الأربعاء، 18 مارس، 2009

خطرفات مسائية..

امبارح لقيت واحدة اعرفها كاتبة على الفيس بوك life is too short for dating ugly boys على ما اظن دا اللى بيسموه التقصير و المجايب من الاخر..
الحمد لله على نعمة العقل
*******
طول عمرى مقتنعة بان مفيش فرحة بتيجى
من غير ما يكون قبلها فترة انتظار لحد ما جملة فى فيلم the lake house خليتنى اعيد نظر كانت حاجة شبه ان اللى بيضيع فرص بايده عشان فرصة معينة فى دماغه ممكن يضيع حياته كلها و هو مستنيها احلى فرحة هى اللى بتيجى على غفلة على فكرة فى اكتر وقت انت مش مستنيها فيه
و مش عارف اصلا ان هى دى اللى هتسعدك فتلاقيها جت و غيرت حاجة جواك من غير ما تعرف جت منين ولا ازاى
دلوقتى بس عرفت معنى جملة فى اغنية لفيروز
جاى عغفلة متل الفرح..
*******

كم رهيب من الاحباط و المحبطين حواليا اكتشفت ان مفيش مخلوق على وجه الارض ممكن يطلعنى من جو الاحباط دا غيرى ممكن اطلع نفسي بحاجات تشغلنى عن التفكير او بلمة ناس و رغى مالوش معنى بهدف تضييع الوقت او بكمية اكل و شوكولاتة مهولة تكفى قرية بحالها او بكلمة صغيرة ابسط من البساطة لكن وقعها على السمع مالوش مثيل فى عالم الكلمات..حلم
*******

بعد ما سبت عالم الدراسة و الكلية و بعد ما دخلت فى عالم ما عنديش فيه اى سيطرة على الناس اللى بتدخل حياتى منه ولا اى تحكم فى نوعية الناس اللى بتعامل معاها لاكتر من 9 ساعات فى اليوم اقدر اقول بكل ثقة ان يوسف بيه وهبى الله يرحمه و يبشبش الطوبة اللى تحت راسه ما كانش دقيق فى وصفه..العالم مش مسرح كبير.. ما العالم الا كباريه كبير .. و فى شارع الهرم و ما زلت منضمة لصفوف القرويين فى المدينة!! *******

بين الصداقة و الحب..شعرة فلماذا يصر البعض على قطعها؟
*******
يوم ما قررت اعمل دراسات عليا فى كلية اعلام
كان رد الفعل امال هتتجوزى امتى و يوم ما اخترت المجال اللى بشتغل فيه
كان السؤال امتى هتختارى العريس اللقطة؟ و يوم ما ابتديت ريجيم
كان الرد كويس عشان الجواز و مستلزماته و اخيرا لما بدات اسال عن الماجيستير
كان الreaction العريس اولا ثم الدراسة خايفة بكرة لما اجى اغير الشامبو اللى بستعمله
الاقى حد بيقولى يا بانتين يا هتعنسي!!
*******
نكتة اليوم رئيس مدغشقر استقال يا ولاد و اتنازل عن المهام الرئاسية لزعيم المعارضة ياما نفسي اشوف اليوم دا هنا مش بتاع الاستقالة بعد الشر.. لكن اليوم اللى يظهر فيه كائن يمشى على رجلتين يصلح انه يطلق عليه زعيم المعارضة المصرية!

هناك 38 تعليقًا:

Desert cat يقول...

انا مؤمنة جدا بموضوع ان الفرحة بتيجى على غفلة
ويا سلام لما تفرحى تأتى الأفراح تباعاً
موضوع العريس ده مسيطر جدا على مجتمعنا الشرقى
لما فكرت اعمل مشروع خاص بيا.. طب ما تفكرى تعملى اسرة احسن لك
ولما صممت وعملت المشروع ها مش هتتجوزى بقى الشغل ولذة احساس انك سيدة اعمال مش هينفعك فى حاجه العمر بيجرى
اتنقلت للسكن فى مكان جديد ومختلف تماما كل لما اروح زيارة للمكان القديم كل اللى يقابلنى هتيجى امتا وايدك فى ايد صاحب النصيب
اقتنصت اول فرصة وقدمت للعمل فى مجالى تخصصى هندسة المساحة وتم قبولى وبقيت دلوقتى مستوظفة قد الدنيا .. جميع الزملاء والزميلات العزيزات انتى كل يوم اجمل من اللى قبله هما الرجالة لابسين نضارات ولا ايه ؟؟
ولما فاجعتهم بخبر الخطوبة مش كملت شهر
مش كمللللللللت لكن السؤال اتغير لصيغة تانية .. هتتجوزى امتا ؟؟
واظرف حاجه بقى هتعيشى هنا ولا فى الاسماعيلية .. الا ان حضر هو بنفسه علشان ياخدنى من الشغل وسمع السؤال المعهود كانت اجابته ان الاسماعيلية مكان شغله اما محل الاقامة هيكون عباس العقاد ابقوا شرفونا .. يسكتوا يا حبيبتشى ابدااااا استلمونى انا تانى يوم وازاى توافقى انه يبعدك عن اهلك .. يا حبيابى وانتوا مالكو ميعرفوش انه رحلة كفاح عمرها سنين .. المهم يا حبيبتى ان الناس مش بتكست وكل لما تحققى خطوة تلاقيهم بيسالو على اللى بعدها
انا حاسة انى لو اتجوزت بكره هيسالونى بعد بكره هتخلفى امتا
رحمتك يااارب

magi يقول...

اه فعلا الجواز هو تانى موضوع الناس بتتكلم فيه بعد الكوره

موضوع الريجيم اتقالى انا كمان انتى مش هتخسى بقى عشان فستان الخطوبه
اقولهم يا جدعان انا لسه متخطبتش مفيش فايده
احسن حل هو التطنيش
وماله التعنيس بقى ده احسن من الجواز لمجرد الجواز الف مره

samamasr يقول...

:)

The Seagull يقول...

يسعدني جدًا إني أكون أول واحدة تقرأ البوست :D


بالنسبة لعضوة الفيس بوك فالبنت دي مية مية والله :D


بالنسبة للنقطة التانية فمش شرط على فكرة :) .. بمعنى إني مثلاً بدرس وبذاكر ليل ونهار عشان أنجح وأجيب تقدير وأنتظر النتيجة وأشوفهـا وتطلع زي ما اتمنيت وأفرح بيها وإنه تعبي جه بفايدة وإني حققت مرادي .. وممكن جدًا أكون قاعدة لا بيا ولا عليـا وألاقي خبر يفرحني مثلاً أو موقف أو فرصة مـا تنزل عليـا فجـأة من غير ما أعرف هي جت منين ولا إزاي وفوق كل توقعاتي :D

أحسن حاجة إنك تبعدي عن أي جو سلبي أو أي مشاعر سلبية وعن ناس مالهاش شغلة في الحياة غير إنها تكسر مقاديفك وتحبطك وتكرهك في نفسك أساسـًا .. أنـا عن نفسي معتزلة هذا العالم وعايشة مع نفسي ولابتوبي ودراستي والنت وانتم :D العالم التانية دي ماليش بها أي صلة نوهائي يعني :D


كلنـا بناعني من نفس الإحساس .. لكن أكيد من جوانتا عارفين إنه أكيد هييحي اليوم اللي هنلاقي نفسنا فس العالم اللي احنا عايزينه وعلى مقاسنـا ;) وده دورنـا احنـا بقى :)


ههههههههههههه .. ربنـا يهديهم العالم دي والله :D أنا نفسي أفهم ليه كل واحد ما خليهوش في نفسه ويحط لسانه جوه بقه ويسكت؟ ليه بجد؟ انتم مالكم أصلاً ما كل واحد حر يا عالم .. لا حول ولا قوة إلا بالله العلي العظيم :D يا ساتر على العالم دي بتخنق منهم بجد :D


ههههههههه يحيينـا ويحييكي ربنـا إن شــاء الله :D


SO NICE POST يا فلتي :D

ReEm يقول...

بصي هو صعب تححدي اي احلى الفرصة او الفرحة على غفلة ولا بعد انتظار
لانه كل حالة و ليها شكلها او يمكن اصلا السر في الفرصة او الفرحة نفسها لما بتجي على غفلة بتحسي انها جات و مالت حياتك من غير استعداد ولو جات بعد انتظار بتحسي انها الراحة بعد التعب و الصبر ففي الحالتين هتبقي مبسوطة بس يمكن مشكلة الانتظار زي مافولت لو ضيعت فرص و انا بنتظر ساعات الندم هيكون هو المسيطر

--------

بصراحة انا قطعت الشكولاتة من البيت بوظت الرجيم ومش عارفة اسيبها زمان لما كانو بيقولو انها ادمان و دوا مؤقت للاكتئاب ماكنتش بصدق بس دلوقت صدقت مش عارفة ليا فترة بحاول اصلا اني اقاوم الاكتئاب مهما كنت زعلانة او اللي حواليا كئيبين و ادينا بجاهد عايزة احس اني بغلب الاحساس ده بنفسي مش عايزة لا ارمي اللوم على حد و لا استعين بمساعدات خارجية زي بهجة عمري الشوكولاتة و عايز اخس كمان (^_^)

-------

الا العريس ده اللي لو عطست هيقولو عشان العريس فكرتيني بماما مرة بتقولي تتجوزي و تروحي بيتك و تسعدي و ترتاحي كنت هقولها طب انتي لا سعيدة ولا مرتاحة يعني بس اتكسفت اصلها ماما برضو

على الله يطلع ابن حلال العريس ده على قد ما كلهم مستنينه

مواطن مصري يقول...

نكتة اليوم
رئيس مدغشقر استقال يا ولاد
و اتنازل عن المهام الرئاسية لزعيم المعارضة
ياما نفسي اشوف اليوم دا هنا
مش بتاع الاستقالة بعد الشر..
لكن اليوم اللى يظهر فيه كائن يمشى على رجلتين
يصلح انه يطلق عليه زعيم المعارضة المصرية!

بجد مش دي في أفريقيا ؟؟


هههههههههههههههههههههههههههههههههههههههههههههههههههههههههه



متحلميش لما الزمالك يوصلل كاس العالم ساعتها توقعي انها ممكن تحصل
:)))

mohamed ghalia يقول...

ههههههههههههههههه
هنحاول نحلم بده

Here i'm يقول...

بما ان الموضوع جامد يبقى أرد بقى :p



انا مش فاهم الحتة دى
life is too short for dating ugly boys
عارف ترجمتها بس مش فاهم المغزى او المضمون


على فكرة هيا هيا .. لو فكرتى شويه .. ان الانتظار يوم ورا يوم بيوديكى لانك تقولى خلاص انا زهقت .. اول ما تقولى زهقت تلاقى الفرح نطلك .. الفرح و الانتظار و المفاجأة .. كلهم واحد



نفسى أحساسى .. محبطين مليين الدنيا .. حاجة من الاتنين يا تاخدى سكتهم يا تاخدى سكتك .. علشان كده بقول مفيش حاجة أسمها اتئاب فى حاجة أسمها انا بكره حكون حزين و حخرج من المود لما اخرج بالليل :D احنا اللى بنعمل كل حاجة فى نفسنا احباط حزن أكتئاب .. كله من صنع أيدينا .. اما الحلم فانا واحد من الناس اللى حياته حلم و امنية .. مش معنى حلم أنى عايش فى حلم كانى نايم .. معنى حلم يعنى الامل و بكرا أكيد احلى رغم الازمة العالمية :D



حالتك دى بتفكرنى بحالتى اول ما بدات أشتغل كان فى الموقع بتاعى حرامية ناس بتسرق الشركة عينى عينك رغم ان الشركة كانت لسه صغيرة .. كنت بروح أعيط و الله العظيم .. لغاية ما مشتهم واحد واحد :D بكل ادب و زوق فلسعتهم .. و بعد ما روحت المكتب ظهرت الفاكسات .. أشى انا مندوبة شركة و تقوم فاقعة ضحكة تسمع الدنيا كلها و ردى بأبتسامة .. شكرا :D



الحتة دى فكرتنى بفيلم مافيا بتاع السقا .. فى اخر مشهد كان واحد صاحبى بيقولى لا لا لا كان المفروض فى النهاية يقول لمنى زكى بحبك و يتجوزها .. فبقله مينفعش يبقوا صحاب يعنى .. قالى لا طبعا :D
هوا الواحد بيهرب من شويه :D


بقولك أيه ما تتجوزى و تخلصينا بقى :D بصى الجواز دا حاجة شبه العمارة عندنا فى المقاولات .. أساس صح طوب احمر محترم حديد عز :D مهندس محترم .. بعد كل دا أستحالة الجواز يتهد .. غير كده يبقى الجواز قايل للسقوط


عارفة بفكر لو حصلت حاجة للريس مين يمسك .. مفيش واحد فى البلد لا معارضة ولا الحزب الحاكم يستاهل .. كل الطرق تؤدى غلى جمال حيث الخراب و الدمار

mUsLiM يقول...

" life is too short for dating ugly boys "

يا سلام عجبانى اوى اوى اوى اوى الجملة دى

مبنهزرش احنا يا فندم

ههههه

ومتكدبش يا كبارى انت معرفتش تترجمها

يا كدااااااب

هيا دى محتاجه مغزى ومضمون عملتها رواية أدبيه

هههههههههههه

بهزر معاك يا كبارى اوى تزعل :)

وبالنسبة لمسألة الغفلة ، فمش مشكلة بالنسبالى الفرح ممكن يجى على غفلة او بانتظار

وعلى فكره لما تنتظرى حاجه وتيجى بتبقى الفرحة أكبر :)

لأن الفرحه هنا بيسبقها خوف وقلق من ضياعها فلما بتتحقق بيتبقى سعادة غامرة ،،

وبينى وبينك المهم ربنا يرزقنا الفرحة سواء عن غفلة او بانتظارها :)

أما بالنسبة للصداقة والحب ، فالقلوب عوالم مغلقة لا يعلم طبيعتها الا ربها ، فنسأل الله سلامة القلب ،،

وانا أقلك على حاجه تطلعك من الإحباط :))

قولى ورايا (( اللهم إنى أمتك بنت عبدك بنت أمتك ناصيتى بيدك ، ماض ٍ فيا حكمك ، عدلٌ فيا قاضئك ، اللهم إنى أسألك بكل اسم هو لك ، سميت به نفسك ، أو أنزلته فى كتابك ، أو علمته أحد من خلقك ، أن تجعل القرآن الكريم ربيع قلوبنا ، ونور صدورنا ، وجلاء همنا وحزننا يارب العالمين ))

وثقى يا أختى ان مفيش انسان هايخرج فعلا من حالة إحباط أو اكتئاب الا بنفسه بعد الدعاء واللجوء الى الله عزوجل ،،

وبالنسبه للعالم فهو فى نظرى رحلة يمر فيها الانسان منذ ولادته الى وفاته ، بها كل أنواع المشاعر والتصورات والتأملات

المهم أن ينتهى الإنسان منها فائزا بتقوى الله ، وإلا فلو كان فى دنياه ملك الملوك ، فلن يفيدها ذلك شيئا ،،

وبالنسبه للشامبو ، فمتعرفيش شامبوا كويس للقشره :))

هههههه

تعبان انا من القشرة

وأحب أقلك ان رئيس مدغشقر لم يستقيل الا بعد شيطرة الجيش على البلاد وانقلاب ضباطه على نظام الحكم

وحتى اخر لحظه كان بيدعو الشعب لمعارضة الانقلابيين :))

لغاية ما استولوا على القصر الجمهورى فنفد بجلده ،،

يلا ربنا يتولى كل المظلومين فى كل مكان

ونسألكم الدعاء :)

السلام عليكم

dr.lecter يقول...

احلي حاجه انها تيجي وانت نيمه في العسل

بالنسبه للتعليق كل واحد علي حسب مخه بقي هتعترضي علي خلقه ربنا ولا اييه؟ هههههههه


لا لا كباريه مش كباريه هو نكته نكته بايخه مصوره زي بتاعه فلاش وميكي وصلاح جاهين



معاكي في الحته دي اصداقه والحب فرق شاسع بينهم

عارفه لو قطعتي الشعره دي لايمكن ترجعي زي الاول وارجعوا اصحاب
لايمكن

كل واحد هيتغير من جواا وهيبقي كلامه بمحسوبيه مع التانني حتي لو بتتظاهروا بالعكس

انا مجرب الموضوع ده وشفته كتيير اووي

وشفته اثاره العكسيه والجروح الي نزفت من الشعره دي



هههههههه امشعني بانتين مش عارف ليه كل البنات بيجيبوه

المره الجايه خدي بالك كويس علشان مايقولوش ليكي غريتي ليه معجون السنان اهو كده القطار فاتك يافالحه


رئيس مدغشقر استقال وايه يعني

احنا مالنا ومالهم احنا لازقين فيه لازقين فيه وهمنشي معاه واخترناه واخترناه

Beram ElMasry يقول...

السلام عليكم ورحمة الله وبركاته
عزيزتى الغالية ،انت ام اليوم او غدا ، فكل عام وانت بخير فى عيد الام ، وان كنت تتمنين لطفلك ان يحيا امنا فلقنيه ان الاسرائيلى شر كله ، فلا يامنه برهة ، ولا يسالمه مدى الحياة

يهودى يعنى حنش احسن دوا تقطعوا راسه
كلام نقوله لنسلنا نطبعوا فى كتابه وكراسه
لك تحياتى والسلام عليكم ، ولا سلام مع اليهود
بيرم المصرى

انا حرة يقول...

Desert cat
انتى هتقوليلي؟
و وحياتك لما تخلفى الاولانى هيقولولك امتى هتخاويه و لما ييجى التانى امتى هتجوزيه؟
حاجة تقرف بجد مش ممكن تدخل الناس و حشريتهم..و بعدين دى مسالة اولويات فى اللى منتهى املهم فى الحياة جوازة و السلام و فى اللى عندهم طموح فى شغل و دراسة و الجواز و الارتباط عندهم مشروعات مؤجلة..مش عيب ولا حرام

مش معقول ان كل من كانت مش لاقية اللى يبص فى وشها تبقى فاكرة ان كل البنات لازم يكونوا هيموتوا على الجواز زيها ولا كل من كانت بتدور لابنها على عروسة تتخيل ان اى بنت معاها شهادة تبقى هتقتل نفسها على العريس اللقطة

المهم الف مبروك على الخطوبة و ربنا يتمملكم على خير ان شاء الله..و يبعد عنكم الحشريين و الحشريات :)

انا حرة يقول...

magi
عجبتنى اوى حتة ان الجواز تانى موضوع الناس بتتكلم فيه بعد الكورة دى :D

و اكيد عدم الجواز اهون بمراحل من جواز فاشل مع شخص ما عندوش ادنى تقدير ولا احترام للطرف التانى

انا حرة يقول...

ازيك يا ايمان :D
انا عارفة الابتسامة دى على انهى جزء فى الموضوع و بما انك مش هتقتنعى بكلامى فمش هقوله عشان ما تزعليش :D

انا حرة يقول...

يويو

انا اللى يسعدنى والله :D

مش كده برضه؟ هم دول البنات ولا بلاش يا بنتى :D

انا معاكى فى نقطة الفرحة بعد التعب دى..بس هى فى الفيلم كانت بتتكلم عن الحاجات اللى مالكيش دخل فيها..زى الحب مثلا

تقريبا دا اللى عملته برضه..شغل و تدوير على دراسة و كورسات و شوية ناس يتعدوا على الايد الواحدة و انتوا طبعا :)

امتى ييجى اليوم دا بجد؟ انا ابتديت اصدق انى ممكن الاقى مكان تانى غير هنا فين بقى بجد مش عارفة :D

شكلك مخنوقة منهم زيي..احنا لازم نعمل بلوج بناتى عشان احكيلكم على اللى بشوفه..بلاوى والله العظيم :D

اهم حاج ان الامل يفضل موجود :)))

thank u so much ya yoyety:D

انا حرة يقول...

reem
هى الفكرة انى طول عمرى شايفة ان الانتظار حلو..لحد حاجة حصلت مؤخرا حسستنى ان اللى بييجى على غفلة دا له سحر تانى خالص :)

هو الاكيد ان ماحدش بينفع يطلع حد من المود دا اللى انا متاكدة منه..هى فكرة الهدف او الحلم دى هى اللى مصبرانى و بعد كسل بقاله كام شهر قررت استانف نشاطى و ربنا يسهل ان شاء الله..هقولك على نصيحة بناتى بما انى عارفة اهمية الشوكولاتة فى حياتنا :D
خليكى فى واحدة فى اليوم و بعدها نص ساعة رياضة و ادعيلى :D

هههههههههه والله كلنا عندنا نفس الاحساس..بس الفكرة انك لو شوفتى حياتى و يومى اللى بيعدى بسرعة مرعبة هتفهمى انا ليه رافشة الفكرة دلوقتى..بس تقولى لمين يا بنتى مفيش فايدة
ربنا يرزقك بالزوج الصالح اللى يقدرك يا ريم..انتى بجد تستاهلى كل خير :)

انا حرة يقول...

مواطن مصرى
ههههههههههه بيتهيالى ولا لما اسمنت اسيوط يوصل ما هنشوف اليوم دا بعنينا :D

انا حرة يقول...

mohamed ghalia

انا بقول احنا نحلم و احفاد احفادنا اكيد هيلاقوا اليوم دا جه.. يعنى مدغشقر تعملها و احنا لسه بنكلم فى انجازات ال99.9%..والله حرام

انا حرة يقول...

كوبرى

ميرسى كتير..و برضه ولا يهمنى :P

المضمون ان الاخت شايفة ان الحياة قصيرة جدا مش عشان تلحق تحقق احلامها ولا عشان ما تقضيهاش مع ناس ما بتقدرش..هى قصيرة اوى لدرجة انها مش عايزة تضيع وقتها فى الخروج مع ولد شكله وحش :D

تصدق عندك حق فى النقطة دى..يا خسارة :D

انا معاك فى ان كتير مننا بيوهم نفسه عشان يعيش فى دور الاكتئاب و الاحباط او من ضعف شخصيته بيسيب حالة اللى حواليه تأثر فيه..لكن برضه ساعات بيكون فى حاجات اكبر من طاقتك انك تعديها لوحدك..او ان خروجة ولا لفة على النيل تخليها تعدى..بس انا شايفة انه مش المهم انت بتاخد وقت قد ايه فى الحالة دى..المهم انت بتخرج منها ازاى و مقرر تروح فين

اسكت يا كوبرى دا انا اللى بشوفه لا يتقال ولا يتحكى :D
و يا ريتها جت على السرقة ياخويا كانت تبقى مبلوعة و مقدور عليها..دا انا بقيت عاملة زى اللى كان سايب البيت كله و قاعد فى اوضة و فجاة فتحوا عليه الابواب و الشبابيك و المنور..بجد مش مصدقة نفسي

ايييوة هو بالظبط كدا..ليه ما ينفعش؟ اصل الحب لازم يكون اوله صداقة لكن الصداقة دى مش شرط نهائى تنتهى بحب..و بعدين الصداقة علاقة راقية و محترمة و نضيفة..ليه لا بجد ؟
اسمها عشان كدا بنلف حواين نفسنا :D

هههههههه مين دى؟!!!ما انت عارف رايي
بلاش انا..امبارح سمعت مناقشة بين اتنين زمايلى واحد منهم قال ان الرجالة خلصوا من البلد و ان اللى موجودين ما يقدروش يربوا عيال..قلتش حاجة انا :D و اهو اسمه راجل اللى بيتكلم عشان مابقاش مفترية..هو انا هتجوز واحد عشان اخد بالى منه ولا عشان ياخد هو باله منى..دا ايه الوكسة دى :D

لو تفتكر اخر موضوع كتبته فى اى كلام كان عن كدا برضه..حاجة تقهر ان 80 مليون واحد يكونوا فالحين فى الشكوى و ساعة الجد كله يفلسع

انا حرة يقول...

مصعب..

ههههههههه اه والله هى دى البنات ولا بلاش..عارفين هدفهم فى الحياة D:

على رايك المهم تيجى الفرحة و خلاص

شكرا على الدعاء..دا من اكتر الادعية اللى بحبها على فكرة

هى اكيد مرحلة انتقالية ما قلناش حاجة..بس الفكرة فى النقلة الحضارية اللى حصلتلى دى و مش قادرة لسه اتاقلم معاها اوى :))

هشوفلك واحد كويس..بس كدا :D

انا اللى فهمته انه بعد الانقلاب ده زعيم المعارشة طلب انه يتولى الرئاسة و الجيش وافق..و يا سيدى ايا كان انقلاب عسكرى ولا مدنى حتى..المهم اشوف اليوم دا قبل ما اموت :D

ربنا يكرمك يا مصعب و يوفقك فى شغلك و سفرك يا رب :)

انا حرة يقول...

لكتر

لا مش هعترض ولا حاجة..انا معترضة على الفكرة نفسها مش معقول واحدة تكون دى كل طلباتها فى البنى ادم اللى هترتبط بيه..فكرتنى بواحدة كانت بتسال صاحبتها عن رايها فى صورتها مع واحد عشان لو حلوة توافق تخرج معاه :D

ايوة بالظبط دا اللى اقصده..و عارفة انها استحالة تكمل او ترجع صداقة تانى خصوصا لو طرف من الاتنين كان عنده مشاعر ناحية الطرف التانى اقوى من مشاعر الصداقة..هيفضل طول عمره حاسس انه مضحى و انه مظلوم مع انه هو اللى قرر يغير مجرى العلاقة دى لوحده

والله دا اللى ناقص..هوس الجواز دا بيطلع علينا احنا مش عارفة اشمعنى انتوا مرحومشن من الحكاية دى..مجتمع ذكورى صحيح :D

طيب انا مالى انا ما اختارتش حد D:
ذنبى ايه اشوف نفس الخلقة فى نفس الصورة من ايام الحضانة و المدرسة و الجامعة و اخيرا عند عم عبده البقال دى لزقة سودة والله :D

انا حرة يقول...

beram el masry
هو ييجى طفلى دا و انا هقوله على كل حاجة حاضر :D..
كل سنة و انت طيب

Founoon يقول...

بصراحة هي كانت تبقى اوقع لو كانت

life is too short for dating stupid boys
بس ما ننكرش ان التقصير والمجايب من الاخر الطف برده

بكره المفاجآت ,,,أخاف حاجة تجيلي فجأة وأنا مش مستعدة وبالتالي تروح
وقتها يبقى ياريتها ماجات من الاول احسن

نفسك هي الوحيدة القادرة على اسعاد او اتعاسك بعد مشيئة ربنا مهما كان للبشر وجود وتأثير

كباريه ايه اللفظ الاوقع ماخور

انا مش فاهمه الناس اللي بتكلمك في جواز وانت 21 سنة !!! لا بجد اوفر اوي !

وليه الاصرار والاستعجال وكأنك متأخرة على معاد الحفلة مافهمتش ؟

مش مدغشقر دي بتاعت I like to move it move it :)
€€

blackcairorose يقول...

معرفش موضوع الفرحة المفاجئة، متهيألي الفرحة اللى منتظرينها وبنتمنى انها تيجي بيبقى طعمها أحلى، مش عارفة، فرحاتي غالبا مفاجئة، ولكن الفرح اللي بستناه عادتا مبيجيش، علشان كده نفسي ادوق طعم الفرحة الي عايزاها ومستنياها

متسمعيش كلامهم، خلي حياتك ماشية زى ما انتي عايزة، جه الجواز الي انتي مقتنعة بيه كان بها، واذا مجاش تبقي حققتي على الاقل امنياتك التانية

اطيب تحاتي

leeno يقول...

امبارح لقيت واحدة اعرفها كاتبة على الفيس بوك
life is too short for dating ugly boys

هههههههههههههههه طب البت عارفة هي عايزة ايه و الله عندها حق ........ اكبر همها في الحياة القصيرة دي تصاحب حلوين

وحياتك البت دي عايشة في نعييييييييييييم

انتي فاكرة ان اللي بيفكروا و يعقلوا و يحللوا و يفهموا مرتاحين

يا بنتي الهيافة تررررررف في ناس مش طايلاه ههههه

ارحمني يارب

اما البقية فليس لدي تعليق ههه

ReEm يقول...

هههههه

حلوة خطة الشوكولاتة طيب واوقات ما واحدة تجر التانية اعمل ايه ؟؟!

انا حرة يقول...

هو من ناحية وقع فهو اوقع بس الفكرة فى انه لو كدا يبقى هتعنس رسمى :)

و اى كباريه يا فاطمة دا انا لو حكيتلك اللى انا فيه مش هتصدقى نفسك :D

ناس بيكلمونى؟!! اسمها كل الناس بتكلمنى..و كل من كان عندها ابن مش لاقى اللى تبص فى وشه ولا حفيد مش لاقى اللى يعبره تجرب حظها معايا :D
هم تقريبا تخيلوا انى كنت متسلية بالدراسة و بما انى خلصت و زهقانة من الشغل قالوا يجيبولى واحد اتسلى عليه:D

ههههههههه ايوة هى دى بالظبط كده

انا حرة يقول...

blackcairorose
يمكن اللى مستنيينه و ما بيجيش بيبقى المه اكبر لكن الاكيد ان فرحة مجيه بتبقى احلى من اى حاجة تانية..لكن م يمنعش ان اللى بيجى على غفلة دا بيحرك فيكى حاجات ما كنتيش تعرفى انها موجودة اساسا

هو دا اللى انا بعمله..او بمعنى اصح ما بعرفش اعمل غيره..اتربيت كدا و شايفة ان دا الصح و اللى مش عاجبه يتفلق..كده او كده احنا فى مجتمع ما بيعجبوش العجب

نورتينى :)

انا حرة يقول...

blackcairorose
يمكن اللى مستنيينه و ما بيجيش بيبقى المه اكبر لكن الاكيد ان فرحة مجيه بتبقى احلى من اى حاجة تانية..لكن م يمنعش ان اللى بيجى على غفلة دا بيحرك فيكى حاجات ما كنتيش تعرفى انها موجودة اساسا

هو دا اللى انا بعمله..او بمعنى اصح ما بعرفش اعمل غيره..اتربيت كدا و شايفة ان دا الصح و اللى مش عاجبه يتفلق..كده او كده احنا فى مجتمع ما بيعجبوش العجب

نورتينى :)

انا حرة يقول...

لينو
على رايك والله اللى بيفكروا و يحللوا و يذاكروا تصرفات الناس متبهدلين اخر بهدلة و بياخدوا كل صدمة و التانية فى الجون يعنى..حلوة الهيافة برضه :D

انا حرة يقول...

هههههههههههه
دى بقى لو لقيتيلها حل يا ريم ابقى قوليلي انا زى اختك برضه :D

بس كدا انا اتاكدت ان الموضوع مستفحل معاكى زى ما هو مستفحل معايا بالظبط :D

soly88 يقول...

ييجى على غفله ييجى بموعد سابق
بس هوه ييجى
علشان شايف كتير من المدونيين عندهم حالة اكتئاب
فكرتينى بليزا مانلى مع انى كنت بحاول انساها

وبعدين مين اللى يتنازل
هما بيطبقوا مبدأ سميره سعيد
مش هتنازل عنك ابدا ابدا

عاشقه وغلبانه يقول...

بالنسبه لموضوع العريس اللي بقيت المفروض اعمل كل حاجه ترقبا لظهوره وصلت لمرحله سألت كل الناس هي الواحده بتعيش علشان تتجوز ولا بتتجوز علشان تعيش

ولا ايه النظام
انا حياتي بيه من غيره ماشيه
جه ماجاش انا هو انا
مش هاتيجي اللحظه اللي امحي فيها شخصيتي ووجودي لمجرد ظهوره
انا مش برتب حياتي انتظارا ليه بالعكس خالص انا برتبها بالطريقه اللي بتبسطني
ليا مش ليه


متفقه معكي في كل البوست

بالنسبه لصوره الصداقه والحب هي عندي في البوست قبل الاخير
بس بمعني تاني

انا مش باقي مني غير الخيط الرفيع ده
وكل الباقي اتقطع

الف مبروك ليا
ههههههههههههههههههههههه

البحث عن أنا شىء جنونى يقول...

ان شاء الله سيتم اصدار كتاب قصة حب سرية للكاتب عمرو الجندى مع بدايات شهر ابريل ان شاء الله

مع شكر خاص لطاقم العمل

اللينك
http://www.amralgendy.blogspot.com/



http://www.facebook.com/inbox/readmessage.php?t=71789721807&mbox_pos=0#/topic.php?uid=45243591058&topic=7688

متمنين التوفيق للجميع

samamasr يقول...

والله أنا نسيت يا ياسمين..أنا كنت بقول إيه :)

samamasr يقول...

لا..دي ابتسامة ليكي والله :)

كل سنة وماما طيبة..وكل الأمهات..لكل الموجودين يارب :)

وربنا يرحم كل أم توفت..وفي الجنة يارب ويكرم أبنائها جميعا :)

البحث عن أنا شىء جنونى يقول...

الفرحة صدفة جيه بعد انتظار

والحياة الحقيقة نفسها اللى بتعيشنا بجد بتيجى بعد انتظار

وما اجمل الفرحة التى تاتى بعد لوع الشوق وطول الانتظار

جميل اوى سردك

وعلى فكرة رئيس مدغقشر ده راجل جدع اوى

هههههههههههههه

ربنا يوفقك دايما ويبارك فيكى :)

Zika يقول...

حكاية الجواز دي عاده متاصله في الشعب المصري
والله مش الستات بس
لأ الرجاله كمان
لو ماتجوزش لازم بارضه في يوم هيتقال عليه انه صايع وانه وانه
اه ملحوظه بس
فيلم
lake house
فيلم عبقري وفكرته عبقريه كمان
تحياتي