الثلاثاء، 11 نوفمبر 2008

حبيبتى انا..

جسم صغنن طوله شبر و نص ايدين فى حجم اللعبة بتتحرك فى كل الاتجاهات عينين بتلمع بذكاء غريب و فضول اغرب بق صغير و سنان بلون اللولى و وش كله على بعضه قد الكف.. بحبك و انتى عاملة فيها مؤدبة
و يتغنى بالانجليزى زى ولاد الناس المحترمين و بحبك و انتى بنص لسان و لماضتك مالهاش حدود بحبك و انتى غلبانة و عايزة اهتمام 24 ساعة فى اليوم و بحب تريقتك عليا
"عشان كاندى عروسة اصلا و ماينفعش تسرق الغطا" و كان ناقص فى اخر الجملة كلمة يا هبلة عشان تبقى كملت غريب اوى ان كائن مش باين من الارض يغيرنى انتى غيرتينى بجد.. طلعتى منى حاجات ما كنتش اعرف اساسا انها موجودة بحس انى مسؤولة عنك..
عايزة اربيكى كويس..عايزة اعلمك كل اللى عرفته بخاف عليكى زى ما تكونى بتاعتى انا لوحدى..
مش عايزاكى تغلطى على فكرة امومتى دى عمرها ما طلعت على حد..
اول مرة اعرف انها موجودة اصلا حتى الاسم اللى ما كنتش بحبه
ما بقيتش بحب اسمع غيره بس عشان انتى بتقوليهولى.. جت جنبى و حضنتى لأول مرة جامد كده باستنى بوسة سريعة عشان تكمل الفيلم اللى بتحبه حطت راسها على كتفى و ايدها على رقبتى
و عينيها لسه متابعة الكارتون اه لو تعرف كام الف فكرة كانوا دايرين فى مخى
و هى سرحانة فى دنيتها الصغنونة من حنين لطفلة عاشت جوايا و مش راضية تمشى
لحد ما بلغت من العمر ارذله حنين بيخليها تنتصر فى الاخر
على الشخصية الكئيبة اللى هى انا برضه و تصاب بتخلف مزمن
كل ما تشوف هذا الكائن اللى مش باين من الارض لشوق ما يتوصفش لكائن مماثل للى انا شايفاه قدامى..
بس يكون بتاعى لوحدى لفرحة ملهاش اول من اخر انها مرتاحة و هى معايا.. اصل دول بالذات مش بيعرفوا يكذبوا ولا ينافقوا عالمهم ابيض..نقى..نضيف..
لا فيه تمثيل ولا كذب و لا مصالح مامتك عايزاكى تطلعى زيي..
و بينى و بينك كلامها ده بيرضى غرورى جدا بس انا عايزاكى تبقى احسن منى..مش بنتى؟! فقت من الحلم الرومانسي اللى كنت معيشة نفسي فيه
على صوت مش عارفة جابته منين مش هتشغليلي اغنية رجب بقى؟ اول مرة اشوف طفلة بتنام على اغانى هيفا:D كل سنة و انتى طيبة يا احلى بنوتة فى الدنيا ربنا يحميكى يا بنوتى

هناك 15 تعليقًا:

RoMeTa يقول...

بجد كلامك حركنى وخلانى اتمنى يجيلى احساس الأمومه اوى
احساس رائع اسمى احساس فى الحياه
بمووووت فى براءه الاطفال
ربنا يخليهالك يااارب
وتشوفيها احسن انسانه فى المجال الى هى تختاره:)

... amr يقول...

هههههههههه هيفا :))))) ..... ربنا يخليهالك و تشوفيها احلى و اجمل بنت في الدنيا :))) ....

هو انا ينفع ابعت لها بوسة ... :))


ربنا يحميها من كل شر

Yasmine يقول...

rometa
amr

منورين البلوج بجد و عقبال ولادكم :)

بس دى مش بنتى انا على فكرة..هى زى بنتى بس :)

RoMeTa يقول...

منا عارفه يا سمسم
ربنا يخليهالك برده D:

Fatma يقول...

شبهك يا فلة ( وش مبرق)

والله شبهك

مين دي يا بنت اعترفي :)

يا رووووووووحي انا عليها مش طبيعية ربنا يحميها ويبارك فيها يا رب

ماقولتيش اسمها ايه

Yasmine يقول...

Rometa
هههههههه..مانا قلت اوضح بس لما لقيتنى اتدبست و بقيت ام و انا قاعدة كده
ربنا يخليكى يا رب
هو انتى هناك فى ايجي فيلم صح ولا انا بخرف؟ :D

Yasmine يقول...

فنونتى هو انا ازاى ما كلمتكيش عنها قبل كده؟..غريبة اوى دى
هى فى الصورة دى بس شبهى اوى و انا صغيرة بس لما كبرت شوية شكلها اتغير و بقيت انا احلى اكيد :D
دى زنزونة بنت خالى لازم اوريهالك فى مرة مش باينة من الارض و لسانها اطول منها اساسا :D

ReEm يقول...

ربنا يسلمها من كل شر

كل سنة وهي طيبة و العمر كله يارب

و تشوفوها من احسن الناس و تكبر وتبقى

احلى عروسة و عقبال ما يجي اللي

يستاهل و نشوفك ماما لبنوتة حلوةانتي كمان

Yasmine يقول...

ربنا يخليكى يا ريم يا رب و يرزقك ببنوتة رقيقة زيك كده :)
انا بقى اكتفيت بامومتى ليها حلو اوى كده على الاقل ضامنة انها لما تزهقنى امها موجودة تشيل..رومانسية اوى انا :))

The Seagull يقول...

ربنـا يخليهالك :D

بس تعرفي بقى أنـا مش بحب البنـات الأطفـال أبـدًا .. بحب الأولاد أكتــر :D

mUsLiM يقول...

ايه القمــر ده :)


الخد فى نعومة السماء ... وشفاهها دقيقة الخباء

والعين أجمل ما يكون ... برمش فى رقة الصفاء

والصوت عندليب يحكى ... كأحلى صوت من حداء

عصفورة فى طيرها تغرّد ... كل الأشجار كالسواء


ربنا يحميها ويبارك فيها يارب

السلام عليكم

RoMeTa يقول...

ايوه يا قمر انا الى فى ايجى فيلم
اكيـــد اكتشفتى من سمسم D:

Yasmine يقول...

the seagull
ربنا يخليكى يا يويو يا رب:)
بس ازاى مش بتحبى البنات و يتحبى الصبيان؟!!
ده انا بينى و بينهم عداء غريب خصوصا اول ما يكملوا 6 سنين بيبقوا عايزين يتضربوا اساسا :D

Yasmine يقول...

مصعب
ايه الفن ده :)
على فكرة انت لو ما عملتش ديوان احنا هنلم من بعض و نعملك واحد غصب و اقتدار :)
حرام بجد الموهبة دى ما تطلعش للناس

ربنا يكرمك يا مصعب يا رب
بس لو سمعت صوتها هتتخض على فكرة..لا تمت للرقة بصلة..مش فاهمة ليه ما طلعتش لبنت عمتها :D

Yasmine يقول...

rometa
اه من سمسم و من اسمك :D
منورة البلوج بجد :)