الاثنين، 16 يونيو 2008

خمسة فلسفة ..."اشكال من الجنون"

مجنون
اللى يفتكر انه فاهم كل حاجة فى الدنيا
و ان محدش هيعرف يضحك عليه
مجنون
اللى مستنى حد يمشيله حياته
و مجنون
اللى عايش مشرف على حياة الناس
و هو محتاج اللى يشرفله على حياته
مجنون
اللى يفتكر انه احسن من غيره عشان هو لابس سينييه و "غيره" لابس ماركة وكالة البلح
مجنون
اللى يعيش لنفسه و يفتكر ان ده ذكاء
مجنون
اللى يضيع عمره ورا اوهام هو مسميها احلام
لكنها بعيدة تماما عن الواقع
مجنون
اللى قعد على القهوة و رمى حلمه فى البحر
عشان هو اكسل من انه يحققه
مجنون
اللى عايز نصيحة متفصلة على اللى هو عايز يسمعه
مجنون
اللى عايز يشوف الناس كلها نسخ منه
و دماغهم نسخ من دماغه
مجنون
اللى يتخلى عن طموحه عشان فشل مرة
مجنون
اللى بيضيع حياته فى الحقد على خلق الله
مجنون
اللى بيفرح بكلام هو عارف انه ميستاهلوش
و مجنون
اللى يقول كلام من ورا قلبه
عشان يوصل لكرسى ولا لمنصب
مجنون
اللى بيدى نفسه الحق يشكك فى نوايا الناس و فى قلوبهم
مجنون
اللى بيرمى نفسه فى النار
و يقول مشيت ورا احساسى
مجنون
اللى بيخلى حياته باردة مفيهاش مشاعر حلوة
و يقول انا عاقل
مجنون
اللى مش بيعترف بغلطه و بضعفه...بحزنه
و برغبته فى ان دموعه تنزل
مجنون
اللى بينسى ان اسمه من "الانسانية"
و ان له رب اقرب له من وريده
و مجنون
اللى بيبص على الناس من فوق
و فاكر انه هيفضل فوق على طول
مجنون
اللى فى ايده يساعد و بيرفض
مجنون
اللى تاعب نفسه و لسه بيدور على ربنا
بالرغم من انه موجود فى كل حاجة حواليه موجود و مستنيه يفتح قلبه...
الايمان احساس و الاحساس مش محتاج اثبات ولا ادلة
مجنون
اللى ناقم و غضبان على مصر عشان ما خدش منها حاجة مع ان اكبر حاجة عملهالها انه جاب كرسى و قعد على القهوة
مجنون
اللى ضيع اكتر من 5 دقايق من حياته فى ندم
على انه عرف ناس متستاهلش لما هم ميستاهلوش ليه بتديهم حجم اكبر من اللى يستحقوه؟
مجنون
اللى عايز يبان ذكى طول الوقت الذكاء بيستدعى احيانا انك تستغبى فى مواقف معينة
مجنون
اللى يخسر صداقة عشان قصة حب
مجنون
اللى يهين كرامته عشان اللى بيحبه
مجنون
اللى فاكر ان الدموع و الالم مرتبطين بالحب الحب بيسعد و بيقوى لا بيضعف ولا بيكئب و على رأى الست "الحب عمره ما جرح"
و اكبر مجنون
اللى بيدور على الحب فى الزمن الاسود ده

هناك تعليقان (2):

Here i'm يقول...

مجنون

اللى فاكر مامى و باباى حيعشولوا





مجنون

اللى فاكر مصــر عزبه

يظهر مش عارف أنه أول واحد حـ.....( تيييت )




مجنون

اللى ميحسش بعد بوستك دا أنه مجنون

banouta masreya يقول...

كلنا مجانين بدرجات مختلفة
بس الفرق ان فى ناس بيجيلها وقت و بتفوق و فى ناس تانية بتستحلى جنانها
ربنا يشفيهم بجد بيصعبوا عليا