الأحد، 15 فبراير 2009

صداع ان تكون انا فى هذه الايام..

*انك تلاقى ناس اكبر منك سنا بيسمعوك باهتمام و يشيدوا بارائك لدرجة تخضك
لانك فى نظر نفسك لسه ما سبتش الطفولة فتبقى عايز تسألهم على اى اساس بتاخدوا كلامى على محمل الجد و تتراجع فى اخر لحظة حفاظا على برستيجك *انك تفضل تدور على اغنية زمان لهشام عباس
لمدة ايام و لما تلاقيها تقرر ما تسمعهاش عشان ما تفكركش بحاجات مش عايز تفتكرها *انك تلاقى نفسك فى اغنية "ما بحبش" لانغام لدرجة تقنعك ان الاغنية دى تحديدا مستوحاه من قصة حياتك *ان ربنا يرزقك بمدير مجنون بيطلب منك تشترى موتوسيكل عشان تأدى شغلك احسن! *انك تلاقى امة لا اله الا الله بتناقشك فى حاجات اعتبرتها بديهيات من زمان فى حياتك
حتى لو كانت غير منطقية عند الاخرين و عملا بمنطق تيجى تصيده يصيدك تقنعهم انت بوجهة نظرك المريبة بدل ما يقنعوك هم! *انك تلاقى نفسك مضطر تطول لسانك على واحد فى سن جدك
عشان فى ناس بتكبر تعقل و ناس بتكبر تتهبل! *انك تلاقى اصدقاء ما شفتهمش من اكتر من 15 سنة لسه فاكرينك و بيدوروا عليك
فتفرح فرحة الاطفال لانك كنت فى يوم شخص مؤثر فى حياتهم *انك تلاقى نفسك بتفكر تنسحب من الحياة دى لحياة تانية لدرجة انك قربت تصدق ان ده ممكن يحصل *انك تعلق على جملة فى اغنية فيروز
" عندى ثقة فيك"
بمزيج من الدهشة و الاستغراب..
ثقة ايه فى الزمن الاسود ده؟!! *انك تقرر بارادتك تسيب الواقع و ترجع للطفولة بالعافية
فتدور على افلام ديزنى و تكتشف انهم كانوا بيضحكوا عليك
فسيندريلا هى السبب فى الظلم اللى شافته بسلبيتها و خضوعها
و سليبنج بيوتى بتنتهى نهاية ساذجة ما تدخلش عقل طفل صغير
و ياسمينة بتطير عشان تتفرج على الدنيا من فوق..
و بالرغم من كده بتقرر ترجع تانى للارض..
بقى ده اسمه كلام؟! *انك تعرف انك كبرت لما تشوف صحابك مع اولادهم مع انك كنت لسه مقتنع انك عيل..جدا *انك تكتشف ان اللى ما اشتغلش فى حياته هتفوته تجربة مش هتتكرر للتعامل مع اغرب انماط من البشر
و بالرغم من كده تتمنى ترجع لايام الدراسة عشان تفضل فى العالم الوردى البعيد عن النفساويات ده! *ان كل الظواهر و الاعراض تقولك انك لازم تروح لدكتور السنان و تصر اصرار غريب على انك كويس مش عشان انت شجاع و بتستحمل الوجع لكن عشان فوبيا الدكاترة وصلت لاخرها و بقت محتاجة علاج حقيقي بس هعالج الخوف من الدكاترة بدكتور ازاى؟ *ان تكتشف انك لما بتسمع كلام ما يعجبكش نظرتك بتكون كافية جدا عشان اللى قدامك يلحق نفسه اول مرة اعرف ان عندى نظرة بتخوف! *انك تكون فى حالة صدمة عنيفة بعد مشاهدتك لكاتبة كنت بتحترم كتاباتها بجنون فى انترفيو لاحدى القنوات و هى بتعترف بقصة الحب اللى جمعتها بنملة
كانت بتزورها فى مطبخها كل يوم لدرجة انها سمتها "انس" و كتبت فيها قصيدة شعر اللهم احفظنا من الثقافة و المثقفين و الجنان اللى بينزل معاهم! *انك ما تعرفش تمنع نفسك من الدهشة العنيفة على قضية مستشفى الفيوم الاخيرة و اللى مات فيها 25 شخص بسبب الاهمال و السبب معدات طبية ناقصة قيمتها اقل من 100 جنيه مع ان الفساد و انعدام الضمير
بقوا ضيوف دائمين على صفحات الجرايد اتاكدت ان مفيش حاجة رخيصة فى البلد دى الا البنى ادمين! *انك تكون قضيت اكتر فالانتين كوميدى
ممكن اى كائن برجلتين يقضيه بعيدا عن التفاصيل اللى مش هتهم حد غيرى ما يمنعش انى استمتعت بكل ثانية فيه. *انك تحس بالغضب و الحزن و الثقة و انعدام الوزن و القوة و الضعف و التعب و الامل و الزهق و الراحة و السعادة و الترقب و الانتظار و القلق و الخوف
و الرضا و الهدوء الذى يسبق العاصفة
و الانفجار و البرود .. فى نفس واحد *ان تعلم ان تكرار الحلم للمرة الثالثة لا يعنى اكثر من ان ما يعتبره البعض حلما قد يكون فى قاموسك الشخصى مجرد كابوس اخر *ان تعرف ما قد يفعله باكو بسكوت و علبة عصير فى قلوب مجموعة من العجائز فى دار "المنسيين" فتدعو الله لا بان يتذكرك الناس من حين الى اخر حينما تصبح مكانهم و لكن بالا يمتد عمرك لليوم الذى تكون فيه اقصى امنياتك ان يتذكرك مجهول بعلبة عصير و باكو بسكوت! *ان تعرف ان لكلمة "ماما" سحرا لا يفوقه سحر اى كلمة اخرى حتى و ان صدر من مجموعة ايتام لا تربطك بهم الا ساعة صباحية واحدة ايام السبت *ان تتأكد ان مجرد التلميح به اكثر من كافى لكى تبدأ لعبة الهروب *ان تتصارع بداخلك رغبتان الاولى ان تختبئ لدرجة الاختفاء و الثانية ان تظهر لدرجة الشهرة! ******* نقطة و من اول السطر "و كنت احسب الشر مقيما فى كوخ ادريس فاذا به فى دمنا نحن.. ان ادريس يقهقه و يسكر و يعربد اما نحن فيقتل بعضنا البعض! " نجيب محفوظ-اولاد حارتنا مشهد.. بنوتين بضفاير و صينية بسكوت بيتوتية الصنع و ريحة الفانيليا و صوت المطر و لون الشتا و دفا طعم الشوكولاتة.. و دندنة فيروزية ب"بعدك على بالى" و ماليش نفس اترجم معلش.

هناك 28 تعليقًا:

mohamed ghalia يقول...

أنا هرد بعنوان الموضوع
كونى انتى
دمتى بكل الود

blue-wave يقول...

انا هاموت واعرف
بتجيبى منين الكلام دا كله؟:))

رئيس جمهوريه نفسى يقول...

اولا اختيارك للاقتباس من اولاد حارتنا رائع لانى على عكس كل اللى بيتقال دي من اروع الروايات اللى قريتها وبحبها جدا

من موضوع البوست حعلق على حجات حكاية الاغنيه بتاعت انغام اللى بتعتبريها مستوحاة من قصة حياتك انا بشوف نفسي فى اغاني كتير مخصص ليهم فولد على الكمبيوتر وعلى الموبيل تحت اسم انا

موضوع المدير الحمد لله مش بعاني منه لانى بمنتهى البساطه شغال حر

موضوع العقل والسن مفيهمش اى ارتباط خالص

اقناعك لامة لا الله الا الله ما هو الا عبارة عن قدرة خاصة بيكى وايمان تام بمنطقك وسلامتة

عايش... ولكن !!!! يقول...

اولا انا مش عارف اقولك غير بجد انتى هايله فى كم الحاجات اللى جمعتيها دى وبجد معظمها موجود فيا

ReEm يقول...

هو انا بس هسيب تعليق عام احجز بيه مكان عشان فعلانفسيتي مش مساعدة على تعليق طويل ومفصل بس هرجع ارد على البوست حتى لو كتبتي غيره

ايامك مش بتجيب صداع ولا حاجة بالعكس لذيذة ومجنونة

لو عشتي ايام صدقيني هتحسي انه مالكيش داعي

leeno يقول...

انا مكنتش واخد بالي من الموضوع ازاي؟ !!!!!


لولا اني في الشغل كنت ردييت رد مطول بس عايزة اقللك اني ليكي اسلوب .......

زي لما تشربي كباية مية و انتي عطشانة


دة غير ان غالبية اللي كتبتيه انا

dr.lecter يقول...

لاااااااااااا ماتقولييش كده افلاام ديزني صادقه مش خياليه يالهوي ده انا اروح فيها علشان لغايه دلوقتي مصدق ان بينكويو ممكن يبقي انسان

واللبيب بالاشاره يفهم



كويس ان ولاد حارتنا عجبتك اسالي كده لما قولت انها روايه كويسه في المنتدي الاسلامي حصل لي ايه من سنتين رغم اني جبت لهم راي دكتور محمد سليم العوا فيها وبرده الكل اتهمني بالتجديف



الشغل ياعيني عليه

عارفه والله العظيم واحد صاحبي بيضرب نفسه بالجزمه علشان كان مستعجل علي التخرج

مالها الدراسه كانت حلوه ومافيش مسئوليات وبتشوف اصحابك وزمايلك كل يوم واهلك بيصرفوا عليكي ومش حامله اي هم ومافيش احتكاك بالعالم الخارجي

مش هتشوفي الاام ولا معاناه ولا قسوه ولا حسره ولا حالات تصعب علي الكافر ولا بروده مشاعر زي ولا حقد ولا حسد ولا عقد نفسيه زي اللي شفتها في ال 3 سنين اللي فاتوا

عارفه في اول سنه ليا في الشغل كنت هاتجنن بجد واعصابي كانت سايبه وخناقات طول الوقت في الشغل بس بعد كده بقيت علي اد ماقدر اتحكم في نفسي

كونك ان يتطلب منك مسئوليات رهيبه عليك انت لوحدك والكل يتهرب منها ويسببهالك ده اسمه حاجه كده بلاش اقولها


دكتور سنان وانا موجود ههههههههه؟

خليكي كده خايفه لغايه مضرسك يسوس علي الاخر ويوصل للعصب وتحتاجي علاج جذور وساعتها بقي هتشوفي الويل

لا بجد لازم تروحي انت مستنيه ايه ياروح مابعدك رووح

انت عارفه انا نفسي عندي مشكله كبييره ومش راضي اروح لاي حد من زمايلي علشان اللي بعمله في الناس مش يتعمل فيا ههههههههه




*انك تعرف انك كبرت لما تشوف صحابك مع اولادهم
مع انك كنت لسه مقتنع انك عيل..جدا


يووووووه بقي ماحنا قلنا اللي فيها

اه اصحابي خلفوا طيب وانا مالي واتزوجوا براحتهم

بس انا فعلا مش مستعد نفسيا امر بالتجربه دي لو كنت سالتوني من 6 اشهر كنت اقولكم العكس بس خلاص ماينفعش ليكتر بتاع امبارح مش بتاع النهارده شتان مابين 2008 و 2009


الفالنتين طاااي ياسلاام مافتكرتش انه فالنتين طاي الا علي الساعه 12 بالليل بعد ماليوم خلص لانه كان يوم طوييل مايين الشغل والماستر والسفر مافترتش الا مع فيلم توم هانكس وميج ريان بتاع النت ده الجميل قلت ياااه هو كان النهارده ؟






*انك تلاقى ناس اكبر منك سنا
بيسمعوك باهتمام و يشيدوا بارائك لدرجة تخضك
لانك فى نظر نفسك لسه ما سبتش الطفولة
فتبقى عايز تسألهم على اى اساس بتاخدوا كلامى على محمل الجد
و تتراجع فى اخر لحظة حفاظا على برستيجك



ههههههههههههههه

مش هارد هاخلي غيري يرد

Desert cat يقول...

جميع المواقف اللى حكيتيها بتحصل لنا وبنفكر فها بشكل او بآخر
اما حقيقى المشهد وانا بقرأه حسيت ان قلبى بينط من مكانه لدرجة خليتنى انى اتمنى اشوفك ولو لحظة واحده فى الوقت ده علشان اخدك فى حضنى
حقيقى دقة تعبير ووصف ولا اعظم فنان
تسلم كيبوردك يا قمر

The Seagull يقول...

"صداع ان تكون انا فى هذه الايام.."
---------------------------------

هو صداع بعقل :$ .. الواحد قرب يكره نفسه يا شيخة :D



*ان ربنا يرزقك بمدير مجنون بيطلب منك تشترى موتوسيكل عشان تأدى شغلك احسن
----------------------------------

ههههههههههه لا والله دمه خفيف :D عادي ما كل الناس مجانين .. كبري G وروقي D


*انك تلاقى نفسك مضطر تطول لسانك
على واحد فى سن جدك
عشان فى ناس بتكبر تعقل و ناس بتكبر تتهبل!
----------------------------------

عارفاهم أنا الناس دول :D ربنـا ياخدهم ويتولانا برحمته يا بنتي والله



*انك تلاقى نفسك بتفكر تنسحب من الحياة دى لحياة تانية لدرجة انك قربت تصدق ان ده ممكن يحصل
----------------------------------
This is EXACTLY ME
وأهو حاصل فعــلاً لأني بجد تعبت وقرفت :(((



*انك تعلق على جملة فى اغنية فيروز
" عندى ثقة فيك"
بمزيج من الدهشة والاستغراب.. ثقة ايه فى الزمن الاسود ده؟!!
----------------------------------

ثقة؟ يعني ايه؟ ثقة مين يا ماما صلي على النبي :D


*انك تعرف انك كبرت لما تشوف صحابك مع اولادهم مع انك كنت لسه مقتنع انك عيل.. جدا
----------------------------------

جيتي على الجرح يا اختشي :( .. أنا على طول ما بسلمش من التعلقيات دي من أهلي .. مش عارفة والله منين يقولوا انتو كبرتوا ولازم تتجوزوا .. ومنين لمـا الواحد ييجي يعمل حاجة والا يقول رأيه في حاجة تخصه يقولك انتو لسة صغيرين مش فاهمين حاجة .. حاجة غريبة والله بجد :D يكبرونا وقت ماهما عايزين ويصغرونا وقت ما هما عايزين .. منتهى التناقض الحقيقة!! أنا عن نفسي ما بهتمش اللي يتجوز يتجوز واللي ما يتجوزش ما يتجوزش .. انتو مالكم أصلاً ما كل واحد حر في حياته يعني :D



*انك تكتشف ان اللى ما اشتغلش فى حياته هتفوته تجربة مش هتتكرر للتعامل مع اغرب انماط من البشر وبالرغم من كده تتمنى ترجع لايام الدراسة عشان تفضل فى العالم الوردى البعيد عن النفساويات ده!
-----------------------------------

الله يطمنك :D الحمد لله لسة مجربتش .. بس في طريقي للحصول على وظيفة إن شـاء الله :)




*ان تكتشف انك لما بتسمع كلام ما يعجبكش نظرتك بتكون كافية جدا عشان اللى قدامك يلحق نفسه اول مرة اعرف ان عندى نظرة بتخوف!
----------------------------------
EXACTLY ME :D




*انك تحس بالغضب و الحزن و الثقة و انعدام الوزن
و القوة و الضعف و التعب و الامل و الزهق و الراحة
و السعادة و الترقب و الانتظار و القلق و الخوف
و الرضا و الهدوء الذى يسبق العاصفة
و الانفجار و البرود .. فى نفس واحد
----------------------------------

ما تقلقيش كلنـا هذا الرجــل :D





*انك تكون قضيت اكتر فالانتين كوميدى
ممكن اى كائن برجلتين يقضيه بعيدا عن التفاصيل اللى مش هتهم حد غيرى ما يمنعش انى استمتعت بكل ثانية فيه.
----------------------------------

والله يا أختشي أنا كان عندي محاضرات يومهـا وخلصتها وروحت على بيتنا نمت عشان الامتحان تاني يوم على طول :D بس ما مأنكرش إنه كان يوم سعيد عليـا جدًا الحقيقة :)




*ان تتصارع بداخلك رغبتان
الاولى ان تختبئ لدرجة الاختفاء
والثانية ان تظهر لدرجة الشهرة!
----------------------------------

ايه ده يا بنتي ده :D انتي دخلتي جوايا والا ايه :D



NICE POST

Fatma يقول...

صداع

اخس عليكي يا وحشة بقى انك تقضي الفالنتاين معايا صداع :(

انا لحد دلوقتي كل ما بفتكر بمووووت من الضحك بجد مش مصدقة اللي احنا عملناه

كفاية لعبة الهروب بتاعتك دي صدقيني ..خسارة


مش عارفه اعلق على ايه ولا ايه بصراحة ..البوست في مجمله حالة مثيرة لمشاعر مختلفة

Yasmine يقول...

mohamed ghalia
ما هو انا اساسا ما ينفعش اكون حد تانى :)

Yasmine يقول...

bluewave
انهى كلام فيهم بالظبط؟ :)

Yasmine يقول...

رئيس جمهورية نفسي

انا فى ربع الرواية تقريبا و شايفة الرموز اللى فيها مبهرة..حدوتة عن الانسان من بدء الخليقة لحد دلوقتى..و لحد ما وصلت مش شايفة فيها اى اساءة لاى دين

احسن حاجة عملتها انك اشتغلت حر و اسال اللى زيي

اتمنى تكون عندى القدرة دى..مع انى مش مقتنعة انها موجودة الحقيقة

Yasmine يقول...

عايش و لكن
ربنا يكرمك يا رب
كويس انك لقيت حاجات شبهك فى الموضوع عشان ما ابقاش انا لوحدى اللى فى الصداع ده :)

Yasmine يقول...

reem
مالك يا ريم بس؟..روقى بجد كله بيعدى
عموما انا هستنى تعليقك و مش هكتب حاجة تانية لحد ما تيجى شوفتى بدبسك ازاى :D

و على فكرة مافيش حد مالوش لزمة فى الدنيا..دورى على حاجة بتحبيها و اعمليها و هتلاقى الافكار السلبية دى كلها بتروح :)

Yasmine يقول...

لينو
ايه الكلام الكبير ده :)
ربنا يخليكى يا رب بجد اسعدتينى بكلامك
و ماليش دعوة بالشغل انا عايزة رد بالفصيل الممل عشان اعرف لقيتى نفسك فين فى اللى مكتوب..هو دخول الحماما زى خروجه ولا ايه؟:D

Yasmine يقول...

لكتر

ديزنى كان من ضمن الاوهام اللى كانوا عايزين يعيشونى فيها و انا صغيرة..بس على مين انا طلعت واعية و فهمت اللى فيها..و يا ريتنى ما فهمت

اولاد حارتنا رائعةاو على الاقل الشوية اللى قريتهم لحد دلوقتى..بس عامة معروف الحساسية اللى عندنا من الدين و من اى حاجة متعلقة بيه..و معروف انه فى بلدنا الحبيبة المنع و الحجر و التكفير هم اسهل الطرق لترييح الدماغ

هى فين ايام الدراسة دى؟ :(
الواحد كان يصحى مالوش مزاج ينزل الكلي فيقضيها نوم دلوقتى عندى معاد و بصمة عشان يعرفوا باجى امتى و بمشى امتى و حاجة تقرف
الحاجة الوحيدة اللى مصبرانى هى الناس..و مش كلهم كمان

ههههههههههههه
انا عايزة دكتور نفسانى الاول عشان يعالج خوفى من الدكاترة..و متخوفنيش لو سمحت..هم قرصين بانادول و هخف ان شاء الله :D
و بعدين انا مش خايفة خالص..نوهائى يعنى..انا مرعوبة بس :D

امبارح بالذات و بعد ما زرت صحبتى فى بيتها الجديد لاول مرة اكتشفت ان الليلة دى مش بتاعتى خالص

انا بقى كنت فاكرة انه الفالنتين بس السنة دى قررت اقضية بالشكل الكوميدى اللى قضيته بيه ده

بتضحك عليا :))
على فكرة دى من اكتر الحاجات اللى مازمانى فى حياتى..انا لسه مقتنعة انى طفلة و مش بعيد قريب اروحلهم الشغل بضفيرتين :D
بجد بتخض كل ما بتحط فى الموقف ده

Yasmine يقول...

desert cat
كلامك اثر فيا جدا بجد..ولا فنان ولا حاجة ده حلم صغنن كده من احلامى :)
ربنا يخليكى يا حنان بجد..و اسمحيلى اكلمك باسمك..حقيقي كلامك اسعدنى اوى

Yasmine يقول...

the seagull
انتى بتروحى فين يا بنتى؟انا كل يوم اعدى على المدونة بتاعتك و اقول هلاقيها رجعتها الاقيها مختفية لسه..رجعيها بقى يا يويو عشان خاطرى :(

بالنسبة لصداع فهو قرب يقلب على جنان رسمى دعواتك بقى :)

دمه خفيف.!! ده انا حاسة انى وقعت فى مستشفى المجانين يا بنتى


تصدقى انا مش بدعى عليه..انا بدعيله ربنا يشفيه لانه بجد قلب على كائن كوميدى ينفع يتعمل عليه فيلم


لو عرفتى فين المكان التانى ده ابقى قوليلى الله يكرمك..عشان انا بجد وصلت لاخرى يعنى

عليه الصلاة و السلام..انا عارفة انك زيي فى الحكاية دى و اكيد انتى عارفة هى متعبة قد ايه


انا بقى عايشالهم فى دور الصغيرة و اللى مش شايفنى صغيرة فبقولها بكل ثقة واشمئناط انى single forever و اللى مش عاجبه الحيطان كتير يخبط دماغه فى اللى تعجبه :D


ربنا يوفقك يا يويو ان شاء الله..و ما تقلقيش هتلاقى ناس من كل الاشكال انا بس عشان كتبت الموضوع ده فى يوم حصلت فيه مشكلة كبيرة فى الشغل..غير كده الحياة بتبقى وردى :)


انتى كمان عندك نظرة بتخوف؟!!!ده على كده الناس اللى هنا المفروض يبتدوا يخافوا مننا بقى

لا ما هى التناقضات دى فينا كلنا او انا بطمن نفسي و اقول كده

ما تغيبيش تانى كتير كده بقى :)

thank u:D

Yasmine يقول...

فنفونتى
لا انا قلت انى استمتعت بكل ثانية فى اليوم ده..انظرى فوق تانى :D

انا كمان بموت من الضحك كل ما افتكر الراجل و هو بيقولنا هابى فالنتين :D

باينى مش بعرف العب العاب تانية يا فنونتى غير اللعبة دى

عجبتنى مثير للمشاعر المختلفة دى..يا فنانة يا انا:D
شوفتى التواضع اللى انا فيه :))

ReEm يقول...

رجعتلك بالتعليق المفصل طالما ادبست :D

بس اولا مبرووك على التغيرات الحلوة في المدونة

على اساس انه الكبر بالعقل مش بالسن
و سيبك اهم حاجة الواحد يحافظ على البرستيج


بتحصل معايا و في حاجات كتير من كتر ما تعوزي الشيء لما تلاقيه بتفقدي اهتمامك بيه


والله هما دول المدراء اللي يفتحو النفس و يخلو الواحد يشتاق لبكرة في الشغل هيشوف ايه منه


اللي قد جدو ده بقى ينطبق على مثل من جعله نفسه قمامة بعترته الدجاج


ياااااه على الاحساس ده لما شوفت صحبات الاعدادي قعدنا نسلم على بعض و نحضن بعض و نضحك و نقول غبار غبار ده دلالة على قدم الصداقة و اننا ماشوفناش بعض من زمان


هو في ثقة بس في ماما و بابا و بس


بما اني في فترة عدم الحنين للطفولة فهو على قد ماحلو ترجع للطفولة على ما بكتشف قد ايه كنت هبلة و بريئة و حاجت كتير غير منطقية مشيت عليا يلا اهي ايام ودت


حتة الكبر و المعيلة دي بجد جيتي على الجحر انا قررت اخفف من علاقتي بالمتزوجات دول شوية و اقرب العزبات زي حالاتي


انا نفسي اشتغل بس حتى في ايام الجامعة بصراحة شوفت و تعاملت مع حاجات غريبة من البشر كنت اجهل تواجدها في العالم ده فعلا اللي يعيش ياما هيشوف


اخرك هتروحي للدكتور اسمعي كلامي وجع ساعة و لا كل ساعة روحي بنفسك و انتي راسك مرفوع احسن ما تروحي بسبب هزيمة الالم


ربنا يحنن قلوبنا على اهالينا و يحنن قلوب اولادنا علينا


اهو ماما دي بستنى اليوم اللي اسمعها
يابختك ياستي بيها حتى لو مش من دلادك


ماتضيعش عمرك في الهروب يا ياسمين ساعات الهروب بيخلينا نضيع حاجات قيمة مننا

انت تسال والكمبيوتر يجيب يقول...

نحن على استعداد ان ناخذ كلامك على محمل الجد ولذلك نوجه لك هذه الدعوه
دعوه
الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://dear.to/cairo

The Seagull يقول...

حاضر يا جميل مش هاغيب تاني إن شـاء الله :D بس المدونة ما أوعدكيش بصراحة إني أرجعها تاني :D أصلاً مافيش حاجة اكتبها والله يا بنوتة ماعدتش فاضية خالص بجد وماعادش ليـا نفس زي الأول :)إن شـاء الله هبقى معاكم على مدوناتكم وعلى لمــة :D

Yasmine يقول...

ريم

الله يبارك فيكى كويس انها عجبتك..انا الصورة وهمتنى الحقيقة فلونت بقيت البلوج بالوان تليق عليها :)

هو انا ما فقدتش اهتمامى بالاغنية..الحكاية انى لقيتنى هفتكر ايام مش عايزة افتكرها فرجعت فى كلامى

يا ريته يفتح النفس..انتوا فهمتونى غلط ده من اسخف الشخصيات اللى قابلتها من كتر سخافته بيبان على وشى القرف و انا بكلمه و زمابلى ما وراهمش حاجة غير الضحك على منظرى :D


حلو اوى المثل..و لايق اكتر مما تتخيلى

انا كمان فرحت اوى لما قابلتهم..مش اوى اوى يعنى :)..بس فرحت انهم لسه فاكرينى


ده بالكتير ماما و بابا

اهو انا بقى نفسي فى الفترة اللى مابقاش فاهمة فيها حاجة دى و ابقى شايفة الناس كلهم حلوين..عمرى ما عشتها الفترة دى

انا بقى كل ما اشوف صحابى المتجوزين اقول الحمد لله على نعمة الحرية :)


تفتكرى كده؟! قولى لعقلى يبطل جبن بقى عشان اعرف اخد الخطوة الجريئة دى :)

اللهم امين


ربنا يرزقك بيهم يا رب و تسمعيها لحد ما تزهقى منها

هقولك زى ما قلت لفنون..تقريبا دى اللعبة الوحيدة اللى بعرف العبها..حتى لو عارفة ان فى حاجات حلوة هتضيع فى السكة

نورتينى يا ريم و مبسوطة اوى انى دبستك :)

Yasmine يقول...

the seagull
طيب المدونة و هنسيبك براحتك و ان شاء الله يجيلك نفس و ترجعى تكتبى فيها تانى..لكن المهم انك ما تغيبيش عننا تانى كده لا هنا ولا فى اللمة :)

Yasmine يقول...

انت تسال و الكومبيوتر يجيب
مش عارفة ادخل على المدونة..مكتوب ملف التعريف غير متاح

مواطن مصري يقول...

بصراحة رائعة احساسك عالي اوي

Yasmine يقول...

متشكرة اوى..ربنا يخليك :)