انظر حولك و ابتسم..فانت فى قاهرة المعز

لن تحتاج اكثر من رحلة قصيرة الى الساحرة فى الشتاء..

الموكوسة فى الصيف "الاسكندرية" ليتضح الفرق المهول بين مدينتين تندرجان تحت اسم بلد واحد فرق شاسع ادركت متاخرة انه كان غايب عنى تماما..

و يا ريتنى ما عرفت شوارع نظيفة..ناس نظيفة..اسعار معقولة..مواصلات سهلة فى مقابل شوارع قذرة..

زحمة لا تطاق..

دوشة لا تنتهى..

مواصلات لا تفضى (عكس الزحمة يعنى) فى مقابل رحلة اليوم الواحد الى العاصمة

التى تم اختزال بلد باكمله فيها فاصبح اسمها مصر و اصبحت الفشخرة بالانتماء اليها سمة من سمات اهلها تقولش عايشين فى فيينا مثلا تبدأ الرحلة بالوصول لسوق التلات..عفوا محطة مصر زحمة لا تحتمل..قذارة غريبة الشكل و المنظر.. عدد مهول من التايهين و الباحثين عن الارصفة و القطارات باعة جائلين بيبيعوا كل حاجة..من الابرة للصاروخ على اليمين سواقين تاكسى بيطاردوا اللى خارج و على الشمال اكشاك بيع الجرايد و المجلات و اعضاء الهيئة العليا للسوق السودا بيجروا ورا اللى داخل و اللى ما يعرفش السوق السودا.. فدول ناس ممكن تبعلك تذكرة القطر اللى هيتحرك بعد عشر دقايق

مع فرق "بسيط"جدا فى التمن و بيوصلوا لدرجة من الحرفنة

انهم ممكن يبيعولك تذكرة القطر اللى قام من ربع ساعة ولا تنسى اننا احنا اللى دهنا الهوا دوكو! لو معاك عربية يبقى ربنا بيحبك..

هتدفع 20 جنيه بس مقابل الركنة فى شارع الحكومة لو ما معاكش يبقى هتركب تاكسي يعنى هتركب تاكسي.. و برضه فرق السعر بسيط جدا

بين التاكسى اللى هتاخده من المحطة نفسها و التاكسى اللى هتاخده من على بعد 10 خطوات..من الشارع الرئيسي بس هم مش هيسيبوك توصل للشارع اساسا بعد ما تدفع العشرة جنيه المتينة.. و دى تعريفة ثابتة

سواء رحت المهندسين او نزلت على باب المحطة بعد حوالى ساعة و نص او ساعتين هتوصل مشوارك..

احنا ما نعرفش الزحمة هنا..نهائى هتشم الهوا النقى..النضيف..اللى بيدخل القلب ده على طول مع موسيقى تصويرية هادية فى الخلفية مكونة من اصوات العربيات و الميكروباصات

و الملاكى و اوتوبيسات الحكومة..و التكاتك و اللى مش عارف التوك توك فهو مكنة شبه الجرار بتاع الفلاح مع فرق بسيط و هو ان الجرار اأمن بمراحل الحكومة منعاه فى معظم شوارع القاهرة.. و عشان احنا هنا بنحترم الحكومة جدا

فالناس بتستورده من الهند و انت نازل من التاكسى

خلى بالك انك ما تنزلش عند ناصية شارع اصل النواصى كلها بقت مواقف اوتوبيسات و ميكروباصات و ما تنزلش عند مطالع الكبارى عشان نفس السبب و ما تنزلش فى نص الشارع

عشان اى ميكروباص بيلاقى مواطن واقف هيقف هو كمان مش عشان يخطفه لكن عشان يوصله..

اصل احنا هنا بنحب نخدم بعض اوى و لو لقيت ناس كتير متجمعين فى اى شارع رئيسى ما تخافش..

دول كمان مستنيين الاوتوبيس و ما تسألش عرفوا منين انه هيقف هنا

بما انه مافيش اى اشارة بتقول ان ده موقف عشان انا شخصيا ما عنديش اى فكرة.. المهم..نقى شارع جانبى و انزل عنده عشان صحتك تهمنا بس خلى بالك من العجل و انت نازل

عشان اللى بيسوق عجل هنا مش بيبص قدامه و ابقى بص يمينك و شمالك

عشان اللى راكبين موتوسيكلات مش بيركزوا مع المشاة امثالك و من موقعى هذا

باعلن عن جايزة قدرها ربع جنيه مخروم للى يدلنى على الرصيف لا مش الرصيف اللى بيبيعوا عليه شرابات ال3 بعشرة جنيه ولا قمصان نوم و بلاوى زرقا لستات ما عندهمش ريحة الحياء بتكلم عن الرصيف

اللى كان زمان مخصص للناس اللى عايزة تمشى فى الشوارع و مالهاش نفس تتخبط ولا تتداس و لا تموت تحت عجل اوتوبيس

بسواق سكران كاتب من ورا الكبير كبير كنوع من انواع التهديد لو كان لسه فيك نفس بعد الرحلة العظيمة دى و قررت تاخد لفة فى الشوارع فلازم تاخد معاك شوية ادوات اساسية لو كنت مريض باى مرض صدرى..

هتحتاج كمامة و لو بخاخة يكون افضل و لو كنت مريض ضغط..

هتحتاج دوا اكيد خصوصا لو نزلت فى "اوقات الذروة" اللى هى بين الساعة 9 الصبح و الساعة 12 بالليل و لو كنت طالع كوبرى اكتوبر هتحتاج ب50 جنيه لب و سودانى كنوع من انواع التسالى لانك مش هتنزل من عليه قبل ساعتين و لو كنتى بنت فهتحتاجى self defense

مش عشان فى تحرش ولا حاجة

بالعكس الرجولة هنا واخدة حدها معانا اوى خصوصا اليومين دول لكن عشان لو زهقتى ترشيه على نفسك كنوع من انواع الترطيب

و كل منطقة ليها احطياطاتها يعنى لو نازل وسط البلد خلى بالك من الحفر اللى فى الشارع و من النصابين بتوع كروت الركنة و لو رايح الدقى خلى بالك من عربيات الامن المركزى و لو لقيت ناس كتير متجمعين ما تخافش دول صحاب مرتضى منصور..هتلاقيهم كل يوم عند مجلس الدولة و لو نازل عند جامعة القاهرة..خلى بالك من الاخوان و مظاهراتهم بيبقوا 30 واحد بيتظاهروا و حواليهم 300 عسكرى..

اصل احنا نحب اللمة هنا اوى لو رحت جامعة الدول بقى.. ركز و انت بتعدى عشان مراجيح مولد النبى شغالة هناك الله ينور سواقين العربيات مش بيبصوا قدامهم اساسا..

و لو بصوا و لقوك هيكسلوا يحودوا لو رايح رمسيس خلى بالك من نقابة الصحفيين.. و لو طالع مدينة نصر او مصر الجديدة اياك ثم اياك تفكر فى كوبرى اكتوبر..

خصوصا لو فى موكب معدى و بلاش نفق الازهر عشان لوزحمة هتاخدلك ساعتين فى المشوار و خصوصا لو كنت من اللى بيتخنقوا فى الاماكن المغلقة زى حالاتى من الاخر كده فاضل المهندسين و الزمالك و المهندسين زحمة على طول فمعندكش حل غير الزمالك و عشان تروح الزمالك لازم تكون عضو فى نادى الجزيرة او نازل ب100 جنيه فى جيبك عشان تعرف تقعد فى اى كافيه هناك انت لسه هنا بعد ده كله؟؟..

بتوع السوق السودا مستنيينك و التذاكر عند بتاع الجرايد و كلمة السر عايز التذكرة بتاعت حسين..على فكرة ده بجد و لو اتلخبطت فده مش ذنبى كقاهرية بتموت فى البلد دى

و صعبان عليها اللى الجهلة الهمجيين بيعملوه فيها دى شوية نصايح على الماشى لوجه الله و بعدين دى غلطتك من الاول..حد قالك تيجى القاهرة؟؟

السؤال بقى اللى بيطرح نفسه امتى هنشوفها كده؟ جوه الموضوع: *الحقيقة فكرة البوست ده جاتلى

فى مشوارى اليومى من الدقى لمدينة نصر و فى وسط التفكير العميق فاللى هكتبه هنا فوجئت بصديقتى العزيزة بتفتح باب العربية

عشان ترمى علبة الاكل فى الشارع و نرجع نقول الحكومة محتاجة تنضف..مش لما ننضف احنا الاول بفكر فى حملة اسمها"ارجوك لا ترمى الزبالة فى الشارع" تفتكروا لو قلت كده للناس هيقولوا عليا مجنونة؟

و عشان ما ابقاش من اللى بيدافعوا عن القيثارة دون ان يعزفوا

على راى جمال الشاعر فرجاء شخصى من اللى هيقرا البوست ده.. اعصروا على نفسكم لمونة و ما ترموش الزبالة فى الشارع يعنى لو قلتها على طريقة النصايح

اللى كانت فى اخر صفحة فى كراريس زمان يبقى ارجوكم لما تلاقوا فى ايديكم ورقة

استنوا لما تلاقوا سبت و ارموها فيه و لو سايقين هاتوا سبت صغير للعربية و لو مش عايزين تكلفوا نفسكم ممكن كيس و لما تروحوا ابقوا ارموه و لم الورق قبل الاكل و بعده..

مش عيب صدقونى النظافة من الايمان على فكرة مش هنبقى احنا و الزمن و الموكوسين اللى ماسكينها عليها بلدنا حلوة بجد و مش ذنبها اننا ما اتعلمناش نحترمها ولا نحترم نفسنا ولا الناس مش بتتلم غير لما يحطوا فواتير الزبالة على الكهربا؟!! *انهاردة الصبح كنت فى spinney’s و حظى الحلو

وقعنى فى واحدة من اللى بيمشوا يرطنوا انجليزى كان ما حدش يعرف لغات فى الدنيا غيرهم و الغريب ان اللى بيكلموهم بيبقوا مصريين برضه..خير بقى!! المهم..الست فضلت تشتم فى البلد و فى اللى فيها بشتايم تمنعها الرقابة..بالانجليزى برضه ابسط واحدة فيهم كانت ان البلد قذرة قلت تبقى متضايقة من التلوث و سلبية الناس زى حالاتى طلعت كل الشتايم دى عشان لفت على السوبر ماركتات الكبيرة كلها و ما لاقيتش dried beef صحيح والله..فى بلد محترمة ما يبقاش فيها dried beef؟ صدق اللى قال اصحاب العقول فى راحة!

*انهاردة الضهر بقى عملت حادثة

اوتوبيس صغنن من بتوع الحكومة

قرر يعدى الشارع بالعرض

مش المشكلة فى انه خبط عربيتى

المشكلة فى انه مشى عادى جدا

و كان ناقص يلومنى انى مش مبسوطة انه تفضل مشكورا و خبطنى

و اللى فارسنى ان كل اللى حكيتلهم و قالولى معلش انتى فى مصر

اتعصبت عليهم هم عشان بيقولوا كده

هى البلد دى عملت فينا ايه عشان نحبها كده؟ -------------------------------------- بره الموضوع فى ناس اتهبلت ده اكيد بس انا ملاحظة ان الهبل زاد عن حده اوى للدرجة دى الخوض فى اعراض الناس بقى سهل؟ بنتين بين ايدين اللى خلقهم و هو اولى بحسابهم من بشر انعدمت الرحمة من قلوبهم و بقوا لما يصدقوا اى فضيحة يقفوا يصقفوا زى خيبيتهم بغض النظر عن مشاعر ام فقدت اغلى ما فى حياتها

او اب حياته انتهت بموت بنته و كله يهون فى سبيل فرقعة صحفية لشوية قراء تافهين ما وراهمش غير النميمة و التشهير بسمعة الناس رسالة صغيرة لدعاة الفضيلة

و حملة صكوك الغفران

و مدعين التدين الفاكسين بيصلوا او لأ..اتحجبوا ولا قلعوا الحجاب..حاجة ما تخصش حد ارحموا من فى الارض يرحمكم من فى السماء..

ما حدش عارف دوره جاى امتى!