50 سنة حب!!

سألتها:50 سنة مش كتير ده؟ ردت:مروا عليا كأنهم 5 سنين محستش للحظة انى ندمانة و عمرى ما فكرت اتراجع ده انا حتى مش فاكرة حياتى قبل ما اعرفه كانت عاملة ازاى ولا فكرة كنت بقضى وقتى ازاى او مع مين قلتلها:طيب و الملل؟ مزهقتيش قالت:ملل؟ انتى بتقولى ايه ييجى منين الملل لما كل يوم تكتشفى حاجة جديدة حاجة مكنتيش تعرفيها عن حب عمرك تعرفيه اكتر و تقربى منه اكتر بكل تفاصيله يوم عرفت انه بيصحى بمزاج مش رايق اوى و ميرتحش الا لما يشرب القهوة على صوت ام كلثوم فى اغنية رق الحبيب و عرفت انه بيحب يتفرج على ماتشات الكوة من غير ما حد يكلمه و انه ميحبش كلمة"مالك؟"السؤال ده بيجننه ...لما يلاقى نفسه قادر يتكلم بييجى يحكيلى لوحده حاجات صغيرة بس بتفرق كتير لعلمك و عودت نفسي اعملها عشان هو كمان بيهتم انه يعمل الحاجات اللى بحبها و عرفت كمان ان دموعه غالية اوى عنده و صعب تبان قدام اى حد و بالرغم من كده مقدرش يخبيها لما عرف انى حامل فابنه و ان حلم عمره اخيرا هيتحقق و كان بيبصلى و انا حامل و يقولى انتى احلى ست فى الدنيا حتى فى الشهر التاسع لما مكنتش بعرف اعدى من الباب و يوم اعرف انه مشاعره مكتومة جواه مش بيبنها غير بحساب بس لما يحب يقولى انى غالية عنده بيبقى بالفعل و ده عندى احلى من الكلام اللى كل الناس بتقوله و عرفت كمان انى مش بضحك من قلبى غير معاه و متسألينيش بيعمل ايه عشان يضحكنى و يخلينى احس بالفرحة دى كلها بكلمة او حركة بسيطة عشان انا بجد مش عارفة و مرة اعرف ان الراجل اللى طلته ليها هيبة و كلامه موزون و عاقل و مقنع لاى حد... جواه طفل... ايوة بجد هو طفل كبير بفرح اوى لما احس انه بيحتاجنى و بيحتاج نصيحتى حتى لو مقليش بشكل مباشر بس انا ببقى عارفة العشرة بقى...و ابتسمت ابتسامة اللى بيفتكر ذكرى حلوة و غمضت عينيها للحظة و قالتلى:ازاى ممكن احس بالملل بعد كل اللى قلتهولك ده؟ قلتلها عايزة تفهمينى انك فضلتى بالسعادة دى 50 سنة؟ عمره ما زعلك؟ اكيد زعلنى بس كان بيعرف ازاى يصالحنى و ينسينى عمره ما اتعصب عليكى؟ يوووه كتير بس نظرته ليا لما بيهدى و ندمه على انه زعلنى دول عندى بالدنيا عمره ما منعك من حاجة بتحبيها؟ عمره ما سفه رأيك قدام الناس؟ عمره ما اتخانق و عمل مشكلة على حاجات صغيرة متستاهلش؟ فكرت شوية و قالتلى:تصدقى مش فاكرة بصتلها باستنكار و كان باين عليا انى مش مقتنعة فهمت لوحدها نظرتى و قالتلى:ايه شكلك مش مصدقانى؟ انا هشرحلك... تعرفى لما تلاقى اللى تأمنيه على نفسك و عمرك و قبلهم قلبك لما تحسي بالامان و انتى فى بيته لما تشيلى ولاده و تشوفيهم و هم بيكبروا قدامك و هم مبهورين بابوهم و بحنيته و قوة شخصيته لما تبنى بيت من اوله لاخره...كأنك بتبنى تاريخ قصة انتى بطلتها و مؤلفتها و عارفة كل تفاصيلها لما تبصى فى الصور اللى بتحبيها و تفتكرى الايام الحلوة اللى مرت عليكى و تبقى مش محتاجة تحكيله عنها لانها كلها مرتبطة بوجوده فى حياتك و عاشها معاكى كلها عشان كده هواكتر حد هيعرفك فى الدنيا لأنه عرفك من ساعة ما اتولدتى...اصلى بحسب عمرى من ساعة ما قابلته بعد ده كله عمرك ما هتفتكرى غير الحاجات الحلوة اللى عشتيها استحالة تفتكرى المشاكل و الخناقات دى كلها هيافات متسواش لحظة حلوة تعيشيها مع حد بتحبيه حد اختارتى بكامل ارادتك انك تكملى معاه الباقى من عمرك اصل الحب مش بوكيه ورد ولا خروجة حلوة ولا حتى كلمة "بحبك"عمال على بطال الحب انك تبنى حياة كاملة و تعرفى تحافظى عليها و تحبيها بحلوها مرها مهو محدش قال ان الموضوع سهل لكن لما تنجحى فيه اعرفى انك ...بتحبى عرفتى ليه احنا دلوقتى بنحتفل بخمسين سنة...خمسين سنة جواز دى واحدة من لحظاتى الرومانسية النادرة الحدوث و هو ده الحب زى ما انا شايفاه و بما انى عارفة انه مش موجود فأنا مش بدور عليه دى بس مجرد لحظات بحس فيها باحتياجى لشوية رومانسية فى حياتى حتى لو انا عارفة انها مش موجودة فى الواقع

ايوة انا بنت...اوئدونى بقى

دى ببساطة حكايتى و حكاية ملايين غيرى ما بين نظرة الناس و حكم المجتمع القاسى المجحف فى حقى احترت يعنى هى كانت غلطتى انى اتخلقت بنت و مين اساسا اللى قال انها غلطة حد او انها غلطة من الاصل لا هى غلطة ولا هو ذنب ربنا خلقنى بنت و اهلى حبونى و انا بنت وانا راضية و مبسوطة انى بنت حد له عندى حاجة؟؟؟ ايوة مبسوطة انى اتخلقت بقلب و احساس ربنا حطهم فيا و فكل بنات حوا و مبسوطة انى بكون المكان اللى بيرتاح فيه ابويا لما الدنيا تكشر فى وشه و لما الاقى امى جايالى انا تشكيلى

و سايبة اخوها عشان هى مش عايزة حلول منطقية لمشكلتها

هى عايزة قلب يسمعلها و ايد تطبطب عليها و مبسوطة لما بلاقى اخويا يسيب صحابه الرجالة

و يجيلى انا يحكيلى و هو متأكد انى سمعاه بقلبى قبل عقلى و مبسوطة انى لما هلاقى الانسان اللى قلبى يرتاح له

هكون له سكن و مودة و رحمة زى ما ربنا قال و فخورة انى هجرب ارقى و احلى مشاعر فى الدنيا... مشاعر الام

اللى مستنية بفارغ الصبر و بتعد الايام و هى بتدعى ربنا

ان التسع شهور يمروا بسرعة

عشان تشوف الكائن ده اللى حبته قبل حتى ما تشوفه مشاعر ما تتوصفش بكلام و كفيلة بانها تغطى على اى احساس

غضب كان او قهر مشاعر كافية انها تخلينى اقول بكل ثقة انى فخورة لانى اتولدت بنت و حتى مع نظرة البعض ليا و انا فى الشارع و كم الاستظراف و اللطافة اللى بشوفهم من شوية عيال تافهة

ما وراهمش غير الوقوف على النواصى و مش بس دول اللى بينرفزونى اللى بيدايقنى بجد اكتر النظرة الدونية اللى بشوفها فى عيون ناس كتير و اللى يقول دى بنت يعنى مكانها البيت...تعليم ايه و شغل ايه اللى بتنادوا بيه؟ خليكوا فى المحشى و البتنجان افيد مع انى لما اتعلم ممكن اكون احسن من 1000 ولد اتعلموا

او بمعنى ادق راحوا مدارس و جامعات و مطلعوش منها بحاجة و لو رسالتى فى الدنيا هتبقى انى افهم الناس اننا بنى ادمين و الله و بنعرف نفهم و نقرا و بكام فصل من بتوع نحو الامية ممكن كمان نعرف نكتب و نعبر اى و الله ييجى مننا فانا مكتفية بالرسالة دى ببساطة دى مشكلتى فى الحياه بس بعون الله هفضل ورا الناس دى لحد ما يعرفوا اننا بنى ادمين زينا زيهم ربنا خلقنا مختلفين و انا مش بطالب اننا نبقى زيهم انا كل اللى بطالب بيه قدر من الاحترام لعقولنا و لانسانيتنا مستكترين ده علينا؟