الأحد، 5 يوليو 2009

Tuesdays with Morrie..درس فى الحياة ..و فى كل حاجة

بقالى زمن ما قريتش كتاب يأثر فيا للدرجة دى

الكتاب اللى اتباع منه 11 مليون نسخة على مستوى العالم و اتعمل فيلم مش هعرف اتكلم عنه لانى لسه تحت تأثير الصدمة.. صدمة ان كتاب يحرك فيا كم الاحاسيس دى الكتاب ببساطة عن قصة حقيقية جمعت بين الكاتب Mitch Albom و مدرسه فى الجامعة Morrie Scwhartz ابتدت قصتهم بيوم تخرج Mitch و وعده لاستاذه انه هيزوره و يفضل على اتصال بيه و كعادة الوعود اللى من النوع دا..عمرها ما بتتحقق بينشغل Mitch بحياته و بشغله لحد ما يلاقى Morrie فى انترفيو مع اشهر مذيع امريكى و بيعرف من الانترفيو دا ان استاذه المفضل عنده مرض خطير و باقيله ايام قليلة فى الدنيا فبيرجع يتصل بيه تانى و بتجمعهم قعدة كل تلات من كل اسبوع.. بيتعلم فيها Mitch من استاذه ازاى يكون بنى ادم مش مجرد الة شغلتها الوحيدة انها تنشغل عن الدنيا بجمع الفلوس علمه ازاى يتجرد من كل الامور السطحية اللى بتشغل البنى ادمين و تمنعهم من انهم يظهروا نقط ضعفهم و رغبتهم فى اوقات كتير فى انهم يعتمدوا على اللى حواليهم الرغبة الملحة اللى عند كل واحد فى انه يفضل دايما قوى فى عيون اللى حواليه حتى لو كان اضعف من الضعف فى عيون نفسه علمه يكون انسان بكل ما تحمله الكلمة من معانى علمه ازاى يمنع نفسه من انه يضيع عمره فى حالة اشفاق على الذات لانه رغم كل اللى هو بيعانى منه دا.. قرر انه ما يضيعش اكتر من عدد معين من الدقايق كل يوم الصبح يسمح لنفسه انها تصعب عليه.. و بقيت اليوم بيتعلم فيه ازاى يتعايش مع حقيقة مرضه و واقع موته و ازاى ان بنى ادم يكون عارف و متاكد انه بيموت.. و يتحمل كل الالام دى بصدر رحب و بحب غريب للحياة و رغبة اغرب فى انه يعيش الايام اللى بقياله زى ما هو عايز مش زى ما هو متوقع من اى حد فى مكانه بيتعلم ازاى ما يتكسفش من حقيقة اكبر منه..حقيقة المرض مش بس بيتعايش مع الواقع المر دا..لكنه بيستخلص منه فلسفة خاصة بيه "Well, i have to look at life uniquely now. Let’s face it I can't go shopping, I can't take care of the bank accounts. I can't take out the garbage. But i can sit here with my dwindling days And look at what I think is important in life. I have both the time and the reason to do that" و بيعرف معنى انه يكون عنده ثقافته الخاصة و انه يتمرد على ثقافة المجتمع الاستهلاكى الامريكى اللى حول البنى ادمين لروبوتس كل همهم انهم يشتغلوا و يعملوا فلوس لالات "بتنشغل عن انسانيتها بدراما الاخرين" على حد تعبير الكاتب و بتغرق فى تفاهات الدنيا و بتنسى احتياجتها الانسانية فى انها تتواصل مع اللى حواليها I worked in the news business. I covered stories where people died .i interviewed grieving family members. I even attended the funerals. I never cried. Morrie, for the suffering of people half a world away ,was weeping"

Mitch كان مصدق دور القوى على طول الخط

و كان بيرفض يظهر مشاعره ناحية اقرب الناس ليه Mitchبعد ما كتب الكتاب اهداه لاخوه

اللى كان مريض بالسرطان و وصفه بانه اشجع بنى ادم عرفه فى حياته.. Morrie بيقرر يعمل جنازته و هو عايش عشان يسمع من اهله و صحابه و الناس اللى يهموه الكلام اللى عمره ما كان هيسمعه.. لانهم كانوا هيقولوه متاخر اوى الكتاب دا خلانى فكرت.. يا ترى انا عملت فى حياتى اللى يخلى الناس اللى تهمنى تتكلم عنى زى ما اتكلموا عن Morrie يا ترى كنت مؤثرة فى حياة غيرى للدرجة اللى تخليه يفتكرنى بالخير بعد ما اموت؟ نصيحة لاى حد عايز يقرا كتاب عن قصة دافية تحسسه ان لسه فى بنى ادمين بيحسوا فى الدنيا..يقرا Tuesdays with Morrie

الكتاب ببساطة درس العمر

لواحد اتعلم ازاى يعيش من واحد على فراش الموت

نقطة و من اول السطر.. "You closed your eyes girl, that was the difference. Sometimes you cannot believe what you see you have to believe what you feel And if you are ever going to have other people trust you you must feel that you can trust them too, even when you are in the dark, even when you are falling" Morrie Schwartz

هناك 18 تعليقًا:

mohamed ghalia يقول...

واضح من كلامك إنه كتاب هايل
استمتعت بكلامك عنه

Old Blogger يقول...

جميله القصه
و مش غريب انها حقيقيه
الحمد لله اتعلمت الدرس ده من زمان
و سؤالك "يا ترى انا عملت فى حياتى اللى يخلى الناس اللى تهمنى
تتكلم عنى زى ما اتكلموا عن Morrie
يا ترى كنت مؤثرة فى حياة غيرى للدرجة اللى تخليه يفتكرنى بالخير بعد ما اموت؟"
بحاول اخلى الاجابه خير
بس يا رب يفتكرونى أصلاً :)
بس تعرفى ؟
انتى قولتى "الناس اللى تهمنى"
انا شايفاها بطريقه مختلفه
يعنى بالنسبه لى ، الناس اللى تهمنى
غالباً هكون انا برضو بهمهم
و ما دمت بهمهم يبقى هما أكيد شايفنى شخصيه كويسه
و بيحبونى ، بالتالى هيفتكرونى بالخير ..
مش عارفه .. بس اللى هيفرق معايه بجد
ان الناس اللى مكانوش قريبين منى
يفتكرونى بالخير
مقياسى بالناس اللى مش قريبين أوى
انما القريبين غالباً هيفتكرونى بالخير لو افتكرونى

اللهم أحسن ختامنا جميعاً
تسلمى :) ..

dr.lecter يقول...

موجود في ديوان ولا فيرجن؟

انا بيتهيالي شفت الفيبلم الماخوذ عن الكتاب بس مش متاكد بصراحه

بمناسبه الكتب رغم اني مابحبش بلال فضل بس نزله كتاب يستحق ان تلقي عليه نظره

اسمه السكان الاصليين لمصر



بماسبه السيما


حلو الفيلم بتاع ساندرا بولوك ده ؟

احلقله وادخل فيلم جوني ديب الجديد ولا يستاهل ادخله ؟

ســـــاره يقول...

في مقولة بتقول

" وردة واحدة لإنسان على قيد الحياة أفضل من باقة كاملة على قبره" :)

تعرفي ياسمين ان ده بقيت اطبقه حاليا وتصدقيني لو قلتلك على اهلي :)
اي حد اقدر اقوله بحبك واعبر عن مشاعري اتجاهه طالما صادقه الا اهلي رغم ان روحي فيهم وماتخيلش حياتي من غير اي حد فيهم (يارب يحفظهم يارب) بس ماكنتش بقول لبابا بحبك ولا لماما ربنا يخليكي ليا .. دلوقتي فعلا اتغيرت ممكن اقول لبابا الله يخليك على راسي يارب .. واتصل بماما في عيد الأم واغنيلها رغم اني عمري ماعملتها قبل كده وانا معاها :)
حتى لما اختلف معاهم اسلوبي في النقاش اتغير ممكن اوصل وجهة نظري بأسلوب يخليهم فخورين ببنتهم مش شايفينها متمرده عليهم !!

حتى اخواني واخواتي علاقتي فيهم حصل فيها تغيير انا لامساه شخصيا مش معنى كده ان علاقتي بيهم في الأول كانت وحشه لاوالله.. بس بقى في دفء وحنية اكتر مابينا..واحد من اخواني الشباب بيدرس في استراليا اول ماتصل بيه يرد يقول الووو.. تلاقيني اصرخ واقوله ..حبيبييييييي وحشتنيييييييي والله العظيم وحشتنيييي .. يضحك بفرحه كده ويقول ياريتني سافرت من زمان عشان اسمع الكلمتين الحلوة دي منك D:

فأكيد احنا مقصرين ومقصرين كتير اوووي مع اقرب الناس لينا فمابالك البعاد عننا ..

بس انتي ياسمينه بجد من الناس اللي ماتتنسيش .. حقيقي والله ..وده راجع لأنك بقلمك وكتابتك قدرتي تحركي حاجه جوانا وتأثري فينا .. ربنا يسعدك حبيبة قلبي يارب :)

Magi Mostafa يقول...

اظن انه كتاب رائع وقصه انسانيه مذهله هحاول الاقى نسخه من الكتاب

mUsLiM يقول...

الواضح من مختصر القصة اللى انتى حكتيها انها فعلا فصة دافية وجميل اوى تعبيرك عنها باللفظ ده

لكن أظن انك كنتى ممكن توصلى القصة بأسلوب أجمل وأوضح من الموضوع ودى من المرات القليلة اللى أحس فيها أنك قصرتى فى حق الفكرة اللى بتحكى عنها

وده رأيى طبعا يمكن أكون غلطان علشان محدش يقول انى مستبد

ههههه :))

لكن على كل حال انتى شوقتينى انى أقرأ فعلا الكتاب ، وان شاء الله هادور عليه وهاشترية ،،

بس انا يهمنى هنا أعلق على نقطتين :-

أول حاجه من خلال الموضوع فكرت مع نفسى ولقيت إنه لا يمكن لإنسان هيكون صادق مع نفسه ومع اللى حواليه بدرجة أكبر من انسان عارف انه هايموت بعد أيام قليله

بالفعل ، الانسان إذا اطمئن انه ميت يعيش حالة من الصدق النفسى اللى بتخليه يقرأ ما بين السطور ، ويرى الأشياء بمنظر آخر ، بل وير ما لا يراه الآخرون !!

هذا خاصة إن كان هذا الإنسان عايش الناس وعاصر الكثير من تجارب الحياة ، فتجارب الناس أقدم وأفضل معلم للإنسان

ولذلك سائر الكتب اللى مؤلفوها كتاب عاصروا الناس وعايشوا مشكلاتهم وعانوا من تجاربهم تجدى فيها من الحكم ما لا تجديها فى كتب علماء كبار ولكن منعزلون مع قراءاتهم وكتبهم

فلن يجد الإنسان أبدا معلما بديلا عن الزمان ،،

ولذلك انا مقدر انبهارك بالكتاب رغم إنى برفض حالة النفسية اللى بتصور للقارئ ان الكتاب لا مثيل له أو نادر ، لا هناك من الكتب الغير قليلة كهذا الكتاب فى رأيى ،،

أما النقطة التانية ، فانا نسيتها الحقيقه :))

معلش اصلى وانا بكتب بنقل من موضوع لموضوع لغاية ما بنسى انا كنت عاوز أقول ايه :))

على العموم لما أفتكرها هارجع أرد تانى ان شاء الله :))

وموضوع جميل كالعادة يا أختى :))

السلام عليكم

Fatma يقول...

اللي عايز احساس معين من حد لازم الاول يحسهوله بصدق :)

سواء ثقة او حب او اهتمام أو أو أو

بحب الروايات والقصص اللي بتدي جرعة ايجابية بالشكل دا وتخلي الانسان يبص دايما على الجانب الايجابي لان كل حاجة فعلا ليها جانب ايجابي
هجيبه واقراه اكيد :)

انا كمان دخلت ذا بروبوزال عجبني مووووووت :) مع انه مكرر مش فكرة جديدة ولا حاجة بس كان ظريف وخفيف وفيه مورال حلو اوي

غير معرف يقول...

يا رب فعلا نقدر نخلى الناس اللى تهمنا تفتكرنا دايما بعد ما نموت و نعمل حاجة مفيدة لديننا و للناس و للمجتمع

الكتاب شكله حلو أوى و عجبانى جدا جدا فكرته..الواحد محتاج يقرا شوية فى المشاعر الإنسانية الراقية

Yasmine يقول...

MOHAMED GHALIA
هو كتاب اكتر من هايل بجد انصحك تقراه

Yasmine يقول...

التى هى نفسي
تصدقى عندك حق فى نظريتك دى..فعلا انك تكونى مؤثرة فى حياة اللى ما يعرفوكيش او اللى مش قريبين منك احسن..او بمعنى اصح هى حاجة تفرح اكتر بكتير

اللهم امين :)

Yasmine يقول...

لكتر

انا جبته من الديوان بس اكيد هتلاقيه فى فيرجن

بلال فضل فضلت امسك كتاب و احط فى كتاب من بتوعه بحاول اقنع نفسي اشترى اى واحد فيهم و فشلت..بس ممكن ابقى اجيبه فى الرحلة الجاية للديوان :D

فيلم ساندرا بولوك تحفة.. بس انا عامة ساندرا و جوليا لما بشوفهم بتبسط حتى لو طلعوا فى فيلم تسجيلى :D

هو فيلم خفيف يعنى لو عايز فيلم مسلى بعيدا عن القصص العميقة ادخله..انا ضحكت من قلبى فى مشاهد كتير و اتاثرت جدافى مشهد معين و انا بحب الكومبيناشن دى فى الافلام عامة

Yasmine يقول...

سارة

بتفكرينى بنفسي جدا..انا كمان عندى مشكلة رهيييبة فى الحكاية دى عامة هو الكلام دا صعب جدا يطلع منى لاى حد مش بس دول

بس برافو عليكى انك عرفتى تعملى كدا..عقبالى يا رب :)
عارفة فى مقولة تانية بتقول ايهما اصعب ان تقول شيئا و تندم عليه ام الا تقول شيئا و تندم انك لم تفعل..انا بيتهيالى التانية اصعب

ربنا يحفظلك اهلك كلهم يا سارة و يخليهملك يا حبيبتى

و مش عارفة اقولك ايه على كلامك بجد..يا رب اكون استاهله
تسلميلى يا سارة بجد:)

Yasmine يقول...

magi
اه بجد هتلاقى فى كل صفحة حاجة تشدك و تلمس احساس جواكى
المفروض الكتب دى هى اللى كانت تدرسلنا فى المدارس مش الصقر الجرئ و النسر الاحول :D

Yasmine يقول...

مصعب

لا انت مش مستبد ولا حاجة بس هى الفكرة انه مفيش فكرة اصلا اتكلم عنها :D

يعنى بدل ما كنت اجيب صورة الكتاب و اقولكم انه حلو و ابقوا اقروه قلت احطلكم كام جملة منه عشان تاخدوا فكرة :D

فبالتالى ما كانش فى مجال للابداع فى الموضوع..هو مجرد نقل للخبر مش اكتر

فى جملة اتكررت كتير فى الكتاب بنفس المعنى اللى انت بتقوله..هى جت على لسان Morrie كان بيقول لميتش انك لما تعرف هتموت ازاى هتعرف تعيش ازاى

هو فعلا المكتاب فى رايي نادر و قليل جدا ما بلاقى كتب تاثر فيا بالشكل دا..بس ممكن انت لما تقراه ما تحسش بكدا..هى مسالة وجهات نظر مش اكتر

و لما تفتكر النقطة التانية ابقى تعالى :)

Yasmine يقول...

فنفونتى..
يا فهمانى انتى :D

الفيلم دخلته مع داليا و مش قادرة اقولك حالة التهييس اللى ركبتنا من كتر ما عجبنا الفيلم..كانت نقصاكى والله :)

Yasmine يقول...

انا و دماغى

هاتى الكتاب على ضمانتى و مش هتندمى..و هستنى رايك فيه بعد ما تقريه :)

leeno يقول...

اعترفلك بحاجة

انا مش عايزة احس

مش عايزة يبقى عندي مشاعر !!!

في كلام كتير جوايا

بس النتيجة اني عايزة اعيش حياة الروبوط عشان اعيش

Yasmine يقول...

انا بقى قرف من عيشة الروبوت دى :)
خلينا نحس بشوية حاجات..فى جزء فى المتاب قريته امبارح كان فى درس من الدروس اللى ادهاله كان بيقوله ان خوفك من انك تحس باحساس معين بيخليك سجين الاحساس دا طول عمرك
و قاله مثال عن الالم..خوفنا من اننا نتوجع بيخلينا موجوعين دول عمرنا..لكن لما تقرررى من جواكى انك you'll let go بتعيشى الالم دا فى لحظته بس و لو عدى عليكى تانى بتبقى جربيته قبل كدا فبالتالى تاثيره بيبقى اقل بكتير من اول مرة..مترجمة فاشلة انا :D
بس الفكرة فى حد ذاتها عجبتنى جدا