عزيزتى حواء..ما تخليهوش يبص بره عشان ما يجيبلكيش ضرة!!!!

و انا بقلب فى جروبات الفيس بوك لقيت جروب اسمه كفاية صحوبية عايزين نتجوز قلت اتفرج على اللى عايزين يتجوزوا دول لقيت موضوع عامله واحد

(هسيب الكلمة المناسبة لتقدير اللى هيقرا) اسمه كونى له اربع حتى لا يتزوج عليكى! بجد يعنى*&%$$#*@@ على اساس ايه مش فاهمة؟!! سيادته بيهدد السنيورة اللى هتتجوزه انها لو ما اتصرفتش فى نفسها و تكاثرت ذاتيا و بقت اربعة المحروس حبيب قلب ماما هيتجوز عليها اللى تحت ده تفاصيل الموضوع: الأولى : الأم انه يحب الام . الام فى حنانها, فى عطائها اللامحدود, عطائها الصامت الذى لا يتبعه من و لا اذى يريد اما فى سعة صدرها معه وفى تسامحها و عفوها ان هو اخطا و فى قبلتها و تشجيعها ان هو اصاب فى تسليتها له و الاخذ بيديه فى الضراء والفرحة و البهجة فى السراء فى سهرها بجواره عند مرضه او اثناء عمله و فى بشاشتها و سعادتها عند حضوره و قلقها و لهفتها عند غيابه انه يريد امه التى فقدها بعد زواجه

و يظل يحن اليها كلما احس بحاجته لها والله هعيط من التاثر..ده ايه الحلاوة دى ولا الرجولة..مش ممكن يخواتى بجد مش فاهمة يعنى لما هو عايز يسيب امه و يتجوز امه برضه كان ساب ماما ليه من الاول؟!!! الثانية : الحبيبة ثم هو يريد الحبيبة العاشقة التى تتفنن فى سرقة قلبه وفى اثارة رجولته يريد امراة لعوب تبهره بقوامها و عطرها كما تبهره بانوثتها و سحرها يريدها ان تذوب بين يديه عشقا و شوقا و هياما انا شلت سطر من فوق عشان ما اتشلش من ناحية و عشان احافظ على نضافة البلوج من ناحية تانية بس كله كوم و لعوب دى كوم تانى!!! ازاى عايزها متربية و بنت ناس و قطة مغمضة و رقيقة و هادية و ما بتفهمش غير اللى هو عايزها تفهمه و لعوب فى نفس ذات الوقت؟ اسكت يا لسانى بجد الثالثة : الصديقة ثم هو يريد الصديقة التى يبث اليها همومه و يستشيرها فى اموره يريد صديقة تحفظ سره و تستر عيبه لا زوجة تفشى سره و تفضح عيبه بين جاراتها و صديقاتها و اهلها يريد عقلك و حكمتك و مشورتك لا لسانك و ثرثرتك فيما لا يهمه يريد ان يتكلم فتحسنى الاستماع لا ان تتكلمى فتكثرى الشكوى من اعباء المنزل و مشاكل الاولاد فيلجا الى الصمت المنزلى او الى ترك البيت و قضاء معظم الوقت مع اصدقائه الذين يفهموه و يسمعوه يعنى هو يتكلم و انتى اسمعى لحد ما يجيلك طرش لكن انتى تتكلمى و لا تشتكى تبقى تستاهلى انه يتجوز عليكى مش كان يتجوز واحدة خرسا افضل برضه!!!! انما مسؤولية و اولاد و مشاكل و مصروف البيت..مش قصته و نعم الرجولة والله الظاهر حد ضحك عليه و فهمه ان الجواز ده رحلة لدريم لاند ولا كوكى بارك بس جامدة يبث دى..مثقف اوى بسلامته الرابعة : الخادمة ثم هو يريد الخادمة- نعم خادمة - يريدك ان تعدى له الطعام بيديك حتى و ان كان لديك خادمة يريدك ان ترتبى اغراضه بنفسك يريد ان يرى لمساتك انت فى اركان البيت يريدك ان تعتنى بملابسه و مظهره و مظهرك و مظهر اولاده يا نهار اسود و منيل!!!!! خدامة..لا و واضحة و صريحة و متكررة مرتين و بالنحوى!!! و على الراغبات فى الفوز بقلب المحروس التمتع بالصفات التالية - الا يقل سن المتقدمة عن السبعين

عشان تكون ام متودكة فى موضوع الامومة ده - ان تكون من نسل القديرة تحية كاريوكا (عشان الشرط الاول بتاع الامومة يتوافق مع الطلب التانى اللى هو اللعوبية) - ان تكون عضوة فى جمعية الصم و البكم عشان تسمع و ما تتكلمش - و اخيرا ان تثبت بالاوراق الرسمية صلة الدم بابلة نظيرة و لو معاها شهادة عليا من معهد التدبير المنزلى هيتعهد المحروس بضمان الاولوية ليها فى طوابير المعاتيه اللى هيستنوا عليه اكتر من 27 ثانية قبل ما يرموه هو و البطيخة و بوكيه الورد و اللى ربته على الانانية دى فى اقرب عبارة طالعة ايطاليا بعيدا عن قضية المراة

و رغى الستات الفاضية بتوع المراة الحديدية

و حقوق الفئة اللى اتفطست لحد ما بقيتش باينة من اول اهل مش هاممهم غير المهر لاب مش شايف فى بنته غير عار عايز يخبيه لاخ بايظ بيمارس على اخته رجولة مش موجودة اساسا لعريس لقطة باعت ماما

تعاين المحروسة اللى هيتجوزها عشان لو محتاجة قطع غيار لواحد تافه مش هامه غير الشعر الاصفر و العينين الملونة لمجتمع عايز غسيل مخ

عشان يعرف يحترم ام و اخت و زوجة و صديقة و ابنة و بما انى زهقت من الكلام فى الموضوع ده و بما انى عارفة و متاكدة ان الاحاديث و الايات اللى بيتحججوا بيها فى اسلوب معاملة المراة لزوجها فى قدامها ايات و احاديث

عن مراعاة المراة و تكريمها و احترامها و احترام ادميتها و بما انى عارفة ان اللى بيفكروا بالاسلوب العقيم ده مش قليليين ابدا و لانى اقتنعت تماما ان فى بنات تستاهل اكتر من كده بغباوتهم و ان اللى مش عارفة تختار صح من الاول يبقى ذنبها على جنبها و بعيدا عن وجهة نظرى الشخصية من التعدد و من المتعددين (اللى هم بيشجعوا تعدد الزوجات يعنى) انا عايزة اسأل سؤال من زاوية تانية خالص ليه الواحد مش بيبص لنفسه قبل مايحط توقعات هلامية من الناس اللى بتشاركه حياته؟ يعنى بسلامته ما قالش هو هيعمل ايه عشان يكون جدير بالخدامة اللى عايز يتجوزها؟ هل هو كمان هيكون ليها اربعة حتى لا تزوغ عينيها؟

ما تخيلش مثلا انه لو كان راجل و فهم معنى الرجولة بجد

كانت هى لوحدها عملت من نفسها 18 عشان تكون جديرة بيه؟ و بعيدا عن انه وزنه وزن تلاتة و انى ما جبتش لينك الجروب هنا خوفا على البنات اللى هيقروا من الفتنة بس و غلاوة ماما عندك اشترى مراية و بص لنفسك قبل ما تدور على الاربعة! اللهم لا تؤاخذنا بما فعل السفهاء منا ملحوظة:الصورة اللى فوق دى مسروقة من هنا

**********

نقطة و من اول السطر

دى صورة صورتها فى اسكندرية من حوالى اسبوعين

ايه دا؟..لا بجد مش فاهمة يعنى

لو واحد نازل من بيته و هو مقرر مقدما انه نازل لهدف ما

و واخد معاه واحدة نازلة من بيتها عشان نفس الهدف ال"ما "دا

و راحوا و اختاروا المكان اللى مش مستخبى نهائى بالمناسبة

زيهم زى كلاب و قطط الشوارع

هل اتنين بالتفكير و المنطق دول ممكن تأثر فيهم جملة

مكتوبة على صخرة فى عرض البحر

هموت و اعرف العبقرى اللى فكر فى الفكرة الجهنمية دى!!!

مش عارفة ليه افتكرت الايميلات بتاعت المعجزات الوهمية

دى بتنسب حاجات لدين قوى من الاساس

و مش محتاج اضافات

من معاتيه رموا عقولهم مع جزمهم على ابواب الجوامع

و دى تصرفات ناس عينوا نفسهم رقباء على خلق الله

و بصولهم من فوق برج عاجى على اساس انهم بيخاطبوا ملايكة مش اشخاص خطائين

و الاتنين نسيوا ان الرقابة لو ما كانتش من جوه البنى ادمين

ولا مليون صخرة و ايميل ما هيعملوا فرق

و الاتنين بيجتمعوا فى ان المخاطِب غبى و المتلقى اغبى!