الأربعاء، 30 أبريل 2008

50 سنة حب!!

سألتها:50 سنة مش كتير ده؟ ردت:مروا عليا كأنهم 5 سنين محستش للحظة انى ندمانة و عمرى ما فكرت اتراجع ده انا حتى مش فاكرة حياتى قبل ما اعرفه كانت عاملة ازاى ولا فكرة كنت بقضى وقتى ازاى او مع مين قلتلها:طيب و الملل؟ مزهقتيش قالت:ملل؟ انتى بتقولى ايه ييجى منين الملل لما كل يوم تكتشفى حاجة جديدة حاجة مكنتيش تعرفيها عن حب عمرك تعرفيه اكتر و تقربى منه اكتر بكل تفاصيله يوم عرفت انه بيصحى بمزاج مش رايق اوى و ميرتحش الا لما يشرب القهوة على صوت ام كلثوم فى اغنية رق الحبيب و عرفت انه بيحب يتفرج على ماتشات الكوة من غير ما حد يكلمه و انه ميحبش كلمة"مالك؟"السؤال ده بيجننه ...لما يلاقى نفسه قادر يتكلم بييجى يحكيلى لوحده حاجات صغيرة بس بتفرق كتير لعلمك و عودت نفسي اعملها عشان هو كمان بيهتم انه يعمل الحاجات اللى بحبها و عرفت كمان ان دموعه غالية اوى عنده و صعب تبان قدام اى حد و بالرغم من كده مقدرش يخبيها لما عرف انى حامل فابنه و ان حلم عمره اخيرا هيتحقق و كان بيبصلى و انا حامل و يقولى انتى احلى ست فى الدنيا حتى فى الشهر التاسع لما مكنتش بعرف اعدى من الباب و يوم اعرف انه مشاعره مكتومة جواه مش بيبنها غير بحساب بس لما يحب يقولى انى غالية عنده بيبقى بالفعل و ده عندى احلى من الكلام اللى كل الناس بتقوله و عرفت كمان انى مش بضحك من قلبى غير معاه و متسألينيش بيعمل ايه عشان يضحكنى و يخلينى احس بالفرحة دى كلها بكلمة او حركة بسيطة عشان انا بجد مش عارفة و مرة اعرف ان الراجل اللى طلته ليها هيبة و كلامه موزون و عاقل و مقنع لاى حد... جواه طفل... ايوة بجد هو طفل كبير بفرح اوى لما احس انه بيحتاجنى و بيحتاج نصيحتى حتى لو مقليش بشكل مباشر بس انا ببقى عارفة العشرة بقى...و ابتسمت ابتسامة اللى بيفتكر ذكرى حلوة و غمضت عينيها للحظة و قالتلى:ازاى ممكن احس بالملل بعد كل اللى قلتهولك ده؟ قلتلها عايزة تفهمينى انك فضلتى بالسعادة دى 50 سنة؟ عمره ما زعلك؟ اكيد زعلنى بس كان بيعرف ازاى يصالحنى و ينسينى عمره ما اتعصب عليكى؟ يوووه كتير بس نظرته ليا لما بيهدى و ندمه على انه زعلنى دول عندى بالدنيا عمره ما منعك من حاجة بتحبيها؟ عمره ما سفه رأيك قدام الناس؟ عمره ما اتخانق و عمل مشكلة على حاجات صغيرة متستاهلش؟ فكرت شوية و قالتلى:تصدقى مش فاكرة بصتلها باستنكار و كان باين عليا انى مش مقتنعة فهمت لوحدها نظرتى و قالتلى:ايه شكلك مش مصدقانى؟ انا هشرحلك... تعرفى لما تلاقى اللى تأمنيه على نفسك و عمرك و قبلهم قلبك لما تحسي بالامان و انتى فى بيته لما تشيلى ولاده و تشوفيهم و هم بيكبروا قدامك و هم مبهورين بابوهم و بحنيته و قوة شخصيته لما تبنى بيت من اوله لاخره...كأنك بتبنى تاريخ قصة انتى بطلتها و مؤلفتها و عارفة كل تفاصيلها لما تبصى فى الصور اللى بتحبيها و تفتكرى الايام الحلوة اللى مرت عليكى و تبقى مش محتاجة تحكيله عنها لانها كلها مرتبطة بوجوده فى حياتك و عاشها معاكى كلها عشان كده هواكتر حد هيعرفك فى الدنيا لأنه عرفك من ساعة ما اتولدتى...اصلى بحسب عمرى من ساعة ما قابلته بعد ده كله عمرك ما هتفتكرى غير الحاجات الحلوة اللى عشتيها استحالة تفتكرى المشاكل و الخناقات دى كلها هيافات متسواش لحظة حلوة تعيشيها مع حد بتحبيه حد اختارتى بكامل ارادتك انك تكملى معاه الباقى من عمرك اصل الحب مش بوكيه ورد ولا خروجة حلوة ولا حتى كلمة "بحبك"عمال على بطال الحب انك تبنى حياة كاملة و تعرفى تحافظى عليها و تحبيها بحلوها مرها مهو محدش قال ان الموضوع سهل لكن لما تنجحى فيه اعرفى انك ...بتحبى عرفتى ليه احنا دلوقتى بنحتفل بخمسين سنة...خمسين سنة جواز دى واحدة من لحظاتى الرومانسية النادرة الحدوث و هو ده الحب زى ما انا شايفاه و بما انى عارفة انه مش موجود فأنا مش بدور عليه دى بس مجرد لحظات بحس فيها باحتياجى لشوية رومانسية فى حياتى حتى لو انا عارفة انها مش موجودة فى الواقع

هناك تعليقان (2):

غير معرف يقول...

اسمحيلي ارد فالموضوع دا
اكيد اي حد حيقول خمسين سنه حب دا مش معقول فزمن الي احنا بنعيشو ومتغيراتو

بس انا عندي نموزج حقيقي وعايش قدامي

جدي عندو تسعين سنه وجدتي اقل منو بسنه -يارب يطول فعمرهم ويحفظهم-

وموضوعك خلاني اعد كام بقالهم متجوزين

لقيت بقى ان بقالهم 75 سنه جواز
الاجمل بقى ان جدي بيحب حدتي بشكل غريب وهيا كمان
لحد دلوقتي مبيعرفش يستغنى عنها يوم واحد
من وانا صغيره كنت بقعد كتير اتفرج هو بيعاملها ازاي
كنت دايما بحس ان راجل دا عندو مشاعر جميله ناحية الست دي
اما كبرت وبقيت افهم احسن اكتشفت ان عمري ما شوفت حب واخلاص بالشكل دا
كانت اول واخر امراه فحياته
اول واخر حب فحياته
اول واخر زوجه فحياته
اول واخر من شاركته فرايت اولاد احفادهم
اما هيا فلم اتصور ان المراه ممكن ان تكون في ذلك الاخلاص والحب ايضا
تسهر على راحته بشكل استغربه
لا تستطيع ان تتركه يوما لوحده
الي لاحظتو من طفولتي انهم قليل اوي عشان يتنقرو فبعض
وحتى لما بيحصل دا فبيكون شكلهم جميله بصراحه انا بفضل اضحك
واوقات بستغرب انهم قدرو يعيشو سوا كل العمر دا وبالشكل دا
مع ان جدتي سريعة العصبيه بس جدي عندو صبر غريب وهدوء اكبر ومكبر دماغو بشكل مش عرفه اقول عنو ايه
نفسي الاقي الوصفه الي قدرو يعيشو بيها كل دا حقيقي
مش لقيه كلام اوصفو بجد عنهم بس اتمنى اني احضى فيوم بنفس الشيء
وبتمنى ان ربنا يطول فعمرهم ويشوفوني اتخرج عن قريب
اكيد في ناس كمان كدا طبعا قليلين بس يمكن الحياه تبقى قدامنا حلوه ونحضى بنفس الشيء

سوري ان كلامي كان مطول بس يمكن الحب الي بشوفو حوليا يخليني انبهر واحكي عنو لانو قليل اوي

missAlgiers

Yasmine يقول...

انا كمان جدى و جدتى عاشوا احلى قصة حب شفتها فى حياتىبس اللى اقصده ان دلوقتى مبقاش فى الحاجة القوية اللى بتربط اى اتنين بيحبوا بعض
مع اول مشكلة القصة بتخلص...يمكن عشان النماذج اللى انا شايفاها حوليا تقريبا كلهم كده فاتعقدت:))
حاسة ان الناس بتستسهل انهم يطلعوا من علاقة الحب دى عن انهم يحاولوا يصلحوها و ده ام دل على حاجة فهو بيدل على انه من الاول ما كانش في الرابط القوى اللى يخليهم يتمسكوا ببعض
زمان الموضوع كان مختلف تماما مش عارفة ليه

ردك مش طويل ولا حاجة بالعكس ده اسعدنى جدا بحب اسمع عن الناس اللى حبوا بجد و عرفوا يخلوا حبهم يصمد

و ربنا يخليلك جدك و جدتك و يشوفوكى بتتخرجى و بتتجوزى كمان
و عن قصة حب زى قصتهم:)