الأربعاء، 19 نوفمبر 2008

تأملات..

اميرة و فرح كان عندهم فراغ عاطفى كانوا بيتسلوا بالتيفونات..و النمرة اللى بتشبك..بيشبكوا معاها اميرة و فرح "بنات ناس"..بتنطبق عليهم كل الصفات بتاعت التصنيف ده شريف بيحبها..او هو بيقول كده ما عندوش اى طموح فى الحياة هو مسميه رضا بس هو فى عرف كل الناس استسهال و نقص رجولة هى اقوى منه بمراحل و مش حاسة معاه باى نوع من انواع الاحتواء دايما بتقول انها مش بتعمله اى اعتبار شريف جاله اكتر من فرصة شغل بره البلد
و هو رفضهم عشان ما يبعدش عن امه
اصعب حاجة على البنت القوية انها تحب واحد اضعف منها جيلان و سماح مفيش حاجة ما عملوهاش فى حياتهم جيلان كان عندها شخصيتين متناقضتين و كل واحدة فيهم لها عالم خاص بيها من اول اللبس لحد الصحاب سماح اتحجبت 3 ايام و جيلان اتحجبت بعد وفاة امها دلوقتى بتوعظ الناس عشان يكفروا عن "ذنوب" هى بس اللى شايفاها احمد كان مرتبط بيها عشان تصرف عليه عقده عشان الفرق الشاسع بينها و بينه كانت بتبان فى كل المواقف كان عايز واحدة بنت ناس..محترمة..شكلها حلو عشان الخروجات و المظهر الاجتماعى بره البيت..هو هيعرف 100 واحدة..
بس هو مش شايف فى ده اى مشاكل حنان شخصية حقودة لدرجة مرعبة كمية السواد اللى جواها تكفى بلد بحالها حنان نجحت فى انها تطفش كل اللى كانوا فى حياتها الغريبة انها مش حاسة ان فيها حاجة غلط! مصطفى فضل يتفرج عليها 3 سنين من بعيد عجبه شكلها فقرر يحبها تخيل انه بمجرد ما يبين اعجابه الطفولى بيها هيلاقى تجاوب مصطفى اهانها جدا بسطحيته..و لسه شايف نفسه ضحية لغرورها سلمى ما كانتش بترتبط غير براجل فى سن ابوها و متجوز بتلاقى سعادة غريبة فى تخريب بيوت الناس سلمى جالها سرطان و ما لقيتش حد يقف جنبها غير شخصين حاليا مافيش فى حياتها غيرهم .. هم و قطة تعتبر الكائن الوحيد اللى استحمل الحياة معاها مها عدت التلاتين و ما اتجوزتش مقارنتها بصحابها وجعتها اوى قررت تحب واحد اصغر منها و اقل منها فى كل حاجة.. بس عشان يكون للحب مكان فى حياتها ياسمين كانت دايما شايفة انها اقل من صحباتها كل ده عشان شغل ابوها ما كانش مناسب للمجتمع اللى هى عايزة تعيش فيه ياسمين ادعت انها مريضة بالسرطان عشان تستدر عطف اللى حواليها و كل اسبوع بتعيش فى فيلم مختلف..و بتصدقه عمر و سلمى راحوا هناك..ارتاحوا
Life is too complicated for me ==============
الموضوع مسروق من عند founoon

هناك 17 تعليقًا:

mohamed ghalia يقول...

حلو قوى الموضوع مسروق
بس هو بيعبر عن حالتا موجودة فى الواقع
دمتى بكل الود

blue-wave يقول...

هوا مين راح فين؟؟؟
ومصطفى ومراته ماجوش؟؟؟؟
طيب وعبد العال لسه متخانق مع حماته ولا رضى ان بنته تروح المصيف تجيب الجرايد والفول؟؟؟؟؟

ReEm يقول...

اهي حالات من سخافات الحياة و اللي الاغلب

بنحط نفسنا فيها مش عارفة ليه الناس

ساعات بتحب التقيد و خصوصا في العلاقات

سواء حب او غيره ساعات بيجي هاجس على

الواحد انه يرمي كل الناس على جنب و

يعيش لوحده لكن في الاخر جنة من غير ناس

ما تنداس

بنحتاج للناس و يمكن اللخظبة دي هي

اللي بتدي الحياة الواقعية و الروح


بصي انا مش هرجع اقرا الرد محاسة انه كله لخبطة و مش عارفة اذا الفكرة اللي جوايا عرفت اوصلها و لا لا اصلي في مود وحش بعيد عنك المهم
الموضوع مسروق او لا حلو و واقعي جدا

و اكيد فنون قلبها ابيض و مسامحة

romansy يقول...

مهما كان الموضوع مسروق


دى حال الدنيا
ناس فرحانه وناس زعلانه
وناس شايفه انها صح
وناس مش عاوزه تغلط

هى دى الدنيا

Yasmine يقول...

mohamed ghalia
اه حقوق الطبع و التوزيع عند فنون..
لقيته معبر اوى عن حالتى اليومين دول فقلت الطشه و اكتبه بطريقتى..بس من غير اسماء مستعارة :)

Yasmine يقول...

انت تسأل و الكومبيوتر يجيب
البروفايل بتاعك blocked عندى على فكرة

Yasmine يقول...

دكتور عمرو
ردك حسسنى انى كان لازم اسمى الموضوع تخاريف :D

Yasmine يقول...

ريم
اكيد كلامك مش هيكون ملخبط اكتر من كلامى
انتى فهمتى بالظبط اللى انا عايزة اقوله
كنت لسه بقول لفنون من كام يوم ان فكرة الانسحاب من الدنيا و اللى فيها مسيطرة عليا بشدة..بس مش عارفة الواحد لما يحب ينعزل عن الناس يروح فين؟!
اللى بسمعه بقى مرعب بالنسبالى بجد
و سلامتك من المود الوحش..كنت هقولك لازم تطلعى نفسك منه باى طريقة بس لقيتنى مش عارفة اطلع نفسى
ربنا يخفف عننا كلنا يا رب

Yasmine يقول...

romansy
اهلا بيك اولا :)
و على رايك هى كده..بس الفكرة فى انك تعرف تتأقلم معاها و مع اللى فيها

dr.lecter يقول...

الاعتراف بالحق فضيله هههههههه

والله انتم جايبين مواقف لناس اعرفهم فعلا ربنا يهديهم ويريح بالهم

... amr يقول...

المهم ان ولاد ال(حلال) فركشوا جوازة خالد و مها

Yasmine يقول...

يا لهوى..مش انا والله
كان لازم اغير اسمها..فاتتنى دى
هو انا مجنونة اه بس مش للدرجة دى يعنى :D

Yasmine يقول...

هم فركشوها اه و كان عندهم حق..بس مين خالد ده :D

... amr يقول...

اللي كان هيخطب مها !!!

باينة اوي يعني

dr.lecter يقول...

هههههههه لا والله مش قصدي خالص ده انا اقصد حاجه تانيه انت دماغك راحت لبعيد يافله ههههههه

Yasmine يقول...

تصدق ما كنتش واخدة بالى منها دى:D

Yasmine يقول...

هههههههههه طيب كويس انا قلت اوضح بس منعا للخبطة :D