الجمعة، 19 يونيو، 2009

تصحيح مسار..

كانت لا ترى من العالم سوى اربعة جدران و سقفا وضعته لنفسها.. ليس شجاعة منها ولا كبرياء من تضع لنفسها حدودا و لمن حولها اسوارا لتحتفظ ببعض الخصوصية فى عالم لا يعترف بالخصوصيات.. و لكنها كانت محاولة اخرى فاشلة للحفاظ على نفسها من الخروج الى عالم اكبر من قدرتها على الاستيعاب كانت تكره ان يقتحم احدهم تلك المساحة التى وضعت نفسها فيها.. فقلبها له مفتاحا واحدا فقط ليس له نسخ. .و عقلها لا يستوعب سوى ما تقرر هى ان تجعله يستوعبه.. كانت تنتقى من تريده فى مساحتها الخاصة تلك.. و تعطيه مفتاحا لحيز ضيق من حياتها.. فلا يرى منها سوى ما تريد هى ان تريه.. فما اكثر المافقين حولها و ما اقوى رغبتها فى قليل من الصدق. و حتى هذه المساحة الضيقة التى سمحت لبعضهم بملئها.. وضعت لهم فيها من المحظورات باكثر مما وضعت من المسموحات.. فالتربيت على رأسها يؤلمها مهما كانت نوايا صاحبه طيبة.. و سؤالهم "مالك؟" يثير غضبها فمن قناعاتها الثابتة ان "لما ابقى عايزة اقول..هقول لوحدى".. و لم تكن تبكى فالفتيات الكبار لا يبكين اما الان فهى لم تعد تحتاج الى مفتاح.. فهى قررت ترك سجنها لخائف اخر.. فنضجها اصبح بالقدر الكافى لتقول ما تريد و تفعل ما تشعر به مباشرة.. و اصبحت لمعة عيونها محيرة لهم.. فلا احد يفهم ان كانت لمعة دموع ام لمعة فرحة لا يعرف تبريرها سواها.. فعندما جعلت صوت فيروز يغطى على جميع الاصوات..توقف الم رأسها وعندما تصالحت مع الطفلة بداخلها ادركت ان دنيتها ابسط من ان "تبات يوم زعلانة" و لم تعد دموعها تخجلها و لم تعد الطبطبة تضايقها..فهى اولا و اخيرا..بشر

هناك 26 تعليقًا:

leeno يقول...

ازيك

انا مطحونة في الشغل جدااااااااااا


علشان كدة قليل اوووي لما بلاقي وقت اعلق في المدونات و لا بكتب حاجات جديدة عندي

عايزة اشكرك على سؤالك


و اقللك النتيجة اللي وصلتلها هايلة

الدنيا بجد متستاهلش

magi يقول...

فعلا الدنيا متستاهلش وانت قولت كل الى بحسه وفى بالى

ReEm يقول...

بجد فرحتلها و اهنيها بجد انه اخيرا

ادركت انه بشر

و يارب الادراك ده يفضل على طول

Here i'm يقول...

تصحيح مسار ..

طيب هيا عايزة أيه دلوقتى .. مش يمكن اللى كان بيقولها مالك .. خلاص بطل يقولها مالك .. و حترجع تقول هما ليه مش بيقولولى مالك ؟؟

على ما أعتقد ان مشكلتها انها بتاخد كل حاجة على اعصابها .. و ان حاجة بسيطة هايفة ممكن تعملها صداع و وجع دماغ و .. و .. و ..

بس انا رأيى ان دا من قلة خبرتها فى التعامل مع العالم الخارجى .. على ما اعتقد تصحيح المسار .. لو هيا حبت تشكر حد عنه .. يبقى للعالم الخارجى المتوحش اللى خلاها تصحح مسارها ..

و لو حتصلح مسارها .. غصب و أقتدار .. مش عارف أسميه ضعف و لا أستسلام .. ولا أسميه التعايش السلمى :D

mohamed ghalia يقول...

رائع أن نتصالح مع أنفسنا

dr.lecter يقول...

عارفه يابنتي انت وفاطمه كتاباتكم شبيهه برحاب بسام اللي اكيد قريتو لها ارز باللبن؟ او دخلته مدونتها ومش بعيد تطلعوا قرايب

اصل هو نفسه القدره علي رسم التفاصيل دي ونفس الطريقه اللي معرفش انتم بتكبوها ازاي ولا جايز يمكن كل البنات كده بيعرفوا يكتبوا عن حاجات معينه خاصه بهم بشكل خاص ومميز


بصي بقين من واحد يمكن معندوش خبره

انا مش هزود عن الكلام اللي قاله قباري

اه انت من حقك تفتحي الباب زي مانت عايزه ولليبي انت عايزاه طبعا ده من حقك

بس افرضي ان الشخص اللي انت اخترتيه علشان يعرف ملامح عالمك عاوز يعرف اكتر وانه الشخص المناسب وانه اللي ينفع يكون سرك ويشيل عنك حتي لو بصفه اخويه او صديق

انت بتفكريني اقصد كلامك بيفكرني بواحد عمل كده مع حد اعرفه وكان نيته زي نيتك بالظبط وخوف من الغد لغايه ماصحيت في يوم كان محتاجاها يقف بجانبها علشان هو الوحيد اللي عارفها وفاهمها لكنها كانت اختفيت زي اي حاحه جميله في الدنيا ومشيت خلاص ودلوقتي ندمان انه خلاه قافل الباب

انا بتكلم عامه لو عن انثي او زكر




لو علي تصحيح المسار فهو كلان لازم

الدنيا رغم بشاعتها وقسوتها لكن فيها حاجات قليله جدا حلوه
ويمكن علشان الحاجات القليله الحلوه دي

احنا بنطمع فيها وشايفين انها بتدينا دافع علشان نعيش
ومن الحاجات دي معرفه الناس

بتنفس حريه يقول...

جميله اوى
لحظه تحرير النفس من مخاوفها هى لحظه ميلاد ثانى

الباب المفتوح يقول...

اولا ازيك يا ياسمين اتمنى تكوني بخير
من فترة طويلة جدا لم اقرأ لك أي شئ في الحقيقة انا اللي ابتعدت عن كل ما يتصل بالادب لظروف خارجة عن ارادتي

وعندما تصالحت مع الطفلة بداخلها
ادركت ان دنيتها ابسط من ان "تبات يوم زعلانة"
و لم تعد دموعها تخجلها و لم تعد الطبطبة تضايقها..فهى اولا و اخيرا..بشر

قمة الحكمة في التصالح مع النفس
اثرت فيا جدا لأني من يويمن بس تصالحت مع نفسي

dalia يقول...

ياسمينة الجميلة

كالعادة تحليل دقيق للامور من الزاوية النفسية العميقة ،تصحيح مسار امممممم جملة بتجعلنى اطمن عليك أكثر من ذى قبل من الجميل ان نتأمل حالنا ونسعى جاهدين أن نصحح مسارنا خاصة اذا نصحنا بعض الاصدقاء أو حتى الاخوات أو والديك بتجنب بعض الامور بيعجبني دائما الانسان المرن الذى يستمع الى الاخرين اللى بيحبوه ويؤمن بضرورة التغيير ليس هذا الا لاننا بشر كما قلتي يعني الواحد يعني في الاول والاخر بشر تحتاج للحنان وللدموع أيضا

ملحوظة ليس كل من يطبطب على رأسك ويرسم بسمة كبيرة على شفتيه أمامك صادق في مشاعره التجربة الحياتية والخروج من النفق المظلم كفيل بأن يعلمك الحياة على أصولها اسأليني أنا لاني كنت زماااان قطة مغمضة الله يبارك في الصحافة علمتني كتير
سلاااام كبير لغاية ما نتقابل صدفة أو عن موعد حتما سيأتي هذا اليوم ربما أكون شفتك النهارده من غير ما احس :) مين عارف

Founoon يقول...

كدا أحسن بكتير :)

The Seagull يقول...

جميل الموضوع يا فلة :)

وألف مبروووووك على حالة التصالح مع النفس دي بجد .. عقبالنـا :)

Jannah يقول...

أجمل شعور في الدنيا انك تنقب في نفسك و روحك و تعرف بالظبط ما تحتاج اليه
مافي اخلى من انك تاخذ مسار تحس انه روحك حرة و راضية و في حالة سلام
اذا كنت ايقاظك للطفلة بداخلك أو اطلاقك لها وصلك لاحساس الرضى فما تحيجي عن هذا المسار أبدا
و بالظبط هذا العنوان المناسب تصحيح مسار
:)

التى هى نفسى يقول...

كانت و مازالت بشر
و كل البشر يخطئـون
[ و يصيبون ] !! ..

حمداً لله علا سلامتها
وفى انتظارها دائماً

:)

انا حرة يقول...

لينو
وحشانى جدا بجد..انتى بتروحى فين يا بنتى؟
يادى الشغل و سنينه انا غيرت رايي بعد خبرتى اللى هتكمل سنة فى اكتوبر الجاى..البنت مننا ملهاش غير بيتها و جوزها :D
بالنسبة لانها ما تستاهل فهى تستاهل والله يا لين..بس انا بعمل نفسي مش واخدة بالى :D
ما تغيبيش تانى عننا بقى

انا حرة يقول...

magi
هو تاثير الموضوع دا ابتدى يروح الحقيقية..بس انا سعيدة بوجودك بجد :)

انا حرة يقول...

reem
مش باين يا ريم انه هيفضل على طول ولا حاجة..هى القعدة على البحر بتعمل اكتر من كدا بس مع الاسف التاثير بتاعها بيروح بسرعة

انا حرة يقول...

كوبرى
ما هو الواحد لو عرف هو عايز ايه ما كان زمان دا بقى حاله..بس دى من الحاجات اللى انا متاكدة انى مش هغير رايي فيها

انا ابتديت اشك ان اعصابى من كتر ما استهلكت خلصت :)

تصدق عمرى ما شوفتها بالطريقة دى..بس لو هشكر العالم الخارجى على الخبرة الرهيبة اللى خدتها فى الكام شهر دول..هشكره كمان على طولة اللسان اللى بقيت فيها :D
دا انا بقيت بنزل من البيت متحفزة و مستنية حد يفكر بينه و بين نفسه يقولى كلمة مش عجبانى..كان مالها الدنيا الصغيرة اللى كنت معيشة نفسي فيها على الاقل كنت بشوف فيها اللى انا عايزة اشوفه

انا حرة يقول...

mohamed ghalia
مش كدا برضه؟ :)

انا حرة يقول...

لكتر

رحاب بسام و غادة عبد العال و نسرين بسيونى و لميا محمد زى ما تقول كدا من مصادر الالهام عندى :)
بس يا ريتنى اعرف اكتب حلو زيهم كدا

كلامك بيفكرنى بكلام واحدة من صحابى..دايما بتقولى نفس كلامك دا و يمكن كمان بنفس الطريقة..

بس تصدق على الرغم من انى مقتنعة بيه 100% الا انى كل ما اقرر اطبقه الاقينى باخد خطوة لقدام و عشرة لورا..و مع ان القصة اللى انت حكيتها دى بييجى فى بالى سيناريوهات شبهها كل يوم و بترعبنى مجرد الفكرة.. الا انى مش عارفة اعمل غير اللى اتعودت عليه

ما هى الحاجات القليلة الحلوة دى هى اللى مخليانا نكمل..مع انى بوف انه فى معظم الاوقات الوحش بيزيد و بيغطى على الحلو و يمكن كمان ياخد مكانه..

انا حرة يقول...

بتنفس حرية
دا لو كانت هتستمر..و لو كانت دى كل مخاوفها اساسا
نورتينى :)

انا حرة يقول...

الباب المفتوح

انا كويسة الحمد لله و متشكرة اوى على سؤالك..و ان شاء الله ترجع تكتب تانى قريب

بس هو زى ما قلت دا فى حالة ان الحالة دى تستمر و ما تكونش مرتبطة بوقت معين ولا حاجة معينة لما تختفى ترجع تانى الخناقة بين البنى ادم و نفسه

انا حرة يقول...

داليا
متشكرة اوى على كلامك فى حقى مش عارفة اقولك ايه بجد :)

بس حكاية ان مش كل اللى بيسال بيبقى صادق و مش كل اللى بيطبطب بيبقى من قلبه دى م محتاجة تقوليهالى..باينك نسيتى المواضيع القديمة بتاعتى..مش مذاكرة كويس انتى :D

و ان شاء الله نتقابل صدفة او بمعاد..دى حاجة تسعدنى طبعا :)

عارفة لو كنتى فى الساحل يوم ما كتبتى الرد كان ممكن نكون شفنا بعض فعلا :D

انا حرة يقول...

فنونتى
لا يا شيخة :D
عموما هو كان تاثير البحر و راح لحاله هو الاول كان الموضوع متعب دلوقتى بقى مرعب تفتكرى لما تتخيرى بين التعب و الرعب هتختارى ايه ؟ :)

انا حرة يقول...

يويو
ميرسى يا حبيبتى ربنا يخليكى :)
بس هى حالة و راحت الحمد لله مع اول يوم شغل
ربنا ما يحكم عليكم بحالة الشيزوفرينيا اللى عندى دى :D

انا حرة يقول...

جنة
انا لقيتها و انا هناك..لما رجعت اختفت تانى فى الزحمة..بس الفرق بين المرة دى و اى مرة تانية انى قررت الاقى الطريقة اللى هتخليها موجودة على طول..يمكن لسه مش عرفاها بس الاكيد انى هفضل ادور لحد ما الاقى الحاجة اللى بتخليها تظهر..دعواتك بقى :)

انا حرة يقول...

التى هى نفسي

الله يسلمك..بس هى تقريبا طهرت يومين و هربت تانى..والله انا كمان فى انتظارها :)