الأربعاء، 22 يوليو، 2009

ازاى تكسب قلب بنت فى 10 خطوات؟

خطوة (1): كون نفسك لو كنت متاكد 100% من احساسك نحيتها " كون نفسك" هى القاعدة الذهبية واحد من اكتر المفاهيم الغلط المتاخدة عن الستات هى انهم بيحبوا الكلام الكبير المعقد الحقيقية بقى..اننا ما بنحبش حاجة قد الصدق. الكلام الكبير اللى بيفقد معناه بمجرد ما بيتقال و التسبيل على الفاضية و المليانة عمرهم ما كانوا الطريقة الصح بالنسبالنا. شوية ارتجال فى البداية بيكونوا اكتر من كافيين على فكرة. خطوة (2): كون مستمع جيد احيانا ممكن تلاقى الاجابة على سؤال زى "يومك كان ماشى ازاى؟" عبارة عن ساعة و نص من الشرح المتواصل المفصل حقيقة كونية: معظم الستات بيحبوا يتكلموا كل اللى عليك تعمله ساعتها انك تكون مستمع جيد و توريها انك مهتم باللى هى بتقوله بس النقطة هنا انك توريها انك مهتم من غير ما تمثل انك بتسمع عشان احنا بنعرف الفرق! نص الكباية المليان هنا هو انك مش محتاج تقول رأى فى اللى هى بتقوله انك تسمع بجد اكتر من كفاية و نقطة تانية هنا..الستات بتقدر الصدق جدا يعنى لو مش حاسس انك عايز تسمع..قول بس بطريقة لطيفة يعنى مثلا ممكن تقولها "انا اسف بس كان يومى مجنون انهاردة فى الشغل.. ممكن نتكلم فى الموضوع دا بعد شوية" جملة لطيفة زى دى ممكن تعمل معجزات على فكرة. خطوة (3): وريها اهتمامك مكالمة بسيطة و انت فى شغلك هيكون لها اثر كبير جدا عليها مش محتاج انك تضيع وقت شغلك ولا انك تترفد مكالمة من 30 ثانية كافية جدا عشان تحسسها انك فاكرها حتى و انت مشغول خطوة (4): احساس مش تكلف! حد فكر ليه الستات بتحتاج لشريك حياة؟ الحقيقة ان الست بتحتاج لسند الست مش محتاجة فلوسك..هى محتاجة مساندتك كل ست بتبقى عايزة الراجل اللى اختارته يكون الصخرة بتاعتها الحالة الوحيدة اللى بتدور فيها على محفظتك هى ان دماغك تكون فاضية! لو عايز تجيبلها هدية..اختار حاجة بسيطة هدية مبتكرة و بسيطة احسن بكتير من اى حاجة غالية و متكلفة طبعا من غير ما تدور على مخرج سهل "حبيبتى دى الفلوس اشترى بيها اللى انتى عايزاه" جملة من الجمل المميتة. خطوة (5): كون ذكى فى اختيار الكلام
الستات بتقدر الصدق لكن قلة الذوق هى بداية النهاية بالنسبالنا قلها اللى انت حاسه بس بطريقة زكية. مثلا بدل ما تقول:" انا مش قادر استحمل طريقتك دى" قلها:"فيها ايه لو نتكلم بطريقة اهدى شوية؟" او مثلا "ما تبقيش عصبية كدا..انا عندى مشكلة فى الشغل و اوعدك اننا هنحل الموضوع دا اول ما اقدر" بدل:" انا مش مهتم اعرف" خليها: "انا مش فى المود دلوقتى..بس ايه رايك لو نشوف فيلم مع بعض؟" خطوة (6):اياك تستقل بيها دايما قدر اراءها و كلامها مهما كانوا تافهين فى رايك.. خصوصا قدام الناس لانها هى كمان هتقدر كلامك حتى لو كان غبى فى نظرها.. و هتقدر اهتماماتك حتى لو كانت سطحية فى رأيها فالحب مش وحدة بين اتنين"ناقصين" الحب اتحاد اتنين "كاملين". فبالتالى ما تتوقعش انها تفكر..تتكلم او تتعامل زيك.. ببساطة لانه عمره ما هيحصل. خطوة (7):بطل تختبرها! حقيقة كونية تانية:احنا بنعرف لما بتختبرونا فى طرق كتير اوى زكية تخليك تعرف اذا كانت مهتمة ولا لأ لكن انك تحاول تخليها تغير بانك تتكلم عن البنت اللى كنت بتحبها زمان او عن جمال زميلتك فى الشغل..مش من الطرق دى بتاتا خطوة (8): ما تنساش! لو فى حاجة واحدة مشتركة بين كل ستات الارض..فهى اننا بنفتكر! افتكر دايما المناسبات المهمة عندها..اعمل لستة بالايام المهمة.. حط ريمايندر على الموبايل..المهم انك تفتكر المناسبات المهمة عندها لان هى كمان هتهتم اوى بالمناسبات المهمة عندك خطوة (9): خليك دايما موجود لما تحتاجك اسمع..اهتم..حسسها انه مهما الدنيا كانت معقدة انك هتقدر دايما تلاقى طريقة تخليها بسيطة خليها تضحك فى الاوقات الصعبة اسمعها لما تحتاج تتكلم مهما كانت قوية فهى هتحتاجك جنبها فى اوقات كتيرة زى مانت كمان هتحتاجها جنبك لما تكون ضعيف. خطوة (10): كون "Breaker-up” شجاع لو حسيت فى يوم انها النهاية..قول لها!!! الخيانة عمرها ما كانت حل مهما كانت الصراحة هتوجعها فى وقتها.. فهى هتخليها تفضل تحترمك طول عمرها.
*****
طبعا بعد قراية ال10 خطوات دول مش غريبة لما نص البنات يكونوا داخلين فى علاقات غير صحية بالمرة و النص التانى يكون صرف نظر عن الفكرة :D طبعا دا لا يمنع ان فى ناس نجحت فى اختياراتها..و ان كانوا قليلين
*****

هناك 47 تعليقًا:

احمد ماهر يقول...

الف الف شكر على التوبيك الهايل ده

وبجد نصايح جامدة وبتدل على خبرة كبيرة فى الحب

بس يا ريت تحاولى تكتبى باللون الابيض بس لان الالوان التانية مرهقة فى القراءة

وشكرا



......احمد ماهر

Founoon يقول...

اوختشي

ممكن تغيري اللون مش شايفة حاجة :(

mUsLiM يقول...

جميل اوى يا أختى :)

وفعلا انتى ذكرتى أشياء مضتركة فى غالب النساء وهى الصفات العامة اللى لا يشذ عنها من النساء إلا القليل على أساس أن لكل قاعدة إستثناء ،،

لكن لا يمكن لإمرأة أن لا توجد بها واحده من الصفات العشر ،،

لكن يمكن الموضوع وإن كنت متفق معاه كليا إلا إنه فى نظرى قاصر عن إحتواء كافة الصفات المشتركة والغالبة على جنس النساء ،،

وأنا لن أتحدث عن بعض هذه الصفات المشتركة والتى أرى أن الموضوع قد أغفل عنها لأنى لا أريد وجهة نظر من رجل وأريد أن يكون الحديث من النساء عن النساء كما بدأتى يا أختى

لذا فأنا سأتابع هذا الموضوع جيدا حتى أرى ردود باقى الأخوات وما إذا أضافوا شيئا أم لا ،،

لكن حقيقة موضوع رائع وجميل ومفيد ، يعنى أنا لا أنكر أن كثير من الرجال يغفل عن كثير من هذه الحقائق ،،

وهذه الصفات التى ذكرتيها وغيرها من الصفات التى أراها مشتركة هى مفاتيح المرأة ،،

وهى الطرق التى يستطيع بها الرجل أن يعتلى قبة قلب إمرأته وأن يصير بعد ذلك بحق رجلها وبعلها وشيخها ،،

كما أنى أود فى الحقيقة أن أدعم الموضوع بأمثلة عملية لخير زوج عرفه التاريخ ألا وهو النبى صلى الله عليه وسلم

ولكن يبدو أن الرد سيطول إن فعلت ذلك ،،

ولكن يهمنى هنا التعليق على ما يلى :-

أولا: حديث أم زرع وأبى زرع وهو حديث طويل موجود فى كتب السنن وهى عبارة عن قصة حكتها السيدة عائشة للنبى صلى الله عليه وسلم عن عشر نساء إجتمعن فى الجاهلية وكل واحدة أخذت تصف زوجها وهى قصة طوييييله للغاية ولا فائدة منها فى الحقيقة

ومع ذلك فالنبى صلى الله عليه وسلم المحمل بهموم أمة بأكملها استمع لزوجته بكل حب وحنان ثم بعدما أنهت السيدة عائشة كلامها قال لها (( كنت لكى كأبى زرع لأم زرع ))

وهو الزوج الوحيد الذى مدحته امرأة ألا وهى أم زرع

فردت السيدة عائشة بكل بساطه (( بل أنت يا رسول الله خير من أبى زرع ))

وأكمل الرد مرة أخرى لضيق الوقت الآن :)

السلام عليكم

mohamed ghalia يقول...

ههههههههههههههههه
حلو أوى النصايح دى
ربنا يكرمك ويسعدك

ســـــاره يقول...

ايه الجمال ده ياجيسي D:

حابة اعلق على نقطة 4 و 7 و 9

للأسف في بنات قيمة الهدية عندها مادية اكتر منها معنوية خصوصا لو الراجل كان ربنا كارمه تلاقيه لما يجيبلها هدية بسيطة تقول هو ده اللي ربنا قدره عليه!!! لأنها على قد حالته المادية بتكون مستنية منه ..

نقطة الإختبار دي بتجرح اوووي هو فاكر انه بالطريقة دي بيثير غيرتها مع انه في الحقيقه بيجرحها جدااا وممكن توصل لمرحله انها تفضل شايلاهاله في قلبها..

اما الإحتياج فالبنت بتحب دايما تحس بحنان الراجل وانه معاها في كل وقت تحتاجه فيه .. ونقطه مهمه كمان دايما تحب تحس انه محتاجلها ..

لازم يكون يوم 22 يوليو هو يوم النصايح العالمي D:

magi يقول...

هى نصايح جميله جدا وكل حاجه بس صدقينى مفيش فايده فيهم
عموما لو لقيتى ناس كده ابقى احجزيلى معاكى واحد

انا حرة يقول...

احمد ماهر

العفو و لا شكر على واجب :)
هو المفروض انه كان ابيض و ظاهر عندى ابيض مش عارفة ليه انت و فنون مش باين عندكم كدا..عموما بيتهيالى انه دلوقتى اتظبط

انا حرة يقول...

فنفونتى

شوفى كدا باين ولا لأ..هو كان ابيض والله مش عارفة انا اللى عندى عما الوان ولا انتوا اللى عندكو حاجة غلط :D

انا حرة يقول...

مصعب

هو انا ما فهمتش اوى ايه الحاجات المشتركة بين كل الستات اللى ممكن تكونوا انتوا كرجالة عارفينها بس مش مشكلة :D

حلو اوى المثال بتاع الرسول عليه الصلاة و السلام و الامثلة من حياته كتيرة جدا كانت كاتبة عنها عائشة عبد الرحمن فى كتاب زوجات الرسول

انا حرة يقول...

محمد غالية

و يسعدك انت كمان يا رب :)
كويس ان الموضوع عجبك

انا حرة يقول...

سارة

كويس انه عجبك يا حبيبتى :)

بيتهيالى اللى بيعملوا كدا بيعملوه لما يلاقوا الرجال اللى معاهم دماغه فى الضياع فتلاقيهم بيمشوا على المثل القائل اللى ييجى منه احسن منه :D

اسكتى دا كله كوم و الاختبارات دى كوم تانى خالص..و الغريبة انهم فاكرين نفسهم ازكيا و مش مفهومين :D

دا لما يكون راجل بجد اولا و يستاهل ثانيا و دول حاجتين تقريبا ما بقوش بيجتمعوا دلوقتى

انا بقول كدا برضه او نخليه 23 يوليو الواحد زهق من الكلام فى السياسة والله:D

انا حرة يقول...

ماجى

ليه بس الاحباط دا
دول موجودين و متوفرين و ممكن تختارى منهم كمان :D

mUsLiM يقول...

الحقيقه ان الموضوع تحول بدون قصد إلى أن الرجال لا يستحقون وأنهم لا يفهمون طبيعة النساء بشكل عام :)

والواقع أن نفس الكلام قد يقال من كل جنس على الآخر والمسألة لا تتعلق بجنس وتمييزه على الآخر بقدر من الفهم والحكمه فى التعامل

وإنما يتعلق الأمر فى الجمله بالشخص نفسه وشخصيته وأخلاقه سواء كان هذا الإنسان رجل أو أنثى :)

أما الحاجات المشتركة بين النساء اللى ممكن احنا كرجاله نعرفها

هههههههه

فهذا سؤال فى وجهة نظرى مش صحيح

لأن الموضوع على حسب ما انا أفهمه يتعلق بالشخص ذاته بعيد عن كونه رجل أو إمرأه

ربما يكون هناك رجل يفهم النساء وطبيعتهن خير من ماشة امرأة والعكس صحيح ايضا

وانا لا أنكر انه يكون للمرأة خبرة ببنى جنسها أكثر من الرجل

ولكن هذا على مستوى الجملة لكن على مستوى الأفراد فكل شخص بحسب فهمه وشخصيته

على كل حال ، اللى كنت عاوز اقوله

ان فيه برده صفات أخرى بتؤثر فى النساء وتجذبهن بل تحتاجها المرأة عموما فى زوجها أو رجلها

انا بالفعل متقف معاكى ومع كلامك زى ما قلت قبل كده تماما

وفى الحقيقة أثار إعجابى تعبيرك عن أفكارك فى الموضوع لأنك عبرتى بحنكة لا يستهان بها فى نظرى

لكن مثلا فى نظرى

تحتاج المرأة أن تشعر بكيان زوجها

بأن تكون له هيبة وشخصية ووقار

هذا يلقى فى روع المرأة الإحترام لزوجها والفخر بها

المهم أن تكون هذه الهيبة مغلفه بالحنان معها والحب الى آخر الألاعيب المعروفة بين الرجل والمرأة والتى يستطيع الرجل بها أن يأسر قلب زوجته

لكن هى أمام الناس تحب أن تشعر بكيان رجلها والفخر به تحب أن تشعر بهيبته وكيانه المستقل وألا يكون إمعه يتكلم كثيرا وليس من كلامه فائده

فهذا الرجل مهما كان طيبا مع زوجته وامرأته فكثيرا ما يصغر فى نظر زوجته خاصة إن كانت زوجته تفوقه فى الفكر والحكمة

وأيضا يرتبط بهذا الجزء جزء القوامة

فالمرأة ترغب فى أن تشعر بقوامة زوجها

والحقيقة ان الكلام عن القوامة هنا قد يطول

ولكن على كل حال هذا مجرد مثال رأيت أن الموضوع أغفله من وجهة نظرى

وهناك أمثله أخرى

ولكن أنا لن أتكلم بالمزيد

حتى أستطيع أن أتابع النقاش من الخطوات

وأرى إن استطاعوا أن يضيفوا شيئا

فحتى الآن لم أر شيئا فى الحقيقه :))

ربما يكون شعورى هذا بسبب فضولى فى معرفة هذه الأمور من وجهة نظر نسائية بحته

تقدرى تقولى عاوز اناقش الجنس الآخر فى الموضوع ده

هههههه

واهو كله خبره برده

يلا يا اختى

السلام عليكم

ReEm يقول...

يا لي لي ماهو بقالنا سنين بنقول الكلام ده

و ندلهم على الحاجات دي و لكن لا حياة

لمن تنادي فين لما راجل و لا اتنين يضبطو

الحاجات دي و سط الف راجل

و المشكلة انه كل واحد فيهم متخيل انه

صح و بيفهم و بيعمل كل الحاجات دي

مع شريكته

مش عارفة امتى هياخدوبالهم من الخطوات

السهلة دي حتى هما هيرتاحو بس عند بقى

نعمل ايه فيهم

ياسر سليم يقول...

شكراً على الافادة

Maga يقول...

هههههههههههههههههههه

حلوة اوى النصايح دي بجد

اهى تنفع الواحد فى حياته

بس على فكرة فى حجات جديدة نزلت :D

dr.lecter يقول...

هههه صعبانين عليا والله

انا لو هاكتسب واحده هاكتسبها بالفطره اللي انا عليها مش هاقعد اخطط واظبط واهو عمك مكي قالها ماتحاولش تبقي حد تاني غير نفسك خليك واثق في نفسك دور في نفسك جوه نفسك هتلاقي حاجه ماحدش فيها نافسك

تصدقي وتامني بالله انا عملت ال 10 خطوات دول بالظبط من غير ماتعلمها ولا ادرسها بالفطره ياحلوين

وخاصه الخطوه رقم 10 ياسلاام

بس المشكله بقي ان الواحد بيخليه معلق الخطوه دي شويه وبيحاول ان يدي لنفسه فرصه تانيه بس هي بتبقي باينه من الاول فاكسه فاكسه فاكسه لعده اسباب بالهابولي مدونتك ومدونه فاطمه مش هتتسع لها


ياللا هاكت انا علشان عاوز اروح ارد علي اختك التانيه

ReEm يقول...

عارفة لسه واخدة بالي من فكرة الوحدة اهون دي و ماقدرتش ما اعلقش عليها

بصراحة لا الوحدة مش اهون خالص احنا مجتمعات من طبعنا مش فرديين و خصوصا للست يمكن لو في مجتمع غربي اقولك ممكن الوحدة تفضل وحيدة و مستقلة شيء عادي بس عندنا الواحدة تقدر تطبق حتة الوحدة اهون دي طول ما اهلها موجودين وربنا مطول في عمرهم و مهما عجزو و كركبو اسمهم موجودين و سندها بس سنة الحياة انهم مش دايمين و لما امر ربنا بيحصل البنت في المجتمع العربي لو اهلها مش موجودين بتتعب و بتتبهدل لا تقولي اخت ولا اخ و لا عم ولا خال كله مالهي بحياته تماما و تلاقي نفسك فعلا وحيدة بطريقة صعبة اوي و ماحدش حواليها و اذا حصل يبقى الحد ده بيتفضل عليها بانه سأل او بيهتم بيها

انا زمان كنت بصراحة بشوفها كدة بس من كتر ما بشوف حال بنات اختارو الوحدة عشان اهون رغم انه قد حالهم ومستقلين و شخصياتهم قوية عرفت انه المسألة دي مش لمجتمعنا و مهما وسع النطاق اللي الوحدة بتكون فيه قوية و مستقلة و كل حاجة حلوة بيفضل نطاق ضيق مقارنة بالمجتمع الكبير اللي شاءت ام ابت هتتعامل معاه و ممكن يدفعها لخيارت زي صاحبتك اللي سلمت نفسها و شركتها لحد ما يستاهلش الكلام سهل بس لما تشوف مستقبل الحياة دي على ناس اختاروها بتلاقيه مؤلمة و اصعب بكتير من كلمة تتقال في فترة قوة او انتعاش للبنت

معلش رغيت كتير انا

SaLLy يقول...

hey:
fakarteny b film what wman wants beta3 mil gebson
bas 3ala fekra
i think as3ab 7aga fel donia to keep a woman in ur life specially in my lisbian society its kinda hard as girls in this society need more care and more love
regards

Founoon يقول...

1- صحيح
2- "انا اسف بس كان يومى مجنون انهاردة فى الشغل..
ممكن نتكلم فى الموضوع دا بعد شوية" مش لطيفة خالص الجملة دي على فكرة
ماعرفش ممكن يعمل ايه بس المفروض الست تحس لوحدها اذا كان الراجل عنده استعداد يسمع في الوقت دا ولا لأ يعني تكون ذكية بما فيه الكفاية عشان تعرف تختار الوقت المناسب للرغي
3- او حتى مسج مش شرط مكالمة ..الحاجات دي بتفرق اوي بجد
4- صحيح
5- صحيح بردو
6- صحيح جدا
7- يوووو دي اسوأ حاجة بيعملوها ولازم يفهموا ان النتيجة اننا بنقفل تماما من الحركات دي
8- ههههههه
9- ولو مش قادر تحل ياريت ماتكونش انت في حد ذاتك مشكلة زيادة
10- والله في كل الاحوال مش هتحترمه بس الانفصال بادب افضل من الخيانة طبعا

انا ودماغي يقول...

بوست هابل بجد و فى الجوووووووون

تحياتى

leeno يقول...

انتي و فنون متفقين و لا ايه ؟؟

انا متفقة معاكي فعلا انا بنحب الحاجات دي كلها بس مش عارفة لو في حد بيسمع

و في حاجة نفسي اضيفها

متستعرضش عضلاتك قدامها على اساس ان دي طريقة تبهرها بيها بتبقى الحركة مفقوووووسة اووووووووي

و النبي كمان بلاش خفة الدم و الاستهزاء من الناس على اساس انك احسن

و اللي بيبقى مش مهتم اصلا بس لا هو بيختفي من حياتها و بيبعد و لا هو بيحبها و لا هو عايزها تختفي من حياته (بينرفزني بجد )


بالنسبة للهدايا مش لازم يقضيها استخاص مثلا هههههههههه مش وحش هدية عليها القيمة بين فينة و أخرى ههههههههههه

afew good men يقول...

الصدق

والحب

تذكرة خلود
تحياتي

Superman يقول...

ايه ده بس..ابو تريكة البلوجات المصرية بيكتب؟ :D

جامد جدآ الكلام ده..جاى في المنطقة اللي بحبها بصراحة..

انا متفق مع كلامك كله تقريبآ..بس نقطة الاختبار دي محتاجة شوية نقاش..

البنت لو ماليه عين الولد بجد عمره ما قلبه يطاوعه يقول لها عن بنت تانية جميلة حتى لو اوحش منها..
لكن في بنات بيتبعوا نظرية انا حلوة و عارفه انني حلوة..فبيخنقوا الرجل لحد ما يبقي مجبر يفكرها ان في بنات تانيين حلوين في الكون!

ده مش إختبار علي قد ما هو إنذار للبنت إنها تخف شوية..

لان اخر حاجة الرجل يفكر فيها في الحالة الطبيعية هي انه يلفت انتباه حبيبته لوجود بنات يشكلوا خطر عليها.. :D

bos bos يقول...

السلام عليكم

بجد الموضوع رائع جدا جدا وأنا كنت بعتلك ميل بخصوصه ومش عارفة شفتية ولا لا ومحتاجة ردك على يوم الأحد ضرورى
مش هو ده ميلك برضة
banoutamasreya@hotmail.com

انا حرة يقول...

مصعب

لا الرجال لا يستحقون دى ممكن يكون فيها نقاش..
اكيد فى رجالة تستاهل زى ما فى ستات ما تستاهلش

لكن ان الرجالة مش بتفهم الستات فدا واقع
و الا ما كانوش عملوا كتاب الزهرة و المريخ اللى بيشرح شرح مفصل
تركيبة دماغ الراجل و الست عشان يوصل لحلول وسط
لان فى حاجات كتير جدا التناقض بينهم بيكون مرعب بجد

و بالنسبة للراجل اللى ممكن يفهم الست اكتر من الستات و العكس فانا مش متخيلاها اوى بصراحة

و اتفضل ناقش الاخوات براحتك المدونة مدونتكم

انا حرة يقول...

ريم

ادينا بتعمل اللى علينا و الباقى على ربنا :D
و بعدين اكيد اللى بيحب واحدة بجد مش هيستنى خطوات عشان يعرف يوصل لقلبها
بس هى الفكرة كلها فى انه يكون صادق فى احساسه

انا حرة يقول...

احمد
ههههههههههههههههه اى خدمة مش عارفة والله من غير خبراتى فى الحياة كنتوا عملتوا ايه :P

طيب ما تقولنا حاجتين تلاتة من اللى نزلوا فى السوق دول خلينا نستفيد احنا كمان :D

انا حرة يقول...

لكتر

ما هى دى النقطة عشان كدا لو تلاحظ دى كانت اول خطوة

اخر حاجة ممكن تشد البنت هى التمثيل و الافورة و دلدقة الاحاسيس المصطنعة على راى فاطمة

و يا سلام بقى على التسبيل الهستيرى لزوم ان البنت بتطبعها رومانسية:@

بس يعنى انت سبت التسعة الاولانيين و مسكت فى العاشرة :D

انا حرة يقول...

ريم

انا متفقة معاكى تماما فى النقطة دى..بس تعالى نفكر كدا

لو البنت اختارت شخص غلط لمجرد انها ما تبقاش لوحدها
هيزيد على عبء الوحدة عبء تانى و هو انها تفضل تمثل لبقية عمرها دور مش بتاعها عشان المركب تمشى زى ما بيقولوا

و برضه هتفضل حاسة بالوحدة لان وجودها مع شخص مش فاهمها او مش مقدرها او مش عاملها اعتبار فى حياته
مش هيفرق كتير عن وجودها لوحدها ..

و على الاقل فى الحالة التانية مش هتبقى شايلة غير هم نفسها
مش همها هى و شريك حياتها و بيتهم و يمكن كمان طفل ولا اتنين

انا معاكى طبعا فى انها مش قاعدة
لكن الجواز خطوة صعبة جدا جدا و لو ما كانش الشخص اللى هتكملى معاه يستاهلك بجد
يبقى يا اهلا بالوحدة..
على الاقل اهون من انك تكونى مع واحد مش شايفك اساسا

بس برضه هرجع و اقول الكلام سهل خصوصا للى لسه ماجربش فكرة انه يعتمد على نفسه تماما

و بعدين ارغى براحتك طبعا
انتى تعليقاتك دايما بتحسسنى انك بتقرى المواضيع بتركيز و دى حاجة مش قادرة اقولك بتفرحنى قد ايه:)

انا حرة يقول...

Sally

It’s hard to win a woman’s heart in any socity
But after all it depends on the partner

انا حرة يقول...

فنفونتى
مش احسن ما يقولها اسكتى شوية انا مصدع :D

و بعدين لازم نعترف ان فى ستات عندهم طاقات فولازية على الرغى
تلاقى الراجل لسه داخل بالبدلة و قبل ما يحط الجاكت
تلاقيها كلت ودانه باخبار الشغالة و مرات البواب و الجارة اللى متخانقة مع جوزها

على الاقل كدا هيحرجها بالذوق بدل ما يديها قلمين على وشها لما يفقد اعصابه من الرغى الهستيرى دا :D

باقى الكلام انا متفقة معاكى فى تماما
خصوصا حتة لو مش قادر تحل ما تزودش المشكلة دى

انا حرة يقول...

انا و دماغى

تسلمى بجد و مبسوطة اوى ان الموضوع عجبك

انا حرة يقول...

لين

لا احنا مش متفقين..احنا مفروسين بس :D

استعراض العضلات دا بيقى كوميدى اساسا
خصوصا بقى لو كان معاه شوية احداث من نوعية و احنا بنصيف فى ايطاليا
او لما كنا فى اليخت بتاعنا فى جزر الكاريبى

بس زى ما قلت فى الموضوع الست مش بتهتم بالحاجات دى غير لما الراجل بتبقى دماغه فاضية
ما يمنعش ان فى ستات دماغها افضى مش بتهتم بس غير بالمناظر..
انا اعرف واحدة اتخطبت لواحد بس عشان عنده جاجوار تخيلى :D

انا حرة يقول...

A few good men

اكيد طبعا بس لما يبقى معاهم تصرفات بتاكدهم

انا حرة يقول...

محمد

هههههههههه دا انا كدا ماحدش هيعرف يكلمنى بعد كدا ( وش مناخيره فى السما)

بس انا لو قالولى احترف هاخد الكام مليون و اخلع عشان نبقى واضحين بس :D
ربنا يكرمك بجد رفعتلى معنوياتى والله :)

هى حكاية الاختبار دى بتختلف اكيد بين واحد و التانى
بس انا شوفتها فى اكتر من حالة حواليا و كان دايما الراجل بيختار نفس الطريقة
فلانة دى حلوة اوى تفتكرى بتعمل ايه فى نفسها؟ او مش تتعلمى منها؟

و تلاقى الست يا عينى بتاكل فى روحها و مش بعيد تروح تسال فلانة دى بتعمل شعرها فين :D

مع ان التصرف الصح فى رايي هو انها تعمل نفسها مش سامعة اساسا

"البنت لو ماليه عين الولد بجد عمره ما قلبه يطاوعه يقول لها عن بنت تانية جميلة حتى لو اوحش منها.."
عجبتنى اوى الجملة دى
و هو كمان لو عنده ثقة فى نفسه و فى احساسها ناحيته
مش هيفكر يقارن بينها و بن غيرها من البنات او بينه و بين غيره من الرجالة

بس بتوع انا حلوة عارفة انى حلوة دول عايزين واحد يتجوز عليهم مش بس يلفت نظرهم لوجود بنات بيشكلوا تهديد لهم ..ازاى بيستحملوا نفسهم اصلا :D

انا حرة يقول...

bosbos

و عليكم السلام و رحمة الله و بركاته
انا شوفت الميل و طبعا دى حاجة تسعدنى :)

dalia يقول...

ياسمينه الجميلة

خطوات عملية ومفيدة بجد

ممكن تسمحيلي اضيف خطوتين على 10 خطوات ليصبحوا 12
أولا الدين والخلق (لانني لا اتصور شخص متدين بلا خلق مثلا وهذا سبب جامد جدا بالنسبة لي على الاقل )(وبالطبع تعرفي الحديث الذي يقول فيما اتذكر اذا جائكم من ترضون دينه وخلقه فزوجوه.مع الاهتمام بمبدأ تكافؤ الوضع الاجتماعي والاقتصادي طبعا

ثانيا الصراحة وعدم الكذب كنت زمان ياياسمين بعتقد اني استطيع اكتشف الرجل الكذاب بس فعلا دلوقتي استحالة لان الكذب اصبح علامة عصرية واستخدامه شائع هذه الايام
لكن بخلاف ذلك اتفق معك في ترتيب الخطوات وانك بدأتي بأهم خطوة كون نفسك فمع صعوبه الامر بالنسبة لعدد كبير من الشباب على تحقيقه الا انه مهم ويجب ان يكون الشاب صريح مع نفسه ومع البنت اللى حيرتبط بيها واتفق معك كذلك في الخطوة رقم 7 بطل تختبرها انت عبقرية يابنتي فعلا لان كتير من الرجال بتحب تختبر الستات ممكن يكون عندهم سبب انهم مش بيثقوا في الستات بس مش كل الستات ذي بعض كمان في مواقف مستهليش اختبارات يعني ممكن تتخنقي من كم التحقيقات على الهايفة بسبب انك قلتي حاجه وانت تعبانه ومش واخده بالك أو قلتي حاجه بسرعة فهو فهمها غلط

تقبلي رغيي

Here i'm يقول...

أشهر 10 كدبات للبنات

1 - امبارح دعيتلك و انا بصلى الفجر
بسم الله ماشاء الله انتى بتصلى الفجر كل يوم
اه .. انا طول عمرى بصلى الفجر كل يوم


2 - امها : ايه رايك فى اكل سوسن .. دى قعدت طول اليوم تطبخ و تجهز فيه علشانك
المأسوف على شبابه : بجد تسلم ايدك يا سوسن الأكل حلو قوى .. بس أيه دا اللى فى أيديك يا طنط
امها : لا دا حرق بسيط من النار !!!!!!!!!!!!


3 - على فكرة يا حسين انا جالى عريس أمبارح و بابا و ماما موافقين عليه و انا بصراحة مش عارفة اعمل ايه
حسين : ممممممممممممممممم .. انتى أيه رايك فيه ؟؟
سوسن : هوا بصراحة تحفة .. و مفهوش عيوب .. و شغال فى الخليج و عنده عربية 9×9
حسين : و انا اتمنالك السعادة
بعد 15 يوم
سوسن تكلم حسين : كده نسيتنى على طول يا حسين .. معقول تخونك العشرة يا سونة
حسين : الله !! .. انتى مش وافقتى على العريس
سوسن : لا طبعا دا انا اتعاركت فى البيت و كبت على نفسى جاز و حلفت متجوز غيرك !!!!!!!


4 - عارف انا أكتر بنت كان بيحبنى مستر سامح فى المدرسة .. كان بيقولى انتى مخك نضيف قوى و ذكية جدا


5 - انا تعبانة قوى .. و نفسى أتكلم معاك .. بجد برتاح قوى و انا بتكلم معاك .. انت حد جميل قوى .. و فى الاخر مش معقول أحنا بنحب نفس الحاجات بالظبط .. دا حتى دماغنا من عند نفس الراجل ..


6 - شوفت امبارح الماتش .. الأهلى كسب الزمالك 6- 1 .. انا أتفرجت على الماتش كله و ابو تريكة كان يجنن .. ربنا يحميه يارب ... انا بموت فيه .. !!!! ( مع ان فى ماتش 6 – 1 مكنش أبو تريكة جاه الاهلى أساسا )


7 - انا لسه جاية امبارح من فرنسا و طالعين بكرا على الساحل .. عمو كامل عازمنا عنده فى القصر بتاعه و انا بصراحة مش عايزة أروح .. مبحبش الجو دا خالص ..
بكرا : مرحتيش ليه الساحل يا سوسن
سوسن : ما انا قولتلك أنى مبحبش اقعد عند عم كامل .. مش عارفة ليه بابا بيحبه !!!

8 - على فكرة أنا حكيت لماما كتير قوى عنك .. و هيا نفسها تشوفك من كتر ما كلمتها عنك
حسين : ما انتى عارفة يا سوسن انا انا ظروفى حاليا متسمحش
سوسن :و اعمل أيه مع بابا اللى عارف انك جاى يوم الخميس اللى جاى
حسين : مش حينفع خالص على فكرة
سوسن : انا قايلاله على كل حاجة .. و هوا مقدر ظروفك .. يوم الخميس ها
يوم الخميس .. المأسوف على شبابه قاعد يتغسل و يتكوى و جاهز على التنشير
و المصيبة انه كان قاعد فى الصالون و بياكل جاتوه .. و سوسن عمالة توشوش صحبتها دعاء و تقولها ها أيه رايك فيه ؟؟ !!!


9 - انت عارف .. أنا مليش ماضى خالص .. و لا عمرى حبيت حد خالص .. و كمان انت اول واحد يدخل حياتى .. انت الحب الوحيد الأول و الاخير !!!

10 - حسين : ايه يا بنتى فينك طول النهار
سوسن : معلش كنت مع ماما فى جمعية رسالة بنديهم شويه حاجات كتير ..
حسين : تبرعات يعنى ؟؟
سوسن : اكييييييييييييييد .. دا احنا كل شهر بنروحلهم و دايما بروحلهم فى يوم اليتيم ..

bos bos يقول...

ازيك يا جميل اخبارك ايه الموضوع نزل فى المجلة وده اللينك
http://www.mikanoo.com/do.php?id=1237

شكرا ليكى

خالص تحياتى

سمكه واحده يقول...

حبيت اسلم عليكي واقلك اخبارك ايه
بقالي كتير مش بشوفك
حبيت اقلك تصبحي علي خير قبل ما اقوم انام
(وش مبتسم)
ابقي اجي اقري البوست تاني ان شاء الله
تحياتي

أسماء علي يقول...

صح كده

هي دي الحقيقة

و أكتر حاجة بتنرفزني و تخليني مش طايقة اللي اودامي نظام الاختبارات ده

بابقى فاهمة و مش طايقة روحي

و كمان لما بيفتكروا إن الهدية الغالية أو المكان اللي ف مكان فايف ستارز هو المناسب

بابقى هاتشل

الهدية لازم تبقى حاجة شبهي لو هو فاهمني يبقى كتاب

و المكان على النيل المهم أنا و هو هاعمل ايه بالأماكن المنشية ماانا فيها طول الوقت

الفكرة المُستفزة إني باحس إنه بيستبدل المشاعر بحاجات مادية

..

و بس كده

:)

انا حرة يقول...

داليا

متفقة معاكى تماما فى نقطة الدين و الخلق و ان كانوا نسبيين جدا حتى لو بانوا عكس كدا

لكن فى حد ادنى ماعتقدش ان ممكن يكون حواليه اختلاف كبير

و متفقة معاكى اكتر فى نقطة الصراحة بس بيتهيالى دى هتكون حكر على الراجل بس فى مجتمع زى مجتمعنا دا

و حكاية الاختبارات دى بيبقى دمها تقيل اوى بجد..خصوصا لو الراجل عايز يعمل فيها الفتك اللى مقطع السمكة و ديلها و هو خاطب واحدة توديه البحر و ترجعه عطشان اساسا :D

انا حرة يقول...

كوبرى

هههههههههههه ردك موتنى من الضحك بجد بس عندى تعليق على كام واحدة كدا

"1 - امبارح دعيتلك و انا بصلى الفجر
بسم الله ماشاء الله انتى بتصلى الفجر كل يوم
اه .. انا طول عمرى بصلى الفجر كل يوم"

مش دى بالظبط زى "بصوم اتنين و خميس على طول عشان ربنا يباركلنا و عمى اللى فى البرازيل يموت و اجى اتجوزك"
ادعاء التدين دا عندكم انتوا اكتر على فكرة :D




2" - امها : ايه رايك فى اكل سوسن .. دى قعدت طول اليوم تطبخ و تجهز فيه علشانك
المأسوف على شبابه : بجد تسلم ايدك يا سوسن الأكل حلو قوى .. بس أيه دا اللى فى أيديك يا طنط
امها : لا دا حرق بسيط من النار !!!!!!!!!!!!"

دى كانت بتحصل على طول بس زمان ايام ما كان الراجل بيبقى مستنى مراته تطبخله
دلوقتى بقوا مستعدين يطبخوا هم بس مراتاتهم تشتغل و تساعد فى مصاريف البيت :D



3" - على فكرة يا حسين انا جالى عريس أمبارح و بابا و ماما موافقين عليه و انا بصراحة مش عارفة اعمل ايه
حسين : ممممممممممممممممم .. انتى أيه رايك فيه ؟؟
سوسن : هوا بصراحة تحفة .. و مفهوش عيوب .. و شغال فى الخليج و عنده عربية 9×9
حسين : و انا اتمنالك السعادة
بعد 15 يوم
سوسن تكلم حسين : كده نسيتنى على طول يا حسين .. معقول تخونك العشرة يا سونة
حسين : الله !! .. انتى مش وافقتى على العريس
سوسن : لا طبعا دا انا اتعاركت فى البيت و كبت على نفسى جاز و حلفت متجوز غيرك !!!!!!!"

ههههههههههههههههههه
دى تقريبا زى طلقنى طلقنى طلقنى و لما يطلقها يبتدى مسلسل" كدا برضه يا سونة يا خاين ":D
اتارى الستات دول مجانين شوية برضه :D




"4 - عارف انا أكتر بنت كان بيحبنى مستر سامح فى المدرسة .. كان بيقولى انتى مخك نضيف قوى و ذكية جدا"

يا سلاااااام يعنى عمرك ما سمعت عن اب بيوهم ولاده انه كان دايما الاول على الفصل و ان استاذ مش عارفة مين بتاع التاريخ كان بيوقفه يراقب زمايله لما يطلع من الفصل و هو فى سابعة رابع:D




"5 - انا تعبانة قوى .. و نفسى أتكلم معاك .. بجد برتاح قوى و انا بتكلم معاك .. انت حد جميل قوى .. و فى الاخر مش معقول أحنا بنحب نفس الحاجات بالظبط .. دا حتى دماغنا من عند نفس الراجل .."

دى برضه عندكم اكتر
مع انى عارفة ان فى بنات تخصص فى انها توهم الولد انها هى بالظبط اللى هو بيدور عليها
بس ما يمنعش ان رجالة كتير بيحترفوا التمثيل خصوصا فى الحتة دى
و نظام فيروز دى انا بنام على صوتها و بموت فى افلام الشحتفة و الرومانسية بس ما بقولش كدا لاى حد
و قلبى بيتقطع لما اشوف طفل بيبكى قال يعنى حسيس اوى الواد.. الى اخر هذا الالش :D




"6 - شوفت امبارح الماتش .. الأهلى كسب الزمالك 6- 1 .. انا أتفرجت على الماتش كله و ابو تريكة كان يجنن .. ربنا يحميه يارب ... انا بموت فيه .. !!!! ( مع ان فى ماتش 6 – 1 مكنش أبو تريكة جاه الاهلى أساسا )"

هههههههههههههههههههههه دى تستاهل تتحرج قدام امة لا اله الا الله اساسا..ابسط رد يتقالها فكرينى كدا هو لون التى شيرت بتاعه كان ايه عشان مش فاكر هو ساعتها كان مع الاهلى ولا غزل المحلة




"8 - على فكرة أنا حكيت لماما كتير قوى عنك .. و هيا نفسها تشوفك من كتر ما كلمتها عنك
حسين : ما انتى عارفة يا سوسن انا انا ظروفى حاليا متسمحش
سوسن :و اعمل أيه مع بابا اللى عارف انك جاى يوم الخميس اللى جاى
حسين : مش حينفع خالص على فكرة
سوسن : انا قايلاله على كل حاجة .. و هوا مقدر ظروفك .. يوم الخميس ها
يوم الخميس .. المأسوف على شبابه قاعد يتغسل و يتكوى و جاهز على التنشير
و المصيبة انه كان قاعد فى الصالون و بياكل جاتوه .. و سوسن عمالة توشوش صحبتها دعاء و تقولها ها أيه رايك فيه ؟؟ !!!"

نظام التدبيس الرسمى دا اثبت نجاحه مع كتير على فكرة..بس اللى ناوية تدبس دى المفروض تعملها بذكاء اكتر من كدا شوية :D



"9 - انت عارف .. أنا مليش ماضى خالص .. و لا عمرى حبيت حد خالص .. و كمان انت اول واحد يدخل حياتى .. انت الحب الوحيد الأول و الاخير !!!"

غلطة الراجل الاهبل اللى لافف على مصر كلها و مصدق ان فى واحدة ممكن ما تكونش شافت فى حياتها غيره!
بس عامة دول يستاهلوا بعض!

دا كان لازم يتعمل موضوع لوحده على فكرة :D

انا حرة يقول...

Bosbos

انا اللى متشكرة اوى على اهتمامك
نورتينى بجد:)

انا حرة يقول...

سمكة واحدة

دا ايه الغيبة الطويلة دى كلها؟
تسلمى بجد على سؤالك و هستنى تعليقك لما تقرى الموضوع

و انتى من اهله :)

انا حرة يقول...

دكتورة اسماء

عارفة المشكلة فى ايه؟..الاستسهال
يعنى بدال ما يفكر ايه اللى ممكن يبسطها يعوض تشغيل دماغه بالفلوس..يعنى بدال مكان بتحبه يقضيها مطعم بمليون جنيه مع شوية وشوش بلاستيك و ستات لابسة من غير هدوم لزوم الشياكة..و بدل هدية تدخل دماغها يتخيل انه هيبهرها بخاتم الماظ ولا عقد لولى..انه الاستسهال يا دكتورة و من الاستسهال ما قتل :)