الأربعاء، 11 مارس 2009

عزيزتى حواء..ما تخليهوش يبص بره عشان ما يجيبلكيش ضرة!!!!

و انا بقلب فى جروبات الفيس بوك لقيت جروب اسمه كفاية صحوبية عايزين نتجوز قلت اتفرج على اللى عايزين يتجوزوا دول لقيت موضوع عامله واحد
(هسيب الكلمة المناسبة لتقدير اللى هيقرا) اسمه كونى له اربع حتى لا يتزوج عليكى! بجد يعنى*&%$$#*@@ على اساس ايه مش فاهمة؟!! سيادته بيهدد السنيورة اللى هتتجوزه انها لو ما اتصرفتش فى نفسها و تكاثرت ذاتيا و بقت اربعة المحروس حبيب قلب ماما هيتجوز عليها اللى تحت ده تفاصيل الموضوع: الأولى : الأم انه يحب الام . الام فى حنانها, فى عطائها اللامحدود, عطائها الصامت الذى لا يتبعه من و لا اذى يريد اما فى سعة صدرها معه وفى تسامحها و عفوها ان هو اخطا و فى قبلتها و تشجيعها ان هو اصاب فى تسليتها له و الاخذ بيديه فى الضراء والفرحة و البهجة فى السراء فى سهرها بجواره عند مرضه او اثناء عمله و فى بشاشتها و سعادتها عند حضوره و قلقها و لهفتها عند غيابه انه يريد امه التى فقدها بعد زواجه
و يظل يحن اليها كلما احس بحاجته لها والله هعيط من التاثر..ده ايه الحلاوة دى ولا الرجولة..مش ممكن يخواتى بجد مش فاهمة يعنى لما هو عايز يسيب امه و يتجوز امه برضه كان ساب ماما ليه من الاول؟!!! الثانية : الحبيبة ثم هو يريد الحبيبة العاشقة التى تتفنن فى سرقة قلبه وفى اثارة رجولته يريد امراة لعوب تبهره بقوامها و عطرها كما تبهره بانوثتها و سحرها يريدها ان تذوب بين يديه عشقا و شوقا و هياما انا شلت سطر من فوق عشان ما اتشلش من ناحية و عشان احافظ على نضافة البلوج من ناحية تانية بس كله كوم و لعوب دى كوم تانى!!! ازاى عايزها متربية و بنت ناس و قطة مغمضة و رقيقة و هادية و ما بتفهمش غير اللى هو عايزها تفهمه و لعوب فى نفس ذات الوقت؟ اسكت يا لسانى بجد الثالثة : الصديقة ثم هو يريد الصديقة التى يبث اليها همومه و يستشيرها فى اموره يريد صديقة تحفظ سره و تستر عيبه لا زوجة تفشى سره و تفضح عيبه بين جاراتها و صديقاتها و اهلها يريد عقلك و حكمتك و مشورتك لا لسانك و ثرثرتك فيما لا يهمه يريد ان يتكلم فتحسنى الاستماع لا ان تتكلمى فتكثرى الشكوى من اعباء المنزل و مشاكل الاولاد فيلجا الى الصمت المنزلى او الى ترك البيت و قضاء معظم الوقت مع اصدقائه الذين يفهموه و يسمعوه يعنى هو يتكلم و انتى اسمعى لحد ما يجيلك طرش لكن انتى تتكلمى و لا تشتكى تبقى تستاهلى انه يتجوز عليكى مش كان يتجوز واحدة خرسا افضل برضه!!!! انما مسؤولية و اولاد و مشاكل و مصروف البيت..مش قصته و نعم الرجولة والله الظاهر حد ضحك عليه و فهمه ان الجواز ده رحلة لدريم لاند ولا كوكى بارك بس جامدة يبث دى..مثقف اوى بسلامته الرابعة : الخادمة ثم هو يريد الخادمة- نعم خادمة - يريدك ان تعدى له الطعام بيديك حتى و ان كان لديك خادمة يريدك ان ترتبى اغراضه بنفسك يريد ان يرى لمساتك انت فى اركان البيت يريدك ان تعتنى بملابسه و مظهره و مظهرك و مظهر اولاده يا نهار اسود و منيل!!!!! خدامة..لا و واضحة و صريحة و متكررة مرتين و بالنحوى!!! و على الراغبات فى الفوز بقلب المحروس التمتع بالصفات التالية - الا يقل سن المتقدمة عن السبعين
عشان تكون ام متودكة فى موضوع الامومة ده - ان تكون من نسل القديرة تحية كاريوكا (عشان الشرط الاول بتاع الامومة يتوافق مع الطلب التانى اللى هو اللعوبية) - ان تكون عضوة فى جمعية الصم و البكم عشان تسمع و ما تتكلمش - و اخيرا ان تثبت بالاوراق الرسمية صلة الدم بابلة نظيرة و لو معاها شهادة عليا من معهد التدبير المنزلى هيتعهد المحروس بضمان الاولوية ليها فى طوابير المعاتيه اللى هيستنوا عليه اكتر من 27 ثانية قبل ما يرموه هو و البطيخة و بوكيه الورد و اللى ربته على الانانية دى فى اقرب عبارة طالعة ايطاليا بعيدا عن قضية المراة
و رغى الستات الفاضية بتوع المراة الحديدية
و حقوق الفئة اللى اتفطست لحد ما بقيتش باينة من اول اهل مش هاممهم غير المهر لاب مش شايف فى بنته غير عار عايز يخبيه لاخ بايظ بيمارس على اخته رجولة مش موجودة اساسا لعريس لقطة باعت ماما
تعاين المحروسة اللى هيتجوزها عشان لو محتاجة قطع غيار لواحد تافه مش هامه غير الشعر الاصفر و العينين الملونة لمجتمع عايز غسيل مخ
عشان يعرف يحترم ام و اخت و زوجة و صديقة و ابنة و بما انى زهقت من الكلام فى الموضوع ده و بما انى عارفة و متاكدة ان الاحاديث و الايات اللى بيتحججوا بيها فى اسلوب معاملة المراة لزوجها فى قدامها ايات و احاديث
عن مراعاة المراة و تكريمها و احترامها و احترام ادميتها و بما انى عارفة ان اللى بيفكروا بالاسلوب العقيم ده مش قليليين ابدا و لانى اقتنعت تماما ان فى بنات تستاهل اكتر من كده بغباوتهم و ان اللى مش عارفة تختار صح من الاول يبقى ذنبها على جنبها و بعيدا عن وجهة نظرى الشخصية من التعدد و من المتعددين (اللى هم بيشجعوا تعدد الزوجات يعنى) انا عايزة اسأل سؤال من زاوية تانية خالص ليه الواحد مش بيبص لنفسه قبل مايحط توقعات هلامية من الناس اللى بتشاركه حياته؟ يعنى بسلامته ما قالش هو هيعمل ايه عشان يكون جدير بالخدامة اللى عايز يتجوزها؟ هل هو كمان هيكون ليها اربعة حتى لا تزوغ عينيها؟
ما تخيلش مثلا انه لو كان راجل و فهم معنى الرجولة بجد
كانت هى لوحدها عملت من نفسها 18 عشان تكون جديرة بيه؟ و بعيدا عن انه وزنه وزن تلاتة و انى ما جبتش لينك الجروب هنا خوفا على البنات اللى هيقروا من الفتنة بس و غلاوة ماما عندك اشترى مراية و بص لنفسك قبل ما تدور على الاربعة! اللهم لا تؤاخذنا بما فعل السفهاء منا ملحوظة:الصورة اللى فوق دى مسروقة من هنا

**********

نقطة و من اول السطر
دى صورة صورتها فى اسكندرية من حوالى اسبوعين
ايه دا؟..لا بجد مش فاهمة يعنى
لو واحد نازل من بيته و هو مقرر مقدما انه نازل لهدف ما
و واخد معاه واحدة نازلة من بيتها عشان نفس الهدف ال"ما "دا
و راحوا و اختاروا المكان اللى مش مستخبى نهائى بالمناسبة
زيهم زى كلاب و قطط الشوارع
هل اتنين بالتفكير و المنطق دول ممكن تأثر فيهم جملة
مكتوبة على صخرة فى عرض البحر
هموت و اعرف العبقرى اللى فكر فى الفكرة الجهنمية دى!!!
مش عارفة ليه افتكرت الايميلات بتاعت المعجزات الوهمية
دى بتنسب حاجات لدين قوى من الاساس
و مش محتاج اضافات
من معاتيه رموا عقولهم مع جزمهم على ابواب الجوامع
و دى تصرفات ناس عينوا نفسهم رقباء على خلق الله
و بصولهم من فوق برج عاجى على اساس انهم بيخاطبوا ملايكة مش اشخاص خطائين
و الاتنين نسيوا ان الرقابة لو ما كانتش من جوه البنى ادمين
ولا مليون صخرة و ايميل ما هيعملوا فرق
و الاتنين بيجتمعوا فى ان المخاطِب غبى و المتلقى اغبى!

هناك 30 تعليقًا:

حواء يقول...

أنا هرد علي النقطتين
الاولي موضوع الاربعه ديه
في مقوله بتقول اذاردتها خديجه فكن لها محمد
وطبعا مفهوم
يعني قبل ما الواحد يتمطع اوي ويقول انا عايز فيها كذا وكذا وكذا
يبص لخلقته وتصرفاته وافعاله الاول

والغريب ان موضوع التعدد ده انتشر جدا
والكل عايز يقلد التقليد الاعمي
والمشكله ان الكل بيشتكي إلا ما ندر
كل الرجاله عايزه تعدد ومعندهاش ثقافة التعدد
ياعم الراجل ياللي عايز تعدد اسعد اللي في ايدك فرح اللي معاك حاول تتفاهم مع اللي معاك وتفهمك هي كمان
ابقي عدد
لكن مش عارف تتفاهم مع واحده رايح تجيب التانيه علشان يبقي خراب بيوت بجد
عالم هبله والله






أما بخصوص الصوره وتأثيرها علي الواحد اللي نازل ووواخد معه واحده
فانا هختلف معاكي
انتي عارفه ان ممكن ابسط حاجه تهدي اي واحد عاصي
ممكن فعلا كلمه زي ديه تهدي انسان بيعمل حاجه حرام
ربنا بيقول لرسوله
أنك لاتهدي الاحبه ولكن الله يهدي من يشاء
عندما يشاء الله ممكن ذبابه تكون سبب في هدايه عاصي
تحياتي
بوست في الجون

ReEm يقول...

بصي اللي بيدي النصايح دي عشان ماتبقاش غيبة قليل الذكاء

الموضوع لا محتاج مواعظ ولا نصايح ولا حكم
بالية زهقنا منها الرجال تاعبين نفسهم في الكلام و هما بمنتهى البساطة يقدرو يخلو الست تبقى زي ما يتمنو بالمعاملة الطيبة و الاحتواء الحقيقي لو بجد الرجال يجربو الاحتواء الحقيقي و المعاملة زي ما الدين بيقول بجد مش زي ما بيفسروه مش هيحتاج يقولها كوني و ما تكونيش هي هتكون له زي مايحب من نفسها لانه هو ليها زي ما هي تحب وزي ما بيقولو ما للجميل الا اللي اجمل منه

بس طبعا مايمنعش انه في نساء كتير بجد ما تستحقش الرجال اللي معاهم زي ما في العكس
عارفة دول بعتبرهم الصابرين اللي الله بلاهم بمصيبة و بصبرهم عليهم هيدخلهم الجنة اهي فكرة حلوة

عموما الموضوع كله بجد ما بقتش عارفة ليه ثوابت تقولي الاختيار الصح و نسأل عليه و نعرفه كويس قدامي زوجات كتييير كدة و فشلت اي نعم بيوت مفتوحة بس زواج فاشل تقولي حب و اقتناع و مش عارف ايه برضو بيفشل و بيوت مفتوحة بس زواج فاشل اصل بعد ما يتقفل باب واحد بتظهر شخصيات يمكن حتى الاهل ماشفوهاش في ولادهم
وغالبا الزيجات دلوقت فاشلة اكتر من ماهي ناجحة

بجد الموضوع ده بالذات من كتر مابشوف حواليا فيه بقيت اقول يارب سلم سلم ووقعنا في نصيب خير ده حتى ماما اللي حلمها تجوزنا صغيرين من كتر ما بتشوف زوجات غريبة هديت و قالت مش مهم تتجوزو متأخر شوية و لا ازوجكم بدري و تتبهدلو خليكو عندي مبسوطين و معززين لحد ما يجي اللي يستاهلكو و طز في كلام الناس انتو اللي هتعيشو مو هما

ReEm يقول...

اه صحيح و اللي عايز يعدد مع احترامي ليه هي الحياة دلوقت سهلة لفتح بيت واحد و تربة ولدين عشان يبقى فيه تعدد احنا الموضوع ده ابتدا يقل اوي الحمدلله مش زي زمان على الاقل في محيطي الشباب بقى افطن من انه مجرد يلا جيب حريم وخلاص و انه الزواج حاجة اصعب من كدة

اما عن الصورة التانية ربك الهادي بس بصراحة ربنا صعب اوي تلاقي عاصي ممكن يرق قلبه بكلمة مكتوبة على صخرة

samamasr يقول...

:)

يويو الجميلة:)

حتة كوني له خادمة دي :)

فعلا أنا مستعدة أكونها :)

بس..مع الإنسان إللي أحبه بجد :)

ده إللي شفته يا يويو

ده إللي شفته كتير :)أقصد.. لو من زوجة بتقبل تخدم زوجها أو أولاد زوجها

فهي..بتخدمهم علشان بتحبهم..سيد القوم خادمهم :)


علشان كدة,,خايفة منها في يوم,خايفة..أكون في يوم كدة مع إنسان مش يستاهل


مع إني مبعملش حاجة في البيت خالص..وماما بتزعق لي

ومش قابلة الفكرة..لأني فاهمة ان ده معناها..

أو..

مش عارفة عادي


وعموما.

مش هتجوز ولا حاجة من دي أصلا


بس جوايا..كبنت..مستعدة أخدم ..فعلا الإنسان إللي هتجوزه عن حب..وأتخلى عن كل شيء ليا وكل طموح..علشانه


بس...

مفيش عادي..طنشي :)

samamasr يقول...

بصي..برجع تاني أقرأ الموضوع من تاني وأرد على كل نقطة :)

كوني له أم

وإيه أجمل من كدة :)


إنها تحس إنها بتتعامل مع ابنها

إنها فعلا تحس من جواها إنه,طفل ليها..شعور يكون جواها بجد..إن الإنسان ده..فعلا طفلها..فعلا ابنها..بروحها وكل شيء جواها تحس بده :)

samamasr يقول...

الصديقة

طيب دي حاجة جميلة بين الزوج وزوجته يا يويو :)


يويو..أنا عجبني الكلام جدا..مش العكس أبدا:)

samamasr يقول...

طيب بصي بقى من غير زعل :)

أنا عجبتني الجملة إللي على الصخرة..كتذكرة :)


وشايفة إنه..ممكن ربنا يديه عنها ثواب إللي حطها:)


:)

samamasr يقول...

معلهش اني رديت كذا مرة متزعليش :)

أنا بقرأ حتة وبعدين برجع..وبعدين بقرأ حتة وأرجع تاني وأرد تاني :)

samamasr يقول...

ورد ليكي

مش عارفة أحط الصورة:)

samamasr يقول...

ورد ليكي

مش عارفة أحط الصورة:)

samamasr يقول...

http://www.w6w.net/album/43/w6w2005041423543038d209f84.jpg

Desert cat يقول...

عايزة تكون باربعة وهو بكام سيادته قصدى يسوى كام فى سوق الرجال اذا كان الزواج سكن ومودة ورحمة بين الاتنين وليس واجب المرأة فقط معقول يعنى بنى آدم عايز انسانة بكل المواصفات دى من غير ما يذكر هو نفسه هيبقى ايه ؟؟
يعنى عايز يتدلع وحنان الام وحنية الاب والمرأة العاهره والمرأة المحترمة ده بيدور على نوع شامبو لسه مش نزل ولا حينزل فى الاسواق اسمه عشرة فى واحد
الاستشهاد بالآيات المقتصة والاحاديث التى تناسب الهوى منهى عنها اساسا وزى ما اتقال على النساء ناقصات عقل ودين مع ان السند ضعيف جدا اتقال برضه رفقا بالقوارير

بالنسبة لجملة الايمان فى غض البصر فانتى عارفه انا اكتر واحدة مفقوعة من الناس اللى معينة نفسها رقباء على غيرهم

تحياتى

leeno يقول...

انتي كاتبة الموضوع بطريقة فطستني من الضحك مش قادرة من كتر ما ضحكت بجد دة اولا

كله كووم و فهمته مااشي انما خداامة صريحة و علني كدة !!! مش قادرة ابلعها !!

مع ان المبدا دة منتشر كتير عند بعض الرجالة ( يقوللك تشتغل في البيت و انا اروح استريح و مزاجي ببلاش و بالمرة تخلفلي عيلين تلاتة يشيلوا اسمي ) و طبعا طبعا طبعااااااااا تبقى لعوب و قطة مغمضة في نفس ذات الوقت !! ( الجملة دي مش بتاعتي واحد قريبي قالها مرة و هو بيدور على عروسة و كان عايزها بكتيره 19 سنة عشان ميضمنش اي وحدة دخلت الجامعة ههههه)

انا افهم انه يبقى عايزها صديقته و بحترم دة و احب ان الست تدلع جوزها و يدلعها ( تعمله اكله بيحبها ... تبقى بكامل انوثتها و رقتها معاه)

افهم انه محتاج الحنية ( مهو طبعا محدش يحب يتجوز جبروت لا ست و لا راجل )
و افهم برضه انه عايز يتجوز الحبيبة اساسا الزواج هو ارقى درجات الحب ( من وجهة نظري و من وجهة نظر الشرع اللي امرنا بالرحمة و المودة و جعل الزوجة سكن لزوجها



انما خدااامة !!!!!! مش قادرة ابلعها و لا بكباية مية و لا برسييييل



خدااامة!!! ليه يا جماعة للدرجادي بقت الست وضيييعة ؟؟؟

مواطن مصري يقول...

همممم ب النسبة لبعض جروبات الفيس بوكب عضها فعلا غريب و بعضها كانت حاطكت فيها امل و فشل


----

يعنى بسلامته ما قالش هو هيعمل ايه
عشان يكون جدير بالخدامة اللى عايز يتجوزها؟
هل هو كمان هيكون ليها اربعة حتى لا تزوغ عينيها؟
ما تخيلش مثلا انه لو كان راجل و فهم معنى الرجولة بجد
كانت هى لوحدها عملت من نفسها 18 عشان تكون جديرة بيه؟
و بعيدا عن انه وزنه وزن تلاتة
و انى ما جبتش لينك الجروب هنا
خوفا على البنات اللى هيقروا من الفتنة
بس و غلاوة ماما عندك
اشترى مراية و بص لنفسك قبل ما تدور على الاربعة!



بصراحة انتو كل حاجة الراجل السبب مع ان البنات بردو معلش بتخنق او بتزن

ما الواحد بيروح الشغل بيطلع تلاتين عينة عهشان يجبلها و فية ستات مهما تجبلها مش راضية عاوزة اكتر

و بردو فية رجالة عاوزين ضرب الجزم


من الاخر اهم حاجة ل انجاح علاقة الجواز الراحة النفسية المصارحة الحب الرضا بين الطرفين

انا حرة يقول...

حواء
انا متفقة معاكى جدا و كنت عايزة اختم الموضوع بجملة حطيتها قبل كده
و هى بنفس المعنى اللى قولتيه "اذا اردتها كالزهراء فكن انت كعلى"
المشكلة ان كل واحد شايف نفسه يستاهل سعاد حسنى..تقريبا بينسوا يبصوا فى المراية الصبح
عايزها ام تخاف عليك و صديقة تتكلم معاها و واحدة تربى عيالك و حبيبة تشاركك فى احلامك
كلام جميل..لكن انت هتعمل ايه قدام ده كله؟
عملتلها ايه عشان تستاهل كل ده؟
بالنسبة للتعدد ففى كتير بيتجوزوا من الاول و هم عارفين انهم مش هيكتفوا بواحدة
يعنى واحد بيتلكك رسمى عشان هو عينه فارغة مش عشان اللى فى البيت مش مكفياه
و بعدين انا افهم انه يتجوز لو مراته مريضة مثلا او عندها مكلة ما اتكلم معاها و حاول يصلحها و فشل
لكن يتجوز عشان هو من الاول اتطافس و اختار واحدة مش مناسبة ليه على امل انه يستغل نص الدين عشان يلم حواليه اربع ستات و يعمل فيها الحاج متولى!!

و نعم بالله طبعا
بس انا مش متخيلة ان واحد ما عندوش اى سيطرة على نفسه ممكن يتعظ بجملة مكتوبة بالشكل المباشر دا

انا حرة يقول...

ريم
حاضر همشيها قليل الذكاء عشان خاطرك :)
هو بالظبط كده..مش طبيعى ثقافة الانانية اللى الامهات بتربى بيها ولادها دى
و على فكرة اللوم مش بس على الراجل اللى بيطلع كده
الغلط الاكبر على جيل من الامهات ربوا ولادهم على انهم يطلعوا عيال مش رجالة
انا كنت ناوية اكتب حاجات كتير و ارتب الموضوع عن كده
بس الاستعجال كان مطلوب لغرض فى نفسي..الا و هو الغلوشة على الموضوع اللى فات :D
بما ان قضية المراة عامة مش ناقحة عليا اوى اليومين دول :D

تصدقى انى اعرف واحد بيتمنظر قدام الناس بقدرته على ضرب مراته
و بضعفها قدامه لدرجة تخليها تقبل سفالة من النوع دا
انا كنت فاكرة ان النوعية دى من الناس عمرى ما هقابلها فى الاماكن اللى متعودة عليها
اتاريهم اكتر من الهم على القلب
مع ان نفس الست دى بمعاملة محترمة و تقدير و احترام لها و لعقلها كانت اكيد هتعمل اكتر من اللى هو طالبه
لكن تقولى ايه فى الغباء و الاستسهال
دكتورة سعاد صالح كانت قالت تصريح مهم جدا من فترة
قالت اننا مجتمع بيعانى من تأويل ذكورى للقران و السنة
و للاسف التصريح ده عدى من غير التركيز اللى كان يستاهله

و اكيد فى رجالة كتير متجوزين ستات قارفينهم فى عيشتهم بس احنا مالنا..خلينا فى الجزء اللى يخصنا
و التانيين دول تبقى جمعية يا رجال العالم اتحدوا تجيبلهم حقوقهم :D

بصى يا ريم هو انا عندى نظرية فى موضوع الجواز ده
انا مقتنعة جدا بكلامك و فعلا مفيش ثوابت..اللى اتجوزوا عن حب مش شرط يكملوا
و اللى اتجوزوا جواز صالونات كتير جوازاتهم بتنجح
بس انا بيتهيالى ان الفكرة كلها فى ان كل بنى ادم له شخص واحد مناسب له 100%
بيفشل فى جوازه امتى؟..لما يستعجل و يعاند علامات واضحة للاعمى عشان ما يفوتوش القطر
لكن الاكيد ان الجواز فى الاخر قدر..و ما ينفعش حد يستعجل القدر
التعدد ده انا ممكن اكتب عن رايي فيه مجلدات
يعنى ممكن وحد يتجوز اتنين لسبب من الاسباب اللى قولتها فوق
لكن اللى بيتجوزوا اربعة دول ازاى ممكن يعدول بينهم بجد مش فاهمة؟!!!
ازاى ممكن يبقى زوج محترم و اب مسؤول و راجل يتسند عليه لاربع ستات..هموت و افهم

انا بقول كده برضه :)

انا حرة يقول...

ايمان
انا بقى لو شوفت واحد قدامى بيقول على مراته خدامة ممكن اخد اول كرسى قدامى و احدفه بيه
لا اقبلها على نفسي ولا على حد اعرفه ولا على واحدة معرفهاش ماشية فى الشارع
و بعدين لما واحدة تبقى ست بيت عشان بتحب جوزها فتطبخ و هى مش طايقة المطبخ و تنضف و هى كارهة اللى بتعمله بس عشان ترضى راجل اختارته بارادتها عشان تكمل معاه حياتها..تبقى جزاتها انه يتقال عليها خدامة
دا عنه ما كل ولا شرب :D

و بعدين ليه مش هتتجوزى؟..ان شاء الله ربنا يجمعك بالبنى ادم اللى يستاهلك

و حتة الامومة دى جميلة..بس فين دوره هو فى الموشوع
انتى شكلك بتقرى العناوين يا ايمان و تنسي بقيت الكلام :D
يعنى لما واحدة تتجوز واحد بتتجوزه ليه؟اللى اعرفه ان الطبيعى و المنطقى انها بتتجوزه عشان ياخد باله منها
يعنى عشان تكون هى ليه ام لازم هو كمان يكون ليها اب ولا ايه 
و نفس الحكاية فى الصديقة..يعنى لو الست مش هتحكى للراجل اللى اختراته عشان تتسند عليه و يشاركها فى بيتها و يكون اب لولادها..هتحكى لمين؟!
فين دوره هو كصديق و اب و راجل ولا هو متجوز غسالة بتسع ارواح و كل دوره انه ياخد غسيله منشور و مكوى من غير اى مساهمة من ناحيته

و هزعل ليه يا حبيبتى..دى وجهات نظر :)
و بعدين ردى براحتك يا ايمان..البلوج بلوجك

انا حرة يقول...

Desert cat
عجبتنى اوى حتة بيدور على شامبو دى
عارفة لو هو هيكون ليها اب و صديق و حبيب و اخ و زوج و سند و ضهر
كنت قلت انه يستاهل يتجوز جوليا روبرتس
لكن قلة المسؤولية دى مش ممكن تكون طبيعية..و استحالة واحد بيتكلم بالطريقة دى تكون عنده ريحة المسؤولية
ولا بوادر ذكاء حتى..
انتى هتقوليلى على رايك فى الناس دى..ما انا عارفاه طبعا :)

انا حرة يقول...

لينو كويس انك ضحكتى يا حبيبتى امال لو شوفتى صورة المحروس :D

بصى دى الرجولة اللى اعرفها
"من المؤمنين رجال صدقوا ما عاهدوا الله عليه فمنهم من قضى نحبه و منهم من ينتظر وما بدّلوا تبديلاً"
صدق الله العظيم

اول صفات الرجولة الصدق..لكن واحد يجبر مراته على الحجاب و هو مش بيصلى ولا يجبرها على حاجة هو مش بيعملها يبقى بيهرج

و الاكيد ان الجواز انقى علاقة ممكن تجمع راجل بست لكن اللى بيحصل دلوقتى ده مش جواز ده بتنجان :D

انا حرة يقول...

مواطن مصرى
ماحدش قال انه فى طرف هو السبب فى فشل العلاقة..اللى بنقوله انه الطبيعى ان الواحد قبل ما يطلب حاجة فى شريك حياته تكون الحاجة دى موجودة فيه هو الاول..ابسط قواعد الامانة بتقول كده..لكن لان المجتمع بتاعنا دايما واخد صف الراجل فبالتالى الثقافة الذكورية الغبية دى هى اللى بتمشى فى الاخر..مهما كانت نسبة الغباء اللى فيها كبيرة

انا حرة يقول...

نورتونى كلكم يا جماعة بجد..
انا هقفل التعليقات بما ان الموضوع زى ما قلت مش هدفه المناقشة على قد ما كان له هدف تانى فى نفسي :))

mUsLiM يقول...

طيب كويس :)

المفروض أقول ايه انا دلوقتى يا أختى :)

انا لو قلت اللى كاتبه هناك ممكن يحصل عليا هجوم نسوى يفجرنى ذريا :))

هادرس الموضوع كويس وهابقى أرد تانى ان شاء الله

عشان بس أحسب الخسائر والمكاسب :)

السلام عليكم

Superman يقول...

بما ان الردود رجعت احب اعلق بقي :)

الراجل ده ماحبش التفت اليه..طالما بيقول كلام عجيب بعتبره غير جدير انني اناقش فكره..
بس ياريت يبقي يعزمنا علي فرحه عشان نشوف مين أسيرة الحرب اللي هتتجوزه :)

بالنسبة للصورة بتاعة الصخرة و الكتابة..
الصخور دي موجودة بطول الكورنيش..يعني كل منطقة تقريبآ فيها واحدة..
و كلهم مابلاقيش قدامهم حد رغم ان بيبقي علي بعد امتار منهم جيوش من الناس..بس بيبعدوا عن الصخور دي!
يعني بصراحة شغالين بفعالية شديدة و نجاح ساحق :D

يمكن الموضوع يدعو للإستغراب..
بس إحنا شعب متدين بطبعه..الحرامي بيدعي ربنا يسترها معاه و مايتمسكش..
مش عايزاهم يحترموا نفسهم لما يشوفوا الصخرة؟ :D

m elgammal يقول...

يويو الجميله اولا اهنئك على صفحتك الالكترونيه لنها بجد جميله جدا وانا قراه اغلبها وفعلا جميله

بس ممكن اعلق على موضوعك الجميل بجد جميل بس فى حاجة.............

انى بالفعل اول ما قراءته اولت ايه دة ايه الطمع دة يعنى المرأه مكتوب عليها انها ديما هيه اللى تكون وهيه اللى تعمل وهيه اللى تبقى ؟؟؟؟؟؟؟؟؟؟؟
بس لقيت ان فعلا دة الحقيقه دة الحقيقه الجميله فعلا اللى ربنا خلقها فى المرأه جعلها حنونه عطوفه رقيقه .
فعلا دة المراه ودة مواصفتها حنان وعطف قلبها الرقيق وذكاء والحياديه العقليه الشديده لديها.

انتى عندك حق فى طريقه المعلومه اللى الاستاذ كتبها عامل زى اللى بيكتب وبيطلب بصيغه امر بس الحكايه مش كدة

ايه رايك لما المرأه تستخد حنيتها وعطفها وقلبها على شان تكون ام ، وصديقه وتستخدم ذكائها ودهائها لكى تكون زوجه وخادمه .

الم تقرائى قول الداهيه السياسيه معاويه عندما قال ( لو بينى وبين الناس شعره ما أنقطعت اذا شدوها ارخيتها واذا رخوها شدتتها ) .

الم تقرائى العشره نصائح التى كانت تنصحها الأم لإبنتها ليله زفافها عندما قالت لها ...............

قالت أم لابنتها ليلة زفافها وهي تودعها ..

أي بنيّــة ..
إنك قد فارقت بيتك ..
الذي منه خرجت ..
ووكرك الذي فيه نشأت ..
إلى وكر لم تألفيه ..
وقرين لم تعرفيه ..
فكوني له أمة ..
يكن لك عبدا ..
واحفظي له عشر خصال ..
يكن لك ذخرا ..
أما الأولى والثانية ..
فالصحبة بالقناعة والمعاشرة بحسن السمع والطاعة ..

أما الثالثة والرابعة ..
فالتعهد لموقع عينيه ..
والتفقد لموضع أنفه ..
فلا تقع عيناه منك على قبيح
ولا يشمن منك إلا أطيب ريح
والكحل أحسن الحسن الموصوف
والماء والصابون أطيب الطيب المعروف


وأما الخامسة والسادسة ..
فالتفقد لوقت طعامه ..
والهدوء عند منامه ..
فإن حرارة الجوع ملهبة ..
وتنغيص النوم مكربة ..


وأما السابعة والثامنة ..
فالعناية ببيته وماله ..
والرعاية لنفسه وعياله ..

أما التاسعة والعاشرة ..
فلا تعصين له أمرا
ولا تفشين له سرا ..


فإنك أن عصيت أمره أوغرت صدره
وإن أفشيت سره لم تأمني غدره ..

ثم بعد ذلك .. إياك والفرح حين اكتئابه
والاكتئاب حين فرحه ..
فإن الأولى من التقصير
والثانية من التكدير ..

وأشد ما تكونين له إعظاما ..
أشد ما يكون لك إكراما ..

ولن تصلي إلى ذلك
حتى تؤثري رضاه على رضاكي ..
وهواه على هواكي ..
فيما أحببت أو كرهت ..

والله يصنع لك الخير

واستودعتك الله


النصائح دة من أم غير متعلمه من أم لم تجلس على الكمبيوتر وتقراء وتطلع ما أبسطها وأجملها واروعها
ايه رايك انتى .
ـــــــــــــــــــــــــــــــــــــــــــــــــــــــــــــــــــــــــ

بالنسبه للشق الثانى عندك حق فى كل حاجة بس فى حاجة ما تيجى نعمل زى ما رسولنا الحبيب ما قال

( بلغوا عنى ولو أيه ) يعنى نبلغ والسلام ربنا أراد انه يهدى اللى هيشوف الايه دة خلاص مأردش يبقى أخذنا نحن ثواب التبليغ ولا ايه ؟؟؟؟؟؟؟؟؟

انا حرة يقول...

بص يا مصعب انا هرد على الكلام اللى انت كنت كاتبه عشان لو ما رديتش هتنقط :D
هو انا لقيت رد لو حاولت اكتب زيه من هنا لبكرة مش هعرف
و هو موجود فى اول البلوج على الشمال بس هحطه هنا زيادة توكيد :D

"أنا لا أحب هؤلاء الذين يأتون إلىّ مُسبِّلى الأعين ومطأطئى الرؤوس، يتغزلون فى عيونى دون داع، ودون احترام بمناسبة وبغير مناسبة، ينظمون القصائد فى رونق الشفاه ورقتها! لا أحب هؤلاء الذين جردونى من العقل، ومن كل المهارات الحياتية أيضاً وكل المواصفات، فلا يرون غير أنى أنثى.. أنثى فقط! ويحكم أيها الرجال!
وأعنى هؤلاء الذين يدعون الرجولة والشهامة وهم فى وتر التيه يلهثون وبالنفاق مقنَّعون بالفرقعات الجوفاء والرنين الزائف.. هؤلاء الموجودة فى نفوسهم أشياء طيبة ولكنها راقدة فى غفوة! لقد علاها الصدأ من طول الرقود.. أنا لا أهوى افترار المشاعر على الطرقات، لم أقع أبداً فى فخ التسول العاطفى، ولن أسمح بأن تتشرد مشاعرى على أرصفة الآخرين الضماء!
ذلك أن مشاعرى لوحات سيريالية لا يفقهها سواى، وسوى من اقترب منى بأناقة الفكر العبقرى والأسلوب الأشَمّ، فأنا لست مجرد أنثى.. أنا رسالة أتت من عالم آخر، لها فكر وعقل وقلب، تيقن -يا من تعتدى بالقول أو العمل على إناث الكون فى الطرقات- أن امرأة ما، ربما تمتلك قوة الرعد وصلابة الجبال، وأخرى تمتلك ضياء لا يعرف له مصدر، ورنيناً لا يعزفه إنسان، أو قد تكون لوحة لم تنقش بعد.. "

هى بتتكلم عن العلاقة بين الراجل و الست عامة بس انا شيفاها معبرة جدا عن علاقة الراجل بمراته
جميل ان الراجل يشوف فى مراته كل ستات الدنيا..لكن لو دا كان هو شايفه فيها لوحده

بمعنى انه مش معقول يكون اختارها بكامل ارادته و بعدين ييجى يطلب منها حاجات ما كانتش فيها من الاول بحجة انه عايزها تكون فى نظره كل النساء

و بعدين فى كلام الاخ اللى فوق دا مفيش سيرة عن اللى هو هيعمله عشان يكون فى نظرها كل الرجال او عشان يكون جدير بيها ولا هى علاقة الجواز دى مبنية على طرف واحد بيقتل مفسه عشان التانى يكون مبسوط حتى لو ما كانش يستاهل

دا غير الجزء بتاع التهديد بالجواز عليها..يعنى واحد مختار من الاول واحدة مش مالية عينيه و بعدين جاى يحملها هى نتيجة اختياره الغلط دا
بناء على ايه تخيل انه يستاهل انها تكون 9 ستات فى بعض عشانه؟و مين فهمه انه قدر يخليها بالسعادة اللى تخليها تعمل كل دا عشان خاطره؟

و كله كوم و حكاية خدامة دى كوم تانى..دا انا لو متجوزة واحد و جه قالى الكلمة دى هلمله هدومه فى شنطة و هشحنه على بيت الست والدته فى اول ميكروباص معدى و مش بعيد ارشى السواق عشان يرميه فى اى ترعة فى سكته

كونه عينه زايغة دى مش مشكلة مراته
و كونه مكبوت و عايز يطلع عليها عقده دى مش قصتها برضه
و كونه طفس و عايز ست بسبع ارواح دى مش مشكلة مراته
و كونه غبى و مش عارف يختار كلامه دى مشكلته لوحده
و اخيرا كونه من الاول حاطط فى دماغه انه عايز يعمل فيها الحج متولى
فعلى الاقل ما يستهنش بذكاء الست اللى معاه
و يقولها بصراحة انا راجل عندى جرعة الدناوة عالية و مش هرتاح غير لما اتجوز عليكى..
لان واحد بالعقلية دى مهما اتعمله مش هيحس برضا..
لكن بحبك لكن انتى مش عارفة تعملى اللى انا عايزه فهتجوز عليكى غصب عنى
دى نغمة غبية اوى ما تدخلش دماغ عيلة صغيرة..
دا غير ان فكرة التهديد نفسها مش مقبولة..ده جواز يعنى مش فيلم رعب :)
دا اعتراضى على كلام الاخ دا غير كده كل واحد حر فى اللستة اللى هيحطها لشريك حياته

انا حرة يقول...

انا ما اقدرتش مالتفتش لكلامه بصراحة..فضلت يومين اقرا و اطنش و بعدين قلت ما بدهاش بقى :)

فكرنى شوية بمشهد لخالد ابو النجا فى فيلم حب البنات لما فضل يسمع طلباته فى شريكة حياته لحد ما هنا شيحة قالتله ما تتجوز كريم المساعد بتاعك احسن :D
دا اكيد هيتجوز واحدة ماما اللى هتختارها و مش بعيد تبقى روحها حلوة زى بولين كده :)

انا مبسوطة اوى ان الراى دا جه من ولد عشان ما احسش انى جاية من المريخ

بالنسبة للصخرة فاحنا مش شعب متدين احنا شعب بيتلكك..يعنى واحد ما معهوش فلوس يلاقى لنفسه مبرر انه يفتح درج مكتبه لتلقى التبرعات و واحد مش عارف يتجوز فيسحب صاحبته على البحر و المبرر ان الانسان ضعيف و ربنا بيغفر..هنا بس بيبان التدين يا سبحان الله يعنى

بس ضحكتنى اوى حكاية انهم بيسيبوا الحتة اللى فيها الصخرة و يقعدوا جنبها دى :D

انا حرة يقول...

اولا بشكرك على كلامك جدا..بس هو السؤال اللى بيطرح نفسه هى مين يويو دى؟ :)

و متفقة معاك جدا فى كلامك فى ان الطبيعى ان كل طرف و خصوصا الست يستخدم ذكاءه عشان يعرف امتى يفوت و امتى يكبر دماغه و امتى يدق عشان المركب تمشي
لكن زى ما قلت انا اعتراضى على صيغة التهديد اولا و على الطلبات الهلامية اللى مش بياقبلها اى التزام من ناحية الراجل

و بالنسبة للنقطة التانية انا مع الذكاء فى اختيار الطريقة اللى بتخاطب بيها الناس..مش طبيعى ان واحد نازل بالهدف دا يتعظ بكلام مباشر للدرجة دى و مكتوب على صخرة..دا فى رايي انا يعنى..يمكن يكون اثبت نجاحه مع ناس قبل كدا لكن انا شايفاه قليل الذكاء على راى ريم

m elgammal يقول...

شكرا جدااااااا لردك على تعليقى وأسفه على ( يويو ) انا شاهدت أصدقاء لكى مستخدميها اعتقدت انه يكون اسم لكى
وأشكرك على المجامله الرقيقه منك.
وسيسعدنى الحظ بزيارتك اسبيسى الخاص ....
http://temoo7.spaces.live.com

انا حرة يقول...

ههههههه لا ده اسم لصديقة تانية لينا هنا.. مش انا :)
عموما حصل خير و اكيد يسعدنى انى ازور مدونتك

The Seagull يقول...

يمكن أكون أول واحدة تقرأ موضوعك ده أول ما نزل ومش هتصدقيني لو قلت لك إني قرأته 4 مرات عشـان بس أعرف أستنبط الناس اللي كاتبة الكلام ده بتفكـر إزاي بجد :D وبالطبع مش محتاجة أقولك قد ايه ضحكتيني بتعليقاتك على الكلام ده بجد :D

أنا مش هاعلق على الكلام اللي اتقال ده بصراحة كل واحد حر في تفكيره ورأيه .. وكلمة بيني وبينك اللي بيقعد يشرط ويتشرط ده وعايزهـا وعايزهـا وعايزهـا زي ما يكون بيفصل بدلة ربنـا بيوقعه وقعة تمـااااااااام ما بيطلعش منهــا :D