الجمعة، 16 مايو، 2008

اننا حقا مجتمع...تعبان فى مخه

شغلنى الموضوع ده لفترة مش قصيرة من حياتى و بخبرتى المتواضعة فى الحياة اكتشفت اننا مجتمع ذكورى (قديمة) و لكن كمان مجتمع مزدوج لدرجة مضحكة احنا اللى بنحط القيم و المبادئ واحنا كمان اول من يخالفها بنعترف ان الغش حرام و بنتفشخر بقدرتنا الفائقة على الغش فى امتحان فيزيا
ولا فى امتحان رخصة السواقة و بنفضل نحكى قصصنا العظيمة بكل شموخ و الاطة لولادنا ولا صحابنا فهى فى الاخر بتيبن اننا شعب فهلوى مش احنا اللى دهنا الدوا دوكو؟ اللى هاممنى بقى نوع تانى من الازدواجية التفرقة الغريبة العجيبة بين الراجل و الست... هحكي عن محسن عشان اقرب الفكرة اكتر محسن ده عنده اخت صغيرة و طبعا لازم يطلع عينها عشان يثبت رجولته لو اتأخرت يوم تبقى ليلة مش فايتة
حتى لو كان عارف انها فى درس ولا فى الجامعة و الام دورها كله مقتصر على شوية جمل مش حافظة غيرهم "قومى حضرى الغدا لاخوكى" "قومى نضفى لاخوكى الاوضه" "اوعى تزعلى اخوكى ده شقيان و بيتعب"
مع ان محسن فى تانية ابتدائى ناسية انها مش بس بتربى شاب دوره انه يخلص الجامعة و ياخد الشهادة الكبيرة دى بتربى زوج ربنا هيحاسبه على معاملته لمراته و اب هيربى جيل من البنات و الصبيان طيب هيربيهم ازاى اذا كان هو اساسا مش متربى؟ محسن زى رجالة كتيرعايز يرتبط بست جميلة يتمنظر بيها قدام صحابه ولما تبقى الست الحلوة دى مراته ينقبها و يبعدها عن الدنيا و انا بتكلم هنا عن نقاب معنوى سجن بيعمله هو و بيحطها فيه قفص هو بس اللى معاه مفتاحه و هى كل دورها فى الحياة انها تبقى بتاعته بس عشان يقول الست الحلوة دى بتاعتى انا بس كانه معندوش اى ثقة فى اخلاصها له او فى قدرته على انه يملا حياتها و يخليها متفكرش فى غيره كانه مش مصدق انه يستاهل واحدة زيها و خايف لتحس هى كمان بكده و تدور على اللى احسن منه ولما محسن بقى اب كان ساعات بيخرج مع بنته و عينه فى وسط راسه خايف لحد يبصلها او يتعرضلها مع ان محسن لما بيخرج لوحده بيعاكس طوب الارض بنات من سن بنته او اصغر و بيعيش فى دور رشدى اباظة ولا احمد رمزى فى زمانه حتى لما شعره ابيض و السنتين اللى فضلوا كانوا بيتلخلخوا
مع كل "يا قمر" ولا "يا عسل" بيقولها محسن كان عنده ولد اسمه كريم علمه و رباه من زمان انه يكون شاب روش عارفينه؟ اعرفكم عليه الشاب الروش اللى بيرتبط ببنت و يخرج معاها سنين
و ممكن يطلب منها اللى اكتر من الخروج و لما تديله اللى هو عايزه و هو عارف و متأكد انها مكنتش هتديه لغيره يروح يدور على "قطة مغمضة" عشان يتجوزها و "معلش بقى يا سوسو اصلى اكيد مش هتجوز واحدة غلطت معايا و انتى تستاهلى اللى احسن منى باى باى و ربنا يوفقك" سبحان الله مش ربنا بيحاسب الاتنين بنفس الشكل ليه نفس الفعل يبقى اسمه زنا و سفالة و عار لو سوسو عملته
و شقاوة شباب و رجولة و فهلوة لو كريم عمله؟ جميل ان الراجل يشوف فى مراته و بنته و اخته شرفه بس هو الشرف ده مقتصر بس على انه يحميهم من الغلط؟ مش المفروض كمان انه يحمى نفسه منين بيطلب من اخته تحافظ على شرفها و يدور هو على بنات عندهم هم كمان اخوات و اهل ؟ و الغريب بقى ان لما البنت تيجى تتجوز ابوها يفضل الشاب اللى لف كتير الشاب اللى"مقطع السمكة و ديلها"
عشان و اتجوزت واحد محترم "عينه هتتفتح"بعد الجواز و مش بعيد يخونها عشان يعوض الفترة اللى عاشها محترم يعنى لو الراجل عرف 100 واحدة يبقى كامل الرجولة و يتمنظر بدفتر تليفوناته اللى مليان ارقام بنات و بمغامراته و نزواته مع سوسو و لولو و ميمي
و يا سلام لو كانت البنت من النوع الصعب اللى بياخد وقت على ما يصدق القصص الوهمية و الكلام الفارغ
اللى داير يقوله لكل واحدة بيشوفها
و تتوهم بالقميص المفتوح و السلسة و مفتاح العربية ال4X4
و غيرها من مظاهر الروشنة يبقى راجل بجد و عرف يوقعها و ابوه و امه يفرحوا بيه و يا زين ما ربوا مش ده يبقى اسمه انفصام؟ و لو البنت عرفت واحد بس قبل ما تتجوز -و اللى اقصده "بعرفته" يعنى حبته مش يعنى اى حاجة تانية- تبقى اجرمت و جابت لاهلها العار و الفضيحة و اللى هيتجوزها ده يبقى مضحى انه وافق و تكرم و تفضل و اتجوزها مش دى يبقى اسمها ازدواجية؟ نفسي ادور فى الشوارع بطبلة ولا بربابة حتى
و اقول فى ودن كل راجل متخلف:
خليك فى حالك مفيش بنت محترمة هتخسر نفسها و شرفها عشان انت مخك مفوت
و قبل ما تعمل فيها وصى على غيرك صلح نفسك الاول
عشان اكيد...اكيد يعنى هى محتاجة تتصلح
و ارحمنا يا رب من اللى فاكرين ان الرجولة مقتصرة على الجنس
و ان الانوثة مقتصرة على الطاعة
و من التفرقة و الازدواجية و التخلف و الانفصام
و الجهل و العنصرية و النظرة الدونية و الجنان الازلى و...و...و...
ممكن اكمل لبكرة بس عندى امتحانات

هناك تعليقان (2):

Here i'm يقول...

ما هو انا لو مردتش على البوست دا مش حعرف أذاكر :)

بصى يا بنتى .. الناس دول أنتى سمتيهم رجالة و هما أبعد ما يكون عن الرجولة

عارفة أنا مش عايز أتكلم عن صفاتى أحسن تقولى دا بيحور و لا بيمثل ...

بس عارفة ... أنا أختى مبتحبش تخرج غير معايا .. مش خوف و الله بس على قد ما هيا بتختار أنها تخرج معايا


و الله العظيم هيا اللى بتيجى تحكيلى عملت أيه و بتاخد رأيى ...


عارفة كمان أنا بخاف أخد على أى بنت و بخلى معاها حدود كتير خوفا على أختى


و الله العظيم تلاتة مكنتش عايز أكتب الكلام دا .. بس علشان حسيت من كلامك أنك شايفة الرجالة كده ..


على العموم ... روحى ذاكرى أحسن :0)

banouta masreya يقول...

لأ ذاكر مش عايزين تلاكيك:D:D
هو انا شايفة كده من شوية انا تعبت بجد من اللى بشوفه
احساس بشع انك تبقى عايش فى مجتمع بيعتبرك مواطن من الدرجة التانية
مواطن ملهوش حقوق مواطنة...

نفس الحاجة بتتعمل و اللى بيتقال عليها مختلف تماما و النظرة ليها مختلفة تماما

عارف بجد على قد ما انا هموت على اخ كبير لكن لو طلع كده يبقى بجد مش عايزة

و انا فاهمة كلامك والله كويس متقلقش بس مش كل الناس بتراعى ربنا حتى لو عندهم اخوات بنات