الخميس، 19 فبراير، 2009

عندما ينتصر الرمادى..

تستيقظ فى السابعة..تتذمر كالعادة.. فهى تكره قلة النوم باكثر مما تكره صوت المنبه المزعج تقرر انها لو كانت تعرف مخترع هذا الشئ لالقته من اقرب شباك تفتح عينيها فى بطء
و تتذكر انه بينها و بين ميعاد العمل 30 دقيقة او اقل تفكر فى ان البنت مالهاش غير بيتها و جوزها و تقرر استبدالها بان البنت مالهاش غير بيتها و لاب توبها تحاول ان تتذكر ما الذى جعلها توافق على هذه الوظيفة..فتفشل ترتدى ملابسها فى عجالة و عدم اكتراث فتتذكر انها "لا تحب ان تخرج مبهدلة"
فتعيد ترتيب ملابسها بعدم اهتمام تغسل وجهها و تنظر الى المراه.."حلو كده" تندهش من قدرة زميلاتها
على وضع كم غير ادمى من الالوان على الصبح تتمتم بينها و بين نفسها: "مؤكد انه العريس اللقطة"..
والا فلما تتحملن هذه المشقة كل صباح؟ تقرر انه يكفيها ما تضعه على وجهها من اقنعة التماسك طوال اليوم فلم تضيف اليهم قناعا اخر يقبح باكثر مما يجمل؟ تشرب قهوتها و تدعو لمخترع النسكافيه بالصحة و الستر لو كان عايش و بالرحمة و المغفرة لو كان مات تقرأ دعاء الخروج من المنزل..
و تستعد ليوم تعرف تفاصيله مسبقا تركب سيارتها غير عابئة بذلك الغريب
الذى لا يترك كرسيه امام العمارة ابدا و تتغاضى عن نظراته اليومية
بالرغم من ملازمة السبحة له فى جميع اوقات اليوم تتحرك بكسل شديد فينتقل كسلها الى السيارة لتتباطئ هى الاخرى
تدندن خدنى يا حبيبى لفيروز
خدني ياحبيبي ع بيت مالو بواب
خدني ياحبيبي ع قمر الغياب
نساني بالغفا بأيام الصفا
تترجع الليالي ويرجعوا الأحباب
خدنى و لا تاخدني الفرح ع الطريق
و حبك بيحصدني و ما عندك رفيق
يا امير السيف وين اخدت الصيف
بشوفك و ما بشوفك و ضايع بالضباب
في اميرة صغيري انخطبت بكير
رميو عليها الغيري و ما بتعرف تطير
سكنوها قصور خلف سبع بحور
و صغيري الاميرة و كبير الباب.. تصل الى عملها متأخرة ربع ساعة..
و بعد سلسلة من "صباح الخير".. تصل الى مكتبها تدعو بالا تتصل بها الان..
فالصداع الصباحى قاتل
و تفاصيل المكالمة حفظاها و ممكن تسمعها يصل زملاؤها فى العمل..
فتسأل عن اخبارهم دون اهتمام حقيقي تنتقدهم و تقلدهم.. فهى تكره اللذين يدعون الاهتمام باحوالها
و هم لا يريدون سوى سماع جملة واحدة "كويسة الحمد لله"..طيب بتسألوا ليه من الاول؟! لا يهم..فالان اصبحت تسأل "ازيك"
و تشير بان "طيب كويس" قبل حتى ان تسمع "الحمد لله"بتاعتهم
تفكر فى الحال الذى وصلت اليه حياتها تريد البكاء فتدعى الابتسام..فهذه هى طريقتها الجديدة.. تفكر فى الاتصال بها..
فمجرد الاطمئنان بانها على قيد الحياة
كاف لنقل بعض السعادة اليها تتراجع..لم تحملها كل هذا الحزن الصباحى؟
تفكر فيما يؤلمها لثوانى..
فتقرر بان الموضوع مش مستاهل..خلاص مع انها تعرف انه يستاهل اوى..و انه مش خلاص تفكر فى الاكل لتمضية الوقت..
تقتلها الزيادة الاخيرة فى وزنها..فتتراجع عن هذه الفكرة ايضا فما اكثر التراجعات فى يومها هذا! يخبرها بأن "بكرة تكبرى و تتعلمى" فترد فى سرها بان "انا كبيرة من زمان على فكرة" تردد لو كان الروتين رجلا لقتلته تصلها رسالة اخرى..
تحدث نفسها بان"مش عايزة اخرج..مش بالعافية يعنى" و ترد على الرسالة بان "ان شاء الله" اخيرا تدق الساعة الخامسة..
تلملم اشيائها فى عجالة كأن لديها ما يستحق العودة من اجله تركب سيارتها و تقرر ان لفة فوق كوبرى قصر النيل هتظبط المود تلف حتى تدوخ..تقنع نفسها بان المود اتظبط..تتجه الى المنزل تغضب قبل ان تدخل الشارع.."مفيش مكان للركن"..
تنفض هذه الافكار السلبية عن رأسها "افتكرى..نشوف الاول و بعدين نتعصب" تصل..تركن..تصعد.."هدومك اتكوت".."عارفة" تدخل حجرتها..المكان الوحيد الذى يحترم خصوصيتها تفتح الشباك حتى تتخلص من هذا الشعور القوى بالخنقة فتدرك ان السبب فى شعورها بالاختناق ليس قلة الهواء تقرر القراءة..فلا ترى سوى حروف تفشل فى ادراك معناها
حان وقت الشيكولاتة..تاكلها دون ان تشعر بطعمها تتذكر ان عليها تغيير نغمة المنبه..
فتتذكر ايضا ان المشكلة ليست فى المنبه يسألونها:"مالك؟"..
فتجيب بأن "كويسة..بس بكره الصحيان بدرى"..و تنام.

هناك 45 تعليقًا:

عايش... ولكن !!!! يقول...

هو انا اول تعليق ولا ايه

عايش... ولكن !!!! يقول...

دنا طلعت اول تعليق والله كويس
اعمل بقا زى الناس التانيه وافرحلى شويه
هيييييييييييييييييه
هههههه

كفايه كده بقا
نخش فى الموضوع
البنت مالهاش غير بيتها و لاب توبها
ده الجديد ولا ايه ؟ هههه

انتى لخصتى تقريبا معظم مشاكل الحياه اليوميه بروتينها الممل ( اللى بنعمله انهارده بنعمله نفسه بكره )
دمتى مبدعه
علاء

Here i'm يقول...

هوا انا ليه دايما بقول فل الحمد لله .. علشان مش عايز أتفاجأ بحد بيمثل عليا دور الحنية و دور اللى عايز يطمن عليا و يطلع بس أن سعادته عنده حب أستطلاع ..

أنا بقيت بلاقى نفسى لوحدى .. كنت زمان مبحبش أخرج غير مع صحابى و أتحايل و أجمعهم .. دلوقتى بقى اللى يقولى لا مش نازل أقوله طيب .. و أنزل انا و أتمشى لوحدى و أحط فى ودنى فيروز .. بقى عادى جدا

mohamed ghalia يقول...

تخليص للروتين اليومى
وبرده مسبتيش فيروز لازم تجيبى سيرتها هههههههههههه
دمتى بكل الود

leeno يقول...

ايه موجة الصباح و احداث اليوم دي؟؟|ليه عودة

شحن اللاب توب خلص

Reem يقول...

فعلا لو كان الروتين رجلا شخصيا لنحرته مش قتلته و بس

تعرفي حاليا بفكر في ايه انه اروح حديقة الحيوانات من باب التغير و هقترح الاقتراح ده على افراد العيلة
هي حاجة هبلة بس اهو تغير

انا مرة خرجت اخويا الساعة 12 تقريبا بس نلف بالعربية قريب من البيت و نرجع بس تغيير جو

بس حلوة اغنية فيروز المفروض دي وحدة تعدل الدماغ

اما مسألة السلام ع الماشي ده فتقريبا نص البنات اللي بتسلم عليا في المركز ببقى مش عارفاهم بس بقول كويسة و اسألها انتي ازيك و اخبارك ايه؟!

روتين و خلاص

انا حرة يقول...

عايش و لكن

باين كده :)

ما هو لازم الوحد يجدد فى حياته ولا ايه؟
انا بشوف اللاب توب مسلى اكتر بكتير بصراحة :D

كويس ان فكرة الموضوع وصلتلك
متشكرة اوى لزوقك

انا حرة يقول...

كوبرى

انا بقى بقيت بقول كويسة دى مع كل الناس سواء كانوا من اللى عايزين يسمعوا الحمد لله و بس او اللى عايزين يعرفوا اكتر بحكم علاقتهم القوية بيا
كده اريح لينا احنا الاتنين :)

تصدق كنت لسه بقول لصاحبتى اللى مسافرة دى كده..انى لما بخرج لوحدى بتبسط اكتر بكتير من لما بخرج مع الناس او يعنى فى اوقات معينة ده بيكون اريح من انك تظبط مواعيدك و الاماكن اللى عايز تروحها مع اربع ولا خمس بنى ادمين تانيين..حلو انك تعرف تسلى نفسك لوحدك

انا حرة يقول...

mohamed ghalia

تصدق ما كنتش ناوية اجيب سيرتها تانى عشان ما تزهقوش..بس لقيت الاغنية لايقة اوى فقلت احطها :)

انا حرة يقول...

لينو

هم بيسموه توارد خواطر
بس انا بالنسبالى قلب على فيلم رعب :D

مستنياكى يا لين :)

انا حرة يقول...

reem

مش كده برضه؟ :)
انا سبقتك و رحت الاسبوع اللى فات بس فى اسكندرية مش هنا..كان يوم حلو اوى بجد

تصدقى انا كنت هموت و يبقى عندى اخ كبير عشان يخرجنى بالليل لما ابقى مخنوقة..ربنا يخليكو لبعض

انا زيك برضه و لسه من حوالى شهر واحدة جت سلمت عليا و قعدت ارغى معاها ربع ساعة و انا معرفش خالص هى مين طلعت واحدة كانت معايا فى المدرسة لمدة عشر سنين و ما افتكرتهاش :)
بس اللى بيضايق لمايكونوا ناس قريبين و ما يكونوش عايزين يسمعوا عنك اى اخبار مش كويسة..امال بتسألوا ليه هموت و افهم بجد؟!!

dr.lecter يقول...

متاخدش في بالك تحلالك عيشتك وتروقي

ادي الشغل اللي كلنا هنمخوت عليه قمه الملل الملل الملل مافيهوش اي تجديد

انتي عارفه انا الشغل بالنسبه لي تضييع وقت مش شيسء اساسي حاجه مؤقته كده لكنتي مش مستعد تبقي حياتي كلها صحيان الساعه 7 ونص علشان ابقي في الشغل 8 ونص

ده انا لما بوصل لهم علي 9 او 9 ونص بيبعملوا لي فيها مولد وانا باطنش


كويس انك بتكتبي يومك بالنفصييل بحب اعرف الناس بتقضي يومها ازاي والحمد لله طلعت اسوا واحد فييكم ههههههه

حلوه اوي معاد الشوكلاته بيتفكرني بمعاد البيبيسي بتاع الساعه 2 بالليل

وماحدش يقولي هو فيه حد كل يوم يشرب بيبسي الساعه 2 بالليل ؟ امال هشاشه العظام دي جت منين

اعملي في مره كده حركه ادخلي عليهم قوليلهم انا زهقت منكم ومخنوقه من الملل ياتدوني اجازه وقت مانا احب ياشوفي حد غيري

طبعا المدير هيجري وراكي ويقولك فله هانم بليييز ماتسيبناش مستقبل الشغل متوقف عليكي هنضيع كلنا من غيرك

تروحي باصاله بكبرياء كده وتقولي ليه too late

وتخرجي والمكان كله ينفجر من ورراكي


وكده تكوني كسرتي الملل واهو غيرتي شويه ممكن تجري ده مرتين في الاسبوع


انتي عارفه بقالي شهر مابشوفش حد من صحابي بسبب الشغل والماستر لدرجه بالصدفه عرفت المهم اول امبارح قالوا يابني ده احنا عملنالك نعي

كان فيه فرح من اسبوعين المفروض نروحه ماروحتنش وسفريه الكس ماروحتاهش ويوم الحفله برده ماروةحتهاش مش عارف افضل متنيل لغايه امتي علي كده

انا مش عاوز ابقي عبد للروتين وللشغل عاوز اعيش حياتي ويبقي كل يوم فيه جديد

اوووووووف

leeno يقول...

كلنا الظاهر عايشين في الرمادي و بنشترك في التفاصيل اليومية دي

في كتير منهابحس ان انا و بحس انك بتتكلمي عني و عن تفاصيلي و مشاعر بمر بيها بشكل يومي

و اللي نفسي الغي نمطيتها

leeno يقول...

على فكرة بكرة يبطل يفرق معاكي تنامي متناميش

ترمي المنبه من مكانه تضربيه في الحيط

انا بقيت استعمل الموبايل عشان قلبي مش حايطوعني يكون مصيره زي مصير المنبهات اللي قبله كلها

تمنه بيفرق يعني هههههههه


عارفة لو جربتي يوم تخرجي و انتي حاطة مسحة ميك اب خفيفة ( انا مش بقول 17 لون) حتحسي انك بادية اليوم بوش نضر شوية و مقبل حبتين على الحياة

انا بحب اخرج و حاطة ميك اب الصبح مش عشان المهفوف اللقطة خاااااااااااااالص بس عشان اداري الرمادي اللي بقيت بحس انه بقى ظاهر على وشي !!ساعات بالليل لما ابقى لوحدي او مع ناس قريبين مني ببقى من غير ميك اب و ببقى مش حابة اداري اي حاجة !!!

عارفة انا في الشغل تقريبا طول الوقت حاطة فيروز و بسمعها بالسماعات عشان مسمعاش بقى حواديت الموظفين اللي تشرح !! و دة مستني دة على الغلطة و دة واقف لدة على الوحدة و دة عايز يضرب دة فضهره

فيروز احسن !!

و في الاخر كلنا تقريبا عايشين نفس اللون الرمادي مع الاختلاف البسيط في التفاصيل

تصدقي

مش حابة افكر اووي في تفاصيلي اليومية ! مش عايزة اكتئب

Founoon يقول...

انا جيت بعد ما فقت من الصدمة :)

انا لحد دلوقتي مش متخيلة ..ولا كتبناها تقريبا في نفس الوقت

عشان حاجة جديدة تحصل في حياتك لازم انتي شخصيا تعملي الحاجة اللي بتعمليها بشكل مختلف وبإحساس مختلف

صعب اوي يبقى النهاردة زي بكرا زي بعده

صعب اوي تبقى الايام شبه بعض

الاحساس دا قاتل بجد

صفا يقول...

البوست لخص الروتين والملل اللى معظم الناس عايشه فيه
بس الجملتين دول خرافه بجد "تفكر فيما يؤلمها لثوانى..
فتقرر بان الموضوع مش مستاهل..خلاص
مع انها تعرف انه يستاهل اوى..و انه مش خلاص" بجد رهيبه وبتحصل معايا
باستمتع جدا ببلوجك ده ومتابعاه دايما بس مش دايما باقدر اسيب كومنت
:)

mUsLiM يقول...

قصة مكـررة

انا حرة يقول...

لكتر
و اى ملل ده ملل غير محتمل بجد
اكن فكرة انى جبت الشغل لفسي من غير واسطة و الاستقلالية اللى بيديهالى هم اللى مخلينى اكمل

لكن انا كمان غالبا مش هكمل فى نفس المجال..ماعرفش اكون موظفة عند حد نفسي فى يوم افتح بيزنس بتاعة لكن فى ايه ماعرفش :D

بس انا عايزة اعرف ليه يومك اسوأ واحد على فكرة :)

بمناسبة الاتهديد ده..انا من كتر ما ببقى قاعدة مديالهم البوز المتين كل ما بمسك ورقة و قلم بيفتكروا انى بكتب استقالتى :D


الشوكولاتة دى اختراع عظيم..بس انا اعرف ان الشوكولاتة بترفع المعنويات..البيبسى بتعمل ايه بقى؟!

بس انا مش سايبة شغلى ياخدنى من حياتى بالعكس..ده انا بروح مش شايفة قدامى و بصر انى انزل و اشوف ناس و اقابل صحابى و لو مش فاضيين بخرج لوحدى..استحالة اضيع فرصة نزول بسسب الشغل ده لو حصل تعرف انى عيانة على طول :D

انا حرة يقول...

لينو

كلنا هذا الرجل على الاقل فى اوقات معينة من السنة بتبقى مواسم للملل :)

انا ماليش فى الاختراع ده نهائى و شكلى بيه بيبقى وحش اوى..او يمكن عشان مش بعرف اتعامل معاه :D
هو الكحل عشان يخبى شوية اثار قلة النوم و خلصنا على كده

الحمد لله ان شغلى كله مع ولاد بعيدا عن اللت و العجن و شوفتى طبخت ايه امبارح ..بس عندى ملل من نوع اخر :D

و تكتئبى ليه ما كلنا فى الهوا سوا :)

انا حرة يقول...

فنفونتى

و ليه تتصدمى..انتى المفروض تكونى اتعودتى يا قلبى :)

بصى انا بقيت مقتنعة انها مسالة نفس..لو عندك نفس هتتغاضى عن القهوة الباردة و الشوارع الزحمة على الصبح و الملل بتاع الشغل..و لو مالكيش القهوة السخنة مش هتفوقك و الشوارع الفاضية مش هتبسطك و الشغل المسلي مش هيفرق معاكى..بالنسبالى مشوار للبحر بيرجع النفس تانى..شوفى بقى ايه اللى بيجيبلك نفس و اعمليه :)

انا حرة يقول...

صفا

متشكرة اوى على كلامك و كويس انه عجبك..و ابقى اكتبى اللى انتى عايزاه فى اى وقت :)

انا حرة يقول...

مصعب
مش فاهمة قصدك ايه..بس هو عامة انا مابعرفش اكتب قصص

leeno يقول...

مين اللي قاللك اني شغلي مع بنات؟

الحمدلله من يوم ما ابتديت اشتغل ما اشتغلتش مع بنات !!

اللت و العجن عند الولاد اكتر من البنات و الفشر و الاسافين و غيره و غيره

احنا اللي جايين على البنات بس !!

dr.lecter يقول...

لا مصعب يقصد ان كل الناس غالبا كده يعني

blackcairorose يقول...

استمتعت بتفاصيلك المنمقة

كلنا بنعدي بالاحاسيس نفسها حتى لو اختلفت الظروف

الروتين والملل والسخافات والنظرات ومقاطع الاغنيات التى نحبها والاحباطات الصغيرة والاشياء التافهة اللي ممكن تخلينا نبتسم او ننسى لثانية ضيقنا

mUsLiM يقول...

الله يكرمك يا دكتور يا فهيــم انت :)

هو اللى قاله دكتور محمد ده اللى انا اقصده :)

والحقيقه أنى مررت لا أقول مرات بل عشرات المرات بفتيات يحكين مثل ما حكيتى من حياة او أسلوب حياة

انا لا أدرى الحقيقه ما هو السبب فى ذلك

أم أنه ادعاء يتمناه البعض ويتحقق عند القليل منهم

مع أن فى نظرى هذا الأسلوب ليس بالهدف المرتجى من حياة الفرد

لكن على كل حال ، ما لفت انتباهى بشده هو هذا التشابه بين الكثير من الفتيات

فأردت أن أنوه عليكى

لكن طبعا مش قصدى انك بتألفى قصص :))

وبعدين يا ستى ألفى قصص ونقراهالك ونستمتع بيها ان شاء الله :)

السلام عليكم

nody_1987 يقول...

المنبه
بجد ده اختراع حقيررررررررر

وخصوصا فى الشتا القارص ده

نجحتى فى انك توصلى حاله الملل والزهق حلو اوى

Desert cat يقول...

اااااااااااااه مشوارى اليومى
اصحى الصبح انزل الشغل ارجع من الشغل انام علشان اصحى تانى انزل الشغل علشان ارجع انام وهكذا
دايرة فى ساقيه بعيد عنك

dalia يقول...

أنا حرة

كان زمان عندي مبدأ لو الواحد ممكن يصحى متأخر ليه يصحى بدرى بس الشروق لغت هذا المبدأ القديم واصبح الاستيقاظ الساعة 7,5 ، واصبحت اقنع نفسى ان العمل خير وسيلة لنسيان الهموم وبالتالي فما اجمله ، اما بالنسبة للروتين اليومي فلا يزعجني لاني بكون متفقه مع نفسى اني حعمل كل يوم حاجه جديدة حتى ولو كان ملابس جديدة أو حذاء أو شنطة
اما بالنسبة للخنقة من الشغل فممكن اكتبلك عشروميت تعليق على الخنقة لدرجة اني بقيت بحب اروح كل يوم من شغلى على الاقدام ههههه بس من حسن حظى ان بيتي قريب من الشغل يعني بمشى حوالي 20 دقيقة وبعدها بحس اني فكيت وأول ما اوصل البيت برسم بسمة كبيرة واسلم على اهلي كاني زي الفل بس اكيد في احلام وطموحات مسببالي انشغال وتفكير وبقول اكيد ربنا حيفرجها ويصبح كل شيئ تمام التمام انصحك بالمشى علاج راااائع صدقي مجرب اسلوبك رائع بالمناسبة ومضحك انا برده بستعجب من كم الالوان اللى بعض الفتيات تضعها على وجهها انا يدوب بعرف اصحي والبس والعريس اللقطة بقه مش بيجي بالالوان هههه

3omda يقول...

ياااااااااااااااااااااااااااااه لالا لسه شويه ياااااااااااااااااااه ايه الملل ده؟
كل ده عايشه فيه!!
دا لو كل بني آدم بص لحياته بالشكل ده هتلاقي بكره الصبح انتحار جماعي من فوق برج القاهره.
طيب ماتجربي تاخدي اجازه..بس أجازه يعني اجازه من كل حاجه كنتي متعوده عليها ميعاد نومك لبس النوم مكان نومك ميعاد صحيانك الطريقه اللي بتكلمي بيها الناس وكمان الطريقه اللي بتستقبلي بيها الكلام من الناس ،الاماكن اللي بتروحيها الحاجات اللي بتعمليها الناس اللي تعرفيها الموسيقي اللي بتسمعيها الافلام اللي بتشوفيها كـــــــــــــــــــل حاجه انسيها وجربي حاجات جديده .ليه ترضي بحاجه مش عجباكي مادام تقدري تغيريها.......
ممكن تقرري طريقة حياتك

... amr يقول...

طبيعي انك مش لوحدك في المود بتاع الروتين دة ... عن نفسي بحاول أجرب حل من 2 عشان موضوع التجديد دة ... اخد العربية و أقفل شبابيك العربية و اعيش مع ال cranberries أو ABBA و اطلع اي حتة بعيدة لوحدي ...
أو اترمي على أي كافية و أقعد أقرا فيريتيجو ...
................. بس انا متخانق مع أبويا و لسة ما اشتريتش فيريتيجو

:S

Desert cat يقول...

انتى فين ؟؟
مش متعودة عليكى تغيبى كدا
طمنينى على اخبارك

leeno يقول...

معلش برة الموضوع

بس انتي فين؟؟؟


مختفية ليه ؟؟؟

يارب خير

انا حرة يقول...

Leeno
مين دول اللى يقدروا ييجوا على البنات و انا موجودة ؟!:D
انتى عرفانى الا انا و قضية المراة
الفكرة كلها فى ان الشغل مع الولاد اريح بالنسبالى..
او يمكن فى المكان اللى انا فيه و مع الناس اللى معايا ده اريح حل
مع انى دلوقتى ممكن اقولك ان الاتنين انيل من بعض
و الاريح انك ياتشتغلى مع ناس تعرفيهم يا تشتغلى لوحدك
و انا برجح الحل التانى :D

انا حرة يقول...

لكتر
ما انا كنت اقصد اقول يا ريتها كانت قصة :)

انا حرة يقول...

Blackcairorose
انا كمان بستمتع دايما بشياكة كتاباتك
و الاشياء التافهة دى هى موضوع البوست الجاى

انا حرة يقول...

مصعب
معلش اعذرنى عشان قلة النوم عملت عمايلها معايا :)
هو ايه ده اللى ليس بالهدف المرتجى من حياة الفرد؟
و ماله ده و مال التشابه بين البنات اللى تعرفهم
هو فى ملل رجالى و ملل حريمى؟ :D

انا حرة يقول...

Nody
مش لوحده والله..ده فى بنى ادمين كتير بيندرجوا تحت الاختراعات المضرة بالبيئة
كويس ان فكرة الموضوع وصلتلك :)

انا حرة يقول...

Desertcat
كلنا دايرين فى نفس الساقية صدقينى
بس الفكرة فى انك تعرفى ايه الحاجة اللى بتخرجك من الحياة دى و تعمل ليوم refresh
حتى لو كانت حاجة صغيرة..عشان بصراحة الحياة بالشكل ده غير محتملة

انا حرة يقول...

داليا
انا حتى لو رايحة اكتر مكان بحبه فى الدنيا..الصحيان بدرى بالنسبالى هيفضل لعنة :D
بس مش هى دى مشكلتى..المشكلة فى الجزء التانى من كلامك
انك تكونى رايحة مكان بترتاحى فيه..و ده مابقاش متوفر عندى اليومين دول
ولا حتى فكرة انك تلبسي و تنزلى و انتى شكلك حلو اللى بتفرح كل البنات المفروض
بس فعلا ما بقيتش بتفرق معايا
المشى كمان ما بقاش اوبشن عندى..
من كم السخافة اللى بقت بتحصل للبنات فى الشارع كرهت فكرة النزول من غير العربية
ربنا يخليكى يا رب :)
ايوة انا زيك برضه اللى شاغلنى مش العمش الرسمى اللى مخليهم مش شايفين انهم بيوحشوا شكلهم
اللى عايزة افهمه هم امتى بيلحقوا يعملوا كده فى نفسهم؟

انا حرة يقول...

Amr
خليك فى الحل الاولانى العربية و الاغانى اللى بتحبها
بما ان الكافيهات بقت دوشة لا تحتمل و لو عرفت تلاقى مكان اساسا يبقى كويس و اساسا مش بقتنع انك لما تكون زهقان تقعد مع ناس..او يمكن لان اللمة عادة بتخنقنى اكتر فى الاوقات اللى زى دى

انا حرة يقول...

Desertcat
انا موجودة والله..بس هى حالة ملل رهيبة كده و قلت استنى لما تعدى
تسلمى يا حنان على سؤالك بجد ما تتصوريش اثر فيا ازاى :)

انا حرة يقول...

Leen
انا هنا اهو :)
كنت فى فترة نقاهة من الحالة اللى فوق دى..ربنا يخليكى يا لين بجد مش عارفة اقولك ايه

The Seagull يقول...

ملل .. ملل .. ملل
خنقة .. خنقة .. خنقة
ايش حال لو كا كنتش بدرس يعني كنت عملت في نفسي ايه إن شـاء الله :D كنت انتحرت على كدة بقى والا ايه :D

كمية سخافات في يوم الواحد لا يمكن احتمالهـا .. والمصيبة إنه كل يوم نفس الروتين الممل المشل للحركة والكلام .. مافيش ما بيتغيرش مش عارفة ليه :(


المهم سيبك من الرغي ده ..
حمدًا على السلامة :D

انا حرة يقول...

يا بنتى ده الزهق ده بقى حالة عامة لدرجة انى لما بلاقى حد مش زهقان ببقى عايزة اقوله لعل المانع خير :D

تصدقى انا بقيت بحس انى بقول نفس الكلام كل يوم :))

الله يسلمك يا يويو و عقبال ما الاقيكى رجعتى تكتبى تانى بقى :)