الثلاثاء، 30 ديسمبر 2008

كفاية خناق..وقت الدعاء

كان شايل الوانه كان رايح مدرسته وبيحلم بحصانه وبلعبه وطيارته ولما انطلق الغدر وموت حتي برأته و سال الدم الطاهر علي كراسته من هنا بنقول ارضنا .. عرضنا..دمنا ..أمنا وان مات ملايين مننا القدس هترجع لنا اب ومد بخوفه اديه يحمي بعمره ضناه ولما ارتعش الجسد الطفل وبقي في ايدين الله بكت العدرا الام وصرخت قالت ياولداه عاش الظلم المر الغادر سقط العدل وناح كان طفل فلسطيني وده بيته وده كل اللي جناه ده تاريخه وتاريخ اجداده ودي ارضه وسماه هنا جرجس ومحمد اصحاب والدين لله جه ظالم وسرق احلامهم كل املهم راح سلم بسلم وحرب بحرب شرع الله والدين وازاي نار تحرق في القلب ونفضل كده ساكتين ياعـــــــرب لمو الصف و اقروا صلاح الدين عمره مافرط مره في حقه وده كان اقوى سلاح لو جه ظالم مره وطردك من بيتك ورماك وبيزرع علي ارضك حقد ومن دمك اشواك مش نار الظلم وجرحك تتحول لهلاك وتعلم اولاد اولادك ان الثوره كفـــــــاح لما نمد ايدينا لغيرنا ويبقي الرد نيران لازم يبقي سلاحنا في ايدينا عشان العدل يبان كل العالم يسمع صوتنا الطالع بالاحزان جيل يستشهد يطلع غيره و الموت للسفاح الارض عشان نزرع فيها يامحمد ونموت بكره الحق هيرجع لينا ملعون اي سكوت صوتك وانت في موتك عالي اغلي واروع صوت هيحول جلادك نكره واعدائك اشباح.. ****** اهداء لارواح الشهيدتين الطفلتين لما و هيا حمدان يا ريت فى ايدينا اكتر من الكلام.. "وَلاَ تَهِنُوا وَلاَ تَحْزَنُوا وَأَنتُمُ الأَعْلَوْنَ إِن كُنتُم مُّؤْمِنِينَ"

*********

للتبرعات بجمعية الهلال الاحمر المصرى التفاصيل فى مدونة بت خيخة و اى كلام انا اتكلمت و عرفت انهم محتاجين تبرعات مالية لاهل غزة و و دى بتروح مباشرة من الجمعية لهناك او تبرعات عينية للمستشفى نفسها و للجرحى اللى بيتعالجوا فيها كراسي متحركة و عكاكيز و ملايات و فرش للسراير

الأحد، 28 ديسمبر 2008

واحد زائد واحد مش دايما بيساوى اتنين!!

المنطق بيقول ان اللى محتاج علاج بيروح لشخص معاه دكتوراه فى الطب و ان اللى محتاج يبنى بيت بيروح للى معاه بكالوريوس هندسة الواقع بيقول ان اغلب الناس بيفضلوا
مهندس طالع بتقدير ضعيف جدا..او دكتور طالع بمادتين على دكتورة معاها مرتبة الشرف..او مهندسة تقديرها امتياز المنطق بيقول ان الازمة الامريكية الاخيرة هتقضى على قطاع الاعمال الخاص لفترة مش قليلة و الواقع بيقول انها احسن فرصة للى بياخد اول خطوة فى شغله عشان يتعلم فى سنة اللى كان هيتعلمه فى سنتين مفيش امتع من الشغل تحت الضغط.. احسن طريقة لتمييز الخايب من اللى يستاهل يكمل فى مكانه بس للى يفهم ده! المنطق بيقول ان كلاب الشوارع اللى بيجيلها سعار على اى انثى معدية هتلم نفسها بعد الحكم المشدد اللى طلع على اتنين منهم الواقع بيقول ان لسه فى رجالة كتير فى الدنيا
بيمشوا على مبدأ"عايز واحدة تهزقنى" ! المنطق بيقول انك لما تعمل نفس الحاجة بنفس الطريقة و تتفقس و ترجع تعملها تانى فاعرف انك غبى الواقع بيقول ان اسرائيل هى اللى قطعت كبلات النت هى نظرية المؤامرة مسلسل من كام جزء بالظبط؟!! المنطق بيقول انك لما توصل فوق تبقى حققت كل اللى بتتمناه و الواقع بيقول انك مش هتحس بسعادة الوصول لفوق الا لو ابتديت من تحت المنطق بيقول ان لو كل الناس اجمعوا على رسمة واحدة و انها بتمثل شكل واحد فلازم انت كمان تقول زيهم الواقع بيقول انك لما يكون عندك وجهة نظر بتاعتك لوحدك هتقدر تخليهم كلهم يشوفوا نفس الشكل اللى انت شايفه..
حتى لو ما كانش كده المنطق بيقول استمد قوتك من اللى حواليك عشان مفيش مخلوق بيقدر يعيش لوحده الواقع بيقول ان اللى مش مقدر قيمة نفسه عمره ما هيلاقى التقدير ده من حد الناس مش بتشوفك زى ما هم عايزين يشوفوك.. نظرة الناس ليك انعكاس لصورتك فى نظر نفسك المنطق بيقول ان واحد حكومة بلده ضيعت عليه اربع سنين من عمره فى الجيش و خلته طلع يبتدى من الصفر..او تحت الصفر فى حين ان زمايله كلهم ثبتوا رجلهم فى شغل محترم و خدوا فيه اكتر من خطوة هيطلع ناقم على البلد و اللى جابوها الواقع بيقول ان اللى اتعمل فيه كده طلع بحافز انه يثبت نفسه فى مجاله و يسبق اللى ابتدوا قبله من سنين و يكون شعاره فى الحياة ان البلد دى تستاهل و ليها حق علينا الراجل ده ادانى درس واقعى
عن الفرق بين اللى مقضى عمره فى الندب و اللى مش بيشوف غير نص الكوباية المليان المنطق بيقول ان اللى بيحط صورة محددة لشريك حياته مش هيتجوز غير الشخص اللى بالمواصفات دى الواقع بيقول ان اللى بيحبها بيضا بيتجوزها سمرا و اللى بتطلبه غنى بتتجوزه شحات (ده فى حالة ان كل الاصوات تسكت
و ما يفضلش غير صوت الحب) المنطق بيقول ان سواق التاكسي اللى مشغل قران و مربى دقن اطول منى هيراعى ربنا فى اللى بيطلبه من الزبون الواقع بيقول ان ده ما بقاش له اى علاقة باى حاجة و اذا اردت ان تصمد هنا..انضم الى صفوف المنافقين المنطق بيقول ان كل البنات بتتكسف الواقع بيقول ان الفنانة المبجلة المحترمة روبى بتتكسف تغنى فى "البيت بيتك" و مش بتتكسف تنسى تلبس هدومها فى "الوعد" المنطق بيقول ان اللى عايز يغير بجد و نفسه يكون ايجابى بيلاقى تشجيع قوى من كل مؤسسات الدولة خصوصا لو كانت فاشلة عشان تخبى فشلها ورا دعمها المزيف للايجابية و الايجابيين و تلهى الناس عن بلاويها اللى مش بتخلص الواقع بيقول ان ده بيحصل فى اى مكان..الا هنا المنطق بيقول ان اللى بيشتغل مدرس 28 سنة بيزهق من شكل الطلبة و الكراريس و اللى بيشتغل سباك 28 سنة بيزهق من الحمامات و اللى بيشتغل فنى لحام 28 سنة بيطق من شكل النار و الحديد و ملحقاتهم و اللى بيشتغل سمكرى عربيات 28 سنة
رئته بتتعب من البوية و مش بعيد يجيله سرطان الواقع بيقول ان ال28 سنة متعبين فى كل الشغلانات..الا دى!!! (عشان الناس اللى مخها بيروح لبعيد:ا
نا اقصد موجابى رئيس زيمبابوى طبعا) المنطق بيقول انك لو شايف حياتك بشكل معين من سنين يبقى اكيد اللى انت شايفه ده هو الحقيقة الواقع بيقول انه مش شرط عشان انت شايفها كده تكون هى كده عايز تشوفها حلوة..ببساطة غير النضارة المنطق بيقول انه كان المفروض هنا يكون فى كلام عن اللى حاصل فى غزة الواقع بيقول انى سبت الكلام للحكام العرب..
بس ما حدش يجيب سيرة مصر عشان حقيقي زودوها
ربنا يتولاهم برحمته..

ادراكات..

الغموض لا يناسبنى.. و مدعين الغموض الساعين للفت الانتباه اغبى من ان اكون منهم و لكن ليس ذنبى انك لا تفهمنى..
فانا 100 امرأة اجتمعن فى جسد امرأة واحدة و يقولون ان التعامل مع حواء واحدة صعبا!!
#####
لا اهتم بالسياسة حتى الاقى مكانا لى فى حياتك فالاعيب النساء لا تناسبنى و لن اتعلمها ولا اهتم بالطبخ حتى تجد ما تأكله اطبخ فقط لانى احبك.. فعندما اتوقف عن الطبخ من اجلك..اعلم اننى توقفت عن حبك
#####
لانى عرفتك اكثر من نفسك لعنت نفسي و لعنت عقلى تمنيت ان يكون ما عرفته وهما فأن اخسر جزءا من ذكائى.. افضل عندى من ان تتشوه صورتك النقية المرسومة داخلى
#####
كنا و كان و كانت فاصبحنا و اصبح و اصبحت ليه مفيش حاجة بتفضل على حالها؟
#####
عندما رأت نظرات التصديق و الاقتناع التام فى اعينهم عرفت انها تمتلك موهبة التمثيل
#####
ان اصعب انواع الوهم هو الوهم الذى تصنعه انت و تستمر فيه حتى تصدقه فتؤمن بانه فى حقيقة الموت و الحياة حتى تأتى اللحظة المنتطرة لتكتشف انه لم يكن مزيفا..
و ان عقلك انت هو ما كان مغيبا
#####
قلت اننى لا احب الادب و الاشعار فتعجبت لكونى بهذه الواقعية.. فالفتيات لا يفتنهن الا الكلام المغطى بالالوان .. المحلى بالسكر فقالت انها تعشق اشعار نزار
و ترقص على موسيقى كلمات شوقى و ناجى فوقفت مشدوها بها..
مع انها لم تقرأ حرفا فى غير مجلات البشرة و تصفيفات الشعر لو كنت اعلم ان النفاق هو طريقى لقلبك.. ما كنت تحملت عناء جمع بقايا حياتى لاهديها اليك
#####
عجيب امر الكلمات وحدها تمتلك القدرة على اللعب باوتار القلب
و تحريكها فى كافة الاتجاهات فالكلمة تحيى و تميت..تفرح و تشقى..تعطى الامل و تضفى اليأس.. تمنيت كثيرا ان افقد اذناى قبل ان اسمع منك ما يجعلنى اعرف ان حقيقتك التى رسمتها.. ما هى الا حبر ملكى رسمته على ورق تمتلكه الحياة
##### و كلما ازدادوا قربا منك.. كلما زادت قدرتهم على قهرك باسم الحب.. و الضغط عليك باسم العشم.. و محاصرة حياتك و انتهاك خصوصيتك باسم الصداقة
#####
الم تقولى انك توأم روحى؟ لم تطالبينى الان بان احكى لك تاريخ حياتى الا يولد التوائم فى يوم واحد..من رحم واحد.. عليكى ان تعرف تاريخى وحدك فموهبة الكلام ضاعت منى
كغيرها من مواهبى الصغيرة التى ابتلعتها الحياة
#####
الانانية هى ان تفكر فى نفسك و مصلحتك و مستقبلك و حياتك الانانية هى ان تفعل ما يسعدك فى الوقت الذى تريد مع الشخص الذى تحب اذن فالانانية هى ان تكون انسان قررت اكون انانية!
#####
لم احلم يوما بان اكون ملاكا فقط طالبت ان اقبل كما انا..
الا اتقبل سخافات الاخرين التى تفوق السماء طولا؟ حقى فى الحياة ان اقبل كما انا لا كما اردت انت ان اكون
#####
ان تخطئ فى حق غيرك فهذا يستوجب الاعتذار من الممكن ان يهين الاعتذاركرامتك.. و لكن من غير الممكن ان تطالب غيرك بالاعتذار
عن خطأ ارتكبته انت فى حقهم.. فالقهر مؤلم بما فيه الكفاية..
و لكن ان يأتى منك انت فهذا فوق قدرتى على الاحتمال
#####
ليس غريبا ان تنجذب الى ما يشقيك
فنظرية الممنوع مرغوب انعكاس للطبيعة البشرية و لكن الغريب اكتشافك ان الشيء الوحيد الذى يسعدك
هو اكثر شيء مارست معه لعبة الهروب
#####
بعد اربع سنين رجعت ريما لعادتها القديمة و بعد سنتين اكتشفت ان مفيش حد بيتغير اعتبرها قاعدة؟!
#####
الحب موهبة اكتشفت اننى لا امتلكها!
#####
انا لا ابكى على اللبن المسكوب..
فدموعى اغلى من ان تهدر على ضائع لكنى ابكى على اشياء ما كان لها ان تضيع..
و لكنها تاهت فى زحام الحياة
#####
ليس انتحارا ان تقطع شرايين يديك الانتحار الحقيقى هو ان تقف امام المدفع و تدعوها شجاعة
##### طيري يا طيارة طيري يا ورق و خيطان بدي ارجع بنت صغيرة على سطح الجيران علي فوق سطوح بعاد عالنسمة الخجولة أخدوني معهن الأولاد و ردوا لي الطفولة ضحكات الصبيان و غناني زمان ردت لي كتبي و مدرستي و العمر اللي كان و ينساني الزمان على سطح الجيران لو فينا نهرب و نطير مع هالورق الطاير تا نكبر بعد بكير شو صاير شو صاير يا زهر الرمان ميل بهالبستان تيتسلوا صغار الأرض و يحلو الزمان و ينساني الزمان على سطح الجيران
#####
عندما ترانى قوية..فاعلم وقتها..وقتها فقط..اننى فى اعمق لحظات ضعفى

الخميس، 18 ديسمبر 2008

كشف حساب..

هموت و اعرف التليفزيون بتاعنا ده معمول لمين؟ يعنى مين اللى بيتفرج عليه و بيتفرج عليه ليه؟ كم غير طبيعى من الهيافة و التخلف و السماجة.. و برامج اكل عليها الدهر و شرب زى ما المثقفين بيقولوا من ضمنها برنامج فاشل اسمه افتكاسات بييجى على القناة التانية يستحق و بجدارة جايزة اهبل برنامج فى 2008 على قد سخافته
الا انه بيعبر عن ثقافة الفتى الرهيييبة اللى بيتمتع بيها ناس كتير اللى فكرنى بالبرنامج يوم قررت انزل مشوار فى جاردن سيتى غلطت غلطة عمرى و سألت العسكرى عن مكان الشارع فرد بكل تلقائية:هم قالولك انه فى جاردن سيتى؟! يعنى ايه احتمالية انهم يكونوا قالولى انه فى مدينة نصر مثلا و انى اكون رحت جاردن سيتى كنوع من انواع التغليس على نفسي؟ المهم فى مرة كانت المذيعة بتسأل عن حاجة اسمها الحقن الالكترونى ... طلعت حاجة ليها علاقة بالعربيات اجابات الناس بقى كانت ما بين
سرنجة متخصصة بيدوها دكاترة متخصصين و نوع من انواع الايداع فى البنوك و استطرد الفتاى قائلا
ان الحقن ده له اهداف عظيمة و بيريح ناس كتير تعبانة و سؤال عن العضو المنتدب قالوا انه العضو اللى فيه منه اتنين فى الجسم زى الكلى و العينين و المفاجأة ان اللى جاوب الاجابة العبقرية دى دكتور او انه عضو فى مجلس الشعب بيخدم الناس و واخد اجماع الاصوات فى دايرته و فى سؤال تانى عن الصندوق الاجتماعى من ضمن الاجابات كانت انه صندوق لبنى بيتحط على باب الجامع عشان يلموا تبرعات للمحتاجين هى كلمة مش عارف دى صعبة اوى؟!! يكونش 80 مليون غبي ده كان هدف فى برنامج الريس الانتخابى؟
******** بقالى فترة متابعة مدونة لواحد ملحد كنت اعرف ناس ملحدين لكن اول مرة اتعمق للدرجة دى فى فكرهم اغلبهم مثقفين بدرجة كبيرة..
لدرجة تخلى المناقشة معاهم صعبة بجد الا على نوعين نوع بيشتم و يقل ادبه متخيل ان دى غيرة على دينه و بما ان دى مش طريقتى فانا ما حاولتش اتبع الاسلوب ده و نوع تانى بيعرف يدخل فى جدل عميق معاهم و تلاقى المناقشات بتتفرع..المعتزلة..الخوارج..الشيعة..السنة..حروب الردة الدولة المدنية..العلمانية..حقوق الاقليات.. و ده برضه ما كنتش هعرف اعمله نظرا لافتقارى للمعلومات الكافية لكن اللى بجد حيرنى.. قدرة بعض الناس على انهم يستكبروا على الفطرة افتكرت مقولة الشيخ الغزالى: "أنا لا أخشي علي الإنسان الذي يفكر وإن ضل لأنه سيعود إلي الحق , ولكني أخشي علي الإنسان الذي لا يفكر وإن اهتدي لأنه سيكون كالقشة في مهب الريح" بحترم جدا حرية الانسان فى اختيار مقدساته..لكن ده مجرد تأمل ******** حد عارف ايه حكاية الستات اللى "بيقروا" الودع فى جامعة الدول بجد بقت ظاهرة غريبة و كلهم عارفين اللى فى بالى و شاغلنى و شغلاه!! الفكرة انهم بطلوا السبت الكبير بتاع الرمل زى اللى كانت نيللى بتمسكه فى فوازير عالم ورق و بقوا بيشتغلوا ب3 ودعات يتما و قال دول اللى هيجيبولى الخبر اليقين! الغريب بقى ان ليهم زباين..و من الجنسين!!!
******** فى ناس فى الدنيا يستاهلوا جايزة نوبل فى التمثيل احسن ناس تعمل نفسها مهتمة و متشحتفة و الدموع هتفر من عينها و هم فى الحقيقة مش عايزين اكتر من قصة تسليهم و يحكوا تفاصيلها لبعض فى قعدات النميمة هى الناس دى مش ناوية تنقرض من الحياة؟
******** فى حياتى شخصين اطيب من بعض القعدة مع اى واحد فيهم لمدة اكتر من ربع ساعة بتحسسنى انى محتاجة ارمى نفسي من اقرب شباك هل ده بيرجع مثلا لكم مهول من الشر جوايا؟ وصلت لان مش كل من كان طيب ينفع يتقعد معاه اكتر من 15 دقيقة
******** احترف الحزن و الانتظار ارتقب الاتى ولا يأتى تبددت زنابق الوقت.. عشرون عاما و انا..احترف الحزن فيروز بتقول كده بس انا عندى امل ان اللى جاى ان شاء الله احسن يا رب احساسى يكون فى محله.. ******** بحب اقرا الابراج بتاعت الجرايد يوميا كنوع من انواع التسلية بقالهم اسبوع تقريبا كل يوم يكتبوا جمل من نوعية عندك حس سخرية عالى
و قدرة على اضحاك الاخرين و اضفاء البهجة على من حولك فلتت منهم جامد يعنى..
ده انا لو بشتغل اراجوز بعد الضهر مش هعمل كل ده بعيداعن مدى الفشر الواضح فى الابراج و فى اللى بيكتبوها مش عارفة ايه سبب الفشخرة الغريبة اللى بتركبنى و انا بقول انى من مواليد برج العقرب المهم ان الست اللى بتكتب حظك اليوم دى بيسموها دكتورة يعنى ممكن تكون واخدة دكتوراه فى ايه مثلا..كوكب زحل؟ ******** To be trusted is a greater compliment
than to be loved من اكتر المقولات اللى بقتنع بيها العلاقة المبنية على ثقة اقوى بكتير من العلاقة المبنية على حب الحب مافيهوش مجال للاختيار لكن الثقة اساسها اختيار
******** Love is knowing you will spend every day of every week
of every month of every season of every year for the rest of your life with this person , and thinking, 'This is exactly what I want
بيتهيألى ان اللى فاضل عنده ذرة رومانسية
بعد ما يقرا الجملة دى هيغير رأيه ايه الملل ده!! ******** احب من الاسماء ما شابه اسمها و وافقه او كان منه مدانيا اعد الليالى ليلة بعد ليلة و قد عشت دهرا لا اعد الليالى فيا رب سوى الحب بينى و بينها يكون كفافا لا على ولا ليا و قد يجمع الله الشتيتين بعدما يظنان كل الظن ان لا تلاقيا
مش عارفة ليه معلقة معايا اوى اليومين دول زى مانا مش عارفة ايه الارتباط الشرطى
بين فيروز و الشتا و الرومانسية ******** "ان تصفح يعنى ان تطلق صراح سجينا
و ان تفاجأ بان هذا السجين.. هو انت!" طيب و اللى مش قادر يلاقى فى نفسه القدرة على انه يسامح..يعمل ايه؟
******** "طالت نوى و بكى من شوقه الوتر خذنى بعينيك و اهرب ايها القمر" حلم بعيد..لكن عمره ماغاب عن بالى بس انا مش هسميه هروب..هسميه فترة نقاهة ******** ادراكات اذا شعرت بطن غضب.. ابحث عن طنين هدوء حتى تعى ما تقول قبل ان تقوله فاذا اغضبوك اجعل عزائك الوحيد العفو عند المقدرة فوقاحة البعض ليست سببا كافيا لاظهار وقاحتك &&& اعمل الخير و ارميه البحر.. بس و انت بترميه اتاكد انك بترميه بجد في فتفوتة بتفضل شغالة فى المخ و بتقول ان المنطقى انك زى ما بتعامل الناس هيعاملوك الفكرة دى اثبتت فشلها الذريع معايا &&& لا تلوم الاخرين لعجزهم عن فهم ما تمر به لم الزمن الذى حملك بما يفوق قدرتك على الاحتمال..و قدرتهم على الاستيعاب &&& فى جملة قريتها فى مدونة عجبتنى اوى "حزام العفة على خصرى..و لكن العفة هى ان استطيع و امتنع" فالسؤال مش هيكون انا لو غمضت هفضل محافظة على مبادئي ولا لأ؟ السؤال اللى فى محله هو لو فضلت مفتحة مين هيراقبنى..
الناس ولا ضميرى؟ &&& Trust no one tell your secrets to nobody and no one will ever betray you صعبة اوى القناعة دى..لكنها حقيقية الى حد كبير &&& ادركت ان كثيرين هم من اعرفهم و يعرفونى و قليلين جدا هم من عرفوا من انا..
******** قريت مذكراتى القديمة بتاعت 2004 و 2005
و لقيتنى كاتبة كلام غريب عجيب و كلام كبير زى انى ما بحبش حد يقتحم حياتى و ان حريتى مقدسة و انى بكره السؤال بتاع "مالك"..و انى ما بحبش اعمل عيد ميلادى لقيتنى ما اتغيرتش..نهائى يعنى نفس الدماغ و نفس الاحساس و نفس الحلم..و نفس نقطة الضعف قررت ارجع اكتب مذكراتى تانى..
******** 2008 فى سطور بدايتها كانت مسؤولية عائلية كبيرة و الحمد لله طلعت قدها و دخول عالم عمرى ما كنت اتخيل انى ممكن ادخله فى يوم من الايام مع اقتناع تام بانى مش هكمل فيه اكتر من شهرين..
و ادينى لسه قاعدة و دخول بنى ادمين من ارقى ما يكون فى حياتى.. و مش محتاجة اقول اسماء..انتوا اكيد عارفين فى نصها كانت نهاية حياتى الدراسية و رجوعى تانى للقراية بعد مقاطعة استمرت فترة طويلة و يوم مرض حسيت فيه ان الموت قريب اوى.. و فى اخرها كان سفر اقرب اتنين ليا من صحابى و اتاكدت تماما ان البعيد عن العين عمره ما كان بعيد عن القلب و رجوع صديقة عزيزة عليا اوى لحياتى بعد اربع سنين و ان كانت اراءها فيا عملالى ضغط عصبى رهيب عشان اقدر اكون عند حسن ظنها بيا زى ما انا من غير تمثيل.. و شغل ما حلمتش بيه اوى بس اعتبرته انتصار شخصى ليا ناس جديدة دخلت حياتى..ما فرحتش بيهم اوى بصراحة و نهايتها اصعب موقف عدى عليا فى حياتى..
او على الاقل من اصعبهم مع احساسين متناقضين تماما فرحة بخطوة كان لازم تتاخد من زمان..
و بقوة غريبة اكتشفتها فى نفسي و حزن اقوى منى على شخص غالى اوى عندى لحد دلوقتى مش عارفة انهى احساس اقوى من التانى.. 2008 ابتدت بصدمة اقوى من احتمالى و انتهت برغبة قوية جدا فى الانعزال عن الدنيا مع صراع داخلى عنيف مفاده "اكون او لا اكون" و انتظار قوى للخروج.. يا منها يا بيها..و لسه ما حددتش مين فيهم هيكسب فى الاخر يا ترى 2009 مخبية ايه؟ كل سنة و انتوا طيبين
******** بجد مش عارفة ايه كمية الرغى دى ولا ايه علاقة الكلام ببعضه..ولا علاقة العنوان بالموضوع و يمكن يكون في حاجات كتيرة مش مفهومة بس اللى حصل بقى :)

الأحد، 14 ديسمبر 2008

مشاهد...

نقطة رجوع!
كانوا يرونها.. مختلفة كثيرا ما اعتبرت نظرات الاندهاش و وجوه المندهشين
من الاشياء المألوفة لديها فالحواجب المرفوعة و الافواه المفتوحة و حركات الايدى الغير مدروسة.. ثوابت اساسية فى حياتها اليومية مثلهم مثل قهوة الصباح و جريدتها المفضلة فكلها اشياء تعودت عليها
حتى اصبحت كل تفصيلة منهم جزءا اساسيا من يومها تعجبوا لاراءها..فازدادت تمسكا بها استنكروا اهتماماتها..فلم تهتم..فهكذا خلقت و هكذا هى حاولوا "تصليحها" ..ففشلوا..
فهى لم تكن يوما مكسورة حتى يحاولوا ترميمها استفزت الكثيرين..و اثارت فضول البعض و لكن احدا لم يستطع ان يدخل الى اعماقها.. فكانت خصوصيتها مقدسة..
و حريتها سورا دائما بينها و بين المتطفلين فلم تفعل سوى ما تؤمن به و لم تقل سوى ما تعنيه فلسفتها ان الحياة قصيرة..
لا وقت فيها للندم على نفاق مضى او وهم قادم كثيرون هم من نصحوها بانها بنت فى مجتمع شرقي.. مجتمع يعرف من القيود و المحظورات
اكثر مما يعرف من المسموحات مجتمع لا يعترف بالحرية سوى لجنس واحد مجتمع لم يقرا اعلان حقوق الانسان
الذى كفل الحرية لكل كائن حى يدعى انسان و لكنها لم تهتم.. فحدودها هى التى تضعها
و ليس مجتمع معقد مريض وضع القهر مرادفا للانوثة لم تكن يوما تطمح فى الاختلاف كل ما طمحت اليه..
حياة عادية تعيشها كما تريد..و ترسم تفاصيلها كما تتمنى كانت ترى فى صوت فيروز اكسير الحياة.. و فى برد الشتاء غذاء للروح.. و فى المطر نقاء غريبا يعوضها عن نقاء اخر كان مكانه فى القلوب و فى لون البحر
عمقا طالما بحثت عنه فى عيون الكثيرين..
و حبيبا فى زمن لا يعرف الحب شعارها فى الحياة ان الطموح لا سقف له.. و ان الايمان اساس الوجود.. و ان راحة البال لا تأتى الا بالبساطة و العفوية كانت معتدة بافكارها..مستنكرة لضعف الكثيرين امام مطبات الحياة فما مرت عليها عاصفة الا و تركتها اقوى مما كانت و ما عرفت مصاعب الا و عبرت منها منتصرة..
او هكذا كانت تعتقد لديها قائمة كبيرة من الاهتمامات..
اخرها ارضاء مجتمع لا يعرف الرضاء فاصبحت نصيحتها الدائمة لصديقتها المقربة
هى ان تفعل ما تريد لا ما يريدونه هم و لم يرضى غرورها يوما رغبة صديقتها فى حياة تشبه حياتها فهى تشفق عليها من حياة لو كان بيدها ما اختارتها ففى قمة شعورها بنصرها الشخصى..
فاجئتها الحياة بمطب اخر مستحيل التجاوز فما اعتبرته بديهيا اصبحت حوله الكثير من الشكوك
لدرجة هزت ثقتها فيما اعتبرته يوما من اساسيات فتسائلت..ماذا لو لم تعرف القيادة يوما و اكتفت بمقاعد الركاب؟ فما اصعب انهيار حياة كاملة فى لحظة يتوقف فيها الزمن ليكشف عن تحول المقدسات الى وهم كبير لا يراه سوى صاحبه
ماتت المحاربة داخلها..فانضمت الى صفوف المستسلمين **********
زى كل حاجة حلوة..
كانت نسمة حلوة فى حياة كل اللى حواليها..
لأ كانت احلى حاجة فى حياتهم وجودها لوحده كان كفيل بانه يهون عليهم اى حاجة..
مهما كانت صعبة كانوا بيستغربوا هى بتعمل ايه هنا..
اللى زيها مكانهم مش مع البنى ادمين اسئلة كتير كانوا بيسألوها لنفسهم هى ازاى بتاكل زينا؟ هى ازاى نقية كده؟ هى بجد؟ كانت بتبتسم دايما لما تشوف انبهار الناس بيها..
كانت عارفة اهميتها عندهم كانوا كلهم عارفين نقطة ضعفها..
كلمة لأ مش فى قاموسها..
خصوصا قدام اللى بيحتاجولها لكن هى كانت بالنسبالها مختلفة..
زى ما هى كمان اعتبرتها فى مكانة تانية غير كل الناس ما كانتش عايزة منها حاجة..كانت مكتفية بانها..موجودة "ملاكها الحارس" زى ما كانت بتسميها.. ما كانش لها طلبات فى الدنيا..كانت من النوع اللى بيدى و بس حاجة واحدة عاشت عشانها عمرها كله "اشوفك فى الكوشة مع واحد يستاهلك" كانت بتزعل اوى من ردودها الطفولية على طلبها ده و كانت بتستنكر تفكيرها و اعتراضها المستمر على الفكرة قالتلها انها اتمنت قبل كده تعيش لحد ما تشوفها بتتخرج من المدرسة و بعدين طمعت تشوف شهادة الجامعة فى ايديها و بعدين اتمنت من ربنا تعيش و تشوفها بتشتغل دلوقتى هى لسه طمعانة فى امل اخير
هيريح بالها و يطمنها عليها على حد تعبيرها استنت اليوم ده كتير..و ما صدقتش نفسها لما لقيته قرب صحيت الصبح اسعد من اى يوم فى حياتها..كأنه فرحها هى باستها فى راسها و قالتلها انتى احلى عروسة فى الدنيا قالتلها انتى عارفة انا بحبك قد ايه..و انا عارفة مكانتى عندك اوعدينى انك مش هتزعلى انهاردة..ده اسعد يوم فى حياتك استغربت طلبها ..هزت راسها و قالتلها اكيد مسكت ايدها و ايده و قالتله خلى بالك منها..و ابتسمت دوروا عليها وقت الزفة..مالقوهاش مشيت و سابتها مع اللى تخيلت انه هيعوضها غيابها ..
**********
امرأة جميلة اخرى..
كانت بارعة الجمال ما رأها رجل الا و خطفت قلبه هم اللذين لم تجتمع قلوبهم على شيء من قبل اجتمعت عيونهم على هدف واحد.. قضاء اكبر قدر من الوقت فى النظر اليها كانت لهة "طلة" كما يقولون فما دخلت الى مكان الا و التفتت اليها العيون وتعلقت بها الارواح.. و تحول الجميع الى مسحورين بجمال لم تراه الاعين من قبل كثيرا منهم كان يتخيل انه من شدة جاذبيتها سيسمع اصوات فلاشات الكاميرات عند دخولها فنجمات السينما لا يقارن بها.. كانت كثيرا ما تختلى بنفسها و دائما ما تخرج من خلوتها بهيئة اكثر اشراقا من هيئتها الاولى.. فلم يحتاجوا للبحث عن مبررات لاختفائها فهى امرأة و جميلة.. مما يعنى انها تجمع كل مقومات التفاهة فى نظرهم فهى بالتاكيد تقضى هذه الجلسات السرية فى اصلاح هيئتها و وضع المزيد من الالوان على وجهها المبهر ليزداد اشراقا استراحوا لهذا التفسير كثيرا و قرروا الا يزعجوها فى خلوتها طالما كانوا قادرين على الاستمتاع بالنظر اليها عندما تخرج بالصورة الملائكية التى تعودوا عليها فهى بالنسبة لهم ليست سوى امرأة جميلة اخرى.. و تخيلوا انها لا ترى نفسها الا فى هذا القالب
فالجميلات عندهم نوعان
غانيات او بائسات لا هم لهن سوى لفت انظار الرجال و لكنها هذه المرة اخذت وقتا اكثر من المعتاد كانت انظارهم محدقة بالباب فى انتظار قدومها كالعادة..لكنها لم تأت تطوع احدهم بالذهاب اليها..فتح الباب و وقف مشدوها رأى عينان تفيضان بالدموع و صوتا رقيقا يردد فى خشوع: "طه مَا أَنزَلْنَا عَلَيْكَ الْقُرْآنَ لِتَشْقَى إِلاَّ تَذْكِرَةً لِّمَن يَخْشَى تَنزِيلا مِّمَّنْ خَلَقَ الأَرْضَ وَالسَّمَاوَاتِ الْعُلَى الرَّحْمَنُ عَلَى الْعَرْشِ اسْتَوَى لَهُ مَا فِي السَّمَاوَاتِ وَمَا فِي الأَرْضِ وَمَا بَيْنَهُمَا وَمَا تَحْتَ الثَّرَى وَإِن تَجْهَرْ بِالْقَوْلِ فَإِنَّهُ يَعْلَمُ السِّرَّ وَأَخْفَى اللَّهُ لا إِلَهَ إِلاَّ هُوَ لَهُ الأَسْمَاء الْحُسْنَى وَهَلْ أَتَاكَ حَدِيثُ مُوسَى إِذْ رَأَى نَارًا فَقَالَ لِأَهْلِهِ امْكُثُوا إِنِّي آنَسْتُ نَارًا لَّعَلِّي آتِيكُم مِّنْهَا بِقَبَسٍ أَوْ أَجِدُ عَلَى النَّارِ هُدًى فَلَمَّا أَتَاهَا نُودِي يَا مُوسَى إِنِّي أَنَا رَبُّكَ فَاخْلَعْ نَعْلَيْكَ إِنَّكَ بِالْوَادِ الْمُقَدَّسِ طُوًى وَأَنَا اخْتَرْتُكَ فَاسْتَمِعْ لِمَا يُوحَى.." لا عجب انها كانت تخرج بصورة احلى من التى تدخل بها فهى كانت..تصلى ********** "ذلك مبلغهم من العلم ان ربك هو اعلم بمن ضل عن سبيله و هو اعلم بمن اهتدى"

الجمعة، 12 ديسمبر 2008

تخاريف..(5)

شفت اليفط اللى فى مصر الجديدة بتاعت الشباب الجد اللى بيبنى مش بيهد هى قديمة بس انا اول مرة اشوفها.. فكرتنى بشعارات فيلم الجردل و الكنكة الشهيرة "الراجل الحق يحب الحق و فهمى بيه الراجل الحق" و" الاسفلت منور ليه ..المهيطل ماشى عليه" السؤال الغبى هيكون مين اللى حاططها؟ و السؤال الساذج هيبقى
"و هو اسم الله على شبابه كان عمل ايه للبلد؟" غير انه طلع التصريح العبقرى بتاع المعارضة اللى بترجعنا لورا.. عشان كده بقترح تغيير شعار الحزب الى.. "مصر بتتقدم بينا..لوحدنا"
"حداد فقير قتل لاجل حفنة جنيهات و مئات فقراء الروح مثلوا بالجثث مجانا
و هم يحتسون الشاى امام الحواسيب" فاطمة ناعوت ادق وصف لحالنا..ناس فقدت الرحمة و الباقى فقد الانسانية الله يرحم البنتين و يصبر اهلهم

وزير داخلية اليونان قدم استقالته عشان شاب واحد مات برصاص البوليس اليونانى ابتديت اشك انهم عاملين اوفر للوزير بتاعنا "على كل مواطن مقتول او مسحول او متعذب فى الاقسام خمس علب امير عشان يلزق اكتر فى الكرسى" هو ما ينفعش نبدل؟

فى خبرين اتنشروا جنب بعض فى المصرى اليوم "اكتر من 20000 مصلى اجتمعوا امام جامع مصطفى محمود لاداء صلاة العيد" "القبض على 50 شاب بتهمة التحرش ببنات فى وسط البلد" هم دول غير دول..ولا دول هم دول .. ولا دى نقرة و دى نقرة..ولا ايه بالظبط

بجد ما بقيتش فاهمة!!

وزير الطاقة الامريكى رفد عالم مصرى بدعوى انه بيهدد الامن القومى الامريكى فالعالم راجع مصر بلده عشان تستفيد من خبرته و العالم نسى ان وزارة التعليم العالى بتاعت مصر بلده كانت بعتت لعالم مصرى تانى بيشتغل فى ناسا عشان ييجى لوظيفته الحكومية و يراقب على الامتحانات و على راى الزعيم مصر بلده مش محتاجة علماء..مصر بلده محتاجة صيع

شعبان عبد الرحيم بطل السجاير و بقى يضرب حشيش حتى انت يا شعبولا طلعت منافق!

مواطن امريكى اخترع مرهم سماه مرهم اوباما المرهم ده بيتباع على ebay
و بيعالج الشيخوخة و بيبيض السنان و بينضف الازاز فكرته جابتلى فكرة نميسة فى دماغى فكرت اننا نصنع مرهم شبيه بس يكون بيجيب الشلل النصفى
و العته الدماغى و التخلف العقلى و التلوث السمعى و البصرى
و الزحمة و الفقر الازلى و التحرش و حوادث المحور و فشل التعليم
و فساد الستشفيات و السحابة السودة و نصدره للسويد عشان هم عندهم نقص جامد فى الحاجات دى نسميه ايه ؟ مش هقول اكيد..كل واحد و نيته بقى ****** مش فاهمة فين المشكلة فى ان شيخ الازهر سلم على بيريز يعنى النواب الحلوين اللى اتشمللوا و رافعين قضايا و عاملين حملات و مكلفين نفسهم ما كانوش عارفين يعترضوا على اللى اكبر من شيخ الازهر و مسلم بلده على الحديدة للى جاى وراه..و اهو كله سلام ساعات كتير بحس ان النواب بتوعنا عايشين فى زحل!

فتوى جديدة لدكتور على جمعة بافضلية ذبح اضحية العيد فى فلسطين كلامى مش هيعجب ناس كتير..لكن انا مش مقتنعة بالمرة ما ينفعش يبقى عندنا اكتر من 14 مليون مواطن
عايشين فى العشوائيات ..و ندبح فى فلسطين ما ينفعش يبقى عندنا دويقة
و صعيد منهار و ناس مش لاقية تاكل.. و ندبح فى فلسطين ما ينفعش تقرير البنك الدولى يقول ان 20% من المصريين بيعيشوا باقل من دولارين فى اليوم و ندبح فى فلسطين و ما ينفعش يكون عندنا 16% معدل فقر و ندبح فى فلسطين عفوا فضيلة المفتى..الدبح هناك مش "اولى"!

كاميرات لرصد التحرشات الجنسية فى حديقة الحيوان بعيدا عن التعليقات المستفزة على الخبر فى كل المواقع تقريبا و اللى ان دلت على حاجة فهى بتدل على جهل و تخلف و غباء عدد مش قليل من البنى ادمين بس مش دى الفكرة يعنى اسيب شغلى و الم البنات اللى اعرفهم و نروح نقعد فى جنينة الحيوانات؟! و بالنسبة للشوارع و الميادين و جامعة الدول و وسط البلد..ايه بقى؟ الا اذا كان الهدف من الكاميرات حماية ابو قردان من التحرش بالقردة الام فى جبلاية القرود هى الناس دى بتفكر ازاى؟!!

نكتة اليوم "السفير المصرى بالنمسا يطالب اسرائيل بالتوقيع على اتفاقية حظر انتشار الاسلحة النووية " مش كان من بدرى يا فوزية؟ اخر جملة دى من عندى مش من الخبر! و من موقعى هذا بهدى سيادة السفير اغنية العندليب الاسمر بعد ايه..بعد ايه..بعد ايه

الأربعاء، 3 ديسمبر 2008

انظر حولك و ابتسم..فانت فى قاهرة المعز

لن تحتاج اكثر من رحلة قصيرة الى الساحرة فى الشتاء..
الموكوسة فى الصيف "الاسكندرية" ليتضح الفرق المهول بين مدينتين تندرجان تحت اسم بلد واحد فرق شاسع ادركت متاخرة انه كان غايب عنى تماما..
و يا ريتنى ما عرفت شوارع نظيفة..ناس نظيفة..اسعار معقولة..مواصلات سهلة فى مقابل شوارع قذرة..
زحمة لا تطاق..
دوشة لا تنتهى..
مواصلات لا تفضى (عكس الزحمة يعنى) فى مقابل رحلة اليوم الواحد الى العاصمة
التى تم اختزال بلد باكمله فيها فاصبح اسمها مصر و اصبحت الفشخرة بالانتماء اليها سمة من سمات اهلها تقولش عايشين فى فيينا مثلا تبدأ الرحلة بالوصول لسوق التلات..عفوا محطة مصر زحمة لا تحتمل..قذارة غريبة الشكل و المنظر.. عدد مهول من التايهين و الباحثين عن الارصفة و القطارات باعة جائلين بيبيعوا كل حاجة..من الابرة للصاروخ على اليمين سواقين تاكسى بيطاردوا اللى خارج و على الشمال اكشاك بيع الجرايد و المجلات و اعضاء الهيئة العليا للسوق السودا بيجروا ورا اللى داخل و اللى ما يعرفش السوق السودا.. فدول ناس ممكن تبعلك تذكرة القطر اللى هيتحرك بعد عشر دقايق
مع فرق "بسيط"جدا فى التمن و بيوصلوا لدرجة من الحرفنة
انهم ممكن يبيعولك تذكرة القطر اللى قام من ربع ساعة ولا تنسى اننا احنا اللى دهنا الهوا دوكو! لو معاك عربية يبقى ربنا بيحبك..
هتدفع 20 جنيه بس مقابل الركنة فى شارع الحكومة لو ما معاكش يبقى هتركب تاكسي يعنى هتركب تاكسي.. و برضه فرق السعر بسيط جدا
بين التاكسى اللى هتاخده من المحطة نفسها و التاكسى اللى هتاخده من على بعد 10 خطوات..من الشارع الرئيسي بس هم مش هيسيبوك توصل للشارع اساسا بعد ما تدفع العشرة جنيه المتينة.. و دى تعريفة ثابتة
سواء رحت المهندسين او نزلت على باب المحطة بعد حوالى ساعة و نص او ساعتين هتوصل مشوارك..
احنا ما نعرفش الزحمة هنا..نهائى هتشم الهوا النقى..النضيف..اللى بيدخل القلب ده على طول مع موسيقى تصويرية هادية فى الخلفية مكونة من اصوات العربيات و الميكروباصات
و الملاكى و اوتوبيسات الحكومة..و التكاتك و اللى مش عارف التوك توك فهو مكنة شبه الجرار بتاع الفلاح مع فرق بسيط و هو ان الجرار اأمن بمراحل الحكومة منعاه فى معظم شوارع القاهرة.. و عشان احنا هنا بنحترم الحكومة جدا
فالناس بتستورده من الهند و انت نازل من التاكسى
خلى بالك انك ما تنزلش عند ناصية شارع اصل النواصى كلها بقت مواقف اوتوبيسات و ميكروباصات و ما تنزلش عند مطالع الكبارى عشان نفس السبب و ما تنزلش فى نص الشارع
عشان اى ميكروباص بيلاقى مواطن واقف هيقف هو كمان مش عشان يخطفه لكن عشان يوصله..
اصل احنا هنا بنحب نخدم بعض اوى و لو لقيت ناس كتير متجمعين فى اى شارع رئيسى ما تخافش..
دول كمان مستنيين الاوتوبيس و ما تسألش عرفوا منين انه هيقف هنا
بما انه مافيش اى اشارة بتقول ان ده موقف عشان انا شخصيا ما عنديش اى فكرة.. المهم..نقى شارع جانبى و انزل عنده عشان صحتك تهمنا بس خلى بالك من العجل و انت نازل
عشان اللى بيسوق عجل هنا مش بيبص قدامه و ابقى بص يمينك و شمالك
عشان اللى راكبين موتوسيكلات مش بيركزوا مع المشاة امثالك و من موقعى هذا
باعلن عن جايزة قدرها ربع جنيه مخروم للى يدلنى على الرصيف لا مش الرصيف اللى بيبيعوا عليه شرابات ال3 بعشرة جنيه ولا قمصان نوم و بلاوى زرقا لستات ما عندهمش ريحة الحياء بتكلم عن الرصيف
اللى كان زمان مخصص للناس اللى عايزة تمشى فى الشوارع و مالهاش نفس تتخبط ولا تتداس و لا تموت تحت عجل اوتوبيس
بسواق سكران كاتب من ورا الكبير كبير كنوع من انواع التهديد لو كان لسه فيك نفس بعد الرحلة العظيمة دى و قررت تاخد لفة فى الشوارع فلازم تاخد معاك شوية ادوات اساسية لو كنت مريض باى مرض صدرى..
هتحتاج كمامة و لو بخاخة يكون افضل و لو كنت مريض ضغط..
هتحتاج دوا اكيد خصوصا لو نزلت فى "اوقات الذروة" اللى هى بين الساعة 9 الصبح و الساعة 12 بالليل و لو كنت طالع كوبرى اكتوبر هتحتاج ب50 جنيه لب و سودانى كنوع من انواع التسالى لانك مش هتنزل من عليه قبل ساعتين و لو كنتى بنت فهتحتاجى self defense
مش عشان فى تحرش ولا حاجة
بالعكس الرجولة هنا واخدة حدها معانا اوى خصوصا اليومين دول لكن عشان لو زهقتى ترشيه على نفسك كنوع من انواع الترطيب
و كل منطقة ليها احطياطاتها يعنى لو نازل وسط البلد خلى بالك من الحفر اللى فى الشارع و من النصابين بتوع كروت الركنة و لو رايح الدقى خلى بالك من عربيات الامن المركزى و لو لقيت ناس كتير متجمعين ما تخافش دول صحاب مرتضى منصور..هتلاقيهم كل يوم عند مجلس الدولة و لو نازل عند جامعة القاهرة..خلى بالك من الاخوان و مظاهراتهم بيبقوا 30 واحد بيتظاهروا و حواليهم 300 عسكرى..
اصل احنا نحب اللمة هنا اوى لو رحت جامعة الدول بقى.. ركز و انت بتعدى عشان مراجيح مولد النبى شغالة هناك الله ينور سواقين العربيات مش بيبصوا قدامهم اساسا..
و لو بصوا و لقوك هيكسلوا يحودوا لو رايح رمسيس خلى بالك من نقابة الصحفيين.. و لو طالع مدينة نصر او مصر الجديدة اياك ثم اياك تفكر فى كوبرى اكتوبر..
خصوصا لو فى موكب معدى و بلاش نفق الازهر عشان لوزحمة هتاخدلك ساعتين فى المشوار و خصوصا لو كنت من اللى بيتخنقوا فى الاماكن المغلقة زى حالاتى من الاخر كده فاضل المهندسين و الزمالك و المهندسين زحمة على طول فمعندكش حل غير الزمالك و عشان تروح الزمالك لازم تكون عضو فى نادى الجزيرة او نازل ب100 جنيه فى جيبك عشان تعرف تقعد فى اى كافيه هناك انت لسه هنا بعد ده كله؟؟..
بتوع السوق السودا مستنيينك و التذاكر عند بتاع الجرايد و كلمة السر عايز التذكرة بتاعت حسين..على فكرة ده بجد و لو اتلخبطت فده مش ذنبى كقاهرية بتموت فى البلد دى
و صعبان عليها اللى الجهلة الهمجيين بيعملوه فيها دى شوية نصايح على الماشى لوجه الله و بعدين دى غلطتك من الاول..حد قالك تيجى القاهرة؟؟
السؤال بقى اللى بيطرح نفسه امتى هنشوفها كده؟ جوه الموضوع: *الحقيقة فكرة البوست ده جاتلى
فى مشوارى اليومى من الدقى لمدينة نصر و فى وسط التفكير العميق فاللى هكتبه هنا فوجئت بصديقتى العزيزة بتفتح باب العربية
عشان ترمى علبة الاكل فى الشارع و نرجع نقول الحكومة محتاجة تنضف..مش لما ننضف احنا الاول بفكر فى حملة اسمها"ارجوك لا ترمى الزبالة فى الشارع" تفتكروا لو قلت كده للناس هيقولوا عليا مجنونة؟
و عشان ما ابقاش من اللى بيدافعوا عن القيثارة دون ان يعزفوا
على راى جمال الشاعر فرجاء شخصى من اللى هيقرا البوست ده.. اعصروا على نفسكم لمونة و ما ترموش الزبالة فى الشارع يعنى لو قلتها على طريقة النصايح
اللى كانت فى اخر صفحة فى كراريس زمان يبقى ارجوكم لما تلاقوا فى ايديكم ورقة
استنوا لما تلاقوا سبت و ارموها فيه و لو سايقين هاتوا سبت صغير للعربية و لو مش عايزين تكلفوا نفسكم ممكن كيس و لما تروحوا ابقوا ارموه و لم الورق قبل الاكل و بعده..
مش عيب صدقونى النظافة من الايمان على فكرة مش هنبقى احنا و الزمن و الموكوسين اللى ماسكينها عليها بلدنا حلوة بجد و مش ذنبها اننا ما اتعلمناش نحترمها ولا نحترم نفسنا ولا الناس مش بتتلم غير لما يحطوا فواتير الزبالة على الكهربا؟!! *انهاردة الصبح كنت فى spinney’s و حظى الحلو
وقعنى فى واحدة من اللى بيمشوا يرطنوا انجليزى كان ما حدش يعرف لغات فى الدنيا غيرهم و الغريب ان اللى بيكلموهم بيبقوا مصريين برضه..خير بقى!! المهم..الست فضلت تشتم فى البلد و فى اللى فيها بشتايم تمنعها الرقابة..بالانجليزى برضه ابسط واحدة فيهم كانت ان البلد قذرة قلت تبقى متضايقة من التلوث و سلبية الناس زى حالاتى طلعت كل الشتايم دى عشان لفت على السوبر ماركتات الكبيرة كلها و ما لاقيتش dried beef صحيح والله..فى بلد محترمة ما يبقاش فيها dried beef؟ صدق اللى قال اصحاب العقول فى راحة!
*انهاردة الضهر بقى عملت حادثة
اوتوبيس صغنن من بتوع الحكومة
قرر يعدى الشارع بالعرض
مش المشكلة فى انه خبط عربيتى
المشكلة فى انه مشى عادى جدا
و كان ناقص يلومنى انى مش مبسوطة انه تفضل مشكورا و خبطنى
و اللى فارسنى ان كل اللى حكيتلهم و قالولى معلش انتى فى مصر
اتعصبت عليهم هم عشان بيقولوا كده
هى البلد دى عملت فينا ايه عشان نحبها كده؟ -------------------------------------- بره الموضوع فى ناس اتهبلت ده اكيد بس انا ملاحظة ان الهبل زاد عن حده اوى للدرجة دى الخوض فى اعراض الناس بقى سهل؟ بنتين بين ايدين اللى خلقهم و هو اولى بحسابهم من بشر انعدمت الرحمة من قلوبهم و بقوا لما يصدقوا اى فضيحة يقفوا يصقفوا زى خيبيتهم بغض النظر عن مشاعر ام فقدت اغلى ما فى حياتها
او اب حياته انتهت بموت بنته و كله يهون فى سبيل فرقعة صحفية لشوية قراء تافهين ما وراهمش غير النميمة و التشهير بسمعة الناس رسالة صغيرة لدعاة الفضيلة
و حملة صكوك الغفران
و مدعين التدين الفاكسين بيصلوا او لأ..اتحجبوا ولا قلعوا الحجاب..حاجة ما تخصش حد ارحموا من فى الارض يرحمكم من فى السماء..
ما حدش عارف دوره جاى امتى!

الثلاثاء، 2 ديسمبر 2008

Hitting the bottom

اكتر حاجة تعرفك ان اللى قدامك "مش كويس" هى انك لما تسأله يقولك انه "كويس" مفيش حد كويس بيقول على نفسه كويس على فكرة ازاى العالم وصل للدرجة الرهيبة دى من التقدم فى وسائل الاتصالات وفى نفس الوقت لسه محتفظ بالبرودة المرعبة دى ؟ The only thing you can pray for
when you’re down Is that it would be the BOTTOM Not because you’re strong, it’s just the fact that any lower points will be intolerable. اخيرا شفت الفيلم الفلتة Gone with the wind حاولت افهم سر الضجة الغريبة اللى الفيلم عملها و ما عرفتش واحدة تافهة..انانية..سطحية..
محدودة التفكير..مغرورة لدرجة المرض و واحد جبان..بتاع ستات..انانى..معدوم المبادئ..و ندل و بالرغم من كل ده ما استحملش يكمل مع البطلة
من كتر ما هى شخصية مريضة فين الرومانسية اللى فى الموضوع؟! فعلا الطيور على اشكالها تقع مش عارفة انهى الاصعب انك تقول حاجة و تتمنى انك ما تكونش قلتها ولا انك ما تقولش و تتمنى انك تكون قلت كل الناس مستنية حاجة تحصل تغيرلهم حياتهم دى كانت فكرة فيلم توم هانكس "The terminal” فى الاول ما عجبتنيش الفكرة اوى بعيدن لقيت انها صح الى حد كبير بس ايه هى "الحاجة"..لا بقيت عارفة ولا ناوية استناها اغبى سؤال فى الدنيا "مالك؟" خصوصا لما يكون السبب معروف للى بيسأل ما هو مش منطقى انك تضرب حد على دماغه و بعدين تعتذر بانك ما كنتش عارف ان دى حاجة بتضايق! كانت بطلة فى الجرى لمسافات طويلة كانت دايما بتعرف تلاقى مخرج لنفسها.. فضلت طول عمرها تجرى.. مش هروب..
لكن هى كانت دايما شايفة ان الاحلى لسه ما جاش و انها لازم هتقابله..ولازم هى اللى تلاقيه مش حد تانى دورت على الاحلى و مالقيتهوش او بمعنى اصح ما لحقتش تلاقيه ما اتعودتش تفشل هى..عمرها ما عرفت الفشل فى حياتها قررت تعمل نفسها مبسوطة و ضحكت على الناس كلها.. بس ما عرفتش تضحك على نفسها.. قررت تكمل جرى عشان ده قدرها.. فى ناس اتخلقت عشان تجرى و ناس كل شغلتها تقدم خطوة و ترجع عشرة لورا هى من اللى بيجروا..او هى كانت فاكرة كده صحيت فى يوم لقت نفسها تعبت من الجرى..
نسيت هم كانوا بيجروا ازاى..و عشان ايه
قررت تبطل جرى..كفاية اوى كده

كوكب تانى رافضك يا زمانى .. يا أوانى .. يا مكانى أنا عايز أعيش فى كوكب تانى فيه عالم تانى .. فيه لسه أمانى فيه الإنسان لسه إنسان عايش للتانى عالم طيار و رياحه قويه بتهد كيانى تكسر فيا من غير مواعيد بتاخدنى بعيد و ده مش بإيديا .. و ده مش بإيديا فى سد منيع .. عالى و فظيع بينى و بين نفسى .. بين روحى و رسمى بين يومى و أمسى و اللى إتمنيته و بنيته فى الهوا بيضيع و ده مش بإيديا .. و ده مش بإيديا مكبوته فى قلبى أحلام محصورة و حطام أفكار أيتام مبتورة و آمال مطويه .. بتعافر فيا و كأن أوانى كان لسه شويه و فى وسط الناس و الزحمة تاه الإحساس و الرحمة ضاع منى سلامى .. تاه حتى كلامى ضاق بيا مكانى كداب يا زمانى .. كداب يا زمانى

هو فين ده؟!! بجد كفاية...

السبت، 29 نوفمبر 2008

و مضى قطار العمر..عن الفرص الضائعة نتحدث

رأته لاول مرة اثناء رحلتها المعتادة فى قطار السابعة لم تعرف تحديدا ما الذى جذبها اليه فهو لم يكن وسيما بالمعنى المعروف و لم يكن به ما يخطف ابصار فتاة مثلها
تعدت مرحلة المراهقة منذ سنوات عديدة فلم تعد المظاهر و القشور تلفت نظرها مثل باقى الفتيات و لكنه كان...مختلفا رأها فخطفت بصره فى اقل من ثانية و هو لم يتعود ان تلفت نظره فتاة قبل ان يحدثها لم يعرف ما الذى ميزها عن الالاف غيرها من النساء ممن يملأن محطة مصر بالضجيج منذ الساعات الاولى من الصباح و لكنه اراد ان يستمر فى النظر اليها حتى يحين موعد القطار كمراهق وجد فى جارته الجميلة
ما يخفف من توقه لقصة يحكيها لاصدقائه من المراهقين وجد فيها عينان واسعتان..و ملامح رقيقة..و بساطة لا حدود لها ليست بارعة الجمال..و لكنها مختلفة رأت فى عينيه عمقا ساحرا اسرها منذ اول لحظة و لمحت فى ملامحه حزنا شبيها بحزنها الذى لازمها منذ عمر مضى شعرت نحوه بحنين غريب لم تعهده فى نفسها من قبل فاستنكرت هذه المشاعر المختلطة.. فلطالما استهزأت بالمراهقين و عالمهم السطحى المحدود انتظرت ان يزول انبهارها بمرور الوقت.. فالانبهار بالرجال لم يكن فى قاموسها فى يوم من الايام اقصى ما شعرت به كان القليل من الاعجاب
الذى لا يلبث ان يزول مع اول تعامل فعالمها جمع النقيضين..العمق و البساطة.. فاين لها برجل يحمل بداخله جميع الاضداد؟ رأى فيها براءة غريبة..
و مسحة حزن لم تنجح ابتسامتها الباهتة فى اخفائها شعر نحوها بالفة كأنه يعرفها منذ من بعيد.. تعجب من شعوره نحو فتاة اذا اراد ان يجد كلمة مناسبة لوصفها ستكون "عادية" و هو من تعود على وجود الجميلات من حوله جميلات الشكل..قبيحات العقول حتى يئس من البحث عن ملكة لقلبه..يقبلها عقله و تعشقها عيناه فتوقف عن البحث منذ زمن سحيق حاولت ان تنظر بعيدا و لكنها لم تستطع و ما توقعته من خفوت حدة الانبهار بشخص لا تعرف حتى اسمه.. وجدت عكسه تماما فاستمرت فى النظر اليه و استكملت محاولتها اليائسة فى اخفاء ما تشعر به و حينما التقت الاعين لم تستطع اخفاء خجلها و ارتباكها فاشاحت بنظرها بعيدا و قررت ان تشغل نفسها حتى تنتهى الرحلة رأت انعكاس صورته فى مرايتها.. فاستمرت فى فحصها
لعلها تجد فيها سر لانجذابها غير المبرر له..ففشلت مرتين الاولى فى الوصول الى سبب مقنع لحالة "اللامعقول"التى تعيشها و الثانية فى التوقف عن النظر اليه.. هل تحاول استخدام ذكاء الانثى التى لا تعرف سوى الدلال سبيلا؟ ولكنها لم تكن يوما ماهرة فى الاعيب النساء.. فكرت..اتحدثه لعلها تعرف عنه شيئا؟ فمنعها خجلها الانثوى من مجرد استكمال الفكرة فى خيالها فتحت كتابها..ادعت القراءة.. اذنها لا تسمع غير صوت انفاسه
الذى غطى على صوت القطار و ركابه و قلبها لا يشعر بالزمن.. يدق فقط لاجل مسافر غامض شغل قلبا كان قد فقد الامل فى ان يجد من يشغله منذ ازمان بعيدة اراد ان ينظر اليها
و لكنه شعر بمدى حمق الفكرة..فهو لا يعرف عنها شيئا ماذا لو كانت متزوجة.. و حتى ان لم تكن ..
ماذا لو اغضبتها نظراته المستمرة نحوها منذ بداية الرحلة؟ فكر فى ان يحدثها حتى يعرف عنها اكثر من وجه خطف قلبه قبل حتى ان يعرف اسم صاحبته منعه كبرياؤه الرجولى من مجرد المحاولة.. جذبته صورتها المطبوعة على زجاج النافذة
الى عالم لا يمت للواقع بصلة اخرج جريدته..ادعى القراءة و عقله لا يفكر سوى فى المسافرة الغريبة صاحبة الوجه الملائكى و النظرات الحزينة.. توقف القطار..سمعا صوت صفيره البغيض معلنا نهاية رحلتهما نظرت الي عينيه فى مرايتها..نظر الي وجهها البرئ فى نافذته و اختفيا فى زحام الحياة.. اضاف كل منهما فرصة جديدة الى فرصه الضائعة و مضى قطار العمر فى انتظار ركاب جدد..لرحلة جديدة.. و فرص ضائعة جديدة..و عدد لامحدود من ال"ماذا لو؟!"

الأربعاء، 26 نوفمبر 2008

السيرك القومى المصرى

البوست ده مش عشان اشيد بقدرات حكومتنا الغراء
على الهاء المواطنين بشغل ال3 ورقات و قصة ال5 صاغ الشهيرة يوم زودنا الرغيف 5 صاغ بس و يوم دعمنا الرغيف ب50%..
و سبحان الله بنصدق الهبل ده..مع انه نفس الرقم ولا بقدراتها الفائقة على تمشية المواطنين على الحبل ولا شغل الاكروبات بتاع الوزرا الكرام و الشقلباظات الحكومية ما بين اشتراكية ورأسمالية و مهلبية ولا نار الاسعار اللى بتنفخها كل يوم فى وش ناس مش لاقية اساسا ولا فقرة البلياتشو اللى بتصيب المواطنين بالضحك
لدرجة الغثيان على تصريحات السادة المسؤولين الواحد من دول عنده القدرة انه يقول التصريح و عكسه فى بق واحد..
الا انتوا عايزين تاكلوا و تفهموا كمان؟
البوست ده هدفه الاشادة
بموهبة فذة تانية من مواهب الحكومة الالكترونية ما كنتش اعرف انهم بيحبوا فقرة الساحر للدرجة دى اتعلموا الصنعة و بقوا ماشيين على نفس مبدأها.. اتعلموا يشوفوا اللى مش حقيقى
و يلفوا و يدوروا على الحقيقي عشان ما يبانش حقيقي مش بقول قدرات خارقة!! و علموها للصحف "الهبابية" فقلدوهم
عملا بمثل علمناهم الشحاتة سبقونا على الابواب و الهبابية علموها للشعب المسطول خلقة..
فازداد سطلة مع انه ما كانش ناقص بقى عامل زى اللى بيعمل دماغ من الحاجة الساقعة
كنوع من انواع التلاكيك مش اكتر
و تلك مقدمة منطقية و استهلال لا بد منه..لايه بقى؟هقول حالا اربع شهور كاملة و سوزان و هشام متصدرين الاخبار كلها واحد بتاع ستات و مغنية مغمورة لو كانت عارفة انها هتتشهر للدرجة دى
كانت اجرت بنفسها حد يقتلها واحدة راحت عند ربها و هو اولى بحسابها..
و واحد بتنظر قضيته قدام القضاء مالنا احنا و مالهم؟ و الاكيد ان الناس لسه مهتمة..نموت احنا فى الفضايح بلاش دى..و انت داخل اى سايت فى جزء فنى على ايدك اليمين ما تنساش تفتح صفحات التعليقات
عشان تشوف كم المهازل اللى بتتقال و كلام على غرار "حسبي الله و نعم الوكيل فى الفنانين" "و يا رب ما يورد على جنة"
و "صوتى يا ام اسماعيل على الشعب المصرى و تفاهته" مع ان اللى ضيع من وقته نص دقيقة عشان يكتب الكلام ده
مش اقل تفاهة من اللى مكتوب عنه الخبر و اللى ضيعت وقتها عشان تقرا الهبل ده-انا يعنى-
اتفه منهم هم الاتنين و اتفرج على عدد التعليقات اللى بيوصل ل200 ولا 300 تعليق على خبر من نوعية اليسا تغير قصة شعرها
بعد مباحثات سرية استمرت شهرين مع كوافيرها اللبنانى ولا شيرين تقرر السفر لجزر الكاريبى لعمل نيولوك فى حاجبها اليمين.. مش بقول الحكومة و الهبابية و الناس اجتمعوا على لعبة الساحر.. ولا سحر ولا شعوذة..
الساحر جمع حواليه ال3 اللى ما ينفعش يجتمعوا ابدا..
نظرة صغنونة على الاخبار و رئيس تحريرها نونو بيه اذ هتفوجأ بكاريكاتير
عن فوز الرئيس بجايزة نهرو
و مصر لابسة الجلابية و مستنياه فى المطار هعيط والله ..ايه الحلاوة دى.. كان ناقص يحطلنا موسيقى صبرنا و عبرنا فى الخلفية
احتفالا بالانجاز المرعب ده و بالاحضان يا سينا..
يا لهوتى يعنى ده كان اهم خبر فى اليوم؟-لفظ اعتراضى- اهم من النائب العظيم اللى اعلن فى دايرته
عن منحة قدرها تأشيرة حج لابناء الدايرة الكرام مع شوية شروط تفطس من الضحك..
و اللى مش مصدق اليافطة فى شارع القصر العينى هو من امتى و شغلة النواب انهم يحججوا الناخبين يووه نسيت اننا فى فقرة الساحر.. اى عصر النايب اللهلوبة
اللى مش هيمانع يشتغل داية لخدمة ناخبيه لو تطلب الامر و كله لوجه الله بلاش دى..نونو بيه ما سمعش عن تجارة الاعضاء البشرية؟ ما عرفش عن المريض نفسيا اللى سرقوا كليته ولا عن الطالب ابو 21 سنة
اللى باع جزء من جسمه
عشان يشترى بيه عيش معمول بعلف اوكرانى؟ ولا عرف عن مية القليوبية اللى مخلوطة بمية الصرف الصحى و وفقا لتصريحات الست ام فاروق
المية لونها بنى و بتخلى الهدوم برتقالى..يا حلاوة ياعيال بس مع الاسف البرتقالى مش موضة السيزون ده! -لفظ اعتراضى-تانى كان عمل كاريكاتير يحقد فيه على مناعة القليوبيين اللى زادت شربوا مية بالصرف الصحى و حلوا بعلف اوكرانى..
والله هعيط تانى من فرط التأثر
و بتوع سوزان دول
ما شافوش فى بلاوى الظباط اى حاجة تستدعى النشر؟ يوم ظابط قتل سواق تاكسى بمسدسه عشان تطاول عليه و يوم ظابط ضرب واحدة لحد ما عينيها اختفت تحت الكدمات
عشان حاول يعتدى عليها و ما عرفش و يوم ظابط يسحل واحدة حامل لحد ما تموت هى و اللى فى بطنها و يوم ظابط يقتل شاب قدام نادى الصيد عشان ما رضيش يعديه قدامه ولا مش مهم كل ده..الظباط خلقهم ضيق..و دول سنهم كان صغير كمان فيها ايه لما يلعبوا ببدلة الظابط و المسدس اللى بابا حبيب جابهم هدية نونو بيه ما استغربش تصريح من نوعية
"استنفار امنى على الحدود خوفا من اجتياح فلسطينى" يا لهو بالى.."اجتياح!!!!"..
الا مش دى كانت بتيجى بعدها كلمة صهيونى او اسرائيلى؟ بلاش دى..
خلينا فى الفرحة العظيمة اللى حسوا بيها امثالى
من مراجعات سيد امام لكتاب الظواهرى ما كانتش تستاهل منه كاريكاتير؟.. ما كانتش تستاهل تحليل و تعليق فى الصفحات الاولى
بدل قميص محسن السكرى اللى شغل امة لا اله الا الله و الختام مع تصريح زقزوق الاخير بتفرغه لمحاربة النقاب.. على اساس ان اخلاق المسلمين بقت تمام و النقاب هو اللى عامل ازمة و قانون نقل ملكية اسهم القطاع العام كل ده مش مهم..خالص..المهم هشان قتل سوزان ولا لأ..
ده ولا ديفيد كوبرفيلد فى زمانه اللى يقدر يلهى الناس بالهبل ده
و اخيرا اخر فقرتين.. فقرة الاسد.. و ده التفسير الوحيد اللى وصلتله
لما قريت الخبر بتاع ال83% السعداء فى مصر اكيد الحكومة كانت ملطلعالهم الاسد عشان يقولوا كده والختام مع لعبة السكاكين اللى بطلت تنشن فيها على المواطن المطحون لانه اتطحن لدرجة انه ما بقاش باين فاستبدلة جثته بمصر نفسها..و غيرت قواعد اللعبة.. ما بقيتش بتنشن حواليها..بقت بتنشن عليها شخصيا و مع السيرك القومى المصرى..مش هتقدر تغمض عينيك

لا تيأس..

لا تيأس فبعد العسر يسر، والليل إن زادت ظلمته اقترب النور،
والمتجبر إن فاض ظلمه أذنت ساعة رحيله،
والرزق وإن تأخر فلا يمكن أن يضيع،
والله قد يجمع الشتيتين بعدما يظنان كل الظن ألا تلاقيا،
والخير باق فى الأرض طالما بقى القمح والملح والورع والرحمة،
والجمال باق طالما هب النسيم وفاح الورد
وشقشقت العصافير وطلت علينا الوجوه الحسنة،
والتغيير آت طالما بقى على الأرض من يقول لا حتى ولو فى سره الدفين،
وطالما بقى الأمل فى أن الدم يمكن أن ينتصر على السيف،
وأن الشعب إن أراد الحياة فلا بد أن يستجيب القدر.
لا تيأس... وتذكر الشاعر التركى ناظم حكمت
الذى كان ينشد من قعر زنزانته الضيقة المظلمة:
أجمل يوم لم أعشه بعد، وأروع قصيدة لم أكتبها بعد. واعرف أن الروائى الإيطالى ألبرتو مورافيا كتب أبدع رواياته
وهو نائم على سريره لا يبرحه من فرط المرض،
والموسيقار الخالد بيتهوفن لم يعزف أعظم ألحانه إلا بعد أن أصابه الصمم،
ولم يمنع العمى طه حسين من أن يكون ما أراد مفكرا عميقا
وعميدا للأدب العربى ومناضلا ووزيرا،
ولم يستسلم العقاد لخروجه مبكرا من التعليم
بل عكف على عقله يثقفه وعلى إرادته يقويها
حتى صار «عملاق الفكر العربى الحديث»، و لم يمنع النفى والتشرد بيرم التونسى
من أن يكون واحدا من أعظم شعراء العامية فى تاريخنا الثقافى كله،
واستغل أحمد فؤاد نجم فترة السجن
فى تعلم القراءة والكتابة فصار رديفا لبيرم.
والشاعر شارلز لامب لم يرسل أخته إلى مصحة عقلية
حين عاد ذات يوم ووجدها قد ذبحت أمها بسكين فى نوبة جنون،
بل احتضنها وجعلها تشاركه نشاطه الأدبى،
حتى خرجت من جنونها، وصار هو شاعرا عظيما.
لا تيأس... فالرمد الربيعى الذى أصاب نجيب محفوظ
وحرمه من القراءة والكتابة لستة أشهر من السنة
لم يمنعه من أن يواصل عطاءه
حتى صار الأغزر والأعمق فى مسيرة الرواية العربية
واحدا من أعظم أدباء العالم بأسره،
ولما طعن وشلت يمينه عاد ليكتب من جديد،
خطا ركيكا، ككتابة الأطفال، لكنه أبدع به »أحلام فترة النقاهة«
فلما عجز تماما عن الكتابة،
كان يبدع مقطوعات هذا العمل الخالد فى ذهنه أولا، ويحفظه، ثم يمليه، وهكذا حتى فاضت روحه دون أن ينقطع عطاؤه.
وداء النقرس الذى أصاب الرسام الفرنسى الشهير فرنوار
لم يمنعه من مواصلة الرسم،
بعد أن استعان بشخص كان يربط له الفرشاة فى يده.
وأعاد الأديب الروسى الكبير ليو تولستوى كتابة رائعته «الحرب والسلام»
سبع مرات على ضخامتها،
وعندما سئل اسحق نيوتن عن سر توصله إلى نظرياته العلمية العظيمة
قال: «لا أترك المسألة تغيب عن عقلى أبدا».
لا تيأس .. ولا تعتقد أن الوقت قد انقضى وأحلامك قد غربت،
فبوسعك أن تفعل ما تريد ما دمت تتنفس،
ومهما كان حجم الظلم الذى يثقل كاهلك والقهر الذى يجثم على كتفيك
فبإمكانك أن تقيم ظهرك، وتحقق ذاتك حتى ولو غزا الشيب مفرقك.
فهاهو الفيلسوف الألمانى الشهير شوبنهور
لم ييأس من انفضاض الجمهور عنه لحساب أستاذه هيجل،
بل واصل عطاءه حتى انجذب إليه الناس، وصار عظيما مثل معلمه. و الروائى الإنجليزى الشهير سومرست موم
لم يكتشف موهبته إلا متأخرا، وظل سنوات طويلة يعمل طبيبا،
حتى ساق له القدر أديبا كبيرا قاصده كطبيب
فخرج من عنده موقنا بأن موم لديه موهبة أدبية عالية،
فنصحه أن يترك الطب ويتفرغ للأدب،
وعمل بالنصيحة فصار هذا الروائى العبقري. وجمال حمدان لم يستسلم للظلم الذى وقع عليه فى الجامعة،
حين تم ترقية من هو أدنى منه،
بل انسحب إلى بيته صامتا، ليواصل البحث والدرس،
ويخرج على الناس بكتبه العميقة وعمله الرائع «شخصية مصر»
ويصير فى النهاية أعظم وأشهر ممن ظلموه.
والأثرى الكبير سليم حسن تمت نقله إلى وظيفة هامشية
بعد أن كان مدير المتحف المصرى،
فوجدها فرصة ليعود إلى البحث وينتج موسوعة أثرية
ويقول فى مطلعها: «إلى الذين أرادوا أن يسيئوا إلى فأحسنوا إلي». والأديب الأرجنتينى خورخى بورخيس كتب أعظم أعماله وهو مبعد من وظيفته،
وأبدع البارودى أعظم قصائده فى المنفى.
والعالم مكتظ بأسماء أثرياء بدءوا من الصفر،
وغيرهم أفلسوا ثم عوضوا خسارتهم وصاروا أفضل مما كانوا عليه.
لا تيأس ... فجيش المسلمين انتصر على المشركين فى موقعة بدر
رغم أنه كان أقل عددا وعدة،
وخالد بن الوليد هزم الروم فى معركة اليرموك
بقوة أقل من عشر قوتهم،
والبطل الإغريقى ليونيداس استطاع برفقة ثلاثمائة رجل
أن يعيق تقدم جيش الفرس الجرار من ممر ترموييل حتى سقط ورفاقه
بعد أن قتلوا أضعاف عددهم، ومهدوا الطريق لبلد صغير هو اسبرطة
كى ينتصر فى النهاية على إمبراطورية الفرس القوية. وبضعة آلاف من مقاتلى حزب الله
تمكنوا من هزيمة الجيش الإسرائيلى المتغطرس،
وقبله استطاع أطفال فلسطين أن يتصدوا للدبابات والبنادق بكومات من حجر،
ويحققوا نصرا استراتيجيا على عدوهم المدجج بالسلاح.
لا تيأس.. ولا تقنط، فرحمة الله واسعة، وجنته تسع كل الطيبين،
ومهما ثقلت الآثام فسبحانه غافر الذنب وقابل التوب،
ومهما عظمت الخطايا فلا يمكنها أن تطمر الغفران،
وليس بوسعها أن تنسينا أن الله أحن علينا من أمهاتنا،
وأنه أقرب إلينا من حبل الوريد.
دكتور عمار على حسن-المصرى اليوم

الأحد، 23 نوفمبر 2008

تخاريف..(4)

المهمشون فى الارض .. انا..مواطن مصرى..او هم بيقولوا كده تعرفنى ازاى؟ هقولك.. لما تلاقينى فى المصلحة الحكومية مبتسم..
مش عشان انا مبسوط لا سمح الله لكن عشان الموظف يهتم.. انا اللى اول ما بيشوفنى بيبصلى من فوق لتحت..
لبسى مش عاجبه.. مش من الطبقة اللى بتقبض.. مش من بتوع "انت مش عارف انت بتكلم مين؟" لا نازل من عربية ولا عندى سواق مستنينى بره المصلحة حتى لو ورقى كامل مش هخلص اللى انا عايزه انهاردة.. بس عشان شكلى مش عاجبه و مش بعيد اتهزق و تتهان كرامتى قدام مراتى و عيالى عشان اتجرأت و قلتله يخلصلى ورقى هتلاقينى كمان فى القسم ممكن اكون رايح املى استمارة او اقضى مصلحة..زي اى حد يعنى ممكن تشوفنى واقف فى طابور لمدة ساعة او اتنين و الظابط المسؤول مش مشغول ولا حاجة.. هو بس مش شايفنى..اشمعنى هو اللى هيشوفنى؟ و مش بعيد تلاقي بنت حلوة فى عينين البيه الظابط دخلت..
و عدتنى انا و اللى زيي و ساعتها هوسعلها و انا برضه مبتسم.. يمكن وجودها يخليه يشوفنى او يلاحظ وجودى هتدخل و تخرج فى 3 دقايق
و هسمع كلام على حسها عمرى ما سمعته و يمكن احاول اتخيل انه بيتقالى انا..
فى زيي كتير محجوزين جوه..
بس مش بنكون واضحين لاى حد هتشوفنا متجرجرين من هدومنا
عشان ماشيين بالعجلة عكس الاتجاه بنعطل المرور..او هم بيقولوا كده مش بعيد اتحجزكام يوم على ما يتعملى محضر لكن اللى سرق و حرق و نصب و غرق و نهب و حول و هرب مش مشكلة حد..اصلهم مش بيعطلوا المرور هتلاقى منى فى مصلحة التامينات ممكن اكون ست كبيرة او فلاحة على قدى مستنية افهم اجيب معاشى ازاى و منين هتشوف نظرات الاحتقار من الموظفين و خصوصا البنات.. مع انى كنت متخيل انهم لما يشوفوا حد فى سنى هيشفقوا عليا و يرحموا سنى امتعاض..نظرات مرعبة..عدم اهتمام..مش مهم..المهم اكل العيال هتشوفنى فى الشارع ممسوك تحرى ممكن..من ظابط ما يسواش 3 مليم بصتله بصة مش عجباه..او ما حطيتش عينى فى الارض اول ما شفته هيطلع دفتر من جيبه و يبدا يدور على اسمى الثلاثى يا... انت معمولك محضر قبل كده؟ لأ معمولك على فكرة بطاقتك فين؟ هرد و انا مبتسم برضه..ما هو اكيد بيشوف شغله يعنى و هبتسم اكتر لما اخد قفا ولا شلوت.. هبتسم عشان اخبى وجع قلبى على كرامتى و كبريائى و لما اسمع جملة زى "ما تعملش كده تانى" و مع انى مش عارف كده ده اللى هو ايه هوطى راسي كالعادة و اقول حاضر.. حدث بالفعل!!!

تعلم الهندية بدون معلم!!

لما تكون بتتكلم فى وادى و الناس بترد فى وادى تانى خالص.. لما تلاقى توقعات هلامية منك ولا كانك سبايدر مان.. لما تلاقى شخصية غير واقعية تماما اتخلقت و اتصدقت و انت قاعد مكانك لا بيك ولا عليك و متوقع منك انك تقوم بدورها عشان هم شايفينك كده.. لما تحلف انك مش كده و هم يصروا انك كده و نص تأكد انك بتتكلم هندى!

عيب اوى لما واحدة فى سنى تلاقى نفسها فى شخصية من شخصيات ديزنى بس دى فعلا اقرب واحدة ليا..اغنيتها اللى فى اول الفيلم بتعبر عنى جدا

بس مش ده السبب فى انى احطها هنا

فى جملة اتقالت فى الفيلم فرستنى لدرجة انى لسه فكراها "القراية مش كويسة للستات عشان بتخليهم يفكروا" س:هل الناس اللى بالغباء ده لسه موجودين؟ ج:ايوة..و بشدة المشكلة انهم مش بيفهموا ان كلامهم ده اهانة ليهم هم اللهم احفظنا من الغباء و اهله

لا دى مش صورة من فيلم بورنو دى من لعبة بتتوزع على الاطفال فى الهابى ميل بتاعت ماكدونالدز دلوقتى فهمت ليه طلبة المدارس بيعاكسوا البنات بس السؤال اللى بيطرح نفسه.. انهاردة بيوزعوا عليهم البنت فى صورة.. بكرة هيدوهم ايه..قرص فياجرا مثلا؟ و نعم التربية بصراحة

"ليس الرهان على حرية النشر فى مصر ان تسمح السلطات بنشر كتاب "عاشوا فى حياتى" لانيس منصور, بل الرهان الحقيقى فى ان تسمح بنشر كتاب لا بد ان يكتبه احد قريبا بعنوان "ماتوا فى حياته" و هاء الضمير ليست عائدة على انيس منصور, له طولة العمر." بلال فضل اللى بيقول انا ماليش دعوة

The story of my life keep everything at a distance... and everyone Sandra Bullock-The lake house

Cross roads

ايه بقى؟