الأربعاء، 23 سبتمبر 2009

مكابرة..

الوقت: ليل..المكان: منزلها..الجو: برد
بين اكواب القهوة و معالق السكر وقفت مع صديقتها المقربة فى مطبخ بيتها او" بيت الامة" كما اعتادت الصديقات على تسميته كالعادة منعها زحام افكارها من الاستماع لما تقوله صديقتها و ان كان طوفان الافكار قد سمح لها بسماع بعض الكلمات من وقت للتانى حتى تستطيع متابعة "راس الموضوع" الذى تتحدث عنه.. ***** "يقولون ان الدموع كثيرا ما تكون صحية.. فهى سموم تخرج شحنات الغضب و الحزن
و الانفعال و المشاعر السلبية كلها فى لحظات"
- بديهى!..فالبكاء كثيرا ما يريح صاحبه..
فكتمان الدموع قاتل باكثر من البكاء نفسه فكثيرا ما كانت جدتى تقول انه اذا ما فاجأتك دموعك فدعيها تسقط فلا حرج فى ان يكون الانسان انسانا!
"يقولون ايضا انه من طبيعة الانسان ان يستمد قوته ممن حوله"
منطقى! فالانسان كائن اجتماعى بطبعه..
و هو لا يستطيع الحياة دون ان يعتمد على الاخرين
*****
- هو انتى مش هتقولى انا عارفة..
بس ممكن لو احتاجتى حاجة تقوليلى؟
- اكيد طبعا
*****
"يقولون ان اعتراف الانسان بحاجته للمساعدة لا علاقة له بالكبرياء فالطبيعة البشرية تقول انه
لا يوجد من يدعى كائن خارق..و كلنا فى لحظات الضعف سواء"
- مؤكد!..لكن منطقى بيقول انه فى نوعين من البشر نوع بيساعد و نوع بيتساعد و النوع اللى بيساعد يا فعلا ضحية..يا عايش فى دور الضحية و الحقيقة انى ما اتعودتش اكون من النوع التانى ايا كان تصنيفه!
*****
- بيقولوا ان الفضفضة مع اللى بتثقى فيه مريحة..
- و بيقولوا كمان ان الكلام مفيش اسهل منه!
*****
اعتدلت فى وقفتها كمن يهم باذاعة خبر خطير فابتسمت صديقتها ابتسامة مشجعة..علها تفصح اخيرا عما يضايقها فاقتربت هى الاخرى منها
كمن يرغب فى قليل من الطبطبة
مما اعطى الصديقة الوفية المزيد من الامل و نظرت كاتمة دموعا تراكمت منذ فترة ليست بالقليلة
و ضمت شفتيها معلنة انفجار وشيك
و تمتمت فى هدوء:
"قلتيلى بتشربيها سادة ولا مظبوط؟"
*****

هناك 28 تعليقًا:

صاحبة الشباك يقول...

مش أول زيارة ولا حاجة
هو بس أول رد
دايما متابعة كلامك
بس ببقى عاجزة إنى أرد على الجمال ده

:)

mUsLiM يقول...

مش عارف زى ما يكون واصلى احساس انك محتجه حد يكون معاكى أو جنبك وبتمنعى نفسك بكل الطرق

انا نفسى تسيبى نفسك ومتقديش الأمور طالما انك شايفه انك مش بتعملى احساس غلط

واضح ان احساس الاحتياج صعب عليكى او فيه قسوة على روحك

لكن عموما ليس منا من يسلم من ذلك

وسواء احساسى ده صح أو غلط

أسأل الله لكى التوفيق والسداد يا اختى :)

وموضوع جميل كالعادة وصياغته جذابه بالفعل

السلام عليكم

dr.lecter يقول...

"يقولون ان الدموع كثيرا ما تكون صحية..
فهى سموم تخرج شحنات الغضب و الحزن
و الانفعال و المشاعر السلبية كلها فى لحظات"



مظبوط وللاسف احنا كرجاله دموعنا صعبه مش زي البنات العمليه عندهم سهله وعلشان كده بيرتاحوا بسرعه لكن في حالتنا الدمعه بتحزق علشان تنزل



منطقى! فالانسان كائن اجتماعى بطبعه..
و هو لا يستطيع الحياة دون ان يعتمد على الاخرين

اه بس لو الباقيين اللي حوله كويسين اصلا وفي بيئه معتدله علي الاقل متوسطه
يبقي اشته اووي


مؤكد!..لكن منطقى بيقول انه فى نوعين من البشر
نوع بيساعد و نوع بيتساعد
و النوع اللى بيساعد يا فعلا ضحية..يا عايش فى دور الضحية
و الحقيقة انى ما اتعودتش اكون من النوع التانى ايا كان تصنيفه!


ولا انا بس متفق مع اللي قاله مصعب

- و بيقولوا كمان ان الكلام مفيش اسهل منه!

بالظبط انت عارفه بقي مابعرفش افضفض لكن بلا فخر انا بيتفضفض لي بسهوله وشغال سماعه طول حياتي لكن نادرا مابفضفض الا لو حد قريب جدا جدا ودي ماحصلتش معايا غير مرات قليله حتي اصحابي المقربين مابحبش افضفض لاني عارف انهم مش هيساعدوني ولا هيتفهموا مضمون اللي عاوز اقوله لاني بقول كلام كتير وفي نصه بيكون هدفي الحقيقي

الفعل اهم من الفضفضه بكتيير


اعتدلت فى وقفتها كمن يهم باذاعة خبر خطير
فابتسمت صديقتها ابتسامة مشجعة..علها تفصح اخيرا عما يضايقها
فاقتربت هى الاخرى منها
كمن يرغب فى قليل من الطبطبة
مما اعطى الصديقة الوفية المزيد من الامل
و نظرت كاتمة دموعا تراكمت منذ فترة ليست بالقليلة
و ضمت شفتيها معلنة انفجار وشيك


و تمتمت فى هدوء:

"قلتيلى بتشربيها سادة ولا مظبوط؟"

انت طبعا زمانك اتكلمتي وقولتي لصاحبتك وده كويس المهم انك شيلتي الهم ده عن قلبك ومش مهم الحياه هتبقي عامله ازاي بعد اللي انت قلتيه سواء كويسه اووحشه المهم انك اتحررتي

وده شيء نادر ان حد يقدر يعمله مع انه سهل وبادينا

اراكي عصيه الدمع شيمتك الصبر

وانا متاكد ان انشالله خير

ReEm يقول...

مش عارفة اذا بتكلم في الموضوع و لا بس ببساطة حسيتها حالة خرس مع رغبة و احتياج للكلام مش عارفة اذا صح ولا بتكلم لانه ده احساسي حاليا

عندي رغبة و احتياج للكلام و البكاء و كل حاجة من اللي بيعمولها البنات دي و بحسدهم عليها بصراحة بس مش بعرف لما بجي اعيط مش بعرف لما احب اتكلم مش بعرف لما اجي افضفض مش بعرف حتى على المدونة مش بعرف اكتب فيها عني بعمق خالص

عارفة بحس لو اتكلمت هخون نفسي على ائتمنها ليا على اسرارهااو هنزل من كبريائي او انقص من قدري قدام نفسي باحساس الاحتياج ده المهم بحس لو اتكلمت هبقى ضعيفة في نظر نفسي و انا مش عايزة اكون ضعيفة

و في حياتي الصديقة دي اللي مستنية صاحبتها تفضفض دي ماما ساعات بحس فيها نفس الوصف الاخير ده بس بفاجأها بكلام تاني و موضوع تاني لدرجة ساعات بتتنهد بحزن او تتعصب و تسبني
عشان مش بفضفضلها و تزعل بس اعمل ايه بجد والله مش عارفة اعمل اللي بيعموله البنات ده نفسي بس مش عارفة ولا قادرة

معلش رغيت كتير اهو برضو من زمان ما رغتيش عندك وصدعتك

لا تـــشـــتــــاق يقول...

خدى بالك انتى حره اوك
وبتكابري
تسلم ايدك

Old Blogger يقول...

مفيش تعليق على الموضوع
لأن فى عنوانه اعتراف
و فى نصه .. مكابره

كان فى تحفظ على الصوره
بس تقدرى تتجاهليه تماماً
لأنك طبعاً .. حره

وحشتنى طبيعتك
و طبيعيتك

: )

Yasmine يقول...

natashia

عاجزة ليه بس :)
تنورينى فى اى وقت و احب اعرف رايك بعد كدا فى اى موضوع بكتبه..حقيقى سعيدة بكلامك جدا

Yasmine يقول...

مصعب

هو احساسك صح الى حد كبير..بس هى الفكرة مش فى الاحتياج نفسه..الفكرة فى الاعتراف بلحظات الضعف خصوصا لما يبقى فى ناس كتير حواليك مستعدين يقفوا جنبك لو طلبت دا..بس عامة ماعتقدش انه سهل على اى حد انه يعترف بضعفه

وشهادة اعتز بيها كالعادة يا فندم والله :)

Yasmine يقول...

لكتر

مين دول اللى الدموع عندهم سهلة؟ انا اعرف واحدة اختها الوحيدة ماتت من اقل من اسبوع و مكسوفة تعيط قدام الناس اللى بيعزوها عشان ما تنكدش عليهم تخيل!!

هو بالظبط كدا..انك تسمع للناس و تحاول تساعدهم اسهل بمراحل من انك تتكلم و تشرح كلام انت اول واحد عارف انه ماحدش هيفهمه غيرك..و مش عشان انت بطل ولا مضحى ولا شمعة تحترق من اجل الاخرين..لكن عشان فعلا الكلام ساعات بيكون تقيل اوى على اللسان و ساعات بتشفق على الناس من انهم يسمعوا كل دا و هم كدا كدا مش هيقدروا يعملوا حاجة

مين دى!! لا خالص..لست انا هذه المراة:D
ولا قلت ولا عدت..دا موقف خيالى اساسا
بس لو كان حقيقي برضه ما كنتش هقول و كنت هكتفى بانى اسالها عن نوع القهوة اللى بتحبها و عدد معالق السكر..هم اصحابى اتشلوا منى من شوية:D

نسيت اقولك كل سنة و انت طيب فى عيد ميلادك..معلش متاخرة كام يوم :)

Yasmine يقول...

ريم

وحشتينى جدا جدا جدا بجد و وحشتنى تعليقاتك و فهمك دايما للى مش بقوله :)
حمد الله على السلامة و ما تغيبيش عنى كدا تانى

حالة خرس مع رغبة و احتياج للكلام
يا نهارى..دا انا لو كنت حاولت اوصفها بالشكل دا ما كنتش هعرف ولا بعد عشر سنين..دا كانك دخلتى جوايا يا بنتى..خضتينى تصدقى :)

والله يا ريم انا حاسة انى اتغيرت شوية..يعنى ما بقيتش بموت نفسي عشان ما ادمعش قدام الناس..كنت الاول بشوف ان دا ضعف لكن دلوقتى بشوفه حاجة طبيعية جدا..طبعا مش معنى كدا ان الواحد ينكد على خلق الله و يقلبها مندبة :D
ولا بقول ان دموعى بقت قريبة بالعكس تماما..
لكن مش عيب ابدا انك تظهرى جزء من ضعفك دا من وقت للتانى..احنا بنى ادمين مش كائنات الية..دا انا بستغرب اوى من اللى بيقولولك الراجل ما ينفعش يعيط..بجد بستغرب حقيقي..ما بالك احنا و احنا كائنات رقيقة و مرهفة و حساسة :D

بصى مش هقولك فضفضى و الكلام بيريح عشان انا لا بعرف اعمل كدا ولا مقتنعة ان دا الحل..لكن لما تلاقى نفسك عايزة تتكلمى اتكلمى حتى لو طلعتى رغبتك فى الكلام دى فى صورة كتابة احتفطتى بيها لنفسك..بجد ما تضغطيش على اعصابك عشان ما توصليش لمرحلة الانفجار..دى نصيحة من مجرب يعنى :)

و بجد بجد ما تغيبيش عنى تانى كدا :)

Yasmine يقول...

لا تشتاق

هههههههه لا مانا واخدة بالى :)

Yasmine يقول...

التى هى نفسي

تحفظى براحتك طبعا..اختلاف الراى لا يفسد للود قضية مش بيقولوا كدا برضه :)

بس تصدقى ان الصورة عجبانى اكتر من الموضوع..او بمعنى اصح الصورة هى اللى خلتنى كتبت الموضوع تخيلى

كويس ان فى حد بيوحشه الرغى دا..انتظرى المزيد بس ماتزهقيش بقى :D

Yasmine يقول...

ريم

شلتى التعليقات قبل ما اقولك كل سنة و انتى طيبة..انتى و سارة و كل اهل بلدكم..و كل عيد وطنى و انتوا بخير :)

لون الشمس يقول...

بسم الله الرحمن الرحيم

السلام عليكم

ادراج جميل و من واقع الحياه

فكرتينى بكلام فيلسوف كان بيقول ان الانسان بيعمل الخير مش عشان يعمل الخير
الانسان بيعمل الخير عشان يحس انه كويس

قلمك حساس وبشوف فيه كلامى مع اصحابى

mohamed ghalia يقول...

نستطيع ان نتكلم كثيرا ولكن القليلون من يصمتون ويفعلون
التوبك هايل
دمتِ فى سعادة

Jannah يقول...

يا بعد قلبي ناقصك شي مهم خاصية مهمة جدا
option مهم جدا وهو البوح
قلة البوح و الرغي تدفع للاكتئاب ..انت حرة
:D

كل عام و انت طيبة :)

mahasen saber يقول...

كل ما الحزن يكتفنا والخوف يكهربنا والدنيا توجعنا

بنحتاج لحد غالى نفضفض معاه من غير خجل ولاا حدود للبوح

وساعات بنستخبا فى فنجان قهوه سخن نبص فيه بعمق ومنعرفش مين اغمق من مين
جوانا ولاا لون البن


البوست ده اثر فيا قوى يا حره

Romaya يقول...

طب تيجي نكابر مع بعض :D

واقولك اني لما ببكي بتعب اكتر مبرتحش ابدآآآآ

لما بتحط في موقف مهما كان صعوبته ببكي وبعرف اتحكم في دموعي لكن مقولكيش على كم التعب اللي بحس بيه بعدها واستغرب لما حد يقولي عيطي عشان ترتاحي !

بالنسبة بقى ان احكي لحد وافضفض
لازم في ناس جنبي احكلهم والإ كنت طقيت بصراحة
بس مش معنى كدا احكي لأي حد بالعكس والله تقريبآ اللي بحس معاه اني هلاقي راحتي في الكلام وهطلع منه انشالله بكلمة تنفعني بلاقيني راسمه قصاده صورة بالكلام باللي جوايا والناس دي هي اقرب حد ليا

حتى لو مكنتش اجتماعية مع البشر اللي حواليا بجد ضروري يكون في حد جنبي احكيله ماهوش احتياج اد ماهو راحة وفضفضة للجواكي

كفاية رغي بقى

وكل سنة وانتي طيوبه :)

مواطن شووجااع يقول...

الأحزان تهذبُ النفوس ، وتصفّي الأرواح ، وتؤدب القلب !!
الدموع تغسل ُ الأوساخ داخل عيوننا ، فنرى الوجودَ بعدها أنقى ،
ولا تسأل الله أن يخفف عبأك بل اسأله أن يشد أزرك ،
واليأس كلمة تجهلها النفوس الكبيرة ،
كن أنت مشرقا ً أولا ً ..
وتأكد من أنه لن تغبَ عنكَ شمس الأمل

نقاش بين متفائل ومتشائم
قال المتفائل:
- أنا سعيد لأنني حي .
وقال المتشائم :
- وأنا حزين لأنني سأموت !

كن أملا ً أنت أولا ً
وبعدها سوف تحصد البسمات التي لا تذبل
وسوف تستقر الطمأنينة بقلبكَ ولن تبرحها !
وخذ من الأمس النصيحة ، ومن اليوم العمل ، ومن الغد الأمل

Yasmine يقول...

لون الشمس

يا اهلا يا اهلا :)
انا بجد مبسوطة اوى انى شفتك هنا..اول مرة اعرف انك عاملة مدونة على فكرة

ايوة انا كمان فاكرة انى قريت حاجة شبه كدا زمان..او انه بيعمل الخير عشان يرتاح من جواه و يحس انه له لازمة فى الدنيا

و كويس ان الموضوع عجبك..هستناكى على طول بقى ;)
بجد مبسوطة بيكى اوى

Yasmine يقول...

محمد غالية

متابعتك الدائمة دى هى اللى هايلة والله :)
تسلم ربنا يخليك يا رب..

Yasmine يقول...

جنة

طيب و ما تعرفيش الاوبشن دا بيبيعوه فى انهى سوبر ماركت :D

و انتى طيبة و بالف خير دايما يا رب :)

Yasmine يقول...

محاسن

عجبنى كلامك اوى..بس تصدقى ساعات بيبقى الانسان دا موجود و برضه الكلام بيفضل صعب و مهما كان اللى انقال كتير برضه بيقى مش كامل..مش عارفة ليه

و اسفة والله انى نكدت عليكى ما كانش الهدف خالص :)

Yasmine يقول...

مروة

هييييه يعنى فى ناس زيي اهو فى الدنيا الحمد لله..كنت هبتدى اشك فى نفسي والله :)

هى المشكلة بتبقى فى الناس اللى بتصر تعمل معاكى اللى انتى بتعمليه معاها كنوع من انواع رد الجميل..من غير ما يتفهموا انك عملتى كدا عسان هم كبيعتهم كدا و دا اللى هم محتاجينه منك..مش معنى كدا انك لما تتحطى فى نفس الظرف بتحتاجى نفس الحاجة و بنفس الطريقة

و بعدين ارغى براحتك طبعا :)
و انتى طيبة يا مروة دايما يا رب

Yasmine يقول...

مواطن شجاع

كلامك مفيش رد يتقال بعده
خصوصا الجملة دى:
ولا تسأل الله أن يخفف عبأك بل اسأله أن يشد أزرك

بجد اثرت فيا جدا
نورتنى :)

Old Blogger يقول...

الصورة جميلة و الموضوع جميل
التحفظ على فكرة نشرها
لكن هى جميله ..
فهمتينى ؟

بيتهيئلى فى ناس كتيــــر
بيوحشها الرغى ده :)
أصل مش كل الرغى وحش برضو
رغى عن رغى يفرق كتيـــر

:)

Yasmine يقول...

ايوة يا حبيبتى فهمتك..تسلميلى بجد كلك ذوق :)
و ليكى عندى كل شوية رغى من النوع دا بس هحاول اخليه مبهج شوية :)

ادرينالين عشوائي يقول...

اسمعي... انا بحاجة احكي معك بشأن مهم كثير..

اذا بتسمحي تبعتيلي عنوانك الالكتروني... ضروري ع الآخر..
Adrenaline.3ashwa2i@gmail.com