الجمعة، 12 ديسمبر 2008

تخاريف..(5)

شفت اليفط اللى فى مصر الجديدة بتاعت الشباب الجد اللى بيبنى مش بيهد هى قديمة بس انا اول مرة اشوفها.. فكرتنى بشعارات فيلم الجردل و الكنكة الشهيرة "الراجل الحق يحب الحق و فهمى بيه الراجل الحق" و" الاسفلت منور ليه ..المهيطل ماشى عليه" السؤال الغبى هيكون مين اللى حاططها؟ و السؤال الساذج هيبقى
"و هو اسم الله على شبابه كان عمل ايه للبلد؟" غير انه طلع التصريح العبقرى بتاع المعارضة اللى بترجعنا لورا.. عشان كده بقترح تغيير شعار الحزب الى.. "مصر بتتقدم بينا..لوحدنا"
"حداد فقير قتل لاجل حفنة جنيهات و مئات فقراء الروح مثلوا بالجثث مجانا
و هم يحتسون الشاى امام الحواسيب" فاطمة ناعوت ادق وصف لحالنا..ناس فقدت الرحمة و الباقى فقد الانسانية الله يرحم البنتين و يصبر اهلهم

وزير داخلية اليونان قدم استقالته عشان شاب واحد مات برصاص البوليس اليونانى ابتديت اشك انهم عاملين اوفر للوزير بتاعنا "على كل مواطن مقتول او مسحول او متعذب فى الاقسام خمس علب امير عشان يلزق اكتر فى الكرسى" هو ما ينفعش نبدل؟

فى خبرين اتنشروا جنب بعض فى المصرى اليوم "اكتر من 20000 مصلى اجتمعوا امام جامع مصطفى محمود لاداء صلاة العيد" "القبض على 50 شاب بتهمة التحرش ببنات فى وسط البلد" هم دول غير دول..ولا دول هم دول .. ولا دى نقرة و دى نقرة..ولا ايه بالظبط

بجد ما بقيتش فاهمة!!

وزير الطاقة الامريكى رفد عالم مصرى بدعوى انه بيهدد الامن القومى الامريكى فالعالم راجع مصر بلده عشان تستفيد من خبرته و العالم نسى ان وزارة التعليم العالى بتاعت مصر بلده كانت بعتت لعالم مصرى تانى بيشتغل فى ناسا عشان ييجى لوظيفته الحكومية و يراقب على الامتحانات و على راى الزعيم مصر بلده مش محتاجة علماء..مصر بلده محتاجة صيع

شعبان عبد الرحيم بطل السجاير و بقى يضرب حشيش حتى انت يا شعبولا طلعت منافق!

مواطن امريكى اخترع مرهم سماه مرهم اوباما المرهم ده بيتباع على ebay
و بيعالج الشيخوخة و بيبيض السنان و بينضف الازاز فكرته جابتلى فكرة نميسة فى دماغى فكرت اننا نصنع مرهم شبيه بس يكون بيجيب الشلل النصفى
و العته الدماغى و التخلف العقلى و التلوث السمعى و البصرى
و الزحمة و الفقر الازلى و التحرش و حوادث المحور و فشل التعليم
و فساد الستشفيات و السحابة السودة و نصدره للسويد عشان هم عندهم نقص جامد فى الحاجات دى نسميه ايه ؟ مش هقول اكيد..كل واحد و نيته بقى ****** مش فاهمة فين المشكلة فى ان شيخ الازهر سلم على بيريز يعنى النواب الحلوين اللى اتشمللوا و رافعين قضايا و عاملين حملات و مكلفين نفسهم ما كانوش عارفين يعترضوا على اللى اكبر من شيخ الازهر و مسلم بلده على الحديدة للى جاى وراه..و اهو كله سلام ساعات كتير بحس ان النواب بتوعنا عايشين فى زحل!

فتوى جديدة لدكتور على جمعة بافضلية ذبح اضحية العيد فى فلسطين كلامى مش هيعجب ناس كتير..لكن انا مش مقتنعة بالمرة ما ينفعش يبقى عندنا اكتر من 14 مليون مواطن
عايشين فى العشوائيات ..و ندبح فى فلسطين ما ينفعش يبقى عندنا دويقة
و صعيد منهار و ناس مش لاقية تاكل.. و ندبح فى فلسطين ما ينفعش تقرير البنك الدولى يقول ان 20% من المصريين بيعيشوا باقل من دولارين فى اليوم و ندبح فى فلسطين و ما ينفعش يكون عندنا 16% معدل فقر و ندبح فى فلسطين عفوا فضيلة المفتى..الدبح هناك مش "اولى"!

كاميرات لرصد التحرشات الجنسية فى حديقة الحيوان بعيدا عن التعليقات المستفزة على الخبر فى كل المواقع تقريبا و اللى ان دلت على حاجة فهى بتدل على جهل و تخلف و غباء عدد مش قليل من البنى ادمين بس مش دى الفكرة يعنى اسيب شغلى و الم البنات اللى اعرفهم و نروح نقعد فى جنينة الحيوانات؟! و بالنسبة للشوارع و الميادين و جامعة الدول و وسط البلد..ايه بقى؟ الا اذا كان الهدف من الكاميرات حماية ابو قردان من التحرش بالقردة الام فى جبلاية القرود هى الناس دى بتفكر ازاى؟!!

نكتة اليوم "السفير المصرى بالنمسا يطالب اسرائيل بالتوقيع على اتفاقية حظر انتشار الاسلحة النووية " مش كان من بدرى يا فوزية؟ اخر جملة دى من عندى مش من الخبر! و من موقعى هذا بهدى سيادة السفير اغنية العندليب الاسمر بعد ايه..بعد ايه..بعد ايه

هناك 11 تعليقًا:

Here i'm يقول...

اليفط دى كانت ملية أسكندرية ساعة الأضراب .. و كنت باصصلها من منطلق أنه كويس الفكر يكون بالفكر .. جماعة تدعى للأضراب و جماعة تدعى لعدم الأضراب و صورة أيد فيها وردة و طينة .. المشكلة بقى كانت أن البوستر دا دخل الجامعة و دخل جميع الشركات .. طب أزاى ؟


فاطمة ناعوت أنا أبتديت أقرالها بتقول كلام حلو قوى .. كانت عاملة مقال عن فيروز فى عيد ميلادها فكرينى أبعتهولك .. و الله اللى حصل حرام .. جريدة الحوادث حاطة فى صفحتها الأولى صورة كبيرة لنادين و هيا جثة .. المساء و الجمهورية نازلين فرم فى البنتين لدرجة أن رئيس تحرير المساء أعتذر فى مقال ليه .. حرام و الله دا قذف المحصنات اللى حيين حرام فما بالك بالميتين ..


فى مقال أقريه بتاع فريد الشوبكى .. مش فاكر أسمه .. بيقارن بين مصر و اليونان .. المقال النهاردة اللى هوا أمبارح يعنى :D


بحس أن فى نوع من الشباب مثلا يعنى أدهم 20 سنة كلية تجارة و أهوى التحرش :D


العالم أترفد علشان مرضاش يكون مرشد للمباحث الفيدرالية .. يعنى الغبى لو كان وافق و كان أرشد عن صحابه العرب كان زمانه سلطان زمان .. أحب أقول للعالم الجليل .. مرحبا بك فى عالم سمسم سيدى ..



شعبان عبد الرحيم من زمان قوى و هوا بيضرب حشيش على فكرة .. و ليه بفة كبيرة قوى بتبقى معاه فى القاعدة و منهم ناس مشهورة .. لما كنا فى حماية كان أعتراضنا على شعبان علشان كان بيضرب حشيش بس كانت الفكرة علشان الحملة توصل للطبقة اللى تحت لازم يكون شعبان علشان كل الطبقة دى بتعتبر الحشيش سجاير .. شعبان حاليا هوا قائد حملة التوعية ضد أنفلونزا الطيور .. تفتكرى بكرا حيطلع يكون بيطحن عظام الفراخ و بيشمها :D


لا دا أحنا محتاجين مرهم تسلخات يكون مفهوش الحروف دى " ا ل ح ز ب ا ل و ط ن ى ا ل د ي م ق ر ا ط ى " و بلاش الحرف دا " ج "


أنا مش ضد أنه يسلم على بيريز أنا ضد رد فعله .. قال أيه مكنش يعرف أنه بيريز .. معنى كده بقى انه مش بيتابع تحركات الريس لما بيقابل بيريز .. معنى كده انه مش بيتابع لقاءات الريس .. ولا أيه يا ريس :D .. بالنسبة للأخوان فدول جامدين أخر حاجة .. دا يا شيخة رفضوا يوقعوا على مذكرة ترفع الحصانة عن أبراهيم سليمان .. علشان يوحدوا جهودهم فى مكافحة ناس معينة .. لا و الله !!



أنا شايف أن يكون فى كاميرات فى حمامات الرجال و حمامات السيدات علشان نمنع التحرش ... قال حديقة حيوانات قال


تلاقيه لسه سفير جديد بشوكه :D

كل سنة و أنتى طيبة ... بس أنا مصمم برضه أن اللى جاى أصعب :D

Here i'm يقول...

حاجة مهمة جدا نسيتها ..

اللى تحتاجه الدويقة يحرم على غزة ..

من فترة كان فى نقاش محتد .. مصعب و ماجا مع غزة و أنا مع الدويقة .. سألت سؤال .. معايا بطانية أديها لمين ؟؟ .. مين أولى ؟؟

و بعدين هما مش بيساعدوا نفسيهم أساسا .. رئيسهم لابس لبس الأحرام و فى السعودية و بيقول أن حماس بقيت اسوء من كفار قريش .. يظهر أن حج سيادة الرئيس فيه رفس عادى جدا

ابن الوليد يقول...

بالنسبة لليونان

نحن اجساد خاوبة نحن خرجنا من مسمي الانسان

فقدناالاحساس الكرامة

لقد بلغنا من الذل مالم يسبق احد من الامم

ولشعبولا
سوف يأتي اليوم الذي يتمنى فيه لو أنه بقي مكوجي

لعالم الذرة

اخرج من امريكا لكي يقتل فى مصر


بالنسبة لشيخ الازهر

لماذا يذهب هناك ويمثل الاسلام في حوار يعطي لاسرائيل حق الاستيطان والتطبيع
في الوقت الذي صافح عدو الله ورسوله استشهد 4 من الاخوة الفلسطنيين على أيدي جنوده الصهاينة
اقدامه على حضور هذا الحوار هو بحد ذاته خيانة للامةالاسلاميةو لدين الله
واعطي للحوار الصبغة الشرعية كأنه يمثل علماء الاسلام والمتحدث الرسمي عن المسلمين جميعهم

هل ادركتى يا بنوتة مصرية اين المشكلة !!


مساكين اخواننا في فلسطين غضوا الطرف عنهم

نحن والزمان عليهم يكفي ما يحصل لهم فهم لهم وضعهم الخاص

ويا here i'm

قتل وتجويع وتعذيب وأسر
وتنكيل وهدم وتخويف وحصر
ذل وإرغام وإحراق ونحر
وأهوال لست تدركهامالها حصر
وربي سوف نسأل عن مايحدث لهم

http://www.alshohooh-upload.com/uploads/images/alshohooh-2cc7386e69.jpg

http://www.alshohooh-upload.com/uploads/images/alshohooh-3c8a405b79.jpg

http://www.alshohooh-upload.com/uploads/images/alshohooh-6b9c596481.jpg

http://www.alshohooh-upload.com/uploads/images/alshohooh-6c3a45e0e3.jpg

http://www.alshohooh-upload.com/uploads/images/alshohooh-7c5cfb93a6.jpg

http://www.alshohooh-upload.com/uploads/images/alshohooh-cc1fbf67c2.jpg

http://www.alshohooh-upload.com/uploads/images/alshohooh-ef3eef8737.jpg

يوميات نائمة في الأرياف يقول...

كل سنة وانتي طيبة
ده اولا
ثانيا:
انا كنت قريت تعليق هايل في المصري اليوم:
بلدنا بتغرق بيكم
معلش بقى
بلدنا وهنستحملها وهنعيش فيها
عشان منعرفش بلد غيرها
تحياتي ليكي
رنا

انا حرة يقول...

لا احنا بتوعنا ما كانش فيهم وردة..يمكن طينة اه :D
و بعدين فكر ايه هم دول عندهم فكر..ما هو لو في اى افكار كان زمانها طلعت ولا هم مستنيين 30 سنة كمان

فاطمة ناعوت هايلة..كتاباتها بتحسسنى بالجهل الشنيع :D
هو العمود كله بتاع 7 ايام هايل.عشان كل اللى بيكتبوا فيه ستات اكيد :))
اللى حصل ده قلة ادب و سفالة..و بعد ما فضحوا البنات و وجعوا قلب اهلهم اكتر ما هم موجوعين طلعوا فى الاخر كذابين..حاجة حقيرة بجد

هو فى مقارنة بين مصر و اليونان..احنا ممكن نقارن بين مصر و السودان عشان معنوياتنا ترتفع شوية :D

حلوة اهوى التحرش دى تصدق فعلا بيبقوا كده..اصله بقى هواية زى القراية و جمع الطوابع كده

انا لو منه كنت ارشدت:D
مش احسن ما اتدفن هنا بالحيا..بس دى معلومة جديدة يا محمد..و منكم نستفيد

انا ما صدقتش نفسي لما لقيت الصورة دى..شعبولا و عمرو خالد مع بعض..على اساس ايه يعنى؟
ما كانش اختيار موفق يا كوبرى بصراحة

فكرتنى بحكاية ابراهيم سليمان دى..الغريب ان الناس ماشيين وراهم يصقفوا كان السلام ده هو اللى وجع لهم كرامتهم اوى
و بعدين متابع ولا لا هو مش شغلته يتابع السياسة اصلا احنا اللى بقينا عايزين فتوى لكل مواطن..دى مش شغلته اصلا..هو يبيح جلد الصحفيين ماشى..لكن يتكلم فى السياسة لا
كفاية مكالمته مع عمرو الليثى اساسا

ما هو عشان ما حدش بيروحها فهيحطوا فيها كاميرا تراقب بيت الفيل:D

انا فاكرة موضوع غزة ده..و مستنية مصعب ييجى يتخانق معايا هنا:D
بس كلمة اولى دى استفزتنى جدا..يعنى كان ممكن يقول انها حاجة مسموحة للى عايز يعمل كده..لكن اولى دى عصبتنى الحقيقة

و انت طيب يا كوبرى :)
و انا لسه مصممة ان مفيش اصعب من كده..

انا حرة يقول...

ابن الوليد
اولا اهلا بيك فى المدونة
انا هعلق على نقطة فلسطين..
اللى حاصل للشعب الفلسطينى مش غايب عن حد..و انا كنت و مازلت رافضة فكرة قفل المعابر و مع الوجود الامنى و السماح لاهالى غزة بالدخول عشان يشتروا حاجاتهم الاساسية..مش هنبقى احنا و حماس و فتح و اسرائيل عليهم

و ما زلت رافضة موقف الحكومة الاخير من قوافل الاغاثة..حتى لو كانوا الاخوان هم اللى بعتينها

لكن ما ينفعش يكون ابنى و جارى مش لاقيين ياكلوا فاسيب ابنى جعان و اكل جارى..خصوصا ان اللى عندى مش مكفى ابنى اساسا

بالنسبة لشيخ الازهر فمش سلامه على بيريز هو اللى هيهين الامة الاسلامية..اذا كان فى اتفاقية حكومية بقالها 30 سنة..تطبيع رسمى يعنى
فمش سلامه على بيريز ده هو اللى هيهين المسلمين..السكوت على الظلم و القهر و التهليل للحاجات التافهة هو اللى مهين

انا حرة يقول...

يوميات نائمة فى الارياف
تصدقى انا كنت هعلق على اخر موضوع عندك قبل ما اقرا تعليقك :)
و انتى طيبة يا رنا :)

ما هى المشكلة انها بتغرق بيهم و انهم مش سايبين لحد الفرصة انه يلحق ينقذها..قاعدين اه هنروح فين..بس ما يمنعش ان قلبنا يوجعنا عليها

enjy يقول...

وااااااااااااو هو كوكتيل جامد جدا بس انا موافقة على كل كلمة فيه وخصوصا موضوع الاضحية...والمرهم والخبر بتاع من بدرى يا فوزية هلكنى من الضحك اصلا.....اقبلى زيارتى لانى هقرفك من هنا ورايح

Desert cat يقول...

تقريبا يفط الحزب الوطنى مغرقة شوارع المحروسة ومحافظتها كلها
بالنسبة للمتحرشين فهما نفسهم برضه اللى بيصوموا شهر رمضان كله ويوم العيد ينزلوا يتحرشوا وهما اللى بيصوموا يوم وقفة عرفات وينزلوا يصلوا العيد ويليه التحرش مجتمع يعانى من حالة شيزوفرنيا مستعصيه
هبه ونادين تهافتت الالسنة والصحف جميعها تحولت لصفراء لتدينهم على الرغم من المعروف انهم اموات ومش هيعرفوا يدافعو عن نفسهم
يعنى لو هما بالفعل سيئين وده مش صحيح
كان الناس اتقت ربنا فيهم وهما بين ايدين الله
موضوع تسليم شيخ الازهر على بريز انا اتكلمت فيه ولاقيت الناس بتقولك لالالا شيخ الازهر ده ممثل الدين مع انهم لو يفقهوا الدين بجد كانوا عرفوا ان دينا دين سلام واذا حييتم بتحية فحيوا باحسن منها ربنا مش حدد بقى احى الاسرائيلى ولا الامريكى ولا الاسبانى
تحياتى ليكى ولطرحك الرائع دائما

انا حرة يقول...

enji
مبسوطة حقيقي بتعليقك
انتى تنورى فى اى وقت :)

انا حرة يقول...

desertcat
كله كوم و التحرش ده كوم تانى لوحده دى مش اى شيزوفرينيا دى حالة مستعصية
المهم انهم اول يوم العيد كانوا 50 امبارح بقوا 137..تقريبا بيرفعوا شعار انا اتحرش اذن انا موجود
نورتي كالعادة