و دائما... تشرق الشمس

تخيلت اننى اعرفها جيدا و بأنى لا يمكن ان اغفل عنها

فكيف لا اعرفها و هى لازمتنى منذ ان ولدت؟

و كيف اغفل عنها و هى ...حياتى

اقتربت منى حتى اصبحت ملامسة لجسدى

كانت ...مختلفة

فالاختلاف هو اقرب وصف لها

اردت تحديد لونا لها فلم اجد غير الاسود

فلطالما احببت هذا اللون و اعتبرته ملك الالوان

و وجدت مائة سبب و سبب لاضفاء هذا اللون عيها

فانا تشاجرت مع هذا

و تأذيت من هذا

و جرحت هذه شعورى

و اغتابنى هؤلاء

و خاننى هذا

و تخلت هى ايضا عنى

و اردت فعل هذا و فشلت

و حلمت بهذه و لم استطع الوصول اليها

فكيف لا يكون الاسود لونها و هى لم تترك مجالا لاى لون اخر؟

فجأة وجدتنى اتسائل عن مكانى

فكيف اراها بهذا الوضوح لاول مرة؟

فهى تلازمنى منذ عشرين عاما و هذه هى اول مرة اراها بهذا القرب

هل مت و هذه هى روحى التى تهذى؟

هل احلم؟هل هذا كابوس؟

تساؤلات كثيرة شغلتنى عنها...

حتى وجدتها تبتعد عنى مرة اخرى

ناديتها"انتظرى" ولكنها لم تسمع ابتعدت...

و كلما زادت المسافة بيننا...كلما رأيت فيها تفاصيل لم اراها من قبل

حتى ابتعدت تماما... فوجدتها على غير هيئتها الاولى

فهى ليست...سوداء

على العكس تماما فانها تحمل من الالوان ما يكفى لتشتيت اصفى الناس ذهنا

فيها الكثير من الازرق

نعم فقد مرت على لحظات صفاء و راحة بال كثيرة

لو اعطيتها لونا حتما سيكون الازرق

و فيها الكثير من الاحمر ايضا

فانا عرفت الكثير من قصص الحب ابطالها اشخاص

تركوا فى اثار لن تمحى من ذاكرتى ابدا

و وجدت فيها بعض الاخضر

فانا حققت كثير من احلامى ...و ما زلت احلم بالاكثر

فلو لونت احلامى سيكون الاخضر لونها بالتأكيد

و اخيرا وجدت فيها لونا لم يكن ظاهرا لى

فهو اللون الاساسى الذى خلقت به

و لكنى انشغلت عنه ببقية الالوان فلم اتمكن من رؤيته

فهو الابيض و عرفت فورا سبب وجوده...

فهو موجود لأنك اساس حياتى و سر وجودى

خلقتنى و احسنت خلقتى و صورتى

منحتنى ما لا اقوى على حمدك عليه

فلا يكفينى عمر فوق عمرى لاحمدك على نعمة واحدة منهم

طلبت... فاعطيت

طلبت اكثر...فلم تبخل على

كنت دائما موجودا

و لكنى غفلت عنك و انشغلت بتفاهات الاشياء و حماقات البشر

فما اغبانى!

فهكذا ارى الاشياء...دائما اراها من قرب

فاى شيء تراه من قرب يجب ان يكون اسود

و اى اختلاف تحدثه بعض الخطوات الى الخلف!

فقليل من المساحة يسمح برؤية الاشياء على حقيقتها

و لكنى سلكت الطريق الاسهل فرأيتها سوداء لاننى اردت ان اراها سوداء

و وجدت الف سبب لتبرير سوادها

مع انى لو اردت لوجدت مليون سبب يضفوا عليها الوان السماء كلها

و يكفى وجودك فى حياتى لتكون بيضاء

بيضاء كحياة طفل لم يخطو بعد اولى خطواته فى الحياة

و لكن هذا طبعى و طبع البشر

اذا سئلنا عن اسباب تعاستنا لا نحتاج لاكثر من دقيقة تفكير

اما اذا سئلنا عن شيء واحد يسعدنا نفكر لساعات

فكأن احساس الحزن يطربنا

و كأن صورة الضحية هدفا تهافت البشر ليصبحوا عليه

حتى ضاعت ملامحهم فى الطريق

فاردتوا جميعا ملابس الحداد على حياة لم يعطوها فرصة اظهار ما بها من الوان

بالرغم من اننا نملك من نعمك ما لا تقوى على حمله الجبال...

فاغفر لى غفلتى و ارحمنى

فمن يرحمنى ان لم يكن انت؟

و برحمتك...برحمتك وحدها...تشرق الشمس فتجعلها بيضاء كما عرفتها

فارحمنى يا الله حتى تشرق من جديد...

كيف تعرف انك مواطن مصرى؟

عندما تقضى يومك كله فى طوابير

طابور للعيش طابور للمواصلات طابور لدخول مستشفيات الحكومة

طابور للحصول على حديد عز

فتأكد انك مواطن مصرى

عندما يوصف وزير فى حكومة بلدك بانه الوزير الفنان

و تراه يرسم لوحات تباع بالاف الجنيهات

مع ان بنت خالى اللى عندها 4 سنين بترسم احلى منها

و تراه يعلن منشكحا عن استعداده لزيارة اسرائيل

حتى يصل الى كرسى اليونيسكو

فتأكد انك مواطن مصرى

عندما تجد فى شهر يونيو ازمتك الكبرى

بسبب امتحانات الثانوية العامة

لأنك اكيد عندك حد بيعانى من الوكسة دى و بالرغم من تكرارها كل سنة بنفس السيناريو الا ان تصريحات الوزير لا تتغير فترى تناقض واضح بين اخبار انتحار طلاب الثانوية و اخبار الامتحانات "اللى فى مستوى الطالب المتخلف" فانت اكيد مواطن مصرى

عندما ترى شخص طوله متر و نص

يدير مجلس الشعب و قراراته بوجبات عشاء من النايل هيلتون فى تعارض واضح بين مصالحه الشخصية و منصبه السياسى و الحزبى

و لكنه يتغلب بذكاء على هذا التعارض... و على عينك يا تاجر

فاعلم انك مواطن مصرى

عندما تجد شجب حكومى لفكرة التوريث

و ادانات واضحة من الخيبة التى تسمى معارضة

فى حين تجد ان الشعب المصرى لا يجد لجمال بديلا

فحتى فى حالة اجراء انتخابات محترمة

فهو رئيس مصر القادم بلا منازع

فانت اكيد مواطن مصرى

عندما تجد ان الممثلين الفاشلين يكسبون الملايين

فى حين ان الكتاب و المدرسين و اساتذة الجامعات

و اطباء المستشفيات الحكومية و الصحفيين

لا يزالوا يبحثون عن كوادر تسمح لهم بحياة ادمية

فانت مصرى فى حكومة نظيف

عندما تجد ان الكل متواطئ ضدك

بدئا بنائب دايرتك اللى مش هيعرفك بعد الانتخابات

لظابط المرور اللى فى شارع بيتك

و اللى لو ما خدش اللى فيه القسمة فالمخالفة جاهزة و مستنياك

للمدرس اللى هيبلغ عنك فورا لو كتبت موضوع تعبير فيه سيرة الحكومة

فاعرف انك مواطن مصرى

لما تلاقى الشعب مقسوم نصين نص مش لاقى ياكل و نص بيفكر يصيف فى مارينا ولا هاسييندا و مفيش حد تقريبا فى النص فانت مواطن مصرى اكيد

عندما "تطلع عينك" عشان تطلع بطاقة ولا ترخص عربية ما بين المشورة فى هيئات الحكومة و الروتين اللى يجيب الضغط و تلاقيهم لسه بيتكلموا عن الحكومة الالكترونية تبقى مواطن مصرى

عندما تجد ان نفس الناس الى بتعارض العرى و الاباحية و بتدين الانحلال الاخلاقى و التدهور و الامركة و التأثر بالغرب و غيره من الكلام الكبير المكلكع فى نفس الوقت هيقطعوا بعض على تذاكر حفلة شاكيرا فانت مواطن مصرى

عندما تجد ان اقصى ما يشغل تفكيرك مين هيكسب فى ستار اكاديمى و حسين فهمى اتجوز مين و مراته حامل ولا لسه و تلاقى القهاوى مفيهاش مكان لبنى ادم وقت ماتشات كاس اوروبا

و تعرف ان زمايلك المواطنين اكتر ناس بتدورعلى مواقع الجنس على الانترنت مع انهم هم نفسهم اللى بيعانوا و بيتبهدلوا و مع ذلك محدش عايز يعمل حاجة فانت برضه مواطن مصرى

عندما تجد ان وصف الديموقراطية ملازم لبلدك

فى حين ان الجماعات السياسية التى تجد صدى عند الناس

و التى تتواجد فى كل مكان و شعاراتها واضحة و معلنة فى الشوارع

و ممثليها حصلوا على 88 مقعد فى مجلس الشعب

لا تزال تدعى"المحظورة"

فتأكد انك مواطن مصرى

عندما تتخذ من شعار "ماحدش فاهم حاجة" اساسا لحياتك و مع ذلك لما يتوجهلك اى سؤال كل طاقات الفتى و الرغى بتتفجر فيك حتى لو كان سؤال فى الذرة فانت بكل تأكيد تحمل لقب مواطن مصرى و بجدارة

عندما تجد امامك طريقين للوصول طريق يخليك فاروق جويدة و طريق يخليك ممدوح اسماعيل (و اللى فى النص دول لا يعنونى فى شيء) تبقى برضه مواطن مصرى

كلام مش موجود فى قاموسى

الرمادى لون سخيف مالوش اى معنى معنديش مكان للون ده فى حياتى معرفش غير الابيض و الاسود مع انه فى مواقف معينة الرمادى بيكون مطلوب بس انا ما اتعودتش اقف فى النص

ضل راجل ولا ضل حيطة دى كمان مقولة مضحكة جدا اوقات كتير الحيطة بتكون افيد على الاقل ثابتة و مش بتتحرك كتير بيتقالهم كده و بياخدوا قرارات بناء على افكار عقيمة بتتحط فى دماغهم و مع انهم مش هم اللى قالوها الا انهم هم لوحدهم اللى بيتحملوا نتايجها

انا ما استاهلش اللى بيحصلى

و الندب و اللطم على اشكالهم

مين مش بيعدى عليه وقت يكتئب فيه

و يحس ان قلبه هيقف من قلة الهوا حواليه

لكن لا الكلام بينفع ولا الشكوى بتجيب نتيجة

ربنا موجود و مجرد الكلام معاه بيريح

المجاملة

مع انى بضطر اوقات كتير انى اقول كلام مش حاساه اوى

بس فى ناس تخصص فى الكلام المتزوق

مبكرهش فى حياتى قد الكلام اللى من ورا القلب

و الكليشيهات المحفوظة اللى بتتقال لكل الناس و فى كل المواقف

امشى جنب الحيط

مقولة تانية بتعصبنى

كل الناس بتمشى جنب الحيط

و انا لاعايزة ابقى زى كل الناس

ولا عايزة حياتى تبقى مملة زيهم

لما الاقى risk هاخده... ليه لأ؟

ايه اللى يمشينى جنب الحيط و الدنيا واسعة

مفيش كرامة فى الحب

مقولة غبية من شخص غبى اى علاقة انسانية فى الدنيا لازم يكون فيها حد ادنى من الاحترام

و الحب خصوصا لو ما كانش قايم على احترام متبادل

تبقى قلته احسن

عجبتنى اوى جملة فى شريط منير

"و ده حب ايه ده اللى من غير حرية"

و مفيش حرية من غير كرامة

السينما النضيفة مصطلح مش عارفة طلع امتى ولا مين النبيه اذكى اخواته اللى طلعه و بالمقياس ده فيلم زى اللمبى هيبقى فيلم "نضيف" و فيلم زى سهر الليالى هيبقى فيلم "مترب" على اساس ايه يعنى؟!!

دون و دوت و دوكهما مالهمش اى علاقة بالموضوع بس دول 3 كلمات بكرههم و بتعصب من اللى بيقولوهم

الحب الاول وهم كبير المقولة دى معناها ان فى اكتر من حب فى حياة البنى ادم انا الحب اللى اعرفه بييجى مرة واحدة بس فى العمر فى حد ممكن اتفق معاه بنسبة 40% و نبقى معارف و حد اتفق معاه بنسبة 60% و نبقى صحاب و حد بنسبة 80% و نبقى صحاب اوى لكن اللى اتفق معاه بنسبة 100% هو شخص واحد بس فى الدنيا و قالتها شادية القلب يحب مرة مايحبش مرتين...

المستحيل فى مقولة سمعتها مرة و عجبتنى اوى "سأل الممكن المستحيل اين تقيم؟ فأجابه: فى احلام العجائز" المستحيل ده حجة البليد زى ما بيقولوا كل من كان اكسل من انه يحقق حلمه يقول ده مستحيل ربنا ادانا عقل و قوة تخلى كل حاجة ممكنة...حتى المستحيل

A woman's heart is a deep ocean of secrets

But now you know

there was a man named Jack Dawson

and that he saved me...

in every way that a person can be saved.

دى جملة اتقالت فى اخر فيلم تيتانك

بحبها اوى و معناها عندى اكبر بكتير من اللى كان مقصود...

ابيض و اسود

بينى و بين الحاجات القديمة حالة حب مستعصية كل ما هو ابيض و اسود بيبهرنى لدرجة انى و انا صغيرة كنت مقتنعة تماما ان زمان ما كانش فى الوان تانية غير اللونين دول زمان عند ناس كتير تخلف و رجعية و ناس راكبة جمال

و عندى انا نقاء و راحة بال و ناس نضيفة شوارع فاضية و بيوت مفتوحة و رقى مالوش حدود لما بشوف صور جدودى القديمة بشوف على وشوش الناس ابتسامة صافية لا فيها تكلف ولا شايلة هم اكيد الناس دى كان عندها مشاكل فى حياتها بس كانوا بيعرفوا يفرحوا و كانوا بيحبوا يعيشوا...

الزمان:الخمسينات من القرن الماضى

المكان:مصر الحروسة

اولا كنت هبقى لابسة لبس بنات

مش الكوارث اللى بنلبسها دلوقتى

و كان ده شكل مصر زمان

دى صورة لروكسى فى الخمسينات

و ده باب الحديد...فى قول اخر ميدان رمسيس

بس من غير ميكروباصات و زحمة و ناس راكبة فوق بعض

و ده كوبرى قصر النيل

حبى الاول و الاخير فى القاهرة مع الزمالك طبعا

و دى الزمالك زمان

و سواء كنت هبقى ساكنة فى بيت كبير بيحرسه عثمان او فى حارة من حوارى المحروسة سواء كنت هسمع اغانى فى البتاع ده... او هروح الاوبرا القديمة سواء هركب الترام مع الشعب... او كان ربنا هيبقى فاتحها علينا و اركب دى كنت هبقى مبسوطة دى صورة لمدرستى زمان و دى صورة لجامعة القاهرة قصدى جامعة فؤاد الاول كان ممكن اصيف فى اسكندرية زى بقية الناس او فى قصر المنتزة لو بابا كان من صحاب الملك :) دول ممثلين زمان

و دول ممثلين دلوقتى

دول مغنيين زمان

و دول مغنيين دلوقتى

دى تقريبا الصورة الوحيدة اللى لقيتها لابسة فيها

و ده تيمو ملك الجيل

مفيش مقارنة من اى نوع بين زمان و دلوقتى

سواء الطبقة الارستقراطية

او الفلاحين و العمال

زمان يعنى زمن الهوانم و البهوات

يا ريته ينفع ...

و لسه بحبك يا بنت الايه!!

من قبل ما اتخرج و انا مستنية فرصة فرصة احقق فيها طموحى اللى اتأجل 20 سنة 20 سنة تعليم و حفظ و صم و جمع وطرح و ضرب و حاجة تقرف مناهج عقيمة لو كان فى منها فايدة ففايدتها فى انها بتقضى على اى قدرة على التفكير كنت عايزة الاقى نفسي و كنت متأكدة انى مش هلاقيها هنا و مؤخرا بقيت مصدقة اوى فى المقولة دى Anywhere but home

نظرا لان ظروف البلد ما بقتش مساعدة حد انه يحقق اى حاجة

ولا حتى انه يحلم و سواء كان مش لاقى ياكل او معاه فلوس

فمجرد التفكير فى انك تعمل حاجة مختلفة هنا يبقى جنان رسمى مش عارفة ليه و انا بفكر و بدور و شاغلة نفسي بمليون حاجة كأن اللى قعدنى 20 سنة مش هاين عليه يقعدنى شهر كمان لقيتنى بفتكر حاجات غريبة افتكرت لما سافرت بره لاول مرة و انا عندى 7 سنين و افتكرت لحظة وصول الطيارة للمطار بعد غياب سنة كاملة عن مصر افتكرت ازاى كنت عايزة احضن هوا بلدى قبل ما الطيارة تلمس ارضها

كنت طفلة عندى 8 سنين و بالرغم من كده حنينى لبلدى كان فوق الوصف و الكلام... اول ما الطيارة نزلت كنت عايزة اعمل كل حاجة فى نفس الوقت عايزة اعوض كل ثانية غيبتها عايزة اشوف شارع بيتنا عايزة ادخل الاودة اللى فيها لعبى القديمة عايزة اشوف اهلى كلهم عايزة اركب عربيتنا و اشوف بيت جدى مليون حاجة و عايزاهم كلهم فى نفس الثانية

وافتكرت كمان لما سافرت لبنان كنت مبسوطة جدا هناك

و حبيت البلد بسرعة غريبة بس برضه كان فى حاجة ناقصة

كان ناقصنى انتى!!

لا عايزة النضافة اللى فى شوارع اوروبا ولا عايزة البيت الكبير ابو جنينة

ولا عايزة المدرسة النضيفة

اللى بيعاملوا فيها الاطفال على انهم بنى ادمين مش مكن للحفظ و التلقين بس برضه مش عايزاها

لا عايزة الجو الرايق و تلج الشتا و هدوء يوم الحد ولا المواصلات الراقية و الناس اللى بتحترم بعضها

ولا عايزة المستقبل و الcareer و الحياة اللى مستنينى هناك عايزة شوارعك الزحمة و التراب بتاع العصارى

اللى محدش عارف هو جاى من شكمانات العربيات و الميكروباصات ولا من السحابة السودا

اللى هى برضه اختراع مش موجود غير هنا

عايزة دوشة الساعة 3 وقت خروج المدارس

والزحمة القاتلة اللى مبقتش بتفرق بين يوم الجمعة و يوم الاتنين عايزة اللف 3 ساعات على ركنة

لدرجة بتخلى الواحد يلعن اليوم اللى اتعلم فيه السواقة

عايزة اتفرج على الولاد الصغيريين

و هم رايحين يصلوا الجمعة مع ابهاتهم عايزة اروح البلد و اتفرج على سعاد و هى بتخبز

مين هيعملى فطير مشلتت فى اوروبا يعنى؟

و اتفرج على الفلاحين و هم بيشتغلوا فى ارضهم من الفجر بحس الفلاح منهم مرتبط بارضه اكتر من مراته و اهله يمكن عشان حتة منك

عايزة اشوف برج الحمام وقت المغربية

و اروح اسكندرية و الساحل فى المصيف عايزة ابص من البلكونة اشوف ملايين البشر بيصيفوا فى جليم

عدد مهول من الشماسى مغطى رمل البحر و بالرغم من الزحمة القاتلة الا ان الناس مبسوطة فين فى الدنيا فى كم البساطة دى؟

عايزة لما احتاج ناس الاقى اهلى كلهم حواليا عايزة لما رمضان ييجى اشوف الزينة فى الشوارع

و موائد الرحمن فى كل مكان

عايزة فى العيد اشوف البنات الصغيرة بفساتينهم الجديدة و اكل الكحك اللى معمول فى البيوت عايزة اتفرج على التليفزيون الممل و الاغانى الامل منه اللى بالرغم من سخافتها الا انها جزء لا يتجزأ من العيد بالنسبالى

عايزة اروح الحسين و السيدة و اتفرج على اللى قاعدين على قهوة الفيشاوى كبار و اطفال اغنيا و فقرا كلهم فى مكان واحد

عايزة اقرا جرايد الحكومة و اضحك على الاخبار اللى مكتوب عكسها بالظبط فى كل الجرايد التانية و اشوف صور الريس دايما متصدرة الخبر الاول مع تعظيم و تمجيد لاى حاجة بيعملها حتى لو كانت قص شريط حمام بيتهم

عايزة اتفرج على النيل وقت الشروق و اشوف الصيادين فى مراكبهم الصغيرة مع ولادهم الصغيرين عايزة اروح الزمالك و استغرب التناقض الغريب

بين رواد الnile city اللى بيسمعوا buddha bar و ركاب الفلوكات اللى مستمتعين بالاغانى الهابطة اللى بيشغلوهالهم و الغريب ان دول مبسوطين و دول مبسوطين

عايزة احبس نفسي فى البيت يوم شم النسيم من اللى بيجرى فيه بس بحبه برضه ما هو حاجة تانية مش موجودة غير هنا

عايزة لما يبقى فى ماتش لمصر اشوف شارع جامعة الدول و هو مافيهوش مكان لبنى ادم كم غير طبيعى من البنى ادمين قلبهم بيقف لما الكورة تقرب من الشبكة يمكن لأنهم عايزين يقولوا اسمك و يفرحوا بيه و خلاص حتى لو كان السبب ان فريقك كسب فى ماتش كورة

كل الناس دول بيحبوكى و مش عارفين يعملولك ايه قلبنا واجعنا عليكى و احساسنا بالعجز هيقتلنا بنشتم فيكى و ياويله اللى يأكد كلامنا و بالرغم من كده لسه قاعدين عايزة امشى بس مش قادرة و غالبا مش هقدر

ايه عملالى عمل؟

قالولى و ما قالوليش...

قالولى اعملى الخير و ارميه البحر و كانوا المفروض يقولولى اتقى شر من احسنت اليه و مش شرط ان الشر ده يكون بمعنى الاذى المتعمد الكارثة بجد لما بيكون اذى نفسي من ناس سموا نفسهم"قريبين" يا ريتهم قالولى ان قلة التقدير هى الاساس دلوقتى

و ان كتير بيشوفوا انهم ليهم حقوق مكتسبة

حتى لو كانوا ما يستاهلوش

قالولى ان الحقد مرتبط بالنفوس المريضة بس نسيوا يقولولى ان المرضى كتروا اوى لدرجة ان التفريق بين "المرضى" و اللى "مش مرضى" بقى شبه مستحيل المهم انهم بيحقدوا لمجرد الحقد بغض النظر عن وجود حاجة تستاهل الحقد ده الحقد ده احساس مدمر للى بيحس بيه ومؤلم جدا لما تحسه فى حد قريب منك خصوصا انك معندكش حاجة تخليه يحقد و حتى لو عندك فانت عمرك ما بينت ده ولا تعمدت انك تتمنظر

قالولى

ان القرايب اهم ناس فى حياتك و انهم اكتر ناس هيأثروا فيا و ما قالوليش ان التأثير ده زى ما بيكون اوقات كتير تأثير حلو

على قد ممكن يتقلب 360 درجة و يبقى مدمر

لما يسمعوا و هم مش سامعين

و لما يتكلموا من ورا قلبهم

و لما يبينوا غير اللى جواهم

كان المفروض يقولولى

ان "القرب"ده مالوش اى علاقة بصلة الدم

كتير بيكونوا "بعاد"

لكن بنحس انهم اقرب لنا من اللى المفروض انهم قريبين

قالولى خلى كلامك كله حلو و كلمى الناس زى ما تحبى انهم يكلموكى طيب لما يقولولى كلام يدايقنى هرد ازاى ؟ما انا متعلمتش اشتم كان المفروض اتعلم ان كلامى ما يكونش حلو غير مع اللى يستاهل يسمعه

كان لازم اتعلم الشتيمة قبل ما اتعلم الكلام

قالولى

متحرجيش حد

و حتى لو عارفة انه كذاب متقوليش

يمكن اتعلمت ان الذكاء هو ان الواحد يستغبى فى اوقات معينة

بس المبدأ ده معناه انى هاخد على دماغى على اعتبار انى هبلة

محدش بيستوعب الطيبة اللى من النوع ده

و فى حالتك انتى مش هيفهموا انه ذكاء

لانك عمرك ما هتوريهم انك فاهمة اكتر منهم

و انا ممكن يجرالى حاجة لو حسيت ان اللى قدامى بيستقل بعقلى

اعذرينى...بس انا مش هقول غير اللى انا شايفاه

مش بعرف اجامل... ولا عايزة اتعلم

قالولى اسألى و اهتمى و جاملى عشان دى واجبات لازم تتعمل و ما قالوش ان ما حدش بيعمل حاجة من قلبه دلوقتى واللى بيعمل كده مرة بتبقى غلطة مطبعية انا مش بستنى حاجة من حد لكن فى حد ادنى فى اى علاقة انسانية صداقة او غيره لو ما كانش موجود يبقى قلتها احسن

قالولى ان الموت ده اصعب حاجة ممكن تحصل فى الدنيا انا مش شايفة كده خالص بالعكس ممكن يكون صعب لما يبعد عنى اللى بحبهم لكن لما يبعدنى انا معتقدش ابدا انه هيبقى أصعب عليا

من الدنيا اللى مش مفهومة نهائى بالنسبالى دلوقتى

قالولى انك رحت فى مكان احسن و انا عارفة و مقتنعة بكده بس ما قالوليش انك هتوحشنى للدرجة دى

و لما انا حاسة بكده دلوقتى امال لما...هيحصلى ايه؟

قالولى

الحب زى الهوا و لازم هيعدى عليكى فى يوم بس مقالوش انه بقى هوا ملوث بالتفاهة و الهيافة تفاهة اللى بيحبوا على اغانى تيمو و هيافة اللى فاكرين الحب كلام و دباديب و ورد احمر و خروجة الفالنتين كان لازم يفهمونى انه لعبة ماليش مكان فيها بس يفهمونى ازاى و هم مش فاهمين؟

قالولى ان فى ناس لازم يكونوا قريبين منك و لازم اللى فى قلبك يطلعلهم هم بس و ما قالوليش ان مفيش حاجة اسمها "لازم" فى الدنيا فى حاجات بتفضل جوه عشان ده مكانها و عشان لو اتقالت مش هتتفهم و لو اتفهمت محدش هيعرف يحلها غيرى و لو اتحلت هتتحل من وجهة نظرهم هم يعنى فى الحالتين مش هوصل لحاجة يبقى على ايه وجع القلب من الاول؟

انا عارفة انه كلام مش مفهوم بس هو مفهوم اوى بالنسبالى

الى من اسرت كلماته قلبى

ناس كتير بتحب الشعر و بتتأثر بالكلام الحلو مش شرط يكونوا شعراء ولا حتى كتاب او ادباء ناس عاديين جدا بس بيتزوقوا الشعر و بيحسوا بكل كلمة فيه انا مش الناس دى نهائى شاعر واحد بس اللى عرف يعمل فيا كده لدرجة تخلينى افضل يومين كاملين بقرا دواوينه و مش قادرة ابطل...ولا عايزة الشاعر ده هو فاروق جويدة كلام بسيط و فيه عمق غريب بيوصف احاسيس راقية و بريئة و فى نفس الوقت صادقة لدرجة انها لازم تدخل القلب بسرعة الصاروخ حسيت كأنه بيتكلم عن حب تانى غير اللى اعرفه و بشوفه حواليا و اللى مش بيحس بكلامه يبقى اكيد عنده مشكلة مش هرغى كتير انا هحط شوية من الابيات اللى عجبتى

قد تسألين الان: ما اقصى المنى؟ قلبى و قلبك حين يلتقيان انى اعاتب فيك عمرى كله يا ليت عمرى كان فى امكانى (من قصيدة اعاتب فيك عمرى)

انا عابد فى رحاب الجمال رأى فى عيونك ما اذهله يقولون فى القتل ذنب كبير و قتل المحبين...من حلله؟ (من قصيدة حلم)

من الف عام... عشت ارسم فى خيالى صورة امرأة يخبئها القدر كانت تطوف مع الليالى كلما سقطت طيور العمر و اندثرت كأوراق الشجر تبدو بلون الفجر احيانا... بلون الحزن احيانا... و حين تغيب يختنق القمر فيه لهيب الشمس... فيها سكرة الامواج... فيها لهفة الارض الحزينة لارتعاشات المطر و الان جئتك كالغريق... و كل ما ابغيه من عينيك... طوق النجاه ما زال فى الايام شئء من رحيق فاحمليه الان بين يديك عمر الحب ما احلاه و لتسكرى من نشوة الشوق المسافر فى جوانحنا فبعض العشق يا عمرى صلاة (من قصيدة امرأة من الف عام)

و توقف الزمن المسافر فى دمى... و تعثرت فى لوعة خطواتى و الوقت يرتع...و الدقائق تختفى فنطارد اللحظات...باللحظات ما كنت اعرف و الرحيل يشدنا انى اودع مهجتى...وحياتى ما كان خوفى من وداع قد مضى بل كان خوفى من فراق ات لم يبق شيء منذ كان وداعنا غير الجراح تئن فى كلماتى لو اننا لم نفترق... لبقيت فى زمن الخطيئة توبتى و جعلت وجهك قبلتى...و صلاتى (من قصيدة لو اننا لم نفترق)

انى لأعرف ان حبك لم يزل ينساب كالانهار فى عمرى و يورق كالشجر و بأننى سأظل ابحر فى عيونك رغم ان الموج ارقنى زمانا ثم فى الم غدر و بأن حبك... مارد كسر الحدود... و اسقط القلب المكابر...و انتصر انا لم اكن ادرى بأن بداية الدنيا لديك... و ان اخرها اليك... و ان لقيانا قدر (من قصيدة رحلة النسيان)

و دى اكتر قصيدة بحبها: يقولون عنى كثيرا... كثيرا و انت الحقيقة لو يعلمون لأنك عندى زمان قديم و افراح عمر...و ذكرى جنون و سافرت ابحث فى كل وجه فألقاك ضوءا بكل العيون يهون مع البعد جرح الامانى و لكن حبك لا...لا يهون احبك بيتا تواريت فيه و قد ضقت يوما بقهر السنين تناثرت بعدك فى كل بيت خداع الامانى...و زيف الحنين كهوف من الزيف ضمت فؤادى و اه من الزيف...لو تعلمين اذا ما تهاوت قلاع النجاه و لو دمر الزيف عشق القلوب لما عاش فى الارض عشق سواه دعينى مع الزيف وحدى بسيفى و تبقين انت المنار البعيد و تبقين رغم زحام الهموم طهارة امسى...و بيتى الوحيد اعود اليك اذا ضاق صبرى و اسقانى الدهر ما لا اريد (من قصيدة و انت الحقيقة لو تعلمين)

مش بس اشعاره اللى عن الحب اللى بتأثر فيا دى اجزاء من قصيدة اسمها ماذا تبقى من بلاد الانبياء عن الذكرى الخمسين لاحتلال فلسطين: حتى السماء الان تغلق بابها سئمت دعاء العاجزين... و هل ترى يجدى مع السفه الدعاء؟ فى حانة التطبيع... يسكر الف دجال...و بين كئوسهم تنهار اوطان...و تسقط كبرياء و يطل وجه محمد يسرى به الرحمن نورا فى السماء الله اكبر من زمان العجز... من وهن القلوب...و سكرة الضعفاء ما زلت احلم... ان ارى فى القدس يوما صوت قداس يعانق ليلة الاسراء و يطل وجه الله بين ربوعنا و تعود...ارض الانبياء

و ده جزء من قصيدة فى حب مصر اسمها حنين: يا مصر...يا قبلة العشاق...يا وطنى كل الامانى مضت...و بقيت لى سندى

شعره فيه كم غير طبيعى من الكبرياء ده جزء تانى من قصيدة حلم:

فخير الخلائق شعب عنيد اذا ما ابتدا حلمه...اكمله و من قال ان البكا كالصهيل و عدو الفوارس كالهرولة؟ سلام على كل نسر جسور يرى فى سماء العلا منزله

و دى ابيات من قصيدة اسمها متى يفيق النائمون: و الناس من الم الفجيعة يضحكون فى صورتين تباع اوطان...و تسقط امة و رؤوسكم تحت النعال...و تركعون!! لن يرحم التاريخ يوما من يفرط... او يخون

و دى ابيات من قصيدة حتى الحجارة اعلنت عصيانها: يا الله...انت الحق...انت العدل... انت الامن فينا... و الرجاء لا شئء غيرك يوقف الطوفان هانت فى ايادى الرجس ارض الانبياء حجر عتيق من زمان النبل يلعن كل من باعوا شموخ النهر فى سوق البغاء قد علموا النهر المكابر كيف يأنس للخنوع... و كيف يركع بين ايدى المستحيل؟! سأعود يوما حين يغتسل الصباح البكر فى عين الندى... قولوا لهم: بين الحجارة عاشق عرف اليقين على ضفاف النهر يوما فاهتدى...

و ده جزء من قصيدة اسمها شاعر فى المزاد: مات الفوارس و انتهى زمن البراءة...و الترفع...و العناد من يشترى قلما حزينا داميا رفض التنطع و التدنى و السكوت؟ و يطل من اعماق هذا الليل وجه غاضب و بكل سطر فى ملامحه الم سيقوم من صمت التراب و يرفع الايدى التى سكنت و يمسك فى اصابعه قلم و يعود يكتب من جديد فوق جدران الهرم "اقرأ و ربك الاكرم الذى علم بالقلم علم الانسان ما لم يعلم" بس مين يفهم؟

يتربوا فى عزو

لقيت فيه صور فتى احلامى الأزعة بتاع الحديد اللى بيزعق للنواب و يقولهم ايه ده؟ فيرجعوا فى كلامهم عشان ما يزعلوهوش مربيهم يعنى مش بيهرج فقلت اجيبه هنا عشان يفضل قدامى على طول رحمتك يا رب

خمسة فلسفة ..."اشكال من الجنون"

مجنون

اللى يفتكر انه فاهم كل حاجة فى الدنيا

و ان محدش هيعرف يضحك عليه

مجنون

اللى مستنى حد يمشيله حياته

و مجنون

اللى عايش مشرف على حياة الناس

و هو محتاج اللى يشرفله على حياته

مجنون

اللى يفتكر انه احسن من غيره عشان هو لابس سينييه و "غيره" لابس ماركة وكالة البلح

مجنون

اللى يعيش لنفسه و يفتكر ان ده ذكاء

مجنون

اللى يضيع عمره ورا اوهام هو مسميها احلام

لكنها بعيدة تماما عن الواقع

مجنون

اللى قعد على القهوة و رمى حلمه فى البحر

عشان هو اكسل من انه يحققه

مجنون

اللى عايز نصيحة متفصلة على اللى هو عايز يسمعه

مجنون

اللى عايز يشوف الناس كلها نسخ منه

و دماغهم نسخ من دماغه

مجنون

اللى يتخلى عن طموحه عشان فشل مرة

مجنون

اللى بيضيع حياته فى الحقد على خلق الله

مجنون

اللى بيفرح بكلام هو عارف انه ميستاهلوش

و مجنون

اللى يقول كلام من ورا قلبه

عشان يوصل لكرسى ولا لمنصب

مجنون

اللى بيدى نفسه الحق يشكك فى نوايا الناس و فى قلوبهم

مجنون

اللى بيرمى نفسه فى النار

و يقول مشيت ورا احساسى

مجنون

اللى بيخلى حياته باردة مفيهاش مشاعر حلوة

و يقول انا عاقل

مجنون

اللى مش بيعترف بغلطه و بضعفه...بحزنه

و برغبته فى ان دموعه تنزل

مجنون

اللى بينسى ان اسمه من "الانسانية"

و ان له رب اقرب له من وريده

و مجنون

اللى بيبص على الناس من فوق

و فاكر انه هيفضل فوق على طول

مجنون

اللى فى ايده يساعد و بيرفض

مجنون

اللى تاعب نفسه و لسه بيدور على ربنا

بالرغم من انه موجود فى كل حاجة حواليه موجود و مستنيه يفتح قلبه...

الايمان احساس و الاحساس مش محتاج اثبات ولا ادلة

مجنون

اللى ناقم و غضبان على مصر عشان ما خدش منها حاجة مع ان اكبر حاجة عملهالها انه جاب كرسى و قعد على القهوة

مجنون

اللى ضيع اكتر من 5 دقايق من حياته فى ندم

على انه عرف ناس متستاهلش لما هم ميستاهلوش ليه بتديهم حجم اكبر من اللى يستحقوه؟

مجنون

اللى عايز يبان ذكى طول الوقت الذكاء بيستدعى احيانا انك تستغبى فى مواقف معينة

مجنون

اللى يخسر صداقة عشان قصة حب

مجنون

اللى يهين كرامته عشان اللى بيحبه

مجنون

اللى فاكر ان الدموع و الالم مرتبطين بالحب الحب بيسعد و بيقوى لا بيضعف ولا بيكئب و على رأى الست "الحب عمره ما جرح"

و اكبر مجنون

اللى بيدور على الحب فى الزمن الاسود ده

كسرت الطوق...

لا ليس طوق الياسمين الذى صنعه نزار لحبيبته فلا هو من الياسمين و لاهو هدية عاشق لمعشوقته فهو طوق من حديد وضعه مجتمع بالى بتقاليده العقيمة و فرض على و على كل بنات جنسى طوق يربطنا بالارض حتى اذا ما جرأت احدانا و رفعت رأسها تجده يجذبها الى مكانها الطبيعى مرة اخرى فمكانها هو الارض... طوق من التابوهات المحرمة طوق تراكمت عليه الممنوعات و المحظورات حتى ملأه الصدأ ممنوعات وضعوها من فقدوا عقلهم و ضعفت حجتهم فلم يجدوا غير المنع و القمع و التحريم سبيلا فاصبح مجرد التفكير فى التخلص منه دربا من الجنون فلا شمشون الجبار ولا هرقل بطل الاساطير يقويان على كسره و تراكمت الممنوعات و تكاثرت الى ما لا نهاية فلا تتحدثن فى السياسة فانتن اجهل من ان تفهموا خباياها ولا تجادلن فيما يقال لكن فليس للجوارى على اسيادهن حق الجدال لا تتدحثن فى الدين فهو موجود لقهركن لا تسألن عن الجنس فهو ملك للرجل... مثلكن تماما تمادت من فكرت منكن ان تجادل او تناقش كفرت من سعت وراء طموح او حلم بعيد او حتى قريب و عاهرة هى كل من حاولت فهم سر من اسرار الحب احكام مسبقة و قوانين اكل عليها الدهر و شرب قواعد ولدت و استمرت و لم اعد اعرف سبب وجودها حتى الان هل هو ظلم الاسياد ام اذعان الجوارى ايا كان السبب فأنا اعلم بأن الارض لم و لن تكون مكانى فأنا لم اخلق لأكون دمية فى مسرح لست انا مخرجته سأسال و اعرف و اجرب و احلم فالسياسة لعبتى و لعبة كل النساء و الدين فى قلبى قبل عقلى اما الحب و اسراره فأنا اعرفه و اعرفهم جميعا منذ ولدت مثل كل بنات حواء منا من اختارت ان تختبئ فى الظلام بين خجل و خوف و منا من عرفت طريقها الى النور اما انا فلن اخجل من اظهار حبى لمن سأسمح له بامتلاك مفتاح قلبى فليس فى الحب الذى اعرفه مكانا لخجل فالحب عندى طهر و نقاء و ليس ذنبى انهم لا يرون فيه الا الشهوات و الرغبات فأنا لست نعامة ضمن قطيع النعام

الذى خلق من الخوف و تغذى على الظلام فالنور مكانى

و السماء هدفى

و الحرية مائى و هوائى لن اكون جزئا من مجتمع يحكمه الطاووس و تدفن فيه النعامة فمن كانت مثلى تجد مكانها مع الطيور فى اعلى السماوات وليس مع من يدفن رؤوسهن فى الرمال فليس احب الى قلبى من كلمة "لا" و ليس اقرب نفسي من التمرد على ما لا يرضينى و انا لست بهرقل ولا شمشون فلن اسمح بدفن انوثتى و لن ارضى عنها بديلا و مع ذلك يا مجتمعى العزيز...فأنا كسرت الطوق

مذكرات مفروسة (2)

مش عارفة من امتى و الشارع ده بقى حكر على الرجالة بس الحقيقة

و مش عارفة مين اللى ادى الحق لواحد

انه يتفرج على اللى رايحة و اللى جاية

و مش بس بيتفرج

ده بيدى نفسه الحق انه يعلق و يتكلم و يقول رأيه اللى محدش طلبه منه اساسا

و هو متخيل ان البنت او الست اللى ماشية دى هتسمعه و هترد مثلا

مش عايزة حد يقولى ان المعاكسات دى مرتبطة بلبس البنت

لأنها ملهاش علاقة

المحجبة بتتعاكس زيها زى اللى مش محجبة

و لو افترضنا انها بتتعاكس عشان لابسة ضيق

يبقى ايه المبرر لمعاكسة واحدة منقبة؟

انا اعرف واحدة منقبة و عندها 50 سنة و ماشية فى حالها فى الشارع

فجاة لقت واحد قد ولادها راكب عجلة و بيلف من حواليها

بس عشان يقولها عينيكى حلوة

يعنى تعمل ايه فى نفسها؟

تلبس نضارة من بتوع الطيارة دول و تمسك عصاية عشان تعرف تمشى؟

امبارح كنت راكبة العربية مع ماما بالليل و ماشيين على كوبرى اكتوبر

شوية شباب روش قرروا انهم يستظرفوا

و النتيجة نص ساعة متواصلة من المطاردات

و فى الاخر خدوا ايه؟ولا حاجة...صباح التفاهة يعنى

المهم اننا بعد ما وصلنا البيت و كان معانا كم مهول من الشنط و الاكياس

الاقى ما لا يقل عن عشر عمال واقفين بيتفرجوا علينا

قال يعنى سعاد حسنى و نادية لطفى ماشيين

و مع انى طبعا مكنتش مستنية ان حد منهم يتطوع و يساعدنا

لانى فقدت الامل من زمان

لكن على الاقل سيبونا فى حالنا

مش معقول ان اى انثى معدية يبقى مباح و مقبول انها تتعاكس

و كله كوم و الجمل العجيبة الغريبة اللى بتتقال دى كوم تانى

مرة اسمع عسكرى محترم بيقول" انا عايز اتجوز بقى ودونى لأمى"

و مرة ابقى سايقة و مش باين منى غير وشى

و الاقى عامل اهبل بيوقفنى عشان يعدى عربية الرمل

و هو بيعدينى الاقيه بيقولى بابتسامة هبلة "مش كنتى تخليكى معانا شوية؟"

طيب اقوله ايه ده؟

ده غير اللى بيبقى ماشى و جنبه بنت ولا حتى ماشى مع مراته

و يتدور يعاكس و يلعب حواجبه على اساس انه أحمد رمزى زمانه مثلا

و لا "يا عسل" و" يا فاكهة الصباح"

و اخر واحدة دى لسه سامعاها يوم الخميس اللى فات

مش عارفة بيجيبوا الكلام ده منين

و "يا عسل" دى بتجيبلى انهيار عصبى حاد لوحدها

و اللى بيضحكوا بجد اللى بيبقوا فوق ال60 و ال70

و لسه فيهم نفس يعاكسوا

و دول معاكساتهم بتبقى مفضوحة جدا

لأنهم على ما بيبصوا و يركزوا

و يرجعوا يعدلوا رقبتهم تانى بتبقى امة لا اله الا الله خدت بالها

ولا الشاب الكول اللى بابى و مامى جايبينله عربية بس عشان يصيع بيها بالليل

و الفلاشر اللى بيشتغل مع حركات استعراضية بهلوانية

بس عشان يقول انا بعرف اسوق

مش مهم بقى البنت اللى سايقة دى تشوف ولا تخبط فى عمود ولا فى الرصيف

المهم انه يثبت وجهة نظره اللى انا لسه مكتشفتهاش

بس ان شاء الله هعرفها قريب

المصيبة اللى بجد

انهم مش شايفين ان ده متعارض مع الشهامة

اللى علمونا انها المفروض تكون موجودة فى الراجل

او بمعنى اصح اللى هى اساس الرجولة

يعنى لما الاقى سواق تاكسى مركب معاه واحد عربى

و ماشى ورا عربية فيها بنات

و بيعمل مغامرات عشان يفضل وراهم ارضاء للبيه اللى راكب معاه

و الشيء اللى راكب ده مطلع فلوس و عمال يشاور بيها للبنات

و المعنى واضح بيتهيألى

و السواق مش شايف ان فيها حاجة خالص و مكمل عشان يرضى الزبون

ده غير الكلام السافل و الايحاءات الجنسية

من غير تفريق بين البنت و الست و حتى الطفلة

كارثة بجد ان يبقى فى رجالة بالشكل ده فى الدنيا

ناس بتخلى فكرة النزول فى الشارع مغامرة عظيمة

لأ مخاطرة كمان من كم الاهانات و الكلام اللى ملوش اى لازمة اللى بنسمعه

و مع ان لا دول ولا مليون واحد زيهم هيقعدونى فى البيت

بس بجد اتخنقت