الجمعة، 25 سبتمبر 2009

من هنا و هناك..

(1) سخافة..
انت تطلق نكتة فهذا يعنى انك مرح ان تطلق نكتة فلا يضحك عليها احد..فهذا يعنى انك دمك تقيل ان تطلق نكتة و تضحك عليها وحدك..فهذا ما لم اجد له اسما بعد
(2) عن الفشل..
بالنسبة لان كل واحد فاشل فى حياته بيرمى فشله على انه عايز يغير و مش عارف و لما تقوله تعالى يا حبيبى غير اللى مش عاجبك يقولك كيف تتنصل لاصلك ايها الجاهل الزنديق.. "من فات قديمه تاه" كان مثل خالتى نوسة المفضل.. و كله الا زعل خالتو!
I came to Wellesley
because I wanted to make a difference
But to change for others is to lie to yourself Katherine Watson- Monalisa Smile
(3)
سخرية قدر..
هو المفروض الواحد يعمل ايه لما يلاقى ناس بتتكلم عن بيتهم اللى اتكلف كام مليون و قضية ديونهم فى كل الجرايد الحكومية منها و المعارضة؟ و لما يعرف عن قوادة بتجيب تاشيرات حج قبل الحج ب20 يوم بس ولما يسمع حوار من نوعية
"المناقصة بتاعتك بكرة يعنى تبقى هنا بكرة بالليل" الغريبة ان الكلام دا من واحدة لجوزها..
و الاغرب انه كان "هنا" قبل المعاد!
(4) مفارقة..
ما بين استقالة الخضيرى و استبعاد حسنى زى اللى بين صوت فيروز فى زهرة المدائن و اداء بعرور فى تحفته الخالدة العنب
(5) لغز ميكى..
حاجتين ما بفهمهمش.. نظرية النسبية لاينيشتاين و تعلق نسبة كبيرة من الرجال الشرقيين العاقلين البالغين الراشدين بامهاتهم لدرجة المرض! حد عنده تفسير علمى؟
(6) حرب طواحين الهوا..
واحدة كل ما يواجهها مطب من مطبات الحياة اللذيذة تغمض عينيها و تسد ودانها و تعمل نفسها مش شايفاه فى برود يدرس فى كليات كاريير و ميراكو والتانية ماشية بعلبة مسكنات عشان تعرف تقف لوحدها قدام مطباتها الاولانية عاشت لحد ما شافت حفيد حفيدها الصغير و التانية ماتت و هى بتحاول تنقذ ابن بنت خال سلفة مرات اخو جارتها من الوقوع من البلكونة مع انه اساسا ما كانش ناوى ينط! (7)
بقالى يومين بقرا فى قصايد نزار قبانى شدتنى الابيات دى :
ورأينا أمريكا ترتدي معطفَ حاخامٍ يهوديٍّ عتيق وتقودُ المجزرة.. تطلقُ النارَ على أطفالنا دونَ سبب.. وعلى زوجاتنا دونَ سبب وعلى أشجارنا دونَ سبب وعلى أفكارنا دونَ سبب فهل الدستورُ في سيّدة العالم.. بالعبريِّ مكتوبٌ لإذلالِ العرب؟؟ على فكرة القصيدة اسمها قانا.. يعنى اتكتبت سنة 1996 مش اول امبارح!
(8) حكمة اليوم..
ليس كل ما يلمع ذهبا..خالص يعنى

هناك 12 تعليقًا:

r يقول...

(1)
سخافة..
هى ربما سخافه وربما من باب اننى لا اكذب ولكنى اتجمل
----------------------
(2)
عن الفشل..
لو على الزعل
يبقى الفشل حاجه بسيطه

وان كان معروف ان الاشياء ثابته فالتغير لنفسى اسهل كثيرا
-----------------------
(3)
سخرية قدر..
وربما هى الحياه فى عالم المنافقين او العالم الاخرالذى لا نعلم كيفيه دخوله
بلا خطايا-- خطايا المال اقصد

-----------------------
(4)
مفارقة..

جميله جدا هذه المفارقه سأتركها بلا تعليق لان ما قلتيه كفى
--------------------------

(5)
لغز ميكى..

مش لغز ولا حاجه هى العقد والامراض النفسيه لمجتمع العرب عموما

------------------

(6)
حرب طواحين الهوا..
او التمثيل
-----------------------
(7)

صدق نزار
وكأن التاريخ ما زال يتعاد ويتكرر بلا مل
ومازلنا لا نرى لا نسمع لا نفهم واكيد لا نتكلم لغه احد يفهمها

---------------------------

(8)
حكمة اليوم..

ليس كل ما يلمع ذهبا..خالص يعنى

نقول نحاس مثلا
----------------------------

رائع على فكره
دمتى بخير

ReEm يقول...

اولا تسلمي على المعايدة و انا شلت التعليق لانه يعني حسيت انقضى وقت المناسبة خلاص

ثانيا بقى انتي كمان واحشاني والله وجو المدونات كله يمكن اكتر حاجة بقيت افتقدها في النت كلها لما اغيب واديني رجعت اهو وفضيت و ناوية ارغي كتييييييييير عندك

ثالثا نخش على البوست
1
ان تطلق نكتة فلا يضحك احد .. فهذا يعني انه الناس اللي انت معاهم ماعندهمش ذوق مايجاملو شوية و انك تضحك على النكتة لوحدك يبقى استهبال
بس بجد ضحكتني الفقرة دي

----
2
مش فاهمها اوي دي بس ممكن يا يبقى خوف من التغير او خوف انه يكتشف انه فاشل بجد

-----
3

يقول اللي اختشو ماتو صحيح

-----
5
هو الطبيعي مي البنت لابوها و الولد لامه باعتبار الام بتبقى احن على الولد من الاب بس هو غالبا انت بتتكلمي عن ابن امه والله اهو ده المرض اللي لسه مالوش دوا خالص ولا تفسير عارفة انا عندي قريب كدة عروسته اولانية لما سابته الكل لامها بس بعد ما اتجوز التانية وبان نوعه من الرجال بجد الاولانية حظها من السما و التانية بقى مسكينة الله يجعله في ميزان حسناتها و صبرهاعليه يدخلها الجنة

-----
6
يعني الواحد يطنش يعش ينتعش (*_*)
بس ناس كتير بقت تحب تعيش المثال التاني اوي

-----
7
للاسف و لحد الان نحن مكانك سر

----
حكمة اليوم

معاكي جدا و حتى كان عندي تشبيه كدة بس بلاش بقى

لون الشمس يقول...

بسم الله الرحمن الرحيم

السلام عليكم

1)

دة يبقى اسمه لون الشمس هههههه
اصلى بهزر عشان انا اللى ادحك
دة اسمه هبل
2)

معرفش انجليزى فمعرفش اترجم اللى مكتوب دة

ودة اكبر دليل على فشلى

3)
المنافق اسير دنيا فانية

هكمل بعدين انا اسفة

4) وحشتنى خفة دمك من زمان هههه

5) انا ممكن اشرحلك النسبية انما الحكاية دى مقدرش اشرحهالك

اصلو عندنا كتاب ف المدرسة لمصطفى محمود بيشرح النسبية انا مفهمتوش بس اقدر اقراهولك قراية ويبقى اسمى شرحت

لى عودة ان شاء الله

mahasen saber يقول...

لما نلاقى ناس بتتكلم عن بيتهم اليى اتكلف كام مليون

نتكلم احنا عن ضحاينا الدويقه اليى كانوا بالمليون برضه

لا تـــشـــتــــاق يقول...

عموما انا مش هكلمك عن الفشل ولا سخريه قدر ولا سخافه اناهكلمك عن نظريه اينشتاين والى المفروض انها عاوزه اعده ونتكلم لكن انا هقولك حاجه بسيطه خالص ارجو انك تفهميها(بتختلف حركه الاشياء تبعا للشخص الي بينظر اليها او للمكان الى هيا فيه او الزمان زى مثلا عربيتين ماشيين جمب بعض بنفس السرعه وفيه واحد واقف على الرصيف بالنسبه له سرعه السيارتين في وضع الحركه =100 جم مثلا الى هى سرعه السيارتين لكن بالنسبه للاشخاص الى في العربيتين لو كل واحد منهم نظر للعربيه الى جمبه هيحس ان سرعه العربيه او وضع الحركه بيساوى صفر لكن لو بصوا مثلا على الطريق او رصيف او اى شئ تانى هيعرفوا انهم في وضع حرجه يعنى تبعا للنظر والمكان والضوء والكيفيه اقدر احدد حركه الاشياء
ودى كلها حاجات وعوامل بتخلينا نعرف نحدد كيفيه الحركه
اما السيارتين الى سرعتهم 100كم دول لو فيه عربيه معديه من جمبهم سرعتها 120 كم وسبقتهم بالنسبه لهم سرعه العربيه دى تساوى 20 كم اما بالنسبه لشخص واقف على الارض فسرعه العربيه بتساوى 120 كم اوك ياجميلوطبعا الزمان والمكان عاملين مؤثرين جدا على الحركه
ارجوا انى اكون قدرت اطرح المعلومه

Fatma يقول...

But to change for others is to lie to yourself
صحيح

سخرية القدر
مش المفروض يعمل حاجة يبتسم ويقول سبحان الله
بس الست اللي بتقول لجوزها تبقى هنا بكرة بالليل اكيد شافت منه الويل فبتحاول تلحق ما يمكن الحاقه

لغز ميكي
نظرية النسبية ! الزمن والمسافة والكتلة والطاقة ! انتي مش كنتي ادبي ؟؟؟!! دي تبقى طلاسم لاي حد كان ادبي لانها اساسا نظرية صعبة على بتوع علمي شخصيا
التعلق بالام ليه فعلا تفسير نفسي فرويد اتكلم عنه كتير جدا ليه اسباب كتير اغلبها بتمارسها الام المصرية عشان كدا بيطلعوا ولادها كدا يعني الغلط من الام

طواحين الهوا
برافو عليها الاولانية بجد مش عشان عاشت كتير بس عشان استمتعت بحياتها وماكانتش نهايتها موتها عشان ولا حاجة !

مش بس ليس كل ما يلمع ذهبا
دا كل ما يلمع هوفي الغالب ولا حاجة وكل اللي بيلمعش في الغالب حاجة
لان اللي حاجة لا يعنيه يلمع نفسه عشان يبرق وبيعيش جندي مجهول كتير
واللي ولا حاجة همه الاساسي يلمع نفسه فبيبقى بيبرق بس في الواقع هو ماعملش حاجة غير انه يلمع نفسه

Yasmine يقول...

بسنت

هى تقريبا من باب انا اكذب ولا اعرف كيف اتجمل

ما هى الفكرة ان الواحد بيبتدى يشك فى نفسه لما يلاقى ان دا بقى الطبيعى!!

طيب و هى الامراض النفسية دى هتخف امتى و ازاى اصلها فى الاول و فى الاخر بتطلع على المسكينة اللى بترتبط بالمسكين دا!

التاريخ بيعيد نفسه بشكل مرعب..لولا انى عارفة ان نزار مات سنة 1998 كنت قلت انه شايف اللى بيحصل انهاردة

نورتينى على فكرة :)

Yasmine يقول...

ريم

و انا هستنى رغيك فى اى وقت بس بجد ما تغيبيش كدا تانى :)

كويس انها ضحكتك..

لا هو مش خوف من التغيير هو رمى الفشل على اى شماعة غير انه فاشل

تصدقى عندك حق :D

انا اعرف واحدة كانت مخطوبة لواحد ما كانش بيخرجها غير فى الاماكن اللى ماما بتحبها :D

والله يا ريم الواحد ساعات بيخاف من انه يكون من اللى بيمثلوا الدور التانى دا

لا لا لا انا عايزة اعرف التشبيه التانى ماليش دعوة :D

Yasmine يقول...

لون الشمس

و عليكم السلام و رحمة الله و بركاته

لا يا حبيبتى انا اللى بيغظونى اللى بيستظرفوا مش اللى غاويين يضحكوا..حد لاقى اساسا ناس من اللى بتضحك على طول دول :)

لا ماتقوليش على نفسك فاشلة ابدا..مال الفشل و مال الانجليزى بس :)
انا اترجملك يا ستى..هى بتقول انها راحت تدرس فى الجامعة عشان كان نفسها تعمل تغيير..لكن بالنسبة لناس معينة التغيير مرادف للكذب على نفسهم

انتى اللى وحشتينى والله..

اهو الشرح جالنا احنا الاتنين فى التعليق اللى تحت :)

هستناكى تانى :)

Yasmine يقول...

محاسن صابر

والله انا مش بحسبها كدا بالظبط..هم ربنا يزيدهم و يباركلهم فى فلوسهم لو كانت حلال..هى الفكرة بس لما تلاقى نفس الناس اللى واخدة قروض و مش عارفة تسددها هى اللى بتكلف بيوتها ملايين..بجد مافهمتش ايه التناقض الغريب دا..والاغرب انه كان على عينك يا تاجر!

Yasmine يقول...

لا تشتاق

متشكرة جدا بجد..شرحك هايل حقيقي

Yasmine يقول...

فنفونتى

حلوة تلحق ما يمكن الحاقه دى بس هو الوضع كان معكوس الحقيقة..مش قلتلك احنا فى حاجات كتير نقصانا :D

لا انا كنت علمى علوم يختى..يادى الفضايح :D
بس كنت و مازلت ضايعة فى الفيزيا الحقيقة

على فكرة العقد دى زادت عن حدها لدرجة مرعبة..لدرجة انى بقيت بحس انك لما تلاقى واحد طبيعى فى علاقته بامه تبقى عايزة تقوليله لعل المانع خير

تفتكرى كدا؟

عجبتنى اوى حكاية اللى ما بيلمعش هو اللى بتبىق له قيمة..بس تصدقى ساعات الواحد بياخد باله من الحاجات دى متاخر شويتين