السبت، 30 مايو 2009

شخبطة..

استقصاد.. "كشف غموض مقتل فتاة باحد شوارع الدقى" "محاكمة قاتل خطيبته و امها و شقيقتها
و المعروف باسم سفاح بين السرايات بالدقى" "العثور على سامى شهاب قائد خلية حزب الله بشقة بالدقى" "مقتل مديرة الائتمان ببنك مصر فى شقتها بالدقى" ايه يا جدعان هو مفيش غير الدقى ولا ايه؟!!
*****
حالة ملل.. هناء و شيرين صحاب من زمان هناء اكبر من شيرين بسنة..بس بتعتبر نفسها بنت شيرين هناء ما بتعرفش تاخد قرار فى حياتها الا لما بترجع لشيرين هناء لو خرجت تتعشى مع شيرين ما بتعرفش تختار حاجة تاكلها و لو راحت تشترى هدوم بتختار نفس اللى اختارته شيرين و لو اتطلب منها رأى بتستنى لما تسمع رأى شيرين عشان تقول زيه هناء ما تعرفش ان شيرين بقت محتاجة اللى يمشيها.. عقلها محتاج يتشحن تانى عشان يرجع يفكر زى الاول شيرين بتموت فى هناء..بس تعبت..بجد تعبت
***** مثير للشفقة لما تصحى تلاقى نفسك فجاة عارف كل حاجة فى الدنيا و غبائك و ضيق افقك يصورولك انك محتكر الحقيقة و تفتكر ان كونك اتولدت كام سنة قبل اللى حواليك دا مبرر كافى عشان تتمنظر عليهم بكام معلومة حافظهم مش فاهمهم و لما تلاقى قدرات الفتى عندك امتدت من السياسة للدين للكيميا النووية و الفيزياء الحيوية و علوم المجرات فاعرف انك مثير للشفقة
*****
من احلى ما قريت.. وهكذا يهتم الناس بقضية تأجير الأرحام،
أكثر بكثير من اهتمامهم بقضية تدهور التعليم، ويتفرقون شيعاً وقبائل على قانون نقل الأعضاء،
ولا ينفعلون أبداً لحال مستشفياتنا المكدسة بمرضى لا ينقصهم سوى النوم فى توابيت، ولا يتألمون لإنسان يعيش حياته عليلاً أو فاقداً لنعمة كالإبصار. شعب هذه هى قضاياه العظمى، ونخبة هذا هو همها،
فهل يمكن أن يكون هناك مستقبل؟ على السيد-المصرى اليوم
*****
كبسة - عارف ان فساتين الفرح هنا رخيصة اوى - كويس..هاتى معاكى كام واحد و انتى راجعة عشان نبيعهم فى مصر
*****
رسالة.. لكنَّ سماءكَ ممطرةٌ.. وطريقكَ مسدودٌ.. مسدود فحبيبةُ قلبكَ.. يا ولدي نائمةٌ في قصرٍ مرصود والقصرُ كبيرٌ يا ولدي وكلابٌ تحرسُهُ.. وجنود وأميرةُ قلبكَ نائمةٌ.. من يدخُلُ حُجرتها مفقود.. من يطلبُ يَدَها.. من يَدنو من سورِ حديقتها.. مفقود من حاولَ فكَّ ضفائرها.. يا ولدي.. مفقودٌ.. مفقود عندما قررت الا تعطى قلبها الا لمن يصبر حتى تسقط امامه اقنعتها جميعا
*****
لحظات.. ولا يزال البحث جاريا عن مخترع اللون الرمادى و عن سارق فرحتها و عن السبب فى استمرار استيقاظها على حلم السقوط من مكان عالى
***** محاولة فاشلة - فيروز بتقول "غمضت عيونى خوفى لا الناس..يشوفوك مخبى بعيونى" - ايوة و بتقول كمان " و انا بايام الصحو..ما حدا نطرنى"
*****
A Must see "مساكين اهل العشق حتى قبورهم.. عليها تراب الذل بين المقابر" من فيلم ابراهيم الابيض
*****
زمان..و دلوقتى - اتغيرتى اوى..كنتى خوافة اوى زمان - زمان كنت فاكرة ان كل البنات زى اميرات الحواديت و كل الولاد زى الشاطر حسن و كل الافلام مهما طولت الدراما فيها .. بتنتهى بجملة " And they lived happily ever after” كان زمااااان.
***** وقفة.. فى ايام المطر و البرد لما اللى عدى يغطيه الضباب و اللى جاى يحاوطه الشك فتحاول تدور وراك على اى لحظة فرحة مسروقة و تفشل و تمشي قدامك يمكن تلاقى نقطة نور توصلك و تلاقى انه مهما الشمس طلعت الدنيا لسه برد و ان الم عدم قدرتك على التاثير فى حاجات كتير غطى على اى احساس تانى و تشوف الفرق المرعب بين اللى الناس شايفاه فيك و اللى انت شايفه افتكر دى..وبس "وَلَنَبْلُوَنَّكُمْ بِشَيْءٍ مِّنَ الْخَوْفْ وَالْجُوعِ
وَنَقْصٍ مِّنَ الأَمْوَالِ وَالأنفُسِ وَالثَّمَرَاتِ وَبَشِّرِ الصَّابِرِينَ الَّذِينَ إِذَا أَصَابَتْهُم مُّصِيبَةٌ قَالُواْ إِنَّا لِلَّهِ وَإِنَّا إِلَيْهِ رَاجِعُونَ"
*****
مقولة..
Et pourtant, elle tourne
*****
امتنان.. احيانا بيكون الكلام افشل من انه يعبر
عن شكر اكبر من انه يتوصف فى كام كلمة
قالها Josh Groban فى you raise me up
نعمة كبيرة من ربنا وجود ناس من النوعية دى فى حياتى..هنا و هناك بجد و من قلبى..شكرا

هناك 32 تعليقًا:

Nanoz يقول...

حمدالله على السلامه ... متغيبيش تانى كده

الفتى ده زى الميا و الهوا
البشر ميقدروش يعيشوا من غيره
يتعبوا و يعيوا و احتمال كمان يموتوا
طبيعه بشريه مريبه


زمان و دلوقتى و بكره ... كل حاجه بتتغير
كل لحظه الدنيا كلها بتتغير و احنا معاها

عارفه ساعات كتير ببص لنفسي و مش بعرفها
ولا بفهم مين دى ... و كل ما اتعرف شويه عليها .. الاقيها اتغيرت تانى ..


عادى بقى ... على الاقل فلا شوويه حاجات كده مش بيتغيروا .. و ثابتين على موقفهم :D:D

الموبايل بتاعى عملها فى الاخر و فصل خالص .. تقريبا اتامر مع الناس عليا:D
بس كنت مبسوطه انى سمعت صوتك

Desert cat يقول...

يااااااااه اخيرا يا مونى
كنتى وحشانى
اوى
اوى
اوى
بالنسبة للبوست
الدقى فعلا صدفة غريبة لوقوع الجرائم فيها فى الفترة الاخيرة
خلينا ندخل على طول فى المحاولة الفاشلة فدائما وابدا ينكشف امرى للاسف عند كل محاولة وان لم يروه فى عيونى نديت انا كل الناس باسمه

بليز مونى مش تغيبى تانى

dalia يقول...

أجمل حمد الله على السلامه واضح ان ف في حاجات مشتركة بيننا في السكن على الاقل وانا اقول ليه النصايب عماله تنزل عل المنطقة :) وحشاني بجد فعلا لا تغيبي مرة أخرى وشكرا على الاغنية الرائعة انت تستهلي كل خير

The Seagull يقول...

هييييييييه فلة رجعت تكتب تاني :D
ما صدقتش نفسي بجد :D مبروووووووك بجد ولا طولي الغيبة :D


كله في الدقي؟! تصدقي أول مرة آخد بالي من الحكاية دي رغم إني قريت العناوين دي كلها كذا مرة قبل كدة :)


مشكلة فعلاً ربنا يكون في عون شيرين :)


هما مثيرين للشفقة بعقل :D ابتسم فأنت في مصر سيد من يفتي في اللي ما بيفهمش فيه :D أنا مش فاهمة الناس دي طايقة نفسها إزاي بجد :)


لسة ما قرأتش المصري اليوم الحقيقة .. بس الكلام في الجووووون :)


هههههه .. أهو ده الاستغلال والا بلاش :D


ايه ده انتي دخلتيه بجد؟! shock
فيلم دموي بشكل بشع :$


مش هقارن بين زمان ودلوقتي لأني أكيد أكيد اتغيرت :) زي ما هو أكيد أكيد هتغير بكرة وبعد بكرة .. بس الأهم إنه يكون للأحسن والأفضل بإذن الله :) ربنا يعيننـا :)



مش فاهمة المقولة بتتكلم عن ايه .. ياريت تنزلي بالترجمة لو سمحتي :D



اسمحيلي أوجه نفس الامتنان للشخصية الوحيدة اللي بتخليني على الحالة دي :)


Welcome back Fulla :D
Nice post

ReEm يقول...

يا مرحبا يامرحبا نورك طفى الكهربا

اخير لي لي خرجت من سكوتك ورجعتي لنا تاني

بس اوعي ترجعي تعمليها و تسيبينا

***

هو طالما شيرين عودت هناء على كدة يبقى مهما تبت هناء مش هتحس و لو شيرين صارحتها هناء هتزعل اوي وجايز تخسرها الله يكون في عون شيرين والله

****

يبقى لغالبية العظمى مثير للشفقة و الباقي في الطريق

****

ايه كمية السد ديه :(

تصدقي اكتشفت انه الحب الصادق سهل اوي بس احنا بنكلكعه اوي و نحط راحل و شروط مش مرياحنا و بتتعبنا بينما الموضوع مش محتاج كل ده و عن الصبر فبحواجز ومن غير حواجز و اقنعة الحب محتاج صبر كتييير اوي عشان ينجح
و يارب السدود دس كلها تتشال قريب

****

مش بتفق مع العبارة خالص بصراحة
بس الفيلم مش عاجبني اعلانه لوحده مقرف بس بفكر اشوفه برضه لما ينزل ديفيدي

****

و فيه اصدق من كلامه عز وجل

****

و انا برضو اشكر الناس الي كدة في حياتي

اوعي تغيبي تاني ابدا

mUsLiM يقول...

عودا حميدا يا أختى :)

ونسأل الله لنا ولكى الخير والعافية فى الدنيا والآخرة ،،

وأرجو أن تكونى بخير حال فى حياتك وعملك ودنياكى يا أختى ،،

ونحن نسعد دائما للقراءة لكى والإطمئنان على حالك ،،

فبارك الله فيكى وهدانا واياكى الى الحق القويم وصراط الله المستقيم

وفى الحقيقة انا ما كنت لأرد على هذا الموضوع فى الوضع الطبيعى لأنه ليس لدى ما أضيفه ،،

ولكن لأنه عودا حميدا لكى فكان لزاما علينا الإطمئنان على حالك والدعوة لكى بالخير :)

ونسألكى الدعاء لنا فى سجودك

السلام عليكم

dr.lecter يقول...

لولولوي

زغرطي ياانشراح

اخيرا ياحاجه ؟ ايه ده كله انا كنت خلاص نسيت ان ليك مدونه من كتر الغيبه
طيب بالعند فيكي انا هاغيب برده لغايه ماخلص

الدقي دي منطقه استراتيجيه جدا ده الشغل كله هناك وهتفموا بعدين



هناء وشرين

عندي حاله شبهها بالملي بس علي ولاد

هو تعب فعلا برده ومعرفش مستحملني ازاي

بس اعمل ايه ؟



بصي انا باعتبر المعرفه خطر

كان شعار الجامعه عندنا konwledge is power

لكن انا باضيف عليها dangerous

الجهل والله نعمه المشكله انك لما بتعرفي حاجات اكتر من الللازم بيبتدي تشوفي حاجات مكانش المفروض تشوفيها وتلاقي اللي حولك مش شايفينها وانت بس اللي شايقه خطورتها واهميتها ساعتاها عقلك بيلسع وتبتندي تتخيلي حاجات مالهاش وجوده وتدي نفسك قيمه اكبر من اللازم وتقعدي تنفخي في نفسك زي البلونه لغايه ماهووب مره واحده بووووووووووووم

انا مش عاوز ابقي ابو العريف ولا موسوعه

انا عاوز ابقي انسان عادي اعيش عيشه عاديه مش ناقص امراض نفسيه واكتئاب

ومعظم المثقفين والعارفين اكتار ناس بيجيلهم اكتئاب
يارب ماكتبتش علينا نبقي واحد من العالم دول



فساتين الفرح؟

ده علي اساس ان كل يوم في واحده يتتزوج ولا ايه؟

مش فاهم حاجه ايه الهبل ده؟


الون الرمادي؟
ده حياتي اصلا



ابراهيم الابيض

فيلم رائع ماعدا اخر ربع ساعه بوظت الفيلم

مش هتكلم في التفاصيل فيلم رومانسي جدا مختلط بالعنف في جو شاعري كان ممكن يبقي تحفه
بس الحلو مايكملش

دخلته مرتين علشان عمرو واكد وموسيقي هشام نزيه


هههههه النهايه دي بقيت ابصم بالعشره ان مافيش حاجه زي كده

عارفه امتي ممكن يعيشوا في هناء ونبات ويخلفوا بغال وبنات؟
في الاخره وبس

انا ماشفتش حدوته نجحت والعيب مش فيهم العيب في الظروف والناس اللي بيبظوا اي حدوته


and yet she is turning around

فينك ياقباري تعالي ورينا فايده الكورسات


بس كفايه عليكي البقين دول علشان مستني فاطمه لما ترجع هي كمان اديها بقين زي دول

Humman being يقول...

مدونتك تحفة
مختلفة فى كل شىء
فعلا مصادفة غريبة موضوع حوادث الدقى ، مأخدناش بالنا منها ، واضح ان الدقى استلمت الرايةمن لندن .... من حوادث شرفات لندن لحوادث الدقى

Yasmine يقول...

نونزى :)
الله يسلمك يا حبيبتى ما تقلقيش انا قاعدة معاكم لحد ما تزقهوا..طاقات الرغى عندى اتفتحت على الاخر :D

المشكلة مش فى الفتى..المشطلة لما الفتاى ما يبقاش عارف انه بيفتى :D

بس التغيير دا بقى للاسوأ..الاول كانت الدنيا وردى اوى..كان هيحرى ايه يعنى لو كانت فضلت كدا؟

انا شاكة ان المشكلة فى موبايلى انا اصلا :D
انا اللى اتبسطت اوى بجد من مكالمتك و ان شاء الله نتقابل قريب

Yasmine يقول...

حنان
انتوا كمان وحشتونى اوى و وحشنى الرغى هنا معاكم :)

بس المحاولة الفاشلة عندى انا بتبقى عكسك بالظبط..كلهم بيبقوا متخيلين حاجة و اللى انا حاسة بيه بيطلع حاجة تانية خالص

الدقى دى انا هبطلها قريب..بجد مش فاهمة ايه الصدف الغريبة دى :D

Yasmine يقول...

داليا

الله يسلمك يا داليا..تسلمى بجد
ايوة واضح فعلا اننا عملنا قفلة فى المنطقة :)

انتى كمان شخصية جميلة اوى و تستاهلى كل خير بجد..و ما تقلقيش قاعدة معاكم بس المهم ما تصدعوش من كمية الرغى اللى هتطلع الفترة اللى جاية :D

Yasmine يقول...

يويو

الله يبارك فيكى..و المهم انى رجعت عملت تانى نفس اللى كنت بقول انى مش هعمله..خدتى بالك ;)

ايوة يا بنتى ازاى ما خدتيش بالك..دول مستقصدنى تقريبا بما انى شجاعة جدا فى المواقف اللى زى دى :D

لا بتوع الفتى دول بيبققوا فاكرين ان الناس كلها هى اللى بتفتى و هم اللى هيصلحولهم معلوماتهم..ربنا يشفيهم بجد

شيرين بتنهار احيانا كتيرة و احيانا تانية بتتبسط اوى بالثقة دى..بس هى مسؤولية رهييييبة بجد

دخلته و عجبنى جدا بالرغم من كمية الدم الرهيبة دى..بس انا عجبنى لاسباب تانية خالص :D

مش فارقة بقى للاحسن ولا للاسوا..هو تغيير للاوقع..من الواقعية يعنى :D مع الاسف

الترجمة يا ستى..انها بالرغم من كل اللى عليها لسه بتدور ..قصدهم على الكرة الارضية يعنى :D
و المعنى انه كله بيعدى :)

thank u يا يويو بجد و عقبال ما تجيلك نفس ترجعى مدونتك تانى بقى :)

Yasmine يقول...

ريم..

هههههههه ايوة خرجت من الصومعة تانى:D
بجد وحشتنى تعليقاتك هنا اوى
و ما تقلقيش انا عندى كلام كتير اقوله بس انتوا ما تزهقوش :)

انتى كانك بتقرى افكارى..بالظبط كدا..لو ما صرحتهاش بيجيلها اوقات كتير تتخنق و لوصارحتها يبقى اكيد هتخسرها طبعا..بس هى اتعودت خلاص :)

عجبتنى حكاية ان الباقيين فى الطريق دى..ربنا يطمنك يا رب :)

مش سد ولا حاجة والله..هى قناعة واحدة عندى من زمان..هو شخص واحد اللى ينفع 100% و هو الوحيد اللى هيعرف ازاى يوصل للغجرية بتاعت حليم دى :D
بس كلامك فكرنى بكلام واحدة صاحبتى اوى..دايما تقولى ان احنا اللى بنكلكع الدنيا زيادة

بثى انا الفيلم عجبنى اوى عشان محمود عبد العزيز و عشان القصة بكل الدم و النكد اللى فيها قايمة على شخصية البنت حتى و هى مش ظاهرة فى المشاهد انتى هتفضلى متخيلاها قدامك و عارفة انها هى اللى بتحرك الاحداث..عجبتنى اوى القصة المعقدة دى بصراحة :)

مش هغيب والله..انا قاعدة :)
و مش عارفة اقولك يا ريم بجد سؤالك و اهتمامك فرقوا معايا قد ايه..ربنا يخليكى يا رب :)

Yasmine يقول...

مصعب..

ربنا يكرمك يا مصعب.متشكرة اوى بجد
انا بخير الحمد لله..يا رب انت كمان تكون بخير و تكون اخدت على الحياة هناك :)

ربنا يوفقك يا مصعب ان شاء الله و ترجع مصر على خير ان شاء الله

و ما تنساناش انت كمان من دعائك :)

Yasmine يقول...

محمد..

عشت و شوفتك بتزغرط يا دكتور :D
والله انا كمان كنت قربت انسى..[س بجد وحشتنى اوى الكتابة هنا و التعليقات بتاعتكو..و بعدين هو اذا حضرت الشياطين ذهبت الملائكة؟ :D
خلص بقى عشان انت من الناس اللى مواضيعهم بقت ادمان عندى اساسا :D

شغل ايه اللى هيسيب القاهرة كلها و ييجى عندنا..ربنا يطمنك يا رب :D
هو لو عشان جامعة القاهرة و القرب و من سفارة البعدا و جاردن سيتى اللى فيها سفارة البعدا التانيين يبقى ممكن يكون عندك حق فعلا..ربنا يستر

اكيد هو مستحملك لنفس السبب اللى مخلى شيرين مستحملة هنا :D..انه بيحبك و شايفك صديق كويس بالرغم من كم الضغط الرهيب دا

انا متفقة معاك فى جزئية ان المعرفة فيها خظورة..بس دا لما تيجى مع الشخصيات المريضة اللى ما عندهاش ثقة فى نفسها و متعودة على مبدا خدوهم بالصوت لا يغلبوكم
و لو على الاكتئاب فما جاتش على المعرفة..دا له اسباب تانية كتير فعلى الاقل الواحد يبقى مكتئب و متعلم احسن ما يبقى مكتئب و جاهل :D

لا سيبك من حكاية ان الناس بطلت تتجوز اساسا نظرا للظروف الاقتصادية المهببة :D
دا حوار دار فى الحقيقة بين واحدة و الواحد اللى بتحبه..هى كانت متوقعة انه يقولها هاتى فستان ليكى عشن فرحنا..لقيته بيكلمها فى مشاريع تجارية :D

الرمادى دا غطى على كل الالوان اساسا :D

اخيييرا حد نصف الفيلم دا..سامعة يا فاطمة؟! :D
انا كمان شوفت فيه رومانسية رهيبةكفاية ان البلطجية دول كل اللى محركهم فى الاخر هو احساسهم ناحية البطلة

عشان لما اقول انهم ضحكوا علينا و احنا صغيرين ما حدش يلومنى بقى :D
مش فارقة المشكلة فى الناس ولا فى الظروف..الفكرة فى ان مفيش حاجة بتكمل فى الاخر و خلاص

كورسات مين يا لكتر انت صدقت :D
دا هو كتاب كيف تتعلم الفرنسية فى ساعة و نص انا عارفاهم الناس دول :D

لا انا و فاطمة ما ينفعش نظهر سوا بنعمل قفلة و مش بعيد تلاقيها كانت كاتبة موضوع اسمه شخبطات مثلا من كام يوم كله وارد معانا احنا بالذات :D

Yasmine يقول...

شيماء
متشكرة اوى بجد يا شيماء..كويس انها عجبتك :)

و تصدقى حلو التفسير بتاع لندن دا بس خلينا بعيد عن حوادث الشبابيك و البلكونات مش ناقصة رعب الحكاية :D

الشارده يقول...

مش هعلق على اى كلام
بس صدقينى لما بلاقى نفسى ايدى مشلوله ومش عارفه اعبر عن اى حاجه جوايا باجى على مدونتك وادور على موضوع جديد لانه بجد بلاقى كل كلمه عايزه اقولها بتطلع منى على ايديك

انتى بالنسبه ليا زى احمد خالد توفيق بتقدروا تطلعوا الى جوايا مع اننا عمرنا ما تقابلنا

وحياتك بطلى تختفى احسن انا جالى اكتئاب من يوم ما بطلتى تكتبى

The Seagull يقول...

أكيد أخدت بالي :D

بالنسبة للتدوين فأنا موجودة على مدونتي أنا والشاردةبس انتم تشاركونا :D

بالنسبة بقى لإبراهيم الأبيض فأنا في صف فاطمة بصراحة :D

أنا دخلته امبارح خلسة لأول مرة في التاريخ يعني أدخل سينما :D وبصراحة كدة أنا مش شايفة فيه حاجة غير كمية عنف ودموية مثيرة للاشمئزاز أصلاً :$

فين الورمانسية اللي انتم بتتكلموا عليها دي؟ واحد زي محمود عبد العزيز يتوحم على واحدة من دور أحفاده ويقتلها في الآخر .. وأحمد السقا يحب هند صبري وهي تحبه وبعدين تبيعه لما عرفت إنه قتل أبوها .. في حين إنه أمها سوسن بدر قتلت أبوه قدام عينيه وهو صغير .. وبعدين تتجوز زرزور وتحرضه على أذية إبراهيم .. بتنتقم يعني والا ايه؟ وفي الآخر قلبها يحن وتخرج جري عشان تنقذ إبراهيم من انتقام زرزور .. طب لما انتي بتحبيه كدة بعتيه ليه؟ وبعتي نفسك واتجوزتي زرزور ليه؟ خوف والا قهر؟ :$

الوحيد اللي صعب عليا في الفيلم ده كله هو السقا .. شاف ظلم وقهر وخيانة من أقرب الناس ليه سواء كان صحبه عمرو واكد أو حبيبته هند صبري


حكاية غريبة ومعقدة وماحبيتهاش بصراحة :) غير بقى كمية العنف والدموية والعالم الغريب ده اللي ماشي بسنج ومطاوي وجنازير وواخدها بالدراع :D

يا لهوووووووي على دا فيلم :D .. ده ولا SAW يا شيخة اسكتي :D


بس هو انتي دخلتيه انتي وفاطمة والا ايه؟ :D

Maga يقول...

يا هلا

دخلت بس اقولك حمد لله ع السلامة

ونعقلوا بعد ماندخلوا ابراهيم الابيض مع انى حاسس انه مش هيعجبنى وهغير رايي وهدخل الفرح :D

dr.lecter يقول...

ماهو الفيلم ده اصلا محدش يحس به الا اللي اتذل واتهان بسبب واحده

واحده دمرت 3 رجاله اتنين ماتوا وواحد اتكسر قلبه

عمرو واكد مخانش صاحبه
عمرو واكد عمل كده مضطر وحاول انه يهرب من المصير اللي مستنيه لكن معرفش لو انت يايسرا كنت مركزه كنت هتاخدي بالك انه اتردد كتير وهو واخد السقا علي مصيره
وحتي حاول يصرح له بس السقا افتكر انه بيخرف

عمرو واكد ومحمود عبد العزيز دورهم لمسني بجد من جوه ياربي عليهم

غير كده انا معاكم في نقط الضعف المليانه في الفيلم والعنف اللي مالشو لازمه
لكن الفيلم نفسه مصنف علي انه رومانسي من معظم النقاد لكنه مختلط بجو دموي عنيف وفيه نقط ضعف كتيره في السكريبت ولولا الحاله البصريه الجميله اللي عملها المخرج والمدهشه للغايه كان الفيلم ده ماحدش استحمله لاخره

dr.lecter يقول...

اه الفرح برده هادخله بس بعد ماخلص ان شالله علشان انا مهتم بالموجه الجديده الللي زي مابيسموها موجه قاع المدينه في السينما زي دكان شحاته والفرح وابراهيم

Fatma يقول...

من كتر ما تكلمتوا على ابراهيم الابيض نسيتوني موضوع فلة كان بيتكلم عن ايه اصلا

دا فيلم متخلف :)

اسفه يا فلة بجد بس فعلا ما عجبنيش
كفاية ان اخر مشهد اللي هو مشهد النهاية المفروض الناس تتأثر وتعيط انا ضحكت :)

فين القصة ؟! فين بجد ؟! ها ؟؟ قام حصل ايه ؟!
خسارة والله
شركة انتاج كبيرة اوي بالحجم دا ومخرج مش بطال وعامل شغل حلو جدا وموسيقى هشام نزيه اكتر من رائعة واماكن التصوير خرافة ومدير تصوير راائع كل دا وفي الاخر ادي النتيجة ؟! دي خيبة تقيلة والله

القصة دمرت كل شيئ ! هو فين القصة اصلا ؟!

الدموية مع انها كانت زيادة الا انها كانت موظفة كويس الى حد ما بس بردو فين القصة ؟!

الفيلم عبارة عن مشاهد او سكتشات ممتازة بس الفيلم مفكك من بعضه تماما مش عارفه هل دا عيب السيناريو والقصة ولا المخرج مش شاطر في الدراما ولا ايه

عموما الفيلم اعتقد ان نظرتي ليه هتكون ظالمة شوية لاني دخلته في نفس اليوم بعد ما دخلت دكان شحاته فالفرق كان كبير اوي لدرجة مخيفة
يعني عمرو سعد يعمل دكان شحاته واحمد السقا يعمل ابراهيم الابيض !! عيب والله
دا بردو مع تحفظات ليا كتير على دكان شحاته هبقى اكتب عنه قريب

يويو لا مادخلنهوش مع بعض بس انا قابلت ياسمين صدفة يوم ما كانت داخلاه :)

كانت هي مع صحابها وانا مع صحابي واتقابلنا صدفه في مطعم قبل ما هي تدخل الفيلم على طول
تخيلي :)

Yasmine يقول...

ايمان
بجد كلامك دا كتير اوى عليا..مش عارفة والله اقولك ايه
انا و فاطمة كنا لسه بنقول ليسرا اننا بجد نفسنا نشوفك انتى و لين بجد انتى انسانة نقية اوى و نضيفة اوى عشان كدا بتشوفى كل اللى حوليكى بالصورة دى

و ما تقلقيش انا مش هختفى تانى..على الاقل دلوقتى :)

Yasmine يقول...

يويو
حرام عليكو انتوا الاتنين محسسنى انى دخلت فيلم تانى :D
انا عجبتنى اوى الرومانسية اللى فيه..ما تنكريش ان فى وسط حمامات الدم دى كان فى شوية رومانسية برضه :D

و بعدين هى حبته و لما عرفت انه هو اللى حرمها من ابوها قررت تنتقم بطريقتها..غجرية بقى و كرامتها فوق كل الاعتبارات..

و محمود عبد العزيز كان اكتر من رائع و الموسيقى تجنن و الاخراج تحفة عايزين ايه تانى بقى :)

لا ما دخلناش مع بعض هو زى ما فاطمة قالت كدا..روحنا كل واحد لوحده بس اتقابلنا صدفة :D

Yasmine يقول...

الله يسلمك يا احمد بيه..منور والله :)
ايوة انا عارفة انك هتنصفنى زى لكتر عشان يسرا و فاطمة حسسونى انى دموية مع انى نسمة والله :D

بس لما تدخل الفرح ابقى قولنا رايك عشان دايما الافلام اللى شركات الانتاج بتستغل فيها نجاح اللى قبلها بتطلع فاكسة..فلو كدا اوفر التذكرة لبدل فاقد بقى..هى العلاوة هتكفى ايه ولا ايه:D

Yasmine يقول...

لكتر
انا هستنى تعليقك انت و احمد على الفرح
و متفقة معاك فى الجزئية بتاعت عمرو واكد دى..دى شخصيته اثرت فيا اكتر من احمد السقا اساسا..السقا كان هو اللى بيحرك الاحداث و التانى وراه..هو اللى بيخطط و التانى بينفذ..هو اللى بيقرر و التانى مالوش راى..حتى لما فكر يخونه كان السبب انه خايف من قوة شخصيته و من رد فعله لما يعرف اللى حصل بينه و بين هند صبرى و بعد دا كله لما اتطلب منه يخون صاحبه حاول باكتر من طريقة انه يفلفص من القصة

بس اساسا واحدة زيي بتشوف فى فيلم هانيبال رومانسية مفرطة طبيعى تقول على ابراهيم الابيض رومانسي برضه :D

Yasmine يقول...

فطومتى
اخص عليكى بجد..يا بنتى دا انا خارجة منبهرة بالفيلم..بس انا قولتلك اسبابى المريضة للاعجاب بيهفى التليفون..مش هقول هنا بقى منعا للفضايح :D

بس تصدقى نقطة انه مش بيتحكى دى صح جدا..انا واحدة صاحبتى جت على اخر ربع ساعة و قالتلنا احكوهولى ماعرفتش خالص

و المشهد الاخير انا مافهمتش ايه الرومانسية فى ان البطل يريل على البنت اللى بيحبها يعنى لحد اخر ثانية ما قدروش يتخلوا عن وجود الدم فى المشهد

بس محمود عبد العزيز كان رائع و عمرو واكد ماحصلش بجد و هند صبرى اكتشاف حقيقي..بعيدا عن الدم الفيلم اسطورى بجد..مش عارفة ليه فكرنى بتروى خصوصا فى اخر كام مشهد

انا كنت داخلة دكان شحاتة دلوقتى و بعدين غيرت رايي لما ادخله هبقى اقولك رايي بقى

Fatma يقول...

هههههههههه

اه لو على اسبابك الخفية ماشي :)

على فكرة انا متفقة معاكي تماما انه فيلم رومانسي

دا اساسا تيمة روميووجولييت
والدم وان كان كتير الا انه موظف صح

بس بردو

فين القصة !!!

انا لو حد حكالي القصة قبل ما ادخل اكيد ماكنتش هدخله

اداء الممثلين ممتاز ..بس يا حرام بيحفروا في البحر
اداء ممثلين في قصة مش موجودة !

مش عارفه انا متحاملة عليه كدا ليه يمكن عشان شايفة انه بوتنشال فيلم كويس ومتضايقة انه طلع كدا

بس اجمالا اكيد لا مقارنة مع عمرو وسلمى تو

اسكتي

مش انا قررت اعمل عملية انتحارية وادخل اتفرج عليه :)

Yasmine يقول...

يعنى مش عجبك السقا و هتدخلى فيلم لتيمو :D

و بعدين مش احنا اتفقنا نروح سوا:(
على الاقل عشان ما تتشلين لوحدك
دى حتى داليا مبسوطة منك جدا و مستعدة تاخدك و تروحوه مع بعض :D

The Seagull يقول...

أما حتة صدفة فعلاً :D سبحان الله بجد ..

عمومًا أنا لازلت شايفة إنه مش الفيلم اللي يشدني ولا أتفاعل معاه بصراحة :D

نلتقي مع "بدل فاقد" بقى :D
ومعلش يا فلة بوظنا عليكي موضوعك ودخلنا في مواضيع فرعية :D

Yasmine يقول...

المفروض تكونوا اتعودتوا على الصدف الغريبة دى معايا انا و الاخت فنون :D
دا لو ما حصلش كدا نبتدى نستغرب
على رايك الى اللقاء مع بدل فاقد :D
و ولا يهمكو نورتونى يا جماعة بجد

dr.lecter يقول...

ههههههه

هاننيبال ده باصحاب الذوق الرفيع

يسرا كانت قالت انها شافاه برده قبل كده بس ماتعاطفتش معاه مع اني شايفه فيلم مليان حاجات بالهبل

الفرح لازم يتشاف علشان لو نجح فعلا وطلع زي مانا متوقع
يبقي السبكيه هيتخلدوا في التريخ بعملين معروفين انهم عملوا تاثير في صناعه السينما

بس انا ادامي علي الاقل اسبوعين علشان اعرف اشوفه



فاطمه عاوز تدخل تيمو؟

ياللعار

اصحالبي يوم الجمعه زنوا عليا تاني مره ادخله معاهم قلتلهم علي جثتي
دهع لما تشوفوا الكوتشي من غير رباط

قريت معظم االنقد والخلاصه انه فيلم قليل الادب سخيف ومش مناسب للاطفال

اشبعوا بالفيلم يامراهقات مصر حلال عليكم تيمو

ده سيتي ستارز عملت حركه غبيه احتقرتها بجد

مخليه 5 قاعات لتاامر؟ يالربي ليه يعني ده كله
وال5 الباقيين لابراهيم بس ده طبعا علشان عماد اديب داخل شريك معاهم في مجمع السينمات




هستني راي احمد في الفرح وبعد كده استنوا رايي لكن لو حد دخله بدري ياريت مايحرقهوش بس