الاثنين، 6 يوليو 2009

شخبطة (2)

حدث بالفعل..
- مستغربة انى بتوه الموضوع؟ - جدا بصراحة - ما اتعودتش ابهدل بنات الناس معايا - ماحدش قالك بهدلها..بس على الاقل اديها حق الاختيار - كرامتى اولا - هى كمان بتحبك..و انت عارف انها محتاجة حد ياخد باله منها - اديكى قلتى ياخد باله منها..مش يعذبها معاه - و بعدين؟ - انا معجب بيها جدا..بس انا ما معيش فلوس احب
*****
نقط نور.. فى ناس وجودهم فى حياتنا بيديها معنى اكبر بكتير من اللى تستاهله مش شرط نكون بنشوفهم كل يوم و مش شرط يكونوا من ثوابت يومنا ولا شرط يكونوا اهل او حتى صحاب قريبين كفاية ان ظهورهم بيكون دايما فى الوقت الصح سلمى..لو جيتى هنا فى يوم..اعرفى انك من اهم الناس دول
*****
حشرية.. - مسكينة.. مضللة و مش عارفة ايه مستنيكى اللى زيك هيعيشوا فاكرين نفسهم ضامنين الجنة
و هم مصيرهم جهنم و بئس المصير - مسكين.. مغيب و هتفضل طول عمرك شايف الدنيا من خرم ابرة.. اللى زيك عمرهم ما بيعرفوا من الدين غير جلد الذات
و الرضا عمره ما بيدخل قلوبهم
*****
مبررات..مبررات..مبررات عندما تركها تسافر بدعوى كونه "متحضر" عرفت وقتها فقط
ان ما اعتبرته هى "اغلى من حياتها"كان بالنسبة له مجرد "نزوة"
*****
اكتشاف لو كل راجل سمع اللى مراته بتقوله عليه
فى قعدات الستات و محلات الكوافير و الجيم نص ستات مصر مش هيطلع عليهم صبح فى بيت اجوازهم
*****
يا لهوى.. - ازاى مش بتحبى الدستور؟!
كفاية انه الجرنال الحكومى الوحيد اللى مش بيقول غير الحقيقة
*****

فراق فقط لانها عندما تحزن تكون "الست" ملجأها الاخير و عندما يحزن هو تعلو موسيقى بيتهوفن فوق صوت احزانه اخبرها انه "مش هينفع"
*****
امتلاك احيانا يتحول الحب الى رغبة فى السيطرة و كثيرا ما تختلط الصداقة بالغيرة المرضية قديما قالت فيروز "انا عصفورة الساحات" فهى ليست ملكا لاحد..و لن تكون
*****

No comment - مالك؟ - ماليش..عايزة افضل ساكتة شوية - مخنوقة؟ - ايوة - شكلك باين - .... - احكيلى - مش قادرة - خلاص هحكيلك انا.. عارفة ان ... مات و ... دخلت المستشفى و ... بيقولوا انه بيموت و ... عندها ورم و لسه مش عارفين نوعه و ... اتيتم امبارح و عنده امتحان ماجيستير بكره و ... ضيع حياته و شكلنا مش هنتجوز.. خدينى فى حضنك عشان عايزة اعيط اوى و قوليلى بقى اعمل ايه؟
*****

سوء تفاهم عندما بدأ يشك فى قدرته على التعبير ظن انها لا تراه مع انها تراه جدا.. لكنها لا ترى انها تستحقه
*****
اسقاط.. الندل شايف كل الناس اندال و الكذاب بيشك فى كلام كل اللى حواليه و الخاين بيفترض الخيانة فى كل اللى يعرفوه افهم من كدا ايه؟
*****

عندما قالت: "مفيش حاجة اسمها اتخلقت عشانى..عشان انا ما اتخلقتش عشان حد!" فاجاب هو: - لانك لم تكونى ملكى منذ البداية..فانا ابدا لن اخسرك
*****

كلام عجبنى لماذا يختار الرئيس مبارك ان ينشر اولى مقالاته فى صحيفة امريكية و هو لديه صحف "شورى الشريف" التى تعطس اذا اصيب الرئيس بالزكام؟ محمود الكردوسي- المصرى اليوم
*****
ادراك
عندما يؤكدون انهم يتقبلون عيوبك
فتاكد ان اخر همهم هو ان يقبلوك كما انت صدق اللى قال "و من الحب ما قتل"
*****
ورقة ضغط فقط لو عرف كم يضغط عليها برقته معها..
*****
مقولة.. Only dead fish swim with the stream وحدها الاسماك الميتة هى التى تسبح مع التيار
*****
Reconsideration But how will I know who my soul mate is?
By taking risks, By risking failure, disappointment, disillusion, but never ceasing in your search for love. Brida-Paulo Coelho

هناك 25 تعليقًا:

Romaya يقول...

تسمحيلي اعلق على فاصل (No comment)
لإني بجد لمست الموضوع دا كتير ..

لسه من كام يوم صديقة ليا بتكلمني وبعد السلام بتقولي مالك ؟
قولتلها ابدآ مفيش
وفي الحقيقة انا كنت مخنوقة عالاخر ومش طايقه اكلم ولا اتكلم مع حد
بس بسمع منها مش اكتر ..
وفجأة لاقيتها حكيتلي اللي في قلبها كله مع انهااااااار من الدموع والبكى

مش قادرة اقولك انا حالتي كانت عاملة ازاي ؟!

هديتها و قولتلها كلمتين اواسيها بيها لحد ماهديت
بس مع كل كلمة طالعه مني ليها كانت بطلوع الروح

في الوقت دا حسيت قد ايه البني أدم تقييييل اوووي

صحيح في ناس بتستحمل وبتسمع وبتخفف عنك ولو بالكلمة بس فالنهاية هو بني أدم زيك .. هيجي وقت وتلاقيه انفجر !

عشان كدا لما بكون في اشد الحاجه اني اتكلم وافضفض لحد بكون عارفه انا هتكلم مع مين وهيستحملني ولا لاء والناس دي قريبة مني جدآآ

وبرغم من كل دا بعد ماتكلم تلاقيني بعاتب نفسي اوووي واشيل هم اللي حكيتله
علشان كل بني أدم فيه اللي مكفيه زي ما بيقولوا.. فمهياش ناقصة

صفا سارة يقول...

كالعادة ردى عليكى هيكون انك عبقرية بجد بحس سعات انك بتقولى حاجات جوايا :)

mohamed ghalia يقول...

الموضوع دسم أوى جواه معانى كتير بجد
دايما مواضيعك رائعة

dr.lecter يقول...

اول حدوته

شفتها 3 مرات فعلا والبنت اللي تفتكر انها هتستناه وتتحمل لغايه مايكون نفسه يبقي بتحلم

هو نفسه ضميره هياكله من جوه ومش هيعرف ينام ولا يرتاح الا لما يخلص من الحمل التقيل ده

ورحم الله امريء عرف قدر نفسه

احنا مش في زمن الرومانسيه علي راي واحده بتفضل كيلو كفته علي بوكيه ورد

معلش انا كلامي تقيل شويه علشان بطلت اعيش في اليس في بلاد العجائب



مبررات مبررات

يبقي تستاهل اللي جرا لها





اكتشاف

انت بتقولي فيها امال بقي لو سمعتي اللي بيتقال عن مراتات بعض في قعدات الرجاله تتعحبي امال هو اتنيل علي عين امه اتزوجها ليه ودبس نفسه ليه

يقولك علشان اللقمه الهنيه والنومه الطريه والاقي حد يناولني الليفه وانا بستحمي

وتقولا في الاخر ياعيني علي الزواج

اشبعوا بقي به ياحلوين


الدستور زي الفجر زي المصري اليوم زي صوت الامه

كله محصل بعضه

جرانين فاكسه مع احترامي لمحيبي المصري مش اليوم بس انا مش مهتم بالصحافه المصريه اصلا ولا بثق فيها ولا باتعظ منها

يمكن اهو اللي شايفه معقول الي حد ما ولسه بجرب فيه الشروق بس فيه عيوب برده


نو كومينت

مسخره بجد الله يكون في عونك



اسقاط

بيقولك ازاي فيه مجرمين وحراميه ومغتصبين وزناه وفاسدين ومرتشين
جم منين دول كلهم؟
قولتله جم من عندك ومن عندي

جم من عندنا من وسطنا


*****

عندما قالت:
"مفيش حاجة اسمها اتخلقت عشانى..عشان انا ما اتخلقتش عشان حد!"
فاجاب هو:
- لانك لم تكونى ملكى منذ البداية..فانا ابدا لن اخسرك


صح كده تمام




الريس سببوه في حاله بقي الراجل بيفصل شحن سبيبوه يعيش ايامه الاخيره بسلام




مقولة..
Only dead fish swim with the stream
وحدها الاسماك الميتة هى التى تسبح مع التيار
*****


some times not




فقط لو عرف كم يضغط عليها برقته معها..


يابخته بجد بس هي تلين بس




امتلاك
احيانا يتحول الحب الى رغبة فى السيطرة
و كثيرا ما تختلط الصداقة بالغيرة المرضية
قديما قالت فيروز "انا عصفورة الساحات"
فهى ليست ملكا لاحد..و لن تكون


ماتفهميش ليه بيحصل ده بجد

ليه كل حاجه حلوه بتبقي ااوفر اووي وتبتدي تخنق بجد


فراق
فقط لانها عندما تحزن تكون "الست" ملجأها الاخير
و عندما يحزن هو تعلو موسيقى بيتهوفن فوق صوت احزانه
اخبرها انه "مش هينفع"

طبعا مش هينفع

واحد بيسمع بيتهوفن عاوزاه يكمل مع واحده بتسمع الست

مع اني بحب ام كلثوم طبعا

بس استحاله ده ينجح مافيش توافق خالص



بالظبط زي اللي بيسمع عاوز اشرب سيجاره بني وواحده بتسمع صابر الرباعي

بزمتك انت مين الاحسن


طبعا سيجاره بني دي اغنيه جامده طحن بقيت كييف الاغاني دي معرفش ليه بس حاسس انها بقت زي الراب الامريكاني











Reconsideration
But how will I know who my soul mate is?
By taking risks,
By risking failure, disappointment,
disillusion, but never ceasing in your search for love.



for me....dont searsch for love

if its written for u to meeet ur soulmate
it will be done

so dont waste ur time and energy on something u r not sure even u meet it..will it end w sentence like

and they lived happily ever after

its all pullshit





ياللا كفايه كده انت رغايه بشكل فظيع روحي نامي بقي ورايا شغل

ReEm يقول...

كله نصيب بس لو فعلا هيبهدلها يبقى بلاش

نقط نور

فعلا اتفق معاكي و بقوة شديدة في النقطة دي

حشرية

هو بجد ده حوار حقيقي لو بجد يبقى دي ناس مش واعية انها نصبت نفسها مكان ربناو لله المثل الاعلى طبعا الله يعنهم على بلوهم

مبررات

مافهمتهاش اوي بصراحة

اكتشاف

و لو الستات تسمع كلام الرجال عنها ازواج كتير هيباتو الليل في الشارع

فراق

جايز الحكاية اكبر من كدة وجايز تفاهة

امتلاك

يمكن لاننا مابصدق نلاقي شخص عدل عشان كة بنتمسك بيه بهبل يخنقه و يخنقنا

نو كومنت

هههههههههههههه
عادي يا ستي

اسقاط

كلا يرى الناس بعين طبعه

Only dead fish swim with the stream
وحدها الاسماك الميتة هى التى تسبح مع التيار

مش دايما اوقات السباحة مع التيار ذكاء و السباحة ضده رعونة و غباء

اخر نقطة بقى و بما اني لغة التانية تايواني هرد حسب فهمي و يارب شكلي ما يطلعش وحش و اكون فهمت صح

هو مبدئيا في ناس كتير بتقول مافيش حد ممكن نطلق عليه الوصف ده في الحياة و انا بقول فيه بس الحكاية كلها قسمة ونصيب و شوية حظ حلو القسمة و النصيب مفروغ منها طبعا اما الحظ الحلو بيخلي يطلع تؤام الروح و اللي ماعندوش حظ بقى يقعد تحت رحمة القسمة و النصيب

و ربنا يستر من الرد الاخراني ده

على باب الله يقول...

عجبتني كل القصاقيص , صحيح معنديش تعليق محدد على قصقوصة مُعينة ، لكني في النهاية أستمتعت بالخلطة و لاحظت أن أسلوبك جميل و مُكثف ، و عندك موهبة إختيار العناوين .

Here i'm يقول...
أزال المؤلف هذا التعليق.
Here i'm يقول...
أزال المؤلف هذا التعليق.
Here i'm يقول...
أزال المؤلف هذا التعليق.
Here i'm يقول...

حدث بالفعل ..

الواد دا أنا احترمته قوى قوى يعنى .. بجد بنى أدم نضيف .. على فكرة كلنا هذا الرجل :D

نقط نور ..

فكرتينى بفيلم if only .. أنه ضحى بنفسه و هيا مش عارفة أنه ضحى بنفسه و عارفة أنه حادث عادى .. أنتى كمان على منا اعتقد مش حتقوليلها فى وشها الجملة دى .. و كمان هيا مش حتشوفها


حشرية ..

مش عارف ..

مبررات مبررات ..

لو متركهاش تسافر .. كانت حتقول ايه ؟؟
هيا لو بالنسباله نزوة .. يبقى على ما اعتقد هيا كانت عارفة بس بتتأكد و مش السفر اللى حيخليها نزوة .. أكيد كانت عارفة يعنى


أكتشاف ..

ببقى حتجن لما بسمع حد بيتكلم عن أهله أو مراته وحش .. حتى لو فى مشاكل الدنيا .. أنا من النوعية اللى مبحبش أقول أنى متعارك مع أبويا أو كاره مراتى .. حتى فعلا لو متعارك أو كاره .. عيب


يالهوى ..

سلميلى على اللى قالك الجملة دى .. و قوليله أستمر أستمر :D


فراق ..

أنا بحب notting hill و هيا بتحب عمر و سلمى :D


إمتلاك ..

مش عارف .. بس انا من الناس أن الأمتلاك يكون من الطرفين فى الحب .. بس أمتلاك نضيف يعنى .. مش أمتلاك يخنق .. أنا ليكى و أنتى ليا و مفيش حد من طرف تالت :D


no comment

الناس دى طيبة قوى .. أول ما تقولك مالك أعرفى أن هيا اللى مالها .. فى ناس عندها قدرة رهيبة عن الحكى .. أنا ممكن أحكى بس بحكى اللى هوا عادى يعنى اى حد بيحكيه .. لكن بالطريقة دى أوفر بصراحة



إسقاط ..

اه فى كده فعلا .. فى الحرامى اللى شايف كل الناس حرامية .. بس مش شرط اللى شايف كل الناس حرامية يكون حرامى .. ممكن يكون أتسرق قبل كده و أتعقد :D



عندما قالت ..

ليه دايما فكرة البديهيات .. انا مش حكون لحد مهما كان .. انا بحب " لم " و مبحبش " لن " :D


كلام عجبنى ..

لا الفكرة مكنتش فى أنه مش واثق .. الفكرة لو تلاتحظى حتة أنه أختار مجلة أقتصادية من المقام الأول .. و كان سبب الاختيار ان الواشنطن بوست و نيويورك تايمز بتكتب وحش عن مصر و مبارك .. و بالتالى هوا حب يرد عليهم بمعنى أنه غضبان عليهم و حيدى مقاله السياسى للصحيفة الأقتصادية .. وصلت :D


أدراك ..

لا معتقدش .. أو يمكن أكون انا مفهمتش صح :D


ورقة ضغط ..

على ما أعتقد انها لازم تحترم نفسها بقى :D

مقولة ..

فى أوقات بيبقى السباحة مع التيار لازمة .. الواحد بيتعب من كتر السباحة ضد التيار .. المشكلة أنى قادر على التيار و حسبح .. بس بيبقى المشكلة فى اللى حواليكى

Brida-Paulo Coelho

مفهمناش يعنى فى الأخر .. حتفضل تبحث ولا لأ .. صدقت أنها ممكن تلاقيه ولا لأ .. أعذرينى أبلة سعاد مكنتش بتدينا من كتب عم باولو :D


يالهوى كل دا كلام و تعليق .. على ما أعتقد انى مسبتش فتفوتة واحدة .. و بعدين أيه النشاط دا .. دا انا حتى ملحقتش أرد على البوست اللى فات :D

أسماء علي يقول...

ايه البساطة الشديدة دي و العميقة اللي وجعتني
!!

حدث بالفعل:
لو يعرف إنه من غير فلوسه و برجولته أهم من ألف واحد معاهم فلوس و هما مايعرفوش من الرجولة ريحتها
لو يعرف إنه لما يسيبها هي البهدلة بعينها

نقط نور:
آه فعلا .. نقط النور أو زي مااباسميهم نقاط التوازن في حياتي
في ناس قليلة في حياتنا بيبقوا كده

حشرية:
أغلب مجتمعنا حاليا مُغيب بالطريقة دي

مبررات:
مش لازم بس احساس الأنثى أغلبه صدق

اكتشاف:
هههههههه حقيقة علمية

يالهوي:

ده أنا اللي لازم اقول يالهووووي

فراق:
صعب فعلا

امتلاك:
أنا عصفورة الساحات
تلك الحقيقة التي لو يفهمها الجميع لتوارت مصائب كثيرة

no comment:
آه بتحصل كتير .. و باتوجع أكتر ما أنا و بادخل في دوامة اكتئاب سوداوية
بنشيل هموم حبابيبنا على همومنا

سوء تفاهم:
اسوأ سوء تفاهم و من القلب باقول الآآآآه

اسقاط:
فعلا

و عندما قالت و هو قال
واقع يحدث كثيرا

كلام عجبني

هههههههه عجبتني بس أصل الريس دايما عنده طموح للأحسن
:))

***
اللي بيقول انه هيتقبل حاجة بيبقى فعلا مش ناوي يتقبلها لكن ناوي يفضل يتكلم و يتناقش فيها طول الوقت
المتقبل و المقتنع مش بيناقش أصلا

***

أحيانا الرقة تكون ضغط على النفس أكثر من القسوة فعلا

***

كويلهو

حكمته أصابت


........

دامت روعتك

Yasmine يقول...

مروة
تخيلى بقى انى بتعامل مع البنى ادمة دى 9 ساعات فى اليوم :)
من كتر ما ببقى على وشك الانفجار فى اوقات معينة ساعات ضميرى بيانبنى انى مش قادرة اسمع و لو سمعت مش قادرة اطبطب و لو طبطبت مش قادرة الاقي حلول..بس فعلا البنى ادم تقيل اوى عشان كدا لما بلاقى انى هموت و احكى..ما بحكيش برضه :)

Yasmine يقول...

صفا سارة
والله ولا عبقرية ولا حاجة :)
تسلمى بجد مش عارفة اقولك ايه..كويس ان الموضوع عجبك مع انه طويل اوى المرة دى برضه

Yasmine يقول...

mohamed ghalia
متشكرة بجد على متابعتك المستمرة و كلامك فى حقى..نورتنى بجد

Yasmine يقول...

ليكتر

ليه بس بتسودها فى وشى كدا..دا انا اللى هو انا اللى بعيدة تماما عن الاحلام الوردية دى عندى امل ان قصتهم تكمل..يمكن مش دلوقتى بس ليه لا بعد كام سنة..المشكلة ان هى مش فاهمة انه بيبعد عنها عشان كدا و لما فهموها شوية قالتلهم انه انانى فى تفكيره عشان هى عايزة تعيش معاه القصة لاخرها..بصراحة لحد دلوقتى متلخبطة و مش عارفة اقولها راى..بس لو ربنا كاتبلهم يكملوا مع بعض اكيد هيكملوا

انا برضه بقول كدا :)

هههههه طيب ما تقولنا الرجالة بيقولوا ايه على مراتاتهم عشان ناخد خبرة برضه :D
هموت و افهم لما هم مش طايقين يبصوا فى خلقة بعض كانوا بتجوزوا ليه من الاول؟!

لا كدا هزعل بجد..ايه اللى جاب المصرى اليوم للدستور ولا ابراهيم عيسى لمجدى الجلاد..انا متحيزة تماما للمصرى اليوم و لو انى بقالى كام يوم ما بقراش جرايد و مركزة فى الكتب اللى جبتها..تقريبا بقيت مغيبة عن الدنيا و لو حصل انقلاب فى الحكم مش هعرف :D

ادعيلى بقى ربنا يصبرنى عشان ما بقيتش عارفة الاقيها منين ولا منين فى المكان دا..قال شغل قال :D

ايوة مننا اكيد بس ممكن اللى بينتقد المرتشى يبقى حرامى و اللى بيسرق ينتقد الكذاب..لكن ان واحد يتكلم عن المنافقين و قبل ما يخلص الجملة تلاقيه بيقول حاجة شبه شخبطة معاليك رسم لمستقبل اولادنا..دا كتير اوى بصراحة :D

والله ما حد هيفصل شحن غيرنا :D

عشان اللى بيحب حد بتهياله انه من حقوقه عليه انه يكون زى ما هو عايزه يكون بغض النظر عن كونه عايز دا من عدمه

ليه بس ما ينفعش..ساعات التناقض دا بيكون مسلى

سيبك من فكرة التدوير..انا عجبتنى حكاية انك تاخد المخاطرة و ما تخافش من النتيجة

امال لما اخد اجازة من الشغل و اقعدلكم هنا هتقول ايه :D

Yasmine يقول...

ريم

عارفة الفكرة فى ايه..لما تلاقى اتنين كويسين اوى و لايقين على بعض اوى لدرجة ان فيهم شبه من بعض..و تلاقى حاجة تافهة زى الفلوس واقفة فى سكتهم..مش بالذمة حاجة توجع القلب

اه بجد والله :)
و دول بقى مفيش اكتر منهم

اقولك يا ستى..هو سفرها عشان يلعب بديله هنا و هى فاكراه خايف على مستقبلها..شوفتى بقى :)

ما بيتهياليش يا ريم..بيتهيالى الستات بيبقوا عارفين بس مكبرين دمواغهم..لكت الرجالة مهما تخيلوا عملهم ما هيوصلوا للى بيتقال فى قعدات الستات..دا انا ببقى مزهولة ما بالك هم :D

هى مش تفاهة هو مجرد اختلاف فى ناس بتقبله و ناس بتستسهل و تخليه ينهى قصتها

بتضحكى يا ريم :)
تخيلى طيب لو كان دا بيحصل معاكى لمدة 9 ساعات فى اليوم :D

عجبتنى اوى الجملة دى
كلا يرى الناس بعين طبعه

يمكن يكون عندك حق انتى و ليكتر فى النقطة دى..بس انا دايما بحترم اللى بيختار السباحة ضد التيار

لا انتى فهمتى صح..بس هى الفكرة اللى ركزت عليها مش فكرة توام الروح فى حد ذاتها..اللى عجبنى اكتر فكرة انك تاخدى مخاطرة عشان توصلى لحاجة انتى عايزاها من غير ما تخافى من الفشل..مش شرط فى دى بس..فى اى حاجة تانية

Yasmine يقول...

على باب الله
متشكرة اوى..و كويس ان الشخابيط عجبتك :)

Yasmine يقول...

كوبرى

اسكت دا انا بقيت عنصر مهم فى القصة دى..بفكر اشتغل خاطبة بعد الضهر:D
انا بقى على قد ما بحترمه على قد ما انا ضد الطريقة اللى وصلها بيها المعلومة..كان ممكن اوى يتعب شوية عشانها او على الاقل يحاول

طبعا طبعا عمرى ما هقول ولا عمرها هتيجى :)

لا هى ما كانتش عارفة..احنا اللى كنا عارفين :D

هم مش بيتكلموا وحش بس..هم بينشروا غسيلهم زى ما بيقولوا..الفكرة فى ان الستات بيروحوا و هم مش عارفين بعش و تفاجا بيهم بيدخلوا فى حوارات بعش كانهم متربيين سوا مثلا :D

تخيل انه عنده 27 سنة!!

لا هى مش كدا بالظبط..انت كانك بتقارن بين اللمبى و كازابلانكا مثلا :D

أول ما تقولك مالك أعرفى أن هيا اللى مالها
تصدق عندك حق..تخيل بقى ان كل الماسي دى اتحكتلى فى يوم واحد :D

هههههههههه اه ممكن على طريقة اللى اتلسع من الشوربة ينفخ فى الخيار :D

ايوة بس فى حاجات كدا بتبقى بديهية و عمرها ما بتتغير

يعنى يوم ما تتفجر فيه مواهب الكتابة مش عارف يكلم شعبه الحبيب الصبور المهاود الاول و بعدين يرد على اللى بيشتموه؟!

تحترم نفسها قوم تعمل ايه يعنى؟:D

انا مقتنعة بالمقولة جدا..بس انا قررت ابقى مع الاسماك الميتة..كفاية اوى لحد كدا..خلى الاجيال القادمة تكمل بقى :D

دا سؤال برضه؟!..لا طبعا..هى الجملة بس عجبتنى :D

دا انا واخدة اجازة اسبوعين بقى..استعدوا :D

الا قولى صحيح هو ايه اللى حصل فى البلوج عندك؟ و بعدين البوست الاخير دا مالوش ترجمة عشان اللى فهمهم على قدهم زيي ؟

Yasmine يقول...

اسماء على
اولا بجد انا سعيدة جدا بوجودك هنا :)

اخيرا حد نصفنى و فهم قصدى هنا..هو بالظبط كدا..هى لقت فيه الراجل اللى بتحلم بيه..و قالت انها حاسة ان ربنا بعته عشان يعوضها عن الظروف اللى عاشتها بعد موت مامتها..بس هو بيحسبها بالورقة و القلم و هى بتفكر فى البنى ادم اللى نفسها انه يشاركها فى حياتها..المريخ و الزهرة بقى و قمة التناقض

و اى مغيب..دا مريض

هههههههههه حلوة حقيقة علمية دى

ما هم لو فهموها ما كانش زمان دا بقى حالنا

هو مش الاسوا هو الاكثر احراجا فى الدنيا

اللي بيقول انه هيتقبل حاجة بيبقى فعلا مش ناوي يتقبلها لكن ناوي يفضل يتكلم و يتناقش فيها طول الوقت
المتقبل و المقتنع مش بيناقش أصلا
نظرية تستحق الاحترام بجد

نورتينى بجد و حقيقي شهادة اعتز بيها جدا

Here i'm يقول...

تحترم نفسها قوم تعمل ايه يعنى ؟ :D

معرفش بقى هيا أدرى بحالها عنى :D
و بعدين مش يمكن لما تتعدل معاه يكون هوا عايزاها زى ما كانت رخمة :D


و بعدين فى فسفوسة نسيت أعلق عليها :D

بتاعة سوء تفاهم ..

هيا قالت انها متستهلهوش .. طيب فى الأول تسأل نفسها عايزة ولا لأ .. و بعدين تقول أستهله ولا لأ .. لو قالت عايزاه يبقى فكرة مين يستاهل مين مش هيا اللى تقررها .. ما يمكن يكون هوا كمان بيقول أنا مستهلهاش ..
لكن لو مش عايزاه ميشغلهاش بقى أستهلك ولا لأ .. انا مش عايزاه و انتهينا :D

البلوج بتاعى أنتى تانى شكوى تجيلى أنتى و مروة .. و بعدين على فكرة بقى .. الكلام عندك فى البوست دا بادىء صغير و بيكبر و بيكبر لغاية ما بيلزق فى بعضه من كتر التكبير و معرفتش أقراه غير بالطريقة رقم 214866213 :D على فكرة دى غير الطريقة رقم 214866213 :D .. حبقى أقولك عليها بعدين :D ..

Old Blogger يقول...

هايــــــــــــــــــل

dalia يقول...

ياسمين الجميلة
اعتذر عن تغيبي بسبب سفري خارج مصر بس اول حاجه عملتها فتحت المدونة بتاعتك وقرأت كل البوست القديم:) وكلها كالعادة تنم عن وعي وثقافة حتى من غير ما تقرأى جرايد الكتب كفاية:)

بس انت بجد بارعة في الاقتباسات وده اعتقد من قراءة الروايات وكمان مش اي روايات انما روايات باللغة الانجليزية اكيد حاحاول اعمل زيك بس لما اخلص كورس الانجليزيى في الجامعة الامريكية ادعيلي:)
بالنسبة لبهدلة بنات الناس انا متعاطفه معاه قوي لانه كده بيحبها بجد رغم انه بيحاول يبعد عنها على الاقل علشان ميعذبهاش معاه هي حتتعب في الاول بس اكيد هتعرف بعد كده انه كان بيحبها لما تلاقى واحد تاني يناسبها فهمتي حاجه ولا انا:)

نقطة نور شعرت بها من قبل واتفق معك تماما

امتلاك
ده نوع وحش قوى من الحب أسوء م الدب الذى قتل صاحبه لانه في الاخر مات وارتاح لكن الاولاني لسه عايش بعزابه

كلام عجبني
حلو قوى علاقة الزكام والعطس اللى بين الجرايد الرسمية والرئيس ديه انت رائعة يابنتي
أما قصة ان الواحد يكون مع أو ضد التيار يتوقف على قوة هذا الشخص وادارته للازمات ساعات بنكون ضعفاء قوى وساعات أقوية وده في الاخر من رأيي يحتاج الى قوة من الله وده بيحتاج روح صادقة متصلة بالله

رائع استمري انا مستنية اجازتك بفارغ الصبر :)

Yasmine يقول...

كوبرى

لا هى مش بتتحسب كدا خالص والله..هو تانيب ضمير مش اكتر

تصدق انا لما بفتحه من الموبايل بشوفه زى ما بتقول كداانا قولت انا اللى احوليت :D
بتاعك بقى كان فاضى تماما و فيه صورتين و مفيش موضوع و بتاع احمد مش عارفة ارد فيه خالص :(

Yasmine يقول...

التى هى نفسي

ربنا يخليكى يا رب :)

Yasmine يقول...

داليا
ترجعى بالف سلامة ان شاء الله
و انصحك بجد تقرى الكتاب اللى اتكلمت عنه فى البوست اللى فات حتى لو باى لغة تانية لانه حقيقي يستاهل

بالنسبة للولد فالفكرة كلها ان اللى هى شايفاه ان الصفات اللى فيه تخليها تستحمل انها تعيش معاه الفترة الصعبة دى..هو بقى عايز يحسبها بالورقة و القلم..انا مش قادرة احدد موقفى بصراحة لكنى بحترمه لاقصى درجة بجد

تخيلى بقى ان الامتلاك دا يكون فى الصداقة :)

مش انا والله دا محمود الكردوسي :D

و ساعات الواحد بيزهق من كتر العوم اصلا فيقرر يسيب التيار هو اللى يحركه و زى ما تيجى تيجى

منورانى دايما يا داليا بجد و انتظرينى فى الاجازة :D