الأربعاء، 22 يوليو 2009

ازاى تكسب قلب بنت فى 10 خطوات؟

خطوة (1): كون نفسك لو كنت متاكد 100% من احساسك نحيتها " كون نفسك" هى القاعدة الذهبية واحد من اكتر المفاهيم الغلط المتاخدة عن الستات هى انهم بيحبوا الكلام الكبير المعقد الحقيقية بقى..اننا ما بنحبش حاجة قد الصدق. الكلام الكبير اللى بيفقد معناه بمجرد ما بيتقال و التسبيل على الفاضية و المليانة عمرهم ما كانوا الطريقة الصح بالنسبالنا. شوية ارتجال فى البداية بيكونوا اكتر من كافيين على فكرة. خطوة (2): كون مستمع جيد احيانا ممكن تلاقى الاجابة على سؤال زى "يومك كان ماشى ازاى؟" عبارة عن ساعة و نص من الشرح المتواصل المفصل حقيقة كونية: معظم الستات بيحبوا يتكلموا كل اللى عليك تعمله ساعتها انك تكون مستمع جيد و توريها انك مهتم باللى هى بتقوله بس النقطة هنا انك توريها انك مهتم من غير ما تمثل انك بتسمع عشان احنا بنعرف الفرق! نص الكباية المليان هنا هو انك مش محتاج تقول رأى فى اللى هى بتقوله انك تسمع بجد اكتر من كفاية و نقطة تانية هنا..الستات بتقدر الصدق جدا يعنى لو مش حاسس انك عايز تسمع..قول بس بطريقة لطيفة يعنى مثلا ممكن تقولها "انا اسف بس كان يومى مجنون انهاردة فى الشغل.. ممكن نتكلم فى الموضوع دا بعد شوية" جملة لطيفة زى دى ممكن تعمل معجزات على فكرة. خطوة (3): وريها اهتمامك مكالمة بسيطة و انت فى شغلك هيكون لها اثر كبير جدا عليها مش محتاج انك تضيع وقت شغلك ولا انك تترفد مكالمة من 30 ثانية كافية جدا عشان تحسسها انك فاكرها حتى و انت مشغول خطوة (4): احساس مش تكلف! حد فكر ليه الستات بتحتاج لشريك حياة؟ الحقيقة ان الست بتحتاج لسند الست مش محتاجة فلوسك..هى محتاجة مساندتك كل ست بتبقى عايزة الراجل اللى اختارته يكون الصخرة بتاعتها الحالة الوحيدة اللى بتدور فيها على محفظتك هى ان دماغك تكون فاضية! لو عايز تجيبلها هدية..اختار حاجة بسيطة هدية مبتكرة و بسيطة احسن بكتير من اى حاجة غالية و متكلفة طبعا من غير ما تدور على مخرج سهل "حبيبتى دى الفلوس اشترى بيها اللى انتى عايزاه" جملة من الجمل المميتة. خطوة (5): كون ذكى فى اختيار الكلام
الستات بتقدر الصدق لكن قلة الذوق هى بداية النهاية بالنسبالنا قلها اللى انت حاسه بس بطريقة زكية. مثلا بدل ما تقول:" انا مش قادر استحمل طريقتك دى" قلها:"فيها ايه لو نتكلم بطريقة اهدى شوية؟" او مثلا "ما تبقيش عصبية كدا..انا عندى مشكلة فى الشغل و اوعدك اننا هنحل الموضوع دا اول ما اقدر" بدل:" انا مش مهتم اعرف" خليها: "انا مش فى المود دلوقتى..بس ايه رايك لو نشوف فيلم مع بعض؟" خطوة (6):اياك تستقل بيها دايما قدر اراءها و كلامها مهما كانوا تافهين فى رايك.. خصوصا قدام الناس لانها هى كمان هتقدر كلامك حتى لو كان غبى فى نظرها.. و هتقدر اهتماماتك حتى لو كانت سطحية فى رأيها فالحب مش وحدة بين اتنين"ناقصين" الحب اتحاد اتنين "كاملين". فبالتالى ما تتوقعش انها تفكر..تتكلم او تتعامل زيك.. ببساطة لانه عمره ما هيحصل. خطوة (7):بطل تختبرها! حقيقة كونية تانية:احنا بنعرف لما بتختبرونا فى طرق كتير اوى زكية تخليك تعرف اذا كانت مهتمة ولا لأ لكن انك تحاول تخليها تغير بانك تتكلم عن البنت اللى كنت بتحبها زمان او عن جمال زميلتك فى الشغل..مش من الطرق دى بتاتا خطوة (8): ما تنساش! لو فى حاجة واحدة مشتركة بين كل ستات الارض..فهى اننا بنفتكر! افتكر دايما المناسبات المهمة عندها..اعمل لستة بالايام المهمة.. حط ريمايندر على الموبايل..المهم انك تفتكر المناسبات المهمة عندها لان هى كمان هتهتم اوى بالمناسبات المهمة عندك خطوة (9): خليك دايما موجود لما تحتاجك اسمع..اهتم..حسسها انه مهما الدنيا كانت معقدة انك هتقدر دايما تلاقى طريقة تخليها بسيطة خليها تضحك فى الاوقات الصعبة اسمعها لما تحتاج تتكلم مهما كانت قوية فهى هتحتاجك جنبها فى اوقات كتيرة زى مانت كمان هتحتاجها جنبك لما تكون ضعيف. خطوة (10): كون "Breaker-up” شجاع لو حسيت فى يوم انها النهاية..قول لها!!! الخيانة عمرها ما كانت حل مهما كانت الصراحة هتوجعها فى وقتها.. فهى هتخليها تفضل تحترمك طول عمرها.
*****
طبعا بعد قراية ال10 خطوات دول مش غريبة لما نص البنات يكونوا داخلين فى علاقات غير صحية بالمرة و النص التانى يكون صرف نظر عن الفكرة :D طبعا دا لا يمنع ان فى ناس نجحت فى اختياراتها..و ان كانوا قليلين
*****

الثلاثاء، 14 يوليو 2009

خمسة فرفشة..

نظرا لحالة الكابة المستعصية اللى انتشرت فى البلوجات و المجلات و الجرايد و الافلام ..و فى كل حتة قلت اسليكم بموضوع خفيف منقول من كتابين لعمر طاهر..
"ابن عبد الحميد الترزى" و "شكلها باظت"
***** ازاى تعرف انك بتتفرج على فيلم مصرى؟
-عندما يكون البطل مريضا منهكا فى الفراش و تقدم له البطلة حبة دواء مع كوب ماء, فيبتلعها البطل ثم تساله البطلة فورا " ها عامل ايه دلوقتى؟" المفاجاة انه يرد "الحمد لله بقيت احسن".. ( كده بالسهولة دى؟! واخد حبة البركة ولا ايه؟!)
- فى افلام ما قبل الثورة مفردات يسهل تمييزها " سي محمد او محمد افندى"
اما الباشا فنادرا ما تعرف له اسما غير" سعادة الباشا" " يا حضرة و هى المرادف ل يا بشمهندس فى الالفلية الجديدة" " و ممنون المرافدة لكلمة قشطة حاليا" اما التعبير عن الموافقة فكان "فليكن" و اصبح حاليا "بيس يا مان" - اهم ما يميز سيارات فترة ما قبل الثورة
خلل ما فى المساعدين
يجعل السيارة تتميل يمينا و يسارا كالبطة البلدى كما انك لن تجد فى افلام هذه الفترة بطلا يقود سيارته بيد واحدة على الرغم من ظهور السيارات الاوتوماتيكية بعد ذلك ب50 سنة - ازمات الربو هى العامل المشترك فى افلام ما قبل النكسة فتمتلئ المشاهد بالتنهيدات
و محاولة البطل الحصول على نفس عميق فى حضور الاخر ( يمكنك ملاحظة هذا بقوة عندما يكون المطرب بطلا
و تستمع اليه البطلة فى الراديو حيث ستشعر بمدى حاجتها للبخاخة)
- اهم ما يميز افلام ما بعد العبور اللقطات التى تلتقى فيها كل الوان الطيف
مع السوالف و الشعر و البواريك (جمع باروكة) فى رقصة شبابية متحررة فى المهلى الليلى
على انغام اجنبية ليقدموا الرقصة المميزة لجيلهم و التى تعتمد على تطويح الراس يمينا و يسارا (كرواد الموالد الشعبية) مع ثنى الساقين و الرعشة المميزة للعلاج بالجلسات الكهربائية
- عندما يصل البوليس الى موقع السرقة او الجريمة عموما
دون ان يبلغه احد! ( فى الحقيقة المخرج هو الذى بلغ الشرطة
حتى يصور مطاردة مثيرة بين الشرطة و المجرمين) - عندما يصب البطل من زجاجة المشروبات الكحولية فى كوب زجاجى طويل فيمتلئ عن اخره كانه يصب عصير قصب - عندما يخلو فيلم عن الصراع المصرى الاسرائيلى الا من كلمة واحدة "خالتى بتسلم عليكوا" - عندما تشاهد فيلما بطولة ممثلة فوق الستين تقدم فن الاغراء! - عندما ينجح هذا الفيلم - عندما يتكشف الزوج خيانة زوجته مصادفة
لانه نسى شيئا فعاد الى بيته و خلال هذه الفترة يكون العشيق قد وصل و غير ملابسه
و اصبح فى فراش الزوجية جاهزا للفضيحة ***** لماذا اصبح المصريون يكرهون الوظيفة؟ (مقارنة بين الشغل و السجن)
- فى السجن يمكنك ان تنقل نفسك فى زنزانة فردية لا يزاحمك فيها احد بمنتهى السهولة..يكفى ان تخرق القواعد داخل السجن - فى الوظيفة حتى تستاثر بمكتب بمفردك..تحتاج الى مجهود جبار - يمكنك الاتلحاق بالسجن فى اى وقت..بمفردك و بمجهودك الشخصى - بينما فى الوظيفة تحتاج الى واسطة من الاساس - فى السجن عندما تكون ملتزما..
تتم مكافئتك بتقليل المدة التى تقضيها - فى الوظيفة اذا كنت ملتزما
تتم مكافئتك بالمزيد من العمل..اى المزيد من الوقت - فى السجن تحصل على ثلاث وجبات يومية مجانية - فى الوظيفة تدفع على الاقل ربع مرتبك
للحصول على وجبة منتصف اليوم - فى السجن كبار المساجين
ضيوف رئيسيون فى البرامج التليفزيونية الشهيرة - و فى الوظيفة كبار الموظفين
ضيوف رئيسيون فى صفحات الكاريكاتير
- فى السجن لديك فرصة للتوبة فى اى وقت - فى الوظيفة ليست لديك فرصة للتوبة قبل سن الستين - فى السجن اذا وشيت بزميلك ينبذك باقى زملائك - فى الوظيفة اذا وشيت بزميلك تصبح رئيسا على بقية الزملاء - فى السجن يمكنك ان تترك اى شئ ذى قيمة فى الامانات - فى الوظيفة لا تترك موبايلك على المكتب و تذهب للحمام
لانك لن تجده عند عودتك - فى السجن اذا هربت يبحثون عنك باخلاص - فى الوظيفة اذا هربت..يكسروا وراك قلة
- فى السجن..يتم عجز الساديين - فى الوظيفة..تتم ترقيتهم
***** كيف تعرف انك اتربيت فى بيت مصرى؟ (اشهر جمل بيقولها الاب و الام لاولادهم)
- مش عايزة اسمع صوت
(تدريب مبكر على القمع و الديكتاتوربة اللذين ستواجهمها طوال حياتك)
- ما تردش عليا (نصيحة هتنفعك قدام مديرك)
- لو مش فاهم حاجة ارفع ايدك و اسال المدرس
(فاكرين المدرسين زى اللى كانوا بيدرسولهم زمان)
- ضرب امثلة على الكفاح و اشهرها القريب
اللى كان بيذاكر على لمض الجاز و خد الدكتواره و سافر امريكا
- التهديدات المخيفة شكلا و الكارتونية مضمونا مثل:هاقطم رقبتك, هاقطعلك لسانك او هدبحك دبح
- يالا يا ابو كحكة حمرا..انت فاكر نفسك هتقعد تاكل معانا؟
- و مالها بقى كتب الوزارة؟
***** ازاى تعرف الcouple اللى قدامك متجوزين صالونات ولا عن حب؟
- ازواج الصالونات يعانون غالبا من مشكلة سوء التفاهم اما المتجوزين عن حب
فيعانون من تدخل الناس بدعوى ان الحب مش كل حاجة
- ازواج الصالونات يتمسكون
بوضع صورة كبيرة للزواج على حائط الصالون "صورة بالبدلة و الفستان و الغرض منها تسجيلى..
مجرد توثيق فوتوغرافى للزواج المتزوجون عن حب يملاون البيت بصورهم
و يحتفظون بصور الزفاف فى الالبومات - زوج الصالونات عندما يتحدث عن زوجته
يتحدث عن "البيت" او "الجماعة" المتزوج عن حب يجد لاسم زوجته حلاوة ما فيردده بسهولة
عندما يكون الكلام بخصوصها فيقول مثلا "انا و داليا قررنا" و كذلك الامر بالنسبة للزوجة - زواج الصالونات ترعبه كلمة خيانة و توتره المتزوج عن حب تضحكه كلمة خيانة - ازواج الصالونات ملتزمون بالمواعيد المتزوجون عن حب يصلون دوما متاخرين - فى خلافات ازواج الصالونات دائما ما يتم الترحيب بالوسطاء و المتزوجون عن حب نادرا ما يرحبون بهم
فمن يتدخل بينهما يكون هو الخاسر غالبا - ازواج الصالونات يسرعون دائما بالانجاب المتزوجون عن حب يجدون سعادة
فى سيطرتهم على مشكلة من هذا النوع و يتفاخرون بثقتهم فى نفسهم امام الناس - ازواج الصالونات يسيرون
الى جوار بعضهم فى الشارع بخطوات بطيئة و نادرا ما تتشابك ايديهما و يندر بينهما الحوار المتزوجون عن حب يجر الواحد منهما الاخر من يده و احيانا تعلق الزوجة بيد زوجها و يتدحثان بصوت عال غالبا - ازواج الصالونات يحالفهم الصمت فى اشارات المرور
و الاستراحة اثناء مشاهدة فيلم فى السينما و فترة انتظار الطعام فى اى مطعم و المتزوجون عن حب لا ينتهى بينهم الكلام المهم او الفارغ ابدا ***** و ختامها مسك :) اشهر كدبات بيقولها الرجل للست فى مصر..
و الكلام على لسان عمر طاهر برضه :)
- بصراحة انتى تستاهلى واحد احسن منى
- المشكلة عندى مش عندك..انا مش حابب فكرة الجواز
- اهلى ضاغطين عليا عشان اتجوز بنت عمى او بنت خالتى او بنت الجيران
- خلينا صحاب احسن
- علاقتنا مافيهاش كيميا
- انا مش قادر احبك زى مانتى بتحبينى قوى كدا
- انا هقفل بقى عشان داخل على لجنة
- كنت قافل الموبايل عشان كنت فى ميتنج
- ما رديتش اصلى كنت عند المدير او كنت سايق
- معلش اصل الموبايل فصل شحن
- عقلك اكتر حاجة عجبانى فيكى
- يا حبيبتى اعملى اللى انتى عايزاه
(دا لما يكون اللى انتى عايزاه نفس اللى هو عايزه)
- على فكرة انتى اكتر واحدة فهمتينى فى الدنيا كلها - انا مستعد اتجوزك دلوقتى حالا (عندما يعرض هذا العرض على واحدة
يجب ان تتظاهر بالموافقة وقتها ستعرف مدى عمق الكذبة)
- لعلمك الاختلاف اللى بيننا هو اللى هيقربنا لبعض اكتر
- لما ببص فى عينيكى ما بقدرش اكدب عليكى
- اما تلاقيه مركز مع اليسا و مش حاسس انك جنبه فيقولك "لعلمك انا ما بتعجيبنيش اليسا اساسا..انا يهمنى جمال الروح اكتر"
- صدفة غريبة لعلمك انا كمان ما بسمعش غير فيروز!
- الحب حاجة و الجواز حاجة تانية
- دى حتى حماتى وحشانى
- الخروجة كلها رجالى
- تصدقى انا حتى مش فاكر اسمها ايه؟!
- دا انا حتى ماعرفش البانجو دا شكله ايه
- اول واحدة حبيتها ماتت فى حادثة او اتجوزت و سابت مصر او خانتنى مع اعز اصدقائى او اهلها رفضونى
- انا عضو اللجنة المنظمة للماراثون بتاع مستشفى السرطان الجديد و دايما بقضى تانى يوم العيد فى ملجأ ايتام بس مش بحب اقول الكلام دا كتير :D

السبت، 11 يوليو 2009

خطرفات جرنالية..

فى تصريح لدكتورة منى عمر نائبة وزير الخارجية لشئون القرن الافريقى بخصوص البحارة المصريين المختطفين فى الصومال قالت انه من المستحيل على الوزارة دفع الفدية حيث انه مفيش فى الميزانية بند مخصص لدفع الفدية عن المخطوفين!!! لانه حتى ورق التواليت بتتقدم بيه فواتير لما عرفت ان المقارنة دلوقتى بقت بين المواطن المصرى و ورق التواليت اتاكدت انه فعلا فى" قرن"..بس هو مش افريقى
***** اخر نكت ابو الغيط "وزارة الخارجية تدين باقوى لهجة ممكنة حادث مروة الشربينى" تقريبا الوزير عنده قريب بيبيع دوا ضغط و كلفه انه يجيبله زباين عشان الناس تعرف مدى العدل اللى حكومتنا فيه.. غزة عندنا زى القاهرة بالظبط..اللهجة القوية دايما موجودة عشان تدافع عنهم طيب غير شوية!
*****
وزارة الخارجية الايرانية تستدعى السفيرين الالمانى و الايطالى بطهران لادانة حادث مقتل مروة الشربينى مش دا اللى بيسموه صيد فى المية العكرة؟!
***** فى تصريح كوميدى جديد لنظيف بيوعد الشباب ب52 مشروع استثمارى عملاق هيطلعوا عليهم على حين غرة بعد انتهاء الازمة الاقتصادية و ما قالهمش هم كانوا فين قبل الازمة ولا هيطلعوا ازاى بعدها! وبيدعو فيه الشباب للاسراع ب"عجلة التنمية" و ما قالهمش ازاى حد ايا كان يسرع بعجلة مش منفوخة اساسا
*****
ابرك حاجة اتقالت عن الاشاعة المغرضة بتاعت تنحى مبارك و توريث جمال كاريكاتير اتنشر فى المصرى اليوم لاب بيدى ابنه جلابية مقطعة..عشان يكمل عليها!
***** حد يشرحلى الخيبة القوية الجديدة بتاعت الكوتة المخصصة للمراة فى مجلس الشعب
قالوا ان الهدف منها هو المساهمة فى "تمكين" المراة
بس ما شرحوش هم هيمكنوها من ايه بالظبط؟!
*****
فى دعوة جديدة من نوعها على الفيس بوك جروب جديد باسم "سيبها تعنس" بيدعو لمقاطعة الجواز فى شهر مارس كاعلان عن الغضب من تكاليف الجواز و الطلبات المبالغ فيها لاهل العروسة رد فعل منطقى جدا لمجتمع اتقلبت معاييره بيقيس الرجولة بقدرة الراجل على شرب بيريل و حجم جيب بنطلونه! *****
نقطة و من اول السطر.. عند مولدنا..نحتاج الاخرين حتى نستطيع ان نعيش و فى نهاية حياتنا نحتاج الاخرين حتى نستطيع ان نتعايش و لكن السر هو:اننا فى الفترة بين الميلاد و الموت..نحتاجهم ايضا Tuesdays with Morrie

الخميس، 9 يوليو 2009

The Freedom of letting go

قد عفوت رجاء أن يعفو الله عني..
"وَأَن تَعْفُواْ أَقْرَبُ لِلتَّقْوَى"
صدق الله العظيم

الاثنين، 6 يوليو 2009

شخبطة (2)

حدث بالفعل..
- مستغربة انى بتوه الموضوع؟ - جدا بصراحة - ما اتعودتش ابهدل بنات الناس معايا - ماحدش قالك بهدلها..بس على الاقل اديها حق الاختيار - كرامتى اولا - هى كمان بتحبك..و انت عارف انها محتاجة حد ياخد باله منها - اديكى قلتى ياخد باله منها..مش يعذبها معاه - و بعدين؟ - انا معجب بيها جدا..بس انا ما معيش فلوس احب
*****
نقط نور.. فى ناس وجودهم فى حياتنا بيديها معنى اكبر بكتير من اللى تستاهله مش شرط نكون بنشوفهم كل يوم و مش شرط يكونوا من ثوابت يومنا ولا شرط يكونوا اهل او حتى صحاب قريبين كفاية ان ظهورهم بيكون دايما فى الوقت الصح سلمى..لو جيتى هنا فى يوم..اعرفى انك من اهم الناس دول
*****
حشرية.. - مسكينة.. مضللة و مش عارفة ايه مستنيكى اللى زيك هيعيشوا فاكرين نفسهم ضامنين الجنة
و هم مصيرهم جهنم و بئس المصير - مسكين.. مغيب و هتفضل طول عمرك شايف الدنيا من خرم ابرة.. اللى زيك عمرهم ما بيعرفوا من الدين غير جلد الذات
و الرضا عمره ما بيدخل قلوبهم
*****
مبررات..مبررات..مبررات عندما تركها تسافر بدعوى كونه "متحضر" عرفت وقتها فقط
ان ما اعتبرته هى "اغلى من حياتها"كان بالنسبة له مجرد "نزوة"
*****
اكتشاف لو كل راجل سمع اللى مراته بتقوله عليه
فى قعدات الستات و محلات الكوافير و الجيم نص ستات مصر مش هيطلع عليهم صبح فى بيت اجوازهم
*****
يا لهوى.. - ازاى مش بتحبى الدستور؟!
كفاية انه الجرنال الحكومى الوحيد اللى مش بيقول غير الحقيقة
*****

فراق فقط لانها عندما تحزن تكون "الست" ملجأها الاخير و عندما يحزن هو تعلو موسيقى بيتهوفن فوق صوت احزانه اخبرها انه "مش هينفع"
*****
امتلاك احيانا يتحول الحب الى رغبة فى السيطرة و كثيرا ما تختلط الصداقة بالغيرة المرضية قديما قالت فيروز "انا عصفورة الساحات" فهى ليست ملكا لاحد..و لن تكون
*****

No comment - مالك؟ - ماليش..عايزة افضل ساكتة شوية - مخنوقة؟ - ايوة - شكلك باين - .... - احكيلى - مش قادرة - خلاص هحكيلك انا.. عارفة ان ... مات و ... دخلت المستشفى و ... بيقولوا انه بيموت و ... عندها ورم و لسه مش عارفين نوعه و ... اتيتم امبارح و عنده امتحان ماجيستير بكره و ... ضيع حياته و شكلنا مش هنتجوز.. خدينى فى حضنك عشان عايزة اعيط اوى و قوليلى بقى اعمل ايه؟
*****

سوء تفاهم عندما بدأ يشك فى قدرته على التعبير ظن انها لا تراه مع انها تراه جدا.. لكنها لا ترى انها تستحقه
*****
اسقاط.. الندل شايف كل الناس اندال و الكذاب بيشك فى كلام كل اللى حواليه و الخاين بيفترض الخيانة فى كل اللى يعرفوه افهم من كدا ايه؟
*****

عندما قالت: "مفيش حاجة اسمها اتخلقت عشانى..عشان انا ما اتخلقتش عشان حد!" فاجاب هو: - لانك لم تكونى ملكى منذ البداية..فانا ابدا لن اخسرك
*****

كلام عجبنى لماذا يختار الرئيس مبارك ان ينشر اولى مقالاته فى صحيفة امريكية و هو لديه صحف "شورى الشريف" التى تعطس اذا اصيب الرئيس بالزكام؟ محمود الكردوسي- المصرى اليوم
*****
ادراك
عندما يؤكدون انهم يتقبلون عيوبك
فتاكد ان اخر همهم هو ان يقبلوك كما انت صدق اللى قال "و من الحب ما قتل"
*****
ورقة ضغط فقط لو عرف كم يضغط عليها برقته معها..
*****
مقولة.. Only dead fish swim with the stream وحدها الاسماك الميتة هى التى تسبح مع التيار
*****
Reconsideration But how will I know who my soul mate is?
By taking risks, By risking failure, disappointment, disillusion, but never ceasing in your search for love. Brida-Paulo Coelho

الأحد، 5 يوليو 2009

Tuesdays with Morrie..درس فى الحياة ..و فى كل حاجة

بقالى زمن ما قريتش كتاب يأثر فيا للدرجة دى

الكتاب اللى اتباع منه 11 مليون نسخة على مستوى العالم و اتعمل فيلم مش هعرف اتكلم عنه لانى لسه تحت تأثير الصدمة.. صدمة ان كتاب يحرك فيا كم الاحاسيس دى الكتاب ببساطة عن قصة حقيقية جمعت بين الكاتب Mitch Albom و مدرسه فى الجامعة Morrie Scwhartz ابتدت قصتهم بيوم تخرج Mitch و وعده لاستاذه انه هيزوره و يفضل على اتصال بيه و كعادة الوعود اللى من النوع دا..عمرها ما بتتحقق بينشغل Mitch بحياته و بشغله لحد ما يلاقى Morrie فى انترفيو مع اشهر مذيع امريكى و بيعرف من الانترفيو دا ان استاذه المفضل عنده مرض خطير و باقيله ايام قليلة فى الدنيا فبيرجع يتصل بيه تانى و بتجمعهم قعدة كل تلات من كل اسبوع.. بيتعلم فيها Mitch من استاذه ازاى يكون بنى ادم مش مجرد الة شغلتها الوحيدة انها تنشغل عن الدنيا بجمع الفلوس علمه ازاى يتجرد من كل الامور السطحية اللى بتشغل البنى ادمين و تمنعهم من انهم يظهروا نقط ضعفهم و رغبتهم فى اوقات كتير فى انهم يعتمدوا على اللى حواليهم الرغبة الملحة اللى عند كل واحد فى انه يفضل دايما قوى فى عيون اللى حواليه حتى لو كان اضعف من الضعف فى عيون نفسه علمه يكون انسان بكل ما تحمله الكلمة من معانى علمه ازاى يمنع نفسه من انه يضيع عمره فى حالة اشفاق على الذات لانه رغم كل اللى هو بيعانى منه دا.. قرر انه ما يضيعش اكتر من عدد معين من الدقايق كل يوم الصبح يسمح لنفسه انها تصعب عليه.. و بقيت اليوم بيتعلم فيه ازاى يتعايش مع حقيقة مرضه و واقع موته و ازاى ان بنى ادم يكون عارف و متاكد انه بيموت.. و يتحمل كل الالام دى بصدر رحب و بحب غريب للحياة و رغبة اغرب فى انه يعيش الايام اللى بقياله زى ما هو عايز مش زى ما هو متوقع من اى حد فى مكانه بيتعلم ازاى ما يتكسفش من حقيقة اكبر منه..حقيقة المرض مش بس بيتعايش مع الواقع المر دا..لكنه بيستخلص منه فلسفة خاصة بيه "Well, i have to look at life uniquely now. Let’s face it I can't go shopping, I can't take care of the bank accounts. I can't take out the garbage. But i can sit here with my dwindling days And look at what I think is important in life. I have both the time and the reason to do that" و بيعرف معنى انه يكون عنده ثقافته الخاصة و انه يتمرد على ثقافة المجتمع الاستهلاكى الامريكى اللى حول البنى ادمين لروبوتس كل همهم انهم يشتغلوا و يعملوا فلوس لالات "بتنشغل عن انسانيتها بدراما الاخرين" على حد تعبير الكاتب و بتغرق فى تفاهات الدنيا و بتنسى احتياجتها الانسانية فى انها تتواصل مع اللى حواليها I worked in the news business. I covered stories where people died .i interviewed grieving family members. I even attended the funerals. I never cried. Morrie, for the suffering of people half a world away ,was weeping"

Mitch كان مصدق دور القوى على طول الخط

و كان بيرفض يظهر مشاعره ناحية اقرب الناس ليه Mitchبعد ما كتب الكتاب اهداه لاخوه

اللى كان مريض بالسرطان و وصفه بانه اشجع بنى ادم عرفه فى حياته.. Morrie بيقرر يعمل جنازته و هو عايش عشان يسمع من اهله و صحابه و الناس اللى يهموه الكلام اللى عمره ما كان هيسمعه.. لانهم كانوا هيقولوه متاخر اوى الكتاب دا خلانى فكرت.. يا ترى انا عملت فى حياتى اللى يخلى الناس اللى تهمنى تتكلم عنى زى ما اتكلموا عن Morrie يا ترى كنت مؤثرة فى حياة غيرى للدرجة اللى تخليه يفتكرنى بالخير بعد ما اموت؟ نصيحة لاى حد عايز يقرا كتاب عن قصة دافية تحسسه ان لسه فى بنى ادمين بيحسوا فى الدنيا..يقرا Tuesdays with Morrie

الكتاب ببساطة درس العمر

لواحد اتعلم ازاى يعيش من واحد على فراش الموت

نقطة و من اول السطر.. "You closed your eyes girl, that was the difference. Sometimes you cannot believe what you see you have to believe what you feel And if you are ever going to have other people trust you you must feel that you can trust them too, even when you are in the dark, even when you are falling" Morrie Schwartz