23 يوليو 1952 ثورة..انقلاب عسكرى..تعددت التسميات و النتيجة واحدة
مع او ضد..مش فارقة
المهم انه من اهم التواريخ المصرية فى القرن العشرين
اذا ما كانش الاهم على الاطلاق..
5 يونيو 1967
كابوس فى ذهن كل مصرى
خديعة عدو ولا خداع حكومة؟
28 سبتمبر 1970 رحيل قائد..انهيار شعب
اكتوبر 1970
السادات يحلف اليمين
6 اكتوبر 1973 يوم الكرامة
14 اكتوبر 1981-...
احتضار وطن
؟؟؟؟ 6 اكتوبر جديد..على ايد سادات جديد يا رب اشوف اليوم ده..
.jfif)
هناك 27 تعليقًا:
بداية حسنى مبارك كانت بتقول أن فى حد جامد جدا جاى يحكم مصر .. أول ما مسك قال ألعبها صح .. أفراج عن كل الصحافيين و الكتاب السياسيين و أستقبلهم فى القصر .. التقرب من البابا شنودة عكس السادات ..
بس فى الأخر .. سنة مع سنة و ناااااااام
انا مستنى حد زى السادات .. بس مش عايزه يكون من سلالة السادات ..
انا بقيت بحلم بأوباما مصرى مش سادات تانى بس ..
مش عارف خايف يكون حلم و خلاص
يارب يا كباري اوباما يمسك علشان تشوف هيعمل ايه مع انى اشك انه هيمسك
ويكون البلوج دا شاهد علينا
قال اوباما قال
ومنه لله ناصر هو واللى معاه هو السبب فى اللى احنا فيه دا
وسبحان الله الراجل كان جانب السادات لازق فيه والسادات يموت والتاني لاء
سبحانك يارب
انا حاسس بجد ان انا ابتديت اكره البلد دي بجد
احنا شعب ترحمي
يعني كل واحد يموت نقول الله يرحمه
بكره حسني يموت ونقول الله يرحم ايامه
زي ما قلنا علي عبد الناصر وقلنا ع السادات وهنقول علي حسني
يابنى انا عارف ان اوباما مش حينصر الأسلام و الكلام دا ..
انا عملت بوست عن كده اول الحملة الانتخابية
الفكرة فى اوباما فكرة حلمه لامريكا .. احنا محتاجين حد يحلم لمصر ..
مش شاغلنى سياسة اوباما الخارجية علشان عارف انها مع الأسلام حتبقى زى بوش .. انا شاغلنى سياسته الداخلية و حلمه لامريكا ..
فهمتى يا بيضة :D
هههههههههههههههههههههههه
اه يا قلبي هموت من الضحك
كان يوم اربع دي جامدة موووووووووووووووووت مش قادرة ابطل ضحك
تعليقا على 23 يوليو وتسميتها ...والله والله والله لولا ان الملك فاروق دا راجل محترم وبيحب مصر بجد كان البلد دي راحت في 600 داهية بسبب الحركة الملعونة بتاعت الانقلاب دي
رحمة الله على كل محترم ..رحمة الله على كل واحد كان بيحب البلد دي
في بوست عندي كتبت
فاروق كان بيحب مصر
ناصر كان عنده ضمير
السادات كان عنده مخ
بالرغم من عيوبهم او مساوئهم كان عندهم حاجة
بالنسبة بقى للي احنا فيه دلوقتي !!!! ايه ؟؟!!! نفسي الاقي حاجة
الاقيهاش عندك يا اوختشي
كوبرى
انا بقى نفسي فى حد يكون زى السادات بالظبط و يا سلام لو شوية كاريزما من بتوع عبد الناصر -كاريزما بس عشان انا مش شايفة فيه اى حاجة تانية احب انها تتكرر-
السادات كانت ليه اخطاء اهمها الاخوان و اعتقالات سبتمبر بس كان راجل عنده رؤية و ذكاء ما حصلش فى اى قائد عربى تانى و لا هيحصل
اوباما انا مش متابعة اوى تصريحاته مهتمة اكتر بالمرشحة لمنصب النائب دعما للحركة النسائية و كده:D
بس كله هيبان لما يمسك دلوقتى مرحلة الشعارات و لم الاصوات ساعة التنفيذ اكيد حاجات كتير هتتغير
يا رب اوعدنا بسادات تانى يخلصنا و بشعب يقدر ده و ما يضيعهوش تانى
ماجا
هتموتونى من الضحك انتوا الاتنين بجد
ناصر كان قائد..و بس عرف ازاى يلم الشعب كله وراه مش بس فى مصر فى الدول العربية كلها
لو حد قدر يعمل كده بس تكون عنده عقلية السادات يبقى اهلا و سهلا
بالنسبة للنقطة التانية فنحن نشكر العناية الالهية اللى حفظته و رعته..مش عايزة اروح فى داهية و انا لسه فى مقتبل العمر
ده من ورا قلبك..انا مصرة على فكرة انك بتحبها اكتر مننا
لسه جايلى ايميل دلوقتى من واحدة من اللى سافروا بره..بتشتم كل حاجة فى باريس حتى الاكل..بلد باردة مافيهاش حياة..ناس مملة بتنام الساعة 7
..صدقنى البلد دى احسن من غيرها
احمد علام
لا احنا شعب عشرى عاملين زى الراجل اللى كل يوم يتجوز واحدة و يفضل يحن للاولانية و يترحم على ايامها مع انها و هى معاه كلن كل يوم يطلع عينها و يشتم فيها و فاللى خلفوها
احنا شعب عايز عمرة
فنونتى
اللى احنا فيه ده وكسة
بس مش هو لوحده اللى مسؤول عنها
انا فاكرة زمان فى المدرسة كتبت موضوع تعبير عنه و عن انجازاته كان فى حاجات كتير اوى تتكتب ساعتها
بس بالذمة لو انتى بتشتغلى فى مكان و مرتبك بيوصلك سواء بتشتغلى او لأ هتعملى حاجة ولا هتنامى على المكتب لحد اول الشهر؟
مش غلطته لوحده غلطة اللى بيتضربوا بالجزم بره و جوه و لسه بياكلوا بطيخ و يناموا
بس تصدقى فعلا انا نفسي الاقى صفة واحدة مميزة..امبارح وانا بتفرج على الخطبة العصماء قلت لو كان في ميزة تتقال يبقى تقل الدم و السماجة
واحد ربنا نزع منه القبول لدرجة انه لو طلع قال صباح الخير هشمئز منه برضه
لما الاقى حل هقولك على طول يا قلبى:D
نسيت اعلق على حاجة
الملك فاروق ما كانش بالصورة اللى وصلتلنا نهائى و اللى عاشوا وقتها قالوا ان عصره كان ارحم بكتير من عصر الوكسة اللى جه وراه
مشكلتنا اننا شعب بتاع كلام بنصدق اللى بيتقال مهما كان مش منطقى و ما دام الحكومة بتقول تبقى هى ادرى على راى سناء يونس فى جواز بقرار جمهورى
حقا , ما كان يتمنى السادات عشر معشار هذا المدح حال حياته..!!
بدون كثير جدال عن السادات وانجازات الرئيس المؤمن رئيس العلم والإيمان ,,
الرجل حسنات أكيده لا ينكرها أحد ,,
ومن ليس له حسنات ,,
الحجاج بن يوسف الثقفى الطاغيه له حسنات ..!!
السادات أفضل رؤساء مصر فى رأيى , وذلك لأن رؤساء مصر أقرب الى ملاك العزب والحارات لا حكام عدل وانصاف ,,
السادات دخل فى حرب اكتوبر , وناصر او مبارك لو كانوا مكانه لفعل مثل ما فعل ,,,
السادات فتح باب التطبيع مع الكيان الصهيونى على مصراعيه ,ولو كان ناصر مكانه ما فعل
أما مبارك فكان هيرشح نفسه لرئاسة اسرائيل ,,!!
السادات ديكتاتور لا يجادل فى ذلك الا جاهل , أرسى نظام الحزب الواحد , وورثه من بعده مبارك وأتباعه ,,
السادات اعتقل فى آخر ايامه كل أحد , الاسلاميين والعلمانيين والنصارى , وكان على وشك إنه يعتقل الحكومه لولا انهم فهموه ان الحكومه معاك يا ريس ..!!
السادات فى آخر عهده الجيش نزل الشوارع , والدبابات كانت فى وسط البلد ,,
السادات من أفضل الرؤساء فى الاحساس بالشعب المصرى ومحاولة حل مشكلاته
ما هو برده كبير العيله كبير البلد (( ابتسامه ))
ولا ايه ياعم الحج ..؟
السلام عليكم
لولا انى عارفة انه من المنوفية و ان انت من المنيا كنت قولت ان بينكم تار بايت :)
يا مصعب انا قلت ان السادات له سقطات كتير اولها تقريبه للاخوان و قلبته عليهم فى اخر حكمه
و اعتقالات سبتمبر دى سقطة تانية كبيرة
و الرئيس المؤمن سقطة تالتة و لقب مستفز جدا
لكن بالنسبالى انا مش بحبه عشان هو احسن الوحش انا معجبة بدماغه لاقصى درجة و شايفة انه صاحب رؤية حقيقية و ذكاء سياسي مش قليل ابدا
انا يا سيدى من الجاهلين اللى بيحبوه و مستنيين واحد تانى زيه :)
بعيدا عن اى حاجة انا بقالى يومين شاكة ان فى حد بيكتب باسمك فى المنتدى و دلوقتى شاكة انه هنا كمان
موتتنى من الضحك حكاية مبارك و رئاسة اسرائيل دى:D
الناس فيما يعشقون مذاهب يا مصعب و انا بحب الراجل ده و مش بحب الاخوان عشان ابقى قولت كل الحاجات اللى هنختلف فيها مرة واحدة و ان شاء الله نتفق فى الباقى :)
بصى انا شايف أنك تعملى لمصعب بلوك أحسن :D
يا عم مصعب براحة علينا يا حجيجة :D
ومين اللى قالك انى مغرم بالاخوان ,,
تعالى شوفى بعمل فيهم ايه هنا فى البلد ,,
بصى يا أختى , انا على فكره الاسره عندنا هنا بيموتوا فى السادات ,,
وانا معنديش مانع احبوا ولا أكرهوا ,,
بس الحب عندى والكره للأشخاص بيبقى مبنى على أفعال اصة لما يبقى رجل صاحب سلطه ,,
هنا الحب لابد وأن يكون مبنى على مستند من الشرع ,,
تقييم أى رئيس فى الدنيا بيبحصل ازاى : -
أولا : هل كان السادات رجلا ديمقراطيا سمح بالحريه فى تكوين الأحزاب وتداول السلطه ..؟
الإجابه : .......
ثانيا : هل قام السادات بالعمل على تطبيق الشريعه _ ولا أقصد بالشريعه مجرد إقامة الحدود _ وإرساء النظام الاسلامى فى الحكم ..؟
الإجابه : ......
ثالثا : هل تم فى عهد السادات إجراء انتخابات حرة ونزيهه شهد بها العالم ..؟
الإجابه : .....
رابعا : هل قام السادات بمحاربة الفساد فى البلاد , وازدهر بالبلاد اقتصاديا واجتماعيا بحيث صرنا من البلاد المتقدمه فى الاقتصاد العالمى ..؟
الإجابه : ......
.........................
دى أربع أسئله انا مش هجاوب عليها , بس لو السادات جاب فيها 3 من 4 انا مستعد أحبه وأتمنى واحد تانى زيه يحكم مصــر ...
لكن لو مش جايب على الاقل 3 من 4 أتمنى واحد تانى زيه ليه ..؟!!
لا طبعا ,,
انا بتمنى انسان يكون مؤمن بحرية الفكر وتداول السلطه حتى لو مش هايطبق الشريعه ,,
لأن المطلوب فى الأول مناخ حرية وعدل , مطلوب ان الانسان لما يتكلم يأمن نفسه وحياته ..
مطلوب رئيس يقوم بميزان العدل الذى هو أساس الملك
مطلوب رئيس يعدل الدستور ويحدد فترة الرئاسه ,,
مطلوب رئيس يؤمن بالانتخابات الحرة النزيهه حتى لو كانت ضده ,,
تضمنولى ان السادات لو حكم مصر تانى هايحقق ده ..؟!!
لو ضمنتولى انا مستعد ادعى كل يوم فى صلاتى ان ربنا يرزقنا بسادات جديد ..
وجزاكم الله خيرا
والله من وراء القصد
السلام عليكم
اه على فكره يا اخت بنت مصريه ,,
متشكيش ولا حاجه
انا مصعب متخافيش (( ابتسامه ))
بس يمكن انا أخدت عليكو شويه فبدأت أتبسط معاكو ,,
ما احنا اخوات ولا ايه (( ابتسامه ))
ربنا يعزك يا اختى ويكرمك
والاختلاف فى الرأى فى نهاية الأمر لا يفسد للود قضيه ,,
بس خلى بالك مش فى كل الحالات
خافى منى فى بعض الحالات (( ابتسامه ))
السلام عليكم
جميل أوى التوبيك
تاريخ مصر فى صورة لقطات وتعليقات
بس على فكرة..اليوم ماكانشى أربع أوى يعنى
الثوب الأسود به نقاط بيضاء كثيرة
دمتى بكل خير..تحياتى
ههههه لا يا كوبرى هو اكيد فى سبب للعداوة دى احنا مش فاهمينه
و الناس فيما يعشقون مذاهب :))
مصعب
هقولك على حاجة..فى مذكراته هو نفسه بيعترف انه فى اجتماع مجلس قيادة الثورة بعد ما الثورة حصلت كانوا 8 اعضاء بيرأسهم عبد الناصر
سبعة وافقوا على نظام ديكتاتورى بينهم السادات و ناصر لوحده اللى كان عايز نظام ديموقراطى
و كان راى السادات ان اللى يتعمل بالديموقراطية فى سنة يتعمل بالديكتاتورية فى شهر
و بصراحة استغربت جدا و افتكرت الاول انى فهمت غلط
لكن هو كعقلية انا بحترمها لابعد الحدود
و اكيد اخوات طبعا..بالعكس انا مبسوطة انك ابتديت تتكلم كده و ضحكت كتير امبارح على ردودك فى المنتدى
ارجوك خليك كده على طول :)
د رامى
اولا اهلا بيك و ميرسى على كلامك
هو كان فيه نقط بيضا كتير بس لما الاسود بيكتر اوى بيخبيها لدرجة انها يا بتتنسي يا ما بتتشافش من الاساس
بصى يا أختى ,,
لا يمكن أبدا إنى أحكم على انسان من مذكراته الشخصيه ,,
هذا تأباه قواعد البحث والانصاف العلمــى ..
ده أولا
ثانيا : ليه مردتيش على أسئلتى ..؟!!
ما انا مش فاهم , أحكم على فترة رئاسيه من أى جانب ..؟!!
كان عقليه ذكيه وخارقه للطبيعه ..
سلمنا ان السادات كان كده , رغم انه مش للدرجه دى
لكن فرضا انه كده
العقليه دى مقدرتش تحقق مناخ ديمقراطى حر ونزيه فى مصر ليه ..؟
مقدرتش ليه تفتح حرية تكوين الأحزاب وتداول السلطه ..؟
مقدرتش ليه تسعى لتطبيق النظام الاسلامى اللى مفروض يحكم أى دوله اسلاميه ..؟
مقدرتش ليه تحدد الفترات الرئاسيه ..؟
مقدرتش ليه تنهض بينا الى مصاف الدول المتقدمه اقتصاديا زى ماليزيا وسنغافوره وتايوان وغيرها من الدول اللى تقدمت حديثا ..؟
انا مش فاهم أقيم رئيس دوله ازاى بس ..؟!!
...............
ومش فاهم بصراحه أنهى عقليه محترمه توافق على نظام ديكتاتورى ,,
والأغرب ان ناصر هو اللى يبقى عاوز نظام ديمقراطى ,,
دى من عجائب القرن العشرين
لان ناصر كان ديكتاتور مشبع بالديكتاتويه (( ابتسامه ))
وعلى العموم تقبلى تحياتى ,,
وأتمنى حد يقدر يجاوب على الاسئله الأربعه اللى حطيتهم سابقا علشان نقدر نقيم بيهم السادات
السلام عليكم
يا مصعب ما ده اللى انا اقصده انى استغربت جدا التناقض ده و بالظبط عشان هى مذكراته استغربت اكتر انه بيقر بكده و شايف ان ده منطقى
و لما اللى ناصر عمله ده بيسموه ديموقراطية الحكم الاستبدادى بيبقى شكله ايه؟
معاك فى حكاية الاحزاب و هو نفسه اقر بيها
و فى تحديد مدة الرئاسة
بالنسبة للديموقراطية فانا مش قادرة احدد الفترة دى الناس كانت عاملة فيها ازاى اللى بسمعه عنها ان بعد الثورة حصل تغير كبير فى المجتمع المصرى و الحماسة خدت الشباب و كل من كان فاهم او مش فاهم انضم لتنظيمات شوية شيوعيين و شوية اسلاميين و شوية مع الاشتراكية و تحالف قوى الشعب العامل
و ده كان واضح اوى انه عمل ازمة فى نظام ناصر و الا ما كناش سمعنا عن الاعتقالات و التعذيب و الاغتصابات و الظلم اللى حصلوا فى عصره
فيمكن اللى بنسميه انهاردة ديكتاتورية يكون وقتها تعقل سياسى بيحمى البلد من فتنة تولع فيها تانى
يمكن لو كان كمل كام سنة كمان كان هيحط اسس لنظام ديموقراطى سليم..اصلى مش متخيلة ديموقراطية مع شعب سلبى جزء كبير منه مش متعلم مكبوت و ساخط على النظام لمجرد انه كان شايف فى عبد الناصر نموذج القائد اللى لازم اى حد ييجى بعده يبتع نفس اسلوبه..ما هى هتبقى قمة الفوضى
السادات سياسي بارع..سمعت خطبته فى الكنيست بعد الحرب؟
كامب ديفيد وقتها كان خطوة عظيمة..فى رأيي انا على الاقل و انا عارفة انك رافض الاتفاقية قلبا و قالبا بس انا شايفاها براعة سياسية و خطوة فى منتهى الذكاء
بلاش الاتفاقية..طرد الخبرا السوفييت فى الوقت اللى دول العالم كله كانت بتسعى لعلاقات مع واحد من القطبين و لما بتصدق تلاقيلها حليف منهم
بالنسبة للاقتصاد فهو عمل كتير كفاية انه كان صاحب رؤية مختلفة تماما عن اللى قبله و سابقة للوقت اللى كان فيه..فى الوقت اللى الدول العربية كلها كانت بتتكلم عن اقتصاد مغلق كان اول من دعى للانفاتح الاقتصادى..يمكن كانت خطوة المفروض تتاجل شوية لان الانفتاح الاقتصادى من غير صناعة وطنية قوية مش
هيجيب النتيجة المطلوبة فكان المفروض يطور سياسة ناصر بتاعت الاحلال محل الواردات الاول لحد ما الاقتصاد يبتدى يحقق معدلات نمو مقبولة قبل ما يحول النظام لعكسه تماما..بس الاتفاقيات التجارية اللى اتعملت فى وقته كانت بتتدرس لنا فى الجامعة على انها خطوات مهمة لنمو اقتصادى مستمر زى اللى كانت مع فرنسا و اسبانيا و القروض اللى اتسمح بيها لمصر و اللى لولا الاستقرار السياسى اللى قدر يعمله ما كان فيه ولا دولة ممكن تجازف بملايين فى شكل قروض
و يا سيدى بلاش ييجى واحد زيه بالظبط..ييجى واحد عنده توجه ليبرالى تعددى و دماغه تكون زى السادات و يكون حكمه حكم اسلامى معتدل..ازاى كل ده مش عارفة بس ربنا كبير :)
أولا : لا يمكن تبرير الديكتاتوريه واحتكار السلطه ,,
مش هانعمل زى نظيف لما قال الشعب المصرى لسه مش مستعد لديمقراطيه حقيقيه ,,
وللعلم الديمقراطيه والحريه السياسيه هى الحل الوحيد والأمثل للكلام اللى بتقوليه بتاع التنظيمات والشيوعيه والاخوان والجماعات وغيرهم
لأن الحركات دى كلها لن توجد أصلا الا فى نظام ديكتاتورى يقمع الحريه ,,
يبقى خلينا نتفق ان الديكتاتوريه واحتكار السلطه لا يمكن تبريره ,,
ثانيا : نظام الانفتاح الاقتصادى والرأسماليه اللى كل واحد بيقول السادات كان سابق عصره لما فكر فيه , والكلام ده مش صحيح لسببين : -
أولا : ان النظام الرأسمالى واقتصاد السوق الحر نظام فاشل والدليل على كده الأزمه العالميه الطاحنه اللى بيمر بيها العالم حاليا
وآخر تصريح لساركوزى قال فيه (( يجب على العالم البحث عن نظام مالى جديد بدلا من نظام السوق الحر ))
ودول الرأسماليه العظمى زى أمريكا وبريطانيا وفرنسا
أممت فى الايام الأخيره العديد من المصارف والشركات حفاظا على النظام المالى من الانهيار ,,
وانا مش اشتراكى على فكره , ده للعلم بالشئ
ثانيا : افترضنا ان النظام الرأسمالى نظام ناجح , هل فعلا السادات نجحفى تطبيقه ..؟!!
انتى بنفسك اعترفتى إنه أخطأ فى تطبيق النظام الرأسمالى وانا هاسيب كلامك دليل على كلامى ,,
ثالثا : كامب ديفيد فى نظرى من أعظم مصائب السادات لأنها فتحت باب التطبيع على مصراعيه للعالم العربى كله ,,
لكن هافترض انها من حسناته, وسلمنا لكى بذلك ,,
تعالى كده نعمل حصاد لحسنات وسيئات السادات : -
1 _ رئيس ديكتاتورى لا يؤمن بتعدد الأحزاب
2_ قمع الحريات واعتقالات فى آخر ايامه كانت هتودى بالبلاد الى الهاويه
3_ امتناعه عن تطبيق نظام اسلامى معتدل
4_ فشله فى محاربة الفساد المالى والادارى والتقدم بمصر اقتصاديا الى مصاف الدول الكبرى ,,
5_ كعلاقات خارجيه , فالحمد لله علاقات مصر الخارجيه لم تكن أبدا بهذا السوء كما كانت فى عصر السادات سواء مع العرب او غيرهم ,,
أما عن حسنات السادات ..
1_ كامب ديفيد _ اللى انا شايفها من المصايب _
2_ انه الرئيس المؤمن (( ابتسامه ))
3_ كبير البلد كبير العيله
هههههههههههه
كفايه كده
السلام عليكم
هههههههه تعبتنى معاك يا مصعب يادى كبير العيلة و راعى الشباب و الرياضة و الفنون و الثقافة
انا اللقب ده بيوجعلى بطنى
عايزة ايموشن واحد رافع الراية البيضا:D
بس انا برضه بحب الراجل ده اعمل ايه فى نفسي؟
و بعدين انت لا عايز اشتراكية ولا عايز رأسمالية طيب نجيب منين تانى ما ده الموجود :)
علما بان اللى حصل فى امريكا مش دليل على فشل النظام الراسمالى هو دليل على فشل الراسمالية المتوحشة زى ما بيسموها المثقفين اللى هى بتلغى رقابة الدولة تماما على القطاع الخاص و القطاع المصرفى لكن الراسمالية الموجهة بيتهيألى عمرها ما تفشل لو اتطبقت زى ما النظريات بتقول و الدليل على كده انجلترا
عموما فى ايميل رائع جالى عن تصور الاسلام للنظام المالى هو بالانجليزى بس بجد اكتر من رائع انا ما قريتوش بتركيز اوى لانى انهاردة بنزينى انتهى لكن اعتقد انه ممكن يكون بديل للنظم الاقتصادية الموجودة بس مش عارفة ساعتها نسميه ايه
وانا بحترم انك بتحبى السادات ,,
لأنى منكرش انى كمان ممكن أكون بحبه , خاصة لما بيقول (( اقف مكانك , مكانك ))
ههههههههه
الراجل كان أفضل من حكم مصر ,,
كان له احساس بالشعب المصرى عن طريق صرف العلاوات والمنح للأسر المصريه على الأعياد والمواسم
حتى كان فى معاش اسمه معاش السادات ممكن تسألى عليه الوالدين (( ابتسامه ))
ولاشك ان السادات كان أفضل من عبد الناصر ومبارك ,,
ولاشك انه الوحيد من رؤساء مصر اللى عانى وشال الطوب والزلط قبل ما يكون ريس ,,
لكن الرجل له سيئات كثيره أيضا تحدثت عنها سابقا ,,
رحم الله الرجل , وأثابه الله بما يستحقه
ولكن انا لا أتمنى مثله مرة أخرى ,,
بل أتمنى أفضل منه ..
وجزاكم الله خيرا يا أختى
واستمتعت بالنقاش معاكى
والله من وراء القصد
السلام عليكم
6أكتوبر جديد ... على ايد سادات جديد ؟؟؟
ماينفعش إحسان جديد ؟؟؟
ومن مواليد أكتوبر كمان ؟؟؟
كل سنة وانت أطيب طيبة
وكل يوم أربع وانت بخير
تحياتي / إحسان الزعيم
و انا بحبه اوى لما بيقول "يا ولد" :)
انا كمان بستمتع اوى بالمناقشة معاك يا مصعب و بجد بتخلينى اخد بالى من حاجات كتيرو ربنا يرزقنا باللى احسن منه..البلد دى تستاهل والله
و انت طيب بس انا بفكر اعمل التماس عشان يلغوا اليوم ده من الاسبوع :)
إرسال تعليق