السبت، 17 يناير 2009

اخبار..اهرام..جمهورية

ما كنتش ناوية اتكلم فى الموضوع ده تانى
لكن الصورة اللى تحت دى اجبرتنى
يا ريت امير الدولة بتاعت القواعد الامريكية
يكون مبسوط بانجازه العظيم
و التانى بتاع الاسلام هو الحل
و التالت بتاع ندين و نشجب و نرفض باقوى العبارات
و الرابع بتاع سنحارب بالمدنيين و الاطفال
و الخامس بتاع معبر الخيار و الفقوس
و السادس و السابع و التامن اللى ما سمعتش صوتهم لحد دلوقتى
و التاسع بتاع ما دام الحرب مش عندنا يبقى مالناش دعوة بس حاربوا انتوا
و العاشر بتاع مش احنا اللى ضربنا الصاروخين يا بيه
يا ريت يكونوا كلهم فرحانين بالنظام العربى المشرف
بقترح تغيير اسم جامعة الدول العربية
و معاه مجلس الامن بالمرة
لبنسيون شحاتة لصاحبه لا ارى لا اسمع لا اتكلم!
صغيرة و ما بتعرف بلعب الكبار
كانت عم تلعب اخدها النسر و طار
بحرب الكبار شو ذنب الطفولة
بحرب الكبار شو ذنب الضحكات الخجولة
قوليلي... قوليلي.. قوليلي ..
يا صغيرة وين رحتي ..
يا نبته نحيلة .. يا دمعة دخيلي..
قوليلي ياريت فيه صرخ بوجه الكبار ..
اقولهم حاجي يلعبو فينا ..
احرار بدنا نضلنا احرار
"صغيرة و ما بتعرف-فيروز"
******
وبالمناسبة فى صباح اليوم العشرين للقذف،
وصل عدد الضحايا إلى ١٠٣٤ شهيداً،
تذكرت على الفور أن الرقم نفسه
يحمل ضحايا حادث العبارة المنكوبة «السلام ١٠٣٤»..
تخيلوا أن إسرائيل بكل جبروتها
وأسلحتها البرية والبحرية والجوية لمدة ٢٠ يوماً قتلت ١٠٣٤ فلسطينياً، بينما راح العدد نفسه من المصريين فى حادث واحد
خلال ساعات وبسلاح واحد هو الفساد،
لكن الغريب أن هناك من يطالب بمحاكمة القادة الإسرائيليين كمجرمى حرب،
بسبب هذه المجازر وإحالتهم إلى «المحكمة الجنائية الدولية»،
بينما تمت إحالة متهمى العبارة إلى «محكمة جنح»،
ولم يعاقب أى مسؤول مصرى أو يحاسب على هذه الجريمة البشعة..
فسااااد يا مصر!
محمود مسلم-المصرى اليوم
******
بعيدا عن اللى لفت نظر الناس كلها
فى الجريمة بتاعت بيع اطفال السفاح لاسر امريكية
بالنسبة لان الولد كان بيتباع ب14 الف جنيه و البنت ب8 هل ده بيرجع مثلا لان الولد اللى لسه مولود اول امبارح عنده اوبشنز مش نازلة للبنت اللى اتولدت معاه؟
رحمتك يا رب من التخلف و المتخلفين!
******

كتاب بجد يستحق القراية!

******

يوم الخميس قضيت يومى بين ذكرى حلوة لمنى بتاعت العربيات فى بين السرايات و يحيى الشاب المصرى النضيف الطيب اللى مهتم يعلمنى تفاصيل شغل مش بتاعى لمجرد انه يساعدنى و رجب السايس بتاع الشغل اللى بيقابلنى كل يوم بابتسامة لطيفة مع ان الساعة بتبقى 8 الصبح و شكل كوبرى قصر النيل الصبح لما الناس بتبقى ناسياه و بتدور على كوبرى اكتوبر و العسكرى اللى بيعدى الاطفال لمدارسهم ورا بيتنا و الام الصغيرة اللى بتوصل بناتها كل يوم لمدرستهم و عينيها واحدة عليهم لحد ما يوصلوا لباب المدرسة و التانية على ابنها اللى قاعد ورا و اللى لسه ما اتعلمش الكلام و مقالة قديمة لمجدى مهنا عن مصر اللى بيتمناها لقيتنى برد على سؤال سألهولى واحد فرنساوى بيشتغل معانا: "هى مصر امتى بتبقى برد؟" قلتله بثقة: "عمرها ما كانت باردة على فكرة"

******

و بما انى مش لاقية حاجة تانية اكتبها فهترجم الكلمتين اللى على الشمال "لا دواء افضل من الامل ولا حافز اعظم منه ولا شيء اكثر قوة من التوقع بان شيئا افضل سيحدث غدا"

هناك 30 تعليقًا:

Mohamed Hamdy يقول...

"لا دواء افضل من الامل
ولا حافز اعظم منه

ولا اروع من تدوينه اقرأها فأصاب بحاله من الغيظ ثم حاله من الراحه والأمل

تحياتى ليكى

mUsLiM يقول...

اولا : السلام عليكم ورحمة الله وبركاته :)

قبل الدخول فى تلابيب الموضوع ، نسأل الله لنا ولكى السداد يا أختى فى الفكر :)

لأن فكر الانسان اليوم أصبح علامة فارقة على شخصه ودينه ولسوف يسأله الله عمّـاذا كان يدعم باللسان والقول ،،

بالنسبه للدول العربيه والدوله بتاعت القواعد الأمريكيه وهى قطر بالتأكيد

فحقيقة أنا قلت سابقا كلمة مازالت تتأكد فى نظرى يوما بعد يوم وهى أن الدول العربية اليوم قاطبة وقعت فى معسكرين بين الخيانة والتواطؤ أو الصمت والتخاذل

أما قطر وفريقها ففى معسر الصمت والتخاذل ، ولكن هى على الأقل بقمتها السابقه حاولت أن تسجل شيئا للتاريخ بقطعها العلاقات مع الكيان الصهيونى ومحاولتها كسر الحصار عن أهل غزة

ولا أدرى ما الذى منع مصر من حضور قمتها هل هو الاستكبار الذى لا فائدة منه ...؟

يجب أن يعلم الجميع أن هذا النظام المصرى أفقد مصر قوتها وسياستها فى المنطقه ، وأصبحت هباءا ولا حول ولا قوة الا بالله

معكسر مبارك أبوالغيط اليوم أصبح علامة فارقة على التواطؤ والخيانة والمهانه ولا حول ولا قوة الا بالله

أما حماس والجهاد والجبهة الشعبية وألوية الناصر وكتائب الأقصى وكل فصائل المقاومه فأصبحوا اليوم رقما صعبا يستعصى على المعادله الصهيو أمريكيه والعربية التخاذليه أو التواطؤيــه

والمجاهدين اليوم أًبحوا لاعبا على الساحه السياسيه وهكذا هم على دربهم سائرون

وثقى يا أختى أن صمود المقاومة وعدم تنازلها رغم ما حاق بأهلنا فى غزة هو مفتاح النصر الشامل والقريب بإذن الله تعالى

وعن الكم الهائل من القتلى والمصابين فهؤلاء ان لم يموتوا بآلة الحرب فكانت ستقتلهم آلة الحصار الجائر

وحسبنا الله ونعم الوكيل

وهؤلاء القتلى لا نحزن عليهم لأنهم فرحون ، قال تعالى (( ولا تحسبن الذين قتلوا فى سبيل الله أمواتا بل أحياء عند ربهم يرزقون ، فرحين بما ءاتاهم الله ))

فهؤلاء فرحون ونحن نفرح لفرحهم

فلا تحزنى عليهم ،،

أما الموقف الشرعى من صمود المجاهدين رغم القتل فى المدنيين فلاشك أن علماء الأمة قاطبة على صحة ما قامت به المقاومه

ولنا فى قصة الحسين وجهاده أمام يزيد بن معاوية أسوة حسنه ، حينما جاهد بكل بيت النبوه من نساء وأطفال وشيوخ

ولم يخش فى الله لومة لائم

ورغم قلة العدد والعتاد الا أنه لم يستسلم ويداهن فى الحق ،،

................

أما عن قصة بيع الأطفال فمع أنها جريمــة إلا أنه حتى الجريمة تفرق بين الذكر والأنثى :)

وانا مش فاهم يا أختى انتى مستعجبه ليه

طبيعى ان الطلب على الذكر يبقى أكثر من الأنثى

مش العتب على المجرمين

العتب على أفكار الجاهلية الأولى التى مازالت فى عقول البعض ،،

ونسألكم الدعاء أختى :))

وأرجو أن تكونى بخير حال

السلام عليكم

dr.lecter يقول...

عودا احمد يااستاذه

انا لسه فعلا ملاحظ حكايه التشابه في عدد الموتي دي نكته تخلي الواحد يبكي
بجد

بالنسبه لربع جرام بقالي شهرين مش عارف اجيبها لان مش لاقي وقت اصلا اجيبها بالاضافه لحجمها الضخم جدا وهاتهبل وهاقراها بس خلاص باذن الله اول ماخد ريست مابين الامتحانات يوم 29 هتلااتقيها عندي بس ياريت بس ماتشتغلش في المعرض وانساها لاني عاوز اجيب حاجات تانيه السنه دي

علي فكره الروايه دي هتتعمل فيلم


حكايه مصر بتبقي بارده دي

اووف انا نفس موقفك ده بيحصل لي كل شهر مره واحده بس من كتر الدفء اللي باحسه نادرا في وسط المصريين بابقي عاوز اطير بالناس واقولعم باحبكم جدا انتم احسن شعب في الدنيا

بعدها علي طول بكام ساعه تلاقيني باسب والعن في الناس واقول امتي بقي اغور من هنا


مش عارف ايه التناقض الرهيب ده



فيه جمله كانت في قصه قصيره اسمها shawshank redemption


الجمله بتقول " hope is every thing and it worth fighting for it"

Desert cat يقول...

انا اكتر ما اضحكنى حقا هو موقف السيد المتشنج اللى وقف يحرض المصريين على الثورة والحرب واول ما انضرب صاروخين جرى على وسائل الاعلام يبرر ويحلف الف يمين ان الصواريخ مش من عندهم

أنا حر يقول...

حلوة الجولة الصحفية دي بس بذمتك مش تفتح النفس على الانتحار؟؟؟
:)
واقعنا كل يوم بيبقى أسؤ وكل يوم بيزدد فساد وظلم
واحنا لسا قادرين نعيش ونضحك... ومننتحرش
تحياتي

shayma يقول...

تتنوع الاخبار والمرار واحد

...
بس انا ناويه اقرا الكتاب ده فعلا

...

عجبنى اوى يوم الخميس

سلامى
:))

Founoon يقول...

وحياة ربنا بيبيعوا الولد اغلى من البنت ؟!!!!! يالهوي

انا حبيت منى من كلامك عليها ونفسي اشوفها

ربنا يديكي ويدينا الصبر والأمل ملحوظةالعبارة انا واخدة بالي منها من اول ما وصل عدد الضحايا للعدد دا

بالنسبة لباقي الموضوع انا قررت مادخلش خالص في اي حوار بخصوص غزة عن مين عمل ومين سوى والتركيز على عمل شيئ ايجابي او السكوت احتراما للموتى اللي الكل بيتاجر بيهم

تمثيلية مقرفة ..انا حاسة اننا في ترومان شو

ابن الوليد يقول...

ملاحظ فى احداث غزة الاخيرة انه كله بيعتب وكله بيلوم وكله بيبرر وكله بيحلل وفى الاخر نكتشف انه كله دووول مابيعملوش اي حاجة

انا حرة يقول...

محمد حمدى

ربنا يكرمك يا رب من بعض ما عندكم بجد انا اللى بتغاظ كل ما باجى عندك :)

بس الجملة دى مش انا اللى كتباها عى فكرة هى عجبتنى بس فترجمتها

انا حرة يقول...

مصعب
و عليكم السلام و رحمة الله و بركاته
يا اهلا يا اهلا :)

بعيدا عن المواقف من موضوع غزة لانها فيها اختلافات كتير فى الاراء..لكن الاكيد ان الكل مجمع على بشاعة المجزرة اللاانسانية و الوضع المرعب اللى اتحطت فيه اطفال و عائلات كاملة لمدة شهر تقريبا..الاهم من حساب المقصرين و الخرس ان الناس زى ما اجمعت على بشاعة اللى حصل تجمع على حاجة ايجابية تتعمل للى نجيوا من الحرب..ايا كان شكلها

اه شفت حتى الجرايم بقى فيا كوسة..رحمتك يا رب بجد انا شكلى هموت و انا بدافع عن قضية خسرانة و المهم ان اللى بيطالبوا باحترام ادمية المراة بقوا فيمينست ودى تعتبر شتيمة عندنا..تقريبا الشتيمة الوحيدة اللى ما عنديش مانع اسمعها كل يوم

انا بخير الحمد لله يا رب انت كمان تكون بخير عندك :)

انا حرة يقول...

لكتر
الله يكرمك يا فندم :)

لازم تقراها على فكرة بجد مسلية جدا خصوصا وقت الامتحانات..هو الواحد هيتسلى فى ايه اكتر من قصة عن شوية عيال محششين؟!

تصدق و انا بقراها قلت لازم تتعمل فيلم بجد الموضوع مهم جدا و ان كان وصلنى لقرار انى لو خلفت فى يوم من الايام ولد يا هربطه فى شجرة الفيلا يا هبيعه لعيلة امريكية..بجد القصة مرعبة

انا زيك برضه اقابل دول اقول عمار يا مصر و اقابل التانيين اقول انتوا اللى جايبينا لورا..بس لو حد منهم ما كانش موجود ما كناش هنعرف قيمة التانى

انا حرة يقول...

desert cat
والله المواقف كلها تضحك اكتر من بعض انا اللى عجبونى اوى بتوع المغرب العربى اللى ما حدش سمعلهم صوت و فالحين بس يندبوا على مصر و دور مصر..طيب ما تورونا شطارتكم الاول
انا قررت ابطل اقرا الاخبار اللى عن الموضوع ده و اللى قادر يساعد بحاجة يساعد و خلاص

انا حرة يقول...

انا حر
لا لو على الانتحار فمفيش اكتر من الاخبار اللى بتساعد عليه
بس انا عندى امل ان بكرة احلى..مش عارفة جبته منين بس هو كده :)

انا حرة يقول...

shayma
و انا عجبتنى الجملة بتاعت تنوعت الاخبار و المرار واحد
اهلا بيكى :)

انا حرة يقول...

فنونتى
اه يختى شفتى اصلهم معمولين من طينة تانية واضح..عايزة اقول كلام كتير بس مش هينفع هنا :D

تعالى فى يوم اعرفك عليها والله كاراكتر ينفع يتعمل فى فيلم سينما

انا ما دخلتش اصلا فى حوارات و ريحت دماغى ما يمنعش ان جالى الضغط من اللى قريته

ايوة انا افتكرتك اول ما قريت المقالة.كان حقى كتبت فنون و محمود مسلم :)

انا حرة يقول...

ابن الوليد
نسيت تقول ان كله بيلوم مصر كانها خلفت العالم العربى كله و نسيته..ربنا يهدى بجد

ابن الوليد يقول...

كله بيلوم الخائن ولا يلوم شعب مصر

يوميات نائمة في الأرياف يقول...

عارفة
انا لفت نظري انا كمان قصة العبارة دي
بس في نفس الوقت
ممكن مش نشارك بالبشر
بس نشارك بالضغط والقوة
بالاحساس بالمسؤلية
يا جماعة
الانتصارات العربية المدوية مكنش فيها احساس الانانية دي
احنا محتاجين كشعوب اننا نكون ايد واحدة
وملناش دعوة بحكامنا عاملين اية؟
ربنا يكرمنا جميعا
تحياتي ليكي

كاتب مصري يقول...

زي ما قال أول واحد علق
الأمل هو العلاج الوحيد
الحمد لله الضرب وقف ويارب يستمر الوقف
تحيتي لكي أختي الكريمة

dalia يقول...

أهلا أنا حرة

صغيرة وما بتعرف .... هذا ما وجع قلبي في غزة
والله يا بنتي موضوع شهداء العبارة وشهداء غزة مثير للعجب فكلها دلائل نعرف من خلالها ان مصيبتنا داخلية وخارجية الحدق يفهم بقه

اما بخصوص جريمة بتاعت الاطفال ممكن يكون عندي تفسير اكيد على البنت ديسكوند علشان البنت مصيرها تخلف وتجيب عيال كتير وهو استثمار في العيال برده والله شر البليه ما يضحك...

شوقتيني للكتاب كده استطيع ان اوكد ان كلية الاعلام خسرت كتير ههه

"عمرها ما كانت باردة على فكرة" جواب رائع لشخصية رائعة مثلك

وبالنسبة للامل فقد ارسل لي أحد الزملاء الاعزاء رسالة مازلت احفظها تقول : بمداد الامل نلون الحلم بالتأكيد سنعيش السعادة يوم سعيد لك

arsenalwy يقول...

جيتى عالجرح

وفكرتينا بمهزلة العبارة

لنا الله

Sola يقول...

el fasad mawgood fel 3alam kolo 3ala fekra bas el far2 howa mowaghet el fasad
hena f california mn kam shahr kan feh 2atr 7'abat f 2atr tany 3ashan el sawa2 kan beyb3at sms
f el natega en nas keteer etsabet o el sawa2 o el mosa3ed mato
bas rafado kol el ta2m
o masr betkoon bard l kol el nas elly mesh la2yah 3'ata
o b monasbet el sorah deh f ana shouf el manzar dah belzabt lama kont bazour el malage2 elly fe masr
allah ye3eeen
o bas keda
salamo 3alekom

انا حرة يقول...

ابن الوليد
ما هى المشكلة انه مش وقت استعراض عضلات ولا محاولات لاثبات ثقافة و المام بالسياسة
ده وقت تقديم مساعدات حقيقية فى الواقع بعيدا عن الانترنت و الشعارات
لكن مين عمل و مين ما عملش و مين خاين و مين ما خانش دى مهاترات لا هتودى ولا هتجيب..و كده او كده ماحدش يجرؤ انه يلوم مصر

انا حرة يقول...

يوميات نائمة فى الارياف
متفقة معاكى جدا..و مع انى بشتم فى الحكومة ليل نهار لكن ده ما يمنعش انى تعبت من الناس اللى مش فالحة غير فى الكلام و مستنية الحكومة تيجى تأكلهم فى بقهم و لما تسأليهم عملتوا ايه عشان تخلوا عيشتكم احسن هيقولولك قعدنا عى القهوة و استنينا الفرج..خليهم مستنيين بقى
نورتينى :)

انا حرة يقول...

كاتب مصرى
عمره ما هيقف لسه انهاردة كانوا مصرحين انهم هيضربو تانى لو حماس ما وقفتش تهريب الاسلحة و لو اختفت حماس هيلاقوا 100 عذر و عذر القضية دى عمرها ما هتتحل بالعنف الامل الوحيد فى السلام مهما قالوا و مهما عادوا عن الانتصارات الوهمية و حروب التطهير و غيره من الشعارات

انا حرة يقول...

dalia
عجبنى اوى التفسير بتاع الديكوند ده..تصدقى ممكن يكون كده فعلا :)

ولا خسرت ولا حاجة كفاية انها طلعت بنات زيك كده..بس اقرى الكتاب هيعجبك اوى

و بجد مش عارفة اقولك ايه على كلامك..ما تتصوريش اتبسطت بيه قد ايه
و ربنا يسعدك يا رب و يخلى حياتك كلها امل فى الاوقات الصعبة قبل السهلة

انا حرة يقول...

sola
احنا عندنا مشكلة حقيقية فى اساليب ادارة الازمات..و المصيبة ان نفس الكارثة ممكن تحصل مرتين ورا بعض و بنفس الطريقة و تلاقى ان مفيش اى تغيير حصل..يعنى مش بس بنستنى الكوارث تحصل و بعدين نتصرف حكوماتنا بتستنى الازمة و بعدين ما تتصرفش

الصورة دى هتلاقيها فى كل دول العالم التالت دى حاجة بديهية..لكن المشكلة لما الفقر اللى هو لوحده مصيبة يكون معاه رعب الحرب كمان..ربنا يصبرهم
و عليكم السلام و رحمة الله و بركاته

انا حرة يقول...

arsenalwy
يا ريتها جت عى العبارة ده احنا بنفتكرها بس عشان الرقم قريب من ضحايا مجزرة غزة لسه فيه قطارات و مسارح و تكاتك..مش بنلحق ننسى اساسا عشان نفتكر

ابن الوليد يقول...

و كده او كده ماحدش يجرؤ انه يلوم مصر

ومن لم يلوم مصر !!!

ابن الوليد يقول...

فلننتظر قريبا ونرى ما ستسفر عنه الاحداث ;)