الثلاثاء، 2 ديسمبر، 2008

Hitting the bottom

اكتر حاجة تعرفك ان اللى قدامك "مش كويس" هى انك لما تسأله يقولك انه "كويس" مفيش حد كويس بيقول على نفسه كويس على فكرة ازاى العالم وصل للدرجة الرهيبة دى من التقدم فى وسائل الاتصالات وفى نفس الوقت لسه محتفظ بالبرودة المرعبة دى ؟ The only thing you can pray for
when you’re down Is that it would be the BOTTOM Not because you’re strong, it’s just the fact that any lower points will be intolerable. اخيرا شفت الفيلم الفلتة Gone with the wind حاولت افهم سر الضجة الغريبة اللى الفيلم عملها و ما عرفتش واحدة تافهة..انانية..سطحية..
محدودة التفكير..مغرورة لدرجة المرض و واحد جبان..بتاع ستات..انانى..معدوم المبادئ..و ندل و بالرغم من كل ده ما استحملش يكمل مع البطلة
من كتر ما هى شخصية مريضة فين الرومانسية اللى فى الموضوع؟! فعلا الطيور على اشكالها تقع مش عارفة انهى الاصعب انك تقول حاجة و تتمنى انك ما تكونش قلتها ولا انك ما تقولش و تتمنى انك تكون قلت كل الناس مستنية حاجة تحصل تغيرلهم حياتهم دى كانت فكرة فيلم توم هانكس "The terminal” فى الاول ما عجبتنيش الفكرة اوى بعيدن لقيت انها صح الى حد كبير بس ايه هى "الحاجة"..لا بقيت عارفة ولا ناوية استناها اغبى سؤال فى الدنيا "مالك؟" خصوصا لما يكون السبب معروف للى بيسأل ما هو مش منطقى انك تضرب حد على دماغه و بعدين تعتذر بانك ما كنتش عارف ان دى حاجة بتضايق! كانت بطلة فى الجرى لمسافات طويلة كانت دايما بتعرف تلاقى مخرج لنفسها.. فضلت طول عمرها تجرى.. مش هروب..
لكن هى كانت دايما شايفة ان الاحلى لسه ما جاش و انها لازم هتقابله..ولازم هى اللى تلاقيه مش حد تانى دورت على الاحلى و مالقيتهوش او بمعنى اصح ما لحقتش تلاقيه ما اتعودتش تفشل هى..عمرها ما عرفت الفشل فى حياتها قررت تعمل نفسها مبسوطة و ضحكت على الناس كلها.. بس ما عرفتش تضحك على نفسها.. قررت تكمل جرى عشان ده قدرها.. فى ناس اتخلقت عشان تجرى و ناس كل شغلتها تقدم خطوة و ترجع عشرة لورا هى من اللى بيجروا..او هى كانت فاكرة كده صحيت فى يوم لقت نفسها تعبت من الجرى..
نسيت هم كانوا بيجروا ازاى..و عشان ايه
قررت تبطل جرى..كفاية اوى كده

كوكب تانى رافضك يا زمانى .. يا أوانى .. يا مكانى أنا عايز أعيش فى كوكب تانى فيه عالم تانى .. فيه لسه أمانى فيه الإنسان لسه إنسان عايش للتانى عالم طيار و رياحه قويه بتهد كيانى تكسر فيا من غير مواعيد بتاخدنى بعيد و ده مش بإيديا .. و ده مش بإيديا فى سد منيع .. عالى و فظيع بينى و بين نفسى .. بين روحى و رسمى بين يومى و أمسى و اللى إتمنيته و بنيته فى الهوا بيضيع و ده مش بإيديا .. و ده مش بإيديا مكبوته فى قلبى أحلام محصورة و حطام أفكار أيتام مبتورة و آمال مطويه .. بتعافر فيا و كأن أوانى كان لسه شويه و فى وسط الناس و الزحمة تاه الإحساس و الرحمة ضاع منى سلامى .. تاه حتى كلامى ضاق بيا مكانى كداب يا زمانى .. كداب يا زمانى

هو فين ده؟!! بجد كفاية...

هناك 21 تعليقًا:

Founoon يقول...

مافيش حد كويس بيقول على نفسه كويس

-----------------------------------------
اه عشان الحسد :)
++++++++
ازاى العالم وصل للدرجة الرهيبة دى من التقدم فى وسائل الاتصالات
وفى نفس الوقت لسه محتفظ بالبرودة المرعبة دىازاى العالم وصل للدرجة الرهيبة دى من التقدم فى وسائل الاتصالات
وفى نفس الوقت لسه محتفظ بالبرودة المرعبة دى
-----------------------------------عشان زمان لما ماكنش في وسائل اتصالات كانت الناس بتوحش بعض بجد
ولما بيتقابلوا ولا بيعرفوا يوصلوا لبعض بيبقى في كم مشاعر مختزن كبير
دلوقتي وسائل الاتصالات دي خففت كتير من كمية المشاعر لانها بقت بتطلع اول بأول
وبقيتي عارفه انك لو عايزة توصلي لحد هتعرفي تلاقيه
فلسفه معلش

++++++++++++++++++++

Gone with the wind
وسعي بقى عشان انتي عايزة تتعضي
زي ماقولتلك كله كوم وسكارليت اوهارا كوم تاني
انا لسه من يومين سبحان الله بتكلم مع حد بقوله البنت دي شبهي اوي
يمكن من اكتر الشخصيات الادبية اللي اثرت فيا واتأثرت بيها
مش عارفه هل من كتر ماهي عجبتني انا قررت ابقى زيها ولا انا اساسا حبيتها عشان فيها حاجة مني ؟
المهم اني متضايقة انك بتتكلمي عليها وحش كدا :(

++++++++++++++++++++++++++++++++++

مش عارفة انهى الاصعب
انك تقول حاجة و تتمنى انك ما تكونش قلتها
ولا انك ما تقولش و تتمنى انك تكون قلت
----------------------------------الندم وحش في كل الحالات

+++++++++++++++++++++++++

كل الناس مستنية حاجة تحصل تغيرلهم حياتهم

وانا كمان
وعارفه هي ايه ومش عارفه هي فين ؟

+++++++++++++++++++++++++

كوكب تاني ...انها الناستالجيا :)

مالك يا ياسمين :)

دي دوعابة حيث ان السؤال دا بيعصبك يعني :)

ضد التيار يقول...

مافهمتش على فكره موضوع كويس

يعنى على الصحه و لا على الاخلاق

عموما

لو اخلاق يبقى طبعا انتى معكى حق فيها

اما لو الصحه الواحد اوقات بيقول كويس عشان مابيحبش يشيل اللى قدام حمل

او اوقات فعلا يكون كويس

------
موضوع الفيلم بجد هو حصل قدامى حقيقه بنفس صفات الشخصيات

و النهايه كانت نفس اللى انتى قولتيه

و فعلا زى ماقولتى الطيور على اشكالها تقع

----------------
اعتقد ان الاصعب انك تقولى حاجه و بعد كدا تتمنى انك ماتكونيش قولتيها

اللى بينك و بين نفسك انتى بس اللى تقدرى تحاسبى نفسك عليه

اما اللى طلع منك بقى ملك للى قدامك هو اللى ممكن يبدأ يحاسب عليها

او يعاقب عليها

او يتجاهل و دا هايكون اصعب حالات الندم

لما تحسى انك قولتى حاجه لحد و قابلها بتجاهل تااااام

-----------------
هى اى نعم صح اننا بنستنى الحاجه اللى تحصل تغير حياتنا

لكن ليه احنا مش نسعى للحاجه دى بدل الانتظار

الحاجه عمرها ماهى اللى هاتيجى لوحدها مهما انتظرنا

مش عارفه ليه حسيت هنا بنبره فقدان امل!!!!!

-----------------
هو فعلا مش منطقى

لكن اوقات الانسان بيطلع منه كلام فعلا مابيعرفش انه هايجرح اللى بعد مايقوله

الانسان من طبعه التسرع فى كل حاجه

فاطبيعى انه لما يغلط يسال مالك

نوع من انواع اقناع النفس و التبرير ليها ان اللى عمله

مايوجعش ولا يجرح

----------
سهل الانسان يضحك على الناس

لكن من الصعب يضحك على نفسه

الا طبعا الانانى هو الوحيد اللى يقدر فعلا يقنع نفسه و يضحك عليها

الجرى او السعى ورا حاجه بندور عليها كويس

لكن ماينفعش نضيع عمرنا كله نجرى وراها و احنا عارفين انها ممكن تكون سراب

او احلام صعب تحقيقها

بس برضه مش معنى اننا تعبنا نستسلم و مانشوفش بديل

برضه حسيت هنا حاله من اليأس

-------------------
الاغنيه دى انا بعشقها فعلا

اما بقى هو فين دا

فى الاحلام بتاعت كل انسان هايلاقى المدينه الفاضله او الكوكب دا

لكن فى الواقع من الصعب

لان الدنيا مزيج من الخير و الشر

و للأسف الشر بقى اكتر و الخير من كتر ماهو قليل بقينا مش عارفيين نشوفه ولا نقبله

لكن لسه فى شعاع أمل

مش ان الشر يختفى لانه من المستحيل يحصل

لكن اننا نلاقى الخير و نقبله

-----------------
البوست دا حسيت فيه زى ماقولت نوع من الزهق و الملل و اليأس من كل حاجه

ارجو ان احساس يكون غلط

و طبعا كالعاده ادخل عندك الرغى يشتغل معيا

انتى حاطه ايه فى المدونه؟؟؟

استحملى بقى

هى دى اخر اللى يفتح ضد التيار فى الكلام (:

دمتِ بكل ود غاليتى

Desert cat يقول...

ساعات الواحد بيضطر يقول للى بيسالانه كويس علشان يطمنه عليه
كتير اوى بنجرى فعلا وبنكون فاكرين نفسنا بناخد خطوة لقدام لكن فى وقت غير مناسب بالمرة بنلاقى نفسنا تعبنا من الجرى فى النفس متعلمناش من الجرى اللى جريناه ده كله ولا اخدنا منه غير التعب والارهاق

mUsLiM يقول...

بحبكم لما تتكلموا عن الأفلام كتيـر :)

لأنى ببقى متابع اوى معاكم :)

على كل حال , يجب أن يسجل التاريخ إنك ذكرتى فيلم أظن إنى شفته زمان

المهم أكون بس فاكر صح

فيلم terminal بطولة توم هانكس , الحقيقة الفيلم ده انا فاكره كويس وطالما فاكره كده يبقى أثر فيها

لأنى عادة أى شئ بيؤثر فيا بحس أنه بيُنقش على صفحة قلبــى

والفيلم ده انا فاكره هو وكم فيلم كده كنت سمعتهم

وأفتكر برده فيلم patch adams بتاع روبين ويليامز

الحقيقة الفيلم ده رائع , فضلا ان روبين ويليامز يمتلك وجه حساس ومشاعر بحسها فى كل حركه من تمثيله

هو وكم واحد كده كنت بحب اسمعلهم زمان

بس الحمد لله ربنا تاب علينا :)

ولا ايه ياجماعه

عاوزين تنحرفونى ولا ايه

هههههههههه

.....................

وبعدين ماله البرد ,انتى مدايقه منه ليه :)
البرد ده جميــل أو الشتا هيا اللى جميله

انا بحب الشتاء اوى لدرجة إنى كتبت فيها قصيده :)

...........

أما الانسان اللى يفتكر نفسه كويس وراضى عن نفسه فده انسان مسكين فى الحقيقه

لأن الاعتقاد ده بيدكر حياة الانسان , يعنى حتى النبى صلى الله عليه وسلم لن يدخل الجنه بعمله

يبقى خلاص كل واحد يغسل ايده , وينسى انه ممكن يؤدى شكر نعم الله تعالى

وانه فى كل حال ومكان وزمان مقصر فى حق ربه ,,

نسأل الله أن يغفر لنا ويرحمنا

.............

وبالنسبه لأغنية مدحت صالح

فانا مش فاهم ماله ومال الزمان , شغال كداب يا زمانى كداب يا زمانى

انا مش فاهم الناس مالها ومال الزمن فعلا , طول الليل والنهار بسمع سب للزمن والدنيا

وده سب لله عزوجل فى الحقيقه

وانا مؤخرا توصلت إن هناك عظائم من الذنوب يستهين بها النــاس , هذه الذنوب كفر فى الحقيقه

منها سب الزمــان

نسأل الله العفو والعافية

وتقبلى تحياتى يا أختى :)

أرجو إنك تكونى بخير وعافية :)

ونسألكى من طيب دعاكى فى هذه الأيام المباركه

وكل عام وانتى بخيــر :)

السلام عليكم

سمراء يقول...

في رواية عزازيل الكاتب كان بسأل سؤال ( معناه وليس الفاظه )هو الناس لما بتموت الدود اللي بيأكلها جي منين يعني الدود عايش جوانا وبيخرج بس لما احنا نموت ولا الدود بيتجمع علينا من قلب الارض لما نموت يعني مستنينا


سمراء

Reem يقول...

انتي كاتباه حاجات كتير اوي هعلق على

اللي افتكره منها

اول نقطة متفق عليها من الازل لما قالو

اجدادنا مادح نفسه كداب

********

نجي لفلم بقى هي الشخصية فعلا تافهة و سطحية

لكن الحلو فيها انه رغم اللي باين صلبة

و وقت الجد قوية و تقدر تتصرف عكس

اللي الكل كان فاكرهم اقوياء و عندهم

عمق و فهم وقدرة على التصرف

ده اللي عجبني فيها شخصيا

***********

مش عارفة انهى الاصعب
انك تقول حاجة و تتمنى انك ما تكونش قلتها
ولا انك ما تقولش و تتمنى انك تكون قلت

-----

الاتنين اصعب من بعض بس احيانا الواحد يتحمل تعب نفسه لكن م يتحملش يتعب الناس بكلمة منه

********

انا كمان من الناس اللي بستنى و عايزة الحاجة دي اللي تغير حياتي بس
مش عارفة هي ايه و امتى تيجي لكن عارفة انها هتيجي و همشي حياتي لحد ما تيجي

و اعذرني في الباقي لحسن مش فاكراه بس عموما انتي كتاباتك حلوة دايما و بتشد اوي

انا حرة يقول...

فنونتى..
لا عشان اللى بيقول كده بيبقى بيسكت الناس غالبا
مع انه بيبقى باين اوى..ازاى مش بياخدوا بالهم
واضح انى كنت انفع ممثلة..يالا البخت بقى )

مش فلسفة ولا حاجة..عندك حق
ابسط حاجة زمان الناس كانت بتتلم فى العيد
كبير و صغير..كانت حاجة مقدسة ان العيلة كلها تشوف بعضها فى المناسبات
بعدين التليفونات بقت بتغنى
و بعدين بقت الsms
بعدين الناس بقت بتفوروارد رسايل مش هى اللى كاتباها
و اللى ببعتهولك ببعته لمليون غيرك
و بعدين هتبقى بالايميل
انا ليه ما جيتش فى الخمسينات ايام التليفون ابو قرص
سؤال بيطرح نفسه بشدة :D

شبهها من انهى زاوية حضرتك يعنى
يمكن عشان هى شخصية قوية و شكلها حلو فى دول هى شبهك اه
غير كده اسمحيلى نختلف بقى و من غير عض ارجوكى :D
دى واحدة لامة حواليها رجالة البلد كلهم
و اتجوزت واحد هيموت عليها و هى ما بتحبوش
عشان تغيظ اللى هى بتحبه اللى هو متجوز واحدة تانية اساسا
و بعدين اتجوزت خطيب اختها..يا لهوى يعنى
هى قوية و حلوة و ما عندهاش اى نوع من انواع الاخلاق
انتى قوية و حلوة و عندك مبادئ 
حلوة وصلة الغزل دى

وحش اوى..بس بيتهيالى انك ما تقوليش اوحش
اصل انا كده او كده ما بعرفش اسكت على اللى مش عاجبنى
يعنى غلط او صح هقول يعنى هقول
لكن مشكلتى فاللى مش بقوله
امتى تتفك العقدة دى مش فاهمة انا 

انا لا عارفة هى ايه ولا هدور عليها
خلينى فاللى موجود..و هو كتير اوى الحمد لله

معلقة معايا اوى الاغنية دى
مصرة انى مش عارفة اتاقلم هنا
بس مش لاقية مكان تانى الحقيقة :D

غالبا مش بحب اتسئله عشان مش بعرف ارد
ماليش يختى..كويسة اوى :)
هى حالة كده و بتيجى بس انا مش بسيبها تطول انتى عارفة

انا حرة يقول...

ضد التيار

لا هى عن الصحة النفسية مش الجسدية
اصلى عمرى ما فهمت الناس اللى كل ما تقوليلهم ازيكوا
يدوكى وصلة عن العشر سنين اللى فاتوا من حياتهم
و نبذة مختصرة عن ظلم الدنيا ليهم هم بالذات و الناس كلهم اللى واقفين ضدهم
يمكن عشان كده بقيت بكتفى بانى اقول كويسة دى فى كل حالاتى
مع انى مش دايما ببقى كويسة
شكلى لخبطتك اكتر 

وجهة نظر برضه
بس انا عمرى ما ندمت على اللى قلته
ما بقولش غير اللى مقتنعة بيه
ساعات بيكون دبش رسمى..لا ساعات كتير الحقيقة :D
بس اللى بيضايقنى اكتر اللى مش بعرف اقوله

لا انا عمرى ما فقدت الامل
افقده ازاى و ربنا موجود
زهق يمكن..لكن يأس.. عمره ما هيحصل معايا
اللى اقصده ان فى ناس بتوقف حياتها على حاجة واحدة
ساعات بيكونوا مش عارفين هى ايه و بيفضلوا مستنيين برضه
مع ان اللى عندهم فى حياتهم يسعدهم جدا
بدور عليها انا كمان على فكرة
بس لما تجيلى حالة الكابة زى اللى كانت عندى و انا بكتب البوست ده 

لا والله مش ياس ابدا 
هو تقدرى تقولى تعب و ملل و رغبة قوية جدا فى الانعزال عن الدنيا و الناس..
بس راح لحاله..او انا بقنع نفسي انه راح 

بقيت مقتنعة انك ممكن تعملى العالم ده لنفسك
بحاول بجد اعمل كده
بما انه عمره ما هيبقى زى ما انا عايزاه..هخليه يبقى زى ما بتمنى اشوفه :)

ارغى براحتك يا بنتى..انا بتبسط بجد برغيك ده
بتفكرينى دايما بواحدة بحترمها جدا..ابقى تعالى كل يوم :)

انا حرة يقول...

desert cat
الحمد لله ان حد فهم قصدى اخيرا
هو ده بالظبط اللى كنت اقصده
بس الفكرة فى ان الوقت اللى بناخد فيه نفسنا ده ما يطولش
عشان بيبقى احساسه بجد مؤلم
خصوصا للى ما اتعودش يشتكى و يبكى على اللبن المسكوب زى ما بيقولوا

انا حرة يقول...

لا بعد الشر عليك من الانحراف يا مصعب
بس هو انت بجد مش بتشوف افلام؟ سؤال حشرى يعنى بس استحملنى :)
عموما هو الفيلم حلو اوى
و بتاع روبين ويليامز ده انا فاكرة انى شوفته زمان
مش هو ده بتاع الدكتور اللى كان بيعالج الاطفال الميؤوس من حالاتهم؟

لا انا بتكلم عن البرد المعنوى مش برد الشتا
و هو فى احلى من برد الشتا ده كفاية البوست اللى فات اللى مش عارفة كتبته ازاى ولا ليه
بس ده من عمايل الشتا فيا..بعد كده هبقى اقفل البلوج فى الفصل ده :)

مش قصدى كويس اخلاقيا انا اقصد كويس نفسيا
اللى بيشكروا فى نفسهم دول مرضى اساسا
زى اللى بيقولوا على نفسهم طيبين
و الدنيا الغدارة قسيت عليهم و الناس الوحشين غدروا بيهم
مش عارفة بيستحملوا نفسهم ازاى بجد

مدحت عايز يروح كوكب تانى..و انا عايزة اروح معاه :)
زهقت اوى من هنا و من ناس هنا
مش عشان انا احسن ولا استاهل الاحسن
بس ساعات بتحس انك مش لايق على المكان اللى انت فيه ولا الناس اللى حواليك
فالاغنية بتعبر عن حالة الملل دى

كل سنة و انت طيب يا مصعب و بخير يا رب
و ما تنساناش انت كمان من دعواتك يوم الوقفة ان شاء الله

انا حرة يقول...

سمراء
بصراحة مش فاهمة خالص علاقة عزازيل باى حاجة
بس عموما اهلا بيكى

انا حرة يقول...

مش مداح نفسه والله يا ريم..انا وضحت قصدى فوق :)
مداح نفسه ده مسكين على راى مصعب

انا كمان حبيت الجزء ده فيها اوى
خصوصا مع القلبة اللى حصلت فى الفيلم
و حولتها من واحدة مرفهة و تافهة
لواحدة مسؤولة عن بيت بالحجم ده و اب مريض و اخوات صغيرين
لكن بتفرس من النوعية دى من البنات بجد
اللى معتمدين على شكلهم و اقصى امنياتهم فى الدنيا لمة الولاد حواليهم
دلعها المرق فى اول الفيلم خلانى حاسة
انى عايزة اطلعها من الشاشة و اديها قلمين عشان تفوق لنفسها :D

تقريبا كل الناس بتتعب من كلامى بس هم اتعودوا على الدبش اللى بحدفه :)
لكن اللى بيدايقنى بجد
ان كتير منهم من حقهم يسمعوا منى كلام انا افشل واحدة ممكن تقوله فى الدنيا

ربنا يسعدك يا ريم يا رب
انتى انسانة بجد راقية و عقلك محترم..
بجد بحترمك جدا مع اننا مافيش معرفة شخصية بيننا
و بشكرك بجد على زوقك و رفعك لمعنوياتى دايما

mUsLiM يقول...

هو سؤال حشرى فعلا

بس معلش بقى هانعمل ايه :)

مسألة الأغانى والأفلام والسينما دى جت معايا بالتدريج بصراحه

فى الأول بطلت أغانى ,وبعدين بطلت سينمات مع إنى كنت مغرم سينما , خاصة بقى سينما جالاكسى حبيبة زمان :)

سينما جالاكسى دى ليها معايا أجمل ذكريات :)

وبعدين بقى مسألة إنى مش بسمع أفلام دى جت وحدها لأنى عمرى ما بقلب فى التليفزيون على قناة أفلام سواء عربى أوانجليزى

هما قناة الجزيره وكم قناة اسلاميه كده والحمد لله :)

................

وبالنسبه لفيلم روبين ويليامز فمتهيقلى هو ده الفيلم اللى قلتى عليه بس هو مكنش بيعالج أطفال بس كان بيعالج أى سن من أى مرض , بس هو بيرزعلى المعالجة النفسيه وإدخال البهجه على حياة الفرد ومراعاة مشاعره

الفيلم ده كان قمـة فى التعامل مع مشاعر الإنسان واحترام نفسيته :)

..............

بالمناسبه يا أختى كنت عاوز اخد رأيك فى حاجه حصلتلى ومش عارف اعمل ايه :(

كنت بعت شعر ليا لدار نشر , المهم الجماعه أبدوا إعجابهم

واتصلوا بيا وقالولى ابعتلنا بقى ديوان كامل واحنا على كافة الاستعداد للنشر وكده طبعا بعد قراءة الديوان كله

المهم انا قلت أسجل الشعر فى وزارة الثقافه أحسن فى الأول

وفعلا رحت أسجله , المهم اتعطلت فى كم حاجه كده خلتنى أأجل التسجيل لبعد العيد

والنهارده الدار اتصل بيا تانى , وانا مش عارف افلهم :(

وخايف أضيع فرصه كويسه منى

انتى رأيك ابعتلهم وخلاص ولا ايه ؟

معلش شغلتك بحاجه متخصكيش بس انتى جيتى فى وشى وانا مشغول فى الموضوع ده :)

فقلت أخد رأيك

على كل حال , نسألكى الدعاء يا أختى وانا مش ناسيكى متخافيش :)

السلام عليكم

انا حرة يقول...

وجهة نظر برضه :)

-----------

انا سألتلك حد عنده خبرة كبيرة فى دور النشر و فى الكتب عموما
قالى انه عمره ما كان بيسجل كتاباته لا فى الشهر العقارى ولا فى وزارة الثقافة
هى دار النشر هتمضى معاك عقد تقدر تحط فيه الشروط اللى تحفظلك حقوقك

بيتهيألى يا مصعب لو هى دار نشر محترمة و معروفة يبقى اتكل على الله و انشره..
و ان شاء الله تكمل على خير
و مليون مبروك مقدما انا فرحت اوى بجد :)

عايزة قصيدة باسمى بقى :D

mUsLiM يقول...

جزاكم الله خيرا يا أختى على اهتمامك , وانا هاخد بكلامك وهابعتلهم القصايد على بركة الله :)

وأما بالنسبه للقصيده اللى على اسمك

فانتى اسمك أصلا قصيدة :)

بس المشكله انك خدعتينا زمان فى موضوع الإسم

فاكره :)

هههههههههه

انا بهزر طبعا

وعلى كل حال من عنيا يا أختى :)

هاكتبلك قصيده كعيديه من أخيكى

لسه بتاخدى عديات ولا كبرنا :)

ربنا يكرمك ويباركلك ان شاء الله

وانا برده أخدت رقم شاعرة أعرفها وهاتصل بيها , وبعد كده هاتوكل على الله وابعت القصايد

نسألكى الدعاء يا أختى :)

السلام عليكم

انا حرة يقول...

ههههههههه غلطة مطبعية غير مقصودة نهاااائى والله :)
بس دى نتيجة ان واحدة مسطولة زيي تعمل ايميل اى كلام و لما الناس تطلبه منها تديهلهم و تنسى تغير الnickname :D
فطبيعى جدا تحصل اللخبطة دى مع واحدة نسبة التركيز عندها تحت الصفر زى حالاتى كده :)))

ربنا يوفقك يا مصعب يا رب..و ان شاء الله تكمل الحكاية دى على خير و اشوفلك اول ديوان قريب باذن الله

The Seagull يقول...
أزال المؤلف هذا التعليق.
The Seagull يقول...

مافيش حد كويس بيقول على نفسه كويس
---------------------------------

صح .. إلا لو كان واحد مغرور وواخد في نفسه مقلب :)



ازاى العالم وصل للدرجة الرهيبة دى من التقدم فى وسائل الاتصالات
وفى نفس الوقت لسه محتفظ بالبرودة المرعبة دى
------------------------------

البرود بقى سمة العصـر حتى بين أفراد العيلة الواحدة اللي المفروض يكونوا على درجة عالية من التفاهم والاحتواء وشعور كل واحد بالتاني :)



Gone with the wind
-------------------------------
ماليش في الأجنبي الحقيقة.. ولا هيبقى لي في العربي إن شـاء الله :D .. كفاية ضحك على الدقون بقى لحد كدة :)



مش عارفة انهى الاصعب
انك تقول حاجة و تتمنى انك ما تكونش قلتها .. ولا انك ما تقولش و تتمنى انك تكون قلت
----------------------------------

أحسن حاجة عملتهـا إني اتخرست خالص :)



كل الناس مستنية حاجة تحصل تغيرلهم حياتهم
دى كانت فكرة فيلم توم هانكس "The terminal”
فى الاول ما عجبتنيش الفكرة اوى
بعيدن لقيت انها صح الى حد كبير
بس ايه هى "الحاجة"..لا بقيت عارفة ولا ناوية استناها
---------------------------------

وأنـا زيك :) .. أصل اللي يتبطر على النعمة لازم ربنـا ياخدهـا منه بلا رجعـة :) الحمد لله إنه البطر ماجاش من ناحيتي :) عشان على الأقل أكون خليت ذمتي .. بس للأسف مش هاقدر أمنع نفسي من الحزن عليها طول العمر!!




اغبى سؤال فى الدنيا "مالك؟"
خصوصا لما يكون السبب معروف للى بيسأل
ما هو مش منطقى انك تضرب حد على دماغه
و بعدين تعتذر بانك ما كنتش عارف ان دى حاجة بتضايق!
---------------------------------
معلش .. سمة العصــر برضـه :)




معلش قدرنـا نجري نجري نجري .. لحد ما نفهم في الآخر ونتعظ إنه اللي كنـا بنجري وراه كان سـراب :)


وأنـا كمـان لو لاقيتي الكوكب ده ابقي دليني عليه .. عشان كدة كتير الحقيقة :$


تقبلي مروري يا بنوتي :)

انا حرة يقول...

كلامك فى نبرة حزن غريبة يا رب اكون فهمت غلط

بصى هى كده عاجبنا او مش عاجبنا هى كده
ساعات بتبقى حلوة و اغلب الاوقات بتبقى عادية و كتير بتكون مؤلمة..بس هنعمل ايه؟
هم اختيارين يا ننكد على نفسنا و نعيط على اللبن المدلوق :)
يا نتنح و نعند معاها عشان تعدى على خير و توصلنا للمكان اللى احنا عايزينه

و الاختيار التانى اوقع بصراحة
و الكوكب التانى ده انا قررت اعمله لنفسي..
جربى تعملى كده و صدقينى هتعرفى..
اعملى الحاجات اللى بتحبيها فى الوقت اللى يعجبك و ما يهمكيش حد
خلى عندك some "me time" فى اليوم..بجد بتفرق كتير

نورتينى يا يو يو :)

The Seagull يقول...

للأسف ظنك في محله في بنوتة :)
أنـا فعـلاً في حالة مزريـة ربنـا ما يحكم عليكي بيهـا يارب :)

هم اختيارين يا ننكد على نفسنا ونعيط على اللبن المدلوق :)
يا نتنح ونعند معاها عشان تعدى على خير و توصلنا للمكان اللى احنا عايزينه
---------------------------------

أدينـا بنتنح وبنعاند لكن المرة دي للأسف مافيش نتيجة .. تعبت خلاص .. بجد مش قادرة .. ماحدش حاسس بحاجة ولا فاهم حاجة في أي حاجة .. ربنا يتولانا برحمته مش هقول أكتر من كدة:)



و الكوكب التانى ده انا قررت اعمله لنفسي..
جربى تعملى كده و صدقينى هتعرفى..
اعملى الحاجات اللى بتحبيها فى الوقت اللى يعجبك و ما يهمكيش حد
خلى عندك some "me time" فى اليوم..بجد بتفرق كتير
---------------------------------

حتى دي مش بعرف أتهنى عليهـا برضه .. لازم حاجة تطلع في النص كدة تعكنن عليكي وتفسد عليكي اللي بتعمليه :)

آسفة على الرغي الكتير :)

انا حرة يقول...

والله ما فى حد بيرغى هنا قدى :)
انا اكبر كذابة فى الدنيا..مش عارفة من كتر ما كذبت على نفسي بقيت بعرف اكذب على الناس ولا من كتر ما كذبت على الناس صدقت نفسي

سيبك من اللى انا قلته ده كله عشان اثبت فشله الزريع..فى حاجات فوق قدرة البنى ادم على الاحتمال و مهما عاند ولا قاوح مش هيقدر برضه
انا عن نفسي استسلمت..ما بقاش فيا نفس اعند..بجد مش قادرة
و على رايك ربنا يتولانا برحمته..