الغاز الحكومة الالكترونية!

احمد ابو الغيط

وزير خارجية بيدين المجزرة الاسرائيلية "باقوى العبارات"

و يوم ما بيتفشخر بانجاز بيتفشخر بقدرته على افشال قمة الدوحة

بعيدا عن كل ده..

ليه يكون عندنا وزير خارجية بينطق ال"ت" "تشى" ؟!

****

فاروق حوستى افتتح معرضه الجديد دى شوية تعليقات من اللى اتقالت فى التليفزيون من "النخبة المثقفة"المصرية - التجريد ده نوع من انواع التجريد الوجدانى - اللى بيشوف لوحات فاروق حسنى بيشعر بحالة وجدانية عميقة - توزيع اللون لو شوفتيه من بعيد هتعرفى درجات الالوان و الوضوح - المرة دى فى حالة جديدة.. كنت فاكر ان المعرض اللى فات كان اكتر حاجة ممكن الواحد يوصلها بس لما الواحد يشوف اللوحات دى بيفاجأ ان ممكن يكون في الاكتر و يقول الله!! دورت على النت عشان اشوف الفن الراقى ده لقيت دول

تجريدى تجريدى يعنى!!

****

احمد عز من الناس اللى عملالى كلاكيع فى دماغى يعنى تجار الحديد يستوردوا حديد من تركيا عشان يقدروا ينافسوا بالاسعار يقرر الاخ يقدم شكوى ولا استجواب ولا استفسار فى مجلس الشعب عشان يوقفوا استيراد الحديد او على الاقل يزودوا الجمارك عليه عشان ما يضرش بمصالحه ييجى الحديد فعزو بيه يقرر يخفض السعر و نسمع عن خوف و رعب من الخسارة اللى هتحصل للتجار و بالرغم من التعارض الواضح فى المصالح ده لسه قاعد برضه.. و لسه بيعشى النواب عشان يقولوا موافقة..حد يشرحلى ده اسمه ايه ده؟!

**** على المصيلحى و بعد نجاح وزارة التضامن فى استبدال طوابير العيش بطوابير البوتاجاز رفضوا انضمام العالم مصطفى السيد صاحب اعلى وسام امريكى فى العلوم للاعضاء المؤسسين لاحدى الجمعيات العلمية الاهلية السؤال مش على اساس ايه يرفضوا ولا على اساس ايه السيد الوزير يرد على واحدة مش لاقية تاكل بسؤال عن سبب خلفة العيال الكتير السؤال اللى بيطرح نفسه بشدة:مال وزارة التضامن بالابحاث العلمية؟! **** ابراهيم سليمان مش هو فى حد ذاته اللى مش مفهوم بالنسبالى لكن الفكرة نفسها بتاعت المسؤول اللى طول ما هو بيحكم تتفرشله السجادة الحمرا و اول ما بيطلع من منصبه تتفرشله الملايات كانت فين اتهامات الاختلاس و الرشاوى و الاستيلاءات و استغلال النفوذ و هو لسه وزير؟ **** حبيب العادلى بعيدا عن التعذيب و المرمطة و الظلم و الافترا بتاع الظباط عشان تقريبا دى مادة نجاح و سقوط فى كلية الشرطة هموت و اعرف مين فهمهم ان الشوارع مكتوبة باساميهم؟ يعنى لما سكان شارع كامل يصحوا الصبح ما يلاقوش عربياتهم و لما يسألوا يكون الرد ان دى اوامر سيادة الوزير و لما يحبوا يعرفوا اماكن عربياتهم يتقالهم دوروا عليها هى اكيد مش بعيد مفترض يكون رد فعلهم ايه؟! و لما تكون عربيات الامن المركزى مرشقة على طول الشارع خوفا من المظاهرات مع ان حرب غزة خلصت و الناس هنا طيبين مش هيتظاهروا على اى حاجة تانية عشان اساسا الدنيا وردى و مفيش حاجة تستاهل التظاهر لكن اللى بجد مش مستوعباه هو دولة العسكر اللى احنا عايشين فيها حد يجيبلهم نتيجة عشان يعرفوا اننا فى 2009 و لسه اشارات المرور بتمشى بعكسرى نايم بيهز ايده فى كل الاتجاهات بحيث ما حدش يعرف دى اشارة مين و كله فى سبيل تنظيم الاسرة يهون! **** عبد الله كمال حنجرة الحزب الوطنى و صاحب الجرنال الوحيد اللى بيخسر و مصر اصرار غريب انه يصدر برضه كنوع من انواع التغليس على القراء بعد خطبة الريس فى قمة الكويت وصفها باتاريخية كالعادة الحقيقة انى ما شوفتش الخطبة لكن قريت عن اكتر من صحفى و فهمت انها كانت محترمة بعيدا عن كونها تاريخية ولا جغرافية.. لما تكون خطبة عيد الشرطة و عيد العمال و العيد الكبير و عيد الكحك و عيد الام كلهم بيوصفوا ب"شديدى اللهجة" و ال"التاريخية" بديهى ان الناس تفقد احترامها للى بيكتب و للجهة اللى بيمثلها حتى لو كان كلامه فيه جانب كبير من الصحة بيقولوا كتر السلام يقل المعرفة انا بقول ان كتر النفاق يقل الثقة..فهل يتعظون؟! **** و اخيرا.. بقترح انشاء وزارة لل"تنفيس" يمسكها الاخ احمد مكى و مش محتاجة اقول اسباب..السبب واضح اكيد ****

نقطة و من اول السطر.. لما مقابل الفكر و الرأى يكون اهدار دم اعرف اننا قربنا من نهاية العالم ايه الهطل الرسمى ده!!

وجهى الاخر..

وجهى الاخر.. وجه طفلة فى الخامسة طفلة مستعدة لدفع باقى عمرها مقابل الاجابة على سؤال واحد ما الذى القى بها فى عالم الكبار؟ وجهى الاخر.. يعرف من نقاط الضعف اكثر مما يعرف من نقاط القوة و يعرف من التناقضات اكثر مما يعرف من المتكاملات وجهى الاخر.. يرفض شعار العاقلة دائما الذى الفوه و صدقوه فهو على استعداد تام لان يترك العقل لاصحابه ليدخل فى حالة مستمرة من الجنان الرسمي وجهى الاخر لديه قاموس خاص به فالطبيعة لا تضطهدنى حينما "تدخل حاجة" فى عيونى كلما اردت البكاء و "كويسة" تعنى اننى فى اسوأ حالاتى فوجهى الاخر يعرف ان سكوتى ليس هدوئا انما هو الغضب نفسه وان صوت الموسيقى المرتفع فى غرفتى ليس الا محاولة لاختلاق شعور زائف بالسعادة لعلى اصدقه..و لعلهم ايضا وجهى الاخر.. يدعى التأقلم برغم شعوره العميق بالغربة يدعى الفهم بالرغم من كثرة الالغاز من حوله و يدعى السعادة بالرغم من حالة التبلد التى اصابته منذ فترة ليست بالقصيرة وجهى الاخر.. يرى فى البحر ثلاثة صفات تمنى ان تكون فيه و صفة واحدة جمعت بينهما فالعمق و النقاء و الوضوح سمات تمناها كثيرا و الثورة وقت الغضب هى العامل الوحيد المشترك بينهما وجهى الاخر.. كثيرا ما تتشابه ملامحه مع ملامح ازميرالدا غجرية ديزنى الشهيرة فهى جمعت صفتان ولدا فيه قبل ان يعرف طريقه للحياة.. التمرد و عشق الحرية وجهى الاخر.. يسامح لكنه ابدا لا ينسى وجهى الاخر.. الكذب اكثر ما يؤلمه فاهانة الاستهانة به و بعقله لا تعادلها اى اهانة اخرى وجهى الاخر.. يفتقد انسانا واحدا جمع بين نقاء الاطفال و خلق الرجال

وجهى الاخر.. لا زال يؤمن بان بابا نويل سيأتى يوما و معه الهدية التى رغب فيها منذ كان طفلا و بانك لما تنام و تصحى هتلاقى كل حاجة بقت كويسة وبانه راح عند ربنا و راجع تانى..

وجهى الاخر.. يعرف الكثير عن معادن الناس و لكنه يختلق لهم الكثير من المبررات..و يصدقها فالم الصدمة فى المقربين لا يخفف منه الا الادعاء الزائف بانهم "اكيد ما كانوش يقصدوا" وجهى الاخر.. يستمتع كثيرا باشيائه الصغيرة التى لا يعرفها غيره بالرغم من اعتقاد الكثيرين بانه صعب الارضاء وجهى الاخر.. به الكثير من العنف المستتر خلف وجه هادئ كنوع من انواع النفاق الاجتماعى وجهى الاخر.. لديه من الخيال اكثر مما لديه من الواقعية فحلم الطيران لا زال يراوده كلما سنحت له الفرصة بالظهور بالرغم من اقتناعه التام بان الجاذبية الواقعية ستسحبه اجلا او عاجلا الى عالم الواقع الكريه وجهى الاخر.. لا زال يتعجب من سواد قلوب البعض بالرغم من ادعائه الدائم بان "ما بقاش يستغرب" و كثيرا ما يبحث عن هذا السواد داخله "لأنه اكيد موجود" وجهى الاخر.. يدفن غضبه فى الشوكولاتة يدفن يأسه فى كتاب لا حزن و يدفن حزنه فى فيلم the lake house .. فالسعادة تأتى دائما لمن ينتظر..او هكذا يقولون وجهى الاخر.. يضع لافتة "ممنوع الاقتراب او التصوير" امام كل من يحاول ان يعرف عنه اكثر مما يريد هو ان يظهر وجهى الاخر.. يشعر ببعض الحسد على اللذين اختاروا ان تتوقف حياتهم عند سن محدد

يسمونهم "متخلفين" و يسميهم "المرتاحين" فهم ارتاحوا من التفكير الذى ادمنه هو.. حتى اثناء النوم

وجهى الاخر.. لا يحلم باضواء مسرح العرائس بل يحلم بان يكون ضمن اللذين يحركون العرائس فمكانهم الكواليس..لكن دونهم لا قيمة للمسرح وجهى الاخر.. جمع بين الشقراء المتحررة و السمراء المحافظة فالاثنان متلازمتان لا يفترقا..فى الشخصيتين:الظاهرة و الخفية وجهى الاخر يرفض دور الضحية لانه لا يناسبه و يرفض دور القاضى لانه يكره ان ياتى اليوم الذى يحكم فيه الاخرون عليه

وجهى الاخر.. يحب الحياة كثيرا و لا يكره الموت

اخبار..اهرام..جمهورية

ما كنتش ناوية اتكلم فى الموضوع ده تانى

لكن الصورة اللى تحت دى اجبرتنى

يا ريت امير الدولة بتاعت القواعد الامريكية

يكون مبسوط بانجازه العظيم

و التانى بتاع الاسلام هو الحل

و التالت بتاع ندين و نشجب و نرفض باقوى العبارات

و الرابع بتاع سنحارب بالمدنيين و الاطفال

و الخامس بتاع معبر الخيار و الفقوس

و السادس و السابع و التامن اللى ما سمعتش صوتهم لحد دلوقتى

و التاسع بتاع ما دام الحرب مش عندنا يبقى مالناش دعوة بس حاربوا انتوا

و العاشر بتاع مش احنا اللى ضربنا الصاروخين يا بيه

يا ريت يكونوا كلهم فرحانين بالنظام العربى المشرف

بقترح تغيير اسم جامعة الدول العربية

و معاه مجلس الامن بالمرة

لبنسيون شحاتة لصاحبه لا ارى لا اسمع لا اتكلم!

صغيرة و ما بتعرف بلعب الكبار

كانت عم تلعب اخدها النسر و طار

بحرب الكبار شو ذنب الطفولة

بحرب الكبار شو ذنب الضحكات الخجولة

قوليلي... قوليلي.. قوليلي ..

يا صغيرة وين رحتي ..

يا نبته نحيلة .. يا دمعة دخيلي..

قوليلي ياريت فيه صرخ بوجه الكبار ..

اقولهم حاجي يلعبو فينا ..

احرار بدنا نضلنا احرار

"صغيرة و ما بتعرف-فيروز"

******

وبالمناسبة فى صباح اليوم العشرين للقذف،

وصل عدد الضحايا إلى ١٠٣٤ شهيداً،

تذكرت على الفور أن الرقم نفسه

يحمل ضحايا حادث العبارة المنكوبة «السلام ١٠٣٤»..

تخيلوا أن إسرائيل بكل جبروتها

وأسلحتها البرية والبحرية والجوية لمدة ٢٠ يوماً قتلت ١٠٣٤ فلسطينياً، بينما راح العدد نفسه من المصريين فى حادث واحد

خلال ساعات وبسلاح واحد هو الفساد،

لكن الغريب أن هناك من يطالب بمحاكمة القادة الإسرائيليين كمجرمى حرب،

بسبب هذه المجازر وإحالتهم إلى «المحكمة الجنائية الدولية»،

بينما تمت إحالة متهمى العبارة إلى «محكمة جنح»،

ولم يعاقب أى مسؤول مصرى أو يحاسب على هذه الجريمة البشعة..

فسااااد يا مصر!

محمود مسلم-المصرى اليوم

******

بعيدا عن اللى لفت نظر الناس كلها

فى الجريمة بتاعت بيع اطفال السفاح لاسر امريكية

بالنسبة لان الولد كان بيتباع ب14 الف جنيه و البنت ب8 هل ده بيرجع مثلا لان الولد اللى لسه مولود اول امبارح عنده اوبشنز مش نازلة للبنت اللى اتولدت معاه؟

رحمتك يا رب من التخلف و المتخلفين!

******

كتاب بجد يستحق القراية!

******

يوم الخميس قضيت يومى بين ذكرى حلوة لمنى بتاعت العربيات فى بين السرايات و يحيى الشاب المصرى النضيف الطيب اللى مهتم يعلمنى تفاصيل شغل مش بتاعى لمجرد انه يساعدنى و رجب السايس بتاع الشغل اللى بيقابلنى كل يوم بابتسامة لطيفة مع ان الساعة بتبقى 8 الصبح و شكل كوبرى قصر النيل الصبح لما الناس بتبقى ناسياه و بتدور على كوبرى اكتوبر و العسكرى اللى بيعدى الاطفال لمدارسهم ورا بيتنا و الام الصغيرة اللى بتوصل بناتها كل يوم لمدرستهم و عينيها واحدة عليهم لحد ما يوصلوا لباب المدرسة و التانية على ابنها اللى قاعد ورا و اللى لسه ما اتعلمش الكلام و مقالة قديمة لمجدى مهنا عن مصر اللى بيتمناها لقيتنى برد على سؤال سألهولى واحد فرنساوى بيشتغل معانا: "هى مصر امتى بتبقى برد؟" قلتله بثقة: "عمرها ما كانت باردة على فكرة"

******

و بما انى مش لاقية حاجة تانية اكتبها فهترجم الكلمتين اللى على الشمال "لا دواء افضل من الامل ولا حافز اعظم منه ولا شيء اكثر قوة من التوقع بان شيئا افضل سيحدث غدا"

خبر سار..اخيرا

وسط مزيج من نحيب وصراخ أهاليهم وصيحات «يحيا العدل»،

أصدرت محكمة جنايات كفر الشيخ، مساء أمس الأول،

حكماً تاريخياً ضد ١٠ متهمين بالإعدام

لإدانتهم بجريمة خطف سيدة من منزلها واغتصابها فى منطقة زراعية،

وأحالت أوراق القضية إلى مفتى الجمهورية،

كما عاقبت صبياً بالسجن ١٠ سنوات لمشاركته فى الجريمة.

ترجع وقائع القضية إلى ٧ يناير من العام ٢٠٠٦،

وحسب التحريات فإن المتهمين الـ ١١

لمحوا الضحية تقف فى شرفة منزلها بقرية «الحمراوى»،

فصعدوا إليها واقتادوها بالقوة داخل «ميكروباص» إلى منطقة زراعية

وتناوبوا الاعتداء عليها لمدة ٣ ساعات،

وألقت الشرطة القبض عليهم،

ووجهت إليهم النيابة تهم الخطف والاغتصاب تحت تهديد السلاح. (المصر اليوم 10-1-2009)

********

اخيرا خبر يفرح فى وسط اخبار المجزرة الاسرائيلية

انا ما بفهمش فى القانون

بس بيتهيألى ده اللى بيقولوا عليه حكم مشدد

اخيرا شوية احساس بالامان

خصوصا بعد براءة متهم بنى مزار و التقفيل المرعب على القضية

برافو نهى رشدى

و برافو لكل ست ب100 ست عرفت تقول لأ!

مترادفات..

ذكرى نغزة فى قلبى تخبرنى بان هناك شيئ ما غير طبيعى محاولات مستميتة من صديقتى الصغيرة لابعاد هذه الافكار السوداء عن رأسي عودة مبكرة من رحلة شرم الشيخ المدرسية امى تنتظرنى بملابس سوداء و عينان تتحركان فى كل الاتجاهات فى محاولة فاشلة لاخفاء دموع غزيرة نغزة اخرى فى قلبى تخبرنى بالا اصدق سوى احساسي

****

حواديت متعتى فى مراقبة المشاة فى شوارع القاهرة المزدحمة دائما فالكناس ذو البدلة البرتقالية المزعجة و بائعة المناديل على ناصية شارعنا و المجنون الذى يحمل صندوقا ثقيلا فوق ظهره لا يتركه ابدا منذ سكنا فى هذا الحى و العجوز الضعيف الذى كلما رأيته اتأكد باننى قريبا ساعرف خبر موته فيفاجئنى بصمود غريب و تمسك اغرب بالحياة و الفتاة التى تظهر من جسمها اكثر مما تخفى فيخبرنى حدسي بانها "مش ولا بد" فتلتقى عينى بعين صديقتى فنتشارك فى ضحكة طويلة على الحاسة السادسة التى تمتلكها كل انثى كلهم يؤكدون لى بان وراء كل عينان قصة تستحق ان تروى فى فيلم مستقل

**** انكسار

كانت سعيدة..و كان هو اسعد

نظرت الى عينيه مباشرة..

فاقترب استعدادا لكلام كرره بينه و بين نفسه حتى مله

قالت:عندى حاجة اقولهالك

قال:و انا كمان

قالت:انا اتخطبت

قال:و انا (كنت) هخطب

****

موقف كان كبير..و كنت انا صغيرة كان مدرس..و انا كنت تلميذة كان لابس جلابية قديمة..و انا لابسة مريلة جديدة كان بيمشي بعصاية..و انا بمشى على رجلى كان اعمى..و انا كنت بشوف الحمد لله

****

حلم

بحلم بمصر اللى اتغزل فيها جويدة

و ضحوا عشانها بحياتهم فى 73

و حلم ليها جاهين

و غنى لها عبد الحليم

و اتمناها مجدى مهنا

و بكوا عليها فى 67

و اتكلم عنها عادل امام فى يعقوبيان

و طلع منها محفوظ و ام كلثوم و توفيق الحكيم و السادات

و كتب فيها سيد حجاب احلى قصايده

امتى هشوفها كده؟

****

اوراق

تذاكر حفلات الموسيقى العربية

تذكرة طيران للاقصر فى تالتة اعدادى

شهادة تانية ابتدائى بخط مدام حسيبة الله يرحمها

صورة قديمة لينا احنا التلاتة من ايام اعدادى

ايام ما كنا بننكش شعرنا و يجيلنا نفس نتصور

و الادهى اننا كنا بنشوف نفسنا حلوين!

اهداء ليا على اول صفحة من كتاب قديم

اوتوجراف ايام الحادث المؤلم بتاع رابعة ابتدائى

شهادة تقدير من المدرسة

تذكرتين سينما و تذاكر قطر اسكندرية

ورق امتحانات اولى اعدادى اللى بتثبت فشلى الذريع فى الجبر

كارت معايدة او اعتذار..مش فاكرة بالظبط

شهادة البكالوريوس

عقد عمل لمدة سنة

ازاى حياة البنى ادم ممكن تتلخص فى شوية اوراق؟!

****

ناس

لم يكن يعرف طعما للنوم الا و هو فى حالة سكر مستعصية

فاصبح لا يهنأ له بالا الا بعد صلاة العشاء

****

كانت من اشد المدافعين عن حقوق المراة

و الان فقدت روحها فى بيت زوج انانى..مريض

لا يرى فى الكون ما يستحق الاهتمام سواه

****

كان يبكى فوق قبرها اياما متواصلة

دون ان تنجح محاولتهم المستميتة لتهدئته

و بعد اقل من سنتين تزوج من امرأة اجنبية

****

كانت تؤكد انها لن تتزوج الا عن حب

الان مضى على زواجها منه عشرون عاما

امضت نصفهم نائمة على اريكة صغيرة فى غرفة المعيشة

****

حقيقة The closer you get.. the harder she'll push you away

****

قرار

قررت التوقف عن التذمر

عند سماع صوت المنبه الكريه فى السادسة فجرا

و التفرغ للاستمتاع بهدوء الشوارع

و ندى الصباح

و لسعة برودة الصبحيات فى شهر يناير

حلو نص الكوباية المليان

البيضة و لا الفرخة؟!

كان سؤال غبى من ضمن الاسئلة اللى كنا بنسألها زمان اول مرة اعرف ان الاطفال عندهم بعد نظر للدرجة دى اتارى السؤال ده اكتر سؤال فى محله دلوقتى..

نبأ عاجل:اكتشاف بؤرة جديدة تتكون من عدد مليون مطبلاتى او اكتر شوية نشأت البؤرة فى جزر اللالا لاند و ترعرعت على حشائش السافانا تبحث البؤرة عن عمل

يستفيد من مواهبها الخارقة فى الزيطة و الهتافات و ترديد الشعارات فمواهبها الفذة يمكن استخدامها فى المظاهرات

او فى تشجيع المنتخب الوطنى فى الاستاد او حتى اللطم فى العزيان و الجنازات مع وعد بتخفيض مغرى فى حالة الابونيه السنوى و النصف سنوي

اعضاء البؤرة ممكن يتحولوا بقدرة قادر من مولولاتية لمفكرين سياسيين و محللين للاحداث و الوقائع و مجريات الامور كنس..غسل..مكوة..نشر.. تخليل خيار و لفت..كله موجود..فول اوبشن يعنى فالملايين اللى تم اكتشافها بيفهموا كلهم فى السياسة

و كلهم بيمتلكوا قدرات على التنبؤ ولا سحر ولا شعوذة ولا بلورة الالوسى السحرية ولا حتى فتح مندل.. هم عارفين مين المخطئ و مين المقصر و مين اللى هيكسب فى الاخر و مين السبب فى وكسة البعثة المصرية فى بكين 2008 و مكان راندا الشامى و يوسف عبد الرحمن و مقاس جزمة منتظر الزيدى و اسم بواب الكهف اللى قاعد فيه اسامة بن لادن و نتيجة وقوع كوكب عطارد على كوكب زحل فى شمس اغسطس الحارقة و مين اللى فجر البرجين و اسم مقاول السيراميك

اللى كان علاء ولى الدين بيدور عليه فى فيلم الناظر و لاعضاء البؤرة الكرام

قدرة فائقة على استعراض عضلاتهم المنفوخة هوا و مواهبهم العظيمة فى الفرجة على قنوات الاخبار

و متابعة مواقع ماحدش عارفها غيرهم دلوقتى مهمتهم واحدة..اثبات حقيقة تريح بالهم و تهدى سرهم اعضاء البؤرة اثبتوا نجاح ملحوظ مع الناس اللى بيجيلها ارتيكاريا و شلل رعاش مصحوبا بحالة هذيان

لما بيسمعوا اى كلمة فيها حروف "م " او "ص" او " ر" و اللى بيترجموا ده فى اعراض عقدة الاضطهاد مع فقدان ذاكرة مؤقت بينسيهم انهم فى الاصل مولولاتية

ولا يجيدوا من الكلام الا فن الردح و فرش الملايات و حول رسمي بيخليهم يشوفوا فى قاتل المدنيين مناضل و بتوع بلاد مارس محاربين و امير قناة الحقيرة صوت الامة و عم دهب ابو فلوس كتير و كلام قليل ممكن يعملوا منه بطل قومى مع انه ما دفعش غير 3 مليم و قرشين صاغ.. و لما سألوه انت شاركت بايه فى الجنازة قال انا اللى جبت الوردة البنفسجى اللى على الباب دى فبيسيبوا جنازة القتيل و يقفوا يتفرجوا و يمارسوا هوايتهم فى اللطم على الميت حتى لو كانوا ما يعرفوهوش مع ان حبيتين مهدى و العد من واحد لعشرة و بق مية ساقعة كل ما تيجى الكلمة اللى بتتعبهم

كانوا هيعملوا نفس المفعول المشكلة ان كتاب الشيخ مبروك

اللى حفظهم الكلمتين اللى مش عارفين غيرهم نسي يشرحلهم ازاى يقولوهم فعملوا زى التلميذ الخايب الحافظ مش فاهم و بدل ما يدعوا للفقيد بالرحمة..وقفوا يقللوا من اللى اهل القتيل عملوه.. مع انهم من اول الجنازة نايمين

ولا اللى ضارب عربيتين فول من عند التابعى يا دوب بيصحوا فى الفواصل الاعلانية

يمسحوا السبورة عملا بنظرية شيلوه من فوقى لاضربه و لو سألتهم انتوا كنتوا فين..

هيقولولك احنا كنا فى الحمام ساعتها بنحاول نجيب التايهة.. الا صحيح هى البيضة قبل الفرخة ولا الفرخة قبل البيضة؟ و صدق اللى قال..اللى ما يعرفش يقول عدس! ********** نقطة و من اول السطر قلبى واجعنى على اطفال غزة مجرد الصحيان الصبح على واقع مش بيتغير بقى مجهود غير محتمل

The new year's hallucinations

ابرك مقالة اتكتبت عن موضوع غزة هى مقالة ل محمد سلماوى مع الاسف.. لكن فى رايي لخصت الوضع كله هم بيروجوا لقضيتهم بذكاء واضح و احنا بنلطم و بنشجب و ندين و بنتهم بعض..استمروا

*****

لما تحلم بحاجة و يجيلك الاحسن منها فتسيبها بارادتك لانك عارف ان اللى جالك احسن و بعدين تتقهر و تبقى هتولع فى نفسك لما تلاقيها راحت لحد تانى مش عشان هى راحت لانك انت اللى سبتها بارادتك لكن عشان اللى خدها حد انت مش بتحبه فاعرف انك انسان مريض و معقد!

*****

كنت فى سيلانترو مع واحدة صاحبتى..

الساعة كانت 9 تقريبا

اذ بينا نفاجأ ب 6 اطفال الكبير فيهم ما يكملش 13 سنة

كانوا 3 بنات و 3 ولاد كل واحد عازم البنت اللى مصاحبها

بعيدا عن حالة الذهول اللى كنا فيها

بمقارنة صغننة بينهم و بيننا و احنا فى السن ده

ايام ما كان اقصى طموحنا خروجة للنادى مع حد كبير

و لو جابولنا مصاصة من سويت واى يبقى يوم الهنا..

و اخرنا لما نتأخر نروح الساعة 7 بالليل

اكتشفنا اننا ما كناش اطفال..خالص يعنى

*****

سؤال بيطرح نفسه هم الاخوة اللى على الشمال دول كانوا فين من الزفة بتاعت غزة و اتهام مصر بالتواطؤ و صويت نصر الله و نجاد الا ما سمعنالهم زغروطة حتى فى وسط الحوسة دى واضح ان فى ناس مش فالحة غير فى المزايدة و استعراض عضلات مش موجودة اساسا عارفة ان مش وقته دلوقتى بس كان لازم اقول الكلمتين دول قبل ما اموت!

*****

امبارح محمد كمال امين التثقيف و البلالايكا فى الحزن الوطنى كان بيقول ان مجرد اعتراف الحكومة بان فى فقر فى مصر دى خطوة ايجابية جدا و نص الطريق للعلاج يا خسارة ال3 ساعات اللى ضيعتهم من عمرى عشان احضرلك محاضرتين فى الكلية ايه يا ابنى اللى انت بتقوله ده!!!

*****

Don't sweet talk me!

فى مدح بيحمل الواحد مسؤوليات زيادة عن اللزوم و بيخلى مجرد محاولة الرد بالكلام مجهود رهييييب مش عايزة اسمع كلام حلو من اى حد.. سواء كان يقصده او ما يقصدوش

*****

اكتشفت ان هبل الستات اللى لسه بيخطبوا لاولادهم اى واحدة معدية عشان شكلها عاجبهم مش بيختلف كتير عن غباء الرجالة اللى بيصورلهم انهم يقدروا يوصلوا لاى واحدة عجباهم بالتسبيل و النفاق رحمتك يا رب من المسبلين و المنافقين و الستات الهبلة!!

*****

نكتة اليوم

9 من كل 13 سواق نقل بيسوقوا تحت تأثير المخدر اتاريهم بيسموه High way يا دماغتكم العالية يعنى!

++++ "توتر العلاقات "بين القاهرة و حلوان بسبب المقابر و خفوت حدة التوتر بعد اقتراح "التهدئة" من محافظ حلوان

بجد لا تعليق!

++++ المصيلحى بيقولكم عام 2009 هو عام "شد الحزام" بس سيادة الوزير ما حددش يشدوا الحزام على ايه بالظبط على البطون ولا على الرقاب عشان تفرق!

++++ اتارى الواحد كان مش عارف المصريين بيجيبوا النكت منين تصريحات المسؤولين و مانشيتات الجرايد مادة هايلة للمسخرة الحقيقة!

***** صدق اللى قال بيقطع من حتة و يوصل من حتة بس ما كنتش اتخيل انه هيكون بالسرعة دى

الحمد لله

*****

بمناسبة موضوع الاطفال: "اجيب عيال ازاى للدنيا و انا كل ما امسك جرنال الاقى العرب بيتضربوا بالجزم؟" احمد عيد-ليلة سقوط بغداد

*****

ملحوظة:

للتبرع لحساب مستشفى وادى النيل 25015 فى بنك بيريوس المستشفى مسؤولة عن توصيل عربيات اسعاف مجهزة لغزة

ملحوظة تانية:

ده موضوع مهم عن غزة يستاهل النشر فعلا

من مدونة الفنان خالد الصاوى

رسالة من فنانى مصر