السبت، 4 أكتوبر، 2014

سنة تانية..




بيقولوا ان السنة الأولى هى السنة الأصعب فى الزواج فالخلافات فيها أكتر من "الاتفاقات"..اما عندنا سنة أولى جواز كانت الأحلى..حب مطلق..خلافات محدودة.. بيتنا الصغير بتفاصيله الحلوة اللى اتشاركنا فى كل فتفوتة فيها.. سفر و سهر..ضحك و لعب و جد و حب و كل فعل فيهم بنعمله بنفس الحماس و البهجة

أما سنة تانية بقى فحدث ولا حرج..كم غير طبيعي من الأحداث و المنعطفات التاريخية..المحزن و المفاجئ و الصادم ..كل حاجة فيهم كانت عايزة سنة لوحدها..و كل حدث منهم كفيل بأنه يفقد أى علاقة توازنها..عدينا بحفر غويطة و كتير كنت بشوف نهايات تعيسة لكل حفرة فيهم..بس عدينا من فوقيهم و ادينالهم ضهرنا و طلعنا لساننا كمان

صعوبة السنة التانية فى تطفل الروتين .. فى ان مبقاش فيه أول مرة فى كل حاجة عشان أكتبها فى المكان اللى بنكتب فى تواريخ أحداثنا الجديدة.. في أن اختراع طرق جديدة للاحتفال بتفاصيلنا الصغيرة بيزيد صعوبة .. فى ان الحياة بتاخدنا من بعض بسخافاتها و مطباتها
بس فى كل حفرة كنت بحاول أسندك و كنت دايما بتسندني..بالمعني الحرفي للكلمة..من قلبك بجد و بطرق عمرها ما كانت تخطر فى بالي..دايما كنت الأعقل و الأكبر دماغا (بعيدا عن كوني الأذكى عشان دا شيء مفروغ منه زي ما كلنا عارفين)..كل ما كنت أقول دي أصعب حاجة كان يفاجئنا الأصعب..و كنا بنمسك ايد بعض و نعدي..او ندي ضهرنا لبعض و نتقمص و كل واحد يعدي لوحده..المهم اننا كنا بنعدي

أنا و أنت فخفخينا محترمة..حاجات ملهاش علاقة ببعض بس لما بتتحط على بعض بتطلع حاجة حلوة.. أنا بعندي و طفولتي و قلقي و نظامي و حنتفتي و جناني المستمر.. و أنت بهدوئك و بعد نظرك و كرهك للنظام و احتوائك ليا.. أنا بلساني الطويل و بالساركازم الدائم و أنت بدبلوماسيتك و بحنانك على كل الناس.. أنا بحبي ليك و أنت بضحكتك الحلوة دي..بتميل كفة ميزاننا كتير بس فى الاخر بتظبط

السنة دي هنفتكر مصلحة الكيميا و يوم المركب الصغيرة اللى اتفقت فيها مع الموج انه يخوفني عشان تمسك ايدي لأول مرة و هنفتكر "أنت شايفني قفلت فى وشك" و السمكتين البرتقاني .. هنفتكر يوم الهرم لما الحصان بتاعك فضل يجري ورا الفرسة اللى كنت ركباها و يعاكسها.. و هفتكر مكالمتك الطويلة يوم فرح صاحبتي عشان مش عايز حد غيرك يكلمني.. هفتكر طفولتك و انت بتسألني مين قاعد جنبك فى السينما.. فيلم رسائل البحر و تمشية من كليوباترا لرشدي اللى ماتقالش فيها كان أكتر بكتير من اللى اتقال.. خناقتنا الكبيرة الكوميدية جدا و الجبس البينك اللى قعدتلي بيه اسبوعين..

السنة دي هنفتح علبة ذكرياتنا و هنتفرج سوا على تذاكر السينما اللى عليها اسماء و تواريخ الافلام اللى رحناها زمان..و جواباتك ليا و كتاباتي عنك.. و صورنا القديمة و سنووايت.. كتب التلوين و تذكرة الاوبرا فى اليوم بتاعنا.. تذاكر القطر اللى كنت بتقعد فيه أكتر ما بتقعد معايا و مع ذلك مكنتش بتفوت فرصة انك تيجي.. صورة برج القاهرة و الحنطور و منديل كتب الكتاب.. هنزود عليهم دبوس كان مشبوك فى سرة بيبي عنده دلوقتي أربع شهور و أسورة مستشفی عليها اسمي و اسمه..و هنكمل :)


ليست هناك تعليقات: