الجمعة، 30 مايو 2008

مين اللى قال ان النسيان نعمة؟

المفروض انى كنت هتكلم هنا عن شخص قريب منى جدا
شخص مبقاش موجود فى الدنيا السخيفة دى
بس لقيته كلام شخصى جدا و ميهمش حد غيرى
فحبيت اتكلم عن حاجة بسمعها كتير و بستغربها جدا
بيقولوا "ان النسيان نعمة"
نسيان ايه بالظبط؟
يعنى انى انسى حد دخل حياتى و اثر فيا و اتعلمت منه حاجة...اى حاجة
انسى حد ربنا بعتهولى عشان يبقى معايا
معايا فى مواقف كتير كان صعب اعديها لوحدى
فكان وجود الشخص ده كافى عشان يخلينى اكتشف فى نفسى
حاجات مكنتش عارفة انها موجودة فيا
و هى نفس الحاجات دى اللى هتخلينى اقدر اكمل حياتى بعد ما يسيبنى
سواء كان حبيب , قريب, صديق, ايا كانت صلته بيا...انساه ازاى؟
اكيد هفتكره لما ارجع تانى اعدى بنفس المواقف
او لما اسمع اغنية بيحبها ولا اشوف فيلم من افلامه المفضلة
لما اسمع حد بيقول نفس رأيه او بيستعمل نفس لزماته فى الكلام
لما ابقى قاعدة لوحدى و افتكر ان وجوده جنبى كان بيهون عليا حاجات كتير
لما اروح الاماكن اللى كان بيحبها
ولما اشوف صحابه و الناس اللى كانوا قريبين منه و اسمع حكاياتهم عنه
لما اقرى كتاب من مكتبته و اشوف الخطوط اللى حطها تحت الجمل اللى اثرت فيه
ولا حتى لما اكل الاكل اللى كان بيحبه
مش معقول يعنى ان ولاحاجة من دول هتحصل
و مش معقول حاجة منهم تحصل و اقول لنفسى الحمد لله انا ناسية
اللى ينسى ناس ادوا معنى لحياته او اضافوله حاجات مهما كانت صغيرة
ميبقاش بنى ادم اساسا
ممكن افهم انه يتأقلم...
يعود نفسه على الوضع الجديد...يعرف يعيش من غير الناس دى
ببساطة لأنه معندوش حل تانى
و مينفعش حد يوقف حياته بعد موت الناس اللى بيحبهم
ممكن اقول ان "التأقلم"نعمة...لكن النسيان ده انعدام احساس
عشان كده انا عمرى ما نسيتك ولا عمرى هنساك
جدى الحبيب...وحشتنى

هناك 4 تعليقات:

samamasr يقول...

ربنا يرحمه يارب

banouta masreya يقول...

و يرحم امواتنا كلهم يا رب
ربنا يخليكى يا ايمان :)

Ahmed EL Masry يقول...

على حسب الذكريات يا سلمى بيكون النسيان نعمه او لا, في ذكريات رقيقة جمعتنا باشخاص اثروا فينا وفي حياتنا بشكل كبير وراحو بعد كده, دول صعب جدا ننساهم , بس في ذكريات اليمة فعلا بنحاول على قد مانقدر ننساها وساعتها بيكون النسيان نعمة , بس ساعتها برضه بتكون نعمة لا تُطال!.

ربنا يرحمنا ويرحم امواتنا جميعا يارب.

banouta masreya يقول...

هى الذكريات الرقيقة دى اللى انا اقصدها اصل فى ناس تقولك الحمد لله على نعمة النسيان و قال يعنى دى حجة عشان ينسوا ناس محترمين عاشوا فى حياتهم
ده منتهى النكران للجميل
اما الذكريات الاليمة دى فمتستاهلش انك تفكر فيها اساسا هى حياة واحدة مش مستاهلة نقضيها فى التفكير فى حاجات عدت و خلصت لو فكرت كده هتلاقيها نعمة تطال:)