الخميس، 13 نوفمبر 2008

YES WE CAN ان تحلم-فى رأيي-هو فرض عين فريدة الشوباشى ======================= فكرة قريتها مش فاكرة فين بتقول انك بتعامل الناس زى ما انت اتربيت مش زى ما هم بيعاملوك بمعنى انك لما تعمل خير لحد او تقف جنب صديق فى محنة ده عشان انت اتربيت على كده و لو ما عملتش كده انت اللى هتحس بغضب او على الاقل بعدم رضا عن نفسك مش عشان هم بيعاملوك كده فانت بتردلهم ده بيتهيألى الفكرة دى مكانها فى دماغ كل اللى بيعتبر نفسه شمعة تحترق من اجل الاخرين و كل اللى بيستنى مقابل لكل اللى بيعمله لغيره و اللى بينطبق على حركات الشهامة بينطبق على الندالة ======== سمعت من شخص متخصص عن نظرية غريبة اوى فى علم النفس النظرية دى بتقول ان المخ بياخد 15 ثانية عشان يكون انطباع اول عن اى شخص و سنة كاملة عشان يتغير الانطباع ده الاول ما فهمتش ايه اللى ممكن يظهرلى فى 15 ثانية بس و بعدين لقيت ان ده بالظبط اللى بيحصل لما بقابل حد جديد ======================= فى حاجة غريبة لاحظتها فى اشارات المرور ساعات العسكرى اللى بيبقى واقف بيحب يريح شوية او يسرح حبتين ممكن الشوية دول يمتدوا لربع او تلت ساعة و الناس اللى واقفة بعربياتها تبقى هتفرقع من الغيظ لكن ما حدش بيتكلم لحد ما واحد يفيض بيه و يقرر يضرب الكلكس بتاعه بشكل مزعج فباقى الناس يقرروا انهم ينضموله كأنهم اتفاجئوا انهم هم كمان زهقوا و عايزين يمشوا ليه بحكى القصة المملة دى؟ عشان اكتشفت اننا شعب بيفتقد للمبادرة سيد من يشتكى و عاملين زى العيل اللى بيقف فى اخر الطابور عشان ياخد الحقنة مستنى دايما اللى يشجعه و يبتدى قبله.. و لو مالقاهوش عمره ما هيتحرك من مكانه ======================= ما بحبش المقارنة عامة لكن كاريكاتير عمرو سليم الاخير كان فى الجول كنا زمان بنبعتلهم اقلام و مدرسين عشان يتعلموا انهاردة جزاء الاحسان بقى 1500 جلدة مش عايزة كلامى يتفهم غلط لكن حقيقى زودوها اوى =======================
"الغباء هو ان تفعل نفس الاشياء
بنفس الطريقة
على فترات متباعدة
و تتوقع نتائج مختلفة"
رشيد محمد رشيد
======================= جارى مسؤول مهم فى وزارة حيوية من حوالى سنة و نص اتهم فى قضايا رشوة و فساد و اسمه تصدر الصفحات الاولى فى كل الجرايد..الحكومية و المعارضة من يومين طلع حكم ببرائته ما شوفتش خبر واحد عن الحكم ده ولا حتى فى صفحة الوفيات ======================= نكتة اليوم بعد فشل الحكومة فى كسب تعاطف الشعب بالمؤتمر الاخير لحزب الوكسة استبدلوا توزيع شنط رمضان بتوزيع اسهم شركات القطاع العام الحمد لله انى كملت 21 سنة بس يا ريت اللى فاهم ده يبقى اسمه ايه يفهمنى ============== فوز احمد فتحى سرور برئاسة مجلس الشعب للسنة ال19 على التوالى و التوازى مش دى النكتة هو فاز ب335 صوت من 337 و فى صوتين باطلين

هناك 23 تعليقًا:

Here i'm يقول...

على فكرة جادعة :D

علشان أنا رديت فى البوست بتاع فيديو أوباما رد طويل و قالى مينفعش :D

Yasmine يقول...

ههههههههههههه عطل فنى :D
اصلى بقالى ساعة احط الفيديو الصور تتشال احط الصور الفيديو يمشى اخر ما زهقت اكتفيت بصورته و خلاص:D
طيب ما تجيبه هنا تانى ما هو اوباما لسه موجود برضه

... amr يقول...

طب ينفع كدة :(((((((((((((((

يعني انا يطلع عين الماما بتاع انا في التعليق على الفيجيون اللي انتي شيلتيةو يقوللي المدونة مقفولة عشان صاحبتها مش طايقاك و مش عارف اية ...

طب والله مانا قاعلكوا فيها بقى :(((

Yasmine يقول...

ههههههههههه انا اسفة والله جدا
ما ينفعش تعمله كوبى تانى طيب؟
ازاى لحقتوا اساسا ده انا حطيته 3 ثوانى و شيلته
مش هحط فيديوهات تانى خلاص :)))

يا دى الاحراج اللى انا فيه :(

... amr يقول...

كوبي !!!!!!!!!! كوبي !!!!!!!!
اصرفها منين دي :(((

انا يتقال لي المدونة مقفولة عشان المكان مش عايز غرباء فية !!!

مكنش العشم :((((

انا زعلان :(((( ... و مش هقبل اي تصالحات ....

Yasmine يقول...

ما هو عشان كنت بحاول احط الكلام تحت الفيديو..هو اكيد العيب مش فى البلوج العيب فى دماغى انا :D
بلاش كوبى ينفع تحط عناوين رئيسية طيب :)
انا اسفة بجد :(

... amr يقول...

لا خلاص ... حصل خير :)) ...

وكمان انا مش بقوللك كدة عشان تعتذري
والله ضايقتيني بالاعتذار دة :(((

اكيد انتي واخدة بالك اني بهرج يعني :(

وكمان العناوين راحت يا ماما .. كلة راح :)) ... بس تعرفي .. بقالي كتير مقريتش مقالة جامدة لفريدة الشوباشي قبل النهاردة :))

Yasmine يقول...

انا فاهمة انك بتهزر :)
انا زعلت على تعبك انت و محمد..اصلى لو كنت مكانكم كنت اتشليت بصراحة :D
و مش بعيد كنت قاطعت بلوجات الناس اللى ما بتعرفش تحط فيديوهات و كلام فى بوست واحد :D

اه حلوة اوى المقالة هى و مقالاتها عن التحرش اللى اتبهدلت بسببها من ناس تافهة كتير..مع انها ناصرية الا انى بتابعها على طول

Sweet Violet يقول...

ياااااااااااه بقالى كتير ماشفتش تحليلك يابنتى

هو انا اللى بقيت مغيبه ؟؟ ولا انتى اللى اتاخرتى ؟؟؟

بس على فكره عجبنى قوى مقوله الغباء

و الاكتر التعامل مع الغير

بس تخيلى انك لما بتتعملى بالخير عشان تربيتك بتقول كده بيتقال عليكى العكس !!!

سيبك انتى بقى

اخبارك ايه ؟؟؟ وحشانى و الله

... amr يقول...

:(( .. تصدقي .. انا والدي فضل يقوللي ماتعاملش الناس و تستنى انهم هايعاملوك زي ما بتعاملهم :(( ... المصيبة بقى اني لاعارف اسمع الكلام .. ولاعارف اعاملهم بلؤم و شر :( .. والله لسة امبارح كنت مع اصدقاء ليا و قلنا جملة واحدة - تعليقا على مشاكل في الشغل و ان صاحبنا ممكن يمشوة من شغلة عشان عايز يمشي صح - احنا اتربينا غلط :((
-----------
علم النفس بقى .... لا تعليق ... :))
-----------

بس هما عاملين اشارات الكترونية و موقفين عساكر برضة ؟؟؟؟ سؤال بسالة و عايز اجابة :(( .. الاقي عندك؟
--------
انا بحترم عمو رشيد ... وحاسس انة عايز يعمل حاجة ... بس فية اللي مكتفة ... احساسي كدة :(
----------------
الله يرحم جارك بقى :))))
------------
والله انا خايف بعد ما يملكوا الشعب اسهم و اصول الشركات ال(خربانة) في البلد ... يقولوا انت كدة من اصحاب الاملاك ... يعني مش عايز مني حاجة .. لاتيجي تقولي دعم ولا بتنجان ... اصل الدعم للي يستحقوة .. وانت من اصحاب الاسهم و الاملاك ... يا ابن المحظوظة !
------------
فتحي سرور ... نكتة بايخة !!!!! .

---------------

طولت عليكي ... اسف على الصداع :(

mohamed ghalia يقول...

مبروك انك هتخدى نصيبك من أصول الدولة
يلا مش حرمينك من حاجة
تحياتى
دمتى بود وفى سعادة
بعدين أمة لا إله إلا الله جاوبت الأسئلة وانتى لسه

ReEm يقول...

تصدقي بحس في بلدهم ممكن يقدرو

لكن في العالم العربي اشك اانا نقدر احنا

نكتفي بالحلم وبس

-------

لسه من شوية حاسة احساس مشابة حسيت

بعتب على اهلي انهم ربوني اعامل الناس

صح بصراحة في وقت ما ينفعش انك تعاملهم

الا زي ما يعملوك بقيت حاسة اني معلقة

لا انا قادرة اعاملهم بالمثل و بتعب اوي

لما هما كمان مش بعاملوني زي ما باعملهم

-------

الانطباع الاول بصي انا مع الجزء الاول

بس الجزء التاني لا بصراحة ممكن في اسبوع

الانطباع يتغير لو حصل موقف او تقرب من

الشخص ده

------

الاستناج بتاع الاشارة ده ممكن تعمميه فعلا

على كل العالم العربي من خليجه لمحيطه

دايما مسنين حد يبدأ و احنا وراه مع

انه حطي في اعتبارك لو حسو العواقب

ممكن تكون وخيمة هيخلو بيه

---------

حق كل واحد يزعل على ابن بلده رغم

بس بصراحة الجلد حكم بيطبق حتى على

السعودي هنا مش بس عشان الدكتور مصري

شخصيا انا شايفة انه المفروض اي دولة

لو المتهم مش من جنسيتها في الوقت الراهن

الاحسن انها تدينه و تبعته لبلده هي

تحاكمه بالحكم المناسب عندهم بدل ما

الحكام عايشة حياتها و الشعوب تدخل في

بعض خلاص كل فرد يتعاقب في بلده

و كفى الله المسلمين شر القتال

---------

اذا كان ده هو الغباء يبقى بصراحة

كلنا في امر ما و وقت ما اغبياء


و ماتحرميناش من مواضيعك الحلوة

dalia يقول...

بنوته مصرية

بيعجبني قفشاتك وتعليقاتك اللي ملهاش دعوى ببعض
سمعت من شخص متخصص عن نظرية غريبة اوى فى علم النفس
النظرية دى بتقول ان المخ بياخد 15 ثانية
عشان يكون انطباع اول عن اى شخص
و سنة كاملة عشان يتغير الانطباع ده
الاول ما فهمتش ايه اللى ممكن يظهرلى فى 15 ثانية بس
و بعدين لقيت ان ده بالظبط اللى بيحصل لما بقابل حد جديد
**************
طبعا الانطباعات الاولى تدوم

الغباء هو ان تفعل نفس الاشياءبنفس الطريقةعلى فترات متباعدةو تتوقع نتائج مختلفة"رشيد محمد
***********
ده منهج حكومتنا المبجلة في تعاملها مع المصريين
تحياتي لكن انت فينك بقالك مده مش بشوفك في مدونتى مستنياكى

Yasmine يقول...

ضد التيار
لا انا اللى اتاخرت :)
اللى اقصده بالجملة دى انك لما تعملى حاجة كويسة لحد عشان ده بيريحك انتى ما تجيش تستنى مقابل المعاملة دى معاملة بالمثل..و العكس صحيح
نورتينى بجد :)

Yasmine يقول...

amr
قصدى من الجملة دى وضحته لضد التيار فوق :)
بس هو احنا ما اتربيناش غلط..اصل فكرة انك تعامل الناس زى ما بيعاملوك دى مش بتدخل دماغى اصلا

لا هو السؤال انها لما بتبقى خضرا يوقفوك و لما تحمر يقولك امشى..
خير بقى:D

حكاية جارى دى اتكررت لدرجة مستفزة..مش فاهمة بجد هى الصحافة اللى بتدور على جنازة و تشبع فيها لطم ولا احنا اللى شعب بيفرح بمصايب الناس عشان يطلع فيها كبته و خلاص

ما هو ده خوف صحفيين كتير و خايفين لا يلغوا او يخفضوا الدعم و خايفيين لا البلد تتباع فى الاخر للناس الكبار و خايفين لا يكون ده تمهيد لجيمى
بس الغريب فى الموضوع ان مافيش صحفى واحد قال انه فاهم الهدف من الليلة دى كلها :D

ما طولتش ولا حاجة على فكرة :)
و البلوج بتاعك مش بيفتح عندى من زمان مش عارفة المشكلة عندى ولا هو اللى تقيل فبيهنج

Yasmine يقول...

mohamed ghalia
كنت مستنية ابقى فى مود يسمح بانى اتكلم عن السعادة :)

Yasmine يقول...

reem
بره اللى عنده حلم و مستعد انه يشتغل عليه ما عندوش غير اوبشن واحد..انه يوصل

ما هو ده اللى انا اقصده..ما تعامليشهمش بالمثل لان ده كمان مش هيريحك و ما تستنيش معاملة شبه معاملتك لانك بتعملى ده عشان انتى اتعلمتى ان ده الصح..مش شرط يكونوا هم كمان اتعلموا كده :)

انا استغربت الفرق الشاسع بين المدتين بصراحة بس الست اكدتلى انها نظرية نفسية

كان مهم اوى عندى انك انتى بالذات تفهمى النقطة دى كده..و صدقينى لو الوضع كان معكوس كان هيبقى عندى نفس الرأى

ده اللى وصلتله برضه..كلامه فى الجول حقيقي

مبسوطة اوى بوجودك يا ريم و بتعليقك..بجد :)

Yasmine يقول...

dalia
ما هى حكومتنا المبجلة بتتميز بغباء نادر الحقيقة
هتلاقينى فورا :)

... amr يقول...

هو لغاية دلوقتي محدش قال انة فاهم اي حاجه من تمليك اصول الدولة للمواطنين..
هتلاقيهم لسة هيبلوروا مشروع القرار و يقلوظوة و يدوة شوية بوية عشان يتلمع .. واعتقد ان اول اناس اللي هتنشرة هتكون الصحف القومية .. طبعا لزوم التلميع و التهليل و الكلام بتاع
في عهدك بقينا اصحاب ملك - الا اذا المصري اليوم عملتها و انفردت بية ...
و اية كل الرغي اللي انا برغية دة ؟؟

www.wa7idmnelnas.blogspot.com
جربي تاني ...

Desert cat يقول...

انا هعلق على موضوع جارك اللى الدنيا كلها عرفت بتهمته ولما اخد برائه مش حد سمع عنه
لاننا للاسف بلد مش بتهتم غير بالفضايح ودائما نطبق نظرية المتهم مدان حتى تثبت برائته وان ثبتت يبقى اكيد هو برضه مدان بس جاب حد شال الليله مكانه
تحياتى
:)

Yasmine يقول...

amr
مش راضية تفتح برضه على فكرة.. مش عارفة فى ايه
بالنسبة للاسهم فدكتور حسن نافعة كاتب مقالة حلوة اوى امبارح فى المصرى اليوم و واضح ان هو كمان مش فاهم زينا :)

Yasmine يقول...

desert cat
اللى يفرس ان الراجل ده عنده بنت..و اسمها اتقال فى الجرايد كلها..و بالرغم من كده ماحدش فكر يردله اعتباره قدامها مع انه حقه يعنى مش فضل من حد

Unknown يقول...

ههههههههههههه

اقولك انا اسمه إيه اسمه استعباط

:)