الأحد، 8 مارس 2009

متتاليات..

Benjamin Button
بعيدا عن ان الفيلم المفروض يتكتب عليه انه للكسلانين فقط نظرا لان الشخصيات اللى ما بتعرفش
تقعد على بعضها 3 ساعات زى حالاتى هتيجى على اخر الفيلم و تنهار لكن فكرة ان واحد يتولد عجوز
و يعيش حياته بالعكس فيها شبه كبير من حياتى مش لازم افسر..بس يا خوفى اجى فى الاخر و الاقى نفسي اتسخطت و محتاجة اتعلم الكلام من الاول و ان كان ده هيريح ناس كتير الصراحة..
غريبة اوى نقط التقاطع بين الواقع و الافلام فيلم فى حياة كل منا مشاهد يتمنى يعملها pause
و غيرها يتمنى انه يعملها replay و اخرى يدفع نص عمره عشان يسجل عليها و ما يشوفهاش تانى فلاش باك صورة قديمة لحضن جامع بنتين الشبه بينهم اقرب للتوائم
منتهى الامان..
فضل كبير من ربنا ان الواحد يلاقى حاجة فى الماضى يحنلها
لكنه اولا و اخيرا بيفضل..مجرد حلم احلام كنت فاكرة ان كل ما الواحد بيكبر احلامه بتكبر معاه
اتارى ان كل ما الوقت بيعدى كم التنازلات بيزيد اكتر
و يبقى الحلم الوحيد المشترك بين البشر هو البحث عن وطن
وطن مش شرط تكون البلد اللى اتولدت فيه و مش شرط تكون بلد من الاساس فالوطن هو كل مكان بتلاقى فيه نفسك
و بتلاقى فيه مجال لاحلامك انها تخرج لارض الواقع و لكلامك انه يتفهم من غير ما تقوله و لعقلك انه يتقدر حتى لو كنت ما بتقولش غير سخافات يمكن يكون بيت على البحر فى جزيرة مافيهاش بنى ادم و يمكن يكون حضن من سند حقيقي عارف و متاكد انه مهما الدنيا اتهزت حواليك هيفضل دايما موجود بعيدا عن زحمة الحياة زحمة كم مهول من البشر دخل حياتى مؤخرا طبيعى و بديهى ان بنى ادمة غير اجتماعية بالمرة زيي
يبتدى يبان عليها بوادر الانهيار العصبى بس على مين..
دى احسن فرصة عشان اجبر على التعامل مع نوعيات عجيبة من البشر
و بعدين تبدأ عملية الفلترة فلترة اكتشفت انه بالوقت الناس اماكنها بتتغير فى حياتك زى الشطرنج شوية بتلاقى وزير بتلجا له عشان ينصحك و شوية بتغير فى العساكر اللى عايزهم يفضلوا حواليك و كتير هتلاقى الوزير بيرجع لمرتبة العساكر..او العسكرى بيطلع لمرتبة الوزير لكن الاكيد ان الملك بالنسبالى ما اتغيرش تغيير ما بحبش التغيير على فكرة يمكن من كتر ما شوفت تغييرات كتير فى حياتى اتمنيت ان الملل المصاحب لعدم التغيير يكون واحد من ثوابتها صدق اللى قال ماحدش عاجبه حاله و يمكن دى من اكتر الثوابت اللى مش محتاجة تفسير! التفسير الغبى للناس اللى بتكره الكاميرات هو التخلف التكنولوجى و التفسير الابسط ان الكاميرا هدفها حفظ اللحظات المميزة مع الناس المميزين فالطبيعى لما تختفى اللحظات المميزة من حياتك..
انك ما تهتمش بانك تمتلك كاميرا Zoom in - مش لازم تكون خارق الذكاء
عشان تعرف انها عشان ما خدتش الورد تبقى مش بتحبك - ولا لازم يكون عندك اسانسير ازاز و مدخل عمارة رخام عشان بنتك تلاقى عريس لقطة بالمناسبة الرخام ده كان رأى تانت جارتنا جيرة عودت نفسي ما ارتبطش بالامكان بما انى بغيرها زى ما بغير هدومى و اتعودت على ان الجيران ما يكونوش اكتر من اشخاص بقولهم صباح الخير لما نتقابل صدفة و مش كلهم كمان كلهم -بيقولوا انهم عارفين انا عايزة ايه بس السؤال اللى بيطرح نفسه هل كلهم عارفين اللى هم عايزينه؟ -و كلهم بيقولوا انهم عرفوك..بس ما حدش منهم عرفك زيي دلوقتى بالذات كل الاماكن بقت بتفكرنى بيك اماكن فى القلب قهوة تريانون اسكندرية..شريط الترام..الراجل بتاع اللعب و المنتزة و جليم فى شهر اغسطس و محطة الرمل و بنت لسه متعلمة العد
بس عشان تحسب عدد اللى يعرفوك و عايزين يسلموا عليك..ذكريات ذكرى
17-3-2002
وحشتنى اوى بجد ملحوظة:طريقة الكتابة دى مش من اختراعى انا اكيد :)

هناك 32 تعليقًا:

Founoon يقول...

كنت ماشية زي الفل لحد اخر نقطة

انا باين قلتلك قبل كدا ان 17 مارس يوم ما بنساهوش في حياتي
بس يوم ذكراه سيئة جدا الحقيقة :)

فكرة المتتاليه رائعة
هرد بكلمة بردو انتي قلتليها في اول الموضوع
غريبة نقطة التقاطع بين الاشياء عموما حتى وان كانت تبدو غير مترابطة

انا حرة يقول...

هو انا قلتلك قبل كده انك هتموتينى ناقصة عمر؟ :)
رعبتينى المرة دى مش خضتينى بس :@

leeno يقول...

مش معقول طريقتك شو حلوة بالكتابة و شو انك بتشدي الواحد يتابع شو عم تكتبي

عنجد و الله برافو عليكي

على فكرة في شغلات كتبتيها استوقفتني
لتشابه الاحاسيس و احيانا الذكريات

على فكرة 17 مارس عيد ميلاد مرات اخويا و اهو نقطة تقاطع برضه ههههههههههههه

leeno يقول...

احلام
كنت فاكرة ان كل ما الواحد بيكبر احلامه بتكبر معاه
اتارى ان كل ما الوقت بيعدى كم التنازلات بيزيد اكتر
و يبقى الحلم الوحيد المشترك بين البشر هو البحث عن وطن

وطن
مش شرط تكون البلد اللى اتولدت فيه
و مش شرط تكون بلد من الاساس
فالوطن هو كل مكان بتلاقى فيه نفسك
و بتلاقى فيه مجال لاحلامك انها تخرج لارض الواقع
و لكلامك انه يتفهم من غير ما تقوله
و لعقلك انه يتقدر حتى لو كنت ما بتقولش غير سخافات
يمكن يكون بيت على البحر فى جزيرة مافيهاش بنى ادم
و يمكن يكون حضن من سند حقيقي عارف و متاكد انه مهما الدنيا اتهزت حواليك
هيفضل دايما موجود بعيدا عن زحمة الحياة



تحديدا فدول


بتتكلمي عني

Desert cat يقول...

بصى انا لو شوفتك دلوقتى هقتلك بجد
انا طول البوست بقرأ وانا منبهره بانفعالاتك مع المواقف ووقوفك عند اللى مش فيه اى انفعال ونهايات البراجراف اللى بتكون دائما عنوان برجراف جديد
وفجأة تصحينى على تريانون وفجأة لاقتنى بقول آآآآآآآى اصلك جيتى على اجمل ذكرى فى حياتى اعااااااا
اعمل فيكى ايه بقى دلوقتى ابوسك يعنى
ههههههههههههه

الشارده يقول...

انتى هايله بجد

بجد عايزه اقولك انك خساره فى البلد دى وفى الزمن ده
افكار فى منتهى النقاء والطهر والواقعيه

على فكره انتى بتفكيرنى بصلاح جاهين جراح الاحاسيس والمشاعر

Reem يقول...

بجد ربنا يحميكي من كل شر

طريقة كتابتك بجد حلوة واسلوب الانتقال

من نقطة لنقطة بالطريقة دي و انك

باسلوب غير مباشر بتحي و تصحي بيها

احاسيس اللي بيقرالك

بجد ربنا يحميكي و يديم عليكي نعمة

الكتابة بالشكل ده

The Seagull يقول...

وطن
مش شرط تكون البلد اللى اتولدت فيه
و مش شرط تكون بلد من الاساس
فالوطن هو كل مكان بتلاقى فيه نفسك
و بتلاقى فيه مجال لاحلامك انها تخرج لارض الواقع
و لكلامك انه يتفهم من غير ما تقوله
و لعقلك انه يتقدر حتى لو كنت ما بتقولش غير سخافات
يمكن يكون بيت على البحر فى جزيرة مافيهاش بنى ادم
و يمكن يكون حضن من سند حقيقي عارف و متاكد انه مهما الدنيا اتهزت حواليك
هيفضل دايما موجود بعيدا عن زحمة الحياة


البند ده أثر فيـا أوووووي :)
لأنه هي دي مشكلتي الأزلية دلوقتي ..
مش لاقية نفسي .. مش لا قية وطني للأسف .. الحيـاة عندي بقت فيها كم لامبالاه وشرود واستسلام رهييييييييب :)


بالنسبة لذكريات شهر مارس .. فمارس كله ذكريات عندي الحقيقة :D منهم حدث مهم جـدًا من تلات سنين :D



ميرسي على البوست الأكثر من رائع :D

مواطن مصري يقول...

قهوة تريانون اسكندرية..شريط الترام..الراجل بتاع اللعب
و المنتزة و جليم فى شهر اغسطس و محطة الرمل
و بنت لسه متعلمة العد
بس عشان تحسب عدد اللى يعرفوك و عايزين يسلموا عليك..ذكريات



متنسيش محطة الرمل و العجمي و ستانلي
و القلعة

بوست رائع جدا و الفلم انا زعلت انو مخدتش اوسكار الفلم دة المفروض يدرس في السينما

la tormenta يقول...

أربع حاجات في الموضوع دقوا على قلبي:
صورة الدومينو بما اني من عشاق
- الدومينو و مرات ألعب مع نفسي ..و نفسي تغلبني :DDD

-طريقة الكتابة بالمتتالية لأني من عشاق الرياضيات

- شهر مارس اللي اتولدت فيه و مليء احداث على كل موال في حياتي

-كلامك عن الوطن
و تصدقين انه البشرية صرفت قرون تعرف بها الوطن و الهوية ووجع راس و اتضح انه كله كلام Les démagogues و انه كلامك هدا اللي بالنهاية dissolution لمعنى الوطن أقرب للقلب:DD..وأزيدك أسهل للهضم:DDD

حبيت أسأل عن رقعة الشطرنج :الملك اللي مايتغيرش يرمز ل ايش عندك؟؟:المقدس و لا القلب ولا انت بالنسبة لك المقدس هو القلب <---قارئ يمشكل :D

samamasr يقول...

أنا رديت راح فين الرد بس :)

mUsLiM يقول...

وطيور البحر تشهـد

كيف أن الدمع فى عينى تنهـّـد

كيف أن الماء كالموج العنيــف

يتراخى

ويقسـو

ويصعــد

حيث أن الصدر يا نبض الحنان ِ

صار للأحزان مقعــد

Superman يقول...

(قهوة تريانون اسكندرية..شريط الترام..الراجل بتاع اللعب
و المنتزة و جليم فى شهر اغسطس و محطة الرمل )

انتي متذوقة ممتازة للأسكندرية.. :D

كل الاماكن دي حلوة..و كويس جدآ انك ماقلتيش ستانلي و بحري..عشان دول بتوع السياح :D

لسان جليم..المنتزة..هم الاماكن اللي بحس نفسي فيهم حر و طاير..هم دول احلي مكانين تحسي فيهم انك في الاسكندرية بجد..

Here i'm يقول...

بما أن الموضوع حلو فحرد :p عجبتنى قوى طريقة كتابة البوست ..

Benjamin Button

عارفة أنا معرفش فى الكلام اللى من نوعية أن الهم و الحزن كبرونى و الكلام دا .. بعتبرهم أغنية من اغنيات حماده هلال :D .. اللى اعرف حاجة واحدة .. أن ربنا بيختار ناس معينة بيشيلها هم كبير هما قدوه .. و فى نفس الوقت بيكون فى هايفيين ملهمش أى لازمة لا بيشيلوا هم ولا أى حاجة ... و ربنا قال " لا يكلف الله نفسا ألا وسعها " .. و علشان كده ربنا حرم الانتحار .. علشان مهما كانت المشاكل و الهموم و الأحزان أحنا قدها .. لو ربنا أختارك تتحملى مسئولية فلازم تعرفى أنك متوسطة الحال فى غيرك شايل هم أكبر من همك و فى غيرك هايف ملهوش لازمة فى الحياة .. وصلت



حستنى نتائج الفلترة.. :D


لسان جليم .. عم محمد بتاع عربية الفول عند قهوة الغرفة التجارية .. مينى ميراج .. بيتزا مينوش ..قهوة القاهرة .. أفندينا فى الشتا ..

Here i'm يقول...

شهر مارس دا عايز قصائد :D

الحاجة الحلوة الوحيدة اللى حواليا بيحتفلوا بيها و بعتبرها حلوة علشان اللى حواليا فاكرينها .. هو عيد ميلادى

و طبعا عيد الأم ..

غير كده شهر مارس بالنسبالى كوارث .. و أن شاء الله أغلبها تنتهى بمارس دا .. يارب

انا حرة يقول...

Leeno
ربنا يخليكى يا لين يا رب..ده من زقك والله :)
امال انا ليه مش شايفة كده خالص :D

ربنا يخليلك مرات اخوكى..
انا عندى اليوم ده ذكرى لحاجة مش لطيفة مش هقولها بقى ما دام بيوافق عيد ميلاد :)

و دول تحديدا اقرب اتنين لقلبى على فكرة

انا حرة يقول...

Desert cat
هههههههههه
انا فاكرة تعليقك مرة هنا زمان على تريانون ده بالذات
شكلها هتطلع نفس الذكريات فى الاخر ولا ايه :D
نورتينى كالعادة يا حنان

انا حرة يقول...

ايمان
انا مش عارفة اقولك ايه على فكرة
انتى عارفة معزتك عندى قد ايه بجد
انتى اللى بنى ادمة نضيفة لاقصى درجة..
اللى بتشوفيه فى الناس بيبانلك كده عشان انتى من جواكى اساسا احلى منه بكتير

بس فين الموضوع اللى وعدينى بيه..انا اساسا زنانة و ما بنساش على فكرة :))

انا حرة يقول...

ريم
على فكرة والله مش لاقية كلام ارد عليكم بيه :)
ربنا يكرمك يا ريم بجد كلامك دايم بيفرحنى اكتر مما تتخيلى

انا حرة يقول...

يويو
اللى بقولك انه لقى نفسه يبقى كذاب رسمى :)

كلنا بندور على حاجة اكبر مننا ننتمى ليها..بس ايه هى بجد مش عارفة

يا رب تكون ذكرياته عكس ذكرياتى انا..اليوم ده كان من اسوا ايام حياتى

و ميرسى ليكى على كلامك اللى بيرفعلى معنوياتى دايما :)

انا حرة يقول...

مواطن مصرى
ميرسى ليك بجد
و شوقتنى اكتر انى اشوف الفيلم

انا حرة يقول...

تورمنتا
ابقى علمينى دومينو بقى لانى اقصى حاجة اعرفها عنها انها مربعات بيضة و منقطة باسود :D
هههههههههه حلوة اوى demagogue دى..فكرتينى بال Terminologie السياسية بتاعت الجامعة
اصل الكلام الكبير اللى معناه فارغ بيزهقنى..الدنيا ابسط من كده بكتير

لا قلب مين..انا مش بتاعت الكلام ده:D
الملك عندى بيرمز لشخص واحد بثق فيه ثقة عمياء..ثقة ماحدش خدها غيرها فى حياتى و ما اعتقدش ان فى حد ممكن ياخدها بعدها..بس كده :)

انا حرة يقول...

تلاقيه اتاخر فى البوسطة يا ايمان :D
كنتى كاتبة ايه طيب قوليلي

انا حرة يقول...

حلوة اوى يا مصعب
معبرة جدا يعنى الحقيقة :)
دى بتاعتك دى ؟

انا حرة يقول...

مش نباهة منى يا محمد والله :D
اصل ما كانش في مصايف غيرها زمان قبل الغزو الماريناوى الحالى

بس الكوميدى فى الموضوع ان بيتنا بقاله 30 سنة فى جليم ولسه عارفة اللسان ده قريب
من الحاجات القليلة الكويسة اللى قبارى عملها فى حياته انه قاللى عليه :D

و عندك حق تحس بقمة الحرية هناك..انا حسيت كانى ماشية على المية اصلا

انا حرة يقول...

يعنى هنقول كام مرة ان ده الطبيعى بتاعى:P
متشكرة يا كوبرى والله بتكسفنى باخلاقك العالية

هم مين و حزن ايه..النغمة دى مش بتاعتى انت عارف
مش همثل انى مبسوطة يعنى لانى تعبت من كتر التمثيل بصراحة..بس مش هى دى النقطة
الفكرة كلها انى مقتنعة ان المخ زى اى جزء تانى من الجسم كل فترة بيبقى ليه شغلانة مختلفة على قد سن صاحبه :D

فلما يكون اشتغل ب150% من طاقته بدرى كده..طبيعى انه يبدأ المنحنى بتاعه ينزل
سيبك من التخريف اللى بقوله ده :D
من الاخر يعنى من كتر التفكير خايفة الموضوع يقلب معايا بالعكس و يجيلى تخلف :D

مش معنى كده انى خارقة الذكاء لا سمح الله..
بس ساعات كتير بتعدى بحاجات اكبر بكتير من الطاقة الطبيعية للى فى سنك
يمكن مسؤولية زى ما بتقول..او ابتلاء
لكن ما يمنعش ان ساعات الواحد بيجيله وقت يحس فيه انه مش عايز يكمل..او بمعنى اصح مش قادر يكمل
فترة استسلام قصيرة كل وقت للتانى ما بتبقاش مضرة على فكرة
بس مش هنتحر يعنى.. ما تفرحش كده :D

تصدق لقيتنى لو فلترت الناس اللى فى حياتى هلاقى نفسي تقريبا لوحدى فى الاخر :)

25 مارس دا كان اهم يوم فى السنة عندى لحد ما عرفت الخبر الصاعق بتاع انه يوم عيد ميلادك..هو احنا مش اتفقنا انك هتغيره :D

و بعدين كوارث ليه خير؟..عشان الاقرار الضريبى بتاع املاكك يعنى؟
يا كوبرى ده حق الدولة عليك ما تقولش كده لو سمحت :D

Here i'm يقول...

لا أحنا أتفقنا أن يوم 25 مارس زاد أهمية و غلاوة عندك :p .. بتنسى أنتى أنا عارف :D

لا لا لا أنا قصدى أشوف أسمى فى القايمة ولا لأ ... :D

صدقينى .. علشان تصدقى نظريتى .. اللى جاى أصعب .. يبقى دلوقتى لازم تقفى صح على رجليكى علشان اللى جاى أصعب .. و حاولى تعملى day off كل شويه ..

la tormenta يقول...

ايه أعلمك ماعندي مانع على الأقل شكر على سياسة الصمت اللي قلت لي عليها:D
حصلت من زوجي على كمية هدايا و وعد بأجازة في الامارات بين 14 و 30 مارس يعني 15 يوم تلاقيه حاسس انه تبذيييير :DDDD
و الأهم اني راح أحضر حفلة في أبو ظبي يوم 27 للتارييييييييييييييخ
ça c du bon travail :DDDDD
JE SUIS TRES HEUREUSE TU PEUX PAS IMAGINER:)))

samamasr يقول...

سيت والله كاتبة إيه :) بإذن الله تبقي بخير :)

انا حرة يقول...

ههههههه شكلك كنت لوحدك فى الاتفاق ده يا كوبرى :D

اكيد اسمك فى اللستة جنب اسم خالو على طول :D

اصعب ولا اسهل بقى بجد ما بقتش بتفرق..
المهم ادعى انت بس :)

انا حرة يقول...

تورمنتا موتينى من الضحك بجد :D
اى خدمة بجد ca me fait plaisir
انا شايفة ان حزب نون النسوة ابتدى ياخد حقه فى البلوج ده :D
ان كيدهن عظيم :)

moi aussi je suis tres contente pour toi, bon amusement a abu dhabi :)

انا حرة يقول...

انا كويسة الحمد لله يا ايمان :)
يا رب انتى كمان تكونى بخير