الجمعة، 30 مايو 2008

مين اللى قال ان النسيان نعمة؟

المفروض انى كنت هتكلم هنا عن شخص قريب منى جدا
شخص مبقاش موجود فى الدنيا السخيفة دى
بس لقيته كلام شخصى جدا و ميهمش حد غيرى
فحبيت اتكلم عن حاجة بسمعها كتير و بستغربها جدا
بيقولوا "ان النسيان نعمة"
نسيان ايه بالظبط؟
يعنى انى انسى حد دخل حياتى و اثر فيا و اتعلمت منه حاجة...اى حاجة
انسى حد ربنا بعتهولى عشان يبقى معايا
معايا فى مواقف كتير كان صعب اعديها لوحدى
فكان وجود الشخص ده كافى عشان يخلينى اكتشف فى نفسى
حاجات مكنتش عارفة انها موجودة فيا
و هى نفس الحاجات دى اللى هتخلينى اقدر اكمل حياتى بعد ما يسيبنى
سواء كان حبيب , قريب, صديق, ايا كانت صلته بيا...انساه ازاى؟
اكيد هفتكره لما ارجع تانى اعدى بنفس المواقف
او لما اسمع اغنية بيحبها ولا اشوف فيلم من افلامه المفضلة
لما اسمع حد بيقول نفس رأيه او بيستعمل نفس لزماته فى الكلام
لما ابقى قاعدة لوحدى و افتكر ان وجوده جنبى كان بيهون عليا حاجات كتير
لما اروح الاماكن اللى كان بيحبها
ولما اشوف صحابه و الناس اللى كانوا قريبين منه و اسمع حكاياتهم عنه
لما اقرى كتاب من مكتبته و اشوف الخطوط اللى حطها تحت الجمل اللى اثرت فيه
ولا حتى لما اكل الاكل اللى كان بيحبه
مش معقول يعنى ان ولاحاجة من دول هتحصل
و مش معقول حاجة منهم تحصل و اقول لنفسى الحمد لله انا ناسية
اللى ينسى ناس ادوا معنى لحياته او اضافوله حاجات مهما كانت صغيرة
ميبقاش بنى ادم اساسا
ممكن افهم انه يتأقلم...
يعود نفسه على الوضع الجديد...يعرف يعيش من غير الناس دى
ببساطة لأنه معندوش حل تانى
و مينفعش حد يوقف حياته بعد موت الناس اللى بيحبهم
ممكن اقول ان "التأقلم"نعمة...لكن النسيان ده انعدام احساس
عشان كده انا عمرى ما نسيتك ولا عمرى هنساك
جدى الحبيب...وحشتنى

الأربعاء، 28 مايو 2008

fairy tales

I'am a realistic person and i don't look for a fairy tale
I just like to be swept away by a story that is too good to be true
So that i would be able to face reality...again

السبت، 24 مايو 2008

what a woman really is

The man is the head of the family
but the woman is its neck.
And she can turn the head any way she wants.
Quote from "my big fat greek wedding"

الأحد، 18 مايو 2008

اسفة...ارفض التطبيع

بناء" على رغبة صديقة عزيزة ليا قررت امشى بشعار جديد فى حياتى "و انا مالى" على رأيها احنا لا بنقف فى طوابير عيش ولا عمرنا هنقف لا بنلجأ لمستشفيات الحكومة ولا بنستنى العلاوة ولا بيأثر فينا سعر القطن لا رحت مدارس من اللى فيها 80 واحد فى الفصل ولا اتشعلقت فى اوتوبيس ولا ميكروباص ولا اترميت فى الشارع عشان البيه السواق ملوش مزاج يكمل لا عشت فى عشوائيات ولا جربت احساس الناس اللى عايشين فى علب تونة يبقى مالى انا بالطبقة الغلبانة اللى بتتعرض لكل ده؟ يزرعوا لب فى الغربية ولا يزرعوا برسيم حتى و انا مالى؟ قررت اخيرا" انى اريح دماغى... كل واحد يخليه فى نفسه بلاها سياسة و بلاها اقتصاد كنا خدنا منهم ايه غير وجع القلب؟ الحقيقة انى خدت القرار العظيم ده الصبح و نظرا لظروف الامتحانات فالواحد مش بيشوف الجرايد غير بالليل ده لاغراض صحية طبعا عشان لما اتشل او ضغطى يعلى من اللى مكتوب محدش هينفعنى سمعت الكلام و ركزت فى مزاكرتى عشان ابقى شاطرة و اهلى يفرحوا بيا و بما انى ادمنت الجرايد و هاخد فترة على ما اخف مقدرتش انام من غير ما اقرا الجرنال الوحيد المحترم فيكى يا مصر "المصرى اليوم" اول صفحة و بالبنط العريض "18 يخت اسرائيلى وصلوا اسكندرية احتفالا بمرور 60 سنة على بناء دولة اسرائيل!!" الوفد الاسرائيلى اتغدى فى سان جيوفانى و الشركة السياحية مجهزاله رحلة فى العلمين و سينا نعم؟؟!! على اساس ايه يعنى؟ طيب مش كانوا يقولولنا عشان نجيب بلالين و زمامير و نروح نستقبلهم؟ كنا جيبنالهم ايس كريم من عند عزة ولا مكرم عشان يطرى عليهم و لا كنا وصينا على كام طاقية من اللى بيلبسوهم و سرحنا بيهم كام واحد فى الاشارات بالظبط زى اللى بيبيعوا علم مصر ايام الماتشات بس احب افهم على اى اساس اتسمح للمراكب دى انها تدخل؟ طيب الغاز و قلنا معلش اتفاقية و هتطلع على دماغنا و مش اسرائيل بس المستفيدة منها انما ييجوا عندنا و يتفسحوا و بمنتهى الجرأة يرفعوا علم اسرائيل فى موانى اسكندرية!! اذا كان التطبيع ده كان ليه ظروف معينة وقتها فده حاجة و اللى بيحصل ده حاجة تانية ده استفزاز رسمى و سفالة ملهاش حدود فى الوقت اللى الناس بتنعى فيه وطن ضاع من 60 سنة و محدش قادر يعمله حاجة ييجوا و يحتفلوا بمرور 60 سنة على الخيبة القوية و فى بلدنا؟ انا قلت من الاول بلاش سياسة بس بجد مقدرتش افوت اللى حصل ده و ان شاء الله هتعالج و همشى اقول لنفسى: انا مش سياسية ولا مواطنة عادية حتى انا هايفة و تافهة وهركز فى الموضة و جمال بشرتك يا سيدتى و ...انا مالى على غرار مقولة فؤاد المهندس الشهيرة"انا مش طويل و اهبل انا قصير و عبيط" ادعولى اخف بقى عشان كده هتجنن رسمى

السبت، 17 مايو 2008

حوار مع مواطن سلبى

بيقولوا ان المصريين اكتر من نصهم عايشن تحت خط الفقر ده صحيح؟
مين قال كده؟
الجهاز المركزى بتاع الاحصاء
كدابين فى اصل وشهم ما انا عايش كويس اهه و بعدين القناعة كنز لا يفنى
يعنى انت عايش كويس؟
اه الحمد لله و بعدين القناعة كنز لا يفنى
ايوة فهمت والله, طيب انت بتشتغل ايه؟
موظف فى مصلحة الضرايب
بتاخد كام فى الشهر؟
300 جنيه
طيب انت متجوز؟
اه و عندى 7 عيال
سبعة!!! بتأكلهم منين دول؟
لا ما هو المرتب بيقضى ليوم 4 فى الشهر الحمد لله و بعدين القناعة كنز لا يفنى
و باقى ال26 يوم بتعمل فيهم ايه؟
بستلف من حسنين و عوضين و محمدين زمايلى فى الشغل
و هم مش عندهم التزامات هم كمان؟ و بعدين هتسدد ازاى الفلوس اللى عليك دى؟
ايوة ما احنا بنساعد بعض...
و يا ستى بكرة تفرج و نسدد اللى علينا و نجيب للعيال بيسين فى الشقة و بجاكوزى كمان
ايوة منين يعنى؟اكيد انت شاركت فى الاضرابات اللى عملوها الموظفين عشان وزارة المالية تزود مرتباتهم
عشان كده متطمن؟
كان نفسى والله بس الواد ابنى كان عنده كالو فى رجله
و كان لازم اوديه المستشفى
بس البركة فى الزملا قاموا بالواجب و زيادة
يبقى اكد شاركت فى اضراب 6 ابريل؟
اه شاركت طبعا و وقفنا نتفرج على الاضراب انا و ام العيال و احنا واقفين فى طابور العيش
تتفرج على الاضراب؟؟!! اذا كان اسمه "خليك فى البيت" يعنى المفروض ما كنتش تنزل
يعنى هى جت عليا ما كل العمارة نزلت تتفرج على الاضراب
بس الشهادة لله دى حاجة حضارية جدا
على الاقل صوتنا وصل للمسئولين و عرفوا اننا عندنا طلبات
تقصد "صوتهم" بما انك ما شاركتش؟
"صوتنا" "صوتهم" مش فارقة المهم ن فى حد بيصوت و خلاص

و بعدين انت بتقول كنت فى طابور العيش يعنى ما رحتش شغلك يومها؟

ايوة ما انا رحت الصبح مضيت و بعدين سنانى كانت بتوجعنى فاضطريت اروح

طيب و مصالح الناس اللى اتعطلت؟

مافيش عطلة ولا حاجة انا سبت يافطة على المكتب

مكتوب عليها فوت علينا بكرة

انا مفيش حاجة تفوتنى ابدا احنا ناس بنراعى ربنا

طيب بالنسبة للانتخابات شاركت فيها؟

الانتخابات دى حاجة ديموقراطية جدا على فكرة

كفاية ان الشعب بيختار مين يحكمه

يعنى افهم من كده انك شاركت... اخترت مين طيب؟ كان بودى اشارك والله بس البنت الصغيرة كانت بتعطس

و كان لازم اوديها المستشفى بس الشهادة لله الناس قاموا بالواجب و زيادة

مين دول انت عارف ان اللى صوتوا دول كانوا 23% من اللى عندهم بطاقات انتخابية بس؟

العدد فى اللمون متقريش احسن يتحسدوا

طيب لو كنت صوتت كنت هتختار مين؟ الراجل ده اسمه ايه بتاع حزب بكرة بيقولوا هيدى للناس 50 جنيه فى الشهر

بالنسبة لانتخابات المحليات شاركت فيها؟
"الحميات" لأ الحمد لله الوحدة الصحية هنا قايمة بالواجب و زيادة
و العيال متطعمين ضد كل الامراض

يعنى مفيش حاجة مزعلاك فى البلد خالص؟ لأ ازاى فى طبعا الحضرى سافر سويسرا و لازم ياخد جزاؤه دى خيانة لمصر و للمصريين

ده بس اللى مزعلك؟

اه ده اللى قاهرنى مش بس مزعلنى و بعدين القناعة كنز لا يفنى

تعرف ايه عن اللى بيحصل فى لبنان و فلسطين دلوقتى؟

انا ما بقراش جرايد اصل اللى بيتكتب انهاردة هو اللى بيتكتب بكره

و هو اللى هيتكتب بعده...مش فارقة

بس الصراحة حظك اليوم و السودوكو بتوع المصرى اليوم

احلى بكتير من اللى بييجوا فى الاخبار

يعنى انت مش ناوى تعمل حاجة لبلدك؟ لا بتشارك فى انتخابات ولا بتعبر عن رأيك فى اضرابات ولا بتروح شغلك؟ لا ما انا هشارك فى الصيام بتاع يوم 20 بيقولوا الدعاء هو الحل

هو مش كان "الاسلام هو الحل" هم غيروها؟

والله معنديش خلفية هم قالولى هنصوم و ندعى و انا معاهم بعون الله

تفتكر ده لوحده اللى هيصلح حال البلد؟

ايوة طبعا امال ايه مفيش احسن من اللجوء لربنا
و بعدين هو انتى ملحدة ولا ايه اعوذ بالله استغفر الله ولا حول ولا قوة الا بالله
ربنا يهدى

اخر سؤال تحب تقول ايه للمسئولين فى البلد؟
ربنا يخليلنا المسؤولين و يباركلهم
كله تمام بس الناس هى اللى طماعة و بعدين القناعة كنز لا يفنى...
و بعد كده عايزينها تتعدل
بامارة ايه طيب؟

الجمعة، 16 مايو 2008

اننا حقا مجتمع...تعبان فى مخه

شغلنى الموضوع ده لفترة مش قصيرة من حياتى و بخبرتى المتواضعة فى الحياة اكتشفت اننا مجتمع ذكورى (قديمة) و لكن كمان مجتمع مزدوج لدرجة مضحكة احنا اللى بنحط القيم و المبادئ واحنا كمان اول من يخالفها بنعترف ان الغش حرام و بنتفشخر بقدرتنا الفائقة على الغش فى امتحان فيزيا
ولا فى امتحان رخصة السواقة و بنفضل نحكى قصصنا العظيمة بكل شموخ و الاطة لولادنا ولا صحابنا فهى فى الاخر بتيبن اننا شعب فهلوى مش احنا اللى دهنا الدوا دوكو؟ اللى هاممنى بقى نوع تانى من الازدواجية التفرقة الغريبة العجيبة بين الراجل و الست... هحكي عن محسن عشان اقرب الفكرة اكتر محسن ده عنده اخت صغيرة و طبعا لازم يطلع عينها عشان يثبت رجولته لو اتأخرت يوم تبقى ليلة مش فايتة
حتى لو كان عارف انها فى درس ولا فى الجامعة و الام دورها كله مقتصر على شوية جمل مش حافظة غيرهم "قومى حضرى الغدا لاخوكى" "قومى نضفى لاخوكى الاوضه" "اوعى تزعلى اخوكى ده شقيان و بيتعب"
مع ان محسن فى تانية ابتدائى ناسية انها مش بس بتربى شاب دوره انه يخلص الجامعة و ياخد الشهادة الكبيرة دى بتربى زوج ربنا هيحاسبه على معاملته لمراته و اب هيربى جيل من البنات و الصبيان طيب هيربيهم ازاى اذا كان هو اساسا مش متربى؟ محسن زى رجالة كتيرعايز يرتبط بست جميلة يتمنظر بيها قدام صحابه ولما تبقى الست الحلوة دى مراته ينقبها و يبعدها عن الدنيا و انا بتكلم هنا عن نقاب معنوى سجن بيعمله هو و بيحطها فيه قفص هو بس اللى معاه مفتاحه و هى كل دورها فى الحياة انها تبقى بتاعته بس عشان يقول الست الحلوة دى بتاعتى انا بس كانه معندوش اى ثقة فى اخلاصها له او فى قدرته على انه يملا حياتها و يخليها متفكرش فى غيره كانه مش مصدق انه يستاهل واحدة زيها و خايف لتحس هى كمان بكده و تدور على اللى احسن منه ولما محسن بقى اب كان ساعات بيخرج مع بنته و عينه فى وسط راسه خايف لحد يبصلها او يتعرضلها مع ان محسن لما بيخرج لوحده بيعاكس طوب الارض بنات من سن بنته او اصغر و بيعيش فى دور رشدى اباظة ولا احمد رمزى فى زمانه حتى لما شعره ابيض و السنتين اللى فضلوا كانوا بيتلخلخوا
مع كل "يا قمر" ولا "يا عسل" بيقولها محسن كان عنده ولد اسمه كريم علمه و رباه من زمان انه يكون شاب روش عارفينه؟ اعرفكم عليه الشاب الروش اللى بيرتبط ببنت و يخرج معاها سنين
و ممكن يطلب منها اللى اكتر من الخروج و لما تديله اللى هو عايزه و هو عارف و متأكد انها مكنتش هتديه لغيره يروح يدور على "قطة مغمضة" عشان يتجوزها و "معلش بقى يا سوسو اصلى اكيد مش هتجوز واحدة غلطت معايا و انتى تستاهلى اللى احسن منى باى باى و ربنا يوفقك" سبحان الله مش ربنا بيحاسب الاتنين بنفس الشكل ليه نفس الفعل يبقى اسمه زنا و سفالة و عار لو سوسو عملته
و شقاوة شباب و رجولة و فهلوة لو كريم عمله؟ جميل ان الراجل يشوف فى مراته و بنته و اخته شرفه بس هو الشرف ده مقتصر بس على انه يحميهم من الغلط؟ مش المفروض كمان انه يحمى نفسه منين بيطلب من اخته تحافظ على شرفها و يدور هو على بنات عندهم هم كمان اخوات و اهل ؟ و الغريب بقى ان لما البنت تيجى تتجوز ابوها يفضل الشاب اللى لف كتير الشاب اللى"مقطع السمكة و ديلها"
عشان و اتجوزت واحد محترم "عينه هتتفتح"بعد الجواز و مش بعيد يخونها عشان يعوض الفترة اللى عاشها محترم يعنى لو الراجل عرف 100 واحدة يبقى كامل الرجولة و يتمنظر بدفتر تليفوناته اللى مليان ارقام بنات و بمغامراته و نزواته مع سوسو و لولو و ميمي
و يا سلام لو كانت البنت من النوع الصعب اللى بياخد وقت على ما يصدق القصص الوهمية و الكلام الفارغ
اللى داير يقوله لكل واحدة بيشوفها
و تتوهم بالقميص المفتوح و السلسة و مفتاح العربية ال4X4
و غيرها من مظاهر الروشنة يبقى راجل بجد و عرف يوقعها و ابوه و امه يفرحوا بيه و يا زين ما ربوا مش ده يبقى اسمه انفصام؟ و لو البنت عرفت واحد بس قبل ما تتجوز -و اللى اقصده "بعرفته" يعنى حبته مش يعنى اى حاجة تانية- تبقى اجرمت و جابت لاهلها العار و الفضيحة و اللى هيتجوزها ده يبقى مضحى انه وافق و تكرم و تفضل و اتجوزها مش دى يبقى اسمها ازدواجية؟ نفسي ادور فى الشوارع بطبلة ولا بربابة حتى
و اقول فى ودن كل راجل متخلف:
خليك فى حالك مفيش بنت محترمة هتخسر نفسها و شرفها عشان انت مخك مفوت
و قبل ما تعمل فيها وصى على غيرك صلح نفسك الاول
عشان اكيد...اكيد يعنى هى محتاجة تتصلح
و ارحمنا يا رب من اللى فاكرين ان الرجولة مقتصرة على الجنس
و ان الانوثة مقتصرة على الطاعة
و من التفرقة و الازدواجية و التخلف و الانفصام
و الجهل و العنصرية و النظرة الدونية و الجنان الازلى و...و...و...
ممكن اكمل لبكرة بس عندى امتحانات

الثلاثاء، 13 مايو 2008

عايزة عريس من كوالالمبور

انا اخترت اتكلم عن كلمة قديمة قدم التليفون ابو قرص او ممكن تكون انقرضت مع الديناصورات و الطرابيش بيتهيألى كل اللى فى جيلى سمعوا عن الكلمة دى بس ما شافوهاش و كلهم بيدوروا عليها فى فارس احلامهم
منهم اللى اتوهم انه لقاها و منهم اللى لسه بيدور و منهم اللى زيي عارف انها مش موجودة فريح نفسه و خدها من قصيرها
و ما حاولش يدور عليها ...
انا بتكلم عن "الرجولة" لا مش بتكلم على انك تربى شنبك لحد ما يوصل لودنك
ما هو سيد قشطة عنده شنب كده بقى راجل مثلا؟
ولا على انك تشرب سجاير ولا شيشة و تجيب لنفسك سرطان
بس عشان تمشى فى الشارع فرحان بروحك و فاهم انك كده راجل
ولا انك تعلى صوتك و تهين مراتك عشان تبان انك اقوى فى حين انك انسان جاهل و مريض بتطلع عقدك
على واحدة لا حول لها ولا قوة
ولا انك تمشى تعاكس اى حاجة معدية قدامك
عشان دى اكتر حاجة ممكن تعملها فى حياتك و لو حاولت تكلم بنت هتقف تتهته زى الاهبل قدامها
و فاكر انك لما تهين واحدة ماشية فى حالها تبقى كده راجل
ولا انك توقع بنطلونك و توقف شعرك
عشان تبقى شاب cool و يقولولك يا مان
الى اخر هذا الهجص... انا بتكلم عن الرجولة اللى تبهر اى ست فى الدنيا
بعيدا عن الشكل المشوه للراجل الشرقى اللى موجود دلوقتى بتكلم عن الراجل اللى بيعرف يشيل مسؤولية بجد اللى بيعرف يتعامل مع الست و يشوف عقلها قبل جسمها
الراجل الرومانسى اللى لو اتجوز مارجريت تاتشر يحولها لنانسى عجرم مش رومانسية التسبيل و الاسطوانات المحفوظة ولا بتاعت 0900و ابعت لحبيبك رنة عشان يحبك اكتر ولا بتاعت دباديب الفالنتين و الورد اللى على الفاضية و المليانة
انا اقصد الراجل اللى بيتعب عشان يوصل للبنت اللى بيبحها
و يعمل المستحيل عشانها مش لازم يركب حصان ابيض ولا يجيبلها لبن العصفور
كفاية انه يقدر قيمتها و يعرف غلاوتها عنده
الراجل اللى الشهامة فى دمه
مش اللى غاوى منظرة و شو على الفاضى
و هو اساسا ميسواش ربع جنيه مخروم
الراجل اللى لما يحب يبان فى عينيه و اللى مش بيربط بين دموعه و رجولته اللى يعرف يحسس حبيبته بالامان حتى لو كانوا عايشين فى العشوائيات
اللى ثقته فى نفسه تخليه عارف و متأكد
ان قيمته مش بعدد ارقام التليفونات اللى عنده ولا بعدد المغامرات اللى عاشها قيمته فى عقل ناضج نضيف و احساس بالمسؤولية ناحية البنت اللى بيحبها و صدق و شجاعة يخلوه يوم ما احساسه ناحيتها يتغير يقولها
من غير ما يخلق مبررات تخليه يعمل حاجة تجرحها
اللى يخلى الست فرحانة انها ملكه هو دونا عن الناس كلها مش عشان هو ازكى واحد فى الدنيا ولا عشان بيلبس سينييه
ولا عشان راكب كرايسلر و عنده بيت فى مارينا و فيلا فى ايطاليا لكن عشان هى عارفة و متأكدة انه هيسندها لما تحتاجه و انه مهما الدنيا اتغيرت حواليها هيفضل هو الحاجة الوحيدة الثابتة فى حياتها هم راحوا فين دول؟

الاثنين، 5 مايو 2008

عن الغباء و صحابه !!

زى ما فى ناس مبنقدرش نتخيل حياتنا من غيرهم فى ناس ممكن نعمل اى حاجة عشان نمسحهم من حياتنا
يعنى مثلا الشخص اللى تدخل معاه فيلم فى السينما و تبقى هتموت و تشوفه
و تلاقيه بيحكيلك الاحداث كلها لو كان شافه
او يفضل يسألك عن توقعاتك لنهاية الفيلم
مع انه عارف انك اول مرة تشوفه
ومع انكوا دافعين فلوس عشان تعرفوها
و الشخص اللى فاهم نفسه عارف كل حاجة فى الدنيا
و كل ما تكلمه فى حاجة يقولك" ايوة انا عارف"
و لو حاولت تفهمه وجهة نظرك
يقولك "استنى انا جايلك فى الكلام"
و عمره ما بييجى
و اللى بينصبوا نفسهم حكام على خلق الله و هم فيهم العبر
و فاكرين انهم بكده مش هيبانوا على حقيقتهم
ما وراهمش طول النهار غير سيرة الناس
و فاكرين ان ده ذكاء اجتماعى
و اللى بيتعمد يهين اللى قدامه عشان يثبت نفسه و يبين انه عارف اكتر
مع انه اجهل من الجهل ذات نفسه!!
و اللى بيعرف صحابه بس لما يبقى مكتئب و عايز يفضفض
و فالح بس انه ينكد عليهم عيشتهم
و لما يكون مبسوط بيختفى بنفس السرعة اللى دخل بيها حياتهم
و اللى يفضل يحكيلك قصة حياته و حياة اهله و جيرانه و صحابه
ردا على سؤال "اخبارك ايه؟"
لدرجة تخليك تكره نفسك انك فكرت تسأل عليه
و اللى متعود يشتكى على طول حتى لو معندوش حاجة يشتكى منها
بيفضل دايما مكتئب و مستنى الضحية اللى هتسأله "مالك؟"
و اللى بيحب النكد زى عينيه و كل ما يروح مكان مع صحابه
و يلاقيهم مبسوطين
يطلع القطط الفاطسة فى المكان و فاللى فيه
حتى لو هو مبسوط
لمجرد انه يعترض و يثبت وجوده
و البنى ادم اللى عنده قدرة فائقة تخليه ممكن يتكلم اسبوع بحاله بلا انقطاع
لو حطيته فى وسط ناس
و لو تكرم و تفضل و سألك سؤال هو اللى يجاوب برده
و الراجل الاهبل اللى بيضحك ضحكة هبلة
كل ما يشوف حاجة اخرها تاء مربوطة بتعدى من قدامه
حتى لو كانت الحاجة دى معزة
و اللى فاكر الست دى كائن ناقص الاهلية مغيب عن الوعى
مستنى اللى ياخد بايده و يوريه يمينه من شماله
و لما مراته تكلمه يقول :"البيت بيتكلم"
على اساس ان اسمها عيب يتقال مثلا
او انها بقت من ضمن ممتلكاته زيها زى اى كنبة او كرسى فى بيته
و الست التافهة اللى ما وراهاش حاجة فى حياتها
غير"تيتى " الcoiffeur و "جيجي" بتاعت الmassage
و" ميمي" بتاعت ال face lifting
و اللى بتدور على الراجل اللى شخصيته ضعيفة
عشان تسيطر هى عليه و تمشيه على مزاجها
و تشوف فى كده قوة و تتخيل نفسها اذكى اخواتها
و الجارة اللكاكة اللى بتقف على باب بيتها و تجيب اخبار امة لا اله الا الله
و توصلها لامة لا اله الا الله برده مع اضافة لمستها الخاصة
فتخلى حكاية زى الست ام فاروق طابخة محشى كرنب
فيلم هندى طوله ساعتين
و مش بعيد يتنهى بانتحار ابو فاروق
بعد فاصل من الاغانى الهندية يتخلله بعض الافيال
و بالرغم من كده متلاقيش على لسانها غير"دع الخلق للخالق"!
و ناس تانية كتير ممكن اكتب عنهم مجلدات... بس دول اللى على بالى دلوقتى
ولو عندى استيكة مكنتش اتأخرت

الخميس، 1 مايو 2008

قالك فتنة طائفية...بعينهم

من كام يوم قريت فتوى غريبة بتخص الكتب المقدسة و انهاردة كنت بتفرج على مواقع اقباط المهجر لا فهمت على اساس ايه فى ناس بتقرر مصاير ديانة كاملة باللى بيعتنقوها و بيوصفوهم بالكفر ولا فهمت من امتى و الاسلام اللى انا اعرفه بيحصل فيه الكلام الغريب اللى مكتوب على المواقع دى عموما انا لا هاممنى رأى الاولانيين سلفيين كانوا او وهابيين ايهما اصح ولا بلتفت لكلام التانيين اللى هم عبارة عن شوية ناس قرروا يسافروا امريكا عشان يتكلموا
عن مشاكل و حقوق خافوا يتكلموا عنها او يطالبوا بيها فى بلدهم محدش يقدر ينكر ان فى مشاكل بتخص المسيحيين فى مصر لكن اللى اعرفه انى لما يكون عندى مشكلة مع حكومة بلدى اطالب بحلها و انا فى بلدى
مش اتحامى فى بلد اخر حاجة تهمه انها ترجعلى حقى ده عارفة ان فى مشاكل و عارفة ان حادثة اسكندرية ممكن جدا تتكرر فى اى وقت و عارفة ان الحل مش هيبقى طلوع البابا مع المفتى فى التليفزيون
ويسلموا على بعض و بالاحضان يا سينا و دمتم بس مش ده اللى هاممنى دلوقتى انا اللى هاممنى احنا احنا الناس العاديين اللى عمرنا ما فكرنا بالشكل ده
ولا عمرنا ادينا دماغنا للمزايدين المدعين اللى عايزين يولعوها مش عارفة ليه جت على بالى ذكرياتى القديمة افتكرت عشر سنين عشتهم فى مدرسة راهبات افتكرت انى عمرى ما سألت ولا فكرت اسأل مين مسلم و مين مسيحى افتكرت فطار رمضان اللى كنا بنعمله فى المدرسة
لما كنا بنتلم كلنا مع الراهبات و نفطركلنا سوا افتكرت الطبق اللى كانت مدام كريستسن مدرسة الفرنساوى بتعمله لينا افتكرت صاحبتى المسيحية اللى كانت بتصوم معايا
و زمايلى اللى ما كانوش بيرضوا ياكلوا قدامنا و احنا صايمين افتكرت معايداتنا لبعض فى الاعياد عيد فطر كان او عيد قيامة افتكرت ندا و ريهام و ماريان و ميرنا و سيلفيا و مونيكا افتكرت ال cours de vie او "حصص الحياة" اللى كانوا الراهبات بيدرسوها لنا
و يعلمونا فيها ازاى نعيش و ازاى نتعايش افتكرت عم فوزى بواب المدرسة
كان بيقابلنا كل يوم بابتسامة حلوة عمرى ما هنساها و افتكرت انى معرفتش انه مسيحى غير صدفة قبل ما اسيب المدرسة باسبوعين حاجات كتيرة جت فى بالى ورا بعضها حاجات اكبر و اعمق من انها تتأثر بشوية كلام فارغ من ناس جاهلة حاجات اتولدت و كبرت جوانا من و احنا اطفال و هتفضل دايما موجودة و هيفضلوا دايما يضربوا بينا المثل فيها رغم انف الحاقدين و الخلاصة:عيسى نبى و موسى نبى و كل من له نبى يصلى عليه