الجمعة، 9 يناير 2009

مترادفات..

ذكرى نغزة فى قلبى تخبرنى بان هناك شيئ ما غير طبيعى محاولات مستميتة من صديقتى الصغيرة لابعاد هذه الافكار السوداء عن رأسي عودة مبكرة من رحلة شرم الشيخ المدرسية امى تنتظرنى بملابس سوداء و عينان تتحركان فى كل الاتجاهات فى محاولة فاشلة لاخفاء دموع غزيرة نغزة اخرى فى قلبى تخبرنى بالا اصدق سوى احساسي
****
حواديت متعتى فى مراقبة المشاة فى شوارع القاهرة المزدحمة دائما فالكناس ذو البدلة البرتقالية المزعجة و بائعة المناديل على ناصية شارعنا و المجنون الذى يحمل صندوقا ثقيلا فوق ظهره لا يتركه ابدا منذ سكنا فى هذا الحى و العجوز الضعيف الذى كلما رأيته اتأكد باننى قريبا ساعرف خبر موته فيفاجئنى بصمود غريب و تمسك اغرب بالحياة و الفتاة التى تظهر من جسمها اكثر مما تخفى فيخبرنى حدسي بانها "مش ولا بد" فتلتقى عينى بعين صديقتى فنتشارك فى ضحكة طويلة على الحاسة السادسة التى تمتلكها كل انثى كلهم يؤكدون لى بان وراء كل عينان قصة تستحق ان تروى فى فيلم مستقل
**** انكسار
كانت سعيدة..و كان هو اسعد
نظرت الى عينيه مباشرة..
فاقترب استعدادا لكلام كرره بينه و بين نفسه حتى مله
قالت:عندى حاجة اقولهالك
قال:و انا كمان
قالت:انا اتخطبت
قال:و انا (كنت) هخطب
****

موقف كان كبير..و كنت انا صغيرة كان مدرس..و انا كنت تلميذة كان لابس جلابية قديمة..و انا لابسة مريلة جديدة كان بيمشي بعصاية..و انا بمشى على رجلى كان اعمى..و انا كنت بشوف الحمد لله

****

حلم
بحلم بمصر اللى اتغزل فيها جويدة
و ضحوا عشانها بحياتهم فى 73
و حلم ليها جاهين
و غنى لها عبد الحليم
و اتمناها مجدى مهنا
و بكوا عليها فى 67
و اتكلم عنها عادل امام فى يعقوبيان
و طلع منها محفوظ و ام كلثوم و توفيق الحكيم و السادات
و كتب فيها سيد حجاب احلى قصايده
امتى هشوفها كده؟
****

اوراق

تذاكر حفلات الموسيقى العربية
تذكرة طيران للاقصر فى تالتة اعدادى
شهادة تانية ابتدائى بخط مدام حسيبة الله يرحمها
صورة قديمة لينا احنا التلاتة من ايام اعدادى
ايام ما كنا بننكش شعرنا و يجيلنا نفس نتصور
و الادهى اننا كنا بنشوف نفسنا حلوين!
اهداء ليا على اول صفحة من كتاب قديم
اوتوجراف ايام الحادث المؤلم بتاع رابعة ابتدائى
شهادة تقدير من المدرسة
تذكرتين سينما و تذاكر قطر اسكندرية
ورق امتحانات اولى اعدادى اللى بتثبت فشلى الذريع فى الجبر
كارت معايدة او اعتذار..مش فاكرة بالظبط
شهادة البكالوريوس
عقد عمل لمدة سنة
ازاى حياة البنى ادم ممكن تتلخص فى شوية اوراق؟!
****
ناس
لم يكن يعرف طعما للنوم الا و هو فى حالة سكر مستعصية
فاصبح لا يهنأ له بالا الا بعد صلاة العشاء
****
كانت من اشد المدافعين عن حقوق المراة
و الان فقدت روحها فى بيت زوج انانى..مريض
لا يرى فى الكون ما يستحق الاهتمام سواه
****
كان يبكى فوق قبرها اياما متواصلة
دون ان تنجح محاولتهم المستميتة لتهدئته
و بعد اقل من سنتين تزوج من امرأة اجنبية
****
كانت تؤكد انها لن تتزوج الا عن حب
الان مضى على زواجها منه عشرون عاما
امضت نصفهم نائمة على اريكة صغيرة فى غرفة المعيشة
****
حقيقة The closer you get.. the harder she'll push you away
****

قرار

قررت التوقف عن التذمر
عند سماع صوت المنبه الكريه فى السادسة فجرا
و التفرغ للاستمتاع بهدوء الشوارع
و ندى الصباح
و لسعة برودة الصبحيات فى شهر يناير
حلو نص الكوباية المليان

هناك 6 تعليقات:

blue-wave يقول...

المشكله فى كلامك انه عميق اوى
وعلشان كدا مش بقدر ابدا اقرا البوست كله مرة واحدة

mUsLiM يقول...

موضوع جميل الحقيقه بس مش من النوع اللى يخلينى أرد فيه

بس هارد علشان خاطرك يا أختى

علشان أسلم عليكى بس

وخلى بالك من العمق فى الكلمات لحسن نغرق بعد كده :)

هههههه

متنسيناش من دعاكى

وان شاء الله ربنا يعملك الخير حيث كان

ونسألكى الدعاء

والله من وراء القصد

السلام عليكم

leeno يقول...

من كتر ما بستمتع بكلامك

مبقدرش اعلق عليه

بحب عمقه بصراحة و بتخليني اسرح لدرجة اني بنسى كنت عايزة اقللك ايه


بجد انا بعزك جدااا

Yasmine يقول...

blue wave
ايه الكلام الكبير ده بس :)
ده من ذوقك يا دكتور والله

Yasmine يقول...

مصعب

هههههههه
بتتريق عل كلامى العميق حضرتك :))
اصلى زهقت بجد من السياسة و الكلام فيها فقلت اغير نشاطى مؤقتا

اولا حمد الله على السلامة
ثانيا سيبك من كلامى العميق انا عايزة اعرف اخبار دبى
و على فكرة مش هتنازل عن هدية من اول مرتب انا عارفة ان الشوبينج فى دبى حلو اوى :)

ربنا يوفقك يا مصعب ان شاء الله و ترجع بالسلامة

Yasmine يقول...

leeno
يا حبيبتى ربنا يخليكى يا رب
قولى لمصعب بقى عشان مش عاجبه:)

احساس متبادل والله..هو انتى مش بتنزلى مصر خالص؟ انا بجد عايزة اشوفك جدا