الأحد، 21 يونيو 2009

حواديت نساء من الشرق..

كانت ارملة..فى قول اخر "ملهاش صاحب".. و فى عرف مجتمع لا يرحم "صيدة سهلة" .. لم تكن تملك من الحياة سوى طفل صغير و شركة اسستها هى و بمجهودها وحدها اصبحت من اكبر الشركات فى المنطقة التى تسكن بها.. تعرفت عليه..وجدت فيه الرجل الذى يحتويها و الاب الذى يعوض ابنها مهانة اليتم و يوفر له الحياة "الطبيعية" التى يستحقها.. وافقت ان تكون الزوجة التانية.. فهذه فرصتها الاخيرة بصفتها امراة second hand كما وصفها..و تحمد ربنا على كدا بنوتة ما كملتش 20 سنة..

طول عمرها كانت بتدور على حب سمعت عنه فى الروايات و الافلام الخايبة..
وافقت على اول حد سمعها الكلام اللى كانت عايزة تسمعه..
قالها انه مستعد يعمل اى حاجة عشان يشوفها سعيدة..
سذاجتها صورتلها ان فى بنى ادم ممكن يحب حد اكتر من نفسه.. كانت بتصرف عليه احيانا..و بتدفع لنفسها على طول..
كانت جارحاه اوى فكرة انها اغنى منه و ان اهلها فى مستوى اجتماعى اعلى من اهله..
قالها هتقدملك..قالتله ما ينفعش دلوقتى بس انا هستناك "تصدقى انه خلانى ادفع لنفسي يوم عيد ميلادى..و قدام الناس..
طب كان دفع هو و حاسبنى بعدين بينى و بينه"
- يعنى انتى مشكلتك بس انه كان قدام الناس؟
- ايوة..مش حاسة انى مسنودة على راجل..بس هو بيحاول يكون احسن..
دا كلامها لنفسها لما قررت انها هتضحك عليها.. كانت الاكبر سنا بين اربعة اخوات..و كانت احلاهن شكلا و خلقا..
لكنها كانت كما تحب امها ان تطلق عليها "مليانة شوية"..
و كما اطلقوا هم عليها "دبدوبة العيلة". كانت تمتلك ابتسامة مشرقة و عقلا راجحا و اخلاقا نادرة فى زمن انعدمت فيه الاخلاق و كانت فى نظرها "بتعرف تقول ايه امتى"..
فكانت دائما ما تنظر اليها باعجاب شديد و تاكد اشد
بان نهاية قصتها ستكون مثل كل قصص ديزنى التى اوهموها انها واقعية.. فكل اميرة يغطى نقاؤها الداخلى على عالمها الصغير..
لا تنتهى قصتها الا بنهاية نقية كبدايتها او اشد نقاوة و انتظرت معها اليوم الذى ياتى فيه الامير الفارس الذى يستحق هذه الاميرة ال"مليانة شوية". تتركهم قليلا و تختلى الى نفسها..و تقنعها بان: You want a man, who will lead you down the beach,
with his hand over your eyes,
just so you can discover the feel of the sand beneath your feet.
You want a guy, who will wake you up a dawn,
just bursting to talk to you,
he can't wait another minute just to find out what you'll say.
Am I right? Richard Gere –The Runaway Bride طالبها بان تكتب الشركة باسمه حتى يتصرف فيها لانه هو الرجل
و الرجل مش بس بكلمته الراجل بسرقة فلوس مراته و خسته..
وافقت مضطرة بعد اكتشافها انها تحمل جنينا لا يد له فى اختيارات امه..
اصفر وجهها و انتهت صحتها..
و اصبحت زبونة دائمة فى العيادات النفسية و مريضة بالاكتئاب المزمن..
بح صوتها الرقيق و انتهت علاقتها بالانوثة..
فكل امرأة تنطفئ انوثتها عندما تجد مشاعرها
و قد انتهى بها الحال و هى ملقاة عند اقدام رجل لا يستحق. - فى فرق بين واحد عارف ان فى فرق كبير بينه و بين اللى بيحبها
و بيموت نفسه عشان يكون جدير بيها فبالتالى هى تقتل نفسها عشان تستناه..ببساطة لانه يستاهلها..
و واحد شايف الفرق دا و بيقنع نفسه انه عمره ما هيروح..
فبيستسلم للامر الواقع و هو عارف و متاكد ان حبها ليه هيخليها مربوطة جنبه
لحد ما حد يفوقها او لحد ما تفوق لوحدها بعد جوازة فاشلة
اولها قلة قيمة و اخرها ضياع عمر على واحد ما يستاهلش - بطلى نظرياتك الواقعية بزيادة دى..انا عايزة عيال..عايزة ابقى ام..
خايفة اموت لوحدى..الوحدة وحشة اوى بجد..
انتى عمرك ما هتعرفى يعنى ايه تبقى بنت وحشة
و لا عمرك هتسمعى اللى بسمعه و انا ماشية فى الشارع - بس انى وشك زى القمر..ازاى مش شايفة كدا؟! ..
و بعدين مفيش حاجة اسمها بنت وحشة اصلا! - هو بيقول ان مناخيرى كبيرة..دا غير انى تخينة اصلا..بس هو بيحبنى..و انا هستناه و حدث ان كانت تزورها يوما فى منزلها و وجدتهم –على غير عادتهم-
منشغلين بترتيب البيت المرتب اصلا و عندما سالت عرفت ان السبب هو زيارة العريس و اهله..
"هو ظابط شرطة و من عيلة..بس يا رب يوافق" و عندما حاولت ان تفهم سبب هذه الجملة الغريبة
قالوا لها ان السبب هو ان ما اعتبرتها هى "الاميرة المليانة شوية"..
اعتبروها هم "المليانة شوية" و كفى! و جاء العريس و عاين بضاعته و وافق متضررا..متنازلا..متفضلا على الزيجة..
و عندما سالتهم لماذا وافقت و وافق اهلها..
اجابوا بان "ما حدش كان هييجى تانى بعد كدا"..
و عندما قالت ان "دا مش سبب كفاية"
كان الرد "انتى لسه صغيرة و ما تفهميش حاجة فى الدنيا". انتظرت معها الفرح كاى طفلة تنتظر مناسبة عائلية لترتدى فستانها الجديد..
و عرفت بعد ذلك ان العروسة اكتفت بفستان اختها الصغيرة
بعد اجراء بعض التعديلات عليه توفيرا على ابيها و بانها وافقت على العريس توفيرا على نفسها
من نظرات و اتهامات و ادانات و مصمصات شفايف
مجتمع لا يرى فى اميرتها سوى انها "دبدوبة"..انه يوم التوفير اذا! تنساهم او تتناساهم..و توهم نفسها بانه لسه موجود She's more real to me than anything I've ever known- One man I can never meet-
Him, I would like to give my whole heart to Sandra Bullock, Keanu Reeves-The Lake House بعد ايام قليلة من الزواج ظهر وجهه القبيح..و كعادة كل حاجة حلوة..وقتها خلص لم يكتفى باهانتها يوميا و سبها باكثر الشتائم بذاءة..
و هى التى تمتلك صوتا رقيقا لدرجة تجبرك على بذل جهدا مضاعفا لتفسير كلماته..
فكان يضربها كلما اخذت منه موقف.. او حتى فكرت "بيضربنى قدام بنتى..بس عادى يعنى..انتى عارفة المشكلة فى ايه؟..
ان العنف مش مقتصر بس على الضرب" - يعنى ايه؟ - يعنى اللى فهمتيه بالظبط.. - و انتى ايه اللى مصبرك على كدا؟ - انتى لسه صغيرة و ما تفهميش..
كل ما هتكبرى ..
هتعرفي ان تنازلاتك لازم تزيد عشان تعرفى تعيشى..احنا اتخلقنا عشان نتنازل انا قررت اعمل زيك على فكرة..انا اساسا ما كنتش بحبه..ولا كنت ناوية استناه..
انا كنت بس بقول لنفسي كدا و انا عارفة و متاكدة انى عمرى ما هعرف اعمل كدا..
هو ما يستاهلش اصلا..
دا لحد دلوقتى ما خدش ولا خطوة جدية عشان نكمل مع بعض..
هييجى يقول لبابا ايه..انا بشتغل اسبوعين و اترفد لانى واحد بيهرج..
انا ما عنديش ثقة فى نفسى اه..بس مش للدرجة دى..
عارفة..انا كمان كذابة جدا..انا بحبه اوى..و اضعف بكتير من انى اسيبه..
هو الوحيد اللى قدر يعمل فيا كدا و هو عارف دا كويس..
سميه بالكلام الكبيربتاعك "ابتزاز عاطفى"..و عارفة كمان..انا عرفت انه بيخوننى و حتى اليوم كلما صادفتها هى و طفليها..
و كلما رات فى عينيها نظرة من تزوجت من لا يستحقها..
و كلما شاهدت لمعة عينيها و انكسار يتمها و انطفاء شبابها..
فى الوقت الذى تتمتع فيه من يفقنها رشاقة
و تفوقهم هى خلقا و اخلاقا بكل مميزات الزواج و الونس..
تتاكد انها ستستمر فى فوبيا السمنة..ليس رغبة فى الزواج ابدا بتاتا البتة..
و لكن حتى تتاكد من انه لن يأتى اليوم الذى يخبرها فيه رقم على الميزان بان
"عفوا لقد تم سحب حقك فى اختيار من يستحق قلبك..فانت اثقل مما يجب!" تنخفض بسقف احلامها حتى يلامس الارض و تقرر ان تستسلم لواقع ان:
"- ورد ايه دا اللى عيزانى اجيبه..مش نص كيلو كباب و كفتة افيد؟" خالد صالح-احلى الاوقات و يا ريتها فضلت صغيرة و ما بتفهمش..

تحديث حد شاف فيلم احكى يا شهرزاد؟

هناك 63 تعليقًا:

ReEm يقول...

بوست طويل بس حلو وممتع لاخر حرف

بس في مواضيع اوقات لما تقراه ماتلاقيها

رد عندك لانه ردك غالبا هيبقى كلام تنظير

لايمت لواقعنا و نفسياتنا الحقيقة بصلة

صفا سارة يقول...

مش هاقول غير بجد انتى عبقريه على قد م البوست مؤلم بس بجد انتى عبقريه

El - Shandwely يقول...

فترة طويلة مرت ملقتش بوست يجبر الواحد على التعليق زى ده ..
خصوصا وان التعليق مش غرضه اضافة شىء بخصوص الموضوع نفسه ..

ولكن لازم اقول انى استمتعت بالصورة .. رغم الايجاز فى الوصف ..

واستمتعت اكتر بالاقتباسات السينمائية اللى نقتيها واللى بصراحة متخيلتش ان الفينال بتاعها باقتباس خالد صالح هيأثر فيا بالشكل ده ..!

Here i'm يقول...

اول حاجة عايز أقولك أنك جبتى شوية quote رائعين .. مش حعلق على ساندرا بولك ولا ريتشارد علشان انتى عارفة رأيى :) .. بس الحتة بتاعة خالد صالح .. و الله شوفت بنات هيا اللى بتعمل كده .. الواد فى عيد الحب جايبلها تورتة و بوكيه ورد .. سابت بوكيه الورد و اخدت التورتة :D


الحكاوى كتير قوى .. ممكن أكتبلك عن قصص شباب مش حتتخيليها .. بس انتوا بتمتلكوا ملكة الكتابة و التسويق :D .. أحنا كشباب مبنعرفش نحكى و اللى بيعرف يحكى فينا تسمعى منه كلام من نوعية أطيب قلب .. و أنه اتصدم بالواقع :D


تصدقى بالله .. بفكر أكتب بوست بنفس طريقتك دى عن قصص شباب رجالة بقى :D

dr.lecter يقول...

مش هعرف اقولك غير كملي ياشهرزاد
وفكره كوبري عاجباني بفكر اكتبها معاه البوست الجاي بس عاوز اروق كده وامخمخ وافتكر كل الحواديت

غير معرف يقول...

حلو اوي البلوج ده انتى واضح انك موهوبة.

Nanoz يقول...

اه يا قلبى ...

وجعتى قلبى بجد ... كميه وجع رهيبه حسيتها وانا بقرا .. مش عارفه اذا كانوا صعبوا عليا..
ولا خفت تصعب عليا نفسي .. عشان هو ده المجتمع اللى عايشين فيه
وهو ده اللى فى دماغ الناس اما بيتعاملوا مع اى واحده
قسوه عاليه اوى .. الناس بتقسي على بعض
حتى على نفسهم .. مش عارفه ليه ..
انتقام ولا ساديه و كتعه اما تلاقي حد تطلع عليه عقدك و تستضعفوا و تمنعوا من الحياه اللى انت معرفتش تعيشها

عشان نبقي كلنا فى الهم سوا


حلو اوى اوى اوى بجد البوست

بتنفس حريه يقول...

تعليقى على البوست ده ..
شكرا :)

حواء يقول...

صدقيني في حاجات ممكن توجع اكتر من كده
ليه متكلمتيش عن الخيانه
خيانه الزوج لزوجته
وخيانة الزوجه لزوجها
عارفه
في ستات كتيره برده تستاهل الشنق
سايقه الهبل علي الشيطنه
متجرده من اي نوع من الحنان والدين والعطف والانوثه
شهوانيه فقط
ربنا يعافينا يارب من الضعف والقوة
وأفضل الامور الوسط

Magi Mostafa يقول...

هى فعلا كوميديا سوداء فعلا قلبى وجعنى
رغم كل شئ احنا الى بنعمل فى نفسنا كده لو كل وحده عرفت قيمه نفسها ومبهدلتهاش معاها ..لكن مشكلتنا اننا بنصدق كلام حولينا سواء وعود الحب او انتقصات من نفسنا انت تخينه يعنى متنفعيش انت ارمله برده متنفعيش وحجات كتير من دى

leeno يقول...

هي مش الرحمة حلوة برضه ؟؟
كلها حالات موجودة و مقززة بصراحة

بس مش هي عموم المجتمع ... احنا اجمالا بنشوفها و بنركز فيها لانها بشعة و مؤلمة و مش طبيعية

و عادة النفس البشرية بتشوف الوحش و بيعلق معاها لانه بيضايقها انما العادي هو اللي المفروض يحصل و طبيعي نشوفه

على فكرة انا قررت ما اتعاملش مع الحالات دي على انها هي العموم عشان اعرف اعيش حياتي

ممكن ابقى حالة من دول او حالة كويسة

بس على كل الاحوال حبقى عشت و جربت و الخوف ممنعنيش اعيش حياتي


البوست رائع

Desert cat يقول...

بطلة أول حكاية اعتقد انها كانت محتاجة تهرب من عوائق المجتمع اكتر من انها كانت محتاجة راجل واب لبنتها
اما بالنسبة للأخت اللى مرتبطة بشخص وبتدفع هى لنفسها محتاجه بس شوية من القوة الدافعه لطرده نهائيا من حياتها ومش تتعب ولا تتعذب بعكس اللى بتحب واحد يستاهل بالعكس دى هتندم على كل لحظة عاشتها فى حبه
بالنسبة لتختوتة شوية فانا اعتقد انها مش كانت توافق اصل كل ظباط الشرطة بيحبوا الجسم السمبتيك
:)))

Here i'm يقول...

خلى البنت اللى معدتش الـ 20 تسمع أنغام .. مهزومة .. يمكن تساعدها :)

تعالى يا لاكتر نعيش فى قصتين تلاتة من اللى بنشوفهم

Here i'm يقول...

أستنى أستنى بس .. على فكرة أنا من ساعة ما قريت البوست دا و أفتكرت بوست قريته من فترة طويلة بس معرفتاش أجيبه لا من اللاب توب ولا من الكومبيوتر القديم

لما رجعت الشغل لاقيت البوست .. كان أسمه تداعيات .. البوست دا شايله عندى من 2008 .. بوستك فكرنى بيه قوى

الحمد لله مطلعتش مجنون و بخرف و طلع بوست فعلا :D

غير معرف يقول...

بجد بوست قمة فى الروعة و مكتوب بأسلوب مفيش بعد كدة أول مرة اقرا بوست طويل و محسش بده غير بعد ما ابص عليه كامل بعد ما فريته حقيقى تحفة.



انتى فعلا جبتى قصص بتحصل معانا و حوالينا كل يوم و تناولتيها بواقعية جدا.

انا بجد كنت حاسة انى قدام فيلم...البوست بجد اكبر من انى ارد عليه و اقول رأيى

تحياتى

Yasmine يقول...

ريم
كويس ان الموضوع عجبك دايما بترفعى من روحى المعنوية بجد :)

Yasmine يقول...

صفا سارة
ولا عبقرية ولا حاجة والله..دى مجرد قصص شوفتها و حكيتها
نورتينى بجد و مبسوطة ان الموضوع عجبك

Yasmine يقول...

el shandawely
حاجة تسعدنى بجد انك استمتعت بالموضوع
بس انت بتقول ايجاز و ريم بتقول انه طويل :)
بالنسبة للاقتباسات فدى اكتر افلام بحبها يمكن عشان كدا عرفت اختار الجمل اللى تليق على الموضوع منها
سعيدة بوجودك هنا حقيقى

Yasmine يقول...

كوبرى
طول عمر اختياراتى رائعة ايه الجديد يعنى :P
بس بنات ايه دول اللى بيسيبوا الورد و يمسكوا فى التورتة عايزة اعرف انا :D
و بعدين اصلا اصلا تلاقيه هو اللى مجوعها فى البيت فيوم ما يفتكرها بهدية و شوكولاتة تسيب الهدية و تمسك فى الشوكولاتة

اكيد احنا بنعرف نكتب و نعبر احسن :P

بس ما يمنعش انى عايزة اعرف حكايات الولاد الغلابة المساكين اللى عايشين فى مجتمع انثوى متوحش دول :D

يا ابنى انا معترفة ان فى بنات مفترية بس الفكرة كلها ان المجتمع يوم ما بينصف حد بينصف الراجل مهما كانت عملته سودة

مستنية الموضوع دا انا..سيبك من اوباما شوية و اكتبه بقى :)

Yasmine يقول...

لكتر
استنانى بس دا انا لسه بسخن..الواحد مبقوق والله من اللى بيشوفه و بيسمعه:D

دا انا كدا اتحمست اكتر..يا ريت بجد اهو نبقى شوفنا وجهة النظر الرجالى المضادة برضه :D

Yasmine يقول...

bastawisi
متشكرة اوى على ذوقك..بس انا لا موهوبة ولا حاجة..انا بحكى اللى بشوفه بس مش اكتر :)

Yasmine يقول...

نونزى

نفس احساسى يا اوختشى والله و انا بسمع و بشوف حواديتهم..

عشان كدا تلاقينى حشرت نفسي فى النص برضه :D
حكيت تطور دماغى معاهم لحد ما وصلت لنظرية الكفتة بتاعت خالد صالح :D

ميرسى اوى اوى اوى يا نانسي بجد..مبسوطة انه عجبك يا حبيبتى :)

Yasmine يقول...

بتنفس حرية

انا مبسوطة بنون النسوة اللى انتشرت فى البلوج دا..استمروا بقى يا بنات :)
و العفو على ايه..لا شكر على واجب :D

Fatma يقول...

ابدعتي :)

Yasmine يقول...

حواء

هو الموضوع كان كفاية عليه اوى نكد لحد كدا..بس اوعدك اكمل فى الاجزاء الجاية ان شاء الله :)

عجبتنى اوى الدعوة بتاعت اللهم اكفينا شر القوة و الضعف على فكرة..اللهم امين

Yasmine يقول...

magi
تعالى ننضم لنادى i matter بتاع الmbc 4 بجد فى بنات ببقى عايزة اخنقهم على قلة تقديرهم لنفسهم..و اولهم بتاعت القصة التانية
نورتينى يا ماجى :)

Yasmine يقول...

leeno
لا وحياتك بنركز عليها عشان من كتر ما بقت قاعدة بقت لازم تتناقش عشان نعرف اخرتها ايه

و كويس انك عرفتى توصلى لقناعة تليكى عارفة تكملى من غير ما تخافى من ان يحصلك زيهم او زى غيرهم كتير من اللى عاشوا من غير ما يعيشوا..لانى انا شخصيا ما عرفتش اعمل زيك

بس ما تحسسنيش انى نكدت عليكى :)
دا انا حتى يوم ما لقيت قصة عدلة كتبت عنها موضوع لوحدها..هى ينعم مرة واحدة بس اهو احسن من مفيش :D

Yasmine يقول...

desert cat
و يا ريتها عرفت تهرب..دى عملت بالظبط اللى افكارهم بتجبرها انها تعمله..دخلت فى علاقة غير صحية بالمرة لمجرد انها ترضى ناس عمرها ما هترضى فى عيشتها

التانية عرفت تعمل كدا فعلا..بس تعبت لدرجة غير محتملة

بالنسبة للتالتة فهو ما كانش يحلم اصلا بواحدة زيها..بس الغباء الازلى خلى المجتكع يديله كارت ابيض عشان يعمل اللى هو عايزه و المبرر انه مستحل يا حرام ان مراه تكون تخينة..حاجة تقر بجد

Yasmine يقول...

كوبرى تانى :D
لا و انت الصادق انا هسمعها بتاعت لازم نصارح بعض عشان الفراق اهون من الخيانة..بخرف طبعا بس فى اغنية فى شريط انغام معناها شبه كدا :D

انت تقصد دا ؟
http://lamiaamahmoad4810.blogspot.com/2008/12/blog-post.html

دى حاجة تبسطنى جدا لو كان البوست بيفكرك بيه..دا احلى موضوع قريته من ساعة ما دخلت عالم البلوجات و التدوين..بس هى موضوعها عاطفى جدا ايه اللى فكرك بيه فى الموضوع النكد دا؟ :D

Yasmine يقول...

انا و دماغى

ربنا يخليكى يا رب..و لا اكبر من انك تقولى رايك ولا حاجة..انا اللى بجد سعيدة جدا بتعليقك و بانك ما زهقتيش من طول البوست :)

Yasmine يقول...

فنفونتى
يخليكى ليا يا رب :)
عقبال ما ربنا يكرمك كدا و ترجعى تكتبى تانى :)

Jannah يقول...

ايييييه حكايات نساء الشرق و احباطاتهم و تنازلاتهم و عذاباتهم بتبدأ قبل سن الشباب و الزواج عند ناس كتير
و عند البعض من قبل ما تتولد هي مرفوضة

أنا متمسكة بفكرة انه اذا تنازلت مرة فتوقع انك تتنازل اكثر و أكثر
معناها من البداية الواحد يدقق فيما يريده
والواحدة تموت لوحدها أفضل ماتعيش بدون كرامة و تجيب لنفسها القهر

Old Blogger يقول...

لو كان بأيديهن أن يعشن أكثر من حياه
ما كانوا اختاروا الاختيار الخطأ من البدايه

المجتمع المجتمع المجتمع ! ..
مهما كان الوضع و مهما فعلتِ
لن يكف أحدا عن الكلام عنكِ
فتكلمى أنتِ أو اختارى ما يناسبك فى صمت

"على فكره" انا زائره قديمه لمدونتك
و سأكون هنا دائماً إن شاء الله
ما دمتِ أنتِ هنا :) ..

Superman يقول...

الفكرة حلوة اوى

بس انا مش متعاطف معاهم..لكن صعبان عليا سوء اختيارهم و يأسهم اللي دفعهم لقبول اول فرصة..حتي لو كانت مش مناسبة لهم!
هم اللي اختاروا و ما اتغصبوش..و اختاروا الغلط..

طبيعي النماذج دى تكون محبطة لكي..بس سقف احلامك مش لازم يقاس بتجارب الاخرين..
سقف احلامك لازم يكون مبني علي احاسيسك و افكارك و حسن إختيارك للشخص اللي يشاركك الاحلام دي..
في حواديت نساء تانيين من الشرق فيها ورود و فراشات..
و علي فكرة..انا مقتنع ان قصص ديزني حقيقية..حتي لو كان سحرها خيالي..و حتي لو قالوا انها مجرد قصص

ســـــاره يقول...

ياسمينة دايما نظرتك للحياة ولكل حاجه حواليكي نظرة تشاؤمية بحته..ليه كده ياحبيبتي ؟ مش يمكن النظرة دي اتولّدت عندك من خلال الجانب او الزاوية اللي حصرتي نفسك من خلالها؟
دايما بتوجهي لنفسك الكلام من خلال تحليل للواقع وكإنك بتلومي نفسك عشان كبرتي وفهمتي الحياة .. مع إنك لو اخدتيها ببساطة وشفتي الحياة من جميع الزوايا سواء منفرجة اوقائمة بدل الزاوية الحادة..صدقيني ممكن جدااا تتكلمي عن بعض انواع الكوميديا الأخرى وتحبي الحياة زي ماهي..

بس للامانه البوست اللي فات (تصحيح مسار) كنت مبسوطة بيه جدااا حسيت إنك اخدتي الحياة ببساطة اكتر :)

نرجع للبوست ده انا مانكرش إنها كلها نماذج واقعيه بس تعالي نشوف كده هي موجوده فين وعند مين ؟
هتلاقيها منتشرة في الأرياف او بين الأوساط اللي مستواها الثقافي ضئيل ويكاد يكون شبه منعدم ولأنهم في عالمنا العربي كُثُر عشان كده بتحسي إن هو ده الموجود وهو ده المتاح !

حقيقي على قد مابقرا بالذات في تجربة الزواج عن نماذج فاشلة إلا ان الواقع حواليا كلها نماذج ناجحه وناجحه جدااا كمان مع إنها زيجات تقليدية بس هل اقدر اعتبر ده مقياس عالجميع؟ طبعا لاء..بدليل إن نسب الطلاق في إزدياد لكن قياساً لنسب الزواج اكيد تعتبر قليله..

حتى اللي بيعمل حساب لكلام الناس مابقاش بيتعامل مع الأمور بالتفاصيل زي زمان .. يمكن الشكليات لسه فيها قيود بس عامةً الزمن ده حصل عند الناس حالة تمرد عالمجتمع وبقى كل واحد بينام عالجنب اللي يريحه طالما مش بيضر نفسه ولا بيضر اللي حواليه..

بالنسبة للي يعتبر عند البعض تنازل ففي فرق كبير بين التضحية والتنازل والتصنيف هنا بيعتمد على الشخص نفسه في رؤيته للموضوع.!

بغض النظر عن إختلافي للنظرة التشاؤمية في بوستاتك إلا اني ماقدرش اختلف ابدااا عن إنك مبدعة وحقيقي كلامك ممتع :)

الشارده يقول...

تفتكرى الواحد لما يعيش مستسلم فى كل حاجه هيكون عايش؟
هى الحياه تنفس وبس
احياه انك تحس ان انت انسان بنى ادم
لو محصلش كده يبقى الموت احسن


موضوع راااااااااااااااائع

The Seagull يقول...

ولحواديت نساء الشرق بقية ... :)

مبدأيـًا مش هاقدر أرد على موضوعك لأني ببساطة مش في مكان أي واحدة فيهم عشان أعرف الدوافع اللي تخليهم يبقوا كدة وتجبرهم يتنازلوا ويقللوا من قيمتهم ويهينوا نفسهم بالطريقة دي :)

وإن كنت أرى إنها نظرة مجتمع في الأول والآخر لأي واحدة مهما بلغت من العلم والثقافة والأخلاق والدين والشخصية المرموقة مبلغه فهي في الأول والآخر ست ما يهمهمش فيها غير شكلها وجسمها ولازم تتقهر ولازم تتنازل ولازم ولازم ولازم عشان هي اتخلقت عشان كدة :))

والكلمة دي اتقالت في وشي قبل كدة على فكرة :D

يعني مش بأجيب من عندي أهو ولا بأتبلى على حد!!


بس بجد بجد أبدعتي :)

Yasmine يقول...

جنة
متفقة معاكى 1000000 فى المية..التنازل و لو لدرجة واحدة بيوصل لتانولات ملهاش اول من اخر
انصحك تشوفى فيلم احكى يا شهرزاد بيلخص حكايات ستات مجتمعات الشرق كلها..انا خارجة من الفيلم حاسة بالقهر كانى واحدة من اللى اتحكت قصصهم

Yasmine يقول...

التى هى نفسي
انا مقتنعة تماما انها مسالة اختيار..بس مش منطقى ان كل دول اختاروا غليط..لاحظى معايا كمان فروق السن و الخبرة..يعنى اللى اقل من عشرين متوقع جدا انها تختار غلط لكن اللى قربت على التلاتين و اللى عدت الاربعين..معقولة دول كمان يكونوا ما عروفش يختاروا؟

تنورينى فى اى وقت و سعيدة اوى بمتابعتك بجد :)

Yasmine يقول...

محمد
ربنا يكرمك يا رب :)

بس زى ما قلت مش شرط تكون كلها اختيارات غلط..يمكن اللى بانلهم فى الاول خلاهم يفتكروا انهم اختاروا الشخص الصح..فى ناس عندها قدرة على التمثيل تقنع حتى اللى عندها خبرة كافية فى الحياة و فى اللى عيشينها..ممكن جدا يكونوا عرفوا يبينوا الجزء اللى يخلى كل واحدة فيهم تفتكر انها لقت توأم روحها لحد ما ييجى الوقت اللى تكتشف فيه حجم الكذبة اللى عيشت نفسها فيها..

انا كمان بقتنع بحكايات ديزنى جمعة و سبت..بمعنى اصح طول ما انا فى الكهف بعيدة عن الناس و العالم..و بمجرد ما برجع تانى بصتدم بالواقع المرعب اللى بقينا عايشينه

يمكن فعلا مش صح انك تقيس طموحاتك على فشل الاخرين..لكن ما يمنعش ان كترة الفشل دى ساعات بتخليك تفكر ايه اللى هيخليك انت بالذات و دونا عن كل دول تنجح؟!

Yasmine يقول...

سارة

بالعكس والله انا عمرى ما كنت متشائمة..يمكن فى وقت من الاوقات كنت متفائلة بزيادة تصدقى ؟ :)

بس الفكرة كلها انى يوم ما بقرر اكتب عن حاجة لازم تكون الحاجة دى ماثرة فيا او معكننة عليا عشان طاقات الكتابة تظهر عندى

و اكيد فشل البعض فى حاجة معينة ايا كانت عمره ما هيكون مقياس لفشل الحاجة دى نفسها..لكن زى ما قلت هو بس بيخليكى تعيدى التفكير فى قدراتك انتى على انك تكونى مختلفة عن اللى حواليكى و تقدرى تنجحى الحاجة دى

التضحية لما بتزيد عن حدها بتبقى تنازل..مش عارفة اذا كنتى هتتفقى معايا فى دا ولا لأ بس انا دايما بشوفها كدا

تسلمى يا سارة ربنا يخليكى يا رب :)
و مبسوطة اوى ان الموضوع عجبك و ان شاء الله اول ما الاقى حاجة تدعو للتفاؤل هكتب عنها عشان خاطرك :)

Yasmine يقول...

ايمان

ما حدش قال يستسلم..بس ممكن تاخدى هدنة طويلة شوية لحد ما تلاقى حاجة تقنعك مليون فى المية انك تغيرى رأيك..او بمعنى اصح تجبرك على انك تتغيرى لانها تستاهل..غير كدا ما اعتقدش ان الموضوع هيكون جايب همه

ربنا يخليكى يا ايمان..رافعنلى معنوياتى دايما انتوا :)

Yasmine يقول...

يويو

عارفة انا كنت بقول انى لو كنت مكان اى واحدة فيهم كنت اكيد اخترت اختيارات مختلفة تماما عن اختياراتهم..بس بعد ما شوفت فيلم منى زى انهاردة اكتشفت ان كلنا مقهورين بشكل او باخر..انصحك بجد تشوفى الفيلم دا لانه بجد يستاهل

و تسليملى يا يويو يا رب..كويس ان الموضوع عجبك :)

Old Blogger يقول...

التى هى نفسي
انا مقتنعة تماما انها مسالة اختيار..بس مش منطقى ان كل دول اختاروا غليط..لاحظى معايا كمان فروق السن و الخبرة..يعنى اللى اقل من عشرين متوقع جدا انها تختار غلط لكن اللى قربت على التلاتين و اللى عدت الاربعين..معقولة دول كمان يكونوا ما عروفش يختاروا؟

تنورينى فى اى وقت و سعيدة اوى بمتابعتك بجد :)

----------------------------------------

لو الاختيار مبنى على نفس الاساس
يبقى منطقى ان كلهن اختاروا غلط
لان مبدأهم غالباً كان واحد
"ضل راجل ولا ضل حيطه"
وحتى اللى كانت رافضه المبدأ ده
مقدرتش تواجه المجتمع و اختارت غلط فى النهايه
و بقت (واحده ضمن كتيــر)

مستنيه جديدك :)

.........

غير معرف يقول...

وجع

engy يقول...

بجد ماشاء الله عليكى
بوست رائع
عارفه ساعات بيكون البوست الطويل ممل
بس هنا انا غيرت رايى
حقيقى رائع

الباب المفتوح يقول...

بعد كل هذه التعليقات التي قالت كل ما يمكن قوله لا أجد شئيا يمكن أن يقال
النص رائع .. لا يمكنك أن تلمسي الخطوط الفاصلة بين نساء النص
يشعرك انها حالة متصلة فعلا لنساء الشرق
فقط .. ألمس في النص مدى نضجك الذي وصلتي إليه عبر السنوات السابقة
اسلام غريب
الباب المفتوح

The Seagull يقول...

بيقولوا عليه فيلم تحفة بجد :)

مش عارفة إذا كان هينفع أشوفه والا لأ .. لأنه وقتي الفترة الجاية صيق جدًا للأسف :((

عين فى الجنة يقول...

نماذج معروفة ولكن اسلوب التناول رقيق وسلس

غير معرف يقول...

يارب تكوني بخير يارب وتكونوا كلكم بخير:)

غير معرف يقول...

فينك :)

Yasmine يقول...

التى هى نفسي

مش عارفة ليه مش شايفاها بنفس الطريقة..يمكن عشان مش عايزة اعترف بان دا السبب الوحيد او العامل المشترك بينهم..اسهل كير انى اقنع نفسي انه مهما اختلفت البداية النهاية دايما بتكون واحدة..كئيبة اوى انا :)

نورتى بجد :)

Yasmine يقول...

mankosha
قصدك واقع

Yasmine يقول...

engy
تسلمى يا انجى بجد..مبسوطة ان الموضوع عجبك :)

Yasmine يقول...

islam
ما هى المشكلة انه مفيش خطوط فاصلة..كلهم باختلاف ثقافاتهم و خلفياتهم و خبراتهم و مستواهم الاجتماعى بيعانوا من نفس القهر..انا كنت متهمة انى ببالغ لحد ما شفت احكى يا شهرزاد..مش معقول اكون انا و وحيد حامد بنبالغ يعنى :)

احيانا النضج دا بيكون متعب لما توصل فى الاخر لقناعة انه كله فى الاخر واحد..

Yasmine يقول...

يويو

لا لا لا..دا فيلك تثقيفى لازم كل البنات تشوفه على فكرة..حاولى تخطفيلك ساعتين و نص تشوفيه فيهم و قوليلى رايك..بجد مش هتندمى :)

Yasmine يقول...

راجى

متشكرة جدا :)

Yasmine يقول...

ايمان

حمد الله على السلامة..دى ايه الغيبة الطويلة دى كلها؟..انا تمام الحمد لله انتى اخبارك ايه؟

انا جيت اهو :)

Magi Mostafa يقول...

لو ممكن ايميلك

Magi Mostafa يقول...
أزال المؤلف هذا التعليق.
غير معرف يقول...

الحمد لله,حمدا لله على السلامة,على فكرة أنا الاتنين على فكرة:D تغيير بس :D
بس المهم ان انتي بخير

انتي وريم وفنون وسندريلا وايمان وجنة وسارة وشكولاتة ونورهان ونانسي وهبة ومروة والكل :D

بث تجريبي يقول...

مش هقولك اكتر من استمتعت بجد
ميرسى اوى انك خليتينى استمتع بالبوست دا

شكرا خالص

Unknown يقول...

حبيتهـا للآخـر!!!