الثلاثاء، 18 أغسطس، 2009

ادينى عقلك!!!

من شوية شفت جزء من حوار الريس من امريكا و عرفت انه كلم" اليهود" و اقنعهم ان الفلسطينيين مش هيقبلوا ابدا بتاتا فكرة الحل المؤقت افتكرت انهم درسولنا فى الجامعة ان اتفاقية اوسلو كانت بتؤكد على الوصول الى مفاوضات الوضع النهائى على سنة 1995 يعنى كان مكلف نفسه و تاعبها.. و تاكسي رايح و تاكسي راجع عشان يقول البقين الحمضانين دول؟!!! ما علينا.. عرفت كمان خير الله اما اجعله خير عن الست اللى قررت ترمى بنتها و تخطف بنت تانية عشان بنتها وحشة و البنت التانية شعرها اصفر قوم لما اختها سالتها البنت ازاى احلوت كدا قالتلها انها صبغتلها شعرها الانيل بقى انها لما عرفت ان ام شعر اصفر مريضة بالقلب فكرت انها ترميها تانى فى الشارع طيب يعنى هى نفسها فى الحلوة.. كانت تخلى الوحشة و تخطف الحلوة برضه اه و فى كمان واحدة و اخواتها البنات و امهم.. حطوا بطاطين على ابن واحدة من البنات عشان حملت فيه سفاحا.. و سابوه يموت ببطء لحد ما اتخنق..الطفل كان عمره 6 شهور على فكرة و سمعت سمع خير عن البنت اللى عمتها و جوزها و ابنها افقدوها عذريتها فى الشارع عشان اتجرات و رفضت تتجوز ابنهم و عرفت ان البحارة المصريين اللى اخر ما غلبوا حرروا نفسهم و ان وزارة الخارجية لسه مصرة ان "اتصالاتها" هى اللى انقذتهم الا هى تليفونات الخارجية متوصلة بمدافع رشاشة ولا بمسدسات مية و انا مش عارفة؟ ولا هم كانوا بيتصلوا بيهم بالساتلايت النووى المصرى مثلا؟ علما بان اهالى البحارة قالوا ان المسؤولين فى الوزارة اكدوا انهم مش هيعرفوا يعملولهم حاجة و قالولهم لما تبقى معاكم فلوس الفدية ابقوا ادوهالنا و احنا نوصلها للقراصنة!!!!! و قريت عن اللى قتل مراته و بنته و ابنه و انتحر عشان خايف عليهم من الفقر قديم اوى الكلام بتاع ازاى يهونوا عليه و كدا هو القتل بقى سهل اوى كدا؟ هى الناس جرالها ايه؟ انا اعرف واحدة صحفية بتعمل دراسات فى الطب النفسي هى بتقول ان النوعية دى من الناس بتبقى عندها رغبة قوية فى القتل لمجرد القتل بس لما كل الناس دى عندها رغبة فى القتل..هيفضل مين عشان يتقتل؟!!
اه صح انا نسيت مقالة بلال فضل اللى حكى فيها عن مهازل الحزب الوطنى فى لقاء جيمى بشباب مصر الواعد
و كلاكيت تانى مرة.. يا خسارة ال3 ساعات اللى ضيعتهم من عمرى على محاضراتك يا محمد يا كمال!!! و فى كمان ظابط مصرى اتضرب رصاصة فى صدره على الحدود فى سينا.. بقيت الجملة هتبقى مفاجاة غير متوقعة بالمرة اصل اللى ضربوه دورية اسرائيلية برضه! و من اطرف التعليقات اللى قريتها على الخبر ان اسرائيل تشدد لهجتها الموجهة لمصر لاسترداد الصراصة من صدر الجدنى لانها عهدة!!!! و اكتشفت انى كان عندى حق فى خناقاتى المستمرة مع ماما على قلة اكل الفاكهة و الخضار اتارينى كان قلبى حاسس ان ضغطى هيبقى عالى فى يوم و ان ضغط عالى مع فواكه و خضروات بمية الصرف الصحى المملحة ممكن يوصلوا لانسداد فى شرايين القلب و انا كله عندى كوم و شرايينى دى كوم تانى خالص و على فكرة انا مش واخدة موقف من مية الصرف الصحى عشان اكيد فيها فيتامينات كل الحكاية ان صحتى ما بتجيش على الاملاح سمعت كمان كام رقم اثروا فى نفسيتى بصراحة اولهم ال60 انجاز فى 60 شهر بتوع الحكومة الالكترونية و ان 30% من الشباب اللى بين 25 و 35 سنة اميين لا مش اميين يعنى ما بيعرفوش يدخلوا على كومبيوتر و يتعاملوا فى التكنولوجيا اصل احنا تعريف الامية عندنا لسه مرتبط بمعرفة القراية و الكتابة و فك الحروف حاجة كمان.. انهاردة وقفنى عسكرى عشان ما كنتش رابطة الحزام و لما رحت اكلم الظابط لقيته موقف راجلين كبار و بيهددهم بالحبس و واحد تالت قاله انه عايز يدفع الغرامة عشان يمشى و بعد ما سيبوله ركبه فى حوار ممل بينهم عن مكتبهم اللى مافيهوش مروحة و عن حاجتهم الملحة لسخان مية او براد مش فاكرة بصراحة.. واحد منهم قاله ادفع المصالحة يا... فى النقطة اللى بعدنا و ارجعلى تانى يا.... عشان احبس ...
السؤال اللى بيطرح نفسه بشدة..هو انا ايه اللى رجعنى لقراية الجرايد؟!

هناك 8 تعليقات:

mUsLiM يقول...

يعنى على الصبح كده قبل ما ابدأ الشغل حظى الحلو يوقعنى فى موضوعك اللى أحلى من حظى

يا بنتى احنا داخلين على ايام مفترجه حرام عليكى

على كل حال بغض النظر عن الموضوع الكئيب ده

وهو مالوش عندى توصيف الا كئيب بصراحه

ههههههههه

دى ألطف حاجه ممكن أقدمهالك فى التعليق

لكن عموما بالنسبه لزيارة مبارك

فسيبك بها الهسهس اللى مبارك وجرايد الحكومه معيشه الناس فيها

انه راح علشان السلام واليهود وفلسطين

كل ده فى الباى باى

الباشا راح عشان يظبط موضوع التوريث ويشوف فيه من رجا ولا ايه النظام

خلاص فترة الرئاسة قربت تنتهى ولو ناويين على التوريث المفروض يتحركوا من دلوقتى جديا وكان اول التحركات دى حوار جيمى الاخير

فالباشا راح امريكا يشوف ايه الأوضاع ويهددهم زى كل مره بالاخوان المسلمين والارهاب وانه مظبط مصالحهم

وبالتأكيد اوباما حبيب قلب مامته عمره ما هيتأخر عن مبارك

حسبى الله ونعم الوكيل

بالله عليكى غيرى الموضوع ده قبل رمضان ونزلى موضوع تانى

بلاش كده

هههههههه

يلا

كل سنه وانتى طيبه يا اختى :)

ويارب السنه اللى جاية تكونى بخير وصحة وعافية وان شاء الله تحققى اللى بتتمنيه فى رمضان

وعقبال ما نفرح بيكى كته :))

يلا ، السلام عليكم

انا حرة يقول...

معلش يا مصعب انا لسه شايفة تعليقك حالا بالصدفة البحتة :)

بس انت لحقت ترد امتى؟ انا شلت التعليقات مخصوص عشان ما اجبلكوش اكتئاب و قلت اجى هنا اكلم نفسي لوحدى زى المجانين و خلاص

بالنسبة للكئابة فتصدق بالله انى بقالى 3 ايام بحاول الاقى موضوع مسلى احطه هنا و مش لاقية..لو عندك اقتراحات قولى و انا موافقة :)

عموما انا ممكن اوعدك ان الموضوع اللى جاى هيكون بعيد تماما عن السياسة و البلد و اللى بيجرى فيها..لكن انه يكون مش كئيب مش هقدر اوعدك بصراحة

و انت طيب و بصحة و سلامة يا رب و ان شاء الله تحقق انت كمان اللى نفسك فيه

e7na يقول...

ازيك يا استاذه يا سمين
كل سنه وانت طيبه
..
مش لانى دمياطى بافتخر ببلدياتى بس فعلا واضح ان الاعتماد على الدراع فى رد الحق هو الطريق الوحيد الباقى لنا
يعنى زى ما عملواصيادين عزبة البرج وحرروا نفسهم وفى الاخر بكل بجاحه خرج ابو الغيط يقول انه هيتوسط علشان يرجعوا على مصر للطيران
..
فى قريه تانيه فى دمياط ظابط جديد شايف نفسه ضرب واحد ورماه على وشه فأهل الرجل ردوا عليه وضربوه راح جاب كام عربيه شرطه ودخل فرد نفسه على البلد ولم الكبار بتوعها وجابهم يقولوا حاحا قدامه ويصورهم بالموبايل
اهل ابلد قفلوا المداخل والمخارج وبدأوا الضرب والحجاره فى الظباط لحد ما كانت هتبقى معركه حقيقيه
تقريبا لازم نكون متشائمين ونعترف ان جاى أسوأ
المشله ان خبر زى خبر الجندى المصاب على الحدود بقى عادى جدا وزاويه صغيره فى اى جرنال كأنه حداث سير يمى
...
طولت عليك
بس دى تدوينه عندىعن عزازيل ياريت تقولى رايك
http://ensazaman.blogspot.com/2009/07/blog-post.html

mUsLiM يقول...

الله يكرمك يا ياسمين يارب

كويس انك فتحتى التعليقات

انا عاوز منك خدمة كده يا اختى

عاوزك تعرفيلى دكتور او اتنين كبار فى القاهره

متخصصين فى مخ وأعصاب

ياريت يا اختى بالله عليكى

بس يكونوا متاحين ان الواحد يروحلهم فى خلال يوم أو يومين

مش نحجز قبلها بشهور

بس المهم طبعا يكون دكتور موثوق فيه وكويس

وطبعا العنوان بتاع الدكتور

ياريت يا اختى تفيدينى لو تقدرى بالله عليكى

وجزاكم الله خيرا

خلى بالك من نفسك

ونسألكى الدعاء

السلام عليكم

انا حرة يقول...

e7na
اكيد الظابط بتاع دمياط دا كان متاثر بعادل امام فى التجربة الدنماركية..والله بعد حادثة الصيادين و التقارير اللى بتقول ان وزارة الزراعة كانت حاطة مية المجارى فى اول مصادر المياه لزراعة اراضى الصف ولا الجيزة مش فاكرة..ما بقيتش عارفة اقول ايه اصل قلبى واجعنى على البلد دى قدمت اوى

هرد اكيد على الموضوع بتاع عزازيل مع انى لسه ما انجزتش اوى فى قرايتها

و انت طيبو بالصحة و السلامة يا رب :)

انا حرة يقول...

مصعب

يا رب اكون عرفت افيدك..انا لسه بشوف لو اعرف حد تانى بس اللى عندك نمرته و عنوانه دا كويس اوى..و ان شاء الله خير و ربنا يطمنك باذن الله

mUsLiM يقول...

ربنا يخليكى يارب يا ياسمين

انا مش عارف اقلك ايه

جزاكم الله خيرا بجد

مش هاقدر اقلك اكتر من كده

وكبارى برده تعبته معايا

ربنا يخليكو ليا يارب

وادعيلى اوى يا اختى

ويارب يكون الدكتور ده سبب فى الشفاء يارب

يارب

السلام عليكم

انا حرة يقول...

على ايه يا مصعب دا كله بس..انا ما عملتش حاجة اصلا
المهم ربنا يطمنك باذن الله