الأحد، 23 نوفمبر 2008

تخاريف..(4)

المهمشون فى الارض .. انا..مواطن مصرى..او هم بيقولوا كده تعرفنى ازاى؟ هقولك.. لما تلاقينى فى المصلحة الحكومية مبتسم..
مش عشان انا مبسوط لا سمح الله لكن عشان الموظف يهتم.. انا اللى اول ما بيشوفنى بيبصلى من فوق لتحت..
لبسى مش عاجبه.. مش من الطبقة اللى بتقبض.. مش من بتوع "انت مش عارف انت بتكلم مين؟" لا نازل من عربية ولا عندى سواق مستنينى بره المصلحة حتى لو ورقى كامل مش هخلص اللى انا عايزه انهاردة.. بس عشان شكلى مش عاجبه و مش بعيد اتهزق و تتهان كرامتى قدام مراتى و عيالى عشان اتجرأت و قلتله يخلصلى ورقى هتلاقينى كمان فى القسم ممكن اكون رايح املى استمارة او اقضى مصلحة..زي اى حد يعنى ممكن تشوفنى واقف فى طابور لمدة ساعة او اتنين و الظابط المسؤول مش مشغول ولا حاجة.. هو بس مش شايفنى..اشمعنى هو اللى هيشوفنى؟ و مش بعيد تلاقي بنت حلوة فى عينين البيه الظابط دخلت..
و عدتنى انا و اللى زيي و ساعتها هوسعلها و انا برضه مبتسم.. يمكن وجودها يخليه يشوفنى او يلاحظ وجودى هتدخل و تخرج فى 3 دقايق
و هسمع كلام على حسها عمرى ما سمعته و يمكن احاول اتخيل انه بيتقالى انا..
فى زيي كتير محجوزين جوه..
بس مش بنكون واضحين لاى حد هتشوفنا متجرجرين من هدومنا
عشان ماشيين بالعجلة عكس الاتجاه بنعطل المرور..او هم بيقولوا كده مش بعيد اتحجزكام يوم على ما يتعملى محضر لكن اللى سرق و حرق و نصب و غرق و نهب و حول و هرب مش مشكلة حد..اصلهم مش بيعطلوا المرور هتلاقى منى فى مصلحة التامينات ممكن اكون ست كبيرة او فلاحة على قدى مستنية افهم اجيب معاشى ازاى و منين هتشوف نظرات الاحتقار من الموظفين و خصوصا البنات.. مع انى كنت متخيل انهم لما يشوفوا حد فى سنى هيشفقوا عليا و يرحموا سنى امتعاض..نظرات مرعبة..عدم اهتمام..مش مهم..المهم اكل العيال هتشوفنى فى الشارع ممسوك تحرى ممكن..من ظابط ما يسواش 3 مليم بصتله بصة مش عجباه..او ما حطيتش عينى فى الارض اول ما شفته هيطلع دفتر من جيبه و يبدا يدور على اسمى الثلاثى يا... انت معمولك محضر قبل كده؟ لأ معمولك على فكرة بطاقتك فين؟ هرد و انا مبتسم برضه..ما هو اكيد بيشوف شغله يعنى و هبتسم اكتر لما اخد قفا ولا شلوت.. هبتسم عشان اخبى وجع قلبى على كرامتى و كبريائى و لما اسمع جملة زى "ما تعملش كده تانى" و مع انى مش عارف كده ده اللى هو ايه هوطى راسي كالعادة و اقول حاضر.. حدث بالفعل!!!

تعلم الهندية بدون معلم!!

لما تكون بتتكلم فى وادى و الناس بترد فى وادى تانى خالص.. لما تلاقى توقعات هلامية منك ولا كانك سبايدر مان.. لما تلاقى شخصية غير واقعية تماما اتخلقت و اتصدقت و انت قاعد مكانك لا بيك ولا عليك و متوقع منك انك تقوم بدورها عشان هم شايفينك كده.. لما تحلف انك مش كده و هم يصروا انك كده و نص تأكد انك بتتكلم هندى!

عيب اوى لما واحدة فى سنى تلاقى نفسها فى شخصية من شخصيات ديزنى بس دى فعلا اقرب واحدة ليا..اغنيتها اللى فى اول الفيلم بتعبر عنى جدا

بس مش ده السبب فى انى احطها هنا

فى جملة اتقالت فى الفيلم فرستنى لدرجة انى لسه فكراها "القراية مش كويسة للستات عشان بتخليهم يفكروا" س:هل الناس اللى بالغباء ده لسه موجودين؟ ج:ايوة..و بشدة المشكلة انهم مش بيفهموا ان كلامهم ده اهانة ليهم هم اللهم احفظنا من الغباء و اهله

لا دى مش صورة من فيلم بورنو دى من لعبة بتتوزع على الاطفال فى الهابى ميل بتاعت ماكدونالدز دلوقتى فهمت ليه طلبة المدارس بيعاكسوا البنات بس السؤال اللى بيطرح نفسه.. انهاردة بيوزعوا عليهم البنت فى صورة.. بكرة هيدوهم ايه..قرص فياجرا مثلا؟ و نعم التربية بصراحة

"ليس الرهان على حرية النشر فى مصر ان تسمح السلطات بنشر كتاب "عاشوا فى حياتى" لانيس منصور, بل الرهان الحقيقى فى ان تسمح بنشر كتاب لا بد ان يكتبه احد قريبا بعنوان "ماتوا فى حياته" و هاء الضمير ليست عائدة على انيس منصور, له طولة العمر." بلال فضل اللى بيقول انا ماليش دعوة

The story of my life keep everything at a distance... and everyone Sandra Bullock-The lake house

Cross roads

ايه بقى؟

هناك 16 تعليقًا:

mohamed ghalia يقول...

مصر الحلوة بتتقدم بينا وربنا يستر علينا
تحياتى

mohamed ghalia يقول...

ياريت بقى تسيبك من التخاريف بلدنا حلوووووووووووووووووة ههههههههههه

romansy يقول...

مش عارف بس مالك
البوست مش عارف فيه ايه شويه حاجات كتيره دخله فى بعضها
مش عارف بس هو دا حالنا فعلا ولا هنخلينا نبتسم على طول
اقول ايه بس بعد اللى اللى اتقال

عظيمه يا مصر

Here i'm يقول...

أول تعليق ليا حيكون على فيلم The lake house .. اللى بالنسبالى على عكس كتير قوى من أحلى الأفلام اللى شوفتها .. كنت فى ايجى عامله توقيع هوا و Notting hill و فنو قالتلى أنت زوقك حلو قوى :D ... الجملة اللى أتقالت يمكن تكون عدت عليا عابرة نظرا لفهمى الدقيق للغة الأنجليزية :D بس جملة حلوة قوى ..


أهم حاجة فى البوست دا ... هوا وصفك الجامد جدا للمواطن المطحون .. فكرتينى بفلاش و قصص المواطن المطحون .. بس عارفة أحنا برضه السبب أحنا اللى سكتنا أو أحنا بمعنى أصح اللى بندفع تمن سكوت أبائنا و أجدادنا و أحنا برضه اللى عيالنا حيدفعوا تمن سكوتنا .. بس انا مازلت مصر .. اللى جاى احسن :)


أنا بتكلم الهندية بطلاقة و كمان فذلوك أخر حاجة .. يارب أرحمنى من عالم سمسم اللى انا عايش فيه :D .. تصدقى أنى أكتشفت مؤخرا أن الحل فى شرم الشيخ :D


أهم حاجة أن عالم ديزنى أنتاج غربى خالص .. فين بقى بتوع حبوب المرأة من ديزنى .. ولا هما شاطرين بس على رجالة بلدهم :D


العيب مش على ماك ولا عى لأطفال اللى بيشتروا الهابى ميل العيب على اللى سيبهم .. العيب على اللى شاغل دماغه لسه و أحنا فى 2008 انه يوصل للمدرسين أزاى أن الضرب ممنوع .. العيب على بتاع الرقابة و بتاع التموين و بتاع التعليم و أهو كله من بتاع الـ 27 سنة .. بس هنا بقى تظهر الأم الواعية .. اللى نفسى أشوف مراتى حتتصرف أزاى فى الموقف دا :D


بالنسبة بلال فضل مبدعنا الفاكس .. أحب أديكى اللينك دا تستمتعى بيه ..

http://kabbary13.blogspot.com/2008/11/blog-post_23.html

mUsLiM يقول...

سلمت يمينك أختــى ,,

ولو كان بمقدورى أن أضع عنوان للجزء الأول من الموضوع لسميته " الظلم "

هذا الظلم الذى يعيش فيه المصرى ليل نهـار , أنا لا أدرى كيف سيقف هذا الحاكم الظالم بين يدى ربه غدا

ماذا سيقول له ..؟!!

سبحانك هذا حمل عظيــم , كيف يحمله إنســان !!

.................

فقط قاصرى البصيرة أو عديمها هم من يحكمون عن الإنسان من مظاهر خارجية ويصدرون هذه الأحكام فى صورة باتة لا تقبل النقاش والتأويل ,,

فهذا هو الجهل عينــه ..

..........

يعنى ايه أفلام بورنو يا أختى ..؟

..........

أما عن تعليم النساء فأقول : -

هذا رسول الله لم ... يُنقص حقوق المؤمنات ِ

العلم كان شريعة ٌ ... لنسائه المتفقهات ِ

رُضن التجارة والسياسة ... والشئون الأخريات ِ

والسلام عليكم

ضد التيار يقول...

يادى تخريفك اللى توجع القلب ):

اولا بجد بجد جزء المواطن المصرى عرفتى توصفيه صح لكن وجعتى قلبى قوى على فكره )):

لكن على فكره المواطن المصرى هو اللى عامل فى نفسه كدا

لو رفض انه يتهان لو عرف لو لمره يقول لأ الكل هايحترمه
-------
اما بقى موضوع الهنود ياباااااااااااااااااااااااااى اكتر حاجه بتخنق فعلا

بس انا الصراحه لما اتعرض للموقف دا مش بقول انى بتكلم هندى

انا بقول هو انا بتكلم عربى !!!!!!!!

ايوة ماهو اكيد اللى قدامى هو اللى هندى مش انا D:

----------
"القراية مش كويسة للستات عشان بتخليهم يفكروا"

ماعتقدش ان لسه فى حد بيفكر كدا

لا بجد هو الفيلم كان امتى ؟؟؟!!!!

---------
انتى بتتكلمى عن لعبه اطفال

يابنتى بقى فى حاجات انيل دلوقتى للأطفال عشان يفسدوا اخلاقهم غير اللعب كمان

الطفل دلوقتى بقى ممكن يكون عارف اكتر من الكبير

بس معلش العيب برضه مش عليهم العيب على الاهل اللى فى البيت

و لا انتى ايه رأيك ؟؟؟!!!

----------
اممممممم

ماهو انتى لو مش مقتنعه بكلام بلال فضل ماكنش نزل فى التخاريف

احم احم تدبيسه وقتى على فكره D:

--------

اكيد فى الطريق مش هانرجع لورا يبقى الاتجاهات اللى قدامنا اتنين و احد شمال وواحد يمين

بما انى بتفائل باليمين .. فانا هاروح فى الاتجاه دا

انتى بقى هاتروحى فى اى اتجاه ؟؟؟؟

------

بقالى كتير مارغتش عندك

بس الصراحه انا عايزة ارغى اليوم

و انتى السبب اهو فى التخاريف

اتحملى بقى نتائج تخاريفك D:

dr.lecter يقول...

وفي الاخر يتهموني اني باقعد اتكلم عن وجع المصريين وغاوي نكد (ابتسامه)

بالنسبه لبلال باموت فيه بعيد عن السينما وعن جرنانالدستور وعن دماغ ابراهيم عيسي

بانسبه لصوره البنت بتاعه ماكدنالدز

معقوله متعرفيهاش؟ دي شخصيه مشهووره في عالم الكوميكس ولها كارتون في فريق العداله كنت باتفرج عليه من سنه ههههه


بالنسبه للجميله والوحش من اجمل 10 افلام عملتها ديزني لغايهدلوقتي وخاصه شخصيه بيللي المتمرده


بالنسبه للفيلم كان من اجمل افلام 2006 مع انه ماعجبش ناس كتيره بس النوعيه دي بحبها اللي مابيحصلش لقاء فعلي بين بطلي الفيلم او تبعدهم المكان والزمان

اديله 7 من 10 علشان جو القصه واداء ساندرا بولوك

بس برده الامريكان مش هيعرفوا يتغلبوا علي روعه الادب الانجليزي الي بيتحول لافلام زي تحفه 2007 atonement

انا حرة يقول...

والله بلدنا مافيش احلى منها..المشكلة فى النظاااام :))

انا حرة يقول...

ما هو ده سر الخلطة :)
حاجات كتيرة داخلة فى بعضها عشان ما حدش يفهم حاجة:D
و ماله لما نبتسم على طول..اى حاجة ارحم من سؤال مالك؟

هى عظيمة اه..بس محتاجة اللى يعدلها

انا حرة يقول...

Notting hill ده من احلى افلام جوليا روبرتس
انا كنت حاطة اغنية الفيلم هنا و لسه مغيراها قريب
فى مشهد فيه من كتر ما بحبه دورت عليه على اليوتيوب و شيلته فى الفافوريتش عشان اشوفه دايما
بالنسبة للجملة فهى عابرة جدا..بس عجبتنى اوى..هى بتقول ان قصة حياتها انها دايما تخلى فى مسافة بينها و بين كل حاجة..و كل الناس
عجبتنى اوى بجد

وصفى للمواطن المطحون يا ريته كان من بنات افكارى
ده كله شوفته بعينى فى يوم واحد لفيت فيه على المصالح الحكومية عشان اخلص ورق التعيين
حسيت ان مش دى مصر بتاعتى..مش دى اللى انا اعرفها خالص
تفتكر هم كمان حاسين بالفرق ده؟
والله مانا عارفة هى غلطة مين..بس اللى شوفته وجعلى قلبى..و لو كان اتحكالى ما كنتش صدقته

شفت بقى انى كان عندى حق:D

و هو فى غباء مستورد و غباء محلى؟:D
و انا مالى بهناك..كل يغنى على ليلاه :))

والله يا محمد انا لما شوفت المصيبة دى افتكرت جملة قالها حد مش فاكرة هو مين:D
قال ان اللى يجيب اطفال فى العالم اللى احنا فيه ده يبقى مجرم..طلع عنده حق بصراحة

على فكرة البوست بتاعك ده من احلى الاجات اللى انت كتبتها..انا ما رضيتش اقول كده هناك عارف ليه طبعا:D
بس بجد مكتوب باسلوب صحفى جدا لدرجة انى تخيلت انى هلاقى اسم صحفى فى الاخر
ييجى منك والله يا كوبرى:D

انا حرة يقول...

ربنا يكرمك يا مصعب يا رب :)
بس انا ماليش اى فضل فى الموضوع..انا نقلت اللى شوفته
ماجا كان سأل مرة السؤال ده..افتكرته اوى لما شفت الناس اللى مالهاش ضهر بيجرالها ايه فى البلد دى

يا ريتها مظاهر..هم بيحكموا على الجوهر لانهم اكتر ناس بيعرفوه..بس الجوهر اللى هم متخيلينه مش هو اللى موجود بجد

لأ دى مش هعرف اشرحها خالص يا مصعب بصراحة :D

حلو اوى الشعر بجد..ما تكتب قصيدة فى الموضوع ده ينوبك فيا ثواب بدل ما انا عمالة اكلم نفسي كده :)
قريت قريب كتاب بنت الشاطئ عن نساء النبى..عرفت ازاى الاسلام كرم المرأة لدرجة فوق الوصف..و الجهل بيه فطسها و جابها ارضا
و عليكم السلام و رحمة الله و بركاته :)

انا حرة يقول...

ما هى الفكرة ان دول ما عندهمش الاوبشن انهم يقولوا لا
لو شوفتى الراجل و هو واقف قدام الظابط فى الشارع بيترعش و بيبتسم ابتسامة باهتة عشان يخبر رعبه كنتى فهمتى قصدى
ربنا يتولاهم برحمته

الفيلم ما كانش من زمان اوى..فى التسعينات على ما افتكر
و لسه فى ناس بيفكروا كده على فكرة..و كتير كمان..بيخافوا من الست المثقفة عشان بتحسسهم بالتهديد

و الاهل هيلاحقوا على ايه ولا ايه
انا مشفقة عليهم بصراحة..تليفزيون و دش و مدرسة و صحاب و مدرسين و ماكدونالدز:D
هيعملوا ايه ولا ايه بس؟

انا مش موافقاه نهائى..حتى فى جملة و يديله هو كمان طولة العمر بس مكتوبة بالاسود فمش باينة:D

والله مانا عارفة اروح فين تصدقى:)
اصل المكان اللى عايزة اروحه خايفة اكون ما استهلوش دلوقتى
المهم اروح مكان احسن..ربنا يسهل

ابقى تعالى ارغى كل يوم..استمتعت برغيك جدا على فكرة :)

انا حرة يقول...

انا اصلا كنت عايزة اكتب الكلام ده فى الموضوع بتاعك بس ما رضيتش انكد على الناس هناك
مش مصدقة اللى شوفته..بجد مش مستوعبة ان اللى بشوفه و بستكتره فى الافلام بيحصل فى الواقع
ده و انا فى القسم افتكرت فيلم هى فوضى جدا من المناظر اللى لقيتها هناك
هى البلد دى بتاعت مين؟؟

ما تقولش لكوبرى بقى عشان ما يزعلش:D
انا عجبانى طريقة كتابته فى المصرى اليوم بصراحة..و المقال الوحيد اللى فوته طلع اهم واحد فيهم

عرفت انهاwonder woman بس و بعدين يعنى؟
دى بالكتير تتحط على نادى striptise امريكانى مش فى وجبة اطفال ابدا يعنى..بالذمة ايه الرسالة اللى عايزين يوصلوها للطفل بالصورة دى؟

لا مش قادرة اصدق..فى حد غيرى بيتفرج على كارتون هنا؟؟!!
احمدك يا رب:D
انا خفت تقولوا عليا اتهبلت ولا حاجة
ده احلى فيلم عندى من افلام ديزنى..من كتر ما بحبه خليت صحابى يجيبوهولى هدية فى عيد ميلادى:D

الفيلم ده فكرته وهمية بجد..ساندرا بولوك مالهاش حل..و الحوار مش طبيعى
وatonement من احلى الافلام اللى شوفتها..انا لسه شايفاه قريب و زعلت انى اتاخرت كده على ما شوفته..انا بشوف نقدك للافلام فى منتدى السينما العالمية على فكرة بتوفر عليا كتير لما ابقى عاية اعرف الافلام اللى تستاهل انى اضيع ساعتين من حياتى عليها :)

samamasr يقول...

:)

mUsLiM يقول...

مش هاتعرفى تشرحى ليه ..؟

هو الأفلام دى يعنى أفلا إباحيه ..؟

هل هذا قصدك ..؟

أما عن الشعــر , إن شاء الله هاكتب قصيدة فى الموضوع ده

بس لما أخلص اللى فى إيدى :)

مش عارف عندى نهم فى الكتابة عن أدب الحيوان :)

وخلى بالك من كتاب بنت الشاطئ ,,,

انا مقريتوش ,بس مش واثق فى بنت الشاطئ دى :)

لأن عادة الأدباء إن لم يكن لهم كبير اطلاع بعلوم الشريعة فبصراحه بيخبطوا الدنيا فى بعضها ,,

كعباس العقاد مثلا , كان كثيرا ما يخطئ إذا تحدث فى علوم الشرع الحنيف ,,

لأنه ببساطه لم يتلق العلم الشرعى من بابه ,,

وربنا يعزك ويكرمك يا أختى

السلام عليكم :)

انا حرة يقول...

اى نعم يا مصعب هذا قصدى :)

على فكرة فى مقدمة كتاب عائشة عبد الرحمن مكتوب انها استاذ بكلية الشريعة بجامعة فاس بالمغرب..و فى قسم الدراسات العليا كمان :)
هو من اشهر الكتب اللى اتكتبت عن زوجات الرسول عليه الصلاة و السلام و يستحق القراية فعلا

مستنية القصيدة على فكرة..ده اللى اسمه تدبيس :)