السبت، 28 مارس 2009

عندما قالت شكرا..

شكراً.. لطوق الياسمين.. وضحكت ساخرة له و ظننت أنك تعرفين معنى سوار الياسمين يأتي به رجل إليك ظننت أنك تدركين احبها فقدرت مشاعره و شكرته عليها تعمدت عدم الرد بالكلمات و اكتفت بابتسامة فاى كلام يقال سوف يجرح مشاعره هو ظن انها لا تعرف معنى هديته و ان هذا هو السبب فى عدم اكتراثها لكن الحقيقة.. انها كانت تعلم جدا و لكنها لم تطلب طوق الياسمين فهو من تطوع باحضاره..

******** وجلست في ركن ركين تسرحين وتنقطين العطر من قارورة و تدمدمين لحناً فرنسي الرنين لحناً كأيامي حزين قدماك في الخف المقصب جدولان من الحنين وقصدت دولاب الملابس تقلعين .. وترتدين وطلبت أن أختار ماذا تلبسين أفلي إذن ؟ أفلي أنا تتجملين ؟ كان صديقا لها و لم تدعى هى غير ذلك اهتمت بان تشركه فى تفاصيلها الصغيرة من باب الصداقة و اهتم هو بكل ما يحيط بها لانه ارادها حبيبة توهم ان كل ما تفعله ما هو الا ردود افعال لمشاعره هو نحوها مشاعره التى لم يصرح لها بها و لكنه توقع ان تفهمها وحدها و توهم انها تتجمل له هو مع انها لم تصرح بذلك..

******** ووقفت .. في دوامة الأوان ملتهب الجبين الأسود المكشوف من كتفيه هل ترتدين ؟ لكنه لون حزين لون كأيامي حزين ولبسته وربطت طوق الياسمين وظننت أنك تعرفين معنى سوار الياسمين يأتي به رجل إليك ظننت أنك تدركين و يستمر فى اوهامه و تستمر هى فى حياتها يدقق فى ثيابها لانه يحبها و تدقق فى مظهرها لانها تحب سواه

********

هذا المساء بحانة صغرى رأيتك ترقصين تتكسرين على زنود المعجبين تتكسرين وتدمدمين قي أذن فارسك الأمين لحناً فرنسي الرنين لحناً كأيامي حزين وبدأت أكتشف اليقين وعرفت أنك للسوى تتجملين وله ترشين العطور وتقلعين وترتدين ولمحت طوق الياسمين في الأرض .. مكتوم الأنين كالجثة البيضاءتدفعه جموع الراقصين ويهم فارسك الجميل بأخذه فتمانعين وتقهقهين" لاشيء يستدعي انحناْك ذاك طوق الياسمين كانت تحب غيره..تغنى لغيره..تراقص غيره فكيف يطلب منها تقدير ما لم يقله هو؟ فهو الذى قرر تغيير مسار علاقة ما كان لها ان تتغير من الاساس ارادته صديقا فقرر هو ان يتخذ منها حبيبة فكيف يطلب منها ان تتجاوب مع مشاعر لا مكان لها سوى فى قلبه هو فقط؟ فسقط طوق الياسمين..و معه رمز حبه لها و لم تهتم بالتقاطه فهى بيد يدى فارسها الذى اختارته فكيف تتركه لتلملم بقايا قلب اخر ؟ فالشفقة فى هذه الحالة مؤلمة باكثر من ادعاء التجاوب احبها فشكرته و قدرت مشاعره.. و احبت غيره فاتهمها بالظلم و القسوة و لكن ليست القسوة فى اخباره بحقيقة مشاعرها و لكن القسوة نفسها ان تدعى شعورا ليس موجودا حتى لا تجرح احساسه بين الصداقة و الحب شعرة.. تماما كالتى بين "شكرا" و "احبك" فهى تقدر شعوره نحوها و لكنها فقط..لا تحبه ربما كانت تكابر و ربما وجودها بجانب الاخر دليل قاطع على عدم اهتمامها و لكن الاكيد انها..قالت شكرا

********
على الهامش..
لم تكن قد اتمت عامها الثالث بعد عندما تصرفت على عكس ما طلب منها اباها فقرر معاقبتها بمنعها من مغادرة فراشها الصغير حتى تقول "اسفة" بصوت مسموع مرت ساعات و هو ثابت على موقفه..و هى اكثر ثباتا و مر اليوم كاملا و هى على حالتها هذه حتى كاد ابوها ان يفقد عقله فهذه ليست تصرفات طفلة فى الثالثة ابدا فتح الباب و نظر اليها و هو يعتقد انه سيرى دموعها و قد اغرقت الفراش فوجدها تنظر اليه بكبرياء لم يصدقه فمنذ خلقت و هى لم تفعل شيئا الا حينما تكون هى مستعدة فمتى يدركون؟!

الثلاثاء، 24 مارس 2009

فونفونتى و كوبرى.. كل سنة و انتوا

مبدأيا كده دا مش موضوع عن مناسبة عادية و جو التورتة و الجاتوه دا مش هنا و مش هعتبره تهنئة بعيد ميلاد على قد ما هو شكر لاتنين
من اطيب الناس اللى ممكن الواحد يعرفهم فى حياته و مش هرغى كتير
عشان انتوا الاتنين اكيد عارفين معزتكم عندى قد ايه.. بس راعوا ظروفى
بما انى فاشلة فى كتابة المواضيع اللى من النوع دا :D و لانى عارفة انى لو اتكلمت من هنا لمارس الجاى مش هديكم حقكم
ندخل بقى فى الموضوع..

يحتفل العالم العربى و الاجنبى و الدولى هذه الايام بمناسبتين من نوع خاص جدا

ففى مثل هذه الايام اتولدت احلى بنوتة فى الدنيا..فنون

24-3-1990
عارفة لما تحسي ان حد قريب منك اوى من قبل حتى ما تشوفيه و من اول مكالمة تحسي كأنك عارفاه من زمان و تتمنى انك لما تقابليه اول مرة
يفضل فى نفس الدرجة اللى انتى حطاه فيها فلما تقابليه تلاقى انه عدى الصورة الحلوة اللى انتى رسمهاله لانه احلى بكتير من اللى كان في خيالك ده بالظبط اللى حصلى معاكى طول عمرى متخيلة انى المجنونة الوحيدة فى الدنيا اللى بالدماغ دى لما عرفتك اتطمنت ان فى حد شبهى للدرجة المرعبة دى عمرى ما تخيلت
انى ممكن الاقى صديقة تبقى اقرب لى من كتير عرفتهم من سنين و عمرى ما توقعت ان دا يحصل هنا فى العالم العجيب دا و انا اللى اساسا باخد قرون على ما بثق فى حد سبحان الله من اول مرة حسيت انى عرفاكى من سنين فنونتى الجميلة..كل سنة و انتى زى ما انتى كل سنة و انتى طيبة
و بتسمعى و بتحلى العقد حتى و انتى تعبانة و مكتئبة كل سنة و انتى دمك خفيف
و القعدة معاكى تطلع اى حد من مود الاكتئاب و السخافة كل سنة و انتى ذكية و دماغك توزن بلد كل سنة و انتى طفلة رقيقة و صغننة و بديل حصان و فاكرة نفسها كبيرة كل سنة و انتى بتفهمى و تقدرى و تقوليلي "قولى انا اسفة" ;) كل سنة و انتى قصيرة و محسسانى انى هانى رمزى :D كل سنة و احنا بنيجى على بال بعض فى الاوقات الصح جدا كل سنة و انا كل ما افكر فيكى الاقى اسمك طلع على الموبايل كل سنة و انتى الوحيدة فى الدنيا
اللى ممكن ارغى معاها اكتر من ساعة متواصلة فى التلفيون كل سنة و انتى بتعرفى اللى مش بقوله
و بتفهمى اللى بحكيه يمكن اكتر منى كل سنة و انتى رعبانى عليكى باختفائاتك المريبة كل سنة و توارد الخواطر المرعب ده شغال بيننا و كل سنة و انتى ناجحة فى حياتك و فى شغلك و محققة كل اللى بتتمنيه و اكتر بس فى الوقت الصح ;) لانك حقيقي تستاهلى كل حاجة حلوة فى الدنيا و انا واثقة و متاكدة
ان ربنا شايلك ايام احلى من احلى احلامك لانك بجد تستاهلى كل سنة و انتى فنون..الصديقة الرقيقة و البنت الجدعة الرومانسية و الاخت القريبة و الطفلة الصغننة على فكرة بجد بحبك اوى يا فنونتى

المناسبة التانية بقى فهى طبعا واكيد..

عيد الام :D هو انا مش عارفة ازاى و اشمعنى اليوم ده تحديدا..بس ما علينا..

25-3-1939 كوبرى الاخ الكبير و الصديق الجدع الاسكندرانى جدا زميلى فى حب المصرى اليوم و مجدى مهنا و جوليا روبرتس:D المتفائل دايما بالرغم من قعدته معانا و اللى انا بجلالة قدرى متوقعاله مستقبل كبير فى البلد دى و اسمع كلام اختك الصغيرة و سيبك من ماجا انت هتغير حاجة فى البلد دى بجد و ابقى قول فلة قالت و انت عارف طبعا ازاى رأيي مهم و كلامى دايما و ابدا بيكون صح و بما انى افشل واحدة فى الدنيا تعرف تتكلم فمش هعرف اشكرك على حاجات كتير اوى و بجد لوكان عندى اخ كبير ما كانش هيعمل اكتر من اللى انت بتعمله معايا و بعيدا عن الدبش اللى بتحدفه احيانا كتيرة فى وشى :D و بما ان الكيبورد معترض فمش هفضل اشكر فيك و اقول فى حقك كلمتين زى انى اتعلمت منك حاجات كتير لا مش كتير اوى يعنى عشان ما تفرحش بنفسك و بالنسبة للصورة فالسبب ان الفيلم بيفكرنى بيك انت و ماجا بشكل هستيرى و الشخصية دى تحديدا بحسهم استوحوها من شخصيتك :D و انا عارفة انك اكيد عايز تقتلنى على الموضوع دا بس ما كانش ينفع ما يتعملش :D كل سنة و انت طيب يا محمد و عقبال ال71 يا رب :D و ربنا يبعد عنك الفاكسين و الفاكسات قادر يا كريم

*******

Samamasr فنون مش راضية أقول كلام كتير.. ربنا يسعدك كل سنة وانتي طيبة .. محمد ربنا يوفقك وينجحك يا محمد وقلل من النت شوية وزاكر كل سنة وانت طيب

*******

Dr.lecter

محمد وفاطمه بعد 10 سنين ان شالله لو لينا عمر ولسه عارفين بعض هاقول ان اللي طلعت به من سنه 2004 من معرفتي بايجي فيلم ناس قليله انا فيه ناس كتيره من ايجي كانت عاوزه تتعرف عليا علشان عجبتهم اللي بكتبه بس انا كنت دايما متخوف من علاقات النت سواء مع ولاد او بنات بس فيه ناس قليله جدا اللي استغربت اشمعني دوول اللي وافقت اعرفهم اصلا انا ماخبييش عليكم انا عنصري في حكايه السن دي او كنت عنصري يعني اي حد اصغر مني بابص له باستخفاف وعدم اهتمام وده يمكن كان عييب فيا بصراحه يوم ماعرفت قباري حسيته ان في نفس سني وقلت انا بكلم واحد ناضج وبعد كده لما عرفت سنه قلت الوااد ده بيشتغلنا اكيد وبعد كده لما قابلته في الصيف اللي فات هو واحمد ماجا قلت معقول ده محمد ده شكله اكبر مني او في سني علي الاقل واحمد بقي كان العكس شكله صغنن كده هههههههههه ويمكن ال3 مرات اللي قابلته فيها اعجبت به اكتر

وقلت ياريت كان محمد اعرفه من زماان وبقيت بصراحه باعتبره حافز ليا اني ابص للدنيا بصه متفائله واني ارجع تاااني اعافر في الدنيا واحارب علشان احقق اللي انا عايزه محمد انا مبحبش اتكلم كتيير بصراحه بس صدقني انت ليك تاثير كبيير جدا عليا انت والناس اللي عرفتها من ايجي واللي باعتز جدا اني عرفتهم طول حيااتي انا عندي 4 شلل شله الزقازيق وشله القاهره وشله زمايلي في الشغل ودلوقتي انت انضميت لشله اسكندريه انت واحمد مع الناس القليله جدا اللي اعرفهم في اسكندريه انا عندي اخوات بس مش راضي عنهم هههههه مش زي مانا عاوز او بالمعني الاصح نفسي يبقي ليا اخ اكبر يرشدني اخ ابص له اقول اه انا ليه مابقاش زيه ليه مابصش للدنيا زيه ابطل ابص للظلمه محمد انا قلت كلاام كتيير عليك السنه اللي فات وبعيده واقوله مره تاانيه احلي حاجه ان رغم مابقيناش ندخل ايجي زي زماان بس المدونات والتليفونات لسه موجوده كل سنه وانت طيب وماتزعلش لو خسرت معركه صغيره في حياتك لكن انت كسباان طوول الحرب وهتيجي في يوم وتقول صدقت ياليكتر كمل ومايهمكش راي الناس لانك انت مؤمن باللي انت عاوزه وعارف انت هتوصل اكيد هتوصل انتي ياببني ناجح صدقني فاطمه هانم الليدي فاطمه اقول اختي ولا صديقتي ولا نقطه النوور ولا ولا ولا ولا كام سنه ؟ سنتين سنتين عارفك امم فاطمه اقول عليها ايه انت عارفه طبعا اني قلتلك قبل كده ان فيكي شبه رهيب من فاطمه بنت عمتي نفس شخصيتها وروحها فاطمه ناضجه جدا متميزه في افكارها لكن رغم كده لا يمكن تنكر وجود طفله في روحها عايشه جواها بتديها حيويه وطاقه تخليها تكمل حياتها مهما كانت العقبات اللي ادامها فاطمه مش مؤمنه بالكلاام ده مش مؤمنه انها فعلا شخص متميز جدا شخص فريد وفاكره نفسها انها مش كده وانها واحده عاديه وحاسه ان ثقتها مهزوزه جواها مع اني اول معرفتها مكانتش كده فاطمه كلمات قليله منك كانت كافيه انها تنتشلني من ظلمات نفسي خاصه انت وانت عارفه دايما اني كان نفسي يبقي ليا اخت اكبر مني نفسي فعلا ان امي كانت تخلف واحدة قبلي علشان الجا لها واسمع نصايحها وتبقي قدوه ليا انا عندي مشكله فعلا في حكايه الاخ الاكبر واالاخت الكبري عندي مشكله في اني عاوز حد امشي وراه ويوجهني والمشكله الاكبر اي واحده اكبر مني بتعلق بها جدا سواء استاذه ليا في الجامعه او طبيبه او مديرتي في الشغل او بنت عمتي او امي علشان انا لسه طفل محتاج توجييه فاطمه انت صحيح اتغيرتي شويه عن زماان لكن انا عارف كويس ان العاصفه دي مؤقته وهتروح حتي لو طولت شويه انت هتوصلي وهتطيري للي انت عايزاه وتستحقي فعلا شخص يكون سندك وعونك ويقدرك وان شالله ربنا يجمعك به وهاجي فرحك علشان اشوف اختي وهي في الكوشه واعيط من الفرحه واطمن عليكم كلكم واحد ورا التااني باذن الله فاطمه قلت ياريت يبقي فيه منك اتنين والحمد لله تم استنساخ واحده منك بس اصغر منك بكام سنه ماتتخيرش عنك بحاجه علشان لو مشيتي التانيه تبقي موجوده وتفكرنا كلنا بيكي ( وش بيضحك علي راي مصعب اخويا ) باذن الله يبقي لينا لقاء قريب يجمع كل الصحاب كل سنه وانت طيبه

*******

الشاردة.. فنون وكبارى

انا عامة مش بعرف اعبر عن الى جوايا بالكلام والمعانى اوقات كتير بتطلع معايا ملخبطه وملهاش هدف وكمان مش هقعد اوصف فى كل واحد فيكم لان اكيد انتم عارفين كويس ايه الى جوايا وفكرتى عنكم كل الى هقدر اقوله ان الفتره الاخيره حاسه ان كل حد فيكم كانه ضايعه منه حاجه ومش قادر يلاقيها يعنى فنون وكبارى الى اكتر اتنين كانوا بيدونى الامل حسيت ان نغمة الحزن ابتدت تسيطر عليهم وانا كنت ببقى فرحانه قوىى بقوتهم وشدتهم فيارب يارب السنه دى كل واحد فيكم يقدر يلاقى الحاجه الى بيدور عليها وحاسس انها ناقصه فى حياتهم الشئ الى يقدر يرجع لهم البسمه والتفاؤل من تانى علشان احنا كمان (شلة المحبطين) نلاقى الى يشجعنا ويدنيا امل فى الحياه تانى اتمنى انكم تحققوا كل الى نفسكم فيه والشئ الى فيه الخير يتم اما الشر فربنا قادر انه يبعده كل شئ بامر الله وربنا معاكم دايما لانكم تستاهلوا كل خير اكيد تستاهلوا انكم تحققوا كل الى بتحلموا بيه

*******

Reem فنون شخصية اعتبرها من اذكى الشخصيات اللي قبلتها ذكاءها و بديهة التصرف بتظره عليها من خلال ردودها حتى من غير ما الواحد يعرفها رغم النضج الواضح في شخصيتها بس بتلاقي فيها حتة براءة كدة زي الاطفال انسانة طموحة جدا و قوية و واضحة في الحياة حب كل الامور في مكانها الصحيح و بتفرض احترامها التام على الجميع في مجرد حضورها كل سنة و انتي طيبة يافنون و عقبال مية سنة و نشوفك دايما سعيدة في كل سنين عمرك و تحققي احلامك كلها قباري شخصية ما شاء الله قمة في التفاؤل مهما كانت الدنيا سودة ماعرفهوش كويس بس اقدر اقول انه انسان راكز في ارائه و اضح و عفوي عنده قدرة حلوة على التفاهم و التعايش و الاحترام مع الاخر مهما كان الاختلاف بينهم ودي ميزة يفتقدها كتير في زماننا بحسه انسان مرح و يحب الضحكة و الحياة و كمية الامل عنده بلا حدود اتمنى السعادة و التفاؤل العمر كله و انك تقدر تأثر بروحك و تفاؤلك على كل من حولك كل سنة و انت طيب و يارب سنين عمرك تديك كل اللي بتتمناه من الحياة

*******

Cinderella

فنـــون وقبــــاري وجهـان لعملـة واحـدة الإصــرار التحدي العزيمـة الصبــر الطمــوح التفـاؤل فنونتي الحلوة .. كل سنة وانتي طيبة يا قمــر وعقبـال 150 سنـة ودايمـًا موفقة في حياتك وبتحققي كل ما تتمنيه .. وإن شـاء الله نبارك لك السنة الجاية مع النونو انتي إنسانة تستهالي كل خيــر بجـد .. وأتمنى إننـا نستمر على اتصــال دايمـًا يا رب

قبـــاري باشــا كل سنة وانت طيب وعقبـال ما أشوفك وزير الماليــة إن شـاء الله وصدقني انت قدهـا وقــدود ومش مجاملة مني والله .. ربنـا يوفقك
*******
فونفونتى و كوبرى
كل سنة و انتوا طيبين
ربنا يحميكم و يبارك فى عمركم يا رب..
كان معكم مراسلينكم :D
Maga&Folla

الأربعاء، 18 مارس 2009

خطرفات مسائية..

امبارح لقيت واحدة اعرفها كاتبة على الفيس بوك life is too short for dating ugly boys على ما اظن دا اللى بيسموه التقصير و المجايب من الاخر..
الحمد لله على نعمة العقل
*******
طول عمرى مقتنعة بان مفيش فرحة بتيجى
من غير ما يكون قبلها فترة انتظار لحد ما جملة فى فيلم the lake house خليتنى اعيد نظر كانت حاجة شبه ان اللى بيضيع فرص بايده عشان فرصة معينة فى دماغه ممكن يضيع حياته كلها و هو مستنيها احلى فرحة هى اللى بتيجى على غفلة على فكرة فى اكتر وقت انت مش مستنيها فيه
و مش عارف اصلا ان هى دى اللى هتسعدك فتلاقيها جت و غيرت حاجة جواك من غير ما تعرف جت منين ولا ازاى
دلوقتى بس عرفت معنى جملة فى اغنية لفيروز
جاى عغفلة متل الفرح..
*******

كم رهيب من الاحباط و المحبطين حواليا اكتشفت ان مفيش مخلوق على وجه الارض ممكن يطلعنى من جو الاحباط دا غيرى ممكن اطلع نفسي بحاجات تشغلنى عن التفكير او بلمة ناس و رغى مالوش معنى بهدف تضييع الوقت او بكمية اكل و شوكولاتة مهولة تكفى قرية بحالها او بكلمة صغيرة ابسط من البساطة لكن وقعها على السمع مالوش مثيل فى عالم الكلمات..حلم
*******

بعد ما سبت عالم الدراسة و الكلية و بعد ما دخلت فى عالم ما عنديش فيه اى سيطرة على الناس اللى بتدخل حياتى منه ولا اى تحكم فى نوعية الناس اللى بتعامل معاها لاكتر من 9 ساعات فى اليوم اقدر اقول بكل ثقة ان يوسف بيه وهبى الله يرحمه و يبشبش الطوبة اللى تحت راسه ما كانش دقيق فى وصفه..العالم مش مسرح كبير.. ما العالم الا كباريه كبير .. و فى شارع الهرم و ما زلت منضمة لصفوف القرويين فى المدينة!! *******

بين الصداقة و الحب..شعرة فلماذا يصر البعض على قطعها؟
*******
يوم ما قررت اعمل دراسات عليا فى كلية اعلام
كان رد الفعل امال هتتجوزى امتى و يوم ما اخترت المجال اللى بشتغل فيه
كان السؤال امتى هتختارى العريس اللقطة؟ و يوم ما ابتديت ريجيم
كان الرد كويس عشان الجواز و مستلزماته و اخيرا لما بدات اسال عن الماجيستير
كان الreaction العريس اولا ثم الدراسة خايفة بكرة لما اجى اغير الشامبو اللى بستعمله
الاقى حد بيقولى يا بانتين يا هتعنسي!!
*******
نكتة اليوم رئيس مدغشقر استقال يا ولاد و اتنازل عن المهام الرئاسية لزعيم المعارضة ياما نفسي اشوف اليوم دا هنا مش بتاع الاستقالة بعد الشر.. لكن اليوم اللى يظهر فيه كائن يمشى على رجلتين يصلح انه يطلق عليه زعيم المعارضة المصرية!

الأحد، 15 مارس 2009

نصفى الاسود..

-اعترف بان "تليفونى اتسرق" هى جملتى المفضلة
للرد على هواة الزن و الخروج اليومى علما بانى غيرت اكتر من تليفون لاكتر من سبب..
ولا سبب منهم كان السرقة! -اعترف بان هزة راسي مش معناها انى سامعة.. معناها انى ماليش نفس اسمع و مش عايزة اكسف اللى بيكلمنى -اعترف باننى انسانة ان جاز التعبير –"ضد اللمس"- فمجرد "طبطبة" المؤازرة العادية تجعلنى اخذ موقفا شديد العدائية فهنا تحديدا النوايا الطيبة لا تشكل لدى ادنى اهمية و معها يبدأ مسلسل "لست مكسورة فلا تحاول اصلاحى" فى الظهور -اعترف باننى اتجنب النظر بمستوى رؤوس البشر فى الاماكن العامة خوفا من مقابلة اشخاص لا ارغب فى رؤيتهم فطريقتى تلك تسمح لى بادعاء بان " ما خدتش بالى " -اعترف بان وضع المتهم لا يناسبنى..
و الدفاع عن نفسي فى منتهى الاهانة فعندما اكون مستفزة..فانا لا اهدف الاستفزاز نفسه..
و لكنى فقط اصون كرامتى -اعترف بانى دلوقتى واثقة و متاكدة
انى ما كنتش هنفع دكتورة مخ و اعصاب ولا دكتورة اى حاجة اساسا لكن المكابرة تمنعنى من الاعتراف بانها كانت على حق -اعترف بانى كذبت كتير للحفاظ على حاجات مهمة فى نظرى لوحدى و بانى احيانا ادعى الاهتمام بحواديت الاخرين
لاحافظ على صورة الطرف الاقوى فى العلاقة التى صدقوها حتى اقتربت انا ايضا من تصديقها - اعترف بانى ما بعرفش اقبل مجاملات من اى نوع.. ففكرة ان اكون مدينة لاحد غير مقبولة بالنسبة لى..
حتى لو كان الدين مجرد كلمات -اعترف بانى اكره الفشل..عمرى ما جربته ولا عمرى هقبله
فمصطلح bad looser ينطبق علي الى حد كبير..
-و بالرغم من ذلك
اعترف بانى اثبت فشلى فى التعامل مع نوعين من البنى ادمين البنت المايصة و الراجل التافه فمعهم اتحول لاسخف شخصية فى العالم ولا مانع من بعض النفاق من جانبى..
فحقيقتهم احقر من ان اصارحهم بها -اعترف بان هناك فى حياتى ما لن يعرفه غيرى..
مهما ادعيت انى "قلت كل حاجة"
-اعترف بان المظاهر لا تعنينى كغيرى.. لكنها تمثل فى حياتى اكثر كثيرا من الحجم الذى ادعى انها تشغله
-اعترف بان كبريائى يمنعنى من معاتبة من يخطئ فى حقى عن عمد فتجاهلى لهم لا يعنى اننى لا اهتم..لكنه يعنى انى اهتم بزيادة -اعترف ان لحظات ضعفى تختبئ دائما خلف ستار هش من القوة المزيفة ستار لن يدرك مدى زيفه الا من يعرفنى جيدا.. -اعترف ان ضميرى بيأنبنى كل ما بسمع رأيك فيا و انا عارفة و متاكدة ان رايي فيكى هو العكس تماما -اعترف بان هناك دائما حاجزا قائما بينى و بينهم..
مهما اعتقدوا انهم "قريبين"
-اعترف بان ادعاء عدم الفهم ما هو الا محاولة اخرى للهروب منه..
و بالرغم من علمى بمدى قسوتها و فشلها الا اننى لا املك غيرها

الجمعة، 13 مارس 2009

just a feeling

قديش كان في ناس عالمفرق تنطر ناس وتشتي الدني ويحملوا شمسيه وانا بأيام الصحو محدا نطرني صارلي شي مية سنه مشلوحه بها الدكان ضجرت مني الحيطان ومستحيه تقول وانا عيني عالحلى والحلى عالطرقات غنيلو غنيات وهو بحاله مشغول نطرت مواعيد الأرض وما حدا نطرني.. صارلي مية سنة عم ألف بعناوين مش معروفة لمين وديلن أخبار بكرا لا بد السما ما تشتيلي عالباب شمسيات وأحباب يخدوني بشي نهار والي ذكر كل الناس بالأخر ذكرني قديش كان في ناس عالمفرق تنطر ناس وتشتي الدني ويحملوا شمسيه وانا بأيام الصحو محدا نطرني..
من احلى اغانى فيروز

*********

if there is anything i hate more than pity
"it's fake pity

الأربعاء، 11 مارس 2009

عزيزتى حواء..ما تخليهوش يبص بره عشان ما يجيبلكيش ضرة!!!!

و انا بقلب فى جروبات الفيس بوك لقيت جروب اسمه كفاية صحوبية عايزين نتجوز قلت اتفرج على اللى عايزين يتجوزوا دول لقيت موضوع عامله واحد
(هسيب الكلمة المناسبة لتقدير اللى هيقرا) اسمه كونى له اربع حتى لا يتزوج عليكى! بجد يعنى*&%$$#*@@ على اساس ايه مش فاهمة؟!! سيادته بيهدد السنيورة اللى هتتجوزه انها لو ما اتصرفتش فى نفسها و تكاثرت ذاتيا و بقت اربعة المحروس حبيب قلب ماما هيتجوز عليها اللى تحت ده تفاصيل الموضوع: الأولى : الأم انه يحب الام . الام فى حنانها, فى عطائها اللامحدود, عطائها الصامت الذى لا يتبعه من و لا اذى يريد اما فى سعة صدرها معه وفى تسامحها و عفوها ان هو اخطا و فى قبلتها و تشجيعها ان هو اصاب فى تسليتها له و الاخذ بيديه فى الضراء والفرحة و البهجة فى السراء فى سهرها بجواره عند مرضه او اثناء عمله و فى بشاشتها و سعادتها عند حضوره و قلقها و لهفتها عند غيابه انه يريد امه التى فقدها بعد زواجه
و يظل يحن اليها كلما احس بحاجته لها والله هعيط من التاثر..ده ايه الحلاوة دى ولا الرجولة..مش ممكن يخواتى بجد مش فاهمة يعنى لما هو عايز يسيب امه و يتجوز امه برضه كان ساب ماما ليه من الاول؟!!! الثانية : الحبيبة ثم هو يريد الحبيبة العاشقة التى تتفنن فى سرقة قلبه وفى اثارة رجولته يريد امراة لعوب تبهره بقوامها و عطرها كما تبهره بانوثتها و سحرها يريدها ان تذوب بين يديه عشقا و شوقا و هياما انا شلت سطر من فوق عشان ما اتشلش من ناحية و عشان احافظ على نضافة البلوج من ناحية تانية بس كله كوم و لعوب دى كوم تانى!!! ازاى عايزها متربية و بنت ناس و قطة مغمضة و رقيقة و هادية و ما بتفهمش غير اللى هو عايزها تفهمه و لعوب فى نفس ذات الوقت؟ اسكت يا لسانى بجد الثالثة : الصديقة ثم هو يريد الصديقة التى يبث اليها همومه و يستشيرها فى اموره يريد صديقة تحفظ سره و تستر عيبه لا زوجة تفشى سره و تفضح عيبه بين جاراتها و صديقاتها و اهلها يريد عقلك و حكمتك و مشورتك لا لسانك و ثرثرتك فيما لا يهمه يريد ان يتكلم فتحسنى الاستماع لا ان تتكلمى فتكثرى الشكوى من اعباء المنزل و مشاكل الاولاد فيلجا الى الصمت المنزلى او الى ترك البيت و قضاء معظم الوقت مع اصدقائه الذين يفهموه و يسمعوه يعنى هو يتكلم و انتى اسمعى لحد ما يجيلك طرش لكن انتى تتكلمى و لا تشتكى تبقى تستاهلى انه يتجوز عليكى مش كان يتجوز واحدة خرسا افضل برضه!!!! انما مسؤولية و اولاد و مشاكل و مصروف البيت..مش قصته و نعم الرجولة والله الظاهر حد ضحك عليه و فهمه ان الجواز ده رحلة لدريم لاند ولا كوكى بارك بس جامدة يبث دى..مثقف اوى بسلامته الرابعة : الخادمة ثم هو يريد الخادمة- نعم خادمة - يريدك ان تعدى له الطعام بيديك حتى و ان كان لديك خادمة يريدك ان ترتبى اغراضه بنفسك يريد ان يرى لمساتك انت فى اركان البيت يريدك ان تعتنى بملابسه و مظهره و مظهرك و مظهر اولاده يا نهار اسود و منيل!!!!! خدامة..لا و واضحة و صريحة و متكررة مرتين و بالنحوى!!! و على الراغبات فى الفوز بقلب المحروس التمتع بالصفات التالية - الا يقل سن المتقدمة عن السبعين
عشان تكون ام متودكة فى موضوع الامومة ده - ان تكون من نسل القديرة تحية كاريوكا (عشان الشرط الاول بتاع الامومة يتوافق مع الطلب التانى اللى هو اللعوبية) - ان تكون عضوة فى جمعية الصم و البكم عشان تسمع و ما تتكلمش - و اخيرا ان تثبت بالاوراق الرسمية صلة الدم بابلة نظيرة و لو معاها شهادة عليا من معهد التدبير المنزلى هيتعهد المحروس بضمان الاولوية ليها فى طوابير المعاتيه اللى هيستنوا عليه اكتر من 27 ثانية قبل ما يرموه هو و البطيخة و بوكيه الورد و اللى ربته على الانانية دى فى اقرب عبارة طالعة ايطاليا بعيدا عن قضية المراة
و رغى الستات الفاضية بتوع المراة الحديدية
و حقوق الفئة اللى اتفطست لحد ما بقيتش باينة من اول اهل مش هاممهم غير المهر لاب مش شايف فى بنته غير عار عايز يخبيه لاخ بايظ بيمارس على اخته رجولة مش موجودة اساسا لعريس لقطة باعت ماما
تعاين المحروسة اللى هيتجوزها عشان لو محتاجة قطع غيار لواحد تافه مش هامه غير الشعر الاصفر و العينين الملونة لمجتمع عايز غسيل مخ
عشان يعرف يحترم ام و اخت و زوجة و صديقة و ابنة و بما انى زهقت من الكلام فى الموضوع ده و بما انى عارفة و متاكدة ان الاحاديث و الايات اللى بيتحججوا بيها فى اسلوب معاملة المراة لزوجها فى قدامها ايات و احاديث
عن مراعاة المراة و تكريمها و احترامها و احترام ادميتها و بما انى عارفة ان اللى بيفكروا بالاسلوب العقيم ده مش قليليين ابدا و لانى اقتنعت تماما ان فى بنات تستاهل اكتر من كده بغباوتهم و ان اللى مش عارفة تختار صح من الاول يبقى ذنبها على جنبها و بعيدا عن وجهة نظرى الشخصية من التعدد و من المتعددين (اللى هم بيشجعوا تعدد الزوجات يعنى) انا عايزة اسأل سؤال من زاوية تانية خالص ليه الواحد مش بيبص لنفسه قبل مايحط توقعات هلامية من الناس اللى بتشاركه حياته؟ يعنى بسلامته ما قالش هو هيعمل ايه عشان يكون جدير بالخدامة اللى عايز يتجوزها؟ هل هو كمان هيكون ليها اربعة حتى لا تزوغ عينيها؟
ما تخيلش مثلا انه لو كان راجل و فهم معنى الرجولة بجد
كانت هى لوحدها عملت من نفسها 18 عشان تكون جديرة بيه؟ و بعيدا عن انه وزنه وزن تلاتة و انى ما جبتش لينك الجروب هنا خوفا على البنات اللى هيقروا من الفتنة بس و غلاوة ماما عندك اشترى مراية و بص لنفسك قبل ما تدور على الاربعة! اللهم لا تؤاخذنا بما فعل السفهاء منا ملحوظة:الصورة اللى فوق دى مسروقة من هنا

**********

نقطة و من اول السطر
دى صورة صورتها فى اسكندرية من حوالى اسبوعين
ايه دا؟..لا بجد مش فاهمة يعنى
لو واحد نازل من بيته و هو مقرر مقدما انه نازل لهدف ما
و واخد معاه واحدة نازلة من بيتها عشان نفس الهدف ال"ما "دا
و راحوا و اختاروا المكان اللى مش مستخبى نهائى بالمناسبة
زيهم زى كلاب و قطط الشوارع
هل اتنين بالتفكير و المنطق دول ممكن تأثر فيهم جملة
مكتوبة على صخرة فى عرض البحر
هموت و اعرف العبقرى اللى فكر فى الفكرة الجهنمية دى!!!
مش عارفة ليه افتكرت الايميلات بتاعت المعجزات الوهمية
دى بتنسب حاجات لدين قوى من الاساس
و مش محتاج اضافات
من معاتيه رموا عقولهم مع جزمهم على ابواب الجوامع
و دى تصرفات ناس عينوا نفسهم رقباء على خلق الله
و بصولهم من فوق برج عاجى على اساس انهم بيخاطبوا ملايكة مش اشخاص خطائين
و الاتنين نسيوا ان الرقابة لو ما كانتش من جوه البنى ادمين
ولا مليون صخرة و ايميل ما هيعملوا فرق
و الاتنين بيجتمعوا فى ان المخاطِب غبى و المتلقى اغبى!

الأحد، 8 مارس 2009

متتاليات..

Benjamin Button
بعيدا عن ان الفيلم المفروض يتكتب عليه انه للكسلانين فقط نظرا لان الشخصيات اللى ما بتعرفش
تقعد على بعضها 3 ساعات زى حالاتى هتيجى على اخر الفيلم و تنهار لكن فكرة ان واحد يتولد عجوز
و يعيش حياته بالعكس فيها شبه كبير من حياتى مش لازم افسر..بس يا خوفى اجى فى الاخر و الاقى نفسي اتسخطت و محتاجة اتعلم الكلام من الاول و ان كان ده هيريح ناس كتير الصراحة..
غريبة اوى نقط التقاطع بين الواقع و الافلام فيلم فى حياة كل منا مشاهد يتمنى يعملها pause
و غيرها يتمنى انه يعملها replay و اخرى يدفع نص عمره عشان يسجل عليها و ما يشوفهاش تانى فلاش باك صورة قديمة لحضن جامع بنتين الشبه بينهم اقرب للتوائم
منتهى الامان..
فضل كبير من ربنا ان الواحد يلاقى حاجة فى الماضى يحنلها
لكنه اولا و اخيرا بيفضل..مجرد حلم احلام كنت فاكرة ان كل ما الواحد بيكبر احلامه بتكبر معاه
اتارى ان كل ما الوقت بيعدى كم التنازلات بيزيد اكتر
و يبقى الحلم الوحيد المشترك بين البشر هو البحث عن وطن
وطن مش شرط تكون البلد اللى اتولدت فيه و مش شرط تكون بلد من الاساس فالوطن هو كل مكان بتلاقى فيه نفسك
و بتلاقى فيه مجال لاحلامك انها تخرج لارض الواقع و لكلامك انه يتفهم من غير ما تقوله و لعقلك انه يتقدر حتى لو كنت ما بتقولش غير سخافات يمكن يكون بيت على البحر فى جزيرة مافيهاش بنى ادم و يمكن يكون حضن من سند حقيقي عارف و متاكد انه مهما الدنيا اتهزت حواليك هيفضل دايما موجود بعيدا عن زحمة الحياة زحمة كم مهول من البشر دخل حياتى مؤخرا طبيعى و بديهى ان بنى ادمة غير اجتماعية بالمرة زيي
يبتدى يبان عليها بوادر الانهيار العصبى بس على مين..
دى احسن فرصة عشان اجبر على التعامل مع نوعيات عجيبة من البشر
و بعدين تبدأ عملية الفلترة فلترة اكتشفت انه بالوقت الناس اماكنها بتتغير فى حياتك زى الشطرنج شوية بتلاقى وزير بتلجا له عشان ينصحك و شوية بتغير فى العساكر اللى عايزهم يفضلوا حواليك و كتير هتلاقى الوزير بيرجع لمرتبة العساكر..او العسكرى بيطلع لمرتبة الوزير لكن الاكيد ان الملك بالنسبالى ما اتغيرش تغيير ما بحبش التغيير على فكرة يمكن من كتر ما شوفت تغييرات كتير فى حياتى اتمنيت ان الملل المصاحب لعدم التغيير يكون واحد من ثوابتها صدق اللى قال ماحدش عاجبه حاله و يمكن دى من اكتر الثوابت اللى مش محتاجة تفسير! التفسير الغبى للناس اللى بتكره الكاميرات هو التخلف التكنولوجى و التفسير الابسط ان الكاميرا هدفها حفظ اللحظات المميزة مع الناس المميزين فالطبيعى لما تختفى اللحظات المميزة من حياتك..
انك ما تهتمش بانك تمتلك كاميرا Zoom in - مش لازم تكون خارق الذكاء
عشان تعرف انها عشان ما خدتش الورد تبقى مش بتحبك - ولا لازم يكون عندك اسانسير ازاز و مدخل عمارة رخام عشان بنتك تلاقى عريس لقطة بالمناسبة الرخام ده كان رأى تانت جارتنا جيرة عودت نفسي ما ارتبطش بالامكان بما انى بغيرها زى ما بغير هدومى و اتعودت على ان الجيران ما يكونوش اكتر من اشخاص بقولهم صباح الخير لما نتقابل صدفة و مش كلهم كمان كلهم -بيقولوا انهم عارفين انا عايزة ايه بس السؤال اللى بيطرح نفسه هل كلهم عارفين اللى هم عايزينه؟ -و كلهم بيقولوا انهم عرفوك..بس ما حدش منهم عرفك زيي دلوقتى بالذات كل الاماكن بقت بتفكرنى بيك اماكن فى القلب قهوة تريانون اسكندرية..شريط الترام..الراجل بتاع اللعب و المنتزة و جليم فى شهر اغسطس و محطة الرمل و بنت لسه متعلمة العد
بس عشان تحسب عدد اللى يعرفوك و عايزين يسلموا عليك..ذكريات ذكرى
17-3-2002
وحشتنى اوى بجد ملحوظة:طريقة الكتابة دى مش من اختراعى انا اكيد :)

السبت، 7 مارس 2009

شماعة التاريخ..

- قديما كانت تجارة الرقيق مصدرا للرزق الان تجارة الاطفال و الاعضاء البشرية اصبحت موضة كاللون الموف فى موسم شتاء 2008 - قديما كان لدينا حزب واحد فعانينا من الشمولية السياسية الان لدينا 24 حزبا..فاصبحا شعبا يعانى من تخمة الاحزاب و الديكتاتورية - قديما حرق قطار الصعيد بسبب الاهمال و الان غرقت العبارة بسبب اخوه الفساد - قديما قتل السياح بسبب الجهل و الان حرق الحسين بسبب استمرار الغباء - قديما كان الاعلام حكوميا و الان اصبح الاعلام مهلبيا - قديما كان اسمها انتفاضة الحرامية و الان نحن فى انتظار ثورة الجياع - قديما كنا نسمع عن مواجهة بين مصر و اسرائيل الان اصبحت المواجهة بين غالى و الملط - قديما سمعنا عن نظريات ماركس و اضراب العمال للحصول على حقوقهم الان انضم للعمال المحامين, المدرسين, دكاترة الجامعات, الصيادلة , المذيعين , المخرجين, و سواقين القطارات و قريبا ينضم اليهم سائقو التكاتك و باعة الجرجير و المناديل الفاين كنوع من انواع تحالف قوى الشعب العامل - قديما كانت المجالس النيابية تدار وفقا لمصالح العائلة المالكة الان اصبح مجلس الشعب يدار بواسطة حديد عز - قديما سمعنا عن زوار الفجر الان اصبح الoffer العادلى..اسحل مواطن و خد التانى هدية
- زمان كان عندنا رية و سكينة.. دلوقتى عندنا سفاح المعادى و التوربينى و قاتل بنى مزار - قديما كان المتهم برئ حتى تقيد القضية ضد مجهول و الان اصبح المتهم ماس كهربائى
حتى ياتى المختل عقليا اللى هيشيل الليلة - قديما كانت المراة اسمها الست امينة و الان اصبحت سينا زى سونيا..
و كله فى الاخر له هدف واحد بس..الفرجة و ختان العقل
صدق من قال ان التاريخ لا يعيد نفسه..فنحن اللذين نعيد التاريخ
*******
نقطة و من اول السطر
- اول مرة اسمع اغنية تخلينى مبتسمة من اولها لاخرها
ده اللى حصلى لما سمعت "ولد رسام" للعسيلى
اخيرا حاجة تخلى الواحد يبتسم فى وسط الاخبار اللى تشل بلد دى

- Seven pounds مستنية اشوف الفيلم ده بفارغ الصبر فكرة ان واحد يظهر فى حياة سبع اشخاص فجأة عشان يغير حياتهم عجبانى اوى شدتنى فكرة ان الواحد يكون له التأثير الجذرى ده فى حياة ناس ما يعرفهوش انك تظهر فى حياة شخص فتغيرها 360 درجة و تختفى تانى.. فيفتكرك هو يمكن اكتر من اللى عشت معاهم عمرك كله يا ريت الواحد يقدر يكون له التاثير ده..حتى لو فى حياة شخص واحد

- بعد انطلاق حملة "من اجل مصر نظيفة" و من بعدها مبادرة "حلم العلم" اتاكدت ان البلد دى لسه فيها ناس عندهم دم و خايفين عليها بجد بس يا رب يكملوا على خير من غير لجنة بتنبثق منها لجنة لتتفرع منها لجنة و فى الاخر نلاقى مشروع فى نجاح مشروع توشكى كده!

الاثنين، 2 مارس 2009

مجرد تفاصيل..

بالرغم من انى بطلت استغرب من زمان الا ان حاليا ادق وصف سمعته جملة لصديقة ليا "احنا عاملين زى القروى فى المدينة" اللهم انى لا اسألك رد القضاء و لكنى اسألك اللطف فى دى مش حالة حزن على فكرة..دى حالة اذبهلال عميق
******* Laisse mes talons aiguilles
faire de moi une fille
Sans me regarder comme un objet
Si le vent qui joue dévoile mes genoux
Il n’est jamais question
D'attirer sur moi l'attention
*******
عندما تضحى من اجل من لا يستحق عندما توقف حياتك عند شخص لا يراك من الاساس عندما تفنى عمرك و لا تجنى سوى قلة التقدير.. فلا تلومن الا نفسك! فدور الضحية لا يناسب الا من اختاره لنفسه ******* - زهقت من التفكير..مش عارفة افكر اصلا - ده قرارك لوحدك ما ينفعش حد ياخده بدالك - عايزة حد يفكرلى..فكريلى فقط لو عرفوا مشقة ان تفكر لاثنين! ******* لماذا هذا الخوف الغريب من المسميات؟ فما الصعوبة فى تسمية الاشياء باسمائها بدلا من لا احب الضلمة ولا احب الدكاترة قررت الاعتراف بان " بخاف من الضلمة و بخاف من الدكاترة" فالخوف من اظهار نقاط الضعف ما هو الا ضعفا اكبر
******* كلاكيت تانى مرة مفيش حاجة اسمها نصى التانى فى حاجة اسمها اتنين بنى ادمين "كاملين"
بيقابلوا بعض فبيبقوا اكثر كمالا ازاى واحدة شايفة نفسها كائن ناقص تتوقع ان الطرف التانى يعتبرها كاملة الاهلية؟! قالتلى بحبه و ماعرفش اعيش من غيره قلتلها اسمها بحبه لكن من غيره حياتى مش هتقف! *******
مين قال ان الوحدة مرادفة لقلة الناس؟
فالوحدة هى مساحة بتفضل فاضية
بالرغم من وجود مئات البنى ادمين حواليها
كلهم شايفينها..لكن ماحدش قادر يملاها
******* اشيائى الصغيرة.. - قهوة ساخنة فى الصباح الباكر - صوت فيروز - لفة فوق كوبرى قصر النيل - خبر عن فوز منتخب مصر فى اى حاجة كتصبيرة لحد ما نسمع عن خبر انها رجعت بتاعتنا تانى - مكالمة صباحية بدايتها "صباح الخير..وحشتينى" - دعوة بان "ربنا يسترلك طريقك" - طعم الشوكولاتة و احساس التحرر بعد الرياضة اليومية - لون بحر اسكندرية فى الشتا - حضن و بوسة و لماضة بنوتى الصغننة - لمة البنات و الضحك على اتفه الاسباب - رسالة من صديقة مسافرة تؤكد لى ان البعيد عن العين عمره ما كان بعيد عن القلب - خروجة للسينما و متعة الاستماع لحواديت ناس تانية اللى بتحكيها - افلام جوليا روبرتس و اغانى افلام ديزنى - احساس طفولى بالفرحة لما تظهر نتيجة الريجيم - نظرة لها معنى و ضحك هستيرى على جملة "باينك احلويتى ولا ايه" - مكالمة من بنتى الاكبر منى سنا تخبرنى بان
"انا البكرية و لو اتبنيتى حد تانى
اعتبريه ابن جوزك من مراته الاولانية" - نظرة فخر تختفى خلف قناع من اللامبالاه مش لايق عليه - فيلم عن قصة دافية فى يوم من ايام الشتا - حرية ان تفعل ما تريد فى الوقت الذى تريده - تمشية طويلة تحت المطر - احساس بثقة الاخرين..حتى لو ما كانش متبادل - فرحة انك تفكر فى حد فتلاقى اسمه ظهر على الموبايل - مشاوير يوم السبت - ذكرى قديمة لبنت صغيرة بضفاير و بيت كبير عل النيل فمجرد قدرتى على الاستمتاع بها.. دليل على ان الحياة لا يزال بها ما يستحق التنفس من اجله ******* احتياج.. عندما اقترب من الانهيار بدور فى اوراقى القديمة اقرا اخر سطر.."هتوحشينى يا اجدع الصحبات" و اقرر الصمود لحد ما ترجعى..تعالى بقى ******* علمتنى الدنيا.. ان منتهى الذكاء فى ان تعرف متى تدعى انك غبى ******* مجرد تفاصيل.. - لان الدنيا مطرت يومها..عرفت انها علامة - لان ضحكتك "صفرا بزيادة".. مجرد وجودك فى نفس الغرفة اصبح عبئا لا يحتمل - لانك تسال "ماحدش عايز حاجة؟" بعد ان تدخل نقودك..عرفت انك بخيل - لان رائحة عطرك تسبقك..عرفت انك مغرورة - لانك ناديتينى "حبيبتى" بعد خمس دقائق من لقائنا عرفت انك منافقة - لانك تصل قبلى..و تتذكر نوع الحلوى التى افضلها و تسمع ما لا اقول..و تهتم بكتبى المفضلة عرفت انك اخ لم تلده امى - لان عينيكى لمعت اول ما شفتك..حسيت انى مسؤولة عنك - لانك لا تهتم بالريجيم الا فى نهاية الشهر عرفت ان كرامتك فوق كل الاعتبارات - لان اسمها هو بداية كل جملة تقولها عرفت انك تحبها و لانك ترتدى الدبلة فى اليمين و مع ذلك تسميها "مراتى" عرفت ان الرجولة ما زال فيها امل - لانكم سندتونى دون حتى ان تعرفونى عرفت ان الدنيا لسه بخير - ولانك تعرفين متى تربتين على كتفى و تهمسين "ما تخافيش" عرفت معنى الامان *******

الأحد، 1 مارس 2009

The pursuit of happiness

عندما يأخذ منك الله شيئا كان فى يدك اليوم فتأكد انه لا يعاقبك انه فقط يفتح يديك ليفسح بها مكانا لتتلقى بها شيئا اكبر غدا..