الثلاثاء، 13 مايو، 2008

عايزة عريس من كوالالمبور

انا اخترت اتكلم عن كلمة قديمة قدم التليفون ابو قرص او ممكن تكون انقرضت مع الديناصورات و الطرابيش بيتهيألى كل اللى فى جيلى سمعوا عن الكلمة دى بس ما شافوهاش و كلهم بيدوروا عليها فى فارس احلامهم
منهم اللى اتوهم انه لقاها و منهم اللى لسه بيدور و منهم اللى زيي عارف انها مش موجودة فريح نفسه و خدها من قصيرها
و ما حاولش يدور عليها ...
انا بتكلم عن "الرجولة" لا مش بتكلم على انك تربى شنبك لحد ما يوصل لودنك
ما هو سيد قشطة عنده شنب كده بقى راجل مثلا؟
ولا على انك تشرب سجاير ولا شيشة و تجيب لنفسك سرطان
بس عشان تمشى فى الشارع فرحان بروحك و فاهم انك كده راجل
ولا انك تعلى صوتك و تهين مراتك عشان تبان انك اقوى فى حين انك انسان جاهل و مريض بتطلع عقدك
على واحدة لا حول لها ولا قوة
ولا انك تمشى تعاكس اى حاجة معدية قدامك
عشان دى اكتر حاجة ممكن تعملها فى حياتك و لو حاولت تكلم بنت هتقف تتهته زى الاهبل قدامها
و فاكر انك لما تهين واحدة ماشية فى حالها تبقى كده راجل
ولا انك توقع بنطلونك و توقف شعرك
عشان تبقى شاب cool و يقولولك يا مان
الى اخر هذا الهجص... انا بتكلم عن الرجولة اللى تبهر اى ست فى الدنيا
بعيدا عن الشكل المشوه للراجل الشرقى اللى موجود دلوقتى بتكلم عن الراجل اللى بيعرف يشيل مسؤولية بجد اللى بيعرف يتعامل مع الست و يشوف عقلها قبل جسمها
الراجل الرومانسى اللى لو اتجوز مارجريت تاتشر يحولها لنانسى عجرم مش رومانسية التسبيل و الاسطوانات المحفوظة ولا بتاعت 0900و ابعت لحبيبك رنة عشان يحبك اكتر ولا بتاعت دباديب الفالنتين و الورد اللى على الفاضية و المليانة
انا اقصد الراجل اللى بيتعب عشان يوصل للبنت اللى بيبحها
و يعمل المستحيل عشانها مش لازم يركب حصان ابيض ولا يجيبلها لبن العصفور
كفاية انه يقدر قيمتها و يعرف غلاوتها عنده
الراجل اللى الشهامة فى دمه
مش اللى غاوى منظرة و شو على الفاضى
و هو اساسا ميسواش ربع جنيه مخروم
الراجل اللى لما يحب يبان فى عينيه و اللى مش بيربط بين دموعه و رجولته اللى يعرف يحسس حبيبته بالامان حتى لو كانوا عايشين فى العشوائيات
اللى ثقته فى نفسه تخليه عارف و متأكد
ان قيمته مش بعدد ارقام التليفونات اللى عنده ولا بعدد المغامرات اللى عاشها قيمته فى عقل ناضج نضيف و احساس بالمسؤولية ناحية البنت اللى بيحبها و صدق و شجاعة يخلوه يوم ما احساسه ناحيتها يتغير يقولها
من غير ما يخلق مبررات تخليه يعمل حاجة تجرحها
اللى يخلى الست فرحانة انها ملكه هو دونا عن الناس كلها مش عشان هو ازكى واحد فى الدنيا ولا عشان بيلبس سينييه
ولا عشان راكب كرايسلر و عنده بيت فى مارينا و فيلا فى ايطاليا لكن عشان هى عارفة و متأكدة انه هيسندها لما تحتاجه و انه مهما الدنيا اتغيرت حواليها هيفضل هو الحاجة الوحيدة الثابتة فى حياتها هم راحوا فين دول؟

هناك 6 تعليقات:

نورهان سراج يقول...

دماغك بتعجبني اوي يا مصريه

بحس انك بنت مصريه وشرقيه فعلا

الرجوله يا ستي بالمعني اللي انتي شايفاه واللي انا موافقاكي فيه جدا انقرضت
فين الراجل اللي تحسي معاه بالامان حتى لو كان اضعف مخلوق في الدنيا
اهو ده اللي هافضل ادور عليه طول عمري ومش هالاقيه
هو عدى في حياتي مره..وعشان النوع ده المفروض ميكونش موجود اساسا في مجتمعنا الظريف ده..وجوده مطولش في الحياه
نهايته..بوست حلو اوي..وانا زيك نفسي الاقي راجل بجد..مش راجل مسقط بنطلونه ومبين البوكسر وفخور بيه جدا ولا كأنه وسام واخده

banouta masreya يقول...

اولا بجد انا اللى مبسوطة جدا ان اللوج عاجبك و انتى كمان كتاباتك حلوة اوى و بتعجبنى جداجدا

اما عن الرجولة دى فانا معنديش اى امل انى الاقيها بالشكل ده فى حد ولا شفتها فى ناس من اللى حواليا ولا حاسة انى هشوفها بعدين...بالذمة فين و امتى و ازاى لما كل اللى معايا فى الجامعة و معظم اللى بشوفهم فى الشارع موقعين بنطلوناتهم و ماشيين يتقصعوا زى البنات؟و اكبر حاجة شاغلة دماغهم ازاى يكلموا البنت الحلوة اللى ميعرفوش عنها حاجة غير انها حلوة يخرب بيت الهيافة يعنى:D

samamasr يقول...

حاجة نفسي أقولها قوي :(


إنتي ممكن تلاقي النموذج ده


بس يكون بعييد :)


وفيه بنات سعيدة الحظ بتلاقيه :)




لسة بكرة جاي :)


وفيه نصك التاني :)


إللي اتخلقتم لبعض :)


متهيألي يمكن يكون مختلف عن الصورة اللي بترسميها

وهتحبيه بعيوبه :)


عامة..كله متهيألي :)



بس كدة كدة هتحبيه :)



بنات كتيرة أعرفها


رسموا صور .. وقالوا بغيرها مش هنرضى



بس مع نصيبهم


قالوا..هو طيب :)

samamasr يقول...

ويمكن تلاقي النموذج ده..وتقولي معقولة لسة موجود في زماننا :)


بس..يفضل بعيد :)






عامة...فيه نماذج كتيرة قوي حلوة بجد...صدقيني :)



أنا شفت نماذج كتيرة..فعلا حلوة :)

samamasr يقول...

:'(

banouta masreya يقول...

طيب انتى بتعيطى ليه دلوقتى :)))
انا مش حاطة لستة طلبات زى البنات اللى بيبقوا عايزين واحد متفصل عليهم و بينسوا انهم مليانين عيوب

انا بتكلم عن الرجولة اللى بجد و دى مش صفة ولا حاجة زيادة انا بدور عليها
ده الاساس اللى لو ما كانش موجود يبقى ملهاش لازمة اى علاقة فى الدنيا بقى

يعنى انا هتجوز ولا هحب واحد على ايه ازا ما كنش راجل بجد هحبه عشان انا الى اقف جنبه ولا انا اللى اطمنه اكيد لأ

و بعدين انا مش عايزة احبطك بس انتى عندك نظرية متفائلة زيادة عن اللزوم :))

و انا لا بدور على نصى التانى ولا هدور من الاساس اللى شايفاه حواليا سد نفسى عن الفكرة من اصلها:D