الأربعاء، 12 أغسطس 2009

Misunderstanding

(1)

كانت نظراته تخترقها و كانها جزء رقيق من زجاج
لا يرى مدى شفافيته سواه .. - بطل تبصلى كانى هخلص..انا مش رايحة فى حتة - بتبسط اوى لما ببصلك.. عارفة كدا - و انا بتخنق اوى لما احس انى كنبة..عارف كدا؟!
*****

(2)

عندما ايقظها من نومها قرب الفجر فقط ليخبرها بان جاره "اللى فيه شيء لله" حدثه عنها و اخبره عن اول حروف اسمها بالرغم من عدم معرفته بها و نقل اليها كلامه عنها
"if you really love her..set her free” ادعت النوم لتقنع نفسها
بان صدمة كونه هو من يريد ان يطلق سراحه بعيدا عنها ليست اكثر من جزء
من اكثر كوابيسها اخافة لقلبها
الذى اصابه العبط المزمن فاصبح لا يرى سواه
*****
(3)
كثيرة هى الالغاز الكونية اهمها على الاطلاق لغز نظرية الاقتراب اصحابه يغويهم الاقتراب
ظنا منهم ان الوصول فى صعوبة تسلق دب الباندا لجبل ايفريست فنظرية الممنوع مرغوب لا تزال تجد من يصفقون لها و لكنهم ينخرطون فى محاولات فاشلة لنط الحواجز فى حين ان الباب اساسا مفتوح و لكن لن يراه الا من يستحق ان يكتب بيديه وحده كلمة النهاية
*****
(4)
فى حين كانوا يعتقدون ان قلة اكلها ليست اكثر من هوس ساذج بالرشاقة كانت تبحث هى عن طريقة ما تجعلها تتضائل حتى تصبح غير مرئية
*****
(5)
أطائشةَ المشاعر .. غادريني ‏ فـمـا أنــا عـبـدُ سـيـدةٍ وكأسِ لقد أخطأتِ .. حين ظننتِ أني ‏ أبيع رجولتي .. وأذل نفسي فأكـبـرُ مـن جمـالكِ كـبـريائي ‏ وأعنفُ من لظى شفتيك بأسي نزار قبانى
عندما تنازل عن حبها ليحافظ على بقايا رجولته تناسى انها هى ايضا استبدلته بحريتها.. فهو يرفض ان يكون تابعا..و هى تأبى ان تكون جارية
*****
(6)
خدعوك فقالوا ان الصداقات الملتصقة هى الاكثر وفاء
فافضل العلاقات على الاطلاق هى العلاقات عن بعد
فبعد جواب او ايميل او مكالمة من 59 ثانية
يعود كل طرف الى اغانى الراب او صوت فيروز
و كوب القهوة او الشاى
و رائحة البحر او البخور العربى
دون الحاجة لادعاء السعادة او افتعال الابتسام
او مشاركة الاخرين غصبا و اقتدارا فى ادق تفاصيل حياتك
قديما قالوا انه من الحب ما قتل
ليتهم اضافوا انه لبعض انواع الحب تاثير السموم تماما..
فقليلها يكفى للشفاء و كثيرها يصيب بالغثيان
سؤال يطرح نفسه بشدة: لماذا لا يتحول العالم
الى شبكة عملاقة من الاماكن الافتراضية و الاسماء المستعارة؟
*****
(7)
تقول انها لا تخشى انكسار قلبها يغضب لثقتها الزائدة فى قوتها فتبتسم رغما عنها لانها الوحيدة التى تعلم انه من المستحيل كسر شيئا كان مكسورا منذ البداية
*****

هناك 18 تعليقًا:

mUsLiM يقول...

جميل هذا الموضوع حقا ، وجميلة هى تلك المعانى التى يحملها بين طياته المرهفه ،،

ويجمع بين فقراته عنوانه الذى يعبر عن القاسم المشترك بين فقرات الموضوع جميعها

والحقيقه ان كل جزء من الموضوع جميل لا يمل الانسان من قراءته فالمعنى يفيض على الكلمات

وإن كان هناك ثمة تنويه فهو فقط بخصوص قصيدة نزار قبانى

ذلك أن القصيدة تبتدئ بطائشة الضفائر وهو عنوانها وليس طائشة المشاعر

وإن كانت كلمة المشاعر هنا تؤدى المعنى أيضا إلا أن كلمة الضفائر تضفى معنى أوسع وأرقى فى نظرى :)

السلام عليكم

Here i'm يقول...

عارفة أنا بسمى المواضيع دى بالطريقة الفلية :D

و بقعد كتير أقرا البوست مرة و اتنين و تلاتة .. و أقعد أقول يا سلام لو تعمل ID لكل فقرة .. علشان نعرف الفقرة دى بتتكلم عن فلان و الفقرة التانية بتتكلم عن علان ..

ســـــاره يقول...

ليا تعليق على النقطة 1 والنقطة 6

1 :
باين من رده انه بيحبها يعني هي مش منيكان في فاترينه وهو بيتأمل جمالها!! بالعكس الواحد لما بيحب بيتأمل اللي بيحبه بيبقى عايز يشبع منه ومش قادر .. صحيح المرأة بتبقى خجلانه جداا وقتها بس في نفس الوقت بيبقى احساس جميل ليها اوووي بيشعرها بأنوثتها .. مش شايفه ابدا انها كنبه :)

6 :
لا طبعا ولا اتمنى ان الكون يكون شبكة وكل حاجه فيه افتراضيه!!! ولا هقدر اعيش دايما مع ناس انا عارفه انهم لابسين اقنعه من اسماء مستعارة وشخصيات خياليه .. الواقع احلى بكتير من هنا يا ياسمين انا ماقدرش اتعامل مع الناس هنا على انهم مقربين مني اوووي الا لو تعدت حدود الشبكة ده غير لو الكون بقى شبكة هيفقدنا حياتنا الإجتماعيه تماما ..

الواحد يقدر يحدد برة هو عاوز ايه وعاوز مين .. مش شايفه ابدااا ان في ناس تقدر تقتحم وجودها في حياتك وانت مش راغب فيهم حتى لو الواحد بيجاملهم فالمجامله دي بيكون ليها حدود ولو مافيش حدود يبقى العيب في الشخص مش في اللي حواليه ..!!

الباقي ابدااااااع :)

Old Blogger يقول...

جميلـــــه
جميله أوى
أحسن حاجة اخدها معايا على الطريق
أكيد لما ارجع هقرأها تانى إن شاء الله
أسبوع كتير أوى .. هيوحشنى كلامك بجد :)

حلو التغيير :)

Fatma يقول...

1- ليه قالتله بحس اني كنبة وهي في الحقيقة خايفة لانها حاسة انه شايفها من جواها اوي وهي مش عايزة حد يشوفها من جواها ؟
هو رائع وهي خوافة
2- نفسي فيه واقول اخيه هي مش عايزاه يبعد وبتقنع نفسها انها عايزاه يبعد وبتقنعه انه لازم يبعدوان قربه مضايقها ولو فكر يبعد هي اللي هتضايق سبحان الله
3- احيانا بنحط حواجز عشان نشوف مين هقدر يعديها مع اننا فاتحين الباب بس من علو الحواجز الناس بتشوف الحاجز وبتنسى الباب
4- حلوة
5-ماحدش اتكلم عن الحب في شعره زي ما نزار عمل ...الحرية ! مافيش احلى من الكلمة دي بس للاسف ليها تمن واكيد غالي والانيل انه بيتدفع متأخر
6- البعد فيه وفاء لان بعد لانك مش مضطرة تتعاملي كل يوم فتكتشفي وحاشة النفس البشرية الناس كلها تقريبا في البعد اجمل مش الناس البعيدة هي اللي احسن البعد هو اللي بيعمينا عن رؤية الوجه الحقيقي
انا ماحبش حد يحبني عشان انا بعيدة احب اللي يحبني يحبني بالحلو والوحش وبالوحش الاول احب يبقى شايف الوحش ورغم كدا بيحبني وماحبش اني اعيش مغيبة ومقتنعة ان الناس كويسة لمجرد اني ماعرفهمش
7- رائع

الموضوع كله جميل حتى وان اختلفت مع حاجات فيه الا ان اسلوبه واحساسه وافكاره وفلسلفته جميلة جدا يا يويو

صفا سارة يقول...

انا بحب كتابتك بس كده :):*

Superman يقول...

(1) تعبيرات البنت عجبانى اوى..دي عصبية الخجل الانثوي :D

--------

(2) ايه المشهد العبقري ده؟!!

--------

(3) كلمة النهاية لإيه؟

--------

(4) انتي بتجيبي الجمل دي منين؟ :)

--------

(5) مابحبش نزار..بس حبيت النظرية بطريقتك

--------

(6) مش متفق معاكى..اكيد مكالمة الـ59 ثانية و الايميل و الرغي علي الماسنجر في ليلة رايقة حاجات لها مذاقها..بس مستحيل تكون دي اساس علاقاتنا الانسانية

---------

(7) تعبيرات زي مفيش حاجة تكسر قلبي..دي بتكسر حاجات تانية عند الرجل..لانها رسالة شبيهة بحبك مايفرقش معايا

leeno يقول...

mesh 3arfa a2ollek ana 2d eh bstmte3 belly btektbeeh, w 7atta lamma bkhtlef m3 b3d elmadmoon bab2a mostamte3a geddan welawdoo3 bylmesny geddan

msh 7ana2esh tfaseel w akhtelef w awafe2

ana bs 3ayza a2ollek en sa3t kteeeeer el7aya btdeena foras nmasheeha zay ma7na 7abeen, bs bnkhda3 nfsena w bnsebha tmasheena 3la mzagha w nfoo2 mt2akhar

Yasmine يقول...

مصعب

كويس ان الموضوع عجبك و كويس انك خدت بالك من العلاقة بين العنوان و الموضوع

بس انا لما دورت على القصيدة طلعتلى زى ما كتبتها و لما سمعتها بصوت كاظم لقيته بيقول اقاسية المشاعر..دى كانت اكتر واحدة عجبتنى بصراحة بس بتاعت الضفاير دى انا مش فهماها اوى

و عليكم السلام و رحمة الله

Yasmine يقول...

كوبرى

عجبتنى اوى الطريقة الفلية دى
و طبعا لازم تقرا مواضيعى مرة و اتنين عشان العمق الرهيب اللى فى كلامى :D

المرة الجاية هبقى اقول بالاسامى بس بعد رمضان عشان ما نفضحش الناس :D

Yasmine يقول...

سارة

انا مش شايفة فى دا حب بصراحة :)
شيفاها غلاسة و احراج و تطفل..شوفتى الرومانسية اللى انا فيها :D

طيب بلاش يبقى افتراضى طول الاسبوع..خلينا خميس و جمعة مثلا :D
هى المشكلة بتبقى لما التدخل دا يكون باسم الحب او الصداقة خصوصا لما تبقى متاكدة ان اللى بيعملوا كدا معاكى بيحبوكى بجد..بس بيحبوكى بالطريقة الغلط
او يمكن انا مش مقياس عشان اكتشفت ان خلقى بقى ضيق لدرجة سخيفة يعنى :)

تسلمى يا سارة ربنا يخليكى يا رب :)

Yasmine يقول...

التى هى نفسي

ربنا يخليكى بجد كلامك اسعدنى جدا
و تروحى و ترجعى بالسلامة ان شاء الله..ما تغيبيش علينا بقى :)

Yasmine يقول...

فنفونتى

1- امال انا ليه مش شايفة اى روعة فى الموضوع دا..ما يمكن هى مش عايزة تتحب بالطريقة دى دا ايه يختى دا :D

2- انا عايزة اعرف رايك بعد ما عرفتى القصة بالتفصيل

3- ما هى الحواجز دى هى اللى بتخلينا نعرف مين يستاهل و مين لا

4- شكرا :)

5- اهى الحرية دى هى المشكلة..بس انا شايفة ان تمنها بيتدفع بدرى اوى

6- تصدقى انا مستعدة اوافق انى اتخدع فى الناس بس اشوفهم من بعيد شوية..بجد خلقى بقى ضيق بشكل غير عادى..يمكن الاجازة الجاية دى تخلى الزحمة الرهيبة اللى انا فيها دى توحشنى ما حدش عارف

7- تسلميلى يا رافعة معنوياتى انتى :)

Yasmine يقول...

صفا سارة

و انا مبسوطة اوى بتعليقك..بس كدا :)

Yasmine يقول...

محمد

1- انا كمان متحيزة للبنت جدا هنا :D
بس انا مش شافاه خجل انثوى..انا شايفاه عصبية الحب بالطريقة الغلط

2- العبقرى هو اللى قرر ينهى القصة بالطريقة المبتكرة دى..دا المفروض يدى دروس لزمايله الشباب فى كيفية الفلسعة باقل الخساير الممكنة

3- كلمة النهاية للعبة الهروب الكبير :)

4- من الmisunderstanding اللى انا عايشة فيه :D

5- معقولة فى حد ما بيحبش نزار؟! انا معاك فى ان كتير من اشعاره اوفر جدا بس دا ليه حاجات حلوة جد زى مثلا ايظن اللى غنتها نجاة و قارئة الفنجان

6- هقولك زى ما قلت لسارة..نخليهم كدا خميس و جمعة كنوع من انواع الراحة..هو ليه ماحدش بيحب الفراغ دا غيرى هنا :D

7-تصدق ما فكرتش فيها من الناحية دى..بس مش يمكن تكون هى عايزاه يطمنها مثلا..ليه ياخدها على المحمل التانى؟

Yasmine يقول...

لينو

انا اللى بتبسط اوى بجد لما حد يفهم اللى مكتوب و يحسه كدا :)

مش بنخدع نفسنا يا لين..احنا بنستسهل نرمى كل حاجة على الدنيا..اللى قادرين نغيره قبل اللى ما نقدرش نغير فيه

The Seagull يقول...

1) مش عارفة تخيلت المنظر كدة وحسيته حاجة حلوة يعني مش زي ما انتي متصوراه كدة :) .. أحيانًا لغة العيون الصادقة بتغني عن كلام كتيير أوي ممكن يتقال .. الواحد هيتضايق في حاجة واحدة بس إذا انتي مش بتبادليه نفس الشعور اللي هو عليه ده بنفس الدرجة اللي هو عليها واللي ممكن تتحس جدًا من نظراته دي :) يعني العملية في الأول والآخر بتعتمد على إحساسك هل نظراته دي نظرات المتأمل المحب اللي بيحاول يستكشفك من جواكي ويسبر أغوارك ويقهمك أكتر؟ والا حاجة تانية؟ :)

أنا شايفاها كدة بصراحة


2) ربنـا يعينهـا :)


3) أول ما قريت النقطة دي ماكنتش فاهماها خالص بصراحة .. وقعدت كتير أفكر فيها وأقول هي تقصد ايه لحد ما وضحتي بقى في ردك :D


5) حلوة


6) أعتقد ده نابع من طبيعتها الانطوائية وشدة الخصوصية :) .. ممكن يكون خوف من التعامل مع البشر عمومـًا .. ممكن هي فضلت تنطوي على حياتها ومشاكلها وما تزعجش حد أو تحس إنها تقيلة على حد مش كرهًا فيهم أو تعالي عليهم أو انعدام ثقة فيهم لا قدر الله .. لكنها حست إنها مش هتقدر تتكيف معاهم مثلاً أو لو وكلوها في مشكلة، أي مشكلة مش هتقدر تعملهم حاجة .. بتحب يبقى في خصوصية شوية .. مش كل حاجة عنها هما لازم يعرفوها بالتفصيل .. بس في نفس الوقت بتسأل عليهم من فترة للتانية :)


7) واضح إنها شخصية عملية أووي :D


تسلمي بجد على البوست الراااااائع ده .. مش عايزة أقولك أنا بقالي 3 أيام عايزة أرد ومش عارفة بجد :D

Yasmine يقول...

تسلميلى يا يويو يا رب :)

انا مبسوطة ان الموضوع عجبك و عجبتنى تحليلاتك اوى فى اكتر من نقطة