الثلاثاء، 30 ديسمبر، 2008

كفاية خناق..وقت الدعاء

كان شايل الوانه كان رايح مدرسته وبيحلم بحصانه وبلعبه وطيارته ولما انطلق الغدر وموت حتي برأته و سال الدم الطاهر علي كراسته من هنا بنقول ارضنا .. عرضنا..دمنا ..أمنا وان مات ملايين مننا القدس هترجع لنا اب ومد بخوفه اديه يحمي بعمره ضناه ولما ارتعش الجسد الطفل وبقي في ايدين الله بكت العدرا الام وصرخت قالت ياولداه عاش الظلم المر الغادر سقط العدل وناح كان طفل فلسطيني وده بيته وده كل اللي جناه ده تاريخه وتاريخ اجداده ودي ارضه وسماه هنا جرجس ومحمد اصحاب والدين لله جه ظالم وسرق احلامهم كل املهم راح سلم بسلم وحرب بحرب شرع الله والدين وازاي نار تحرق في القلب ونفضل كده ساكتين ياعـــــــرب لمو الصف و اقروا صلاح الدين عمره مافرط مره في حقه وده كان اقوى سلاح لو جه ظالم مره وطردك من بيتك ورماك وبيزرع علي ارضك حقد ومن دمك اشواك مش نار الظلم وجرحك تتحول لهلاك وتعلم اولاد اولادك ان الثوره كفـــــــاح لما نمد ايدينا لغيرنا ويبقي الرد نيران لازم يبقي سلاحنا في ايدينا عشان العدل يبان كل العالم يسمع صوتنا الطالع بالاحزان جيل يستشهد يطلع غيره و الموت للسفاح الارض عشان نزرع فيها يامحمد ونموت بكره الحق هيرجع لينا ملعون اي سكوت صوتك وانت في موتك عالي اغلي واروع صوت هيحول جلادك نكره واعدائك اشباح.. ****** اهداء لارواح الشهيدتين الطفلتين لما و هيا حمدان يا ريت فى ايدينا اكتر من الكلام.. "وَلاَ تَهِنُوا وَلاَ تَحْزَنُوا وَأَنتُمُ الأَعْلَوْنَ إِن كُنتُم مُّؤْمِنِينَ"

*********

للتبرعات بجمعية الهلال الاحمر المصرى التفاصيل فى مدونة بت خيخة و اى كلام انا اتكلمت و عرفت انهم محتاجين تبرعات مالية لاهل غزة و و دى بتروح مباشرة من الجمعية لهناك او تبرعات عينية للمستشفى نفسها و للجرحى اللى بيتعالجوا فيها كراسي متحركة و عكاكيز و ملايات و فرش للسراير

هناك 26 تعليقًا:

Nanoz يقول...

يا رب

مفيش فى ايدينا للاسف الا الدعاء و نقول يا رب

هو القادر على كل شئ

Nanoz يقول...

الارض عشان نزرع فيها يامحمد ونموت
بكره الحق هيرجع لينا ملعون اي سكوت
صوتك وانت في موتك عالي اغلي واروع صوت
هيحول جلادك بكره واعدائك اشباح..


عدى بكره و بكره و بكره و سنين
واحنا اللى بقينا اشباح و الجلاد و الاعداء زى ما هما

انا حرة يقول...

ربنا ينصرهم بجد كفاية الخيبة اللى العرب فيها
انا من الصبح بين الجزيرة و العربية و مش طايقة نفسي بجد..صور الاطفال و الستات و الرعب بجد غير ادمية بالمرة
و فى النص كل اهبل و التانى يطلع يقول خطبة عصماء على وعد بقمة طارئة قريباو لما هيعملوا القمة هيكون نص الشعب ابيد و يطلعوا بيان ختامى يدينوا فيه الحصار ما احنا حفظنا خلاص
يا رب ارحمهم مالهمش غيرك

Desert cat يقول...

ربنا معاهم

romansy يقول...

الدعاء هو الشئ الوحيد اللى قدمنا


بس ندعى وتبقى قلوبنا على قلوب بعض


وايدينا فى ايد بعض
اكيد فى حاجات هتتغير

Mohamed Hamdy يقول...

بجد موضوع وجع قلبى

ابقى اقرى اخر بوست عندى هو كمان مهدى للشهداء .. فقط

Reem يقول...

ربنا معاهم بجد

و يارب الكل يفوق للاهم و يسيب التفاهات دي لبعدين

ربنا يتولاهم برحمته

Founoon يقول...

انا ناقصة

انا خلاص مش قادرة ومش عارفه الاقيها منين ولا منين

من المساكين اللي بيموتواغدر في كل لحظة

ولا من شتيمة الناس واولهم المصريين في مصر واتهامها بالتواطئ والعمالة

ولا من تصريحات ابو الغيط

وكملت بخطاب الريس

انا تعبانة اوي ومش عارفه انام والساعة بقت 3 ونص وانا عندي شغل الساعة 9

safa7_karmooz يقول...

يارب ...:(

انا حرة يقول...

اللهم امين

انا حرة يقول...

لا ندعى و نبطل نشتم و نرغى و نستعرض معلوماتنا..بجد مش وقته خالص يعنى

انا حرة يقول...

احلى بوست اتكتب عن الموضوع بجد فرحت بيه اوى

انا حرة يقول...

يسمع منك ربنا يا ريم
المهم ان اللى بيتريقوا على الحكام العرب اللى مش بيعملوا غير الكلام هم كمان ما عملوش حاجة..و يا ريت كلامهم له معنى اصلا..حاجة تقرف بجد

انا حرة يقول...

و مين سمعك يا فنونتى انا نايمة متاخر اوى امبارح و كان عندى انترفيو مهم اوى انهاردة رحته فى حالة يرثى لها
بجد مش فاهمة الطم على اللى بيتقال على مصر من الجهلة و الخايبين
ولا اللى اتقال فى القمة بتاعت الخليج
ولا رفض اقتراح الاتحاد الاوروربى اللى كان عندى فيه امل كبير
ولا على منظر الشهدا و الاطفال و الستات
ولا نصر الله و نجاد و الولية المجنونة اللى كانوا جايبينها فى الجزيرة انهاردة
ربنا ينصرهم و يقويهم و يرحم شهدائهم و يهدى حماس و يكحم اسرائيل فى يوم واحد

انا حرة يقول...

امين يا رب :)

سندس وأمل يقول...

اللهم ارحمهم واغفر لهم واغثهم.....

حسبى الله فى كا من شارك فى هذا العدوان

سندس

mUsLiM يقول...

اللهم انصر عبادك المستضعفيــن فى غــزّة

يا ذا الجلال والعــزة ، أنقذ المسلمين فى غــزة ،،

حسبنا الله ونعم الوكيــل

اللهم ارحم ضعيفهم ،واجبر كسرهم ، وتول أمرهــم يا رب العالميــن

اللهم ثبت أقدامهم وانصرهم على القوم الكافريــن

اللهم انهم عبادك فارحمهم ، وانهم اماؤك فكن لهم خير نصيــر يارب العالميــن

اللهم اغفر لهم وتقبل شهدءهــم

آميــن ، آميــن ، آميــن

والله من وراء القصد

السلام عليكم

samamasr يقول...

ربنا يرحم الجميع يارب

انا فكرت في اليومين اللي فاتوا


حسيت ان فيه حاجة

فيه حاجة وحاجز نفسي حد حطه؟!


مش عارفة..في وسط كل اللي بيحصل


حسيت بحاجز نفسي اتحط..من حد

احساس لسه حى يقول...
أزال أحد مشرفي المدونة هذا التعليق.
انا حرة يقول...

سندس و امل
اللهم امين..اهلا بيكى هنا :)

انا حرة يقول...

مصعب
اللهم امين
اللهم امين
اللهم امين
بجد الحالة اللى وصلولها لا تطاق و الجرايد العربية و الفضائيات ما وراهاش غير الاتهامات و تصفية الحسابات
و مجلس الامن عمل جلسة و طلع من غير قرارات..ربنا يرحمهم من حكامهم و من حكام العرب

انا حرة يقول...

ايمان
مش حاجز واحد يا ايمان دى حواجز كتير
مشكلتنا ان كل واحد شايف كلامه هو الحقيقة المطلقة..ما بقيناش بنعرف نتناقش
المهم خلينا ندعى للمدنيين اللى عايشين فى الرعب ده و بيعانوا من غباء حكومتهم و سفالة اسرائيل و نوم حكام العرب اللى سابوا المصيبة دى و تفرغوا لشتيمة بعض

انا حرة يقول...

احساس لسه حى
شلت تعليقك لانه يحتوى على استفزاز اكثر مما يحتوى على اسلوب حوار
عندك اعتراض على كلامها روح ناقشها هى لكن تلف ورا اللى معلقين عندها و يا يخدوا صفك يا يبقوا خونة و عملاء فدى مش طريقة حوار..الفكر لا يقابله الا فكر

و بعدين هو انت لما تاخد صف حماس ولا فتح بالكلام و الردود على النت كده هتتحل القضية الفلسطينية؟!

و بالنسبة لرايي فدم الشهداء الفلسطينيين فى رقبة السفالة الاسرائيلية و غباء حماس اللى فتحت لهم المجال لابادة شعب اعزل
و ان كنت شايفة ان دلوقتى مش مجال محاسبة المخطئ قد ما هو مجال دعاء للمدنيين اللى مالهمش اى ذنب و فى الاخر تبقى اى اراء بتتقال هنا او هناك مجرد كلام مفيش منه اى فايدة غير التنفيس عن صاحبه

ده غير انى مش فاهمة مين اللى قال ان اللى واخد موقف من حماس يبقى مؤيد بالتبعية لاسرائيل؟

و على فكرة زى ما فى مواقع نشرت الخبر بالشكل اللى انت جايبه ده مواقع تانية نشرت ان الظابط اتقتل باوامر مباشرة من قادة حماس لتشتيت ااجانب المصرى..نصدق مين احنا؟!!

و بالنسبة لتعليقاتى عندها فانا بتفق معاها فى حاجات كتير و بختلف معاها فى مواقف معينة و لما ده بيحصل بقوله صراحة احنا مفيش بيننا معرفة شخصية من الاساس عشان يكون فى اى مجال للمجاملات..

ما علينا كل واحد حر فى رأيه مهما كان مختلف او غريب عن الاغلبية..و كالما كان ملتزم باسلوب متحضر للحوار بعيدا عن الاهانات الشخصية

و على فكرة الايجابية مش فى مهاجمة الراى المخالف..الايجابية فى فعل يأكد رأيك انت و يدعمه بعمل على ارض الواقع مش فى عالم المدونات

عموما اخر جملة فى تعليقك كانت كافية جدا بالنسبالى.."فى ناس...لازم نشتمها"
فاذا كانت الشتيمة طريقتك فى الحوار فكلامك ملهوش مكان هنا

mUsLiM يقول...

جزاكم الله خيرا على عاطفتك مع أهلنا فى غزةيا أختى

ولكن لأنى تعودت فى نقاشى معكى ألا أخفى فى نفسى شيئا من كلامك فأقول ،،

ما هو الغباء الذى ارتكبته حماس والذى اعتبرتيه سببا فيما يواجهه الشعب الفلسطينى

أولا يا أختى يجب أن تعى أن حماس ليست مجرد تنظيم مسلح ولكنها طائفة وجزء كبير من الشعب الفلسطينى

فرغم الحصار والتجويع الذى عانى منه الشعب الفلسطينى فى غزة ثم القذف والنار الذى وقع عليهم بسبب ثبات حماس على مواقفها لم نسمع عن مظاهره فى غزة ضد حماس أو ضد نهج المقاومة عموما

وهذا واضح للعيان ويدل أن كل الشعب أو أغلبهم فى غزة مع المقاومة وحمـاس ونهجهـا

هذا أولا

وثانيا : فأنا لا أدرى ما المطلوب من حماس فى حصار خانق مات خلاله المئات فى المستشفيات لعدم وجود الدواء والغذاء ..!!

حصار أدى الى استخدام علف الحيوانات فى المخابز ثم إغلاقهـا

هل تقف مكتوفة الأيدى أم تدافع عن نفسها وتحاول كسر الحصار باستهداف الصهاينه بصواريخهـا

وقد تعلمنا من القرآن الكريم أن الله تعالى يقول (( وأعدوا لهم ما استطعتم من قوة ..الايه ))

وهذه الصواريخ هى إستطاعة حمــاس وأقصى ما قدروا عليــه

فعن أى غباء تتحدثين يا أختى

هل يجب على حماس أن تتنازل عن ثوابتها فتعترف بالصهاينه وتتنازل عن الثوابت الشرعيــة ..!!

أم المفروض عليها أن تشارك الخونة فى حركة فتح والذى فضحهم محمد نزال على قناة الجزيرة بالوثائق بأنهم حتى كانوا يتجسسوا على المجاهدين فى الشيشان والصومال لصالح الكيان الصهيونى ولم يستطع فرد من فتح إنكار ذلك ..؟!!

ولو كانت صواريخ المقاومة عبثيهكما يدّعون ، فما الذى يرعب الصهاينه منهـا ..؟!!

وما الذى دفع الصهاينه الى قصف غزة وترك الضفه ، ألا يدل هذا أنها ليست عبثيه بل هى توجع فى الكيان الصهيونى ..؟!!

وفعلا هذه الصواريخ وإن كانت لا تحقق توازن فى الإصابات بين سلاح اليهود وسلا حماس إلا أنها تحقق توازن فى الرعب ،،

فاليهود أجبن خلق الله ، هذه الصواريخ تؤرق نومهم وتحرمهم من متعة الحيــاة ،،

وصدق الله حيث قال (( سنلقى فى قلوب الذين كفروا الرعب ..الايه ))

أرجو يا أختى أن تتقبلى كلامى بصدر رحب

وهكذا عهدناكى :)

وانا سعيد غاية السعادة بالحديث إليى

ويعلم الله كم أكن لى فى قلبى من احترام وتقدير وعلاقة طيبه أود من الله أن تستمر وتستمر،،

وجزاكم الله خيرا يا أختى :)

وأسألكى الدعـاء

والسلام عليكم

انا حرة يقول...

بص يا مصعب انا رأيي فى حماس نفس رأيي فى الاخوان..و انا متفهمة اننا مختلفين فى النقطة دى

ما يمنعش انى عارفة انهم وصلوا للحكم فى 2006 بانتخابات شرعية و نزيهة..و بعيدا عن كلام الحكام العرب اللى مش من مصلحتهم وجود حماس اللى هى من نوعية ان حماس انقلبت على شرعيتها الى اخر هذا الهبل ..فايا كان مصدر تمويلها ايرانى ولا هندى حتى ما داموا هم هناك عايزينها تحكم يبقى هم ادرى بمصلحتهم

مع العلم بانى شايفة ان وصولهم للحكم زيه زى وصول الاخوان هنا لو كانت الانتخابات عندنا فيها شيء من الديموقراطية..فده مش عشان هم الاصلح لكن عشان هم الاجدر على تحريك الناس بشعاراتهم..بس برضه مش دى النقطة..و ما دام الفلسطينيين عايزينهم او الجزء الاكبر منهم على الاقل.. فهم احرار

لكن فى نفس الوقت مش شايفة انه من الحكمة انهم يقرروا يدخلوا حرب ضد امريكا بكام صاروخ معمولين فى بير السلم على راى واحد صحفى..قدام كل 1000 فلسطينى بيستشهد بتضرب مستوطنة واحدة..فين التوازن فى الموضوع؟

ده غير انى مش شايفة ان خوف اسرائيل من حماس ده خوف من الكام صاروخ اللى عندهم..ده زيه زى خوفهم من اى جماعة اسلامية لانهم عارفين انه بعيدا عن الديموقراطية الانتقائية بتاعتهم الجماعات الاسلامية هى الاقرب للحكم فى اغلب البلاد العربية..و بما ان مصلحتهم مع التيارات التانية سواء فتح او باقى الانظمة العربية ما عدا سوريا فبالتالى تصفية حماس لازم تكون هدف بالنسبالهم

يعنى مش الصواريخ هى اللى مخوفاهم..فى رأيي يعنى..بالعكس تهديد حماس المستمر كان احسن حجة ليهم عشان يوصلوا للى هم عايزينه
و كان فى تفسير تانى بيقول ان ليفنى و اولمرت كانوا محتاجين الحرب دى عشان يقووا شرعيتهم فى الانتخابات الجاية
يعنى هم فى كل الاحوال كسبانين

فانا مش شايفة بطولة فاللى حماس بتعمله بالعكس..يعنى مهما كان لهم حق فى السلطة و مهما كانوا لهم شرعية و قبول عند الفلسطينيين ده ما يخليهمش يقفوا قدام اسرائيل بصاروخين على حساب الشعب..ما ينفعش تتحط اى مصالح سياسية على حساب الناس مهما كانت بطولية فى نظرهم..فبالتالى المطلوب منهم يقدرو قوتهم الاول و من قبلها قوة عدوهم قبل التصريحات و الشعارات اللى مش بتاكل عيش

و بعدين يوم هنية يطلع يقول سنقاوم و سنصمد و انا الحقيقة مش فاهمة هيقاوموا بايه و هيصمدوا ازاى..و بعدها بيومين خالد مشعل يطلع يقول هنتناقش و نتحاور على الهدنة..طيب ما كان من الاول!!

و ادى ليفنى رفضت صراحة المباردة الاوروبية فى فرنسا و اولمرت اعلن ان دى مجرد بداية و فى اى وقت هيحصل اجتياح برى..مش محتاجة خبرة سياسية عشان يبان ان الخاسر الاول و الاخير هو الشعب الفلسطينى..حرام والله

و انا لا مع حماس ول مع فتح انا مع الاطفال اللى بتموت كل ثانية و الامهات اللى مش عارفة تطمن عيالها لانهم هم نفسهم خايفين و مع الشيوخ اللى لا حول لهم ولا قوة..مع المدنيين يعنى بعيدا عن السياسة و قذارتها

و بجد شعور متبادل يا مصعب والله..مهما كان فى اختلاف فى الاراء بيننا فانا بجد بحترمك جدا :)

انا حرة يقول...

ايمان..
نسيت اقولك ان رسالتك الصباحية بسطتنى اوى بجد..ربنا يخليكى ليا يا حبيبتى يا رب

بس انا مش عايزاكى تشغلى نفسك بيا..انا كويسة والله :)