الأربعاء، 30 يوليو، 2008

امام الستار الاخير..وقفت انتظر

فكرت كثيرا فى كتابة وصيتى و لكنى لم اجد لدى ما يستحق ان اورثه لغيرى فأنا لا املك غير ثيابا كثيرة
فطالما كان جمعها هواية عندى مثل كل البنات و اذا كتبت عنها
فانا اتمنى ان ترثها اختاى الصغيرتان حتى تتذكرانى كل يوم ..
و سيارة كانت اغلى هدية حصلت عليها فى حياتى ليس لانها الاغلى ثمنا و لكن لانها هدية من ابى و كلما رأيتها تذكرت كيف قدمها لى و كيف اخفى عنى خبر شرائها
حتى يفاجئنى بها بمجرد اتمامى الثامنة عشرة
و غرفة تعبر عنى بكل ما بها من تفاصيل صغيرة فصورى التى اخترتها بعناية تزين كل ركن منها ففى اقصى اليمين صورى القديمة و اقربهم الى قلبى تلك التى ارتدى فيها ثوبا احمر
و فى عينى نظرة كبرياء غريبة على طفلة فى السادسة ..
و فى وسط الغرفة صور كثيرة تلخص حياتى القصيرة و فى نهاية الغرفة صندوق يؤكد لمن يراه انها غرفة طفلة فى العاشرة لما يمتلئ به من العاب ..
اما الصندوق الصغير الذى وضعته بعناية فوق سريرى فبه كل ما كتبه اصدقائى لى منذ كنت فى السابعة ..
و كتبى من اكثر الاشياء القريبة الى قلبى فاذا حاول احد قرائتها سيجد بها تواريخ قرائتى لها و سيجد سطورا تحت الكلمات التى احببتها لذا فانا اريد ان اتركها لامى فعندما تقرأها ستعرف الكثير عنى مما لم تكن تعرفه.
و اهم ما فكرت فيه هو اننى لا اريد ان يقام لى عزاء لاسباب كثيرة اهمها اننى لن اطيق ان اسمع اصوات تقول عنى ما لا تشعر به فالعزاء فى نظرى مظهر اخر من المظاهر الفارغة ليتهم يتصدقون بهذه الاموال و يعطونها لمن يستحق...و ما اكثرهم
كثيرون تحدثوا عن الموت ... رأووا فيه اكبر مخاوفهم على الاطلاق فمنهم من يخشاه لأنه لم يفعل فى حياته ما يجعله مستعدا لمواجهة نهايتها و منهم من يخافه لأنه متمسك بالدنيا لدرجة الجنون فمجرد فكرة فقدانها و فقدان الاشياء التى تعود عليها ترعبه ..
اما انا... فأنا لم اعد اعرف طبيعة مشاعرى نحوه فهل هو شوق لمكان مختلف سمعت عنه كثيرا فأردت رؤيته؟ ام ترانى اكابر لأنى اعرف تماما اننى لم استعد جيدا لهذا اللقاء... متضاربة هى مشاعرى التى اكنها للموت فاحيانا اشعر بانى احاسب نفسى لدرجة جلد الذات على كل ما يخرج من فمى و كل ما يدور فى عقلى
سواء خرج الى النور ام بقى فى الظلام و احيانا اشعر بأنى اخطأت كثيرا لدرجة لن ينفع معها ندم و بأنى احتاج للكثير من الوقت
حتى اصلح ما افسدته او انقذ ما يمكن انقاذه ..
و أيا كان شعورى الان فليس هذا ما يشغلنى فما يشغل تفكيرى هى الصورة التى سأكون عليها عندما افارق هذه الحياة هل سأموت فى فراشى و انا فى السبعين من عمرى و قد فاض رأسي بالشعر الابيض
بحيث لم يعد ممكنا معرفة لونه الاصلى؟
ام سأموت فى سن الشباب؟ فكثيرين هم من يموتون فى هذه السن خصوصا فى ايامنا هذه
ام اموت فى حادث مفاجئ بالرغم من تحذيرات امى المتكررة
و غضبها الدائم منى بسبب طريقة قيادتى
التى تشبه قيادة "سواقين الميكروباص"على حد قولها
ام ترانى سأموت بعد مرض طويل ينهكنى
و ينهك ما تبقى فى جسدى من رغبة فى البقاء
فاستسلم بعد ان اخسر اخر معاركى معه او استسلم دون مقاومة...
فهذه هى الحرب الوحيدة التى لا اقوى عليها
و ان كان مرضا فاين سيصيبنى؟ هل فى قلبى الذى شاخ منذ كنت طفلة ام فى عقلى الذى لم يتوقف عن التفكير لحظة لدرجة اننى تمنيت لو استطيع ان اعطيه اجازة عارضة
حتى لو كانت لساعات قليلة...
لا اعرف لماذا تذكرت كرامتى فجأة فما دخل الكرامة فى حديث عن الموت؟ و هل للميت كرامة من الاساس؟ فكرامتى هى مرضى المزمن الذى اصابنى منذ الطفولة
و لازمنى لدرجة منعتنى من التنفس فانا اخاف عليها كخوفى على طفلى الذى لم يولد بعد فحتى فى حوارى مع نفسى عن الموت اراها و قد ظهرت امامى كأنها تأبى ان انساها لدقائق او حتى ان احاول فانا تمنيت كثيرا من الله ان اموت صغيرة فلن احتمل ان اكون سببا لتعاسة من حولى و لن اقوى على نظرات الشفقة فى عيونهم حتى لو كانت شفقة مغلفة بالحب او بحزن على فراق ات لا مفر و لم اتعود ان اعطى يدى لاحد ليقودها و يقودنى فانا اقودنى منذ ولدت و لن اقوى على اعطاء دفة حياتى لغيرى... فهذا وحده كفيل بقتلى
كثيرا ما تصورت سيناريوهات مرضى و كلها لها نفس النهاية فأنا اعرف بحقيقة مرضى ...فأحتفظ بها لنفسى...
فأموت بعد فترة ليس بالقصيرة ولا بالطويلة
فيفاجأ الجميع ولا يعرفوا اي مفاجأة اصعب...
وفاتى ام حقيقة مرضى السرى و تذكرت اغنية احبها كثيرا لدرجة انى اعتبرها كتبت لى و تمنيت من الله ان اموت مثل بطلة الاغنية فهى تريد الموت على المسرح... امام الناس ...و هى تفعل ما تحب انا ايضا مثلها...حينما يأتى وقتى
اريد ان يسقط الستار من خلفى و ليس من امامى فطالما سقط خلفى لن اهتم بما مضى فهو لم يعد ملكى و لن اهتم بما سيقولون فلن اتذكر سوى اسماء...
اسماء سيهلك الحزن قلبها .. و اسماء ستكون نهايتى ميلادا جديدا لها .. اسماء ستتأثر خوفا من اقتراب نهايتها .. و اسماء ستذكرنى بالخير .. اسماء ستشكر الله على استجابة دعواتها .. و اسماء ستتوجه لله بالدعاء لى .. و لكنها فى النهاية مجرد اسماء...
و ان كنت اعرف ان الحياة ستستمر بى او بدونى و مهما طالت مدة الحزن على فراقى او الفرح للخلاص منى
فهى فى النهاية فترة مؤقتة و الزمن كفيل بأن ينسى اكثرهم حبا لى...
النسيان ! كلمة بها الكثير من القسوة و الجفاء فبرغم معرفتى بانه من سنن الحياة الثابتة لا يزال جزء منى يتمنى
ان اظل بطلة مسرحية الكثيرين ممن يهمنى امرهم انانية انا؟... ربما و لكنى اعتبرها انانية مشروعة فأنا لا اريد ان اتحول الى قطعة ديكور لدى من اعتبرتهم ابطالا لمسرحيتى اللهم أحسن خاتمتى يا رب العالمين
========================
فى اغنية شيرين الاخيرة:
"هتعمل ايه لو نمت يوم و صحيت و لقيت..
اقرب ما ليك فى الدنيا مش حواليك"
مش عايزة اعرف هعمل ايه..ربنا يجعل يومى قبل يومها

الثلاثاء، 29 يوليو، 2008

خواطر مصيفة...(2)

زمن الوكسة الكبيرة ما زلت عند رأيي.. الرجولة انتهت و الرجالة اندثروا و المحترمين اللى فيهم بيتجوزوا ستات مفترية اكيد فى منطق ورا الموضوع ده...لسه ما اكتشفتوش
================
كنت ناوية اسيبه كده و بعدين قررت ابقى حقانية
الانوثة كمان بقت مشوهة
و على رأى عادل امام
احنا فى زمن المسخ طفولتى المشردة زمان ما كنتش بقرا غير رجل المستحيل و المغامرون الخمسة كبرت شوية و بقى في اختراع من اسخف ما يمكن اسمه فلاش استحالة يكون فى تقل دم اكتر من كده المهم انى عرفت ليه كل اللى كتبته فى الفترة دى من حياتى كان مضحك كده واحدة مستمدة ثقافتها من المواطن المطحون و ميدو و سوزى و خليل البخيل و عدلات هتطلع ايه مثلا؟ انيس منصور؟ البنزين و الاسعار و نظيف و حكومة التلت ورقات اخر تصريحات نظيف: لا نية لرفع سعر البنزين 80 مش لما نلاقيه الاول حضرتك بيضحكوا علينا ولا عليهم ولا على مين مش فاهمة اكتر حاجة بتعجبنى فى الحكومة دى انها بتخلى الواحد يدور على شتايم جديدة يقولها فى سره اصل القدام ما بقوش معبرين كفاية وزير التعليم العالى يعترض على تأجيل الدراسة لبعد رمضان خوفا على "صورة الاسلام" خايف يقولوا علينا ما بنشتغلش فى رمضان قال يعنى الشغل واخد حده اوى معانا بقيت السنة و قال يعنى ده بس اللى هيدى صورة سيئة عننا اسكت يا لسانى.. محمد منير ما كنتش بسمعه و كنت بتريق على اللى بيسمعوه بعد ما سمعت اخر شريط اكتشفت انى كان فايتنى كتير احسن شريط فى الصيف بلا منازع ما يمنعش انه لازم يستحمى اقلع...توصل بقالى كام يوم بتفرج على البنات هنا لاحظت ان فى خلط غريب بين التى شيرت و الفستان نفسي حد يشرحلهم ان التى شيرتات بيتلبس تحتها بنطلونات اصله عيب شوية لما يمشوا كده و كلهم فى مارينا 4 مش عارفة اشمعنى فهموهم ان القلع ده اول الطريق طريق ايه؟ الله اعلم اعلانات للكبار فقط ما بقتش الافلام و الروايات بس انضمت الاعلانات لصف طويل عريض من القباحة المتواصلة الغريب ان اللى بيشرحولى الاعلانات دى عندهم 13 او 14 سنة ميلودى افلام متفوقة بشدة فى النوعية دى من الاعلانات
3 حاجات لازم تباد من الدنيا الريجيم الرياضة البطيخ
everything happens for a reason
فى حاجات غلط بتيجى فى الوقت الصح و من احتياجنا ليها بنصدقها مع اننا لو فكرنا فيها هنلاقى ان مش ده اللى محتاجينه و انه فرحتنا الوهمية بيها هتروح مع اول اصطدام بالواقع شوية احساس كفاية اوى عشان يوضحوا الاتجاه... و فى حاجات صح بتيجى فى الوقت الغلط و دى بتبقى مؤلمة اكتر بكتير اى حد بيمشى ورا احساسه هيعرف انها صح لكن مفيش حاجة واحدة حواليه هتساعده انه يتمسك بيها او يمكن لأنه من جواه بقى فاضى و مش قادر يتمسك بحاجة تطلع فى الاخر وهم او لأنه بقى اجبن من انه يجرب حاجة جديدة حتى لو كان من جواه عارف انها هتغير حاجات كتير فى حياته بس الاكيد ان المقولة اللى فوق دى صح جدا حتى لو معرفناش السبب دلوقتى تولع السودان اه تولع احنا مالنا هيبعتوا سفراءنا تانى هناك و لما واحد منهم يموت الشجب و الادانة جاهزين فى درج الوزير اليمين مش قادرين تحموهم ما تبعتوهمش الموضوع بسيط يعنى يوسف شاهين ما بحبش من افلامه غير هى فوضى و الاخر و اسكندرية نيويورك و مع ذلك هتوحشنى افلامه الله يرحمه العبد و الشيطان دى اغنية بقالها فترة مش كبيرة ده ان جاز انه يتقال عليها اغنية و نظرا لكم الاقبال غير العادى عليها سمعتها و ما عنديش غير تعليق واحد يا لهوى من فلسفاتى.. "مش مهم مين خد الخطوة..المهم انها اتاخدت" قالولى الجملة دى كتير مش مقتنعة بيها نهائى تفرق اوى اذا انا اللى اخدتها ولا اتفرضت عليا كل الناس بتشتم فى المنافقين كل الناس بتشتم الكذابين كل الناس بتشتم المدعين امال مين اللى بيتشتم؟ مجتمع بير السلم كان فى جملة فى فيلم حب البنات معلقة معايا اوى "مش مهم بنعمل ايه المهم ما حدش يشوف" جملة معبرة اوى عن الحالة اللى وصلنالها للدرجة دى رأى الناس بيهمنا مش مهم نسرق نزنى ندمن ننم نغتاب نحقد ننافق نحور و نلون الكلام نولع فى بعض حتى كل ده مش مهم المهم نفضل فى نظر الناس محترمين مش مهم الحاج احمد عبد الجواد بيعمل ايه فى بيت الرقاصة المهم انه فى بيته راجل ملو هدومه راعب عياله و مراته فاكرينه ذكاء يا تنتن يا تنتن ملاحظة ان عدد الواعظين زاد اوى و كلهم محتكرين الحقيقة انا اعرف ان اللى عنده حاجة حلوة يقولها مرة او مرتين بالكتير لكن لما يصر على الوعظ و الارشاد بالعافية الموضوع بيقلب على سخافة و معتقدش انه غلط اوى لما الواحد لسانه يطول شوية معاهم خصوصا لو بيكلموه من منطلق انه جاهل و كافر و انهم هم بس اللى بيفهموا فى الدين و بيدوك اختيارين يا تعمل زيهم يا اما مصيرك النار و بئس المصير ايه مؤهلاتهم؟ محدش عارف حار جاف صيفا ...دفئ ممطر شتاء الجملة دى هرونا بيها فى المدرسة هى و "النشاط الزراعى اساس الدخل القومى المصرى" "اراضى الدلتا خصبة و النيل فيه مية كتير" و مع ذلك هنزرع قمح فى اوغندا مش عارفة انا استغبيت ولا هم اللى بيهرجوا مش عاجباكم...سيبوها مدون لا هقول اسمه ولا اسم مدونته ما بيعملش حاجة غير انه يشتم فى المحجبات و المنقبات و فى مدونة تانية ليه بيشتم فى مصر حاطط كم غير عادى من الصور من نوعية يبقى انت اكيد فى مصر تاعب نفسه و مضيع وقته فى الهبل ده ليه ؟ شنط السفر مش بتاخد اكتر من نص ساعة توضيب مش اسهل برضه؟ اغبياء فى حياتى فى شوية ناس فى الدنيا مالهمش لازمة بجد اللى يشوفك بتقرا و يصر اصرار عجيب مريب انه يكلمك سواء كنت بتقرا مجلة ميكى او حتى المصحف اللى بيدخل سينيما عشان يتكلم فى التليفون و تلاقى مكالمة طويلة عريضة بيذكر فيها بشكل عابر انه فى السينيما و الغريب انه بيكمل كلامه و الاغرب ان اللى بيكلمه بيكمل المكالمة عادى جدا اللى عنده قدرة غريبة انه يتكلم فى موضوع اتفه من التفاهة و يكبره و يدخل فى تفاصيله كأنه بيتكلم عن الذرة و عادة بتبقى مواضيع بتدل على تفاهتها و تفاهتهم على رأى زكى رستم و اللى بتوقف شارع كامل عشان تتكلم فى الموبايل و هى سايقة او عشان تركن فى مكان يقضى 9 عربيات طول عمرى اقول الستات مالهمش سواقة.. اللى تفهمه مرة و اتنين و تلاتة ان الحاجة دى بتدايقك و يصر انه يعملها على اساس انك مش هتاخد بالك مثلا الغريب انهم هم اللى بيزعلوا و الاغرب انهم بيفتكروا ان كلمة اسف ولا اسفة دى كفاية و بيزعلوا اوى لما تلغيهم من حياتك تماما مع انهم يستاهلوا اكتر من كده نفسي الناس تتعامل زى ما يحبوا يتعاملوا حاجات ما بتتنسيش سؤال مش لقياله اجابة ليه لما نحب ننسى حاجة بتفضل اكتر حاجة فاكرينها مهما حاولنا و ازاى ممكن الواحد تبقى حياته ماشية عادى جدا و فجأة تحصل حاجة تقلبها تماما و عمرها ما بترجع زى الاول.. انا "حرمة" و انت "احترم" نفسك بيقولوا على الست فى الارياف "حرمة" و الحقيقة الاسم ده كان بيدايقنى جدا لحد وقت قريب ما كنتش فاهمة ايه الغرض منه يعنى هل هو تشييء الست (يعنى تحويلها لشيء) ولا هو حلقة من حلقات سلسلة طويلة من تحقير الست فى مجتمعنا مرة بقصر شرف الراجل عليها و مرة باعتبارها عار على اهلها كلامها كله لازم يتقاس بمسطرة و تصرفاتها كلها محسوبة عليها فاكتشفت ان الكلمة ممكن تكون مشتقة من الحرمانية مثلا يعنى ان الست تكون حاجة مقدسة لازم يتحافظ عليها طيب حاجة جميلة والله بس فى كام نقطة كده جم على بالى يعنى لما انا يتقال عليا" حرمة " و يبقى كل هم ابويا و اخويا انهم يحلقوا عليا ولا كأنى فرخة هربانة اقل واجب يعنى انهم "يحترموا" نفسهم الاول ما هو مش منطقى انهم يلفوا ورايا عشان "يحمونى" و فى نفس ذات الوقت يلفوا ورا بنات الناس عشان يتفرجوا عليهم ولا طبيعى انهم يربونى و هم اساسا ما اتربوش عايزينا حريم... احترموا نفسكوا تجدوا ما يسركوا Blondes should not be taken seriously مقولة غبية من شخص اغبى عن الخرس و اهله فى كلام لازم يتقال لناس معينة فى حياتى حقهم يسمعوه و واجبى انى اقوله لا عارفة اقوله ولا هعرف اسف على الازعاج ...كلاكيت تانى مرة
لتانى مرة بدخل الفيلم و بحس بنفس الاحساس
الحمد لله انى ما بعرفش اعيط قدام الناس.. صدق او لا تصدق - مش ممدوح اسماعيل اخد براءة؟ - مين محمود اسماعيل ده؟ ليلتنا فل..

الاثنين، 28 يوليو، 2008

ضد التيار

قديما كانت السباحة ضد التيار سباحة ضد الحق ايضا
فالحق كان هو التيار..
شاذ هو كل من حاد عنه او حاول
الان اصبح مصير من يحاول ان يسبح ضد التيار هو الغرق
فمن يستطيع الصمود فى زمان صار القهر فيه قاعدة
زمان يعاقب فاروق جويدة و يكافئ ممدوح اسمعاعيل
ليس غريبا ..
فزمان الانبياء و الصالحين صار زمانا للاغبياء و القوادين
حرام والله..

الأحد، 27 يوليو، 2008

مصر فى 2009...توقعات ليلة الامتحان

مش نباهة منى ولا ذكاء مفرط لما اقول انه توقع مانشيتات الجرايد المصرية فى 2009 فى سهولة توقع رئيس مصر القادم مش بيقولوا التاريخ بيعيد نفسه؟ مش هتكلم عن الاخبار و الاهرام لأن اخبارهم بايتة و مكررة لدرجة مستفزة بدايتها دايما "خبر الرئيس" و صورة له من الحجم الكبير و المقصود بخبر الرئيس -عشان مش عايزة تلاكيك- الخبر اللى بيبقى فى اول صفحة و احيانا بيبقى قبل اسم الجرنال خصوصا لو كان خبر باهمية افتتاح معرض ورد ولا استقبال رئيس كازاخستان الشقيقة خلينا فى المصرى اليوم يناير 2009 علاوة جديدة بمناسبة العام الجديد: زيادة مرتبات القطاع العام و الهيئات الحكومية بحد ادنى 20% تهنئة البابا شنودة بعيد الميلاد المجيد و يحيا الهلال مع الصليب غرق 100 شاب فى محاولة للهجرة الغير شرعية الى سواحل اليونان فبراير 2009 زيادة اسعار جميع السلع الغذائية و غير الغذائية بنسبة لا تقل عن 60% لتتناسب مع الاسعار العالمية و فى تصريح للمصيلحى اكد انه على المواطنين ان يحمدوا ربنا كفاية ان منيو الخمسة لسه بخمسة غرق 200 شاب فى محاولة للهجرة الغير شرعية الى سواحل اليونان مارس 2009 قانون جديد للضرائب على الدخل 100 مليون جنيه تكلفة الحملة الاعلانية الخاصة بمصلحة الضرائب زيادة مهولة فى اعداد الممولين و كلهم بيرفعوا شعار "الضرائب...مصلحتك اولا" انباء عن ان السبب الحقيقى وراء هذه الزيادة هو رغبة المواطن المصرى فى ان يتفوتر بدلا من ان يتظبط غرق 300 شاب فى محاولة للهجرة الغير شرعية الى سواحل اليونان
ابريل 2009 قانون جديد مقترح من مجلس الشعب:
فرض تبرعات اجبارية على المصريين
قيمتها لا تقل عن 90% من المرتب الاساسى
يتم تقديمها الى اى رجل اعمال يعمل فى مجال الحديد
و اسمه فيه حرف "ع" و حرف "ز"
تصريح جديد لاحمد عز:انا ضد تزاوج رأس المال و السلطة
ولا تعارض بين مصالحى الشخصية و منصبى فى المجلسٍ
مايو 2009 زيادة جديدة فى اسعار البنزين 80 و 90 و 95 و 100 و 105 بس المواطنون يبحثون عن بنزين 80 و على من يجده الاتصال برقم 0900800700 و تخصيص 10% من الزيادة لشراء تورتة بمناسبة عيد ميلاده و عدد 85 شمعة عشان الحسد توقيع اتفاقية لتحرير التجارة مع الاتحاد الاوروبى تانى مع تحديد يناير 3009 كحد اقصى لدخولها حيز التنفيذ غرق 400 شاب فى محاولة للهجرة الغير شرعية الى سواحل اليونان يونيو 2009 امتحانات الثانوية العامة على الابواب و اعلان حالة الطوارئ فى البيوت المصرية تصريح وزارة التعليم: الامتحانات فى مستوى الطالب المتخلف انتحار طالب ثانوى شنقا انتحار طالبة ثانوى بادوية مهدئة دموع و انهيارات امام لجان التنسيق انتهاء اسوأ ثانوية عامة عرفتها مصر و الوزير بيطلعلكوا لسانه و بيقولكم الى اللقاء فى العام القادم غرق 500 شاب فى محاولة للهجرة الغير شرعية الى سواحل اليونان يوليو 2009 وفاة 500 شخص فى حوادث على الطرق الساحلية "الدولية" الحوادث يا سبحان الله غير متوقعة بالمرة و اول مرة تحصل قرار وزير الصحة باحالة مديرين و مسئولين مستشفيات مطروح و الساحل
الى النائب العام للاهمال فتوى جديدة من مشيخة الازهر: من لا يحترم قواعد المرور لا يعتبر شهيد احتفال الشعب المصرى بالثورة المجيدة
التى ارست قواعد الديموقراطية و التعددية السياسية
تصريح جديد لوزير الداخلية:
"الاعدام شنقا عقوبة لأى كلب مش شايف انجازات الثورة" غرق 600 شاب فى محاولة للهجرة الغير شرعية الى سواحل اليونان اغسطس 2009 مفيش اخبار جديدة الحكومة بتصيف و النواب فى مارينا غرق 700 شاب فى محاولة للهجرة الغير شرعية الى سواحل اليونان سبتمبر 2009 اصابة 300 مواطن مصرى بشلل نصفى و 400 بالشلل الرعاش و السبب مسلسلات رمضان انتحار اب بسبب مصاريف المدارس و مستلزماتها و ارتفاع اسعار مكسرات رمضان استيراد 1000 طن لحوم سودانية بايظة
لمساعدة المواطنين على مواجهة غلاء المعيشة و فى تصريح لمصدر مسئول رفض ذكر اسمه: " اهم يموتوا بعد اكلة لحمة احسن ما يموتوا جعانين" غرق 800 شاب فى محاولة للهجرة الغير شرعية الى سواحل اليونان اكتوبر 2009 قمة بجامعة الدول العربية
لمناقشة الاوضاع المتدهورة فى العراق و فلسطين البيان الختامى للقمة:اسرائيل دولة مجرمة و وحشة و لازم تتعاقب من المجتمع الدولى القبض على ريان جديد بمحافظة الدقهلية اوهم المواطنين بان الفلوس بتبيض اذا اتدفت كويس و لبست تقيل و استولى على 100 مليون جنيه و هرب و لا يزال البحث مستمرا نوفمبر 2009 قمة جديدة فى جامعة الدول العربية لادانة احداث لبنان الاخيرة البيان الختامى للقمة:فى مشاكل بين المعارضة و الموالاة و ان شاء الله هتتحل بس انتم قولوا يا رب هدية الحكومة للشعب المصرى بمناسبة البرد القارس: زيادة 80% فى اسعار الهدوم اكتشاف شبكة جديدة لبيع الاعضاء و المفاجأة القبض على طبيب بعد محاولته تهريب قلب و رئة و كلية رجل فى الاربعين و تنفرد المصرى اليوم باجراء حوار مع الاب بعد العملية فتوى جديدة: اللى بيموت و هو بيبيع كليته ما يبقاش شهيد غرق 900 شاب فى محاولة للهجرة الغير شرعية الى سواحل اليونان ديسمبر 2009 فوز احمد عز بجايزة النايب المثالى فوز فاروق حسنى بمنصب امين عام اليونيسكو بعد زيارته الالف لاسرائيل و فى تصريح للامين العام للامم المتحدة: "صعب علينا من كتر الزن... فقلنا نعينه" قانون جديد للتأمين الصحى لرعاية غير القادرين: اقتطاع 50 % من مرتبات محدودى الدخل لتحسين مستوى الخدمات الصحية اخر تصريحات جمال مبارك: لا انوى الترشح لمنصب رئاسة الجمهورية و 30% من ميزانية الحزب ستخصص لرعاية حملتى الانتخابية فى 2010 غرق 1000 شاب فى محاولة للهجرة الغير شرعية الى سواحل ايطاليا...بيقولوا بتبقى طراوة فى الشتا فتوى جديدة:اللى بيموت غرقان لا يعتبر شهيد...

الجمعة، 25 يوليو، 2008

و لسه الطفلة جوايا...

كبرت و لازم تتصرف زى الكبار مع انها لسه جواها طفلة بتحارب عشان تطلع تانى عندها حنين لوقت كانت فيه طفلة بدماغ توزن بلد لكن بتتصرف زى الاطفال لأنه محدش متوقع منها حاجة تانية عايزة ترجع للبنت الناضجة اللى عاشت فى جسم طفلة بيفتكروها سرحانة فى قصص الاطفال و عالم خيالى و وهمى فهموها انه واقع و موجود فى الوقت اللى بتراقب فيه الدنيا بعقل بنت كبيرة مستخبى ورا عيون طفلة شافت كل واحد على حقيقته...و من زمان اوى الفرق انها زمان كانت فهمت الدنيا ماشية ازاى لكن ما كانتش مجبرة تتعامل معاها لكن دلوقتى فهمت و لازم تعمل زى الكبار حتى لو ما كانتش شايفة نفسها كبيرة ما بقاش فى ركن تغضب فيه ولا اوضة تحبس نفسها فيها لا عارفة تدبدب على الارض
ولا تستخبى فى حضن مامتها اللى صغر عليها ولا حتى تحضن عروستها لحد ما يجيلها نوم كبرت اوى... كبرت اوى على المحايلة
و ما بقتش تصدق الكلمتين اللى بيتقالوا فى كل المناسبات و شوية كمان و مش هيكون في اللى تترمى فى حضنه و تعيط
ليه الزمن ما وقفش و هى لسه شبر و نص؟
============================ بقالى يومين بدور على عروسة بحبها فى محلات لعب الاطفال خايفة يجيلى تخلف فى الاخر
طفولة متأخرة يمكن...

خواطر مصيفة

لا تنشغل بغير الطريق بتعجبنى اوى اليفط اللى على الطريق الصحراوى اغلبها يا مكسورة يا ناقصة حروف و ارقام الجملة اللى فوق دى شوفتها كتير على الصحراوى عايزة اعرف مين النبيه اللى فكر فيها و بالنسبة للسواق اللى هيقرا اليافطة مش كده "هينشغل بغير الطريق"؟ ده غير اليفط الكوميدية من نوعية اهلك عايزينك و اوعى ترجعلهم مكسور و امشى بالراحة تسلم و فى التأنى السلامة بيفكرونى باعلانات ماما كريمة بتاعت تنظيم الاسرة و اعلانات زمان من نوعية ادى ضهرك للترعة غريبة اوى ان الحوادث بتزيد كل يوم بالرغم من مجهودات الحكومة العظيمة او يمكن يكون ده الهدف من الاساس محدش عارف =================================== لما يبوسها... يبوسها رابع كتاب اقراه و ابتديت اشك ان انا اللى فيا حاجة غلط مين قال ان الرواية عشان تنجح لازم يبقى فيها شوية "مناظر" يعنى الافلام و فهمنا و بيتكتب عليها للكبار فقط لكن القصص و الروايات الجديدة اغلبها لازم يتحشر فيها كام كلمة على كام وصف لحاجات ممكن تتفهم بالاشارة بعتبر نفسي متفتحة جدا لكن لا قادرة افهم ولا عارفة استوعب الفكرة اللى ورا القرف ده بيتهيألى مافيهاش حاجة لما يكتبوا على القصص كمان للكبار فقط على الاقل عشان الاطفال اللى زيي يخلوهم فى سمير و ميكى و رجل المستحيل اه الجملة اللى فوق قالها خالد يوسف فى سؤال على كم المشاهد الجنسية اللى فى افلامه و تبريره ان المشاهد دى هتطلع جيل مش معقد زى الجيل بتاع دلوقتى بحب افلامه اوى و بتعجبنى دماغه جدا بس موتتنى من الضحك الجملة الحقيقة =================================== ان تكون ماريناوى فى شهر اغسطس بشوف ان مارينا فى الشهر ده تحديدا بتبقى كأنها نموذج مصغر لمصر فى يوليو بيبقى فيها" المؤسسين " اللى بقالهم 10 سنين بيصيفواهناك من ايام ما كان السي جل ارقى مكان فيها و فى سبتمبر بيبقى اصغر واحد فيها فى ال60 من عمره فى اغسطس بقى الوضع مختلف تماما كم غريب عجيب من التناقضات ناس قالعة و ناس لابسة ناس سكرانة و ناس بتصلى ناس عايشة فى ركن بعيد هادى و ناس مش قادرة تبعد عن الدوشة يوم واحد ناس محدثة تصييف و متخيلين الصيف رقص و قلع و سهر و شرب و بنات و ناس طبيعية بتعمل كل حاجة فى وقتها و مع ذلك مش متخيلة الصيف من غير ما اروح هناك =================================== احمد عز مقدرش اعدى البوست ده من غير ما اجيب سيرته اول يوم فى الصيف و اول جرنال اقراه كان وش جنابه منور صفحته الاولى كان خبر عن ارباحه فى اخر كام شهر نفسي اعرف لو مات بكرة هيقالبه بانهى وش بتاع العاشرة مساء ولا بتاع الحزب الوطنى و المجلس كان نفسي اقابله هناك يمكن يكون عنده ابن ولا حاجة اللهم لا حسد =================================== الصيف و بلاويه و اللى بيجرى فيه سمعت كم من الاغانى الراقية اللى كلامها مبتكر لدرجة انى مش فاهماه دول ارقى ما سمعت: "انا مش عارفنى" للقدير عبد الباسط حمودة اغنية فلسفية عميقة الحقيقة اتعلمت منها كتير و اللى عاجبنى انه و هو بيقول الهبل ده متأثر جدا و واخد الموضوع جد جدا كأنه بيغنى مضناك مثلا "اسكتى" و" قسمة و نصيب" لتيمو بيه ملك الجيل يا انا اللى نيتى وحشة و مخى بيروح لبعيد يا اما السفالة وصلت لدرجة ان مخى مش عارف يستوعبها بس الحق يتقال الراجل محترم يعنى لو كل شريطين من النوعية دى يعمل اغنية زى انا مش عارف اتغير يبقى لا بأس و يجوز و حلال حلال حلال...يموت نفسه يعنى؟ كان ناقصنى جدا شريط لعمرو دياب الصيف من غيره ناقصه حاجات كتير =================================== اخبار نقطتنى اعدام السادات زعلانين اوى ان الفيلم اللى بيهاجم السادات ايرانى طيب و بالنسبة لولاد بلده اللى لسه بيسموه خاين و عميل بالرغم من انه عمل اللى غيره بقاله سنين بيحاول يوصل لربعه و على الاقل ايران لها موقف واضح و صريح من اسرائيل و طبيعى جدا انها ترفض اى محاولة تفاوض فبديهى انها ترفض التطبيع انما غيرها محدش فاهمله معاهم ولا عليهم السادات كان ولا يزال اعظم من حكم مصر الله يرحمه صفقة تبادل الاسرى بين اسرائيل و حزب الله: 5 مقاتلين لبنانيين رفاة 8 من مقاتلى حزب الله رفاة 200 من المتسللين العرب مقابل الاسيرين الاسرائيليين!!! مش عارفة ايه اللى فكرنى بتصريح لواحد من بتوع الامن قال ان من انجازات عصر مبارك ان عدد اللى عايشين فى العشوائيات 7 مليون بالكتير و بعيدا عن صحة الرقم من عدمها عرفت قد ايه البنى ادم عندنا غالى و روحه ليها قيمة قانون تنظيم البث الفضائى ده قانون جديد للرقابة على اجهزة الاعلام بما فيها الانترنت لما يجتمع التخلف مع الهطل تبقى النتيجة قانون من النوعية دى قانون هيعد على الناس نفسهم و نهاره اسود اللى يكتب كلمتين فى السياسة ولا فى اى حاجة غير جمال بشرتك سيدتى
و كيف تحصلين على تان فى الصيف و دليلك لربط جوزك جنبك
فى ظل اكتساح هيفاء و روبى للفضائيات و لتليفون جوزك و صباح الديموقراطية نور و مهند و الصلاة!!! اخر فتوى قريتها لشيخ سعودى و ايدوها شيوخ مصريين اى هدوم عليها صور لابطال مسلسل نور تبطل الصلاة و تطرقت الفتوى للصور و مدى حرمانيتها الغريب انى قريت الخبر ده بعد يوم واحد من خبر تانى
منشور فى نفس الجرنال عن بريطانية اسلمت و دخلت ضمن وفد لتحسين صورة الاسلام فى الغرب مش عارفة ايه اللى فكرنى بالاعلان بتاع"طلع بالشيفروليه و احنا قاعدين" الرشوة عندهم pocket moneyعندنا كام شهر فاتوا على اللى سموه "فضيحة" اولمرت الراجل متهم بانه خد رشوة وقت انتخابه و ده حصل فى انتخابات قبل انتخابات حزب الليكود المهم ان المبلغ اللى اتهموه فيه عبارة عن 100 الف دولار و ده كان كافى عشان يسموه الفاسد الاكبر فى اسرائيل ييجوا يتفرجوا على اللى عندنا و ادراجهم مفتوحة على البحرى ولا اللى بيبيعوا الاراضى و الشوارع و بحر الغردقة و اللى بيخصخصوا البنوك و الشركات و النيل و الاهرامات عندنا كل حاجة بتتباع حتى الاصوات و الكلاوى بيتهيألى واجب علينا نصدرلهم شوية من الناس دى و بالمرة ينوبهم ثواب لما يعلموا اسرائيل الشقيقة قواعد الرشوة على اصولها يمكن يقدروا يوصلوا للهنا اللى احنا فيه و تبقى الرشوة عندهم حوافز و اوفر تايم و ساعتها اولمرت هيبقى بطل قومى و اللى عمله هيندرج تحت بند جمع التبرعات اسرائيل تستعد لتوجيه ضربة عسكرية لايران بموافقة من امريكا مش الخبر فى حد ذاته اللى نقطتنى ولا توقيت الخبر اللى اتنشر بعد يوم واحد من تصريح البرادعى باستكمال المفاوضات السلمية مع ايران ببساطة لانه شيء مفروغ منه اللى نقطتنى ان توقعاتى طلعت غلط كنت متخيلة ان سوريا هى اللى هتكون خليفة العراق الثانوية العامة مطابقة للمواصفات ده اخر تصريح قريته للجمل مش عارفة انهى مواصفات دى اللى تخلى واحد ينتحر و واحدة ترمى نفسها من الشباك المهم ان اللى يهمونى عدوا منها و هم لسه بعقلهم فاضلنا واحدة...هانت اسرائيل...المعجزة فى تصريح لاوباما قال ان دولة اسرائيل معجزة صمدت 60 سنة مش ده اللى فارسنى فى نفس الصفحة على الشمال خبر عن القبض على 8 مصريين حاولوا يهربوا لاسرائيل اللى يقرا الخبر ده ماينفش يجرؤ ينتقد الخبر الاولانى ولا صاحبه العيب مش على اوباما ده اكيد صحتك فى الشنطة دى بغض النظر عن بنود قانون المرور الجديد كله كوم و شنطة الاسعافات الاولية دى كوم تانى خالص المفروض دلوقتى ان كل عربية يكون فيها شنطة بمواصفات معينة
اتحددت فى القانون الشنطة حديد و فيها 3 اربطة شاش بعرض 10 سم 3 رباط ضاغط عرض 10 سم برضه 5 باكت شاش معقم و لو 6 ماينفعش مقص صغير و ما قالوش كام سم ازازة بيتادين 5 جوانتيات طبية مش عارفة مين اللى لسه هيلبسهم و عربيته بتتحرق و 2 رباط مثلث و لو مستطيل او بيضاوى يبقى فيها حبس ملاية حروق 2 اكياس تلج منشط عن طريق الفرك لسه هنفرك و احنا بنولع بطارية اضاءة حجم متوسط و دى بقى النكتة الكبيرة: كتيب عن الاسعافات الاولية والله لو اسماعيل ياسين بذات نفسه اللى حط القانون ده ما كان هيضحكنى كده صدق اللى قال اصحاب العقول فى راحة =================================== قالوا... “A soldier wears his uniform with pride, and makes himself visible to his enemy, because he has courage. A spy dresses as a woman, because he’s a coward” دى جملة فى كتاب لباولو كويلو بعيدا عن اى نظرة عاطفية للمرأة عندى سؤال بيلح عليا مين اللى جابهم و مين هيجيب ولادهم؟ علم اللوع اضخم كتـــــــــاب في الأرض
بس اللي يغلط فيه يجيبه الارض
أما الصراحة فأمرها ساهل
لكن لا تجلب المال و لا تصون العرض
عجبي!!! صلاح جاهين =================================== حسن و مرقص فيلم اكتر من رائع خلاصته ان الله مكانه فى القلوب المسلم دخل الكنيسة و المسيحى دخل الجامع و الاتنين لقوه يا ريت الجهلة و الاغبياء اللى بيدوهم اسم شيك و بيقولوا عليهم "متطرفين" يشوفوه يمكن يخفوا =================================== Priorities in life الناس بتستغربنى لما اقول ان فى حدود لازم تتحط مع اى و كل بنى ادم فى حياتى مهما كان قريب و كل يوم بتأكد ان نظريتى صح ما ينفعش تحط ناس فى اولوياتك و انت مش فى اولوياتهم او و انت فى اولوياتهم
لما ما يبقاش عندهم حد تانى يعتبروه ضمن اولوياتهم اولوياتى اتغيرت الاهل اهم حاجة فى الدنيا مفيش حد زيهم مهما كان قريب و بعدهم الشغل مهم اوى ان الواحد يكون عنده حياة بعيدة عن القرايب و الاهم انه يقدر يكون مستقل ماديا لو اتطلب منه ده و بعدهم تيجى اى حاجة تانية فى الدنيا حتى الصحاب =================================== Beauty and the beast ده اكتر فيلم بحبه فى افلام ديزنى بتبهرنى التفاصيل اللى فيه و بحب اغنيته جدا مع ان القصة تعتبر ضحك على الدقون زى ما بيقولوا وحش ايه ده اللى هيتحول لبنى ادم لما يعرف الحب؟ اللى فى القلب فى القلب و مفيش حد بيتغير عشان حد الفيلم ده لو اتعمل دلوقتى اكيد جميلة كانت هتقتل الوحش و تاخد فلوسه و تتجوز الراجل السخيف ده اللى كان بيحبها فى اول الفيلم و مع ذلك بحب اتفرج على افلام ديزنى اوى ساعة ولا ساعة و نص فى عالم خيالى بعيد تماما عن النفاق و اللف و الدوران و الكذب مهم اوى للصحة النفسية بس المهم ان الواحد ما ينساش نفسه و يفضل فى دماغه انه هيرجع تانى لكل السخافات دى يا ريت فى مكان تانى يتراح ما كنتش اتأخرت =================================== option مش نازل فى الصيف الخصوصية لما اتكلم عنها فى الصيف يبقى كأنى بتكلم عن كائن فضائى بالظبط محدش بيعترف بيها نهائى و اغلب الناس مناخيرهم بتطول
و بيقرروا يتحشروا فى حاجات ما تخصهمش بيبقى قدامى حل من اتنين احبس نفسي فى الحمام
بما انه المكان الوحيد اللى بيبقى فيه نوع من الخصوصية يا اما الف زى المجنونة فى الشوارع بالعربية اخترت الحل التانى =================================== مش قادرة ابطل فلسفة اول مرة اخد بالى انى سخيفة للدرجة دى بقيت بفكر زيادة عن اللزوم دماغى مش عايزة تاخد اجازة و مع ان الفلسفة و المتلفلسفين و اى حاجة متعلقة بيهم بيجبولى حساسية الا انى مش عارفة ابطل اقول ارائى العظيمة فى كل و اى حاجة قدامى مشوفتش اسخف منى بجد =================================== خالد سليم لسه راجعة من حفلته فى بورتو مارينا و بمقارنة صغننة بينه و بين اللى واقفين يتفرجوا عليه اللى ببنطلونات واقعة و شعر واقف و بيمشوا زى البنات تأكدت و اكاد اجزم كمان ...انهم ماتوا فى 73 و مش بتكلم عن الشكل لأنى موصلتش للمرحلة دى من التفاهة بتكلم عن حاجات كتير ما بقتش موجودة فى الراجل و مفيش مجال لذكرها هنا لانى فى اجازة و مش عايزة احرق دمى =================================== البنات و الصيف اكتشفت اكتشاف مذهل لسه فى بنات هبلة فى الدنيا و فى الصيف الهبل بيزيد عن حده لدرجة مملة حد عمل عملة سودة و فهمهم انهم لازم يحبوا فى الصيف و اللى ما حبتش عايزة صاحبتها تحب و يستمر مسلسل طويل من التخلف الازلى تعارفات و خروجات و تليفونات و استهبال رسمى غالبا المعقدين اللى زيي بيبقى دمهم تقيل فى الصيف كمان =================================== بقيت ام! احساس الامومة اللى راكبنى بقاله فترة لقيت اللى اطلعه عليه بس الغريب انه طلع على واحدة صاحبتى و الاغرب انها اكبر منى حاجة مستفزة ان الواحد ما يعرفش يفكر لنفسه و لا يعرف يقرر الا لما يلجأ لحد تانى حتى لو كان اللى بيمشيله حياته ده اصغر منه مش احساس ممتع بالمرة انى الاقى نفسى مربوطة بحد بالعافية و حاجة غريبة اوى انى الاقى حد متقمص شخصيتى و بيتعامل كأنه هو كان كده من الاول و لاول مرة الاقينى مش عارفة اتكلم لان الكلام فى الحالة دى هيخسرنى صديقة بحبها مش دى الامومة اللى كنت عايزاها نهائى =================================== تحت الميكروسكوب بيقولوا ان الرجالة بينفسنوا مع بعض فى الشغل غالبا الستات بينفسنوا اكتر بكتير مهما كانوا صحاب ده مش بيفرق فى حاجة فى حاجات كتير فى الدنيا بتبقى عاملة زى الميكروسكوب بتبين الواحد على حقيقته الشغل من ضمنهم و الفلوس كمان بتبين اوى اللى جوه الناس و بتفرق بين اللى فعلا عينه مليانة و اللى عامل نفسه كده بس عشان معندوش و اول ما ربنا بيكرمه بيتقلب لشخصية محدثة رسمى لو طالت تعبد الفلوس هتعمل كده اتعلمت ان كل واحد فى حياتى لازم يبقاله حجم معين حسب اهميته فيها ما كنتش اتمنى ابدا انى اتعلم ده بس اللى حصل =================================== فيروز مش عارفة من غيرها كنت هعمل ايه تقريبا بسمعها طول اليوم صوتها بيدخل قلبى من غير لف ولا دوران و اغانيها بتقول كتير اوى بتحسسنى بحاجات كتير عارفة انها مش موجودة فى الدنيا بس بحتاج اسمعها من وقت للتانى الدنيا من غير احساس تبقى غابة و الاحساس هو فيروز =================================== علامة...تانى بما انى بقيت مهووسة شوية بموضوع العلامات ده حصلت حاجة فكرتنى بواحد اعرفه حسيت انى ممكن اكون ظلمته و بما اى مش هعرف اوصله احساسى ده قلت اكلم نفسي هنا لتالت او رابع مرة بشوف ناس شبهه حواليا يمكن اكون اتصرفت بقسوة مع حد كان عنده احساس برئ ناحيتى و حاول على قد ما مخه ساعده انه يوصلى احساسه ده و يمكن لو كنت خدت الموضوع ببساطة
كانت حاجات كتير هتتغير فى حياتى لكن الاكيد انى لا بتقل ولا ليا فى دلع البنات من اصله انا فعلا مش قادرة دلوقتى =================================== ليبراليون...و لكن!! بستغرب اوى الناس اللى بيسموا نفسهم ليبراليين بيدعوا لحرية الرأى و التعبير و فى نفس الوقت بينتقدوا الحجاب و النقاب و اللى لابسينهم مش اللبس ده بيندرج تحت الحرية الشخصية برضه؟ و بالرغم من انى مش محجبة
الا انى فعلا استفزيت من طريقة تفكيرهم كان المفروض يسموا نفسهم ليبراليين طول ما انت معانا على الخط على غرار ديموقراطية عم بوش يعنى فعلا لحد دلوقتى مش فاهمة ايه اللى مزعلهم فى الحجاب يا ريت اللى يفهم يبقى يقولى =================================== القلة المندسة! قسمونا لمسلمين و اقباط المسلمين سنة و شيعة المسيحيين بروتستانت و ارثودوكس و كاتوليك و بعدين لقوا التقسيمة ناقصها حاجة فقالوا نغير بقى في دلوقتى طبقة كادحة و طبقة حرامية كل من كان فقير و مش لاقى ياكل يبقى شريف حتى لو كان درج مكتبه مفتوح" للتبرعات" و كل غنى حرامى و نصاب و سارق فلوس البلد و اموال اليتامى قلة مندسة طالعة بتاكل نازلة بتاكل و مع انى لحد دلوقتى مش عارفة تعريف للغنى ما هو اللى راكب 128 غنى بمقاييس واحد عايش فى العشوائيات يبقى نعتبره حرامى برضه؟ طيب ممكن يكون سرق ايه مثلا تليفزيون ملون و سماعة بلوتوث؟ مش شايفة اى ارتباط شرطى بين الغنى و قلة الضمير كام واحد طلع من افقر احياء مصر و نسى اصله و كام واحد ربنا كرمه و اداله اللى يكفيه فحس باللى مش لاقى يأكل عيلته و اللى مش عارف يعلم بنته واللى معندوش اللى يعالج بيه مراته فى مستشفيات الحكومة و اللى بيعانوا من قلة المية و احنا فى الالفية التالتة و عندنا حكومة اليكترونية و اللى نايمين فى بلكونات القصر العينى مستنيين دكتور يحن عليهم و اللى ماتوا و هيموتوا فى طوابير العيش و اللى فضلوا الغرق على بلد غرقتهم 100 مرة فى اليوم و اللى سمعوا عن الريان و توابعه و برضه ضيعوا تحويشة العمر
لأنهم كده كده مش لاقيين واللى ماتوا تحت عربية البيه الصغير ابن البيه الظابط
و طبعا حقهم راح و اللى باعت جسمها عشان تاكل و اللى باع كليته لثرى عربى و اللى ...و اللى...و اللى... و مش بس حس بيهم ساعدهم على قد ما ربنا قدره مش لازم الواحد يكون اعمى عشان يعرف ان البصر نعمة و مش لازم يكون فقير عشان يحس بعجز اب مش عارف يضمن لولاده ان سقف بيته مش هيتهد عليهم بكرة بس نعمل ايه؟ بنموت فى التقسيمات احنا =================================== اسكندرية ليه؟ سؤال بيلح عليا من ساعة ما اتولدت اسكندرية ما ينفعش ابدا تكون مصيف فى الشتا تجنن و كفاية شكل الكورنيش بالليل و كوبرى ستانلى لكن فى الصيف بتبقى كارثة بجد الاسكندرانية مش طايقينا ولا احنا طايقين البلد
اللى عدد الناس فيها اكتر من رمل البحر و بالرغم من كده المقرر السنوى بتاعنا بيقول اننا لازم نروح ليه؟ يسأل فى ذلك بابا =================================== خمسة ثقافة دى احسن كتب قريتها: The fifth mountain Paulo Coelho انبياء الله لاحمد بهجت و بالحق نزل و السرد القصصى فى القران الكريم لثروت اباظة تغريدة البجعة لمكاوى سعيد مصر المفروسة لمحمود عطية =================================== عشان نبطل ننسى لبنانى عاش فى مصر فترة طويلة جدا مستحيل اللى يشوفه يقول عليه اى حاجة غير انه مصرى انسان راقى و مثقف و محترم و حبه لبلده مالوش حدود حافظ المنتجات الاسرائيلية و الامريكية صم و يا ويله اللى يستخدم حاجة منهم قدامه كان بنى ادم جميل...الله يرحمه لتانى مرة بكرر نفس الغلطة يا ريت اللى يقرا البوست ده يفتكر الناس اللى يهموه و اللى بقاله فترة كبيرة ما شافهمش او ما سألش عليهم اسألوا عليهم عشان محدش عارف امتى اخر مرة هنشوفهم و يا ريت اللى يقدر يقرا الفاتحة يقراله =================================== حكومة العين الحمرا بعد سلسة طويلة من اعلانات مصلحة الضرايب و تأكد الحكومة من ان المواطنين فضلوا ان يتفوتروا على ان يتظبطوا اتحفونا بسلسة جديدة من الاعلانات عن قانون المرور الجديد و"اللى كان مخالفة بقى فيه حبس و اتباع القانون الجديد ما بقاش اختيار" بحبكوا و انتم مربينا كده =================================== The know it all's الناس دى بتجننى بجد و حياتى اتملت بيهم مؤخرا بشكل ملحوظ نفسي يفهموا ان كلمة مش عارف بتبقى مطلوبة احيانا لا هى عيب ولا هى حرام زى كلمة حاضر بتريح =================================== اسف على الازعاج الفيلم ده خوفنى بجد و مش مهم اقول ليه =================================== خدت البكالوريوس الحقيقة انا مش عارفة اللى بيتخرج من الكلية دى المفروض يشتغل ايه و لسه مكتشفة الموضوع ده من كام شهر بس اهى ورقة جديدة نزوق بيها الحيطة و المهم انى دلوقتى انضميت رسميا لصفوف العاطلين العريضة =================================== رأيت الله ده اسم كتاب لدكتور مصطفى محمود اللى فكرنى بيه الحالة اللى انا عايشاها بقالى فترة الايمان عرفته من زمان و عمرى ما كنت محتاجة ادلة ولا براهين يمكن كان عندى اسئلة زي كل الناس منها اللى لقيتله اجابات و منها اللى ما بقتش مهتمة ادورله على اجابة لأنى حسيت ان فى حاجة كبرت اوى جوايا و خليتى مش محتاجة اعرف اكتر اكتفيت باللى عرفته لانه خلانى وصلت للحالة اللى انا فيها دى مش عارفة اوصفها بالكلام بس حاسة كأن رمضان جه بدرى السنة دى الحمد لله ===================================

الأربعاء، 2 يوليو، 2008

كلمتين

كل يوم اسأل نفسى انا بعمل ايه هنا؟ ايه اللى مخلينى سايبة حياتى و قاعدة بالساعتين و التلاتة قدام اللاب توب شوية بكتب كلام ما يهمش حد غيرى و شوية برد على مواضيع ناس معرفهاش ولا يعرفونى... اخر حاجة كنت اتخيلها ان ناس لا عمرى شوفتهم ولا عمرهم شافونى يفرقوا معايا للدرجة دى دلوقتى بقى فى حياتى نوعين من الناس ناس يعرفونى بس ميعرفونيش و ناس ميعرفونيش بس عارفينى يمكن اكتر من الناس اللى يعرفونى انا فعلا مش عارفة انا بعمل ايه هنا ولا عارفة انا بكتب البوست ده ليه دلوقتى بس عارفة انى بجد مبسوطة انى عرفت ناس زيكوا كلكوا بلا استثناء اتعلمت منكم كتير و خليتوا ال6 شهور اللى فاتوا دول مختلفين جدا بالنسبالى

سواء اللى عرفتهم شخصيا او اللى عجبتنى مواضيعهم و لمستنى بجد اثرتوا فيا فوق ما تتخيلوا و مش محتاجة اقول اسامى انتوا اكيد عارفين نفسكوا بجد بشكركم من قلبى هصيف و اجيلكوا تانى ابقوا افتكرونى لما تسمعوا او تقروا عن احمد عز:) و بجد هتوحشونى الشهرين دول ======================== بره الموضوع كل ما بمسح الinbox باجى عند رسالتين و مش بقدر اقرب منهم صحابهم اكيد عارفينهم بس مش عارفين هم عملوا فيا ايه ولا اثروا فيا ازاى و لو شكرتهم من هنا للسنة الجاية مش كفاية ربنا يحميكوا و يديكوا على قد قلوبكم النضيفة دى انتوا الاتنين تستاهلوا كل خير كفاية انكم اكتر ناس خضتنى فى الدنيا و قضيتوا على شوية الصحة اللى كانوا فاضلين فيا و ابتديت اشك انها مقصودة :) هتوحشونى والله

مش عايزة ابقى مثقفة...خالص يعنى

بقالى شهر تقريبا بقرا فى الشيء ده قريت اكتر من 400 صفحة و مش فاهمة هو عايز يقول ايه و مش عارفة ايه اللى مصبرنى عليه لحد دلوقتى ولا فاهمة ايه اللى فى الكتاب عشان كاتبه ياخد جايزة نوبل فى الادب بس اللى اكتشفته ان كل من حب يبان مثقف قدام الناس يقول انه قرا كتاب من النوعية دى او شاف فيلم من افلام يوسف شاهين و غالبا كل ما بتبقى الحاجة مش مفهومة اكتر كل ما يفرحوا بنفسهم اكتر لو الثقافة ان الواحد يقراله كتابين مش مفهومين و يستنبط الافكار اللى كانت فى اللاوعى الانسانى
الاستقرائى الاستنباطى للمؤلف الى اخر الكلام المكلكع بتاع المثقفين فانا مش عايزة ابقى مثقفة خالص ماله ميكى؟