الخميس، 26 يونيو، 2008

كلام مش موجود فى قاموسى

الرمادى لون سخيف مالوش اى معنى معنديش مكان للون ده فى حياتى معرفش غير الابيض و الاسود مع انه فى مواقف معينة الرمادى بيكون مطلوب بس انا ما اتعودتش اقف فى النص
ضل راجل ولا ضل حيطة دى كمان مقولة مضحكة جدا اوقات كتير الحيطة بتكون افيد على الاقل ثابتة و مش بتتحرك كتير بيتقالهم كده و بياخدوا قرارات بناء على افكار عقيمة بتتحط فى دماغهم و مع انهم مش هم اللى قالوها الا انهم هم لوحدهم اللى بيتحملوا نتايجها
انا ما استاهلش اللى بيحصلى
و الندب و اللطم على اشكالهم
مين مش بيعدى عليه وقت يكتئب فيه
و يحس ان قلبه هيقف من قلة الهوا حواليه
لكن لا الكلام بينفع ولا الشكوى بتجيب نتيجة
ربنا موجود و مجرد الكلام معاه بيريح
المجاملة
مع انى بضطر اوقات كتير انى اقول كلام مش حاساه اوى
بس فى ناس تخصص فى الكلام المتزوق
مبكرهش فى حياتى قد الكلام اللى من ورا القلب
و الكليشيهات المحفوظة اللى بتتقال لكل الناس و فى كل المواقف
امشى جنب الحيط
مقولة تانية بتعصبنى
كل الناس بتمشى جنب الحيط
و انا لاعايزة ابقى زى كل الناس
ولا عايزة حياتى تبقى مملة زيهم
لما الاقى risk هاخده... ليه لأ؟
ايه اللى يمشينى جنب الحيط و الدنيا واسعة
مفيش كرامة فى الحب
مقولة غبية من شخص غبى اى علاقة انسانية فى الدنيا لازم يكون فيها حد ادنى من الاحترام
و الحب خصوصا لو ما كانش قايم على احترام متبادل
تبقى قلته احسن
عجبتنى اوى جملة فى شريط منير
"و ده حب ايه ده اللى من غير حرية"
و مفيش حرية من غير كرامة
السينما النضيفة مصطلح مش عارفة طلع امتى ولا مين النبيه اذكى اخواته اللى طلعه و بالمقياس ده فيلم زى اللمبى هيبقى فيلم "نضيف" و فيلم زى سهر الليالى هيبقى فيلم "مترب" على اساس ايه يعنى؟!!
دون و دوت و دوكهما مالهمش اى علاقة بالموضوع بس دول 3 كلمات بكرههم و بتعصب من اللى بيقولوهم
الحب الاول وهم كبير المقولة دى معناها ان فى اكتر من حب فى حياة البنى ادم انا الحب اللى اعرفه بييجى مرة واحدة بس فى العمر فى حد ممكن اتفق معاه بنسبة 40% و نبقى معارف و حد اتفق معاه بنسبة 60% و نبقى صحاب و حد بنسبة 80% و نبقى صحاب اوى لكن اللى اتفق معاه بنسبة 100% هو شخص واحد بس فى الدنيا و قالتها شادية القلب يحب مرة مايحبش مرتين...
المستحيل فى مقولة سمعتها مرة و عجبتنى اوى "سأل الممكن المستحيل اين تقيم؟ فأجابه: فى احلام العجائز" المستحيل ده حجة البليد زى ما بيقولوا كل من كان اكسل من انه يحقق حلمه يقول ده مستحيل ربنا ادانا عقل و قوة تخلى كل حاجة ممكنة...حتى المستحيل

هناك 4 تعليقات:

Here i'm يقول...

الأكتئاب

مبحبش الكلمة دى ..
قريت عنها بحث بيقول أنها ملهاش وجود فى الحياة .. كل اللى بيحصل أن الإنسان مستعد يكتئب .. أو بيسلم نفسه لظروفه الوحشة فبيكتئب ..



العلمانية

قريت بحث لعبد الوهاب المسيرى أننا ملناش دخل بيها من بعيد أو قريب .. لأننا ببساطة دينا لا يقوم على فكرة الكهنوت ...





مجنون فلان

يمكن الواحد لما كان مراهق كان بيحب فلان و علان .. بس الحمد لله طول عمرى موصلتش لكلمة أنى أقول أو حد يقول عليا مجنون فلان .. الحمد لله



لو لاقيت حاجات تانى .. حجيلك هوا :D

banouta masreya يقول...

انا عارفة ان الاكتئاب مش فى قاموسك انت هتقولى :)
ان شاء الله دايما

العلمانية دى انا مش بفتى فيها جبت كتاب من كام شهر و لسه ما قرتوش لما اقراه هكون رأى بدل ما افتى

اما الممثلين و المغنيين فانا ما عشتش سن المراهقة ده اساسا كنت عاقلة اوى لدرجة السخافة يعنى:D
المهم بس ما تطلعش عليا متأخر:))

الشارده يقول...

احييكى على كل كلامك خصوصا حكاية الكرامه والحب البت اختى دايما تفلقنى بالجمله دى واقولها مفيش حب من غير كرامه لو حب من غير كرامه يبقى استعباد اتفرجتى على فيلم كرامة زوجتى

banouta masreya يقول...

شوفتى انتى فيلم الزوجة 13:))
انا كنت كاتبة حاجة تانية و تخيلت انها هتعجبك بس مكسوفة اوى احطها بصراحة هبقى اوريهالك بعدين على انفراد بدل الفضايح :)))