السبت، 11 يوليو 2009

خطرفات جرنالية..

فى تصريح لدكتورة منى عمر نائبة وزير الخارجية لشئون القرن الافريقى بخصوص البحارة المصريين المختطفين فى الصومال قالت انه من المستحيل على الوزارة دفع الفدية حيث انه مفيش فى الميزانية بند مخصص لدفع الفدية عن المخطوفين!!! لانه حتى ورق التواليت بتتقدم بيه فواتير لما عرفت ان المقارنة دلوقتى بقت بين المواطن المصرى و ورق التواليت اتاكدت انه فعلا فى" قرن"..بس هو مش افريقى
***** اخر نكت ابو الغيط "وزارة الخارجية تدين باقوى لهجة ممكنة حادث مروة الشربينى" تقريبا الوزير عنده قريب بيبيع دوا ضغط و كلفه انه يجيبله زباين عشان الناس تعرف مدى العدل اللى حكومتنا فيه.. غزة عندنا زى القاهرة بالظبط..اللهجة القوية دايما موجودة عشان تدافع عنهم طيب غير شوية!
*****
وزارة الخارجية الايرانية تستدعى السفيرين الالمانى و الايطالى بطهران لادانة حادث مقتل مروة الشربينى مش دا اللى بيسموه صيد فى المية العكرة؟!
***** فى تصريح كوميدى جديد لنظيف بيوعد الشباب ب52 مشروع استثمارى عملاق هيطلعوا عليهم على حين غرة بعد انتهاء الازمة الاقتصادية و ما قالهمش هم كانوا فين قبل الازمة ولا هيطلعوا ازاى بعدها! وبيدعو فيه الشباب للاسراع ب"عجلة التنمية" و ما قالهمش ازاى حد ايا كان يسرع بعجلة مش منفوخة اساسا
*****
ابرك حاجة اتقالت عن الاشاعة المغرضة بتاعت تنحى مبارك و توريث جمال كاريكاتير اتنشر فى المصرى اليوم لاب بيدى ابنه جلابية مقطعة..عشان يكمل عليها!
***** حد يشرحلى الخيبة القوية الجديدة بتاعت الكوتة المخصصة للمراة فى مجلس الشعب
قالوا ان الهدف منها هو المساهمة فى "تمكين" المراة
بس ما شرحوش هم هيمكنوها من ايه بالظبط؟!
*****
فى دعوة جديدة من نوعها على الفيس بوك جروب جديد باسم "سيبها تعنس" بيدعو لمقاطعة الجواز فى شهر مارس كاعلان عن الغضب من تكاليف الجواز و الطلبات المبالغ فيها لاهل العروسة رد فعل منطقى جدا لمجتمع اتقلبت معاييره بيقيس الرجولة بقدرة الراجل على شرب بيريل و حجم جيب بنطلونه! *****
نقطة و من اول السطر.. عند مولدنا..نحتاج الاخرين حتى نستطيع ان نعيش و فى نهاية حياتنا نحتاج الاخرين حتى نستطيع ان نتعايش و لكن السر هو:اننا فى الفترة بين الميلاد و الموت..نحتاجهم ايضا Tuesdays with Morrie

هناك 30 تعليقًا:

Magi Mostafa يقول...

حلو موضوع ورق التواليت ده بس مش مكسوفين من نفسهم دايما كده المصرى ملوش تمن
اه ايران بتصطاد فى الميه العكره بس مش هى لوحدها على فكره
يابنتى ازمه ماليه ايه دى الى تأثر فينا ده احنا جمدين اوى وبرده انا مش مقتنعه بحكايه الكوته حاسه انه تمييز ضد المرأه لاحظى ضد المرأه مش الرجل
عموما انت اخبارك ايه

غير معرف يقول...

بعتلك رسايل في المنتدى,اقريها,بدون قصد,بعتذر,لو فيه أي سوء فهم ممكن أسببه


و,,انتي فين,وفنون فين

يسرا

وإيمان

وهبة

ونورهان

كل الناس,هنسأل عليهم,ممكن,نلاقيهم:)


بس,انتم كمان,بخير؟

Maga يقول...

والله مستخسرك هنا بجد :D

nody يقول...

ياشيخه دول بيفاصلوا مع القراصنه
عمرها ماحصلت والله
بس عندنا حصلت
وكويس اوى انها جت على روق التواليت
مش هاننهب

mUsLiM يقول...

السلام عليكم :)

كيف حالك يا أختنا ؟

عساك بخير حال وعافية ان شاء الله

انا هاعلق على كم نقطه كده من اللى انتى كتبتى عنهم ،،

بالنسبة لأبوالغيط فالحقيقه ان الخارجية المصرية عموما فى هذه الايام هى فى أسوأ حالاتها من ساعة ما بدأت أعرف يعنى ايه سياسه

راجل لا عارف معنى الدبلوماسية ولا بيحسب للكلام قيمه ، تحسى لما بيعمل مؤتمر صحفى او لقاء انه بيتكلم كده باللى بيجى على باله وبيحدف طوب على أى حد سواء إيران أو قطر او سوريا او حماس او حزب حسن نصر او اى حد من اللى فيه بينهم وبين مصر مشاكل

وده مش المفروض ابدا يحصل مع اى سياسى محترم بيعرف معنى الكلمه اللى بتخرج منه

أما عن الخارجية الايرانية واستدعائها للسفير الالمانى والايطالى فانا الحقيقة ورغم عدائى لسياسات طهران فى الوقت الحالى والنظام الايراني بشكل عام

إلا أنى أ{حب بهكذا فعل ، لأن اللى حصل فى المانيا للأخت مروة الشربينى مكنش مجرد اعتداء على مصرية ده اعتداء على مسلمة وعلى الحجاب كرمز للمسلمة

واللى قتلها معترضش على كونها مصرية ابدا ولكن على كونها مسلمة ترتدى الحجاب الاسلامى

لذلك فالواجب اعتبار هذه اهانه لكل المسلمين ايا كانت طوائفهم وليس فقط المصريين لأن المصرية هنا مكنتش سبب الإعتداء

لذلك انا اعتبر هذا موقف شرف لطهران وهو أقل ما يمكن لدولة تحترم دينها وتحترم الحجاب كرمز وواجب دينى على المرأة المسلمة أيا كانت جنسيتها

والحقيقة أن أداء الخارجية الإيرانية عموما مستواه جيد وعال ،،

وأفضل من أداء الخارجية الإيرانية أداء الخارجية التركية واللى بيظهر دورها كلما تعاقبت الأحداث وظهر ذلك أيضا فى أزمة المسلمين بالصين ،،

طبعا انا عارف ان الموضوع مش عن أداء الخارجيات للدول المختلفة بس الكلام جاب بعضه مش اكتر :)

" عند مولدنا..نحتاج الاخرين حتى نستطيع ان نعيش
و فى نهاية حياتنا نحتاج الاخرين حتى نستطيع ان نتعايش
و لكن السر هو:اننا فى الفترة بين الميلاد و الموت..نحتاجهم ايضا "

كلام جميل فى الحقيقه

ولكن انا لم أفهم جملة "و فى نهاية حياتنا نحتاج الاخرين حتى نستطيع ان نتعايش"

ما هو الفرق بين نتعايش ونعيش فى المعنى المقصود من الجملة ؟

ثم هناك بعض بعض التكلف فى نظرى بين كلمة نتعايش وبين كون الانسان فى نهاية حياته

فالأصل ان الانسان هنا على مشارف الموت لي همه الأساسى هو التعايش

لا أدرى ولكن شعرت أن المعنى مختل ولو قليلا !!

وعلى كل حال جزاكم الله خيرا على موضوعك يا اختى :)

السلام عليكم

Superman يقول...

مش عارف ليه مش جاى في بالي غير مشهد عادل امام و هو قدام تمثال طلعت حرب و بيصرخ "إحنا في زمن المسخ" !

Yasmine يقول...

ماجى

لا ما حكاية مالوش تمن دى عرفينها من زمان بس ما توصلش لورق التواليت يعنى :D

بالظبط كدا الله ينور عليكى..مش انا اهو بتاعت قضايا المراة :D
الموضوع دا مستفزنى فوق ما تتخيلى بجد..قال تمكين المراة قال

انا تماما الحمد لله..يا رب انتى كمان تكونى كويسة :)

Yasmine يقول...

ايمان

معلش يا ايمى انا مش بدخل هناك خالص فماشوفهمش..عموما انا تمام الحمد لله انتى اخبارك ايه؟

اللى اعرفه ان انا و فاطمة كويسين الحمد لله :)
الباقى مش عارفة والله..يسرا مختفية بقالها فترة يا ريت اللى يعرف عنها حاجة يطمننا عليها

Yasmine يقول...

احمد

خلاص شارك كوبرى و انتجولى كتاب :D
الا قولى صحيح انت من ساعة ما عملت نيو لوك للبلوج بتاعك و انا مش عارفة ارد فيه خالص :(

لا الاكسبلورر ولا الفاير فوكس نافعين و قعدت كتبت رد طويل عريض من الموبايل و برضه ما رضيش يتبعت..تفتكر دا معناته ايه؟ :D

Yasmine يقول...

ندى
لا اللى انا فهمته ان القراصنة هم اللى قللوا الفدية لما لقوا ان مفيش فايدة و انهم بيصرفوا كتير على اكل البحارة..شكلهم فى الاخر هيرجعوهم و معاهم تبرعات من الصومال الشقيقة..هم يبكى و هم يضحك والله

Yasmine يقول...

مصعب

انا تماما الحمد لله ان شاء الله تكون انت كمان بخير :)

بالنسبة لابو الغيط فمن ساعة حواره مع عمرو اديب و جملته الشهيرة بتاعت اللى ينفع يتقال هقوله و اللى مش هينفع مش هقوله وانا مبطلاه على راى ماجا :D

هو تقريبا بيبقى حافظ اجابات على اسئلة معينة و سواء اتسألها او ما اتسألهاش هو هيرد عليها

بالنسبة لاليران فانا مافهمش سياسة خارجية غيورة على الاسلام و سياسة داخلية بتزور الانتخابات

تركيا دى اساسا برا المقارنة..دى محسوبة غلط على منطقة الشرق الاوسط كلها

هو غالبا هيبقى عيب ترجمة برضه يا مصعب :)
بس هو فى الكتاب يقصد ان البنى ادم فى اول حياته بيحتاج للناس عشان يقدر يعمل ابسط الحاجات من اكل و شرب و غيره..و فى اخر حياته بيحتاجهم لنفس الهدف برضه الفرق انه فى الاول عجزه بيكون بسبب صغر سنه و فى الاخر بيكون بسبب المرض او الشيخوخة عامة..يا رب اكون عرفت اوصلك الفكرة كويس :)

Yasmine يقول...

محمد
المشهد دا من اوله لاخره عبقرى بجد على قد ما بيوجعلى قلبى على قد ما هو ادق تعبير اتقال عن الحال اللى وصلناله..دا يا ريته مسخ واحد اصلا

Jannah يقول...

أبو الغيط شخصية كاريكاتيرية شوية
:D
أنا شفت له حوار لما أوباما راح مصر قعد يشرح بأسلوب ركيك كيف انه أوباما جاء لمصر لأنها أهم بلد ولغته كانت لا تتناسب مع دوره كوزير خارجية كان ناقص يطلع نبوت من ورا الكرسي
ولما سأله المذيع هل فيه دول تانيةمهمة في المنطقة قاله :اااه اممم اااه فيه سوريا بحكم انها عندها مشاكل مع اسرائيل و عشان الحدود ..يعني..
:D
وبعدين لما أخد كاس الماي حتى يشرب عمل حركة "بصحتك" بدون ما يشعر
يعني لا بينتبه على لسانهولا على حركاته
وزير خارجية يقول

*******
ايران أقول
chapeau
وبس

*****
العرسان المصريين طيبين جدا على فكرة ...الرجل المصري عامة يعتبر طيب
هنا ما في شي اسمه مصاريف وأصرف والمرأة من الأحسن تقعد في البيت
والمرأة ذات دين وخلق
الكلام هذا انتهى من20 سنة
الحين الرجل بيطالب بالمرأة اللي بتشتغل ولازم تجيب المرتب وتحطه جنب مرتبه ويحسبه المصاريف و بالتساوي
مافي شي اسمه "وان طبن لكن عن شيء "
اللي ما تشتغل غير مطلوبة بالمرة
وكل شي لازم يتوثق و يتكتب مناصفة
وليستة الشروط قبل الزواج صفحتين تلاتة ان كان عاجبها
لأنه القانون بيطالب الرجل باقتسام الحاجات بالنص في حالة طلاق فبيأمنوا نفسهم من البداية
أما المهور فأظن ماعاد فيه شي اسمه مهر أوتقريبا أصبح رمزي
و الذهب أساسا يعني من زمان أب العروسة بيجيب أغلب الحاجة يعني

هذا هو الدارج
العكس هو الاستثناء

بس فنفس الوقت بيتكلم في الدين و الحقوق الشرعية في ظروف أخرى ...طروف ما بتتطلبش منه انه يدفع فلوس

.:DDD

*******

ايمان سما مصر ان شاء الله تكوني بخير
:)

غير معرف يقول...

جنة,بإذن الله والله,تبقي بألف خير:)

بطمن عليكي من مدونتك:)

وإن شاء الله,الجميع,بألف خير:)

Old Blogger يقول...

بالنسبه للخطرفات
مش لاقيه رد

بالنسبه لك
مبسوطه أوى بنشاطك الايام دى

يا رب ديماً موفقه :)

..............

دون كيشوت يقول...

موضوع جميل واقتباسات اجمل

Fatma يقول...

1- اهالي المخطوفين فاتحين باب التبرع وبيلموا فلوس الفدية شوفتي وجع قلب اكتر من كدا
ومنفترة واحد في الخارجية مالوش لازمة قال لا نملك للمخطوفين الا الدعاء
لا وجاي على نفسك ليه اوي كدا ! دولة بجلالة قدرها لا تملك الا الدعاء

2- ابو العبيط دا بجد عرة كفااااااية كفاية بجد كفاااااية عيب كدا والله الضرب في الميت حرام احنا مش ناقصين ابو العبيط دا خالص
3- أنا عجبني موقف ايران وخلاني اقرف مننا اوي اوي بجد
4- لا تعليق على نظيف
5- معاريف وجيروزلم بوست الاسبوع اللي فات ماكنش وراهم سيرة غير التوريث لدرجة اني بقيت متأكدة انهم عارفين حاجة احنا طبعا مش عارفينها
6- انا لحد اللحظة دي مش فاهمه في ايه في موضوع الكوتة وايه الضجة اللي حاصله دي
7- ظريف الجروب دا ....
8- ردي على المقولة موجود في اخر البوست الجديد بتاعي

Maga يقول...

Founoon يقول...

ابو العبيط دا بجد عرة

جامدة اوووووووي

Maga يقول...

انتى جيتي فى كتاب يا فلة نزلى انتى بس وليكي عليا اقراه وربنا :D

وموضوع البلوج دا مش عارف بجد مشكلته عند ميين بس هعرفها واقولك

بقولك

ماتكتبلنا قصة صغيرة

وبجد مش بهزر

Yasmine يقول...

جنة
هو كاركاتورى بعقل؟ دا تحف من تحف الحكومة الالكترونية بتاعتنا :D

chapeau على النفاق السياسى ولا ايه:D
الا هم ايه موقفهم من اللى حاصل فى الصين مش دول مسلمين برضه؟!

خلى بالك كدا هتقومى الرجالة عليكى:D

و مين قالك ان هنا مش دا اللى حاصل..هنا فى الطبقات الفقيرة..هتلاقى تلات ارباع الستات اللى بتشتغل فى البيوت هى اللى بتصرف على البيت لوحدها و على اجوازها طبعا اساسى
و فى الطبقات الاعلى شوية هتلاقى كتير منهم بيقولولك ان الزمن اللى احنا فيه صعب و ان الست لازم تساعد جوزها..انا لسه حاضرة 3 جوازات لتلاتة زمايلى فى الشغل و كلهم موافقين على شغل مراتاتهم لانهم مش هيقدروا يصرفوا لوحدهم على البيت ..تخيلى!!

Yasmine يقول...

التى هى نفسي

انا اللى مبسوطة بمتابعتك و اهتمامك
منورانى بجد :)

Yasmine يقول...

دون كيشوت

متشكرة جدا

Yasmine يقول...

فنفونتى
سمعت حوار التبرعات دا..والله احنا بلد مسخرة

تحفة ابو العبيط دى..كيفتنى جدا تصدقى :D

انا ما عجبنيش اللف و الدوران دا..مع ان فى السياسة مفيش غير القذارة و الضرب من تحت الحزام اساسا

الكوتة دى هتبقى 68 كرسي باين..يعنى بقى عندنا اربع تفسيمات لمصر..عمال و فلاحين و حريم و حزب وطنى شوفتى الوكسة اللى احنا فيها :D

و هتلاقى ردى عندك..مش عايزاكى تزعلى كدا..مفيش حاجة تستاهل وجع القلب دا والله :)

Yasmine يقول...

احمد
لا ما المثل بيقولك ايه..اطبخى يا جارية كلف يا سيدى :D

كلف انت بقى و سيبلى موضوع الكتابة دا و هبقى اقول اسمك فى كل الانترفيوهات اللى هطلغ فيها ما تقلقش :D

اه شوفه الله يكرمك عشان انا لعبت كل الالعاب و ولا حاجة نافعة مش عارفة اشمعنى البلوج بتاعك

القصة الصغيرة دى اللى هى قصة قصيرة يعنى؟ :D
دا انت فاهمنى غلط اوى يا احمد..يا ريتنى اعرف والله ما كنتش اعزها عنكم ابدا :)

dr.lecter يقول...

انت عارفه بقي قالوا لاهالي الرهاين ايه؟
قالوا لهم اتصرفوا في الفديه بنفسكم
بذالذمه ده كلاام



ابو العره علي راي فنون لا تعليق بجد

انا بفكر اعمل جروب اسمه ابو العره


والنبي بلاش ايران اليومين دوول بغض النظر عن اي خلاف فقهي او سياسي والعداوه اللي بيينا وبينهم من ايام الدوله العباسيه بس هم اجدع مننا برده


نفسي اشوف وش المصري اليوم وباقي الجرايد لما فعلا جمال يمسك الكرسي
هيقولوا ايه ساعتاها والنكت اللي هيقثولوها هتبقي بايخه اووي




سيبها تعنس

حلو الجروب ده جدا علي فكره انا دخلته لما واحد اداني المصري اليوم وقالل لي اقرا
بصراحه هو تنفيس وتطليع لسان مش اكتر للمجتمع واهو يعتبر تحرك بسيط جدا ماظنش انه هيغير مافهيم ولا معتقدات

بس فعلا الموضوع بقي اوفر اووي ده حتي لو الواحد عرف يتزوج بطلوع الروح هيطلع ترتابتيته في مسئوليات الزواج

علي راي واحد صاحبي انا مش عارف اجيب تمن البامبرز ومسلتزمات مراتي
الله يكون في عون اللي بيتزوج في الزمن ده بجد ارفع لع القبعه


واحدصحبي بيشتغل في وزاره الاتصالات في القريه الذكيه استدعوه علشان كانت فيه مشكله في بيت مسؤوول مهم ماقالوش ليه مين المسئول هو اصلا مهندس اتصالات

راح بيت المسئوول وقابل ابن المسئوول اللي كان بيشتكي من الشكله واكتئف انه خالد احمد نظيف
لما خلص المشكله اللي حكا له هولي عن البيت عامل ازاي من جوه والتجهيزات والمعدات والفخامه

قلت امال بيت جيمي عامل ازاي بقي؟.
ولما دول يبقي بيتهم عامل كده امال اللي قاعدين علي القهاوي وعاطلين عاملين ازاي

ولما حد ييجي يشتكي ويقول الشباب بقي ضريبه بانجو وذئاب بشريه مابيرحموش انثي ماشيه في الشارع

ويسمع عن ان بيت فلان عامل كذا

يبقي الغلط علي مين؟

شكل كده الغلط عليا انا علشان اعراض الحقد الطبقي بدات تظهر عندي وهي معديه علي فكره ( بضم الميم)


فاكر جمله قالها وحيد حامد في احكي ياشهرزاد مسخره كان عن وزير من الوزارات اللي مالهاش لازمه بيصرف في مطعم مش اقل من 15 الف جنيه في الليله

فلوس ابوهم ولا ال




نحتاج الاخرين طول الوقت

ايه عدم الاستقلاليه دي احنا عاملين زي الطفيليلات عايشين علي الباقيين وبنستغلهم طول الوقت بغض النظر عن النيه بس ده شيء طبيعي علشان احنا اصلا ضعفا جدا ومتحاجين نتسند علي حد

الحمد لله ان فيه ناس اقدر اتسند عليهم ويمشوا في جنازتي بس ميقعدوش علي تربتي يلعبوا اونو

غير معرف يقول...

لا إله إلا الله
بصى...بصراحة انا مقدرتش اكمل البوست
لأن الموضوع مش ناقص هم..بجد كفاية كدة

بلد زبالة

Jannah يقول...

chapeau انهم شايفين شغلهم كخارجية
شلون تتكلم عن الصين وهي العضو الدائم العضوية يعني صوت
:D
هذا غير اتفاقاتهم العسكرية
الصين وروسيا حبايب لايران
على كل حال السياسة اساسا نفاق ماجابو جديد منافقين ايران
:D
اي رجالة؟

****
كنت واخدة مقلب في الرجل المصري
:DDDDD

******
ايماااااان تسلمي انا بخير

Yasmine يقول...

مش غلطة الحكومة انها عايزة المواطنين يبتدوا يعتمدوا على نفسهم :D

بعيدا عن الخلاف الفقهى لانه لا يعنينى فى اى حاجة..انا بس مستغربة المعايير المقلوبة و الضحك على الدقون باسم الدين و الدفاع عن الاسلام

الجواز دلوقتى بقى اول المستحيلات مش رابعهم..حاليا انا مكتفية بالفرجة على قصص حب يتنتهى عشان شقة ولا طقم السفرة او بتبوظ عشان قسط الغسالة و التلاجة و الميكرويف

هههههههههه جامدة اوى حكاية الحقد الطبقى دى..بس اللى بيحدقوا فى الزمن اللى الناس مش لاقية لقمة نضيفة تاكلها لعيالها ولا مستشفى ادمية تعالجهم فيها عندهم حق يعملوا اكتر من كدا..انا لسه سامعة من كام يوم عن واحد جوز ابنه فى فرح استمر لحد اليوم اللى بعده و جابله هيفا و نانسى و بعدين اتجوز هو على مراته و جابلها قصر فيه 11 حمام..مش حقد ولا حاجة لا سمح الله..بس منين جت الفلوس دى كلها؟

كنت بعد كمية الناس اللى دخلوا حياتى مؤخرا و قلت انه يبقى انجاز حقيقي لو قدرت فى يوم من الايام اسيب فيهم الاثر اللى يخليهم يفتكرونى بدعوة ولا بكلمة حلوة لما اموت

مش فاكرة فيلم ايه اللى كان فيه الجملة بتاعت ان البنى ادم لما بيموت روحه بتطلع فوق و جسمه بينزل تحت الارض و مش بيفضل منه غير السيرة الحلوة..ربنا يجعلنا من اللى بتفضل سيرتهم الحلوة على لسان الناس :)

Yasmine يقول...

انا و دماغى

مش البلد اللى زبالة..الحكومة هى اللى زبالة و احنا مش احسن كتير

Yasmine يقول...

جنة

قصدك تفهمينى ان الجمهورية الاسلامية البتنجانية الايرانية مش عارفة تقول تصريح نارى من بتوعها عن اللى بيحصل فى الصين عشان الصين عندها مقعد دائم فى مجلس الامن..مش معقول يا جنة نظرية المؤامرة دى :D
دا حتى دم ندا سلطان لسه ما بردش..مش معقول الجمهورية الديمقراطية تكون بالنفاق دا لا لا لا ما صدقش ابدا :D

انتى هتوقعينى فى الغلط ليه حد جاب سيرة الراجل المصرى دلوقتى:D
هو في زى الراجل الشرقى فى الدنيا؟ دى كفاية دماغه :D

احنا محظوظين بيهم والله :D.
لدرجة انى بفكر جديا اقاطع قعدات البنات و الستات عشان ما اسمعش الحكايات اللى بتفور دمى و تجيبلى الضغط و تخلينى اجى هنا و اكتب مواضيع من نوعية حواديت نساء من الشرق..مالهم البنات الشرقيات ما هم هيموتوا من السعادة اهم :D

على فكرة البلوج بتاعك انضم للبلوج بتاع احمد..مش عارفة ارد فيه خالص :(