الاثنين، 9 فبراير 2009

تخاريف بنوتية..

لما قابلت شهد.. قررت اخيرا ارجع ازور مكان كان فى فترة من الفترات قريب جدا لقلبى ملجأ للبنات اليتيمات بتديره صديقة لجدتى و اخترت بتركيز شديد الصديقة اللى هاخدها معايا و بعد اتفاقنا على مبدأ "don't get emotionaly involved" اى الا نتعلق عاطفيا بالاطفال حفاظا على صحتنا النفسية وصلنا الدار و استقبلتنا ميس عايدة او بمعنى اصح..النسخة التى استوحى منها مؤلف مسرحية هالة حبيبتى شخصية سناء يونس لما كانت بتشوف فؤاد المهندس و تقوله "شعاع" و بعد فاصل من توقيف الاطفال فى طوابير عشان يحيوا "تانت" و نشيد الصباح و السلام الوطنى و بعد ايمانات و حلفانات مننا بان تسيبهم على راحتهم و بعد اصرارها الغريب على ان يجيبوا الاطفال عشان يتفرجوا عليهم و فى وسط 20 طفل على الاقل شوفتها بنت زى القمر..فى عينيها انكسار واحدة شافت 20 سنة وجع و لمعة دموع عايزة تنزل و مش عارفة يمكن خايفة من المشرفات و يمكن عارفة انها لو فضلت تعيط للى باقى من عمرها مش هتقدر تغير الواقع..واقع اليتم
سألتها عن اسمها..قالتلى شهد شيلتها و حضنتها و ما عرفتش اتكلم هم المفروض يقولوا ايه اصلا؟! عرفت ان امها عايشة و متجوزة و بتيجى تاخدها فى الاجازات يعنى كل 15 يوم قلتلها مش عايزة تلعبى..قالتلى عايزة مسكت ايدى جامد اوى كانها خايفة اسيبها و امشى مع انى حتى لو كنت عايزة امشى..ما كنتش هعرف قابلت الاطفال كلهم..بس ما كنتش شايفة غير شهد اتمنيت بسذاجة ان لمعة عينيها يكون سببها دور برد بايخ و اقنعت نفسي ان كل الاطفال لما بيجيلهم برد عينيهم بتدمع مع شهد رجعت طفلة عندها 6 سنين و مش عارفة مين فينا اللى كانت بتلاعب التانية جت المشرفة عشان تلاعبها..بصتلها و قالتها بحدة "لأ..هى بس" سألتنى هتمشى؟..قلتلها ايوة قالتلى خليكى شوية..قلتلها هجيلك تانى بصيتلى صاحبتى بنظرة "مش اتفقنا على مبدأنا؟" قلتلها فى سري "هو انتى اول مرة تعرفى انى كذابة؟!"

- على فكرة اللى زى شهد كتير اوى و على فكرة برضه اللى زيها اخر حاجة محتاجينلها هى الفلوس!

*******

كن صديقى..

كم جميلاً لو بقينا أصدقاء إن كل امرأة تحتاج أحيانا الى صديق و كلام طيب تسمعه و إلى خيمة دفء صنعت من كلمات لا إلى عاصفة من قبلات فلماذا يا صديقي ؟ لست تهتم بأشيائي الصغيرة و لماذا .. لست تهتم بما يرضي النساء ؟ كن صديقي إني احتاج أحيانا لأن أمشي على العشب معك و أنا أحتاج أحيانا لأن أقرأ ديواناً من شعر معك و أنا كامرأة يسعدني أن أسمعك فلماذا أيها الشرقي تهتم بشكلي؟ و لماذا تبصر الكحل بعيني و لا تبصر عقلي؟ إني أحتاج كالأرض إلى ماء الحوار فلماذا لا ترى في معصمي إلا السوار ؟ و لماذا فيك شيء من بقايا شهريار كن صديقي ليس في الأمر انتقاص للرجولة غير أن الرجل الشرقي لا يرضى بدورغير أدوار البطولة فلماذا تخلط الأشياء و ما أنت العشيق؟ إن كل أمراة في الأرض تحتاج إلى صوت ذكي.. وعميق و إلى النوم على صدر بيانو أو كتاب فلماذا تهمل البعد الثقافي و تعنى بتفاصيل الثياب؟ كن صديقي انا لا أطلب أن تعشقني العشق الكبير لا أطلب أن تبتاع لي يختاً و تهديني قصورا وتمطرني عطراً فرنسياً و تعطيني مفاتيح القمر هذه الأشياء لا تسعدني فاهتماماتي صغيرة .. و هواياتي صغيرة و طموحاتي هى أن أمشي ساعات و ساعات معك تحت موسيقى المطر و طموحي هو أن أسمع في الهاتف صوتك عندما يسكنني الحزن ويضنيني الضجر كن صديقي فأنا محتاجة جدا لميناء سلام و أنا متعبة من قصص العشق و الغرام و أنا متعبة من ذلك العصر الذي يعتبر المرأة تمثال رخام فتكلم حين تلقاني لماذا الرجل الشرقي ينسى حين يلقى امرأة نصف الكلام؟ و لماذا لا يرى فيها سوى قطعة حلوى و زغاليل حمام و لماذا يقطف التفاح من أشجارها ثم ينام؟ **** فى الواقع .. كان فى بوست طويل عريض مكتوب عن الموضوع ده خصوصا بعد فقرة كاملة فى القاهرة اليوم جابلتى شلل رباعى اسمها "لماذا يفضل الرجل المصرى المرأة الشقراء؟" يخرب بيت السطحية يعنى لكن واضح ان اللاب توب تواطأ مع حزب يا رجال العالم اتحدوا و النتيجة انى اكتفيت بقصيدة الشاعرة سعاد الصباح الله يسترها دنيا و اخرة قالت كل اللى عايزة اقوله فلماذا الرجل الشرقي ينسى حين يلقى امرأة نصف الكلام؟

********

حلم.. و ينسانى الزمان على سطح الجيران.. *******

اختيارات.. اختارت ان تكون قائدة..و اختار ان يكون تابعا اختارت ان تنجح..و اختار ان ينتهى من دراسته فى الثلاثين اختارت هى الطموح..و اختار هو الميرى اختارت الطريق الصعب..و اختار الروتين و المرتب المضحك و البطيخة اختارت شعار" لو ما تعبتش دلوقتى عشان مستقبلى..هتعب امتى؟!" اختار شعار "ليه تتعب اكتر لما ممكن تتعب اقل؟!" اختارت ان تحبه..فضعفه فى نظرها مشكلة يمكن التغلب عليها اختار ان يحبها..فقوتها مبهرة بالنسبة له اختارت ان تكون دوبليرة تمثل دورا ليس دورها حتى تسير المركب و اختار ان يكون كومبارسا مع ان دوره هو دور البطولة اختارت الا تتزوجه..فليست مهمة المرأة ان تكون الاقوى و اختار الا يتزوجها..فهى اقوى مما ينبغى و هو اضعف مما يجب حقا ان الحياة ليست الا مجموعة اختيارات!!

*******

كيف تعرفين انك عروسة غبية؟ - لما تقيسى تقديره ليكى بحجم فص خاتم الجواز - لما تسمعى كلام صحابك و تفورى دمه و تجيبيله الضغط عشان تتأكدى انه بيغير عليكى - لما تقتنعى باللى بيقوله و تعملى عكسه عشان تبينى انك شخصية قوية - لما تستنى تسمعى كلام اهبل و سطحى و هدية فى اليوم الخنيق اللى اسمه فالنتين بس عشان تفرجيها للناس - لما تسمعى كلام ماما و تتجوزى واحد شخصيته ضعيفة عشان تمشيه على مزاجك - لما بابا يقوله احنا بنشترى راجل و بعدين ينضف جيوبه بمهر خيالى عشان ما يحسش انك "سهلة" على اساس ان فلوس الدنيا كلها تساوى دماغ واحدة عندها ذرة كرامة *******

انا و اللى لى.. فكرت اكتب عن سر انبهارى اللى مالهوش اى تبرير بوردة الlily بس لقيتنى مش هعرف اوصف حلو زى ما ريم وصفت حبها للتيوليب مش ممكن حالة الفرحة الطفولية اللى بتجيلى كل ما بشوف الوردة دى يمكن السر فى ان ال3 مرات اللى اتهديت فيهم بورد ولا واحدة فيهم كان فيها لى لى !

*******
حدث بالفعل! هى:ربنا خلق الراجل كده و الست كده (و حطت ايدها الاولانية فى مستوى راسها
و ايدها التانية فى مستوى كتفها) احنا:يعنى ايه ان شاء الله؟ هى:يعنى الست المفروض تكون الاضعف انا: يعنى انتى شايفة انها قاعدة عامة ان اى راجل اقوى من اى ست؟ هى:لا خالص..بس انا قلت ان الست "المفروض تكون ضعيفة" انا:و ايه الفرق؟ هى :يعنى هى قوية و مستقلة بس تمثل انها ضعيفة فهمتى؟ انا: تمثل دور السهتنة و هى عارفة ان اللى هى عايزاه هيتعمل؟ هى:بالظبط كده انا:يعنى نفاق رسمى احسن من الوضوح من اولها؟ هى:مش نفاق دى شطارة الانثى انا:على كده انا لا امت للانوثة بصلة! هى:مش نفاق..يعنى هيجرى ايه لو الست قامت تفطر جوزها الصبح و هى بتدعى عليه فى سرها انه مصحيها بدرى فى البرد انما تقوله انها اسعد واحدة فى الدنيا عشان بتاكله من ايديها انا:؟!!#$^##@+#@!$$ !!!! هو (فى اول طلعة له من اول الحوار): ايووووة..اهم حاجة الفطار انا:لا واضح فعلا انهم هم كده و احنا كده الحمد لله على نعمة كدة!!
مين قال ان الانوثة مرادفة للنفاق و التمثيل؟!!
*******
مقولة.. اذا اردتها كالزهراء..فكن انت كعلىِّ
******* نقطة و من اول السطر..

- انهاردة لقيتنى قدام يافطة مكتوب عليها طريق العين السخنة مش عارفة ازاى و ليه مش بخاف لما الاقينى سرحت و تهت و انا سايقة منتهى الاحساس بالحرية لما الواحد يسيب العربية هى اللى تمشيه ايه المانع من شوية جنان متمثلين فى انك تمشى فى طريق مش عارف هيوصلك فين؟ مش كل حاجة لازم تبقى مترتبة بالقلم و الورقة!

- فكرة الموت مسيطرة عليا اوى اليومين دول خصوصا بعد وفاة احد المدونين قريب و مدونة تانية من كام شهر -الله يرحمهم و يغفرلهم و يثبتهم عند السؤال- بدأت اعيد النظر فى المدونة دى!

*******

هناك 26 تعليقًا:

غير معرف يقول...

بوست أكتر من رائع

بالنسبة لشهد فا فعلا زى ما قلتى اللى زيها كتيرو آخر حاجة عيزنها الفلوس...هما محتاجين حب يحبهم يلعب معاهم ياخدهم فى حضنه ...بس برضه الناس على قد ما بيتساعد بتدى هما يمكن يكونوا فى سنهم مش مدركين أنهم عايزين فلوس بس الملجأ بيكون عايزها عشان يقدر يربيهم.....للآسف هما آه عايزين حنان و حب حقيقى و مش أى حب يقدر يديهم الحنان و الحب غير الأم و الأب فعلا لأنهم حيكونوا فعلا بيحبوهم لكن أى حد مهما حب الشخص اللى قدامه ممكن يخلى المسؤليه فورا لو حس أنه عبء عليه

أما بالنسبة للحقلة بتاعة القاهرة اليوم و الرجاله ال.... بيفضلوا الست الشقرا أنا عن نفسى حسيت أنى قاعدة بتفرج على تفاهة و تفيط التلفزيون لأنى محبش أسمع ناس دماغها هسهس


بالنسبة بقى لموضوع كونى منافقه حتى تكونى أثنى فده أكيد غلط 100 % لانى الأنوثة بتكون فى الحنان و الرومانسية و الكلام الحلو و قبل ده كله فى أنك تكونى على طبيعتك لأن اللى ظاهر منك حيكون أحسن ألف مرة من اللى مش جواكى و عايزة تبينيه

Here i'm يقول...

يخربيت الدماغ اللى بتطلع الحاجات دى :D

و الله يا فندم دا مدح مش ذم :D

أمثال طنطك عايدة .. دول موجودين فى جميع المؤسسات الخيرية .. و أسألى العبد لله :D .. ألا من رحم ربى .. و من رحمه ربى مش بيكمل و الله علشان أعصابه بتتحرق بسرعة .. أما شهد فدى ربنا يتولاها برحمته زى ما أختارها للموقف دا .. يعنى أمها مثلا حاليا متزوجة و بتيجى تشوفها كل 15 يوم .. ليه ربنا أختار شهد هيا اللى فى الملجا و أختها أو أخوها التانى يعيش مع أمه .. علشان ربنا هوا اللى حيرحمها .. أمثال شهد نقدر نطبق عليهم الجزء بتاع أن الأختيارات و أن الحياة مجرد أختيارات .. بس للأسف شهد مش حتختار .. حتى زوجها فى المستقبل لازم يكون من الدار أو من الدار المجاور .. شهد لا خيارات لها ..


القصيدة حلوة قوى و دى أحسن حاجة كتبتها سعاد الصباح فى وجه نظرى المتواضعة :D


اهو أنا عارف لو معايا عربية كان زمانى كل شويه فى محافظة شكل .. علشان كده ربنا بيحب أهلى :D .. و خلانى لا بعرف أسوق ولا عندى عربية :D


الجزء بتاع أن تكونى عريسة غبية فكرنى بحاجة كنت كاتبها من زمن عن مواصفات فتاة أوهامى مش أحلامى :D .. و رجعت و فتحت ملف الـ word بتاعها لاقيت أن مواصفاتها لسه متغيرتش كتير .. مع العلم أن الكومبيوتر دا عندى بقالى 8 سنين :D

ReEm يقول...

تنتي طلعتي اشجع مني في الزيارة دي اللي نفسي اعملها من زمان بس مش لاقية حد يوديني و بصراحة جوايا خايفة اعملها لاني من غير حاجة بتعلق بالاطفال و حاسة لو رحت هيبان تأثري بحالاتهم و كسرة نفسهم عليا
يمكن دي من اكتر الحاجات اللي عايزة اعملها و مرعوبة اني اعملها

**********

مسألة الرجل الصديق فعليا في شرقنا الجميل اكتر النساء حظا على الارض من تجد الرجل الصديق

**********

العرايس الاغبيا كتير و الاهل الجهلة اكتر


**********

انا شوفت وردة اللي لي تاني يوم لما روحت اشتري الورد افتكرت وقتها لو كنت قريبة كنت قبتهالك هدية

*********

بصي حتة المرأة اضعف انا معاها جدا بس مش بطريقة الست دي مش بالاكراه يعني ( و لو انه لو خرجنا من عالم الاماني ودخلنا الواقع هنلاقي كلامها هو اللي في الواقع) بس عمومااهم شيء تكون مع راجل ذكي فاهم انه تصرف الانثى مش ضعف ذل لا هو نوع من احتياج المرأة لقوة الرجل مش عارفة اوصلك فكرتي بس انا من النوع اللي احب او اشتاق اكون ضعيفة مع الرجل بس مش معناه انه مش قوية لو كان غبي ومافهمش الضعف صح ممكن تطلع انسان صلبة جدا حتى عليه ومعاه بس في المجمل مابحبش الندية اللي بقت منتشرة اوي دلوقت و الرغبة الفظيعة انه الست تبقى زي الرجل في كل تكة و تفصيلة
شكلي دقة قديمة بقى


**********

انا بقى حاليا نفسي في لحظة جنان زي دي بس مش لاقياه


( سؤال على جنب كدة هو ازاي و منين بتحطي سميالات في التعليق )

soly88 يقول...

خدعوك وقالوا الحياه مجموعه من الاختيارات
بدليل وجود امثال شهد، التى لاحول لها ولا قوه فى وجودها بالملجأ
---
القصيده جميله... ولكن
صداقة الرجل والمرأه اسمع عنها ولم أرها
___
اما عن المرأه الشقراء
فتستطيع المرأه ان تكون كذلك لو أحبت
----
كويس ان الراجل بيفتكر النص التانى من
الكلام

مواطن مصري يقول...

- فكرة الموت مسيطرة عليا اوى اليومين دول

انا الموت مسيطر عليا من زمان

بوست رائع

leeno يقول...

لما قابلت شهد :

عارفة انا كل مرة بروح بقول انا حرجع و انا قادرة اتمالك نفسي المرة دي عشان اتعلمت اسيطر على اعصابي و طبعا مش بيحصل !!!


كن صديقي :

بعيدا عن نص القصيدة الاكثر من رائع
و عن اتفاقي مع مضمونها جدااااااااااا ساعات كتير ببقى نفسي اكتب نص مقابل بيقول ياريت متلعبش دور الصديق و انت مش حاسهياريت متقربش مني بحجة الصداقة و انت احساسك مش احساس صديق قناع الصداقة بيبقى واضح و ممل و يخنق لحد اني ببقى عايزة اصرخ و اقللك من الرجولة انك متخافش تقولي بحبك !! و تعمل نفسك صديقي !! و انت اخر همك الصداقة

اختيارات: !!!!!!!

عجبي عليك يا زمن بجد لكن هي الدنيا كدة اختيارات !!

عروسة غبية :

للاسف العرايس و العرسان اغبى من بعض و انتي ممكن تكتبي مجلد في غباء الاتنين
كفاية غباء ابن الاوادم اللي بيروح ياخد قرض من البنك عشان يعمل فرح يصرف فيه الوفات في ليلة وحدة و يعيشو عشر سنين بعدها عايشين في ضنك عشان برستيجه قدام العيلة و اصحابه و انه عمل فرح صرف فيه بلاوي على كلام فاضي و مظاهر ملهاش لا معنى و لا طعم تعيش الف عيلة لسنة !!!

اما بالنسبة لانهم بيفضوا جيب العريس فمن اللي بشوفه صراحة من الشباب انهم يستاهلو اللي بيحصل دة مش عشان بيفكروا ان البنت مش سهلة لا عشان المحترمين اووووووي بيفكروا ان اهلها مسترخصينها و رامين نفسهم عليه و عايزين يخلصوا منها و دة تفكير شائع جداااااااااااااا للاسف !!!!! و ان اللي يجي بالرخيص يضيع بالرخيص !!

تفكير عقيم و غبي لكن للاسف منتشر جدا جدا جدا

طبعا مش حيحمي البنت انها تتاقل بالدهب لو طهقت منه بس اهو اجراء احتياطي على قول الكثير من الاهل

حدث بالفعل :

بصراحة انا مش متفقة بالكامل مع كلامها لكن متفقة مع فقرة الشطارة الانثوية و استخدام الذكاء العاطفي في العلاقة عشان مش كل حاجة تقدري تحليها
بالصراحة و الوضوح و المواجهة في حاجات كتييييييير لازم توصلي فيها لحل بالذكاء و الانوثة !!!! هم بيحبو يضحك عليهم تعملي اييه بقى !!!!!!

نقطة من اول السطر

انا بعمل كدة كتيير خصوصا لما ابقى متدايقة و نفسي افضفض مع نفسي و اشتكيلي و اعيطلي

ارحميني من السبع تلاف موضوع الي فموضوع واحد دول !!!

بنسى كنت عايزة اقول ايه

Fatma يقول...

بعد حكاية شهد مانصحكيش انك تقري ساحرة بورتوبيللو لانها هي كمان كانت في ملجأ !!
مؤلم جدا احساس اللقطاء او من تخلى عنهم اهلهم مؤلم فوق الوصف

بالنسبة لكن صدقي الرد من القصيدة نفسها
"غير أن الرجل الشرقي لا يرضى بدورغير أدوار البطولة"
مين راجل شرقي هيبقى عنده استعداد تحكيله قصة حبك واحساسك ناحية راجل تاني ؟
مين راجل شرقي هيرضى ان حبيبته لما تتضايق تكلم صديقها الراجل التاني عشان تفضفضله باعتبار انه صديق ؟
مستحيل ..الصداقة بين الراجل والست في مجتمعنا انوجدت فهي صداقة مؤقتة بتنتهي بمجرد ارتباط واحد منهم
لو استمرت هتستمر في صور اخرى زي صداقة عائلية مثلا وهنا بردوهتتغير شكل الصداقة وهيتلاشى مع الوقت

مش دايما الحياة اختيارات ..احنا ممكن نقول عليه اختيار بس في الواقع هو واقع مفروض علينا بشكل او بأخر

الزهور ...ما بحسش غير بالورد البلدي وبالذات الأبيض

اذا اردتها فاطمة فكن انت علىُ ...دي جملة كنت بقولها انا كتير اوي

موضوع وفاةالمدونيين دا هزني هزةغريبة ..أثر فيا بشكل كبير جدا جدا جدا
بفكر جديا ادي لحد بثق فيه باسورد المدونة عشان يدمرها لما أموت

حاجات كتير من اللي انتي كاتباها كانت شاغلة تفكيري بقالها فترة يا فلة
انبسطت بالبوست اوي

محمد فوزي يقول...

الراجل بينسى مع المرأه نص الكلام يمكن عشان بيكون مركز قوي في النص التاني D:
إنما عموما المرأه بالفعل مخلوق معقد جدا مش قصدي انها عندها عقد لكن قصدي انها مستعصيه على الفهم دي حقيقه انا مقتنع بيها تماما
والقصيده نفسها بتقول كده لأني مش قادر افهمها إلا في إطار إنها بتحبه بس يمكن عاوزاه أحيانا في بعض الأوقات يكون صديق مش حبيب وطبعا ( البيه ) لازم يتوقع الأوقات اللي من النوع ده من نفسه لأنها غالبا معندهاش استعداد انها تعرفه هي عاوزه منه ايه امال هو بيحبها ازاي ؟ لازم يعرف لوحده هههههه
وإذا معرفش ؟ يبقى .......

وانا مع فنون في كلامها عن الصداقه بس ده ليه ؟ لأن العلاقات مش بيبقى فيها وضوح من البدايه , في طرف بيقول كلام وهو مش مقتنع بيه وأحيانا هما الإتنين

بالنسبه بقى لنقطة النفاق فلو كانت هي بتحبه اكيد مكانتش هتلعنه لما صحاها عشان تحضر له الفطار واكيد هو لو عرف ده مش هيكون سعيد حتى لو حطت على وشها كل إبتسامات الدنيا ,لو كانت بتحبه مش هتعتبر ده نفاق هتعتبره شطاره في التعامل مع حبيبها وتنازل عشانه زي ما هو بيتنازل اكيد كتير عشان يرضيها

بس المؤكد بقى ان الأفلام اللي كنا بنشوفها زمان طلعت مضروبه , ما هو يا إما كده يا إما البنات اتغيروا ومبقوش هما الطرف الرومانسي في علاقات اليومين دول

لحظه لحظه , هو انا بعك ولا ايه وشكلي هطلع من هنا متعور

بس بجد والله الجزء بتاع العروسه الغبيه ده جامد جدا يتدرس يعني

وكفى الله المؤمنين شر القتال هههههه

كل التحيه

Yasmine يقول...

انا و دماغى

ربنا يخليكى يا رب :)
بصى حكاية عبء عليه دى عندك فيها حق..عشان كده المفروض من الاول اللى مش مش قد المسؤولية دى ما يعملهاش..ماهواش فرض يعنى..لانه بجد حرام انك تعلقى الاطفال دول بيكى و بعدين تختفى فجاة من حياتهم..كفاية عليهم وجع اليتم

بالنسبة للشقر فانا ما ينفعش اخد منهم موقف الصراحة:D
بس انا مشكلتى مع التافهين اللى اقصى امنياتهم فاللى هيرتبطوا بيها انها يكون شعرها اصفر!!

مش كده برضه؟:)
والله يا بنتى انتى بتفهمى..اقولهم كده يقولولى الانوثة و شطارة الانثى و بتاع..الانثى هى اللى عندها ثقة فى انوثتها و فى نفسها زى ما هى من غير تمثيل ولا ادعاء حاجات مش موجودة و اللى مش عاجبه على كده الباب يفوت جنينة الحيوانات كلها مش جمل واحد :D

Yasmine يقول...

كوبرى

ياللهول!!!انت متاكد انك مش سخن؟؟
انت بتقول مدح؟ :D
بس اوعى تكون بتتريق عليا ولا حاجة..الا قضية المراة انت عارف :D

عارف اهم امثال الست دى هم اللى خلونى ابطل اروح هناك من زمان..بس وقتها كنت صغيرة و كنت شايفة كل ده و مش عارفة اعمل حاجة..دلوقتى ربنا يقدرنى بجد و اعرف انقذ ما يمكن انقاذه

كويس انك فهمت حياة شهد و اللى زيها عاملة ازاى..انا لما رحت كانت خطوبة واحدة من البنات و بالرغم من فرحتها الواضحة الا ان نظرتها كا فيها انكسار اليتم ده برضه..ربنا يتولاهم برحمته

انا ماعرفش قصايد تانية لسعاد الصباح بصراحة..بس دى من اكتر الحاجات المعبرة اللى قريتها فى حياتى

دى السواقة دى من اكتر الحاجات اللى مصبرانى على الدنيا :D

لو كانت بالمواصفات دى فالمفروض تسميها فتاة كوابيسى :D
المشكلة ان اغلب الامهات يا بيفطسوا بناتهم و بيقهروهم باسم التربية يا بيربوهم على الغباء الازلى ده..

Yasmine يقول...

ريم

لا روحى بجد..ادينى اهو كنت عاملة فيها الجامدة اللى مش هتتاثر و طلعت من هناك قلبى واجعنى على شهد بالذات..ده انا رحت اللى اصعب من كده كمان بس ربنا ستر و ما كانوش محتاجين متطوعين :)

بالظبط كده بس فكرة الحبيب الصديق دى مش مقبولة عند الراجل الشرقى عامة

عجبتنى الجملة دى اوى

تسلميلى يا ريم :)
كانها وصلت بالظبط

لا طبعا انتى مش دقة قديمة ولا حاجاة..طبيعى ان الست ترتبط براجل اقوى منها..امال هتعمل ايه بواحد ما تعرفش تعتمد على ولا على دماغه..فى الحالة دى القعدة فى بيتها احسن بمراحل طبعا..بس اللى انا اقصده ان ضعف الست فى انها تبين حاجات فى شخصيتها ما بتبانش لاى حد..انها تكون على طبيعتها بكل نقط الضعف اللى فيها..انها ترمى مسؤوليتها هلى واحد هى عارفة انه يقدر يشيلها لانها بتثق فى دماغه..ده ضعف الانثى اللى اقصده و دى قوة الراجل اللى المفروض تكون موجودة
لكن مش معنى كده ان الست تمثل انها من غير حبيبها هتموت او انها تفهمه ان ابسط الحاجات فى حياتها ما بتعرفش تعملها من غيره بس عشان توهمه انها مجتاجاله فى حياتها..او يمكن عشان انا مش بعرف اعمل كده فمش مستوعبة الفكرة و شايفة فيها نوع من انواع اللوع و اللف و الدوران

انا لو يسيبولى الفرصة مش هبقى عاقلة غير خميس و جمعة..و يمكن جمعة بس كمان :D

لو قصدك زى اللى فوق دول هم زى ما بتكتبيهم على الماسنجر يعنى نقطتين و قوس للsmile و كده

Yasmine يقول...

soly88

انا شايفة ان اللى زى شهد دول اكتر ناس عندهم حافز انهم يتمردوا على الواقع اللى هم عايشينه..و الاختيارات دى هى اللى بتفرق بين الفاشلين اللى قاعدين محلك سر و الناجحين اللى بيقدروا يحولوا كل هزيمة لنصر شخصى

و اللى زى شهد دول محتاجين بس حد يديهم ثقة فى نفسهم و فى قدراتهم و فى انهم يستاهلوا فعلا حياة محترمة و قبل كل ده انهم مش اقل من غيرهم ابدا..و بتمنى من قلبى انى اقدر اسيب التاثير ده فيها مع الوقت

اللى فهمته من القصيدة انها موجهة لحبيب مش لصديق..يعنى هى بتطلب من حبيبها انه يكون صديقها فى الاول و انه يحترم عقلها و دماغها

لا كتر خيره بصراحة :)

Yasmine يقول...

مواطن مصرى

ليه بس كده؟
انا اللى مسيطر عليا انى مش عايزة المدونة دى تفضل موجودة لما اموت لكن الموت نفسه مش عاملى ازمة فى حيانى يعنى

نورتنى بجد و اشكرك على ذوقك :)

Yasmine يقول...

لينو

انا بقى هبطل اقول لنفسي كده..حلو ان الواحد يسيب نقط ضعفه تظهر من وقت للتانى..انا زهقت من دور القوية اللى لابسنى على طول ده

اللى اعرفه ان الرجالة عادة عندهم commitment phobia و ان البنات اللى زى حالاتى اللى عندهم الحالة دى قليلين اوى :)
فطبيعى ان الراجل يستسهل يلعب دور الصديق و عن انه يربط نفسه بمسؤولية هو مش قدها

انتى هتقوليلى..ده شائع جدا جدا
ماما كمان من الناس اللى بتقول كده و ده من اكبر الخلافات الل بيننا..هى شايفة ان دى ثقافة مجتمع و انا شايفة انه غباء مالهوش اول من اخر
خصوصا لو البنت مستقلة ماديا عن جوزها لانه اكيد ساعتها هيبقى عارف ان اللى رابطها بيه مش الفلوس و اساسا اللى يتجوز واحدة و هو عارف انها لو معاها اللى يعيشها هتسيبه عند اول مطب ده يستاهل الخلع اساسا :D

و من ناحية تانية اللى مش بيراعى ربنا فى مراته عشان هو خايف من عقابه والله لو دفع ملايين الدنيا ما فى حاجة هتفرق معاه

ما هو عشان كده بالظبط انا بقول انى لا امت للانوثة بصلة :D

احسن حاجة بتطلعنى من المود انا كمان خصوصا ان التمشية فى الشارع ما بقيتش اوبشن للبنات عندنا

ارحمك اكتر من كده يا لين:D
ده انا كده مختصرة نص الكلام

Yasmine يقول...

فنفونتى

لا ما انا بعد اللى قريته عندك مش هقراها دلوقتى خالص..انا ناقصة نكده:D

هو اللى انا فهمته من القصيدة انها بتكلم حبيبها و بتطلب منه انه يكون صديق يحاور و يناقش و يعاملها على انها بنى ادمة مش تمثال حجر
بالنسبة لصداقة الراجل و الست فى مجتمعنا فهى مستحيلة و مش بس عشان السبب الى انتى قولتيه انا شايفة ان السبب الرئيسي فى الراجل نفسه..كتير منهم بيفسروا الصداقة دى على انها حب بشكل او باخر لان الرجالة هنا ما اتعودوش يشوفوا فى الست غير مزة يتفرجوا عليها و بعدين يتجوزوها

انا بقى عديت مرحلة التفكير من يومين
و قريبا جدا هتلاقينى بعتالك الباسوورد و اليوزر بتوع هنا انا كمان اتاثرت جدا فوق ما تتخيلى

بعد الشر عليكى يا قلبى ما تقوليش كده على نفسك الله يكرمك

و ايه الجديد فى توارد الخواطر بيننا ما ده العادى يا فنونتى
على فكرة امبارح كنت فى on the border و افتكرتك اوى ;)
وحشتينى اوى بجد

Yasmine يقول...

محمد فوزى

امال انا ليه مش بشوف فى الموضوع اى تعقيد؟ :)
الست كائن عايز يتعامل على انه بنى ادم مش على انه فيلم اغراء..ايه المشكلة فى كده فهمونى بجد عشان انا قربت اتجنن

و بعدين طبعا لازم البيه يفهم لوحده مش المفروض انه بيحبها..و الحب ده اساسه انه يكون فاهمها و فاهم هى عايزة تتعامل ازاى..الا اذا كان من النوع اللى بيكتفى بالشعر الاصفر و دمتم

مش عارفة اذا كنت فهمت ردك اوى او لا
بس انا معاك فى جزئية ان فى طرف هيقول كلام هو مش مقتنع بيه لان احساسه هيكون اكبر بكتير من مسمى الصداقة و ده لان الصداقة بين الراجل و الست مش من العلاقات اللى لها مكان فى مجتمعنا

طيب تقول ايه بقى لو قلتلك انى اعرف ستات كتير متجوزين من سنين و متبعين الطريقة اللولبية دى مع اجوازهم و الغريبة ان اجوازهم مبسوطين بيهم اوى و من ناحية تانية اللى بتقولهم انها قادرة تعيش حياتها و تعتمد على نفسها بتحسسهم بنقص فى رجولتهم لدرجة انى اعرف واحد طلق مراته عشان حس انها اقوى منه و هى لا اقوى منه ولا حاجاة هى بس قادرة انها تعيش من غيره و الفرق كبير اوى بين الاتنين

و فى نفس الوقت اللى بتقول انها ما بتعرف تنزل لوحدها او ما بتعرفش تسوق مثلا دى اكيد كذابة لكن فى ازواج بيفضلوا يقنعوا نفسهم ان ده واقع مع انه لا يمت للمنطق بصلة

ههههههههه لا قتال ولا حاجة بالعكس ردك اسعدنى جدا

Here i'm يقول...

لا يا فندم ..

انا مش عايزها بالمواصفات دى خالص :D

انا مسميها فتاة أوهامى علشان المواصفات بتعتى معتقدش أنى حلاقيها .. و ربنا يبعد عنا الكوابيس :D

لذا لزم التنويه :D

عايش... ولكن !!!! يقول...

يخربيت كده
ايه ده كله انتى جايباه منين
:)
اظرف ما فى الموضوع ان تكونى عروسه غبيه
بجد كل كلمه قلتيها بتحصل

اما الرجل الصديق فبكل امانه مش موجود كتير فى مجتمعنا

leeno يقول...

عارفة انتي أنثى و بشدة و حتفاجئي نفسك و انتي بتحبي

صدقيني انتي لازم تبقي صريحة وواضحة و على طبيعتك و كمان حقيقية

لكن الطريقة هي اللي بتفرق
ممكن تقولي لحد انك زعلانة منه و يبتدي يزعقلك و ممكن يسمعك كلام مش لطيف و ممكن برضه يقللك حقك علية كله الا زعلك

بتعتمد على الطريقة ... الانوثة جزء كبير منها الحنان و الرقة مش السهتنة و الخداع

دة اللي انا اقصده

اني تحتضني العلاقة بعقلك و قلبك فهمك و ذكاءك

انك توزني الكلام قبل ما تقوليه تفكري لو كنتي مكانه و هو بيسمع الكلام دة منك او بيسمع طريقتك احساسك حيكون ايه

تحسي بيه و بتعبه و تداويه و متزيديش عليه

شوية تضحية لما انتي بتبقي تعبانة مهياش تنازل و شوية تفهم لاحساسه مش تنازل

لما تلاقي بيعمل حاجة بتدايقك و تيجي تقوليله و انتي بتديله اوامر عمره ما حيسمعك و انتي لو بتتلقي اوامر عمرك ما حتسمعيه

لكن لو قاللك بلاش الحاجة الفلانية عشان بجد ببقى متدايق و احساسي اني متدايق منك بيتعبني او بيضايقني مش بحب ابقى زعلان منك

حيفرق معاكي الاسلوب طبعا و دة اللي انا اقصده

الانوثة و الرجولة كتير منها

اسلوبنا في التعبير عن نفسنا و عن مشاعرنا

فهمتيني و لا انا طينت الدنيا اكتر؟

Yasmine يقول...

معلش يا كوبرى العتب على النظر :D
انجز بقى انا عايزة اشوف البوست ده عشان بتوع سفارة الصومال الشقيقة مستنيين :P

Yasmine يقول...

عايش و لكن

دى شوية ملاحظات مختصرة كده على الماشى

انا ملاحظة ان الجزء ده عاجب الرجالة كلهم لدرجة انى بفكر اشيله :)
سايبين الموضوع كله و جايين على الجزء الوحيد الخاص بالبنات المظلومين دايما معاكم كده :)

مجتمعنا حاطط محظورات مالهاش اول من اخر ما جاتش على الراجل الصديق..

Yasmine يقول...

لين
لا طينتى ايه؟ :)
بالعكس كلامك حلو اوى و موزون جدا

و ده اللى اقصده فى طريقة تظهر انوثة الست من غير ما تقلل منها او تهين كرامتها ولا تخدع الطرف التانى بحركات لف و دوران و خداع مستفزة باسم الانوثة و الدلع

و على رايك الطريقة هى اللى بتفرق..و النية كمان :)

ReEm يقول...

النسبة لموضوع الانوثة كلامك من اللي اقصده بس ماعرفتش اوصلك الفكرة بس ان جينا للحق لو اتوجد الحب الحقيقي و التفاهم و الثقة مش هيفرق اي تصرف بين الاتنين


( و معلش هرجعك للاسميلات بس هوي ازيا بتظهر اصلا في المدونة انا عندي بتظهر رموز الكتابة نفسها مش الوش بتاع الايموشن )

Desert cat يقول...

شهد انا قابلت النسخة اللى بالكربون منها فى إحدى دور الأيتام بس كان اسمها بسمة ... ولما شوفت حسيت انها لا تملك من البسمة سوى الاسم فقط لكن عند رؤياكى لها للمرة الاولى تشعرى بانها تملك دفئ لا مثيل له
قصيدة كن صديقى اعتقد ان تعبر عن كل فتاة شرقية .. لحظة مش مخططين ليها طريق مش عارفينه بعملها احيانا لما بكون رايحه مكان غريب لاول مرة بحاول استشكفه لوحدى ولو توهت برجع تانى من نفس الشوارع اللى مشيتها

تحياتى

Yasmine يقول...

ريم

مش عارفة والله يمكن انا اللى مبكاها شوية بس انتى عارفة اهمية قضايا المراة عندى :D

لابنسبة للسمايليز فهم مس بيبانوا فى التعليق هو بس الرموز اللى بتبان انا فهمت انك بتسالى على الرموز نفسها معلش

Yasmine يقول...

desert cat
شهد فى منها ملايين ما بين اشارات المرور و الملاجئ و العشوائيات

بعمل زيك لما بتوه برضه..لأكن الغريبة انى بلاقى متعة غير عادية فى التوهان مع ان ناس كتير بتخاف لما تلاقى نفيها فى اماكن ما تعرفهاش

نورتينى يا قطة :)