الثلاثاء، 29 يوليو، 2008

خواطر مصيفة...(2)

زمن الوكسة الكبيرة ما زلت عند رأيي.. الرجولة انتهت و الرجالة اندثروا و المحترمين اللى فيهم بيتجوزوا ستات مفترية اكيد فى منطق ورا الموضوع ده...لسه ما اكتشفتوش
================
كنت ناوية اسيبه كده و بعدين قررت ابقى حقانية
الانوثة كمان بقت مشوهة
و على رأى عادل امام
احنا فى زمن المسخ طفولتى المشردة زمان ما كنتش بقرا غير رجل المستحيل و المغامرون الخمسة كبرت شوية و بقى في اختراع من اسخف ما يمكن اسمه فلاش استحالة يكون فى تقل دم اكتر من كده المهم انى عرفت ليه كل اللى كتبته فى الفترة دى من حياتى كان مضحك كده واحدة مستمدة ثقافتها من المواطن المطحون و ميدو و سوزى و خليل البخيل و عدلات هتطلع ايه مثلا؟ انيس منصور؟ البنزين و الاسعار و نظيف و حكومة التلت ورقات اخر تصريحات نظيف: لا نية لرفع سعر البنزين 80 مش لما نلاقيه الاول حضرتك بيضحكوا علينا ولا عليهم ولا على مين مش فاهمة اكتر حاجة بتعجبنى فى الحكومة دى انها بتخلى الواحد يدور على شتايم جديدة يقولها فى سره اصل القدام ما بقوش معبرين كفاية وزير التعليم العالى يعترض على تأجيل الدراسة لبعد رمضان خوفا على "صورة الاسلام" خايف يقولوا علينا ما بنشتغلش فى رمضان قال يعنى الشغل واخد حده اوى معانا بقيت السنة و قال يعنى ده بس اللى هيدى صورة سيئة عننا اسكت يا لسانى.. محمد منير ما كنتش بسمعه و كنت بتريق على اللى بيسمعوه بعد ما سمعت اخر شريط اكتشفت انى كان فايتنى كتير احسن شريط فى الصيف بلا منازع ما يمنعش انه لازم يستحمى اقلع...توصل بقالى كام يوم بتفرج على البنات هنا لاحظت ان فى خلط غريب بين التى شيرت و الفستان نفسي حد يشرحلهم ان التى شيرتات بيتلبس تحتها بنطلونات اصله عيب شوية لما يمشوا كده و كلهم فى مارينا 4 مش عارفة اشمعنى فهموهم ان القلع ده اول الطريق طريق ايه؟ الله اعلم اعلانات للكبار فقط ما بقتش الافلام و الروايات بس انضمت الاعلانات لصف طويل عريض من القباحة المتواصلة الغريب ان اللى بيشرحولى الاعلانات دى عندهم 13 او 14 سنة ميلودى افلام متفوقة بشدة فى النوعية دى من الاعلانات
3 حاجات لازم تباد من الدنيا الريجيم الرياضة البطيخ
everything happens for a reason
فى حاجات غلط بتيجى فى الوقت الصح و من احتياجنا ليها بنصدقها مع اننا لو فكرنا فيها هنلاقى ان مش ده اللى محتاجينه و انه فرحتنا الوهمية بيها هتروح مع اول اصطدام بالواقع شوية احساس كفاية اوى عشان يوضحوا الاتجاه... و فى حاجات صح بتيجى فى الوقت الغلط و دى بتبقى مؤلمة اكتر بكتير اى حد بيمشى ورا احساسه هيعرف انها صح لكن مفيش حاجة واحدة حواليه هتساعده انه يتمسك بيها او يمكن لأنه من جواه بقى فاضى و مش قادر يتمسك بحاجة تطلع فى الاخر وهم او لأنه بقى اجبن من انه يجرب حاجة جديدة حتى لو كان من جواه عارف انها هتغير حاجات كتير فى حياته بس الاكيد ان المقولة اللى فوق دى صح جدا حتى لو معرفناش السبب دلوقتى تولع السودان اه تولع احنا مالنا هيبعتوا سفراءنا تانى هناك و لما واحد منهم يموت الشجب و الادانة جاهزين فى درج الوزير اليمين مش قادرين تحموهم ما تبعتوهمش الموضوع بسيط يعنى يوسف شاهين ما بحبش من افلامه غير هى فوضى و الاخر و اسكندرية نيويورك و مع ذلك هتوحشنى افلامه الله يرحمه العبد و الشيطان دى اغنية بقالها فترة مش كبيرة ده ان جاز انه يتقال عليها اغنية و نظرا لكم الاقبال غير العادى عليها سمعتها و ما عنديش غير تعليق واحد يا لهوى من فلسفاتى.. "مش مهم مين خد الخطوة..المهم انها اتاخدت" قالولى الجملة دى كتير مش مقتنعة بيها نهائى تفرق اوى اذا انا اللى اخدتها ولا اتفرضت عليا كل الناس بتشتم فى المنافقين كل الناس بتشتم الكذابين كل الناس بتشتم المدعين امال مين اللى بيتشتم؟ مجتمع بير السلم كان فى جملة فى فيلم حب البنات معلقة معايا اوى "مش مهم بنعمل ايه المهم ما حدش يشوف" جملة معبرة اوى عن الحالة اللى وصلنالها للدرجة دى رأى الناس بيهمنا مش مهم نسرق نزنى ندمن ننم نغتاب نحقد ننافق نحور و نلون الكلام نولع فى بعض حتى كل ده مش مهم المهم نفضل فى نظر الناس محترمين مش مهم الحاج احمد عبد الجواد بيعمل ايه فى بيت الرقاصة المهم انه فى بيته راجل ملو هدومه راعب عياله و مراته فاكرينه ذكاء يا تنتن يا تنتن ملاحظة ان عدد الواعظين زاد اوى و كلهم محتكرين الحقيقة انا اعرف ان اللى عنده حاجة حلوة يقولها مرة او مرتين بالكتير لكن لما يصر على الوعظ و الارشاد بالعافية الموضوع بيقلب على سخافة و معتقدش انه غلط اوى لما الواحد لسانه يطول شوية معاهم خصوصا لو بيكلموه من منطلق انه جاهل و كافر و انهم هم بس اللى بيفهموا فى الدين و بيدوك اختيارين يا تعمل زيهم يا اما مصيرك النار و بئس المصير ايه مؤهلاتهم؟ محدش عارف حار جاف صيفا ...دفئ ممطر شتاء الجملة دى هرونا بيها فى المدرسة هى و "النشاط الزراعى اساس الدخل القومى المصرى" "اراضى الدلتا خصبة و النيل فيه مية كتير" و مع ذلك هنزرع قمح فى اوغندا مش عارفة انا استغبيت ولا هم اللى بيهرجوا مش عاجباكم...سيبوها مدون لا هقول اسمه ولا اسم مدونته ما بيعملش حاجة غير انه يشتم فى المحجبات و المنقبات و فى مدونة تانية ليه بيشتم فى مصر حاطط كم غير عادى من الصور من نوعية يبقى انت اكيد فى مصر تاعب نفسه و مضيع وقته فى الهبل ده ليه ؟ شنط السفر مش بتاخد اكتر من نص ساعة توضيب مش اسهل برضه؟ اغبياء فى حياتى فى شوية ناس فى الدنيا مالهمش لازمة بجد اللى يشوفك بتقرا و يصر اصرار عجيب مريب انه يكلمك سواء كنت بتقرا مجلة ميكى او حتى المصحف اللى بيدخل سينيما عشان يتكلم فى التليفون و تلاقى مكالمة طويلة عريضة بيذكر فيها بشكل عابر انه فى السينيما و الغريب انه بيكمل كلامه و الاغرب ان اللى بيكلمه بيكمل المكالمة عادى جدا اللى عنده قدرة غريبة انه يتكلم فى موضوع اتفه من التفاهة و يكبره و يدخل فى تفاصيله كأنه بيتكلم عن الذرة و عادة بتبقى مواضيع بتدل على تفاهتها و تفاهتهم على رأى زكى رستم و اللى بتوقف شارع كامل عشان تتكلم فى الموبايل و هى سايقة او عشان تركن فى مكان يقضى 9 عربيات طول عمرى اقول الستات مالهمش سواقة.. اللى تفهمه مرة و اتنين و تلاتة ان الحاجة دى بتدايقك و يصر انه يعملها على اساس انك مش هتاخد بالك مثلا الغريب انهم هم اللى بيزعلوا و الاغرب انهم بيفتكروا ان كلمة اسف ولا اسفة دى كفاية و بيزعلوا اوى لما تلغيهم من حياتك تماما مع انهم يستاهلوا اكتر من كده نفسي الناس تتعامل زى ما يحبوا يتعاملوا حاجات ما بتتنسيش سؤال مش لقياله اجابة ليه لما نحب ننسى حاجة بتفضل اكتر حاجة فاكرينها مهما حاولنا و ازاى ممكن الواحد تبقى حياته ماشية عادى جدا و فجأة تحصل حاجة تقلبها تماما و عمرها ما بترجع زى الاول.. انا "حرمة" و انت "احترم" نفسك بيقولوا على الست فى الارياف "حرمة" و الحقيقة الاسم ده كان بيدايقنى جدا لحد وقت قريب ما كنتش فاهمة ايه الغرض منه يعنى هل هو تشييء الست (يعنى تحويلها لشيء) ولا هو حلقة من حلقات سلسلة طويلة من تحقير الست فى مجتمعنا مرة بقصر شرف الراجل عليها و مرة باعتبارها عار على اهلها كلامها كله لازم يتقاس بمسطرة و تصرفاتها كلها محسوبة عليها فاكتشفت ان الكلمة ممكن تكون مشتقة من الحرمانية مثلا يعنى ان الست تكون حاجة مقدسة لازم يتحافظ عليها طيب حاجة جميلة والله بس فى كام نقطة كده جم على بالى يعنى لما انا يتقال عليا" حرمة " و يبقى كل هم ابويا و اخويا انهم يحلقوا عليا ولا كأنى فرخة هربانة اقل واجب يعنى انهم "يحترموا" نفسهم الاول ما هو مش منطقى انهم يلفوا ورايا عشان "يحمونى" و فى نفس ذات الوقت يلفوا ورا بنات الناس عشان يتفرجوا عليهم ولا طبيعى انهم يربونى و هم اساسا ما اتربوش عايزينا حريم... احترموا نفسكوا تجدوا ما يسركوا Blondes should not be taken seriously مقولة غبية من شخص اغبى عن الخرس و اهله فى كلام لازم يتقال لناس معينة فى حياتى حقهم يسمعوه و واجبى انى اقوله لا عارفة اقوله ولا هعرف اسف على الازعاج ...كلاكيت تانى مرة
لتانى مرة بدخل الفيلم و بحس بنفس الاحساس
الحمد لله انى ما بعرفش اعيط قدام الناس.. صدق او لا تصدق - مش ممدوح اسماعيل اخد براءة؟ - مين محمود اسماعيل ده؟ ليلتنا فل..

هناك 11 تعليقًا:

mUsLiM يقول...

خيـــر ان شاء الله (( ابتسامه))

حاولى تقللى الموضوع شويه علشان نعرف نتناقش

مش كده (( ابتسامه ))

بس أجمل شئ لفتنى فى اللى بتكتبيه , ان انتى المفروض مصيفه ..

وده بيثبت ان مش معنى الانسان مصيف انه ينعزل عن الدنيا وما فيها وميبقاش فاضى غير للتفاهه وقلة الأدب

بالعكس ..

انا أفضل فترات الكتابه بالنسبه ليا هو انى ابقى قدام منظر جميــل , أو جوايا مشاعر معينه بعبر عنها

ربنا يكرمك يا اختى

وجزاكم الله خيرا

السلام عليكم

Founoon يقول...

تعااالي بقىىىىىىىىىىى :(

محمد منير خسارة انك ما سعتهوش من زمان

جيبي كل اغانيه القديمة واسمعيها هيجيلك ذهول وهتستغربي اكتر وهتضايقي انك ما كتشفتهوش من بدري

نفس الكلام بالنسبة لشاهين

الافلام اللي ذكرتيها اقل من افلام كتير هو عملها

شوفي العصفور والارض والاختيار وحدوته مصرية وشوية حاجات تانية

عظيم شاهين

كل العظماء بيمشوا من عالمنا المنيل

- بالنسبة للرجولة لا تعليق الا فيما ندر ونفس الكلام بالنسبة للانوثة

الانوثة بقت مرادف للقلع ..مش عارفه مين فهمهم الكلام دا

كل حتة موضوع لوحده انا مش عارفه اعلق على ايه ولا ايه

وحشتيني

mUsLiM يقول...
أزال المؤلف هذا التعليق.
mUsLiM يقول...

لا مش عظيم شاهين

banouta masreya يقول...

مصعب
انا اللى هقول خير ان شاء الله المرة دى :)
اول مرة اشوفك كاتب بالعامية ايه اللى حصل؟
و بعدين ما ينفعش تقارن بيننا نهائى
انت شاعر موهوب بجد لو شفت منظر حلو ممكن تكتب عنه قصيدة...انا لو فضلت شهرين قدام البحر مش هشوف غير اللى قدامى لا هعرف اعبر ولا هعرف اكتب بالعمق اللى بتكتب بيه

انا مصيفة على قدى بقرا جرايد فبتنكد و اجى ارغى مع نفسى هنا
انت فنان بجد...فالمقارنة مش فى صالحى خالص :)

بالنسبة ليوسف شاهين انا مش بشوفه عبقرى هو مختلف و ما فهمتش من افلامه غير اللى قلت عليهم دول
بس بحب فى افلامه انه بيهتم بالصورةو بحب فى شخصيته انه مبيهموش حد و ما بيقولش غير اللى هو مقتنع بيه مش اللى الناس عايزة تسمعه
بعيدا عن كونى مقتنعة بكلامه او موافقة عليه انا بحب الشخصيات دى..

و حاضر البوست الجاى مش هرغى فيه عشان نعرف نتناقش :)

banouta masreya يقول...

فنونتى :)
منير بقيت بسمعه بشدة من وقت الامتحانات و نزلت كل اغانيه تقريبا..كنت فاكراها حالة و هتخلص بعد الامتحانات بس هى لسه مستمرة الحقيقة:)

لانوثة بقت مرادف للقلع ..مش عارفه مين فهمهم الكلام دا
انا كنت هقول كده بالظبط والله بس قلت لسه فى بنات لابسة...اصل الموضوع ده واجعلى قلبى بجد..

انتى اللى واحشانى اوى والله..انا لسه بدرى عليا على ما ارجع ما تيجى انتى بقى :(

Founoon يقول...

ممممممممممممممممممم

طيب عظيم شاهين من منظوري انا الشخصي :)

كدا اظن مالاكش حجة يا مصعب :)

عظمة شاهين في نظري تتلخص في نقاط ابعد ما تكون عن كونه مخرج سينمائي

شاهين شخص عاش ومات بكرامة

ماتذلش في يوم لانسان ولا نافق نفسه عشان يوصل

وصل بمجهوده وبس ..ما باسش الايادي ولا مسح جوخ لاي شخص مهما كان عشان يوصل

قال اللي جواه بمنتهى الصراحة وماخافش من حد

الافلام اللي ذكرتها بنت مصرية في نظري مش من روائعه ابدا

شاهين في افلامه القديمة كان عنده القدرة على قرائة الوضع السياسي والاجتماعي المستقبلي

الحرب الاهلية اللبنانية في عودة الابن الضال
النكسة في العصفور
واخرهم ثورة الجياع في هي فوضى واللي لسه ماحصلتش

شاهين في هي فوضى راهن على القضاء المصري النزيه

ومات في نفس اليوم اللي ابتدت فيه بوادر فساد القضاء المصري تظهر للعيان في حادث العبارة

اتمنى ان توقعه يكون في محله المرة دي كمان ويطلع فعلا القضاء المصري نضيف ويكون قائد الثورة الجاية زي ماهو توقع

عبقرية شاهين اللي بيقولوا عليها انا مش مقتنعة بيها

هو لم يكن عبقري ..بس كان فعلا شخص عظيم

كلنا جوانا كتير ..كام واحد بيقدر يعبر وصوته يوصل

كام واحد ما بيخافش ..بالعكس بيتخاف منه

فيلمه الاخير هيا فوضى كان عامل مشكلة كبيرة مع الداخلية المصرية

كانوا عايزين يمنعوا لفيلم

تخيل انهم في الاخر خافوا يمنعوه ؟!

خافوا بجد يسكتوا صوت شاهين
واحد بيتخاف منه ومابيخافش من اي مخلوق

كام واحد في زماننا كدا ؟!

بالاضافه انه شخص حساس ..وعميق ..يري الاشياء دائما بمناظير اخرى

شاهين ضد امريكا وقالها بلا خوف

شاهين ضد الفساد وقالها بمنتهى الوضوح

شاهين وصى يتعمله عزا في مسجد عمر مكرم :))) شاهين اكيد كان عايز يقول حاجة ويوصل رسالة بطلبه دا بس طلبه اترفض وماحدش فهمه

زي ما طول عمر ناس كتير ما بتفهمش افلامه ولا بيفهموا هو كان عايز يقول ايه

اختلف مع شاهين في اشياء كثير

اكره في شاهين حاجات كتير

بحاول اتجاهلها واشوف الانسان اللي جواه زي ماهو قال في فيلمه حدوته مصرية

اسفه على الاطالة

بس انا فعلا بحب الراجل دا :)

mUsLiM يقول...

أولا : جزاكى الله خيرا على هذا الإطراء المبالغ فيه يا أختى فأنا لا أستحقه حقــا ..

وصدقا يا أختى , أفضل الكلام ما كان صادقا من القلب , ولو كان أبسط ما يكــون ..

فقيمة الكلام فيما يدل عليه , لا فى مجرد صياغته ..

والحكيم من يضع لسانه وراء قلبه فيتذوق ما يقول بقلبه قبل أن يقول شيئــا

والأحمق من يضع لسانه أمام قلبه ..

وشاهين رجل حر التفكيــر , مثل أشخاص أخرى عامه كعمر الشريف مثلا

ولا يُمدح التفكير الحر لأنه حر , ولكن يُمدح إذا كان يحض على الحق ويدعو الى الاصــلاح

والرجل له حسنات لا ننكرها , ولكن هى من أجل دنيا لا آخــره ..

ولا أقصد بقولى من أجل دنيا أنه يبتغى المال أو الجاه , ولكن قد يفعل الانسان الخير من أجل راحة البال أو أنه يحب أن يكون عادلا ويرتاح لذلك

فهذه دنيا

فكل أعمال الخير ما لم تقم على توحيد الله وعبادته فهى هباءا منثــورا

قال تعالى (( والذين كفروا أعمالهم كرماد اشتدت به الريح فى يوم عاصف ..الايه ))

نسأل الله أن يرحمنا وهو أرحم الراحمين

والله من وراء القصد

السلام عليكم

banouta masreya يقول...

فنون
الافلام اللى بتقولى عليها دى اتعرضت قبل ما اتولد بكتير اوى و يا دوب سمعت عنها..مش قصدى اكبرك ولا حاجة لا سمح الله :))

مصعب
مش كتير ولا حاجة خصوصا من واحدة كلامها كله سخيف مع الناس زيي كده :)
ما عنديش اى قدرة على تزويق الكلام و الحمد لله انى ما عنديش فلما اقول كده تأكد انك تستاهل اكتر منه
احنا مختلفين فى حاجات كتير جدا
لكن ما يمنعش انى معجبة جدا باسلوبك فى الكتابة و زى ما قلتلك لو اهتميت بنشره ناس كتير هتحب انها تقراه

بالنسبة ليوسف شاهين انا قلت رأيي فيه و الله اعلم باللى فى قلبه

dr.lecter يقول...

لا شاهين عظيم يامصعب انت يمكن مختلف معاه لان افلامه بيبقي فيها اباحيه بعض الشيء او افكاره تحرريه لكن هو ده الفن الفن معلهوش قيود

شاهين له فيلم يامصعب مابيتعرضش اسمه 11 سبتمبر 11 دقيقه 10 ثواني كادر واحد اشترك فيهع مع 10 مخجرين عالميين بعد 11 سبتمبر نفسي تشوفه بجد

شاهين اعظم افلامه العصفور اللي باعغتبره ازكي افلامه المصير الارض باب الحديد الي اتظلم من ناس كتيره

محمد منير كينج من يومه محمد بيشتغل مع كاست معين والمزيكا بتاعته منوعه بين الاوربي والنوبي علشان اصلا العازفين عنده نصهم المان



الرجاله معذورين برده الرجاله اللي بحجد بيمشوا مكسورين الجناح وجنب الحيطه لكن وقت مالرجله عنههم بتنده هتلاقيهم بقوا رجاله لكن المجتمع عمل عمليه اخصاء لهم في ظل تنامي المجتمع الراسمالي

الراجل بقه همه حاجه واحده انه يجيب رزق عياله مابقاش فيه رجاه زي زمان اللي لهم احلام وطموحات

الرجاله او اشباه الرجاله اللي انت بتشوزفيهم في مارينا مع مراتتهم وخطيباتهم وقاعد شايف مراته طالعه من البحر وبتقول اللي مايتفرجش اتفرج ياسبعي


الانوثه سلامات يانوثه الانوثه ان الواحده تمشي مشكره وتبص بقرف ولابسه لي نظاره شمس واكله نص وشها مش شايف فيها اي حاجه قال ايه شياكه وروشنه والنبي اتلهي ياختي انت وهي

اشوف فيكي ايه لما وشك اصلا مش باين بالاضافه انك لو محجبه يبقي اصلا مافيش حاجه فيكي باينه اصلا

الانوثه كانت في الصوت الهعادي المعامله الرقيقه اللبس البسيط الاوان الفاتحه

الرزانه التعقل النضج الزكاء في الكلام


مش الهيفي ميك اب والقرف اللي انتم بتلبسوه سوري يعني

حتي المشي الواحد زمان كان يشوف واحده ماشيه زي الفراشه دلوقتي الواحده تشي زي الغازيه او زي اللي راكبها عفريت

دستور ياسيادنا البت راكبها جوست

banouta masreya يقول...

ياااه ده انت شايل اوى:D
و ايه راكبها جوست دى مش احسن من اللى ماشي يترقص و هو موقع بنطلونه يخرب بيت كده يعنى
الستات بقوا يا بيسترجلوا يا بيستهبلوا و الرجالة فقدوا كل مقومات الرجولة..بس لسه فى شوية كويسين خلينى عايشة على الامل ده :D