قبل اى حاجةلازم اشير لحدث اهم من قفل مستشفى النيل بدراوى
و من قضية هشام و سوزان..
بعد 3 ايام متواصلة
من الارهاق الذهنى و الجسدى و العصبى الشنيع
انضميت رسميا لصفوف العاملين
و من موقعى هذا..
اهنئ عالم الاعمال بانضمام العبقرية الفذة اللى هى انا لهم
و عقبال باقى العواطلية
=================
موضوع الsms بتاع ميلودى ده شاغلنى بقاله فترة
يعنى لو سامح عايز يقول لسميرة بحبك.. احنا مالنا؟
و هل مثلا سميرة قاعدة متسمرة قدام التليفزيون 46 ساعة فى اليوم
عشان لما اسمها يطلع فى الرسالة تشوفه؟
و لو ما بتبقاش قاعدة..
هل سامح بيكلمها مخصوص
عشان يقولها شوفى الرسالة اللى انا باعتها على ميلودى و فيها اسمك
طيب لو ده اللى بيحصل..مش كان يقولها فى التليفون اسهل؟
يخرب بيت التفاهة و سنينها
=================
مش فاهمة ايه الانجاز الرهيب فى كون الشرطة بتخدم الشعب
او فى كون الظباط بتوع الامن بيتدربوا كويس
هو مش ده الطبيعى برضه؟
اعلانات مصر بتتقدم بينا مستفزة جدا بالنسبالى
الاعلام المصرى اذا كان نجح فى حاجة
فهو نجح فانه يحول العادى لغير عادى..
و المصيبة اننا بنصدق!
=================
"بقيتى راجل"
دى جملة بتتقالى على سبيل المجاملة
و بتتقال عامة لاى واحدة شخصيتها قوية
و مش فاهمة ايه سر ربط الصفة..اى صفة بجنس معين
بس انا ما يشرفنيش انى يتقال عليا ب100 راجل
انا واحدة بتحاول تثبت نفسها فى عالم مليان ذكور
لكن الرجالة اللى فيه بيتعدوا على صوابع الايد..الواحدة
=================
ما بحبش الكذب ..
هو الاكيد ان ماحدش بيحب الكذب
لكن انا مشكلتى مش فى الم اكتشاف الحقيقة
مشكلتى فى اهانة الاستهانة بعقلى و التقليل منه
بقى عندى قرون استشعار للكذب و الكذابين
بس يا ترى هتشتغل على طول؟
=================
اعلان مجلة اليوم السابع اكتر من رائع
ساندرا نشأت فنانة حقيقي
الاهم من ساندرا الكلمة اللى الاعلان بيقولها
مش هتتصلح غير بينا!
=================
الزمان:الجمعة 17 اكتوبر
المكان:معهد الموسيقى العربية
حصلت حاجة المفروض انها تبسط اى بنت
لكن بالنسبالى كانت مهينة اوى
من الاخر كده حاسة انى اتهزقت
و من الاخر برضه اكتشفت انى مانفعش ابقى زيهم..خالص يعنى
=================
مع انى بطلت اقرا جرايد استكمالا لعلاج الادمان اللى كان عندى
ما عرفتش ما اعلقش على الخبر بتاع تقرير التنمية البشرية المصرى
مصر فى المركز ال120 بعد ليبيا و بعد البوسنة و الهرسك..طب ايه؟!!
=================
ده ايميل جالى من كام يوم
اثر فيا جدا..
مش لأنى مش عارفة المعنى المقصود منه
لكن لانى عارفاه و برضه بنسى و بستهبل..
Do you think that you are unhappy
look at them
.jfif)
هناك 37 تعليقًا:
أولاً مبروك الانضمام لصفوف لعاملين :D.. عقبالنـا يااااارب ..
بالنسبة لرسايل sms بتاعة مولتي ومزيكا والذي منه .. فأنـا والحمد لله عاملة معاهدة مقاطعة نهائية بيني وبين التليفزيون .. أنـا مش ناقصة حرقة دم و جع دماغ يا أختشي .. أنـا صاحبة عيـا :D
الإعلانات برضه من وسائل رفع الضغط لذلك مدرجة من بنود المقاطعة المشار إليها سابقـًا :D
"بقيتي راجل" .. بقولهم ايه المشكلة يعني حضراتكم؟ هو الواحدة المفروض تبقى عمالة إزاي يعني عشان نعجب مش فاهمة؟ .. يا سلام لو كل واحد يحط لسانه جوة بقه ويتخرس ويدور على نفسه كدة ويهتم زي ما بيهتم بكلامه عن الناس كدة ومالوش دعوة بغيره .. هيبقى أحسن بكتير والله وأهم يريحوا ويستريحوا :D
الكذب .. نفس وجهة نظرك بالضبط :D
بتصعب عليـا نفسي اوي .. عشـان كدة بقيت ماديش ثقتي لأي حد أبـدًا إلا لو كان يستاهل :)
بالنسبة لموقف معهد الموسيقى العربية أكد أخمن ايه هو .. بس عادي ما تاخديش في بالك طنشي :D .. عالم لزجة أساسـًا
بالنسبة للإيميل جالي كتير جدًا ..وفي كل مرة بقول الحمد لله على كل شيء :) .. احنا برضه أحسن من غيرنـا .. بس هي دي النفس البشرية دايمـًا :)
بوست رائع كالعادة .. ولا تحرمينا من هرتلاتك .. بيبقى لهـا مذاق خاص كدة :D
مبروك الشغل يافله..اتبسطت جدا على فكره
الحمد لله واحده فلحت اهي
عقبالي وعقبال الباقي :D
ياريت الرسائل كلها بحبك دي
انما فيها كلام غير محترم بيتذاع بدون رقيب
واحد لامؤاخذه بيدور على واحد تاني لامؤاخذه عشان يقضوا سوا وقت لامؤاخذه برضه
انا مش عارفه الناس دي ملتها ايه
خليكي راجل احسن ماتبقي بنت زي عدمها
الكذب اكتر حاجه بكرهها في حياتي..ومفيش امل ابراهيم يرجع
موقف معهد الموسيقى زي ماتوقعته يعني قابلت منه كتير اوي في الوسط الفني الحقير
وايقنت بعدها ان مفيش بني ادم ولا بني ادمه مهما كانت درجة تعليمه اوثقافته او وسطه الاجتماعي اسمه محترم في الوسط ده..متحطيش في دماغك..يامام هتقابلي ناس بتقدملك فروض الطاعه والولاء في كل وقت لانك فقط بنت جميله..او ييجي منك يعني
كلمة الحمد لله مش محتاجه الايميل اكيد
طول مالواحد بينزل الشاره وبيشوف وبيتفرج عالتليفزيون هايفضل يحمد ربه في كل ثانيه على كل نعمه ادهاله
احنا احسن من غيرنا كتير اوي الحمد لله
لذيذ اوي اني اهرتل وانك تخرفي في نفس ذات الوقت
صدفك كترت يافله :D:D
اولا الف الف مبروك على الحدث المهم
و عقبال كل العواطلية يارب
قولى امين بسرعه قولى امين
----
و الله موضوع الشات اللى بتبقى فى كل القنوات عموما
بحب اتفرج عليها عشان اضحك مش اكتر
اما عن سامح وسميره ماتخديش فى بالك هو عايز يقولها بحبك قدام العالم و
انتى عارفه بقى الدنيا بتتحرك و مش هاينفع يزعق فى الشارع فابيروح يزعق
فى القنوات
----
الصراحه انا ماشفتش الاعلان دا مع انى نفسى اتفرج عليه من كتر مابسمع
عنه
لكن الاعلانات عموما دلوقتى بقى فيها فكر جديد للضحك على الشعب
-------
الجمله دى بتتقال عشان فى المجتمع بتاعنا الراجل بس هو اللى بيعرف ياخد
حقه
عشان كدا لما البنت تكون شخصيه قويه و بتعرف تاخد حقها يتقال انها اتحولت
للجنس الاخر
على اساس ان المرأة كائن ضعيف ممكن شويه هوا يطيره او كلام يغيير تفكيره
----------
اممممم ماعتقدش انها تشتغل على طول لان الكذب دلوقتى بقى اكتر من
الصدق بالتالى القرون بتاعتك هاتتعب و تاخد على كدا و هاتقف
و قرون استشعار الصدق هى اللى هاتشتغل (:
--------------
الاعلان دا حلوته فى صدقه
انها فعلا مش هاتتصلح غير بينا لكن فى بعض السلوكيات اما الاشياء اللى
السلطه ماسكها دى مش هاتتصلح الا لما هما اللى يتصلحه
يعنى برضه مش هايكون اصلاح كامل الا لو تعاون الشعب مع الحكومه
امممممممم تفتكرى ممكن دا يحصل فعلا ؟؟؟
------------
ايه بقى اللى حصل فى المعهد D:
---------------
هو ممكن اقول زيك
طب ايه بقى ؟؟؟!!!!!!
----------
الحمدلله
للأسف الواحد بيفكر نفسه دايما حزين لانه بيبص للأعلى منه مش للى أقل
):
طولت انا المره دى معلش بقى بفضفض معكى فى مدونتك
(:
مبروك الإنضمام لسلك العاملين
وسيبك من حرقة الدم بتاعت الإس ام اس والجرايد
بالنسبة للإيميل
لازم نقول الحمد لله
تحياتى
دمتى بود
الحمد والشكر لله
ربنا يسعدك ويوفقك
ان شاء الله ينورلك طريقك..ويتم فرحتك ونجاحك على خير يارب :)
متتصوريش آخر جزء في الموضوع ده
الحمد والشكر لله :)
السلام عليكم
بوست متميز جدا
وبجد الصور صعبه اوى
مع تحياتى
مبروك الانضمام في صفوف المتعبين أقصد العاملين الحمد لله الشغل ده نعمة كبيرة يكف أن الواحد بيكون قادر يصرف على نفسه وحاسس بقيمته انه بيساهم بحاجه ايجابية في المجتمع نصيحتي في بداية عملك نصرفي بحذر شديد مع من تتعاملي معه وحطي نية كويسه لربنا انك بهذا الشغل تعملى حاجة كويسة لبلدك ، واهم حاجة الانضبابط من أول يوم علشان الانطباع الاول ييدوم تقبلي مرورى
لا لا لا متقوليش ..
عملتيها و أشتغلتى :D .. حاكم ظالم :D
لما بنت مصرية تشتغل يبقى محدش يقولى فى بطالة خلاااااااااص :D
على فكرة أنت موعدانى أنك حتشغلينى معاكى لو حاجة حلوة ... و لو مش حلوة .. موبيلى مستنيكى :D
مبروك يا فلة .. كالانيختا
هرد في اللي يخصني
اولا مبروك على الوظيفة و عقبالي يارب
************
الsms عادي ياستي ادينا بنتسلى على حسهم يعني تبقي مخنوقة تشوفي هبل تضحكي على الهبل اسمك ضحكتي
************
مش فاهمة بصراحة يعني ايه بقيتي راجل
يعني بالمواقف ؟! يمكن عشان الرجولة مواقف و اغلب المواقف بقت من الستات فبيقولو بقيت راجل جايز بس تخيلي لو المقولة دي تطبق حقيقي و يحسبونا بمية راجل ياسلالالالالام كناعملنا العجايب
و انهينا المجتمع الذكوري ده
***********
الكذب بقى كلنا هنكره و مش هنحب يتكذب علينا و بنكذب عادي طبيعة بشر
و بالنسبة للي يستهيفني غالبا بتفرج عليه و يوم ما اكشف ورقي يبقى غبيييي
جدا و في وضع بايييييييخ
*********
الايميل ده جالي فعلا و مش بقول غير الحمدلله
بس ممكن انسى بعد شوية وارجع اتشكى شوية بس بحمد ربنا على كل حال
ابقي خرفي كتير يا بنوتة تخاريفك حلوة اوي
قبل اي حاجة الف مبروووووووووووووووك انضمامك لصفوف العاملين
يا اهلا يا اهلا
بالنسبة للمسجز بتاعت التيليفيزيون دي تسالي رهيبة لو حصل وكنت زهقانة بفتح اقرا واسخسخ
ما بفهمش حقيقي ايه دا !!
اعلان مصر بتتقدم دا ماشوفتوش الحقيقة بس متخيلة المنظر
بقيتي راجل ..انتي بنت بميت راجل ..الكلام دا كان بيسعدني زمان قبل ما اركز واجمع ان كدا بينفوا ضمنيا صفات كتير عن الانثى وبيحصروها في الرجالة ..والبنت اللي يكون فيها صفات زي الجدعنة وتجمل المسؤولية بتبقى في نظرهم راجل مش بنت
حاجة تقرف
ربنا يحميكي من الكذب والكذابين ..انا عندي نفس المشكلة مع اللي بيستهون بذكائي بس وقتها بتغابي ..يعني بعمل نفسي هبلة
اعلان اليوم السابع رائع ..اثر فيا جدا
عايزة اعرف ايه اللي حصل في الموسيقى العربية
اخر حاجة بقى
جميل الميل اوي ..الحمد لله
the seagull
الله يبارك فيكى يا جميلة و عقبالك ان شاء الله :)
انا كمان مقاطعة التليفزون و مؤخرا قاطعت الجرايد كمان..الاتنين بقوا بيجيبولى الضغط بصراحة و انا بقيت سيدة اعمال و شغلى محتاج صحة :D
اه والله لو كل واحد حط لسانه جوة بقه هنترحم من تفاهات كتير مالهاش اى لزم غير انها تشل الواحد..و المصيبة انهم بيفتكروها مجاملة..قال بقيت راجل قال
الا موضوع الثقة ده.انا ما اتوصاش فيه:D
عالم تافهة..محدودة..سخيفة لاقصى درجة انا لحد دلوقتى متنكدة اساسا
انا مبسوطة اوى و انا عمالة بتفلسف كده..بس المهم تفضلوا مستحملينى :))
نورهان
الله يبارك فيكى و عقبالك قريب اوى ان شاء الله
انا بتخض بجد من الناس اللى رومانسى و عايز واحدة رومانسية و اللى يقولك مطلقة ولا ارملة..قمة السفالة اللى فى الدنيا..بس انا بحب اركز على بتوع بحبك يا تيمو و بحبك يا رجاء..بيموتونى من الضحك بجد
لا ما هى الفكرة ان فى رجالة كتير زى عدمهم فا مش منطقى انى اتشبه بالراجل عشان انا واحدة عندها شخصية كان الطبيعى بتاع الست انها تكون تابع و بس و اللى بتخرج عن القاعدة دى تبقى راجل ايه الاستفزاز ده
لا يا ريته كان عرض فنى كنت ضحكت و خلاص و ما كنتش خدته على كرامتى للدرجة دى
الغريب بقى انى كنت هخرف فى نفس اليوم بتاع الهرتلة بتاعتك:D
بس قلت استنى لحد ما امضى العقد عشان يبقى الموضوع اكيد بما انى شخصية قلوقة لدرجة المرض و لو ما لقيتش حاجة اقلق عليها بخترعلى حاجة فقلت اتاكد ليكونوا كلمونى غلط ولا حاجة و بعدين اخرف براحتى:D
ضد التيار
الله يبارك فيكى..و امييين يا رب :)
لازم تشوفى العلان بجد هتضحكى اوى
تفتكرى فعلا ده اللى هيحصل..اصل لوكده الواحد ينعزل عن الدنيا اهون و ارحم بصراحة..الكذب مرتبط بالشخصية الضعيفة مش معقول كل الناس يبقوا بالضعف ده..خوفتينى على فكرة
اللى حصل قلة ادب و هيافة على تفاهة و دليل تانى على ان الرجالة اللى بجد فى طريقهم للانقراض:D
نفسي كل واحد يبدا بنفسه و يكون ايجابى قبل ما يلطم و يدين الظروف..و اكيد ساعتها هتتصلح
لا طولتى ولا حاجة و بجد نورتينى :)
mohamed ghalia
الله يبارك فيك :)و سيبتنى من حرقة الدم اكيد فى حاجات تانية اهم الواحد يهتم بيها فى حياته
ايمان
ربنا يخليكى يا ايمان يا رب
و ان شاء الله تنجحى فى الدبلومة الجديدة اللى بتعمليها زى ما انتى عايزة
انا كمان الايميل اثر فيا اوى المشكلة اننا ساعات بننسى فعلا و ننشغل بحاجات اتفه من التفاهة و فى لسه ناس عايشين بالمنظر دى
الحمد لله
حسام وريمان
اهلا بيك و ميرسى على تعليقك :)
dalia
الله يبارك فيكى و ما تقلقيش انا ما اتوصاش فى موضوع الحذر ده
ميرسى بجد على نصيحتك..نورتينى :)
كوبرى
ايون ايون الخبر صحيح :D
و من غير واسطة ولا بابى و مامى :))
و هى حاجة حلوة اه بس مش اللى انا كنت عايزاه خالص بس انا عاملة نفسي مش واخدة بالىD:
ابقى ابعتلى السى فى و انا احاول اقنعهم :P
قال موبايلك قال كلها سنتين و ابقى مديرة قد الدنيا و نبقى نشوف مين هيمسك موبايل مين :D
الله يبارك فيك..دى مبروك باليونانى برضه؟
شوفت الذكاء الخارق اللى انا فيه:D
reem
الله يبارك فيكى و عقبال كل اللى عايز يشتغل :)
ما هى المشكلة ان الوصف ده بيخرج الست من عالم الستات و يحطها ى مكان تانى يعنى مش فاهمة فين المشكلة فى ان الست تكون قوية و عارفة تاخد حقها..كان القوة دى مرتبطة بالرجاة بس و اللى بيضحك فى الموضوع انك تنزلى الشارع تلاقى الواحد من دول موقع بنطلونه و ناكش شعره..طب ايه بقى؟
انا لسه ناوية اخرف كتير بس المهم انتوا ما تزهقوش :)
فنونتى
يا اهلا بيكى..بالرغم من انك خوفتينى من موضوع الشغل ده بس انا قررت انى لو زهقت هخلع:D
انا كمان كنت بتبسط بالوصف ده زمان بس دلوقتى اكتشفت انه مش مجاملة نهائى ده استفزاز رسمى يعنى..انا ماما من كتر ما يئست منى بقت بتقولى و انتى مالك و مال البنات يا حبيبتى انا بتكلم عن البنات:D
فكرينى ابقى احكيلك على اللى حصل على انفراد بس اوعى تضحكى عليا انا بقولك من دلوقتى اهه..مش عايزة تريقة:D
لا يا ذكية دى مش مبروك ..
دى تصبحى على خير :D
جهلة :D
ازيك يا حره .. تحياتى
تسمحى لى ادخل على مدونتك .. مش حاقول كلام كتير الا بعد السماح لى لانى قريت عندك انك فى عالمك بتحبى الخصوصيه ..لكن مبروك على انضمامك لصفوف العاملين.
ههههههههههه ايه الاحراج ده يا كوبرى ما تمشيها مبروك وخلاص..
دايما كاسفنى كده:D
---------------
fashkool
الله يبارك فيك متشكرة اوى
و من غير استئذان ولا حاجة علق براحتك طبعا
ألف مبروك يا أختى ((ابتسامه))
وانا فرحان اوى انك اشتغلتى وربنا يسعدك فى الشغل ده
وأسأل الله أن يبارك لكى فى هذا العمل ,,
وأن يجعله خيرا لكى فى دينك ودنياكى ,,
ودعواتك كده لأخيكى ,,
ربنا يستر عليه يارب
المهم
أول مرتب ان شاء الله يعنى
هاتجيبيلنا منه ايه (( ابتسامه ))
السلام عليكم
بنت مصرية كتبت ..
و هى حاجة حلوة اه بس مش اللى انا كنت عايزاه خالص بس انا عاملة نفسي مش واخدة بالىD:
دا بجد ؟؟؟
نورهان
اه فى الحالة دى انا موافقة جدا اكون راجل قال زى عدمى قال:D
مصعب
الله يبارك فيك :)
و عقبالك ان شاء الله..ربنايوفقك فى حياتك يا رب
بالنسبة لاول مرتب فهو هيتصرف على البنزين بما انى يوميا فى مدينة نصر..تانى مرتب بقى هجيبلكو بيه نص كيلو شوكولاتة :D
لا بجد انت تؤمر يا مصعب :)
محمد
اه والله بجد :)
ما كونتش عايزة بنوك خالص
بس بعد مسلسل لن اعيش فى جلباب ابى اللى عملته ده ما كانش ينفع استنى واسطة
بس انا مش متدايقة يعنى..ادينى بجرب
دعواتك بقى:)
لولولي زغرطي ياللي انت مش غرمانه
الف تريلليون مبروك يابنتي عقبال السنيوره اختي اللي مش عايزه تشتغل وحابه قعده البيت والتي في رغم انها لو قدمت بس هتلاقي بالهبل وبرده بنوك بس هي برطه
اهلا بك في عالم الحضور والغياب المستمر والاجازات العارضه والتاخير ابو نص ساعه والمواصلات والحوافز والخصم من المرتب واجازه بدون مرتب
ياااااااااااه كانت ايام والله لذيذه اوي
عقبالك كده
لا يا جماعه ,,
بالله عليكم ,,
بلاش حد يشتغل فى البنــوك ,,
حــــــرام
حــــــرام
لا خلاف بين ذلك عند أهل العلــم
حــــرام
انا هنا مش عاوز أعمل نقاش فقهى
بس انا بنصح ناس بحبهم وبخاف عليهم
إياكم والبنوك الربويه
إياكم ,,
قال تعالى (( يمحق الله الربا ))
والله من وراء القصد
السلام عليكم
ليه حرام يا مصعب
هيسيبوا البنوك :)
نور..فيه حاجة عندي كمان في المدونة
كل ما تحصل حاجة جديدة
او اكتب موضوع
مفيش حاجة بتظهر خالص
عندكم كمان؟!!!!!!!!!!!
انا رديت في موضوع تاني..آسفة
مفيش اي حاجة في مدوناتكم كلكم من يوم 24 بتظهر عندي
حتى العناوين في المدونات التانية :(
استب اكسبلورر جديد ولا ايه كدة :(
طيب هعمل كدة :)
كل سنة وانتي طيبة :)
غريبة اوى دى يا يا ايمان
طيب جربى من الارشيف بتاع البلوج تشوف اخر المواضيع..انا جبت سيرتك فى الموضوع اللى فوق على فكرة لازم تشوفيه ماليش دعوة :)
إرسال تعليق