الأربعاء، 25 يونيو 2008

و لسه بحبك يا بنت الايه!!

من قبل ما اتخرج و انا مستنية فرصة فرصة احقق فيها طموحى اللى اتأجل 20 سنة 20 سنة تعليم و حفظ و صم و جمع وطرح و ضرب و حاجة تقرف مناهج عقيمة لو كان فى منها فايدة ففايدتها فى انها بتقضى على اى قدرة على التفكير كنت عايزة الاقى نفسي و كنت متأكدة انى مش هلاقيها هنا و مؤخرا بقيت مصدقة اوى فى المقولة دى Anywhere but home
نظرا لان ظروف البلد ما بقتش مساعدة حد انه يحقق اى حاجة
ولا حتى انه يحلم و سواء كان مش لاقى ياكل او معاه فلوس
فمجرد التفكير فى انك تعمل حاجة مختلفة هنا يبقى جنان رسمى مش عارفة ليه و انا بفكر و بدور و شاغلة نفسي بمليون حاجة كأن اللى قعدنى 20 سنة مش هاين عليه يقعدنى شهر كمان لقيتنى بفتكر حاجات غريبة افتكرت لما سافرت بره لاول مرة و انا عندى 7 سنين و افتكرت لحظة وصول الطيارة للمطار بعد غياب سنة كاملة عن مصر افتكرت ازاى كنت عايزة احضن هوا بلدى قبل ما الطيارة تلمس ارضها
كنت طفلة عندى 8 سنين و بالرغم من كده حنينى لبلدى كان فوق الوصف و الكلام... اول ما الطيارة نزلت كنت عايزة اعمل كل حاجة فى نفس الوقت عايزة اعوض كل ثانية غيبتها عايزة اشوف شارع بيتنا عايزة ادخل الاودة اللى فيها لعبى القديمة عايزة اشوف اهلى كلهم عايزة اركب عربيتنا و اشوف بيت جدى مليون حاجة و عايزاهم كلهم فى نفس الثانية
وافتكرت كمان لما سافرت لبنان كنت مبسوطة جدا هناك
و حبيت البلد بسرعة غريبة بس برضه كان فى حاجة ناقصة
كان ناقصنى انتى!!
لا عايزة النضافة اللى فى شوارع اوروبا ولا عايزة البيت الكبير ابو جنينة
ولا عايزة المدرسة النضيفة
اللى بيعاملوا فيها الاطفال على انهم بنى ادمين مش مكن للحفظ و التلقين بس برضه مش عايزاها
لا عايزة الجو الرايق و تلج الشتا و هدوء يوم الحد ولا المواصلات الراقية و الناس اللى بتحترم بعضها
ولا عايزة المستقبل و الcareer و الحياة اللى مستنينى هناك عايزة شوارعك الزحمة و التراب بتاع العصارى
اللى محدش عارف هو جاى من شكمانات العربيات و الميكروباصات ولا من السحابة السودا
اللى هى برضه اختراع مش موجود غير هنا
عايزة دوشة الساعة 3 وقت خروج المدارس
والزحمة القاتلة اللى مبقتش بتفرق بين يوم الجمعة و يوم الاتنين عايزة اللف 3 ساعات على ركنة
لدرجة بتخلى الواحد يلعن اليوم اللى اتعلم فيه السواقة
عايزة اتفرج على الولاد الصغيريين
و هم رايحين يصلوا الجمعة مع ابهاتهم عايزة اروح البلد و اتفرج على سعاد و هى بتخبز
مين هيعملى فطير مشلتت فى اوروبا يعنى؟
و اتفرج على الفلاحين و هم بيشتغلوا فى ارضهم من الفجر بحس الفلاح منهم مرتبط بارضه اكتر من مراته و اهله يمكن عشان حتة منك
عايزة اشوف برج الحمام وقت المغربية
و اروح اسكندرية و الساحل فى المصيف عايزة ابص من البلكونة اشوف ملايين البشر بيصيفوا فى جليم
عدد مهول من الشماسى مغطى رمل البحر و بالرغم من الزحمة القاتلة الا ان الناس مبسوطة فين فى الدنيا فى كم البساطة دى؟
عايزة لما احتاج ناس الاقى اهلى كلهم حواليا عايزة لما رمضان ييجى اشوف الزينة فى الشوارع
و موائد الرحمن فى كل مكان
عايزة فى العيد اشوف البنات الصغيرة بفساتينهم الجديدة و اكل الكحك اللى معمول فى البيوت عايزة اتفرج على التليفزيون الممل و الاغانى الامل منه اللى بالرغم من سخافتها الا انها جزء لا يتجزأ من العيد بالنسبالى
عايزة اروح الحسين و السيدة و اتفرج على اللى قاعدين على قهوة الفيشاوى كبار و اطفال اغنيا و فقرا كلهم فى مكان واحد
عايزة اقرا جرايد الحكومة و اضحك على الاخبار اللى مكتوب عكسها بالظبط فى كل الجرايد التانية و اشوف صور الريس دايما متصدرة الخبر الاول مع تعظيم و تمجيد لاى حاجة بيعملها حتى لو كانت قص شريط حمام بيتهم
عايزة اتفرج على النيل وقت الشروق و اشوف الصيادين فى مراكبهم الصغيرة مع ولادهم الصغيرين عايزة اروح الزمالك و استغرب التناقض الغريب
بين رواد الnile city اللى بيسمعوا buddha bar و ركاب الفلوكات اللى مستمتعين بالاغانى الهابطة اللى بيشغلوهالهم و الغريب ان دول مبسوطين و دول مبسوطين
عايزة احبس نفسي فى البيت يوم شم النسيم من اللى بيجرى فيه بس بحبه برضه ما هو حاجة تانية مش موجودة غير هنا
عايزة لما يبقى فى ماتش لمصر اشوف شارع جامعة الدول و هو مافيهوش مكان لبنى ادم كم غير طبيعى من البنى ادمين قلبهم بيقف لما الكورة تقرب من الشبكة يمكن لأنهم عايزين يقولوا اسمك و يفرحوا بيه و خلاص حتى لو كان السبب ان فريقك كسب فى ماتش كورة
كل الناس دول بيحبوكى و مش عارفين يعملولك ايه قلبنا واجعنا عليكى و احساسنا بالعجز هيقتلنا بنشتم فيكى و ياويله اللى يأكد كلامنا و بالرغم من كده لسه قاعدين عايزة امشى بس مش قادرة و غالبا مش هقدر
ايه عملالى عمل؟

هناك 3 تعليقات:

Founoon يقول...

خليتيني اعيط الله يسامحك

موضوع رااائع

اكتبيه هناك بقى

banouta masreya يقول...

الموضوع ده معمول عشانك اساسا
زى ما تقولى بغير رأيي فى الرد اللى كنت قايلاه فى موضوعك بتاع الهجرة
ده انا معرفتش اقدم على منحة 7 شهور ما بالك بسفر نهائى
انا قاعدة معاكى خلاص قررت :)

إبتسام مختار يقول...

فين فى الدنيا فى كم البساطة دى؟

فى مصر
مصر بس