الاثنين، 1 يونيو 2009

من وحى الكوميديا المصرية..

(1)
اوباما هيشرف بعد يومين
لما مرتضى منصور كان بييجى يقول احد خطبه العصماء كانت شوارع الدقى بتتقفل بالامن المركزى لحد ما لقوا الحل العبقرى بتاع الشجر اللى اتحط على سلالم مجلس الدولة قال ايه عشان يمنع الوقفات الاحتجاجية دلوقتى لما اوباما بيه قرر يشرف.. متوقعة انهم يمنعوا الناس من نزول بيوتهم و مش بعيد يمنعوهم من دخول الحمامات لحد ما الزيارة تعدى على خير اوباما جاى فقبة جامعة القاهرة تتلمع و احنا قعدنا فيها اربع سنين ما شوفناش ازازة جلانس بتترش عليها اوباما جاى فعلم مصر اللى قدام الجامعة يتغير فورا مع اننا قعدنا سنين بيه و هو دايب و لافف على العمود.. اوباما جاى فالسور يتدهن و الشوارع تنضف
و الطلبة تتلغى امتحاناتها..ايشى خيال يا ناس مش مهم كل دا..المهم اوباما جيتو مبسوط من كايرو و على راى عمرو سليم الحكومة بتدهن الشوارع و المعارضة بتزرع شعر سؤالين اخبث من بعض: يا ترى لو مبارك راح يقول خطاب فى هارفارد..
الطلبة هتتمنع من دخول كلياتها برضه؟ و يا ترى الكومبارس اللى هيقوموا بدور الطلبة المستحميين و افراد الشعب المبتسمين و رجال الامن المتعاونين.. هيجيبوهم من انهى استوديو.. ستوديو الاهرام ولا ستوديو يونيفيرسال؟
ده العلم زى ما كان محطوطلنا
و دا العلم بتاع اوباما ********** (2) الصورة دى لما اتنشرت من حوالى شهر و نص جرايد المعارضة طلعت طاقات الشتيمة كلها فى الست نائبة رئيس الوزرا الاسبانية و كل اللى همهم انه ازاى الزيارة دى ما تكونش متنسقة مع الحكومة جرايد الحكومة قالت ان الست جاية تساعد و ان كله متنسق مع الست فايزة و الجرايد المستقلة اكتفت بنشر الصورة ما حدش سأل نفسه اذا كانت الست الاسبانية هى المسؤولة عن الحالة اللى تخلى واحدة ست توطى تبوس ايدها عشان 1500 جنيه؟ فعلا هى اسبانيا اللى غلطانة ********** (3) فاروق حوستى اعتذر عن تصريحاته "العنصرية"ضد الشقيقة اسرائيل سيادة الوزير ما اكتفاش برسوماته البوهيمية السيريالية التشكيلية المهلبية فقرر يشل بقيت الشعب بتراجعه عن موقفه العنصرى ضد الدولة الوحيدة اللى قايمة على اساس عنصرى و لها شرعية دولية فى نفس ذات الوقت لدرجة ان مؤتمر كامل لمناهضة العنصرية يتبرجل عشان رفض دولة واحدة لتصريح واحد اتقال فيه مش عارفة ليه افتكرت المشهد بتاع مسرحية وجهة نظر بتاع "وطى..وطى..وطى..ازحف" يا ترى كرسى اليونيسكو يستاهل كل الوطيا..قصدى التوطية دى؟
**********
(4)
My biggest fear لما هو كل الفنانين صحاب و بيموتوا فى بعض و كل ما واحدة فيهم تتسئل عن رأيها فى اختها تقولك قد ايه دى "حد جميل" و قد ايه بتموت فيها على المستوى الشخصى و ان ازاى الناس الفتانة الحقودة هى اللى بتطلع اشاعات على الوسط الفنى و ان فلانة هايلة و ما حصلتش مش بس كفنانة لا كمان كانسانة امال سيد زيان و جورج سيدهم و محمد شرف و مريم فخر الدين و المنتصر بالله و فؤاد خليل و محمد الدفراوى بيعلموا ايه لوحدهم ؟ و يا ترى الواحد ممكن ييجى عليه اليوم اللى تكون فيه اقصى امنياته ان حد يفتكره بتليفون ولا بزيارة مستعجلة و علبة شوكولاتة و ابتسامة من ورا القلب و سؤال مش مقصود لزوم تادية الواجب؟
**********
(5)
نكتة اليوم..
للى نظره ضعيف..مكتوب على الاوتوبيس "للبيع بجد" و للى مش فاهم النكتة..فالصورة لاوتوبيس حكومى..مال عام يعنى.. م م ع على راى هانى رمزى فى فيلم عايز حقى
**********
(6)
نقطة و من اول السطر.. ازاى الخنقة النفسية من مكان تتحول لخنقة فعلية تخلى الواحد بمجرد ما يدخله ما يعرفش ياخد نفسه؟ صدق اللى قال البنت مالهاش غير بيتها و جوزها..قال شغل قال

هناك 40 تعليقًا:

Here i'm يقول...

عمرو سليم عمل كاركاتير .. بيرسم فيه ناس فقيرة و المسئول بيقول عايزيين ندهنهم أو حتى نلبسهم لبس جديد علشان اوباما ..


العلم فى كل حتة فى مصر طالع عينه .. من أيام مدرستى الأبتدائى و الاعدادى و الثانوى .. العلم المتقطع كان هوا القاسم المشترك بينهم ..


عارفة .. لما تعرفى سر زيارة الست دى لمصر أيه .. تزعلى أكتر .. انها جاية من بلادها علشان تبرر للحكومة و البرلان الأسبانى ان الفلوس بتاعة الاعانة رايحة فى المكان الصح .. يعنى جاية تقولهم ان و الله فى هنا فقرا .. و الله دى قلة ادب .. من الحكومة الزبالة .. و من الست الغلبانة اللى خلت 1500 تنزل على أيد الست و تبوسها .. و أنا أشك أنها غلبانة أساسا


عمرو سليم .. عمل كاركتير وصف فيه فاروق زبالة .. رسمه و هوا عريان و كاتب التنازلات للوصول لكرسى اليونيسكو



عارفة .. كله كوم و محمد شرف كوم .. الراجل دا متعبش زى جورج سيدهم من 13 سنة .. دا تعب من يومين .. دا كان فى أسف من الأزعاج و كان فى فيلم كبارية .. و كان فى كل افلام أحمد حلمى .. احتقرت أحمد حلمى خاصة و شباب الممثليين اللى كان بيشتغل معاهم محمد شرف ...



تيجى .. نشتريه .. وهوا علشان يبقى أسمنا رجال اعمال .. و أهو نشرب شوية من دم البلد دى ؟؟



بعيدا عن الخنقة .. انا اتعودت أصبر .. بس بشروطى و بقوتى .. لكن أصبر على خنقة ..NO Way .. لكن عارفة هيا البنات ملهاش غير بيتها و جوزها .. يصبحها علقة و يمسيها بعلقة :D .. و خصوصا بتوع الحكومة

Here i'm يقول...

ياريت متجييش تانى توجعى دمغنا .. كنا مستريحين من سعادتك ..

انا قولت حتتبى عن أيمن نور و السيشوار .. :D

تحفة أيمن نور دا و الله :D

أقفلى البلوج دا .. لا بتعرفى تكتبى و لا بتعرفى تعبرى ولا بتعملى أى حاجة .. أنا مش عارف أيه اللى يخليكوا توجعوا دماغنا ..


جامدة قوى حتة السلالم دى .. فكرتينى بواحد صاحبى قعد على السلالم مستنى اهله علشان معهوش المفتاح يومين ع السلم .. بيقولوا أنه غسل وشه الصبح قبل ما يروح الشغل عند البواب

Fatma يقول...

1
لسه اثار الزيارة ما ظهرتش نواحينا
ربك يستر

اصلا في نفس ذات اليوم ال opening بتاع Zara
في سيتي ستارز
متهيألي الدنيا هتبقى مقفوله عندنا بسبب المناسبة دي اكتر من عندكم بسبب اوباما :)

2- الصورة دي وجعتلي قلبي وزعلتني من نفسي مش من الحكومة على فكرة
لو بلدنا .... احنا فين سيبنا الناس توصل لكدا ليه !

3- فاروق حوستي دا مقزز

4- بلاش انا ووسط الفنانيين والنفاق المريع بتاعهم
مش معقولين بجد ..المفروض يعني ان الفنان دا انسان حساس ومرهف المشاعر وحاجة كدا طايرة في الهوا فري سبيريت يعني
ماعرفش مين يا اوختشي الفنانيين بتوعنا دول وليه عاملين كدا

5- هي جات ع الاتوبيس
بيع يا عواد
مش كان اسمه عواد بردو

6- دايما الخنقة النفسية بتتحول لخنقة حقيقية
كنت عاملة موضوع عن كدا من زمان مش فاكرة اسمه ايه بي حاجة فيها خنقة
مبروك احب اطمنك انك على الطريق الصح
الحقي نفسك يا امي
حاولي تلاقي اي حاجة لطيفة في اللي بتعمليه حاولي توجدي لنفسك جحاجة بتحبيها في الشغل بأي طريقة
والا فعلا مش هتقدري تكملي
فعلا بجد

Yasmine يقول...

دى مسخرة والله..و كله كوم و الخبر بتاع تمن الحاجات اللى دهنوا بيها القبة..دا على اساس انه هيطلع يقعد فوقيها و يقول الخطاب مثلا؟

مانا عارفة انها جاية لاسباب سياسية بس مش مقتنعة بحكاية ان الست متأجرة ولا مقتنعة بنظرية ان دا ذل للشعب المصرى..الشعب مذلول اي نعم بس مش اسبانيا اللى ذلاه

شوفت بتاع فاروق حوستى يومها طبعا..و قعدت ادور عليه على الانترنت عشان اجيبه هنا و فشلت..كان جامد اوى اصلا

انا الملف دا وجعلى قلبى بجد..ولا المنتصر بالله اللى قال انه مش محتاج فلوس و قادر يصرف على نفسه..و قال انه محتاج بس حد من صحابه القدام يفتكره و يفتح على الباب فى يوم و يسال عليه..يا رب ما اشوفنى ولا اشوف حد بحبه فى الموقف دا ابدا بجد

اه و ماله :D
بجد ما استوعبتش سر الخلطة..دا انا عملت شقلباظات بالعربية عشان اعرف اخد اللقطة دى :D

كل واحد عنده سياسته فى الخنقة..انا بالنسبالى دا معناه انى اتهزمت من اولها..و بصراحة كرامتى هتنقح عليا اوى لو عملت كدا دلوقتى..
بس شوفت العروستين؟..بيحسسونى انى عندى 3 سنين مثلا :D

مانا اكتفيت بالجملة بتاعت عمرو سليم بتاعت المعارضة اللى بتزرع شعر..انا قريت المصرى اليوم بتاع امبارح انهاردة فى الشغل و كل ما تيجى سيرة السيشوار و ال200 شعرة اللى عايز يزرعهم اتقلب من الضحك :D..بالذمة فين فى الدنيا فى معارضة مسلية كدا :D

انا مش هرد عليك..انا هسيب قرائى اللى بالملايين هم اللى يردوا عليك..متواضعة اوى انا :D

لا و قال انا اللى رايحة اتريق عليها و لما اكتشفت الفاجعة لقيتها بتقولى تعالى يختى اقعدى جنبى:D
قال غسل وشه عند البواب قال :@

Yasmine يقول...

ايون ايون انا مستنية زارا دا بفارغ الصبر..تعالى نبقى نروح يومها انا الحاج زارا دا له عندى معزة خاصة جدا..و كدا او كدا ما بينلهاش مرواح يومها :D

ما هو بالظبط كدا..هم سابوهم يوصلوا لكدا و احنا ما عملناش حاجة عشان نمنع ان دا يحصل..ما نلومش بقى الاجانب لما ييجوا يستفيدوا شوية من الزبالة اللى احنا عايشين فيها

و اى مقزز الله يكرمك ابقى شوفى الصور اللى راسمها على النت

بجد يا فاطمة قلبى وجعنى اوى..و قاعدين يقولولك الفنانين و احساسهم بلا خيبة

اه يختى كان اسمه عواد :D

الاقى فين و منين يختى :D
انا بنهااااار يا فاطمة بجد انتى مش متخيلة الافلام الهندى اللى انا فيها
بس صامدووون ان شاء الله..دعواتك يا اوختشى بقى :)

Jannah يقول...

يا بنتي ارحمي حالك من البشر وخذي أجازة و ريحي حالك تعبتي أعصابج
عاملين تخقيضات مذهلة على الخطوط الجوية فكل مكان لازم نستغل و نستغل و ما أحلى الاستغلال
خذي لك كم يوم في الاسكندرية و لا فينيسيا و لا أي مكان بلا أوباما بلا وجع راس
الدنيا أساسا حر مو ناقصة

Desert cat يقول...

كل الناس كانت مستائه من اللى حصل من الست العجوزة اللى وطت وباست الايادى الا انا اصل الحق مش عليها الحق على النظام اللى عمل فيها كدا
اما زيارة اوباما اعتقد لو اونكل حسنى اللى كان رايح كان بقى الحياة عندهم بيس ولاكان فى حاجه بس احنا علشان حاسين بالنقص عايزين نتجمل ولما يمشى هترجع ريمه
تحياتى

Maga يقول...

والله اتعكنن من الصورة دي

اسمعى كلام جنة انك ترحمى حالك بس اسكندرية لاء :D
عارفة المشكلة فى الهان والاسفت و و انا شوفت صورة للجامعة والشوارع اللى حواليها والاشجار لفت انتباهي حاجة واحدة ان كل دا اتعمل في يوم فى يوم واحد بس المنطقة دي نضفت اوى كدة
يبقى معقولة ان فى ناس مش عايزة البلد تبقى حلوة ؟!!

اما بقة بتاع امه مصدر تشريع

اللى اعتذر لليهوم معتذرش لينا

اللى بيهين نفسه علشان خاطر مركز

هدعي ربنا انه مايطلهوش ولا يشمه

برسومات اهله دي :D


اديكي اشتغلتى مش كنتى سمعتى كلامنا :D

The Seagull يقول...

(1) عقدة الخواجة :D بالضبط كدة زي أيام أسبوع شباب الجامعات عندنا في المنصورة كنتي تعالي اتفرجي على النظافة في الشوارع وتخطيط الأرضيات وعمل الأرصفة :D وبعد ما انتهى كل شيء .. رجعت ريمة لعادتها القديمة .. عادتها والا هنشتريها يعني :D


(4) قريت فعلاً الملف ده في المصري اليوم واتضايقت جدًا وصعبوا عليا بجد :) ويمكن أكتر اتنين أثروا فيا أبو الحسن وجورج سيدهم والمنتصر بالله :) واستغربت جدًا محمد شرف :$ ابن امبارح؟ يعني للدرجة دي؟

صحيح الدنيا فعلاً تلاهي :$


(5) ههههههه ضحكتيني والله انتي وقباري :D عادي عادي كنت شفت كاريكاتير عن سياسة البيع والخصخصة اللي ماشية في البلد سمسار بيتفاوض مع واحد خواجة أمريكاني على أبو هول :D


(6) بتحصلي فعلاً من مكان معين لحد ما فعلاً كرهته وماعدتش طايقة أي حاجة فيه :) يالا ربنا يعيننـا :D


واوجعي دماغنا زي ما انتي عايزة :D ولا تلتفتي لآراء الحسودين :D

يااااه يا بنتي خرجتيني من صمت أزلي بقاله أكتر من شهر :)

mahasen saber يقول...

البوست رائع يا حره
واكتر ما المنى فيه الست اللعجوزه المحتاجه المقهوره

وموضوع مرض الفنانيين

الدنيا دى فعلا ولاا تسوى قرش صاغ

mUsLiM يقول...

تعرفى يا اختى .. انا الجامعه وحشانى اوى اوى .. ووحشانى القبة .. ومربع حقوق والقعدة فى المدرج والضحك والهزار ووحشانى برده سياسة واقتصاد الحقيقه والموديل بتاع منظمة المؤتمر الاسلامى ووحشانى بين السرايات المنطقة المعفنة اللى بتخنق منها .. وواحشنى اوى اوى وسط البلد وكوبرى قصر النيل يااااه

معلش انا دخلتك فى قصيدة وحشانى بس لو مكنتش قلت دول كنت هاموت الصراحه ههههه

والله مش المشكله فى العلم بحد ذاته ، المشكله ان زيارة أوباما لجامعة القاهره لغاية دلوقتى متأكدتش ، نفسى يديهم زمبه وميجيش ( هيا زمبه دى بتتكتب ازاى هههه )

أما عن الصورة بتاعت الست الاسبانية هو كلامك صح وانا متفق معاكى بس برده الصورة تغيظ مالها يعنى الأخت الاسبانية دى منشكحه اوى كده

ههههههه ، يعنى واضح جدا انها مبسوطه وما شاء الله ماده ايديها بكل فخر

لكن على كل حال فى الآخر مش غلطها ، الغلط غلط اللى خلى الست الغلبانة دى توطى وتتذلل للأجانب ولناس لا مسلمين ولا عرب ولا مصريين ، وعلى فكره فى آلاف المصريات زى الست دى مستعدين يوطوا ويبوسوا قدام واحده تحسن عليهم ومعندهمش اى مانع يتصوروا

حسبنا الله ونعم الوكيل

أما عن فاروق حسنى فمن ساعة ما حصل وأساء لأركان الإسلام الأربعة فأنا رميت طوبته الحقيقه ومش عاوز أدور على طوبته تانى خلاص ، أصلى استعوضت فيها ربنا :)

أما عن موضوع الفنانين ده ، فباين انك شفتى الحلقة اللى جابت المنتصر بالله وماع أخ تانى كده ممثل قديم جميل الحقيقه والحلقة دى أظن اتذاعت على الحياة ،،

فعلا شئ مؤلم والله يا أختى ، بس انتى فكرى كده ، إيه اللى خلى آخرة الناس دى كده

الانسان لازم يتعلم ويتعظ من المواقف دى ،،

هل ده عيبهم ولا عيب الناس التانيين ، ولا عيب الجميع ..؟

جاوبى نفسك وانتى تعرفى ،،

أما عن الأتوبيس فهو ممثل لمصر الفتاة :))

إلا قوليلى صح

كانوا زمان دايما يقولوا مصر الفتاة ، وشوقى فى أحد قصايده قال مصر الفتاة

هيا لسه فتاة على كده ..؟ :)

وخديها منى حكمة هههههههه

معلش اخوكى حكيم كبير يعنى

والله من غير هزار انا فى نظرى ان البنت بتشرب المر ياعينى فى الشغل فى الزمن ده لأن الشغل فى الزمن ده بقى انتهاك لآدمية الانسان الحقيقه

يعنى والله بجد لو قاسم أمين نفسه موجود فى هذا الزمن كان طالب بعدم عمل المرأة

انا مش ضد عمل المرأة ابدا ، كل انسان حر فى كده ، والعمل حق مكفول لكل أحد سواء رجل أو مرأة

لكن البنت فعلا بتتعب بجد وبتتبهدل وبتفقد كثيرا وأنا واثق من كده بتفقد كثيرا من أنوثتها ورونقها

يعنى أى أنوثه وأى رونق بعد 9 ساعات عمل يهدوا الحيل بالله عليكم !!!

يلا الله المستعان

جميل موضوع يا ياسمين :)

السلام عليكم

Superman يقول...

(1)

يا ساتر علي الناس اللي بيدعوا انهم مثقفين و يقولوا العلم إتغير و القبة إتدهنت عشان اوباما

العلم اللي انتي صورتيه ده متنكس حدادآ علي مستقبل طلبة جامعة القاهرة اللي بيتخرجوا منها اسوأ مما دخلوها..

اما القبة اللي دهنوها فده لان أوباما رايح الجامعة بالطيارة..و كان لازم يعملوا له علامة يشوفها من فوق!

اما بالنسبة للطلاب..فرئيس الجامعة بعت لكل عميد كلية يرشح له 4 طلاب..
و هم دلوقتي قاعدين يمتحنوا تويفل يتقدمهم السيد رئيس الجامعة اللي حب يراجع!

إسمحي لي بقي اسئلك سؤال أخبث من سؤالك..
سيبك من هارفارد..هم ليه ما عملوش كده لما الريس كان رايح جامعة القاهرة يلتقي بشباب الجامعات؟


(2)

الصورة مؤلمة فعلآ..بس برضه كتر خير الوزيرة..
و لو انني اعتقد انها في اسبانيا لو شافت متسولة هتخلي حرسها يبعدوها و مش بعيد يقبضوا عليها..

عمومآ ممكن تشوفي الكليب ده؟

http://www.youtube.com/watch?v=0Ytf6aXp9Zg

(3)

خلونا قبل ما نهاجم الرجل..نفهم هو قال كده ليه..
إسرائيل تفاوضت مع مصر في موضوع اليونسكو و اشترطوا عشان يوقفوا الحملة ضد فاروق حسني لازم مصر تقدم حاجة إيجابية في المقابل لصورة إسرائيل..
فالتصريح ده عملآ بمبدأ إن كان لك عند الكلب حاجة..قول له انا اسف علي تصريحاتي ضدك!
و فعلآ وقف الحملة الاسرائيلية ضد فاروق حسني ساعدنا في اننا نضمن صوت امريكا..رغم ان اللوبي الصهيوني في امريكا ما وقفش حملته..
و بقت المنافسة مع وزير خارجية النمسا اللي رشح نفسه غلاسة!

(4)

اعتقد ان الوسط الفني بيتعامل بمبدأ ان كل نجوم الصف الاول "حد جميل"..و كل نجوم الصف التاني "فنان بجد لازمه فرصه"..و اى حد غير دول "الرقم الذي طلبته غير متاح"

انا ماوقفتش غير قدام حالتين..
محمد ابو الحسن اللي قال انه كل ما بيتصل بإسعاد يونس بتتهرب منه..رغم انه ساعدها كتير في بداياتها..

و محمد شرف اللي بيقول انه بقي علي الحديدة و ماحدش بيسأل عنه..
ده بجد مش فاهم ازاى؟
ممثل مهم في كل الاعمال اللي شارك فيها الـ5 سنين اللي فاتوا..يتنسي بالسهولة دي؟

(5)
انتي متأكدة ان ده اتوبيس حكومة؟ :D

(6)

محدش هيعرف يدي في مكان هو مش مرتاح فيه..حتي لو كان احسن واحد في شغله..
بس طالما انعدمت الراحة..يبقي يشرب المدير بقي اللي هيحصل

بس انا مؤيد للراجل بتاع البنت مالهاش غير بيتها و جوزها..و لو اتخطبت تستقيل علي طول! :D

(7)

welcome back

Yasmine يقول...

جنة
انتى بتقولى فيها ما دى الخطة الخمسية الجاية..سفرية لاى مكان فى الدنيا فيه بحر و مافيهوش ناس تعرفنى :D
على رايك الدنيا حر :)

Yasmine يقول...

حنان
اصل ايه اللى يدايق مش فاهمة..اللى متدايق اوى دا يروح يعمل حاجة عشان يساعد بيها..لكن جو النعامة و دفن الراس فى التراب دا ما بفهموش بصراحة

اه احنا مستنيين كسوة الشتا و رضا ماما امريكا علينا و لو وصلت لانهم يعملوا حمام جماعى للمصريين كلهم قبل ما اوباما يشرف مش هيتأخروا :D

Yasmine يقول...

احمد
تصدق ما كنتش ناوية بس بعد كلمتك دى بقى غيرت رايي..اعمل حسابك انى جاية اسكندرية اسبوع ولا اتنين و عايزة الاقامة تبقى فول بورد و الحساب عند البيه..انت قولتلى بتشتغل فين :D


بالظبط كدا..بلاش القبة ولا العلم الجديد..ما كانوش عارفين ينضفوا الشوارع و يدهنوا السور على الاقل؟!

كله كوم و رسومات اهله دى كوم تانى :D
امبارح كنت بتفرج عليهم عشان اختار واحدة احطها لقيته راسم سيشوار و مشط و مشخبط عليهم و انا متاكدة انه لو اتسال هيقولك دى تعبير عن التردى الثقافى فى ظل انهيار الحضارات :D

يا ريتنى سمعت كلامكم..بجد انا ما كانش ليا شغل نوهائى يعنى

Yasmine يقول...

يويو
انا متخيلة اللى بتقوليه..و نظام الزرع اللى بيحطوه و يلموه اول ما الموكب يعدى عشان دا عهدة :D
هى مش المنصورة دى اللى لموا فيها العيال عشان يعملوا نفسهم بيقروا لما سوزان راحت و ادولهم بيضتين و رغيف عيش مقابل المشهد التمثيلى الخيالى دا:D

انا اللى وجعلى قلبى اكتر انى حاسة ان دا اللى بيحصل مع اى حد يتحط فى الموقف دا..يمكن هم عشان معروفين عرفنا غير كدا ما كناش هنسمع عنهم حاجة..ماحدش بقى فاضى لحد دلوقتى

ايوة اللى هو نظام ابو الهول و الاهرامات و عليهم خروفين من معبد الكرنك هدية :D

انا حاولت اطبق نظرية فاطمة انهاردة و وصلت لانى قولتلهلم حد فيكو يقولى حسنة واحدة للقعدة معاكم تسع ساعات فى اليوم..اكتشفت انهم هم كمان مش طايقين نفسهم..ربنا يعيننا بقى :)

ايوة يا بنتى عارفة انا الناس المنفسنة دى..هنعمل ايه بقى هى دايما الاشجار المثمرة بتتحدف بالطوب :D

ابقى تعالى ارغى كل يوم..سعدنا برغيكم يا فندم :)

Yasmine يقول...

mahasen saber
كويس ان الموضوع عجبك و نورتينى بجد :)

Yasmine يقول...

سلطان
ههههههههههههههههه
تحليلك موتنى من الضحك بجد..تصدق فكرة والله:D
فعلا دناوة و جهل و قال انا اللى فاكرة انهم بيزوقوله القاهرة مخصوص
دا حتى هينزلوه بالطيارة فى الملاعب الرياضية بتاعت الطلبة اللى انا قعدت اربع سنين فى الجامعة و ما شوفتهاش لحد ما اكتشفت انهم يقصدوا الخرابة اللى جنب المدينة الجامعية..لحقوا عملوها ملاعب امتى دى هموت و اعرف..و انهاردة دهنوا العواميد برونزى مش ابيض تقريبا عشان يدينوا العنصرية :D

مبارك ما اتعملوش كدا عشان تلاقيهم نزلوه فى الايه يو سى و فهموه انها جامعة القاهرة بس القبة متشالة لظروف الصيانة :D

الفيديو مؤلم اكتر من الصورة..عايشة ب60 جنيه فى الشهر و بيفضل منها؟!! اللهم لك الحمد و الشكر..بجد مش عارفة اقول ايه الواحد ما بيقدرش اللى هو فيه غير فى العشر دقايق اللى بعد ما يشوف مشاهد زى دى..اللهم لك الحمد و الشكر الف مرة بجد

ما احنا مش مختلفين على ان الست الوزيرة جاية لاهداف سياسية بحتة..بس الغلط مش عليها الغلطة على اللى اداها الفرصة تستفيد من الوضع الزبالة اللى الناس عايشة فيه

هو اللى انا قريته ان اسرائيل اعلنت عن استعدادها لوقف الحملة ضد حوستى فى مقابل تصرفات "مرضية" من الجانب المصرى..بس تقريبا الجانب المصرى قراها بالفتحة بدال الضمة و قرر يشل الشعب المصرى كله عشان خاطر حوستى..فى ستين داهية الكرسي اللى يخلى الواحد يبوس جزم قتلة الاطفال عشان يوصله..كان نفسي الاقى كاريكاتير عمرو سليم على النت عشان تشوفوه..بجد كان معبر اوى

ما هم تقريبا بيبقوا حد جميل لحد ما يعيوا و بيبقوا محتاجين فرصة طول ما نجوم الصفوف الاولى محتاجينهم عشان كام مشهد فى افلامهم بما ان الثقافة السينمائية المريضة بتاعتنا بتقول ان اللى بيطلع اول صف ما يعملش غير بطولات على عكس كل السينمات العالمية المحترمة..لكن مرض و سؤال و اهتمام ما دام مفيش كاميرات تصور تبقى تكاليف على الفاضى و تضييع وقت

اه والله اوتوبيس حكومة :D
بالذمة فى اى شركة محترمة هتعمل اوتوبيس فزدقى فى اخضر :D

ما هى دى الخطة..انا قررت اخليه يشرب :D
و على ايه لما تتخطب..هى اول ما تكعبل الراجل و تجيبه يشرب فنجان القهوة تكون الاستقالة اتكتبت..دا كل الولاد اللى معايا فى الشغل بيقولولى احنا لو عندنا الاوبشن بتاع اننا نتخوز و نقعد فى البيت ما كناش عمرنا فكرنا نشتغل :D

thank u :)

Yasmine يقول...

مصعب

انت بتقول فيها..انا عرفت دلوقتى قيمة الجامعة..بجد وحشتنى اوى قعدة سلالم الكلية و باب تجارة و السكاشن المتاخرة و المحاضرات اللى ما كانتش يتتحضر و بين السرايات و منى بتاعت العجل :)

انا نفسي يديهم زمبة فى الزيارة من اساسها..و يورونا بقى يلموا البوية اللى دهنوا بيها السور و القبة و اعمدة النور ازاى :D

ما هى لازم تكون مبسوطة..احنا بلد لقطة للدعاية الانتخابية اللى كانت عايزاها..المصيبة فى اللى قعدوا يولولوا و ما فكروش يعملوا حاجة يغيروا بيها الواقع اللى ما عاجبهم دا

انا احترم جدا رؤية اى بنى ادم للطريقة اللى بيبعد بيها ربنا..هو حر فى ارائه الدينية ببساطة لانه لا شيخ ولا مفتى عشان يتاخد كلامه على محمل الجد..لكن التلزيق فى اسرائيل عشان كرسي دا اللى مش مستوعباه بصراحة..دى وصلت لانه ينزل مقالة كاملة بيعتذر فيها عن الاساءة لاسرائيل!!

لا هو العيب على الكل..ماحدش بقى عنده وقت حتى لانه يعمل نفسه مهتم..ربنا ما يحوجنا لحد ابدا يا رب

شوقى لو كان لسه معانا كان كتب عن مصر الارملة ولا اليتيمة

على فكرة انا ما بقيتش مع عمل المراة و من موقعى هذا بقول للبنات كلهم خليك بالبيت :D
و هى فعلا بتفقد انوثتها بس مش من التعب و الارهاق..من فكرة انه مهما كان المكان متحضر دايما الشكل هيفضل عامل اساسى مهما كانت البنت دماغها كويسة و فاهمة اللى بتعمله..المكان الوحيد اللى هيحترم ادمية الست هو المدية الفاضلة بتاعت الاخ افلاطون غير كدا ما تلاقيش :)

شكرا يا استاذ مصعب..اخجلتم تواضعنا :)

و عليكم السلام و رحمة الله و بركاته

Magi Mostafa يقول...

نفسى يأجلولنا الامتحانات احنا كمان على حس اوباما
قولى يارب

بس بصراحه هما قللوا من قيمتنا بالعته الى بيعملوه ده سواء حكومه او معارضه كله بيتمسح فى السيد اوباما وامريكا مفيش دم

dalia يقول...

أهلا يا فلة
أيوه أيوه اشجينا كالعادة موضوعاتك تدل على وعي وقراءة متأنية للواقع الحاصل في مصر يا بنتي لو كنت دخلت كلية الاعلام مش أحسن على العموم انا ممكن أحجز لك مكان في الشروق.
عايزه اقولك انا طالع عيني علشان موضوع اوباما بس اوعدك اعمل موضوع من وراء الكواليس لو التحريات مشيت على خير ووافقوا على حضورى الخطاب في الجامعة قولي يارب
بس ممكن احاول احدث مدونتي بشوية صور النهاردة واحكي على اللى حصل لما زوغت من عين الامن الرئاسي والجامعة ورحت قاعة الاحتفالات لالقى نظرة على الديكورات الاخيرة ما اروعها
عجبني الصورة الاخيرة بتاعت للبيع بجد والله مصدقة وربنا يستر الشعب ما يبعش حاجه تانية
خليكي نشيطة واكتبي كل اللى في نفسك ومالكيش دعوة بقباري هو اكيد متغاظ منك بس:)

Jannah يقول...

ايواااااااا هذا هو الكلام
سافري يا حبيبتي و ريحي و ما تفكري بأحد لا شغل و لا أوباما و لا غيره

كنت حابة أعلق على كلمة قالها مصعب بخصوص فاروق حسني
هو قال أركان الاسلام الاربعة لأنه ممكن يكون من الناس اللي ينكرون الحج
بس ماعتقد انه مو عارف أركان الاسلام حتى
صعبة
مهما كان هو مصري و عايش فمصر لو كان في بلد تاني بدون ذكر أسماء كنت قلت يمكن مو عارف

بس أنا عندي سؤال و أي واحد يجاوبني
مصر لا ينقصها مثقفين يعني فليش حسني هذا.؟أصلا ما يعرفش يجمع الكلام و لا عنده علاقات مع المثقفين برا ولا ايتيكيت و كاسغهم فكل حتة هذا غير انه المصريين على ما يبدو غير راضيين عن أداؤه و تصريحاته
فمسنود من مين هذا؟
أصلا انا من يوم وعيت و أنا أسمع انه وزير الثقافة فمصر هو فاروق حسني
محنط هذا و لا كيف؟!!!

Yasmine Adel Fouad يقول...

انتى جامدة جدااااااااااااااااااا

Yasmine Adel Fouad يقول...

اوباما جه و الدنيا قعدت ف بيوتها و الامتحانات اتأجلت و العيشة بقيت فل

The Seagull يقول...

يا رهيييييييييبة :D

r يقول...

بالنسبه لاوباما
واهو شرف ومشى
كل اللى قلتيه صحيح والصراحه ابتسمت جدا لانى افتكرت يوم زياره وزير التعليم العالى لجامعتى ايام الدراسه
اتحط ورد ونجيله وزرع يوم الزياره تصدقى علشان طبعا يبان طبيعى مش دبلان
غير الاعلام
فمستعجبه ان دا يحصل لما رئيس امريكا بنفسه يهل على مصر
الموضوع مش محتاج اى استغراب
تمسليه زى اى مسلسل غش بنشوفه يوميا
بس الحق قال كلام كبير جدا
وفى انتظار الفعل
-----------------------
بالنسبه للست الغلبانه دى
فى كتير زيها واكتر منها مستعدين يبوسوا ايدين الزوار كلهم
لانها ناس فعلا محتاجه رغيف عيش مش 1500 جنيه
مصر فيها بلاوى سودا وناس مش عايشه
ومحدش حاسس بيها نهائى
ربنا معاهم بجد
ويحرق حكومتنا اللى رخصت المصريين اوى كدا
---------------------
فاروق افندى تعرفى انا مش الشخص دا
ولا مقتنعه بيه كمسئول اصلا
بس عايزاه فعلا يفوز بالمركز دا
مش عشان هو فاروق ولا التصريحات ولا اى حاجه
بس عشان حاجه واحده ان مصر يكون ليها كرسى رئيسى فى المنظمه
يمكن
دا مجرد تفاؤل يتسمع صوتها بين الدول
ولو لحقوق لسه غايبه عنا
---------------------------
الناس فى مجتمع الزيف
اللى بيسموه فنانين من رأى
تمثيل ايضا برا فى الحياه زى جوه فى الافلام والمسلسلات
فطبيعى المعرفه مصلحه
الناس الطبيعيه بتعرف بعض بدون شهره او فلوس او مركز
لو لاقينا الناس دى يبقى عمرنا ما هنخاف نكون لوحدنا فى وقت الشده
-----------------------------
الاتوبيس مش هعلق عليه
لسبب بسيط اشمعن دا يعنى اللى مش هيتباع مثلا
------------------------
اخر حاجه
ربنا ما يجيب خنقه ولا حاجه
كفايه الواحد دخل هنا وانبسط بكلامك الجميل
دمتى بخير

أسماء علي يقول...

مبدئيا منعوا الطلية عشان الأمن و خافوا على أوباما لأن لو حصله حاجة العلاقات الأمريكية و الدنيا كلها هتقوم على مصر
لكن لو الريس بتاعنا عندهم و حتى حصله حاجة
أكيد الشعب هيبعت رسالة شكر و العلاقات المصرية الأمريكية هتتحسن جدااا

...

هو صورة النائبة الأسبانية أثارت الاستياء لأن البعض قال إن ده مش جديد و بيحصل ليل نهار و انهم بيكسبوا ولاء الناس دي و كلام فاضي كتير

بس اللي فهمته من صديق ليا ف المجال الدبلوماسي
إن النائبة كانت في زيارة عادية في برنامج سياحي تابع لسفارتها

في جميع الأحوال
اللي مابيقدرش على الحمار بيجي على ايه ؟؟

......

فاروق حسني ليه تفكيره الخاص
أزمته الوحيدة إن منصبح بيخليه يرجع ف بعض آراءه عشان الرأي العام


......

الفنانين صحاب من طول و في شغل و بيزنس و أضواء

لكن انحسرت الأضواء .. خلع من قالوا يوما أنهم أصدقاء!!


.......

للبيع بجد؟

البلد كلها للبيع بجد بس مش لاقيين اللي يشتري بجد
:))

Yasmine يقول...

magi
يا رب يختى يا رب :D

و هم بيتمسحوا بعقل..عمرو اديب كان بيقول امبارح انهم جابوا اللقطة بتاعت we love u obama دى 100 مرة فى التليفزيون الامريكي..مش فاهمة ايه السذاجة اللى الناس بقت فيها دى

Yasmine يقول...

dalia
انتى بتقولى فيها..والله يا بنتى انا مكنتش هنفع غير فى كلية اعلام دى..بس يالا الحمد لله :)

ايوة انا موافقة احجزيلى مكان فى الشروق..بس يكون قد نص صفحة اقل من كدا مش هوافق :D

انا شوفت موضوعك عن الزيارة و مستنية الباقى بفارغ الصبر..عايزة اعرف ايه اللى حصل خلف الابواب المغلقة

و هيبيعوا ايه تانى يا حسرة ما فضلش غير الشعب الحقيقة :D

هكتب ما تقلقيش بس المهم انتوا ما تزهقوش من القراية..نورتينى يا داليا بجد :)

Yasmine يقول...

جنة

انا اقولك مسنود من مين..من ماما سوزان طبعا :D

يا ستى الاركان التلاتة و لا الاربعة هو حر فى نفسه..لكن انه يكون وزير ثقافة يعنى من صفات الوظيفة دى انه يكون حد عنده حد ادنى من اللباقة فى الكلام لكن السخافات اللى بتتقال و ارسومات الاطفال اللى بيرسمها دى..كتير على مرارتى بصراحة :D

دا يوم ما قال تصريح عدل شوية رجع اعتذر عنه فى جميع الصحف و المجلات و وسائل الاعلام المرئية و المسموعة و المقروؤة فى مصر و الفضاء الخارجى :D

و بعدين يعنى هو لوحده اللى من يوم ما وعيتى على الدنيا و هو موجود؟
انا امنية حياتى اشوف بنى ادم مصرى يطلق عليه اسم رئيس سابق :D

Yasmine يقول...

شبيهتى فى الاسم الحقيقي و الnickname :)

ربنا يكرمك يا رب..من بعض ما عندكم..انا اللى كل ما بدخل مدونتك بحس انى فى عالم رومانسى و ناعم و مش موجود دلوقتى

اه والله دا انا كنت حاسة ان انا اللى اوباما و انا ماشية فى الشارع لوحدى كدا..يا رب يكتر من زياراته يا رب :D

Yasmine يقول...

يويو
هى مين دى؟ :D

Yasmine يقول...

بسنت

تانى يوم زيارة اوباما المصرى اليوم جابت قصة لست مصرية اسمها ام احمد على ما افتكر..الست دى كانت بتحكى على اللى حصلها قبل و اثناء زيارة الحاج اوباما..قالت انهم شالوها من قدام مسجد السلطان حسن قال عشان دا مش منظر حضارى يشوفه الريس..و قالت انهم بعد الزيارة رجعوها تانى و انهم ما فكروش حتى يسالوها هى محتاجة لايه
الست دى اقصى امنية ليها فى حياتها صابونة تستحمى بيها..تخيلى!

فكرتينى بموضوع كان مكتوب هنا قلت فيه انى نفسي حوستى ياخد كرسي اليونيسكو بس عشان يتقال ان مصر تراسته لفترة من الفترات..الحقيقة ردود الافعال عليه كانت ظريفة اوى :D

انا بقيت بشك اصلا فى وجود الناس الطبيعيين دول :)

دا من ذوقك يا بسنت بجد..نورتينى :)

Yasmine يقول...

دكتورة اسماء

اولا انا بجد مبسوطة جدا بزيارتك هنا..انا بتابع مدونتك على طول

يمكن يكون دا تفسير منطقى برضه..بس انا شايفة اننا لوجربناه عملى هيكون اوقع برضه :)

بالظبط كدا سابوا الحكومة بوزرائها و ريسها و مسؤولينها و مسكوا فى الست الاسبانية..حاجة تكسف بجد

فاروق حسنى واخد كرسي اكبر من حجمه..زى كل المسؤولين بتوعنا

ايوة هو زى ما قال سلطان كدا..الصداقة محصورة على الابطال عشان الشهرة و على الصف التانى عشان ساعات بيبقى لهم عوزة..غير كدا ما تلاقيش

اذا كنا احنا مش شاريين غيرنا هيشترى بامارة ايه؟ :)

ســـــاره يقول...

ياسمينة :)
والله العظيم نورتــي مدونتك :)

Yasmine يقول...

اولا حمد الله على السلامة :)

تسلمى يا سارة ربنا يخليكى..و بجد والله هى منورة بوجودكم فيها

dalia يقول...

ياسمينه

آه عرفت الاسم اخيرا ما اجمله يبقى كده انا عرفت حاجتين الاسم ومكان السكن مش باقي غير التعارف يلا بقى سابدأ بنفسى
delakkad@hotmail.com

Yasmine يقول...

انتى كل دا ما كنتيش عرفتى يا داليا؟! :)
تسلمى يا حبيبتى ربنا يخليكى..انا هعملك Add على طول بس ما تستغربيش لو ما لقيتينش اونلاين كتير اصلى ما عنديش صبر على الاختراع اللى اسمه msn دا نهائى :D

خيرالدين يقول...

الكوميديا المصريه تجلت فى حالة الانبهار بالسيد اوباما وهو يقرا الآيات التى انتقاها ليزين بها خطابه وتجلت أيضا فى الهوس غير المبرر بالرجل
وطبعا فى صرخة شريف منير
we love you
...
سؤال خبيث آخر
ليه لما أوباما راح تركيا تعامل معه الشعب والنظام كما ينبغى دون تهليل وكأن زيارته هى التى ستعيد لنا امجادنا
؟؟
...
أنا كمان عجبنى تحقيق المصرى اليوم عن الفنانين المنسيين وافتكر انها لفته جيده
...
مدونتك جميله جدا وعجبنى اختيارك فى بوست قديم لمقال د.عمار على حسن لا تيأس
السلسله ددى كانت رائعه
...

Yasmine يقول...

انا لسه ما فقتش من صدمة الاوباميزم على راى لميس جابر :)

عشان فى تركيا عندهم اردوجان و عبد الله جول و عندهم انتخابات و صوتهم له قيمة..لكن احنا لسه محدثين ديموقراطية فطبيعى نهلل و نصوت لاى حد معدى حتى لو قال حمرا يا قوطة و مشى

ميرسى اوى بجد مبسوطة اوى ان المدونة عجبتك