سيدى الرئيس...الرحمة حلوة

سيدى الرئيس 28 عاما و انت تحكمنا

لا احد ينكر انك قدمت كثيرا لمصر

ففى عصرك بنيت مدنا جديدة لم يسكنها احد

و من مكنهم حظهم البائس من ان يسكنوها

فهم يلعنون اليوم الذى دخلوها فيه

بنيت المحور الذى اكتشفوا بعد اعوام قليلة من استخدامه انه به اخطاء خطيرة و لا اعرف ما الانجاز فى بناء كوبرى

او افتتاح مدنا لا يريد احد ان يسكنها؟

اعذرنى فانا لا اكاد اتذكر انجازات اخرى هامة لا عفوا"...لقد نسيت قنوات النايل سات التى يتردد فيها اسمك اكثر مما يتردد فى بيتك

و نسيت التعديلات الدستورية التاريخية فبعد سنوات من اعلان تحرير الجنيه فى ظل حكومة عبيد الغراء و دخول مصر فى اتفاقيات تجارية اقليمية و دولية عقيمة تذكرت ان المادة الاولى من الدستور لا تزال تؤكد على الاقتصاد الاشتراكى

عدلت قانون الانتخاب لكنك نسيت تحديد حد اقصى لمدة الرئاسة فى عصرك تراجعت مكانة مصر الاقليمية بشكل غير مسبوق للحد الذى اصبحت فيه دول صغيرة مثل قطر اقدر على حل المشكلات العربية و اصبح اقصى دور تستطيع الدبلوماسية المصرية ان تلعبه هو الشجب و الادانة و التنديد

شجب محرقة غزة ادانة الحرب على لبنان التنديد بحرب العراق

فى عصرك اصبح وجود وزارة مثل وزارة التعليم بلا معنى فى زمن يفشل طلاب الدبلومات التجارية فى كتابة اسمائهم...بل و اسمك ايضا"!

فى عصرك انتشرت العشوائية عشوائية القرارات عشوائية التفكير عشوائية السكن

فى عصرك يوجد 14 مليون مصرى تحت خط الفقر وفقا للاحصائات الرسمية ولا اعرف لماذا اشك فى هذا الرقم مع اننا نملك حكومة الكترونية

فى عصرك زادت المستحيلات فلم تعد ثلاثة كما نعرفها فاصبح البحث عن علاج ادمى عن مواصلات ادمية عن رغيف عيش بدون مسامير عن نواب يراعون مصالح ناخبيهم و دوائرهم و من قبلهم الله عن وزراء يخفقون و يعترفون باخفاقهم عن مسئولين يتركون مناصبهم طواعية كلهم اصبحوا من المستحيلات

سيدى الرئيس اذا كان رب البيت بالدف ضاربا فشيمة اهل البيت كلهم الرقص فكيف تنتظر من الناس ان يراعوا ضمائرهم و ان يكونوا صادقين فى الوقت الذى استهنت فيه بعقولهم فلم تنفذ وعدا واحدا من وعودك لهم فها انت تجدد العمل بقانون الطوارئ نفسه الذى اعلنت عن الغاؤه فى برنامجك الانتخابى

سيدى الرئيس فى عصرك صدرنا الغاز لاسرائيل هل تعرفها؟ فهى تلك الدولة التى تقع على حدودنا الشرقية الدولة التى وصف جيمى كارتر الرئيس الامريكى السابق وصف ما يحدث بها على انه افظع انتهاك لحقوق الانسان فى العام فها نحن نصدر لها الغاز لتعتمد عليه فى انارة 20% من منازلها

سيدى الرئيس فى عصرك انا لا اشعر بالامان ماذا لو تعدى ضابط مرور على حقى؟ هل تعرف ماذا يفعلوا فى الاقسام؟ هل حكوا لك عما يفعلوه فى مواطنيك؟ هل تعرف انهم يعذبون, يغتصبون, ينتهكون اعراض, و يظلمون هل تعرف انهم ضربوا شيخ معاق فى الدقهلية امام اولاده؟ هل سمعت عن حادثة عماد الكبير؟ هل سمعت عن استعانهم بالبلطجية فى المحلة؟

فى عصرك غرقت العبارة حرق مسرح بنى سويف غرق الالاف من الشباب و هم يحاولون الهرب نعم يا سيدى فهم يريدون الهرب من هنا يريدون الهرب من حكومة اهانتهم و اهانت عقولهم و ادميتهم حكومة قتلت احلامهم قبل ان تولد حكومة قتلت فيهم كل امل فى غد امن

فى عصرك اصبح احمد عز يحكم مصر فهو المحتكر و رئيس لجنة الموازنة و رجل الاعمال و صاحب المصانع و اشك انه الرئيس الفعلى لمجلس الشعب

سيدى الرئيس استحق عصرك لقب"عصر الاضرابات بامتياز"

فالمحامون مضربون

و المدرسون مضربون

العمال مضربون

اساتذة الجامعة مضربون

الاطباء مضربون

الصحفيين مضربون

حتى الشعب يا سيدى قد اعلن اضرابه

فى عصرك لا احد يتكلم

و اذا تكلم فانت لا تسمع

فى عصرك امتلأت المعتقلات بسجناء بلا تهم او ادانة

فى عصرك امتصت الاسعار العلاوات... و البنى ادمين

فى عصرك مات الضمير بالسكتة القلبية

سيدى اريد الاستمرار فى عد انجازاتك و لكن ...ايدى وجعتنى لم يبق الا ان اذكرك بقول الشيخ الشعراوى رحمه الله إذا كنت قدرنا فليوفقك الله .. وإذا كنا قدرك فليعنك الله علينا فانت قدرنا و نحن قدرك و لكن كيف يوفق من لا يسمع الا صوته؟ و كيف يعينك الله و انت فى برجك العاجى محاطا بمن القوا بضمائرهم فى النيل نفسه الذى يموت فيه ابناءك كل يوم و هم يحاولون الهرب؟

سيدى الرئيس...الرحمة حلوة

*****

فى 07-06-2008

طلبت منك ترحمنا ليرحمك الله

اليوم 27-01-2011

بعد ثلاث ايام من تعبير شعبك الحبيب عن حبه الجارف لك

بقولك..ارحل عنا يمكن يرحمك الله!

من هنا و هناك..

(1) سخافة..

انت تطلق نكتة فهذا يعنى انك مرح ان تطلق نكتة فلا يضحك عليها احد..فهذا يعنى انك دمك تقيل ان تطلق نكتة و تضحك عليها وحدك..فهذا ما لم اجد له اسما بعد

(2) عن الفشل..

بالنسبة لان كل واحد فاشل فى حياته بيرمى فشله على انه عايز يغير و مش عارف و لما تقوله تعالى يا حبيبى غير اللى مش عاجبك يقولك كيف تتنصل لاصلك ايها الجاهل الزنديق.. "من فات قديمه تاه" كان مثل خالتى نوسة المفضل.. و كله الا زعل خالتو!

I came to Wellesley

because I wanted to make a difference

But to change for others is to lie to yourself Katherine Watson- Monalisa Smile

(3)

سخرية قدر..

هو المفروض الواحد يعمل ايه لما يلاقى ناس بتتكلم عن بيتهم اللى اتكلف كام مليون و قضية ديونهم فى كل الجرايد الحكومية منها و المعارضة؟ و لما يعرف عن قوادة بتجيب تاشيرات حج قبل الحج ب20 يوم بس ولما يسمع حوار من نوعية

"المناقصة بتاعتك بكرة يعنى تبقى هنا بكرة بالليل" الغريبة ان الكلام دا من واحدة لجوزها..

و الاغرب انه كان "هنا" قبل المعاد!

(4) مفارقة..

ما بين استقالة الخضيرى و استبعاد حسنى زى اللى بين صوت فيروز فى زهرة المدائن و اداء بعرور فى تحفته الخالدة العنب

(5) لغز ميكى..

حاجتين ما بفهمهمش.. نظرية النسبية لاينيشتاين و تعلق نسبة كبيرة من الرجال الشرقيين العاقلين البالغين الراشدين بامهاتهم لدرجة المرض! حد عنده تفسير علمى؟

(6) حرب طواحين الهوا..

واحدة كل ما يواجهها مطب من مطبات الحياة اللذيذة تغمض عينيها و تسد ودانها و تعمل نفسها مش شايفاه فى برود يدرس فى كليات كاريير و ميراكو والتانية ماشية بعلبة مسكنات عشان تعرف تقف لوحدها قدام مطباتها الاولانية عاشت لحد ما شافت حفيد حفيدها الصغير و التانية ماتت و هى بتحاول تنقذ ابن بنت خال سلفة مرات اخو جارتها من الوقوع من البلكونة مع انه اساسا ما كانش ناوى ينط! (7)

بقالى يومين بقرا فى قصايد نزار قبانى شدتنى الابيات دى :

ورأينا أمريكا ترتدي معطفَ حاخامٍ يهوديٍّ عتيق وتقودُ المجزرة.. تطلقُ النارَ على أطفالنا دونَ سبب.. وعلى زوجاتنا دونَ سبب وعلى أشجارنا دونَ سبب وعلى أفكارنا دونَ سبب فهل الدستورُ في سيّدة العالم.. بالعبريِّ مكتوبٌ لإذلالِ العرب؟؟ على فكرة القصيدة اسمها قانا.. يعنى اتكتبت سنة 1996 مش اول امبارح!

(8) حكمة اليوم..

ليس كل ما يلمع ذهبا..خالص يعنى

هم اللى قالوا (1)..

قديما قالوا ..

"عندما تستيقظ على واقع احلى من احلامك فاعرف انك تحب"

حديثا سيقولون .. "عندما تستيقظ على واقع احلى من احلامك..فاعرف انك لسه نايم"

*****

Harry: I have never lied to you,

I have always told you some version of the truth

Erica Barry: The truth doesn't have versions, okay

Something's gotta give

*****

"ان الناس لا تبوح باسرارها للاصدقاء..و انما للغرباء"

بهاء طاهر - الحب فى المنفى

*****

من برنامج ابيض و اسود لمصطفى فهمى:

الزوج: " بتضربنى قدام عيالى"

الزوجة: " يستاهل ما هو عامل زى البقدونس بيحشر نفسه فى كل حاجة "!!!

*****

"ان قتل الناس باسم الدين..لا يجعله دينا"

يوسف زيدان..عزازيل

*****

"احيانا يفوق الخوف من تحقق الاحلام الخوف من الا تتحقق"

*****

You were disgusted with the women who were always speaking and looking, and thinking for your approbation alone. I roused, and interested you, because I was so unlike them

Elizabeth-Pride and prejudice

*****

"الشعب المصرى يعيش فى رفاهية تامة"

حمادة عزو الشهير بملك الحديد

*****

بين علمانية متطرفة و تشددية متزمتة

قريت كتاب من فترة للدكتور محمد سعيد العشماوى

كان بيقول فيه ان الصراع بين الاتنين

قائم على استخدام ايتين محددين من القران..كل لهدف فى نفسه

الاولى " وَمَنْ لَمْ يَحْكُمْ بِمَا أَنْزَلَ اللَّهُ فَأُولَٰئِكَ هُمُ الْفَاسِقُونَ"

و التانية "أَطِيعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمْ "

نقطة و من اول السطر:

"كَذَٰلِكَ جَعَلْنَاكُمْ أُمَّةً وَسَطًا لِتَكُونُوا شُهَدَاءَ عَلَى النَّاسِ

وَيَكُونَ الرَّسُولُ عَلَيْكُمْ شَهِيدًا ۗ "

صدق الله العظيم

و اللبيب بالاشارة يفهم!

ادينى عقلك!!!

من شوية شفت جزء من حوار الريس من امريكا و عرفت انه كلم" اليهود" و اقنعهم ان الفلسطينيين مش هيقبلوا ابدا بتاتا فكرة الحل المؤقت افتكرت انهم درسولنا فى الجامعة ان اتفاقية اوسلو كانت بتؤكد على الوصول الى مفاوضات الوضع النهائى على سنة 1995 يعنى كان مكلف نفسه و تاعبها.. و تاكسي رايح و تاكسي راجع عشان يقول البقين الحمضانين دول؟!!! ما علينا.. عرفت كمان خير الله اما اجعله خير عن الست اللى قررت ترمى بنتها و تخطف بنت تانية عشان بنتها وحشة و البنت التانية شعرها اصفر قوم لما اختها سالتها البنت ازاى احلوت كدا قالتلها انها صبغتلها شعرها الانيل بقى انها لما عرفت ان ام شعر اصفر مريضة بالقلب فكرت انها ترميها تانى فى الشارع طيب يعنى هى نفسها فى الحلوة.. كانت تخلى الوحشة و تخطف الحلوة برضه اه و فى كمان واحدة و اخواتها البنات و امهم.. حطوا بطاطين على ابن واحدة من البنات عشان حملت فيه سفاحا.. و سابوه يموت ببطء لحد ما اتخنق..الطفل كان عمره 6 شهور على فكرة و سمعت سمع خير عن البنت اللى عمتها و جوزها و ابنها افقدوها عذريتها فى الشارع عشان اتجرات و رفضت تتجوز ابنهم و عرفت ان البحارة المصريين اللى اخر ما غلبوا حرروا نفسهم و ان وزارة الخارجية لسه مصرة ان "اتصالاتها" هى اللى انقذتهم الا هى تليفونات الخارجية متوصلة بمدافع رشاشة ولا بمسدسات مية و انا مش عارفة؟ ولا هم كانوا بيتصلوا بيهم بالساتلايت النووى المصرى مثلا؟ علما بان اهالى البحارة قالوا ان المسؤولين فى الوزارة اكدوا انهم مش هيعرفوا يعملولهم حاجة و قالولهم لما تبقى معاكم فلوس الفدية ابقوا ادوهالنا و احنا نوصلها للقراصنة!!!!! و قريت عن اللى قتل مراته و بنته و ابنه و انتحر عشان خايف عليهم من الفقر قديم اوى الكلام بتاع ازاى يهونوا عليه و كدا هو القتل بقى سهل اوى كدا؟ هى الناس جرالها ايه؟ انا اعرف واحدة صحفية بتعمل دراسات فى الطب النفسي هى بتقول ان النوعية دى من الناس بتبقى عندها رغبة قوية فى القتل لمجرد القتل بس لما كل الناس دى عندها رغبة فى القتل..هيفضل مين عشان يتقتل؟!!

اه صح انا نسيت مقالة بلال فضل اللى حكى فيها عن مهازل الحزب الوطنى فى لقاء جيمى بشباب مصر الواعد

و كلاكيت تانى مرة.. يا خسارة ال3 ساعات اللى ضيعتهم من عمرى على محاضراتك يا محمد يا كمال!!! و فى كمان ظابط مصرى اتضرب رصاصة فى صدره على الحدود فى سينا.. بقيت الجملة هتبقى مفاجاة غير متوقعة بالمرة اصل اللى ضربوه دورية اسرائيلية برضه! و من اطرف التعليقات اللى قريتها على الخبر ان اسرائيل تشدد لهجتها الموجهة لمصر لاسترداد الصراصة من صدر الجدنى لانها عهدة!!!! و اكتشفت انى كان عندى حق فى خناقاتى المستمرة مع ماما على قلة اكل الفاكهة و الخضار اتارينى كان قلبى حاسس ان ضغطى هيبقى عالى فى يوم و ان ضغط عالى مع فواكه و خضروات بمية الصرف الصحى المملحة ممكن يوصلوا لانسداد فى شرايين القلب و انا كله عندى كوم و شرايينى دى كوم تانى خالص و على فكرة انا مش واخدة موقف من مية الصرف الصحى عشان اكيد فيها فيتامينات كل الحكاية ان صحتى ما بتجيش على الاملاح سمعت كمان كام رقم اثروا فى نفسيتى بصراحة اولهم ال60 انجاز فى 60 شهر بتوع الحكومة الالكترونية و ان 30% من الشباب اللى بين 25 و 35 سنة اميين لا مش اميين يعنى ما بيعرفوش يدخلوا على كومبيوتر و يتعاملوا فى التكنولوجيا اصل احنا تعريف الامية عندنا لسه مرتبط بمعرفة القراية و الكتابة و فك الحروف حاجة كمان.. انهاردة وقفنى عسكرى عشان ما كنتش رابطة الحزام و لما رحت اكلم الظابط لقيته موقف راجلين كبار و بيهددهم بالحبس و واحد تالت قاله انه عايز يدفع الغرامة عشان يمشى و بعد ما سيبوله ركبه فى حوار ممل بينهم عن مكتبهم اللى مافيهوش مروحة و عن حاجتهم الملحة لسخان مية او براد مش فاكرة بصراحة.. واحد منهم قاله ادفع المصالحة يا... فى النقطة اللى بعدنا و ارجعلى تانى يا.... عشان احبس ...

السؤال اللى بيطرح نفسه بشدة..هو انا ايه اللى رجعنى لقراية الجرايد؟!

خطرفات جرنالية..

فى تصريح لدكتورة منى عمر نائبة وزير الخارجية لشئون القرن الافريقى بخصوص البحارة المصريين المختطفين فى الصومال قالت انه من المستحيل على الوزارة دفع الفدية حيث انه مفيش فى الميزانية بند مخصص لدفع الفدية عن المخطوفين!!! لانه حتى ورق التواليت بتتقدم بيه فواتير لما عرفت ان المقارنة دلوقتى بقت بين المواطن المصرى و ورق التواليت اتاكدت انه فعلا فى" قرن"..بس هو مش افريقى

***** اخر نكت ابو الغيط "وزارة الخارجية تدين باقوى لهجة ممكنة حادث مروة الشربينى" تقريبا الوزير عنده قريب بيبيع دوا ضغط و كلفه انه يجيبله زباين عشان الناس تعرف مدى العدل اللى حكومتنا فيه.. غزة عندنا زى القاهرة بالظبط..اللهجة القوية دايما موجودة عشان تدافع عنهم طيب غير شوية!

*****

وزارة الخارجية الايرانية تستدعى السفيرين الالمانى و الايطالى بطهران لادانة حادث مقتل مروة الشربينى مش دا اللى بيسموه صيد فى المية العكرة؟!

***** فى تصريح كوميدى جديد لنظيف بيوعد الشباب ب52 مشروع استثمارى عملاق هيطلعوا عليهم على حين غرة بعد انتهاء الازمة الاقتصادية و ما قالهمش هم كانوا فين قبل الازمة ولا هيطلعوا ازاى بعدها! وبيدعو فيه الشباب للاسراع ب"عجلة التنمية" و ما قالهمش ازاى حد ايا كان يسرع بعجلة مش منفوخة اساسا

*****

ابرك حاجة اتقالت عن الاشاعة المغرضة بتاعت تنحى مبارك و توريث جمال كاريكاتير اتنشر فى المصرى اليوم لاب بيدى ابنه جلابية مقطعة..عشان يكمل عليها!

***** حد يشرحلى الخيبة القوية الجديدة بتاعت الكوتة المخصصة للمراة فى مجلس الشعب

قالوا ان الهدف منها هو المساهمة فى "تمكين" المراة

بس ما شرحوش هم هيمكنوها من ايه بالظبط؟!

*****

فى دعوة جديدة من نوعها على الفيس بوك جروب جديد باسم "سيبها تعنس" بيدعو لمقاطعة الجواز فى شهر مارس كاعلان عن الغضب من تكاليف الجواز و الطلبات المبالغ فيها لاهل العروسة رد فعل منطقى جدا لمجتمع اتقلبت معاييره بيقيس الرجولة بقدرة الراجل على شرب بيريل و حجم جيب بنطلونه! *****

نقطة و من اول السطر.. عند مولدنا..نحتاج الاخرين حتى نستطيع ان نعيش و فى نهاية حياتنا نحتاج الاخرين حتى نستطيع ان نتعايش و لكن السر هو:اننا فى الفترة بين الميلاد و الموت..نحتاجهم ايضا Tuesdays with Morrie

شخبطة (2)

حدث بالفعل..

- مستغربة انى بتوه الموضوع؟ - جدا بصراحة - ما اتعودتش ابهدل بنات الناس معايا - ماحدش قالك بهدلها..بس على الاقل اديها حق الاختيار - كرامتى اولا - هى كمان بتحبك..و انت عارف انها محتاجة حد ياخد باله منها - اديكى قلتى ياخد باله منها..مش يعذبها معاه - و بعدين؟ - انا معجب بيها جدا..بس انا ما معيش فلوس احب

*****

نقط نور.. فى ناس وجودهم فى حياتنا بيديها معنى اكبر بكتير من اللى تستاهله مش شرط نكون بنشوفهم كل يوم و مش شرط يكونوا من ثوابت يومنا ولا شرط يكونوا اهل او حتى صحاب قريبين كفاية ان ظهورهم بيكون دايما فى الوقت الصح سلمى..لو جيتى هنا فى يوم..اعرفى انك من اهم الناس دول

*****

حشرية.. - مسكينة.. مضللة و مش عارفة ايه مستنيكى اللى زيك هيعيشوا فاكرين نفسهم ضامنين الجنة

و هم مصيرهم جهنم و بئس المصير - مسكين.. مغيب و هتفضل طول عمرك شايف الدنيا من خرم ابرة.. اللى زيك عمرهم ما بيعرفوا من الدين غير جلد الذات

و الرضا عمره ما بيدخل قلوبهم

*****

مبررات..مبررات..مبررات عندما تركها تسافر بدعوى كونه "متحضر" عرفت وقتها فقط

ان ما اعتبرته هى "اغلى من حياتها"كان بالنسبة له مجرد "نزوة"

*****

اكتشاف لو كل راجل سمع اللى مراته بتقوله عليه

فى قعدات الستات و محلات الكوافير و الجيم نص ستات مصر مش هيطلع عليهم صبح فى بيت اجوازهم

*****

يا لهوى.. - ازاى مش بتحبى الدستور؟!

كفاية انه الجرنال الحكومى الوحيد اللى مش بيقول غير الحقيقة

*****

فراق فقط لانها عندما تحزن تكون "الست" ملجأها الاخير و عندما يحزن هو تعلو موسيقى بيتهوفن فوق صوت احزانه اخبرها انه "مش هينفع"

*****

امتلاك احيانا يتحول الحب الى رغبة فى السيطرة و كثيرا ما تختلط الصداقة بالغيرة المرضية قديما قالت فيروز "انا عصفورة الساحات" فهى ليست ملكا لاحد..و لن تكون

*****

No comment - مالك؟ - ماليش..عايزة افضل ساكتة شوية - مخنوقة؟ - ايوة - شكلك باين - .... - احكيلى - مش قادرة - خلاص هحكيلك انا.. عارفة ان ... مات و ... دخلت المستشفى و ... بيقولوا انه بيموت و ... عندها ورم و لسه مش عارفين نوعه و ... اتيتم امبارح و عنده امتحان ماجيستير بكره و ... ضيع حياته و شكلنا مش هنتجوز.. خدينى فى حضنك عشان عايزة اعيط اوى و قوليلى بقى اعمل ايه؟

*****

سوء تفاهم عندما بدأ يشك فى قدرته على التعبير ظن انها لا تراه مع انها تراه جدا.. لكنها لا ترى انها تستحقه

*****

اسقاط.. الندل شايف كل الناس اندال و الكذاب بيشك فى كلام كل اللى حواليه و الخاين بيفترض الخيانة فى كل اللى يعرفوه افهم من كدا ايه؟

*****

عندما قالت: "مفيش حاجة اسمها اتخلقت عشانى..عشان انا ما اتخلقتش عشان حد!" فاجاب هو: - لانك لم تكونى ملكى منذ البداية..فانا ابدا لن اخسرك

*****

كلام عجبنى لماذا يختار الرئيس مبارك ان ينشر اولى مقالاته فى صحيفة امريكية و هو لديه صحف "شورى الشريف" التى تعطس اذا اصيب الرئيس بالزكام؟ محمود الكردوسي- المصرى اليوم

*****

ادراك

عندما يؤكدون انهم يتقبلون عيوبك

فتاكد ان اخر همهم هو ان يقبلوك كما انت صدق اللى قال "و من الحب ما قتل"

*****

ورقة ضغط فقط لو عرف كم يضغط عليها برقته معها..

*****

مقولة.. Only dead fish swim with the stream وحدها الاسماك الميتة هى التى تسبح مع التيار

*****

Reconsideration But how will I know who my soul mate is?

By taking risks, By risking failure, disappointment, disillusion, but never ceasing in your search for love. Brida-Paulo Coelho

من قناعاتى الجديدة..

فاقد الشيء دائما ما يعطيه فلا يقدر قيمة الشئ..الا من حرم منه

شخبطة..

استقصاد.. "كشف غموض مقتل فتاة باحد شوارع الدقى" "محاكمة قاتل خطيبته و امها و شقيقتها

و المعروف باسم سفاح بين السرايات بالدقى" "العثور على سامى شهاب قائد خلية حزب الله بشقة بالدقى" "مقتل مديرة الائتمان ببنك مصر فى شقتها بالدقى" ايه يا جدعان هو مفيش غير الدقى ولا ايه؟!!

*****

حالة ملل.. هناء و شيرين صحاب من زمان هناء اكبر من شيرين بسنة..بس بتعتبر نفسها بنت شيرين هناء ما بتعرفش تاخد قرار فى حياتها الا لما بترجع لشيرين هناء لو خرجت تتعشى مع شيرين ما بتعرفش تختار حاجة تاكلها و لو راحت تشترى هدوم بتختار نفس اللى اختارته شيرين و لو اتطلب منها رأى بتستنى لما تسمع رأى شيرين عشان تقول زيه هناء ما تعرفش ان شيرين بقت محتاجة اللى يمشيها.. عقلها محتاج يتشحن تانى عشان يرجع يفكر زى الاول شيرين بتموت فى هناء..بس تعبت..بجد تعبت

***** مثير للشفقة لما تصحى تلاقى نفسك فجاة عارف كل حاجة فى الدنيا و غبائك و ضيق افقك يصورولك انك محتكر الحقيقة و تفتكر ان كونك اتولدت كام سنة قبل اللى حواليك دا مبرر كافى عشان تتمنظر عليهم بكام معلومة حافظهم مش فاهمهم و لما تلاقى قدرات الفتى عندك امتدت من السياسة للدين للكيميا النووية و الفيزياء الحيوية و علوم المجرات فاعرف انك مثير للشفقة

*****

من احلى ما قريت.. وهكذا يهتم الناس بقضية تأجير الأرحام،

أكثر بكثير من اهتمامهم بقضية تدهور التعليم، ويتفرقون شيعاً وقبائل على قانون نقل الأعضاء،

ولا ينفعلون أبداً لحال مستشفياتنا المكدسة بمرضى لا ينقصهم سوى النوم فى توابيت، ولا يتألمون لإنسان يعيش حياته عليلاً أو فاقداً لنعمة كالإبصار. شعب هذه هى قضاياه العظمى، ونخبة هذا هو همها،

فهل يمكن أن يكون هناك مستقبل؟ على السيد-المصرى اليوم

*****

كبسة - عارف ان فساتين الفرح هنا رخيصة اوى - كويس..هاتى معاكى كام واحد و انتى راجعة عشان نبيعهم فى مصر

*****

رسالة.. لكنَّ سماءكَ ممطرةٌ.. وطريقكَ مسدودٌ.. مسدود فحبيبةُ قلبكَ.. يا ولدي نائمةٌ في قصرٍ مرصود والقصرُ كبيرٌ يا ولدي وكلابٌ تحرسُهُ.. وجنود وأميرةُ قلبكَ نائمةٌ.. من يدخُلُ حُجرتها مفقود.. من يطلبُ يَدَها.. من يَدنو من سورِ حديقتها.. مفقود من حاولَ فكَّ ضفائرها.. يا ولدي.. مفقودٌ.. مفقود عندما قررت الا تعطى قلبها الا لمن يصبر حتى تسقط امامه اقنعتها جميعا

*****

لحظات.. ولا يزال البحث جاريا عن مخترع اللون الرمادى و عن سارق فرحتها و عن السبب فى استمرار استيقاظها على حلم السقوط من مكان عالى

***** محاولة فاشلة - فيروز بتقول "غمضت عيونى خوفى لا الناس..يشوفوك مخبى بعيونى" - ايوة و بتقول كمان " و انا بايام الصحو..ما حدا نطرنى"

*****

A Must see "مساكين اهل العشق حتى قبورهم.. عليها تراب الذل بين المقابر" من فيلم ابراهيم الابيض

*****

زمان..و دلوقتى - اتغيرتى اوى..كنتى خوافة اوى زمان - زمان كنت فاكرة ان كل البنات زى اميرات الحواديت و كل الولاد زى الشاطر حسن و كل الافلام مهما طولت الدراما فيها .. بتنتهى بجملة " And they lived happily ever after” كان زمااااان.

***** وقفة.. فى ايام المطر و البرد لما اللى عدى يغطيه الضباب و اللى جاى يحاوطه الشك فتحاول تدور وراك على اى لحظة فرحة مسروقة و تفشل و تمشي قدامك يمكن تلاقى نقطة نور توصلك و تلاقى انه مهما الشمس طلعت الدنيا لسه برد و ان الم عدم قدرتك على التاثير فى حاجات كتير غطى على اى احساس تانى و تشوف الفرق المرعب بين اللى الناس شايفاه فيك و اللى انت شايفه افتكر دى..وبس "وَلَنَبْلُوَنَّكُمْ بِشَيْءٍ مِّنَ الْخَوْفْ وَالْجُوعِ

وَنَقْصٍ مِّنَ الأَمْوَالِ وَالأنفُسِ وَالثَّمَرَاتِ وَبَشِّرِ الصَّابِرِينَ الَّذِينَ إِذَا أَصَابَتْهُم مُّصِيبَةٌ قَالُواْ إِنَّا لِلَّهِ وَإِنَّا إِلَيْهِ رَاجِعُونَ"

*****

مقولة..

Et pourtant, elle tourne

*****

امتنان.. احيانا بيكون الكلام افشل من انه يعبر

عن شكر اكبر من انه يتوصف فى كام كلمة

قالها Josh Groban فى you raise me up

نعمة كبيرة من ربنا وجود ناس من النوعية دى فى حياتى..هنا و هناك بجد و من قلبى..شكرا

خطرفات مسائية..

امبارح لقيت واحدة اعرفها كاتبة على الفيس بوك life is too short for dating ugly boys على ما اظن دا اللى بيسموه التقصير و المجايب من الاخر..

الحمد لله على نعمة العقل

*******

طول عمرى مقتنعة بان مفيش فرحة بتيجى

من غير ما يكون قبلها فترة انتظار لحد ما جملة فى فيلم the lake house خليتنى اعيد نظر كانت حاجة شبه ان اللى بيضيع فرص بايده عشان فرصة معينة فى دماغه ممكن يضيع حياته كلها و هو مستنيها احلى فرحة هى اللى بتيجى على غفلة على فكرة فى اكتر وقت انت مش مستنيها فيه

و مش عارف اصلا ان هى دى اللى هتسعدك فتلاقيها جت و غيرت حاجة جواك من غير ما تعرف جت منين ولا ازاى

دلوقتى بس عرفت معنى جملة فى اغنية لفيروز

جاى عغفلة متل الفرح..

*******

كم رهيب من الاحباط و المحبطين حواليا اكتشفت ان مفيش مخلوق على وجه الارض ممكن يطلعنى من جو الاحباط دا غيرى ممكن اطلع نفسي بحاجات تشغلنى عن التفكير او بلمة ناس و رغى مالوش معنى بهدف تضييع الوقت او بكمية اكل و شوكولاتة مهولة تكفى قرية بحالها او بكلمة صغيرة ابسط من البساطة لكن وقعها على السمع مالوش مثيل فى عالم الكلمات..حلم

*******

بعد ما سبت عالم الدراسة و الكلية و بعد ما دخلت فى عالم ما عنديش فيه اى سيطرة على الناس اللى بتدخل حياتى منه ولا اى تحكم فى نوعية الناس اللى بتعامل معاها لاكتر من 9 ساعات فى اليوم اقدر اقول بكل ثقة ان يوسف بيه وهبى الله يرحمه و يبشبش الطوبة اللى تحت راسه ما كانش دقيق فى وصفه..العالم مش مسرح كبير.. ما العالم الا كباريه كبير .. و فى شارع الهرم و ما زلت منضمة لصفوف القرويين فى المدينة!! *******

بين الصداقة و الحب..شعرة فلماذا يصر البعض على قطعها؟

*******

يوم ما قررت اعمل دراسات عليا فى كلية اعلام

كان رد الفعل امال هتتجوزى امتى و يوم ما اخترت المجال اللى بشتغل فيه

كان السؤال امتى هتختارى العريس اللقطة؟ و يوم ما ابتديت ريجيم

كان الرد كويس عشان الجواز و مستلزماته و اخيرا لما بدات اسال عن الماجيستير

كان الreaction العريس اولا ثم الدراسة خايفة بكرة لما اجى اغير الشامبو اللى بستعمله

الاقى حد بيقولى يا بانتين يا هتعنسي!!

*******

نكتة اليوم رئيس مدغشقر استقال يا ولاد و اتنازل عن المهام الرئاسية لزعيم المعارضة ياما نفسي اشوف اليوم دا هنا مش بتاع الاستقالة بعد الشر.. لكن اليوم اللى يظهر فيه كائن يمشى على رجلتين يصلح انه يطلق عليه زعيم المعارضة المصرية!

عزيزتى حواء..ما تخليهوش يبص بره عشان ما يجيبلكيش ضرة!!!!

و انا بقلب فى جروبات الفيس بوك لقيت جروب اسمه كفاية صحوبية عايزين نتجوز قلت اتفرج على اللى عايزين يتجوزوا دول لقيت موضوع عامله واحد

(هسيب الكلمة المناسبة لتقدير اللى هيقرا) اسمه كونى له اربع حتى لا يتزوج عليكى! بجد يعنى*&%$$#*@@ على اساس ايه مش فاهمة؟!! سيادته بيهدد السنيورة اللى هتتجوزه انها لو ما اتصرفتش فى نفسها و تكاثرت ذاتيا و بقت اربعة المحروس حبيب قلب ماما هيتجوز عليها اللى تحت ده تفاصيل الموضوع: الأولى : الأم انه يحب الام . الام فى حنانها, فى عطائها اللامحدود, عطائها الصامت الذى لا يتبعه من و لا اذى يريد اما فى سعة صدرها معه وفى تسامحها و عفوها ان هو اخطا و فى قبلتها و تشجيعها ان هو اصاب فى تسليتها له و الاخذ بيديه فى الضراء والفرحة و البهجة فى السراء فى سهرها بجواره عند مرضه او اثناء عمله و فى بشاشتها و سعادتها عند حضوره و قلقها و لهفتها عند غيابه انه يريد امه التى فقدها بعد زواجه

و يظل يحن اليها كلما احس بحاجته لها والله هعيط من التاثر..ده ايه الحلاوة دى ولا الرجولة..مش ممكن يخواتى بجد مش فاهمة يعنى لما هو عايز يسيب امه و يتجوز امه برضه كان ساب ماما ليه من الاول؟!!! الثانية : الحبيبة ثم هو يريد الحبيبة العاشقة التى تتفنن فى سرقة قلبه وفى اثارة رجولته يريد امراة لعوب تبهره بقوامها و عطرها كما تبهره بانوثتها و سحرها يريدها ان تذوب بين يديه عشقا و شوقا و هياما انا شلت سطر من فوق عشان ما اتشلش من ناحية و عشان احافظ على نضافة البلوج من ناحية تانية بس كله كوم و لعوب دى كوم تانى!!! ازاى عايزها متربية و بنت ناس و قطة مغمضة و رقيقة و هادية و ما بتفهمش غير اللى هو عايزها تفهمه و لعوب فى نفس ذات الوقت؟ اسكت يا لسانى بجد الثالثة : الصديقة ثم هو يريد الصديقة التى يبث اليها همومه و يستشيرها فى اموره يريد صديقة تحفظ سره و تستر عيبه لا زوجة تفشى سره و تفضح عيبه بين جاراتها و صديقاتها و اهلها يريد عقلك و حكمتك و مشورتك لا لسانك و ثرثرتك فيما لا يهمه يريد ان يتكلم فتحسنى الاستماع لا ان تتكلمى فتكثرى الشكوى من اعباء المنزل و مشاكل الاولاد فيلجا الى الصمت المنزلى او الى ترك البيت و قضاء معظم الوقت مع اصدقائه الذين يفهموه و يسمعوه يعنى هو يتكلم و انتى اسمعى لحد ما يجيلك طرش لكن انتى تتكلمى و لا تشتكى تبقى تستاهلى انه يتجوز عليكى مش كان يتجوز واحدة خرسا افضل برضه!!!! انما مسؤولية و اولاد و مشاكل و مصروف البيت..مش قصته و نعم الرجولة والله الظاهر حد ضحك عليه و فهمه ان الجواز ده رحلة لدريم لاند ولا كوكى بارك بس جامدة يبث دى..مثقف اوى بسلامته الرابعة : الخادمة ثم هو يريد الخادمة- نعم خادمة - يريدك ان تعدى له الطعام بيديك حتى و ان كان لديك خادمة يريدك ان ترتبى اغراضه بنفسك يريد ان يرى لمساتك انت فى اركان البيت يريدك ان تعتنى بملابسه و مظهره و مظهرك و مظهر اولاده يا نهار اسود و منيل!!!!! خدامة..لا و واضحة و صريحة و متكررة مرتين و بالنحوى!!! و على الراغبات فى الفوز بقلب المحروس التمتع بالصفات التالية - الا يقل سن المتقدمة عن السبعين

عشان تكون ام متودكة فى موضوع الامومة ده - ان تكون من نسل القديرة تحية كاريوكا (عشان الشرط الاول بتاع الامومة يتوافق مع الطلب التانى اللى هو اللعوبية) - ان تكون عضوة فى جمعية الصم و البكم عشان تسمع و ما تتكلمش - و اخيرا ان تثبت بالاوراق الرسمية صلة الدم بابلة نظيرة و لو معاها شهادة عليا من معهد التدبير المنزلى هيتعهد المحروس بضمان الاولوية ليها فى طوابير المعاتيه اللى هيستنوا عليه اكتر من 27 ثانية قبل ما يرموه هو و البطيخة و بوكيه الورد و اللى ربته على الانانية دى فى اقرب عبارة طالعة ايطاليا بعيدا عن قضية المراة

و رغى الستات الفاضية بتوع المراة الحديدية

و حقوق الفئة اللى اتفطست لحد ما بقيتش باينة من اول اهل مش هاممهم غير المهر لاب مش شايف فى بنته غير عار عايز يخبيه لاخ بايظ بيمارس على اخته رجولة مش موجودة اساسا لعريس لقطة باعت ماما

تعاين المحروسة اللى هيتجوزها عشان لو محتاجة قطع غيار لواحد تافه مش هامه غير الشعر الاصفر و العينين الملونة لمجتمع عايز غسيل مخ

عشان يعرف يحترم ام و اخت و زوجة و صديقة و ابنة و بما انى زهقت من الكلام فى الموضوع ده و بما انى عارفة و متاكدة ان الاحاديث و الايات اللى بيتحججوا بيها فى اسلوب معاملة المراة لزوجها فى قدامها ايات و احاديث

عن مراعاة المراة و تكريمها و احترامها و احترام ادميتها و بما انى عارفة ان اللى بيفكروا بالاسلوب العقيم ده مش قليليين ابدا و لانى اقتنعت تماما ان فى بنات تستاهل اكتر من كده بغباوتهم و ان اللى مش عارفة تختار صح من الاول يبقى ذنبها على جنبها و بعيدا عن وجهة نظرى الشخصية من التعدد و من المتعددين (اللى هم بيشجعوا تعدد الزوجات يعنى) انا عايزة اسأل سؤال من زاوية تانية خالص ليه الواحد مش بيبص لنفسه قبل مايحط توقعات هلامية من الناس اللى بتشاركه حياته؟ يعنى بسلامته ما قالش هو هيعمل ايه عشان يكون جدير بالخدامة اللى عايز يتجوزها؟ هل هو كمان هيكون ليها اربعة حتى لا تزوغ عينيها؟

ما تخيلش مثلا انه لو كان راجل و فهم معنى الرجولة بجد

كانت هى لوحدها عملت من نفسها 18 عشان تكون جديرة بيه؟ و بعيدا عن انه وزنه وزن تلاتة و انى ما جبتش لينك الجروب هنا خوفا على البنات اللى هيقروا من الفتنة بس و غلاوة ماما عندك اشترى مراية و بص لنفسك قبل ما تدور على الاربعة! اللهم لا تؤاخذنا بما فعل السفهاء منا ملحوظة:الصورة اللى فوق دى مسروقة من هنا

**********

نقطة و من اول السطر

دى صورة صورتها فى اسكندرية من حوالى اسبوعين

ايه دا؟..لا بجد مش فاهمة يعنى

لو واحد نازل من بيته و هو مقرر مقدما انه نازل لهدف ما

و واخد معاه واحدة نازلة من بيتها عشان نفس الهدف ال"ما "دا

و راحوا و اختاروا المكان اللى مش مستخبى نهائى بالمناسبة

زيهم زى كلاب و قطط الشوارع

هل اتنين بالتفكير و المنطق دول ممكن تأثر فيهم جملة

مكتوبة على صخرة فى عرض البحر

هموت و اعرف العبقرى اللى فكر فى الفكرة الجهنمية دى!!!

مش عارفة ليه افتكرت الايميلات بتاعت المعجزات الوهمية

دى بتنسب حاجات لدين قوى من الاساس

و مش محتاج اضافات

من معاتيه رموا عقولهم مع جزمهم على ابواب الجوامع

و دى تصرفات ناس عينوا نفسهم رقباء على خلق الله

و بصولهم من فوق برج عاجى على اساس انهم بيخاطبوا ملايكة مش اشخاص خطائين

و الاتنين نسيوا ان الرقابة لو ما كانتش من جوه البنى ادمين

ولا مليون صخرة و ايميل ما هيعملوا فرق

و الاتنين بيجتمعوا فى ان المخاطِب غبى و المتلقى اغبى!

شماعة التاريخ..

- قديما كانت تجارة الرقيق مصدرا للرزق الان تجارة الاطفال و الاعضاء البشرية اصبحت موضة كاللون الموف فى موسم شتاء 2008 - قديما كان لدينا حزب واحد فعانينا من الشمولية السياسية الان لدينا 24 حزبا..فاصبحا شعبا يعانى من تخمة الاحزاب و الديكتاتورية - قديما حرق قطار الصعيد بسبب الاهمال و الان غرقت العبارة بسبب اخوه الفساد - قديما قتل السياح بسبب الجهل و الان حرق الحسين بسبب استمرار الغباء - قديما كان الاعلام حكوميا و الان اصبح الاعلام مهلبيا - قديما كان اسمها انتفاضة الحرامية و الان نحن فى انتظار ثورة الجياع - قديما كنا نسمع عن مواجهة بين مصر و اسرائيل الان اصبحت المواجهة بين غالى و الملط - قديما سمعنا عن نظريات ماركس و اضراب العمال للحصول على حقوقهم الان انضم للعمال المحامين, المدرسين, دكاترة الجامعات, الصيادلة , المذيعين , المخرجين, و سواقين القطارات و قريبا ينضم اليهم سائقو التكاتك و باعة الجرجير و المناديل الفاين كنوع من انواع تحالف قوى الشعب العامل - قديما كانت المجالس النيابية تدار وفقا لمصالح العائلة المالكة الان اصبح مجلس الشعب يدار بواسطة حديد عز - قديما سمعنا عن زوار الفجر الان اصبح الoffer العادلى..اسحل مواطن و خد التانى هدية

- زمان كان عندنا رية و سكينة.. دلوقتى عندنا سفاح المعادى و التوربينى و قاتل بنى مزار - قديما كان المتهم برئ حتى تقيد القضية ضد مجهول و الان اصبح المتهم ماس كهربائى

حتى ياتى المختل عقليا اللى هيشيل الليلة - قديما كانت المراة اسمها الست امينة و الان اصبحت سينا زى سونيا..

و كله فى الاخر له هدف واحد بس..الفرجة و ختان العقل

صدق من قال ان التاريخ لا يعيد نفسه..فنحن اللذين نعيد التاريخ

*******

نقطة و من اول السطر

- اول مرة اسمع اغنية تخلينى مبتسمة من اولها لاخرها

ده اللى حصلى لما سمعت "ولد رسام" للعسيلى

اخيرا حاجة تخلى الواحد يبتسم فى وسط الاخبار اللى تشل بلد دى

- Seven pounds مستنية اشوف الفيلم ده بفارغ الصبر فكرة ان واحد يظهر فى حياة سبع اشخاص فجأة عشان يغير حياتهم عجبانى اوى شدتنى فكرة ان الواحد يكون له التأثير الجذرى ده فى حياة ناس ما يعرفهوش انك تظهر فى حياة شخص فتغيرها 360 درجة و تختفى تانى.. فيفتكرك هو يمكن اكتر من اللى عشت معاهم عمرك كله يا ريت الواحد يقدر يكون له التاثير ده..حتى لو فى حياة شخص واحد

- بعد انطلاق حملة "من اجل مصر نظيفة" و من بعدها مبادرة "حلم العلم" اتاكدت ان البلد دى لسه فيها ناس عندهم دم و خايفين عليها بجد بس يا رب يكملوا على خير من غير لجنة بتنبثق منها لجنة لتتفرع منها لجنة و فى الاخر نلاقى مشروع فى نجاح مشروع توشكى كده!

مجرد تفاصيل..

بالرغم من انى بطلت استغرب من زمان الا ان حاليا ادق وصف سمعته جملة لصديقة ليا "احنا عاملين زى القروى فى المدينة" اللهم انى لا اسألك رد القضاء و لكنى اسألك اللطف فى دى مش حالة حزن على فكرة..دى حالة اذبهلال عميق

******* Laisse mes talons aiguilles

faire de moi une fille

Sans me regarder comme un objet

Si le vent qui joue dévoile mes genoux

Il n’est jamais question

D'attirer sur moi l'attention

*******

عندما تضحى من اجل من لا يستحق عندما توقف حياتك عند شخص لا يراك من الاساس عندما تفنى عمرك و لا تجنى سوى قلة التقدير.. فلا تلومن الا نفسك! فدور الضحية لا يناسب الا من اختاره لنفسه ******* - زهقت من التفكير..مش عارفة افكر اصلا - ده قرارك لوحدك ما ينفعش حد ياخده بدالك - عايزة حد يفكرلى..فكريلى فقط لو عرفوا مشقة ان تفكر لاثنين! ******* لماذا هذا الخوف الغريب من المسميات؟ فما الصعوبة فى تسمية الاشياء باسمائها بدلا من لا احب الضلمة ولا احب الدكاترة قررت الاعتراف بان " بخاف من الضلمة و بخاف من الدكاترة" فالخوف من اظهار نقاط الضعف ما هو الا ضعفا اكبر

******* كلاكيت تانى مرة مفيش حاجة اسمها نصى التانى فى حاجة اسمها اتنين بنى ادمين "كاملين"

بيقابلوا بعض فبيبقوا اكثر كمالا ازاى واحدة شايفة نفسها كائن ناقص تتوقع ان الطرف التانى يعتبرها كاملة الاهلية؟! قالتلى بحبه و ماعرفش اعيش من غيره قلتلها اسمها بحبه لكن من غيره حياتى مش هتقف! *******

مين قال ان الوحدة مرادفة لقلة الناس؟

فالوحدة هى مساحة بتفضل فاضية

بالرغم من وجود مئات البنى ادمين حواليها

كلهم شايفينها..لكن ماحدش قادر يملاها

******* اشيائى الصغيرة.. - قهوة ساخنة فى الصباح الباكر - صوت فيروز - لفة فوق كوبرى قصر النيل - خبر عن فوز منتخب مصر فى اى حاجة كتصبيرة لحد ما نسمع عن خبر انها رجعت بتاعتنا تانى - مكالمة صباحية بدايتها "صباح الخير..وحشتينى" - دعوة بان "ربنا يسترلك طريقك" - طعم الشوكولاتة و احساس التحرر بعد الرياضة اليومية - لون بحر اسكندرية فى الشتا - حضن و بوسة و لماضة بنوتى الصغننة - لمة البنات و الضحك على اتفه الاسباب - رسالة من صديقة مسافرة تؤكد لى ان البعيد عن العين عمره ما كان بعيد عن القلب - خروجة للسينما و متعة الاستماع لحواديت ناس تانية اللى بتحكيها - افلام جوليا روبرتس و اغانى افلام ديزنى - احساس طفولى بالفرحة لما تظهر نتيجة الريجيم - نظرة لها معنى و ضحك هستيرى على جملة "باينك احلويتى ولا ايه" - مكالمة من بنتى الاكبر منى سنا تخبرنى بان

"انا البكرية و لو اتبنيتى حد تانى

اعتبريه ابن جوزك من مراته الاولانية" - نظرة فخر تختفى خلف قناع من اللامبالاه مش لايق عليه - فيلم عن قصة دافية فى يوم من ايام الشتا - حرية ان تفعل ما تريد فى الوقت الذى تريده - تمشية طويلة تحت المطر - احساس بثقة الاخرين..حتى لو ما كانش متبادل - فرحة انك تفكر فى حد فتلاقى اسمه ظهر على الموبايل - مشاوير يوم السبت - ذكرى قديمة لبنت صغيرة بضفاير و بيت كبير عل النيل فمجرد قدرتى على الاستمتاع بها.. دليل على ان الحياة لا يزال بها ما يستحق التنفس من اجله ******* احتياج.. عندما اقترب من الانهيار بدور فى اوراقى القديمة اقرا اخر سطر.."هتوحشينى يا اجدع الصحبات" و اقرر الصمود لحد ما ترجعى..تعالى بقى ******* علمتنى الدنيا.. ان منتهى الذكاء فى ان تعرف متى تدعى انك غبى ******* مجرد تفاصيل.. - لان الدنيا مطرت يومها..عرفت انها علامة - لان ضحكتك "صفرا بزيادة".. مجرد وجودك فى نفس الغرفة اصبح عبئا لا يحتمل - لانك تسال "ماحدش عايز حاجة؟" بعد ان تدخل نقودك..عرفت انك بخيل - لان رائحة عطرك تسبقك..عرفت انك مغرورة - لانك ناديتينى "حبيبتى" بعد خمس دقائق من لقائنا عرفت انك منافقة - لانك تصل قبلى..و تتذكر نوع الحلوى التى افضلها و تسمع ما لا اقول..و تهتم بكتبى المفضلة عرفت انك اخ لم تلده امى - لان عينيكى لمعت اول ما شفتك..حسيت انى مسؤولة عنك - لانك لا تهتم بالريجيم الا فى نهاية الشهر عرفت ان كرامتك فوق كل الاعتبارات - لان اسمها هو بداية كل جملة تقولها عرفت انك تحبها و لانك ترتدى الدبلة فى اليمين و مع ذلك تسميها "مراتى" عرفت ان الرجولة ما زال فيها امل - لانكم سندتونى دون حتى ان تعرفونى عرفت ان الدنيا لسه بخير - ولانك تعرفين متى تربتين على كتفى و تهمسين "ما تخافيش" عرفت معنى الامان *******

The pursuit of happiness

عندما يأخذ منك الله شيئا كان فى يدك اليوم فتأكد انه لا يعاقبك انه فقط يفتح يديك ليفسح بها مكانا لتتلقى بها شيئا اكبر غدا..

الغاز الحكومة الالكترونية!

احمد ابو الغيط

وزير خارجية بيدين المجزرة الاسرائيلية "باقوى العبارات"

و يوم ما بيتفشخر بانجاز بيتفشخر بقدرته على افشال قمة الدوحة

بعيدا عن كل ده..

ليه يكون عندنا وزير خارجية بينطق ال"ت" "تشى" ؟!

****

فاروق حوستى افتتح معرضه الجديد دى شوية تعليقات من اللى اتقالت فى التليفزيون من "النخبة المثقفة"المصرية - التجريد ده نوع من انواع التجريد الوجدانى - اللى بيشوف لوحات فاروق حسنى بيشعر بحالة وجدانية عميقة - توزيع اللون لو شوفتيه من بعيد هتعرفى درجات الالوان و الوضوح - المرة دى فى حالة جديدة.. كنت فاكر ان المعرض اللى فات كان اكتر حاجة ممكن الواحد يوصلها بس لما الواحد يشوف اللوحات دى بيفاجأ ان ممكن يكون في الاكتر و يقول الله!! دورت على النت عشان اشوف الفن الراقى ده لقيت دول

تجريدى تجريدى يعنى!!

****

احمد عز من الناس اللى عملالى كلاكيع فى دماغى يعنى تجار الحديد يستوردوا حديد من تركيا عشان يقدروا ينافسوا بالاسعار يقرر الاخ يقدم شكوى ولا استجواب ولا استفسار فى مجلس الشعب عشان يوقفوا استيراد الحديد او على الاقل يزودوا الجمارك عليه عشان ما يضرش بمصالحه ييجى الحديد فعزو بيه يقرر يخفض السعر و نسمع عن خوف و رعب من الخسارة اللى هتحصل للتجار و بالرغم من التعارض الواضح فى المصالح ده لسه قاعد برضه.. و لسه بيعشى النواب عشان يقولوا موافقة..حد يشرحلى ده اسمه ايه ده؟!

**** على المصيلحى و بعد نجاح وزارة التضامن فى استبدال طوابير العيش بطوابير البوتاجاز رفضوا انضمام العالم مصطفى السيد صاحب اعلى وسام امريكى فى العلوم للاعضاء المؤسسين لاحدى الجمعيات العلمية الاهلية السؤال مش على اساس ايه يرفضوا ولا على اساس ايه السيد الوزير يرد على واحدة مش لاقية تاكل بسؤال عن سبب خلفة العيال الكتير السؤال اللى بيطرح نفسه بشدة:مال وزارة التضامن بالابحاث العلمية؟! **** ابراهيم سليمان مش هو فى حد ذاته اللى مش مفهوم بالنسبالى لكن الفكرة نفسها بتاعت المسؤول اللى طول ما هو بيحكم تتفرشله السجادة الحمرا و اول ما بيطلع من منصبه تتفرشله الملايات كانت فين اتهامات الاختلاس و الرشاوى و الاستيلاءات و استغلال النفوذ و هو لسه وزير؟ **** حبيب العادلى بعيدا عن التعذيب و المرمطة و الظلم و الافترا بتاع الظباط عشان تقريبا دى مادة نجاح و سقوط فى كلية الشرطة هموت و اعرف مين فهمهم ان الشوارع مكتوبة باساميهم؟ يعنى لما سكان شارع كامل يصحوا الصبح ما يلاقوش عربياتهم و لما يسألوا يكون الرد ان دى اوامر سيادة الوزير و لما يحبوا يعرفوا اماكن عربياتهم يتقالهم دوروا عليها هى اكيد مش بعيد مفترض يكون رد فعلهم ايه؟! و لما تكون عربيات الامن المركزى مرشقة على طول الشارع خوفا من المظاهرات مع ان حرب غزة خلصت و الناس هنا طيبين مش هيتظاهروا على اى حاجة تانية عشان اساسا الدنيا وردى و مفيش حاجة تستاهل التظاهر لكن اللى بجد مش مستوعباه هو دولة العسكر اللى احنا عايشين فيها حد يجيبلهم نتيجة عشان يعرفوا اننا فى 2009 و لسه اشارات المرور بتمشى بعكسرى نايم بيهز ايده فى كل الاتجاهات بحيث ما حدش يعرف دى اشارة مين و كله فى سبيل تنظيم الاسرة يهون! **** عبد الله كمال حنجرة الحزب الوطنى و صاحب الجرنال الوحيد اللى بيخسر و مصر اصرار غريب انه يصدر برضه كنوع من انواع التغليس على القراء بعد خطبة الريس فى قمة الكويت وصفها باتاريخية كالعادة الحقيقة انى ما شوفتش الخطبة لكن قريت عن اكتر من صحفى و فهمت انها كانت محترمة بعيدا عن كونها تاريخية ولا جغرافية.. لما تكون خطبة عيد الشرطة و عيد العمال و العيد الكبير و عيد الكحك و عيد الام كلهم بيوصفوا ب"شديدى اللهجة" و ال"التاريخية" بديهى ان الناس تفقد احترامها للى بيكتب و للجهة اللى بيمثلها حتى لو كان كلامه فيه جانب كبير من الصحة بيقولوا كتر السلام يقل المعرفة انا بقول ان كتر النفاق يقل الثقة..فهل يتعظون؟! **** و اخيرا.. بقترح انشاء وزارة لل"تنفيس" يمسكها الاخ احمد مكى و مش محتاجة اقول اسباب..السبب واضح اكيد ****

نقطة و من اول السطر.. لما مقابل الفكر و الرأى يكون اهدار دم اعرف اننا قربنا من نهاية العالم ايه الهطل الرسمى ده!!

اخبار..اهرام..جمهورية

ما كنتش ناوية اتكلم فى الموضوع ده تانى

لكن الصورة اللى تحت دى اجبرتنى

يا ريت امير الدولة بتاعت القواعد الامريكية

يكون مبسوط بانجازه العظيم

و التانى بتاع الاسلام هو الحل

و التالت بتاع ندين و نشجب و نرفض باقوى العبارات

و الرابع بتاع سنحارب بالمدنيين و الاطفال

و الخامس بتاع معبر الخيار و الفقوس

و السادس و السابع و التامن اللى ما سمعتش صوتهم لحد دلوقتى

و التاسع بتاع ما دام الحرب مش عندنا يبقى مالناش دعوة بس حاربوا انتوا

و العاشر بتاع مش احنا اللى ضربنا الصاروخين يا بيه

يا ريت يكونوا كلهم فرحانين بالنظام العربى المشرف

بقترح تغيير اسم جامعة الدول العربية

و معاه مجلس الامن بالمرة

لبنسيون شحاتة لصاحبه لا ارى لا اسمع لا اتكلم!

صغيرة و ما بتعرف بلعب الكبار

كانت عم تلعب اخدها النسر و طار

بحرب الكبار شو ذنب الطفولة

بحرب الكبار شو ذنب الضحكات الخجولة

قوليلي... قوليلي.. قوليلي ..

يا صغيرة وين رحتي ..

يا نبته نحيلة .. يا دمعة دخيلي..

قوليلي ياريت فيه صرخ بوجه الكبار ..

اقولهم حاجي يلعبو فينا ..

احرار بدنا نضلنا احرار

"صغيرة و ما بتعرف-فيروز"

******

وبالمناسبة فى صباح اليوم العشرين للقذف،

وصل عدد الضحايا إلى ١٠٣٤ شهيداً،

تذكرت على الفور أن الرقم نفسه

يحمل ضحايا حادث العبارة المنكوبة «السلام ١٠٣٤»..

تخيلوا أن إسرائيل بكل جبروتها

وأسلحتها البرية والبحرية والجوية لمدة ٢٠ يوماً قتلت ١٠٣٤ فلسطينياً، بينما راح العدد نفسه من المصريين فى حادث واحد

خلال ساعات وبسلاح واحد هو الفساد،

لكن الغريب أن هناك من يطالب بمحاكمة القادة الإسرائيليين كمجرمى حرب،

بسبب هذه المجازر وإحالتهم إلى «المحكمة الجنائية الدولية»،

بينما تمت إحالة متهمى العبارة إلى «محكمة جنح»،

ولم يعاقب أى مسؤول مصرى أو يحاسب على هذه الجريمة البشعة..

فسااااد يا مصر!

محمود مسلم-المصرى اليوم

******

بعيدا عن اللى لفت نظر الناس كلها

فى الجريمة بتاعت بيع اطفال السفاح لاسر امريكية

بالنسبة لان الولد كان بيتباع ب14 الف جنيه و البنت ب8 هل ده بيرجع مثلا لان الولد اللى لسه مولود اول امبارح عنده اوبشنز مش نازلة للبنت اللى اتولدت معاه؟

رحمتك يا رب من التخلف و المتخلفين!

******

كتاب بجد يستحق القراية!

******

يوم الخميس قضيت يومى بين ذكرى حلوة لمنى بتاعت العربيات فى بين السرايات و يحيى الشاب المصرى النضيف الطيب اللى مهتم يعلمنى تفاصيل شغل مش بتاعى لمجرد انه يساعدنى و رجب السايس بتاع الشغل اللى بيقابلنى كل يوم بابتسامة لطيفة مع ان الساعة بتبقى 8 الصبح و شكل كوبرى قصر النيل الصبح لما الناس بتبقى ناسياه و بتدور على كوبرى اكتوبر و العسكرى اللى بيعدى الاطفال لمدارسهم ورا بيتنا و الام الصغيرة اللى بتوصل بناتها كل يوم لمدرستهم و عينيها واحدة عليهم لحد ما يوصلوا لباب المدرسة و التانية على ابنها اللى قاعد ورا و اللى لسه ما اتعلمش الكلام و مقالة قديمة لمجدى مهنا عن مصر اللى بيتمناها لقيتنى برد على سؤال سألهولى واحد فرنساوى بيشتغل معانا: "هى مصر امتى بتبقى برد؟" قلتله بثقة: "عمرها ما كانت باردة على فكرة"

******

و بما انى مش لاقية حاجة تانية اكتبها فهترجم الكلمتين اللى على الشمال "لا دواء افضل من الامل ولا حافز اعظم منه ولا شيء اكثر قوة من التوقع بان شيئا افضل سيحدث غدا"

مترادفات..

ذكرى نغزة فى قلبى تخبرنى بان هناك شيئ ما غير طبيعى محاولات مستميتة من صديقتى الصغيرة لابعاد هذه الافكار السوداء عن رأسي عودة مبكرة من رحلة شرم الشيخ المدرسية امى تنتظرنى بملابس سوداء و عينان تتحركان فى كل الاتجاهات فى محاولة فاشلة لاخفاء دموع غزيرة نغزة اخرى فى قلبى تخبرنى بالا اصدق سوى احساسي

****

حواديت متعتى فى مراقبة المشاة فى شوارع القاهرة المزدحمة دائما فالكناس ذو البدلة البرتقالية المزعجة و بائعة المناديل على ناصية شارعنا و المجنون الذى يحمل صندوقا ثقيلا فوق ظهره لا يتركه ابدا منذ سكنا فى هذا الحى و العجوز الضعيف الذى كلما رأيته اتأكد باننى قريبا ساعرف خبر موته فيفاجئنى بصمود غريب و تمسك اغرب بالحياة و الفتاة التى تظهر من جسمها اكثر مما تخفى فيخبرنى حدسي بانها "مش ولا بد" فتلتقى عينى بعين صديقتى فنتشارك فى ضحكة طويلة على الحاسة السادسة التى تمتلكها كل انثى كلهم يؤكدون لى بان وراء كل عينان قصة تستحق ان تروى فى فيلم مستقل

**** انكسار

كانت سعيدة..و كان هو اسعد

نظرت الى عينيه مباشرة..

فاقترب استعدادا لكلام كرره بينه و بين نفسه حتى مله

قالت:عندى حاجة اقولهالك

قال:و انا كمان

قالت:انا اتخطبت

قال:و انا (كنت) هخطب

****

موقف كان كبير..و كنت انا صغيرة كان مدرس..و انا كنت تلميذة كان لابس جلابية قديمة..و انا لابسة مريلة جديدة كان بيمشي بعصاية..و انا بمشى على رجلى كان اعمى..و انا كنت بشوف الحمد لله

****

حلم

بحلم بمصر اللى اتغزل فيها جويدة

و ضحوا عشانها بحياتهم فى 73

و حلم ليها جاهين

و غنى لها عبد الحليم

و اتمناها مجدى مهنا

و بكوا عليها فى 67

و اتكلم عنها عادل امام فى يعقوبيان

و طلع منها محفوظ و ام كلثوم و توفيق الحكيم و السادات

و كتب فيها سيد حجاب احلى قصايده

امتى هشوفها كده؟

****

اوراق

تذاكر حفلات الموسيقى العربية

تذكرة طيران للاقصر فى تالتة اعدادى

شهادة تانية ابتدائى بخط مدام حسيبة الله يرحمها

صورة قديمة لينا احنا التلاتة من ايام اعدادى

ايام ما كنا بننكش شعرنا و يجيلنا نفس نتصور

و الادهى اننا كنا بنشوف نفسنا حلوين!

اهداء ليا على اول صفحة من كتاب قديم

اوتوجراف ايام الحادث المؤلم بتاع رابعة ابتدائى

شهادة تقدير من المدرسة

تذكرتين سينما و تذاكر قطر اسكندرية

ورق امتحانات اولى اعدادى اللى بتثبت فشلى الذريع فى الجبر

كارت معايدة او اعتذار..مش فاكرة بالظبط

شهادة البكالوريوس

عقد عمل لمدة سنة

ازاى حياة البنى ادم ممكن تتلخص فى شوية اوراق؟!

****

ناس

لم يكن يعرف طعما للنوم الا و هو فى حالة سكر مستعصية

فاصبح لا يهنأ له بالا الا بعد صلاة العشاء

****

كانت من اشد المدافعين عن حقوق المراة

و الان فقدت روحها فى بيت زوج انانى..مريض

لا يرى فى الكون ما يستحق الاهتمام سواه

****

كان يبكى فوق قبرها اياما متواصلة

دون ان تنجح محاولتهم المستميتة لتهدئته

و بعد اقل من سنتين تزوج من امرأة اجنبية

****

كانت تؤكد انها لن تتزوج الا عن حب

الان مضى على زواجها منه عشرون عاما

امضت نصفهم نائمة على اريكة صغيرة فى غرفة المعيشة

****

حقيقة The closer you get.. the harder she'll push you away

****

قرار

قررت التوقف عن التذمر

عند سماع صوت المنبه الكريه فى السادسة فجرا

و التفرغ للاستمتاع بهدوء الشوارع

و ندى الصباح

و لسعة برودة الصبحيات فى شهر يناير

حلو نص الكوباية المليان