الاثنين، 17 نوفمبر 2008

انا كل ما احتاج اتكلم مع حد قلبى بيرتاحله يطلع كمان هو اتألم ملحقش اكمل و اشرحله
حصله نفس اللى حصلى.. احكى وهو يكملى..
وبدال ماشكى له حالى.. يفضل يشكى بدالى..
واقوله كلام ياسلام ياسلام.. لو اقوله لنفسى واتعلم.. كتر الكلام ولا ريح حد.. ولا عمره خلا الجرح يروح.. و كلنا بنضحك على بعض.. مجروح و راح ينصح مجروح و انا اللى بشكى من اللى انا فيه.. و اقول لغيرى..قال..يعمل ايه و اقوله كلام.. يا سلام..يا سلام..
لو اقوله لنفسي و اتعلم
من احلى اغانى انغام

هناك 19 تعليقًا:

Here i'm يقول...

تصدقى بقى و الله العظيم الأغنية عندى فى المرفقات مش عايز أبعتها .. أدخل أمسحها بقى .. :D

بعيدا عن أنغام علشان أنغام دى بالنسبالى حالة تخصنى انا بس ..

الأغنية دى بالذات و أغنية ألقالك حد من أكتر الأغانى اللى بحبها لأنغام ..

على فكرة .. كلنا كده .. فالحين قوى و أحنا بنكلم غيرنا .. عندك أنا مثلا بدى كورسات لصحابى و قرايبى فى طريقة المذاكرة و انا فاشل فى المذاكرة .. بقول لصحابى يعملوا أيه مع الموزز بتاعتهم و انا و الحمد لله فاقد الشىء :D

و لما أفكر أتكلم .. الاقى اللى قدامى بيشكى أقعد أنصحه و أقوله و فى الاخر ألاقى نفسى بكرر نفس الكلام دا

د/ رامي شهاب الدين يقول...

هى الأغنية كلماتها جامدة فعلا


لكنى بفضل لها أغنية مابتعلمش


فيها حكمة، وفلسفة حياتية خاصة


دمتى بكل الود .. تحياتى

Fatma يقول...

هههههههههههههههههههههههههههههههههه

لا جاية في وقتها بالنسبة لي بصراحة :)))

انا هسكت ماشي :)

Yasmine يقول...

القالك حد بتجيبلى اكتئاب على فكرة..و برضه حطاها فى البلاى ليست بتاعت النكد..غاوية انكد على نفسي انا :)

لا بس انا تفوقت على نفسي و ناقصلى شوية و امسك عصاية للناس عشان اربيهم على مزاجى..شوفت اسخف من كده شخصية؟!

اه صح..مبروك للاهلى :D

Yasmine يقول...

ما بتعلمش احلى اغنية فى اخر شريط هى و ما بحبش بس الاغنية دى هى اللى جاية على بالى اوى اليومين دول..لاقية فيها نفسي اوى

Yasmine يقول...

فنونتى انا الاغنية دى بتتلخص عندى فى اخر سطرين..باب النجار مخلع زى ما بيقولوا
بس انا بستمتع بجد بالسمع بما ان اوبشن الكلام ده مش نازلى اساسا
و هزعل بجد لو كنتى فهمتى حاجة تانية :)

Sweet Violet يقول...

الكل كده فعلا

بينصح الغير حلو قووووى

لكن هو للأسف مابيعرفش

ممكن لان الكلام مافيش اسهل منه ):

Here i'm يقول...

أه الحمد لله كسبان ..

ربنا بيحبك أننا كسبنا .. دا أنا كنت حتشائم :D

blue-wave يقول...

انا كمان بعشق الأغنيه دى

غير معرف يقول...

أنا بعشق الأغنية دى على فكرة
ليها ذكريات حلوة





وحشتينى موت على فكرة

Desert cat يقول...

انا علشان عتيقة ومش بسمع غير فيروز فاول مرة اشوف كلمات الاغنية الجميلة دى
فكرتنى بالمثل اللى بيقول كل واحد فيه اللى مكفيه
:)
محبتى

صفا سارة يقول...

انا اول مره اقرأ كلمات الاغنيه دى بس بجد جميله اوى بس واضح ان ده حال كتير لان النصايح سهله بس صعب تطبيقها

Yasmine يقول...

ضد التيار
طيب تقولى ايه بقى للى بيقول للناس انه ماعندوش القدرة على النصيحة و برضه بيتطلب منه ده
اصعب حاجة فى الدنيا ان الناس تحطك فى مكان هم بس اللى شايفينه لايق عليكى و يستنوا منك انك تعملى اللى هم متوقعينه منك

Yasmine يقول...

كوبرى
يا خسارة..كنت عايزاك تتشائم :D

Yasmine يقول...

blue wave
انا و دماغى

سعيدة بوجودكم جدا
واضح انى مش لوحدى اللى بحب النكد :)

Yasmine يقول...

desert cat
انا كمان عتيقة زيك و فيروز لا غنى عنها فى حياتى
بس لو سمعتيها من انغام هتعجبك بجد
نورتينى كالعادة :)

Yasmine يقول...

صفا
لو سمعتيها باللحن هتعجبك اكتر
هى المشكلة ان الواحد ساعات بينصح الناس باللى هو مش قادر يعمله..و ده اصعب ما فى الموضوع

nA3'oUm HaNeM يقول...

كلمات حلوه
يلا عشان جو النكد و الاكتئاب يكمل يا سوسو : D :D

و انا عندي دور اكتئاب محترم جدا

Yasmine يقول...

سلامتك من الاكتئاب يا نوجتى :)
انشاله اللى يكرهوكى يا قلبى
لقرى البوست اللى بعد بعد ده و انتى تتفائلى شوية :)